Dodaj do ulubionych

"Ślonzok fikcjom" - tragikomedyjo.

21.06.11, 20:58
"Ślonzok fikcjom" - tragikomedyjo.

Roztomajcie we realu richtig ło tym prawiom
Jedni widzom go Polokym, inksi Niymcym jawiom
Dwie nacyje dlo Ślonzoka mustrym tu być miały
Dyć po prowdzie, richtig łobie za gorszego miały

Ano - było, jest - czy bydzie? -Leci historyjo
Dyć jo szkryfnońć chca wom prawie z Neta komedyjo
Jak roz istny Bolek Broda - pewnikym go znocie
"Fikcjom" łostoł w "naszy-klasie" - wcale niy skiż pociech

Czy kajś zgobioł? -Czy uciyrpioł skiż kunsztu ślonskego?
Boł za wiela wrazidlaty? -Trzimoł sie swojego
"Fikcjo" zdo sie jako sztrofa dlo obywatela
Stalking z tego już zaziyro? -Możno chnetko tela.
--
Ruda Śląska - stolica fraszki
Edytor zaawansowany
  • broneknotgeld 21.06.11, 20:59
    Sztuka na piontka

    Piontka postaci w sztuce poznocie
    Piyńć palcow tako u ryncow mocie
    Bolek ze Hyjdlom forum zbudujom
    Ignac z Hajnelym tymu dziwujom
    Bydzie tyż Admin - szycha we Necie
    Tela wystyknie - wiyncy niy checie.
    --
    Ruda Śląska - stolica fraszki
  • broneknotgeld 25.06.11, 22:28
    Materiały źrodłowe:
    nk.pl/#forum/17/977/63
    nk.pl/#forum/17/977/64
    --
    Ruda Śląska - stolica fraszki
  • broneknotgeld 21.06.11, 20:59
    Admin

    Szycha we Necie - w portalu władza
    Toż niy na darmo go tukej wsadza
    Dość wiela może - czy robi wiela?
    Dyć łodpowiado za swoja sztela

    Duchym portalu jakby sie zdowo
    Kej łon niyherski czy rośnie zdrowo?
    Ech, łod Admina wiela zoleży
    Tymu naprowdy możecie wierzyć.
    --
    Ruda Śląska - stolica fraszki
  • broneknotgeld 21.06.11, 21:00
    Bolek

    Klasowicz prawie we tym portalu
    Kery społecznościowym sie miyni
    Niy medykuje ło jakimś "Graalu"
    Bo przeca twardo łazi po ziymi

    Szkryflo na forach, "profil" buduje
    Wolontariuszy staro podźwigać
    I ślonsko godka tako promuje
    Jako poradzi - niy chce w tym migać.
    --
    Ruda Śląska - stolica fraszki
  • broneknotgeld 21.06.11, 21:04
    Hajnel

    Istny durś kuko na ślonske fora
    Czegosik szuko tam niy łod wczora
    Kajniykaj szkryflo sie po naszymu
    Poradzi piyknie dać coś do rymu

    Po prowdzie jednak - woli dziwować
    Niż cołko dusza czymuś łoddować
    Gafto ze bliska, niy ze daleka
    Zdo sie na cosik jakby durś czekać.
    --
    Ruda Śląska - stolica fraszki
  • broneknotgeld 21.06.11, 21:22
    Hyjdla

    A dyć, ślonsko frela - gorko jeji dusza
    Chciałaby w portalu niyjednego ruszać
    Coby pomog ciongnońć wszystko w strona zocno
    Łona za tym stować zowdy bydzie mocno

    Ktoś dobrym chce dzielić - wspiyrać we tym bydzie
    Choć leko z tym niy ma, roztomajcie idzie
    Hyjdla sie niy poddo nawet jak fest tropi
    Kto mo ślonsko dusza pewno jom spokopi.
    --
    Ruda Śląska - stolica fraszki
  • broneknotgeld 21.06.11, 21:35
    Ignac

    Chce coś zrychtować na ślonskim forum
    Mo nawet "fanklub" echt-romantyczny
    Dyć sie niy widzi mu kyns humoru
    W gowie durś jakiś muster liryczny

