Tôwarzistwo Piastowaniô Ślónskij Môwy "Danga" - Nowina dlô prasy
6/2008
„Z połedniowyj stróny dostympu bróniła rzyka Sumina, szyroko rozlotô
po barzolatych łónkach“
W Górkach w gminie Nyndza postawiyli bezmała piyrszõ tabulã po
ślónsku na świecie!
Górki/Górki Śl. Tak po prawości, to niy ma nic dziwnego ani
niezwykłego w tym, iże w gminach sóm stawiane tabule z informacyjami
dlô gości i turystów. Tyż wieś Górki w raciborskim krysie mô òd
krótkigo czasu takõ tabulã, co turysta może sie ś nij dowiedzieć,
jak Górki powstały. Ta to blaszannô tabula rozeznôwô sie òd inkszych
bez to, iże bôjka ò zaczóntku Górek jest na nij napisanô we trzech
môwach wrôz: po polsku, po niymiecku i… po ślónsku!
Idejô ślónskij tabule wylóngła sie w gowie sekretôrza Tôwarzistwa
Piastowaniô Ślónskij Môwy „Danga“ Hajnela Postawki (Henryk
Postawka), kiery sie tukej we wsi òżyniył i òd tego czasu sam
miyszkô i zarôbiô na życie jako rechtór môwy angielskij w gimnazjum
w Rybniku. Tyn prawdziwy poliglota, co poradzi dobrze rzóndzić tyż
po włosku, jest – jakby sie dziś powiedziało – zapôlónym historykiym
regiónalnym, kiery prowadzi òd roku 2006 strónã internetowõ
ò Górkach (adresa w internecie: www.postawka.go.pl), i wydôwô wrôz
z fojtym jónkowickim gazytkã „Oblicza wsi“. Jest (spół)autorym
niekierych bardzo wertownych inicjatywów, takich jak òchróna
dymbowyj aleje abo postawiynie piyrszyj tabule z òpisym wsi (stoi
óna òd siyrpnia kole góreckij szkoły).
Legynda ò tym, jak powstała wieś, to jest bezmała nôjbarzi upodobany
projekt Hajnela Postawki. Spisôł ón jóm nôprzód po angielsku,
a potym se umyślół, żeby przełożyć jóm na tela różnych môwów, jak
sie ino dô. Na jego strónie idzie se jóm przeczytać w dwanôstu
môwach, w tym blank „egzotycznie“ – po grecku abo dolnołużycku –,
a zaniedugo pokôże sie tam jeji kaszubskô wersyjô. Legyndã ò Górkach
przełożył na ślónski znany autor ślónskich rozprôwków i wice-Ślónzôk
Roku Bogdan Dzierżawa z Chwalyncic (znany skirz swojich
ksiónżek „Utopek z Wielopola“ abo „Z biegiem Rudy“).
Hajnel Postawka òbiecuje, że to dziepiyro poczóntek „wieku ślonskich
tabulów“ w jego òkolicy: „Ważne jest, żeby ślónskô môwa tych strón
wylazła z chałup na drógi i place w naszych wsiach i miastach i żeby
jóm było niy ino słychać ale tyż widać i żeby nasi Ślónzôcy mógli se
jóm mieć za coś“. Tôwarzistwo Danga mô wielkõ nadziejã, iże inksze
ślónskie gminy weznóm se z Górek przikłôd.
Góreckô legynda po ślónsku to bezmała piyrszô takô tabula na całym
Górnym Ślónsku. Mô óna służyć niy ino jako „ciekawostka“ turystóm,
ale tyż tutecznyj ludności mô przipóminać ò korzyniach i ò staryj
môwie Górczanów. Fóndatorami tabule sóm gmiński urzónd
i „Stowarzyszenie Sumina na Rzecz Odnowy i Rozwoju Górnego Śląska”.
Tôwarzistwo Piastowaniô Ślónskij Môwy „Danga”
Wiyncyj ò tabuli może Wóm porozprawiać Hajnel Postawka (Henryk
Postawka), tel. 0 509 608 145, e-mail: postawka@gmail.com
www.postawka.go.pl/