    Lipsty łon ciyngym w portalu szuko?
    Zdo sie tym kilać niyjedna frela?
    Czy richtig za "M" kajniykaj kuko?
    Keroś sie doczko ze niym wesela?
    --
    Ruda Śląska - stolica fraszki
  • broneknotgeld 21.06.11, 22:31
    Wstymp - na łobroz to za mało
    Dyć se tako zaczynało
    Trefioł koncept do Admina
    Czy mo forum cosik z kina?
    --
    Ruda Śląska - stolica fraszki
  • broneknotgeld 21.06.11, 22:57
    Szanowna Administracjo

    For w Waszym portalu jest naprawdę wiele
    W różnorodnych działach są poukładane
    Chcę jedno założyć - na to się ośmielę
    Czy sukces odniesie? -Może będzie dane

    Widać w "naszej-klasie" fora konkursowe
    Właśnie takie prawie po głowie mej chodzi
    Może założycie kategorie nowe
    na konkurs, plebiscyt co zabawę rodzi?
    --
    Ruda Śląska - stolica fraszki
  • broneknotgeld 21.06.11, 23:06
    Szanowny Panie

    Kategorii nowych się nie przewiduje
    Założyć Pan może forum konkursowe
    Radzę wybrać "Inne" - to pewnie spasuje
    Ciągle się tam tworzą fora całkiem nowe.
    --
    Ruda Śląska - stolica fraszki
  • broneknotgeld 21.06.11, 23:16
    Szanowny Adminie

    Dzięki za odpowiedź - forum więc otworzę
    Aby promowało tych co dobrem dzielą
    W rozkręcenie tego nieco trudu włożę
    Posty śląskim rymem tam wątki zaścielą.
    --
    Ruda Śląska - stolica fraszki
  • broneknotgeld 22.06.11, 08:48
    Łobroz piyrszy - w kerym forum
    Mo coś z fraszki, ze humoru
    Dyć rozkulać tako musi
    Rym konceptu niy zadusi.
    --
    Ruda Śląska - stolica fraszki
  • broneknotgeld 22.06.11, 08:49
    Bolek

    Roztomili - forum nowe
    We portalu kery rośnie
    Kuknie tu niyjedyn czowiek
    Szkryfnie Ślonzok coś radośnie

    Sztela mo nagrodzie służyć
    Jako tym co dobro niesom
    Bliźnim nawet we czas burzy
    Zocne dusze jejich cieszom

    Roztomili - toż wspiyrejcie
    Ta ideja, tako forum
    Posty swoje tu dowejcie
    Trza radości i humoru

    Dziynki wom niychej rozkwitnie
    To co ślonske, to co nasze
    Co złe niychej kajsik citnie
    Forum biercie jako wasze
    --
    Ruda Śląska - stolica fraszki
  • broneknotgeld 22.06.11, 08:50
    Hyjdla

    Bolek - zocno to ideja
    Trza nagrodzać dobrodzieja
    Mieć go w zocy zowdy trzeba
    Jako tyn pecynek chleba.
    --
    Ruda Śląska - stolica fraszki
  • broneknotgeld 22.06.11, 08:50
    Bolek

    Hyjdla - ciynżko to rozkulać
    Jo niy byda ło tym fulać
    Dyć jest fraszka - poradzymy
    Forum blyśnie ślonskim rymym
    Możno styknie promocyji
    Kunszt we ślonski komedyji
    Jo sie ło to prawie starom
    Ślonski rym jest dlo mie miarom
    Na nic colsztok z myjtermasym
    Fraszka wsparciym w take czasy.
    --
    Ruda Śląska - stolica fraszki
  • broneknotgeld 22.06.11, 08:58
    Hyjdla

    Oby ze tym sie udało
    Forum bydzie radowało
    Przidom inksi - swoje dadzom
    Z godkom tukej poparadzom
    Jo to byda mocno wspiyrać
    I na wontki durś zaziyrać.
    --
    Ruda Śląska - stolica fraszki
  • broneknotgeld 22.06.11, 18:53
    Bolek

    Wiysz - tyn portal zdo sie cudym
    Niy ma we niym wcale nudy
    Znod żech z podstawowki klasa
    W średni niy grom za mamlasa
    Som założoł żech tam swoja
    Przidom inksi - sie niy boja
    Tref tyż piyrszy już za nami
    We realu z kamratami.
    --
    Ruda Śląska - stolica fraszki
  • broneknotgeld 22.06.11, 18:54
    Hyjdla

    Niych ci dali tako leci
    No i coś przi tymu kleci.
    --
    Ruda Śląska - stolica fraszki
  • broneknotgeld 22.06.11, 18:54
    Bolek

    Dziynki - swoje robić byda
    Zocne chyńci to niy biyda
    A kej wsparcio inkszych styknie
    To poleci nom tu piyknie.
    --
    Ruda Śląska - stolica fraszki
  • broneknotgeld 22.06.11, 18:54
    Hajnel

    Bolek - tyż na forum kukom
    Możno mało tu nablukom
    Dyć kontmanow w tym przibywo
    -A mie tyn twoj "profil" dziwo.
    --
    Ruda Śląska - stolica fraszki
  • broneknotgeld 22.06.11, 18:55
    Bolek

    Hajnel - "profil" sie rozwijo
    Przez "znajomych" - kryjolyjo!
    Brify śla - na forum prosza
    Ślonskom godkom tako głosza
    -Szykujymy coś zocnego!
    Tych "znajomych" mom skiż tego
    Że choć mało tu szkryflajom
    Na swoj "profil" zaproszajom.
    --
    Ruda Śląska - stolica fraszki
  • broneknotgeld 22.06.11, 18:55

    --
    Ruda Śląska - stolica fraszkiHajnel

    Ja, spokopiołch - coś promujesz
    Ślonski rym przi tymu sujesz
    Zamiost zdjyńcio coś tam wsadzioł?
    Bydziesz tako durś paradzioł?

    Ty sie możno z tego lachosz
    Dyć nikerych pewno strachosz.
  • broneknotgeld 22.06.11, 18:56
    Bolek

    Mom we zocy kunszt Tigrana
    Ze niym wszyndy zowdy stana
    Zdo ci sie co tako broja?
    -Dyć karykatura moja

    Tak czy siak mie poznowajom
    Uwierz - wcale jo niy bajom.
    --
    Ruda Śląska - stolica fraszki
  • broneknotgeld 22.06.11, 19:35
    Hajnel

    Kej tak prawisz, kej to jawisz
    Niy dziw że tom fraszkom bawisz.
    --
    Ruda Śląska - stolica fraszki
  • broneknotgeld 22.06.11, 19:36
    Hyjdla

    Bolek - koncept w tym ciekawy
    Tako przeca kyns zabawy.
    --
    Ruda Śląska - stolica fraszki
  • broneknotgeld 22.06.11, 19:36
    Bolek

    Uwiyrz Hyjdla - w dziyń dzisiejszy
    Niy wiym kej żech jest gryfniejszy
    Czy we zdrzadło kukom z rana?
    Czy na kryska łod Tigrana?
    --
    Ruda Śląska - stolica fraszki
  • broneknotgeld 22.06.11, 19:37
    Hyjdla

    Toż niy yno fraszkom bawisz
    Tym nikerych tyż ciekawisz.
    --
    Ruda Śląska - stolica fraszki
  • broneknotgeld 22.06.11, 19:37
    Bolek

    Niy ma w tym nic ciekawego
    Łotworz "google" - wciep do tego
    Czy gryfniejszy Bolek Broda?
    Hehe - czasu nawet szkoda.
    --
    Ruda Śląska - stolica fraszki
  • broneknotgeld 22.06.11, 19:37
    Ignac

    Tak sie tu przegadujecie
    Ślonskim rymym sztyjc sujecie
    Dyć mie prawie ło to idzie
    Kaj wic, fraszka - ślonskość w biydzie!
    Skończyć trza ze "czynstochowom"
    i kulturom "bercikowom"!

    --
    Ruda Śląska - stolica fraszki
  • broneknotgeld 22.06.11, 21:28
    Bolek

    Ignac, wiym - grosz za liryka
    Biołym wierszym chcesz kajś rzykać
    Rob se swoje jak poradzisz
    Dyć niych fraszka ci niy wadzi.
    --
    Ruda Śląska - stolica fraszki
  • broneknotgeld 22.06.11, 21:29
    Ignac

    Wadzi mie i inkszym wadzi
    Sie panoszy - niy paradzi
    Dlo Ślonzoka gańba niesie
    Durś wom kajsik tkać to chce sie
    Toż kultura "krupniokowo"
    Z tym sztyjc u nos wiyrchym stowo.

    --
    Ruda Śląska - stolica fraszki
  • broneknotgeld 22.06.11, 21:29
    Bolek

    Ignac - zdo sie co fandzolisz
    Kej liryka yno chwolisz

    Dyć to tukej niy zawadzi
    Łotworz wontek - niych paradzi
    Wiersz na forum co liryczny
    Dlo kogosik tyż rychtyczny.
    --
    Ruda Śląska - stolica fraszki
  • broneknotgeld 22.06.11, 21:30
    Ignac

    Sie te fraszki na nic zdajom
    Niy na darmo tukej wajom
    Kej na forach je promujesz
    Co zocniejsze tako psujesz.
    --
    Ruda Śląska - stolica fraszki
  • broneknotgeld 22.06.11, 21:31
    Bolek

    Żech ci swoje już tu pedzioł
    Czegoś ło cia tyż dowiedzioł
    Wicym, fraszkom jo raduja
    I krupniokym poczynstuja
    Dyć na forum wolno wola
    Czymu pszaja i sie chwola.
    --
    Ruda Śląska - stolica fraszki
  • broneknotgeld 22.06.11, 21:31
    Ignac

    We "czynstochowie" co zocne topisz
    Możno to kedyś w końcu spokopisz.
    --
    Ruda Śląska - stolica fraszki
  • broneknotgeld 22.06.11, 21:32
    Bolek

    Co jo spokopia - moja w tym gowa
    Mie zdo jałowo durś twoja "mowa"
    Chcesz dać tu cosik - wiersze kładź w wontku
    Niy chcesz - sie trzimej swojego kontku

    Dali tyn dyszkurs ciongnońć niy werci
    Bo bych se musioł chlapnońć trzi ćwierci
    --
    Ruda Śląska - stolica fraszki
  • broneknotgeld 22.06.11, 21:32
    Łobroz drugi - z plebiscytym
    Ździybko trza nom sztopnońć przi tym.
    --
    Ruda Śląska - stolica fraszki
  • broneknotgeld 22.06.11, 21:33
    Hyjdla

    "Pisze inaczy", dyć czytać idzie
    - Ze plebiscytym jako tu bydzie?
    --
    Ruda Śląska - stolica fraszki
  • broneknotgeld 22.06.11, 21:34
    Bolek

    Ano - plebiscyt trza już rychtować
    Wolontariuszy na muster dować
    Drap kandydatow tu wystowiymy
    Tym dobrodziejow wypromujymy.
    --
    Ruda Śląska - stolica fraszki
  • broneknotgeld 22.06.11, 21:58
    Hyjdla

    Jo poru mom zocnych - tako ich tu zgłoszom
    We wercie nagrody - dobro inkszym noszom.
    --
    Ruda Śląska - stolica fraszki
  • broneknotgeld 22.06.11, 21:58
    Hajnel

    Tyż kandydatury tu moje dołoża
    Dyć sie niy dziwejcie że na to wom woża
    Choć mi ryzykowno zdo sie ta ideja
    Dobrym jest uczynkym wspacie dobrodzieja.
    --
    Ruda Śląska - stolica fraszki
  • broneknotgeld 22.06.11, 21:59
    Bolek

    No - jak jo dom swoje, to możno wystyknie
    Plebiscyt sie może rozkulać nom piyknie
    Na piontka aż idzie tako zagłosować
    Coby ludzie kukli trza tyż fest promować
    --
    Ruda Śląska - stolica fraszki
  • broneknotgeld 23.06.11, 14:04
    Hyjdla

    Ech, kajniykaj szkryflom i linka tyż kłada
    Welowanie ruszo - plebiscyt - parada!
    --
    Ruda Śląska - stolica fraszki
  • broneknotgeld 23.06.11, 14:04
    Bolek

    Hyjdla, jo tyż brify wysyłom do ludzi
    Jakosik to leci - wiyncy tyż tu wkludzi
    Głosow durś przibywo - istni w wiyrch skokajom
    Zdo sie co "fankluby" nikierzy tyż majom.
    --
    Ruda Śląska - stolica fraszki
  • broneknotgeld 23.06.11, 14:05
    Hajnel

    Dyć anonimowo ktosik tyż weluje
    Ze regulaminu - "to sie niy rachuje".
    --
    Ruda Śląska - stolica fraszki
  • broneknotgeld 23.06.11, 14:06
    Bolek

    Dubeltowo głosy wiela by dowało
    Jakby sie sie cuzamyn wszysko rachowało
    "Profile fikcyjne" ciyngym tukej mnożom
    Dyć cołkym inaczy we portalu wożom.
    --
    Ruda Śląska - stolica fraszki
  • broneknotgeld 23.06.11, 16:37
    Hajnel

    Mie te "fikcje" już wnerwiajom
    Toż czasami na to wajom
    Lepi by w portalu było
    Jakby sie to stond straciyło.
    --
    Ruda Śląska - stolica fraszki
  • broneknotgeld 23.06.11, 16:38
    Bolek

    Hajnel - "fikcjo" z wolny woli
    Jedyn wajo inkszy chwoli
    Taki "profil" hobby zdo sie
    Dyć tu nic po jejich głosie.
    --
    Ruda Śląska - stolica fraszki
  • broneknotgeld 23.06.11, 16:38
    Hajnel

    Ja - na forach już maraszom
    Dyszkurs zocny czynsto gaszom
    Niypotrzebne w "naszy-klasie"
    Sie przekonosz poniywczasie.
    --
    Ruda Śląska - stolica fraszki
  • broneknotgeld 23.06.11, 16:39
    Bolek

    Przeca wszysko prawie łod ludzi zoleży
    Czasym w jejich duszach maras tako leży
    Kej anonimowo na wiyrch wyciepujom
    Abo sie strachajom abo tym gańbujom.
    --
    Ruda Śląska - stolica fraszki
  • broneknotgeld 23.06.11, 16:39
    Hajnel

    Tak czy siak - zgobiom
    Łostuda robiom.
    --
    Ruda Śląska - stolica fraszkiHajnel

  • broneknotgeld 23.06.11, 16:40
    Hyjdla

    Jeronie - przestońcie sztrachecle tu ciupać
    Plebiscyt jest gorki - chcom ludzie tu klupać
    Na darmo skiż "fikcji" tela labiydzicie
    Kej teroz na forum aże were życie.
    --
    Ruda Śląska - stolica fraszki
  • broneknotgeld 23.06.11, 16:40
    Bolek

    Mie to fest raduje - richtig tym sie ciesza
    Niy byda biadoloł - możno tako grzesza.
    --
    Ruda Śląska - stolica fraszki
  • broneknotgeld 23.06.11, 16:41
    Hyjdla

    Choć "Notgeld" niy "Nobel" dyć uciecha niesie
    I zocno ideja lansować z tym chce sie.
    --
    Ruda Śląska - stolica fraszki
  • broneknotgeld 23.06.11, 16:44
    Hajnel

    Ja, Hyjdla - to chyto
    Niyjedyn sie pyto
    Chce kogosik wspiyrać
    Na forum zaziyrać.
    --
    Ruda Śląska - stolica fraszki
  • broneknotgeld 23.06.11, 16:45
    Hyjdla

    Ano - zaziyrajom - na wontkach głosujom
    Tako tyż ta sztela po trochu budujom
    Razym z plebiscytym te forum rozkwitnie
    A że dobru służy - niych nigdy niy kitnie!
    --
    Ruda Śląska - stolica fraszki
  • broneknotgeld 23.06.11, 19:45
    Hajnel

    "Notgeld" fest ciekawi. Czamu łon nagrodom?
    Kej sie mie pytajom roztomajcie godom
    Wiym że piniondz miejski skiż potrzeby wielki
    A że niy podrobka - tyż niy duperelki.
    --
    Ruda Śląska - stolica fraszki
  • broneknotgeld 23.06.11, 21:40
    Bolek

    Hajnel - jo to zbiyrom, łod lot tyż wystowiom
    Ludzie sie dziwujom, uczom, tako bowiom
    Piyrwyj skiż utropy boł potrzebom "chwili"
    Dyć przeca z niym wiela ludzie tyż przeżyli
    Notgeld we złym czasie jako ta nadzieja
    Toż zocnom nagrodom jest dlo dobrodzieja.
    --
    Ruda Śląska - stolica fraszki
  • broneknotgeld 23.06.11, 21:42
    Hajnel

    Mosz recht - żeś to piyknie teroz wyklarowoł
    Tym bardzi jo byda ideja promowoł.
    --
    Ruda Śląska - stolica fraszki
  • broneknotgeld 23.06.11, 22:08
    Hyjdla

    Ludzie durś welujom - pewno fest kukajom
    Widać dobrodziejom we tych czasach pszajom
    Ech, czas wartko leci - chnetko finał bydzie
    Ze końcym tych głosow jeszcze ździybko przidzie.
    --
    Ruda Śląska - stolica fraszki
  • broneknotgeld 23.06.11, 22:20
    Bolek

    Ano - jeszcze trocha głosy idzie dować
    Chnetko jednak wontki przidzie zasztopować
    Hyjdla - welowało trzista ludzi prawie
    Kożdy sie wygranym zdowo w ty zabawie.
    --
    Ruda Śląska - stolica fraszki
  • broneknotgeld 23.06.11, 23:17
    Hyjdla

    "Notgeldow" piyńć yno prziznowanych bydzie
    Dyć kto niy dostanie wcale niy we biydzie.
    --
    Ruda Śląska - stolica fraszki
  • broneknotgeld 24.06.11, 13:21
    Bolek

    Dobrze tukej prawisz - richtig "niy we biydzie"
    Pewnikym za roczek ktoś zaś dran z tym przidzie
    Wontki w plebiscycie terozki haltuja
    Wszystkim za te głosy festelnie dziynkuja.
    --
    Ruda Śląska - stolica fraszki
  • broneknotgeld 24.06.11, 13:32
    Hyjdla

    No i patrz - sie wszysko piyknie rozkulało
    A przi tymu forum piyknie rozkwitało
    Wystykło do tego miesiyncy niywiela
    Rym ślonski dopomog - szkryfna yno tela.
    --
    Ruda Śląska - stolica fraszki
  • broneknotgeld 24.06.11, 15:05
    broneknotgeld napisał:

    > Hyjdla
    >
    > No i patrz - sie wszysko piyknie rozkulało
    > A przi tymu forum piyknie rozkwitało
    > Wystykło do tego miesiyncy niywiela
    > Rym ślonski dopomog - szkryfna yno tela.
    No i patrz - sie wszysko wartko rozkulało.

    --
    Ruda Śląska - stolica fraszki
  • broneknotgeld 24.06.11, 15:10
    Bolek

    Piontce co z "Notgeldym" już tu gratuluja
    Zaproszom na finał - z majym to szykuja
    Dyplom tyz do tego jako potwierdzynie
    Niy idzie inaczy - by żgało sumiynie.
    --
    Ruda Śląska - stolica fraszki
  • broneknotgeld 24.06.11, 15:20
    Hyjdla

    Do gratulacyji i jo dokupluja
    Przeca sie skiż tego tyż wiela raduja.
    --
    Ruda Śląska - stolica fraszki
  • broneknotgeld 24.06.11, 15:38
    Hajnel

    Jo tyż sie łodzywom - sukcesow winszuja
    Wszyskim dobrodziejom - za rok popromuja
    Ideja "Notgelda" trza ciongnońć w ty szteli
    Niychej tu rozkwito - z tym przeca weseli.
    --
    Ruda Śląska - stolica fraszki
  • broneknotgeld 24.06.11, 15:40
    Łobroz szworty - po finale
    Czy uciechy wiela? -Wcale?!
    --
    Ruda Śląska - stolica fraszki
  • broneknotgeld 24.06.11, 15:40
    broneknotgeld napisał:

    > Łobroz szworty - po finale
    > Czy uciechy wiela? -Wcale?!
    Łobroz trzeci....

    --
    Ruda Śląska - stolica fraszki
  • broneknotgeld 24.06.11, 15:48
    Ktoś utropy sie spodziywoł?
    Po sukcesie sztrofom dziwoł?
    Ech to niy som balakwasty
    Ciynzko być ze ślonski asty.
    --
    Ruda Śląska - stolica fraszki
  • broneknotgeld 24.06.11, 17:12
    Bolek

    Toż już po finale - piyknie ze tym było
    Poru dziynnikorzy nawet tam trefiyło
    Kablowka nagrała - kuknijcie we Necie
    Zdjyńć wiela ze tego łoglondnońć możecie
    Za rok możno lepi jeszcze ze tym bydzie
    Jak czas plebiscytu "Notgelda" zaś przidzie,

    --
    Ruda Śląska - stolica fraszki
  • broneknotgeld 24.06.11, 17:30
    Hyjdla

    Bolek - wyszło gryfnie, uciechy fest było
    Ciesza sie że mie to tyż niy łominyło
    Za rok tyn plebiscyt zaś byda wspiyrała
    Linki z relacyjom terozki dowała.
    --
    Ruda Śląska - stolica fraszki
  • broneknotgeld 24.06.11, 17:43
    Hajnel

    Hyjdla - dyć dziynkuja
    Że tego niy szukom
    Sukcesym raduja
    Z uciechom tam kukom

    Bo przeca z tym prawie
    Przed łoczy mi włazi
    Finał - śnik na jawie!
    Dyć kogosik razi.
    --
    Ruda Śląska - stolica fraszki
  • broneknotgeld 24.06.11, 18:04
    Bolek

    "Dyć kogosik razi" - szkryfnołś w zło godzina
    Na swoj "profil" kukom - mom niytyngo mina
    Administracyjo "fikcjom" mie zrobiyła
    Skuli czego tako? -Dyć niy wyjowiyła!
    --
    Ruda Śląska - stolica fraszki
  • broneknotgeld 25.06.11, 21:27
    Hyjdla

    Bolek - zdo sie niymożliwe!
    Żeś niczego niy ukrywoł!
    Kery chcioł tyn wartko przeca
    twojim klasom tyż podziwoł

    Tam na forach szkryflołś nawet
    Dyszkurs wiod ze kamratami
    Czy ta Administracyjo
    chce sie asić felerami?
    --
    Ruda Śląska - stolica fraszki
  • broneknotgeld 25.06.11, 21:28
    Hajnel

    Bolek - szpas szykujesz tako?
    Byś tym nos za bozna robioł?
    Wybocz - widza w tym gupota
    Czy ktoś komuś gowa łobioł?
    --
    Ruda Śląska - stolica fraszki
  • broneknotgeld 25.06.11, 21:29
    Bolek

    Łoj roztomili - idzie spokopić
    Że ktoś ideje zocne chce topić
    Łoszkliwo czynsto tyż ślonsko dusza
    Tako tu szkryfnońć terozki musza

    Nikerym zelter bije do gowy
    Inkszych grzych kusi jakisik nowy
    Kej ktoś "zbudować" nic niy poradzi
    Uciechy szuko w tym co "wysadzi".
    --
    Ruda Śląska - stolica fraszki
  • broneknotgeld 26.06.11, 01:19
    Hyjdla

    "Niyrzeczywistym" "fikcyjne konto"
    Z niyprowdziwymi cołkym "danymi"
    -Z regulaminu podowom wom to
    Toż bydźcie tako teroz mondrymi.
    --
    Ruda Śląska - stolica fraszki
  • broneknotgeld 26.06.11, 01:20
    Bolek

    Że ich cygania tako "pedzieli"
    Ze klas kamratow tyż łoszukuja
    -Łoszczerstwo ofyn wcisnońć mi śmieli!
    Niy ma co dziwać - fest tym nerwuja!
    --
    Ruda Śląska - stolica fraszki
  • broneknotgeld 26.06.11, 01:20
    Hyjdla

    Trza ci szkryfnońć do Admina
    Niych niy robiom tukej "kina".
    --
    Ruda Śląska - stolica fraszki
  • broneknotgeld 26.06.11, 01:21
    Bolek

    Hyjdla - brif przisłali prawie
    Mom być "fikcjom" - już po sprawie?
    Żech "niyregulaminowy"!
    Stond tyn "klajdzik" dlo mie nowy.
    --
    Ruda Śląska - stolica fraszki
  • broneknotgeld 26.06.11, 01:22
    Hyjdla

    Niy po jejich myśli jest karykatura?
    Możno prawie bezto w całym widzom dziura.
    --
    Ruda Śląska - stolica fraszki
  • broneknotgeld 26.06.11, 01:22
    Hajnel

    Hyjdla - zdo sie kogoś mierzi fest co ślonske
    Ciynżko wyklarować kej gowiczki wonske.
    --
    Ruda Śląska - stolica fraszki
  • broneknotgeld 26.06.11, 01:23
    Hyjdla

    Pewno ze zowiści sie "fikcjo" wykluła
    Pódzie to łodkryńcić, choć NK mo ruła.
    --
    Ruda Śląska - stolica fraszki
  • broneknotgeld 26.06.11, 01:23
    Bolek

    Durś "fikcyjnym" z wtorkym byda?
    Jako jutro? Czy tu przida?
    W "usuniynte" awansuja?
    Tako dzisioj medytuja

    Muter w grobie sie przewroco
    "Fikcyjnego" rodzić? Po co?
    Ech ta administracyjo!
    Robić tako komedyjo!

    Godka "fikcjom"? Co powiycie?
    Dlo mie łona jako życie!
    Etniczności ktoś łodmowio?
    Nacjonalnie sie zabowio?

    Czy gymbusiom jo cygania?
    Trza łopytać se Tigrana
    Co mie tako wyrysowoł
    Cajtong tyż łopublikowoł

    Żech "fikcyjny" - wyrok mieli
    Ło nic spytać se niy chcieli
    Ostracyzmym popisali
    Jako ze tym bydzie dali?
    --
    Ruda Śląska - stolica fraszki
  • broneknotgeld 26.06.11, 12:18
    Hyjdla

    Jo żech "fikcyjnych" poblokowała
    Byda terozki to łodkryncała
    Bolek - brif wyśla tyż do Admina
    Ech - sie skiż tego aż traci wyna!
    --
    Ruda Śląska - stolica fraszki
  • broneknotgeld 26.06.11, 12:19
    Bolek

    Dziynki - czekom łodpowiedzi
    Tyż brif posłołch do Admina
    Coś dziwnego w NK siedzi?
    Antyślonskość majom w gynach?
    --
    Ruda Śląska - stolica fraszki
  • broneknotgeld 26.06.11, 12:19
    Hajnel

    Kej żeś sie sukcesym asioł
    To cie wartko ktoś ugasioł
    Widać tako musi być
    Ślonzok mo łobrywać w rzić.
    --
    Ruda Śląska - stolica fraszki
  • broneknotgeld 26.06.11, 12:20
    Bolek

    Szłoby dowiyść?
    -Polsko zowiść?
    --
    Ruda Śląska - stolica fraszki
  • broneknotgeld 26.06.11, 12:20
    Hajnel

    Niy wiń yno w tym Poloka
    Swoj tyż zowiść trzimie w zokach
    I kej go zaświyndzom piynty
    Sztrasa prosto mo zakrynty

    A Polokom już "w to grej"
    Toż Ślonzoku pretekst dej
    We "zgłoś fikcjo" styknie klikać
    Ze uciechom potym blikać
    Żeś kajś komuś coś zmajstrowoł
    -Jakosik łoszkliwość nowo.
    --
    Ruda Śląska - stolica fraszki
  • broneknotgeld 26.06.11, 13:00
    Bolek

    Sztygsym dlo nikerych fraszka
    Nawet ofyn to szkryflali
    Wloz sztrachecel tam kaj draska?
    Możno by sie winszowali

    Dyć po prowdzie w tym gupota
    Jako sranie w gniozdo swoje
    Zy mnie możno tyż niycnota
    Mierznom jednak take "boje"

    Trza na ślonskość chuchać, dmuchać
    Kożdy kunszt mieć ciyngym w zocy
    Ktoś lirycznie może "gruchać"
    - Yno z tego styknie mocy?
    --
    Ruda Śląska - stolica fraszki
  • broneknotgeld 26.06.11, 18:19
    Hyjdla

    Bolek - trza poczekać
    Cosik łodpowiedzom
    Niy darmo Adminy
    Na portalu siedzom.
    --
    Ruda Śląska - stolica fraszki
  • broneknotgeld 26.06.11, 18:19
    Bolek

    Żech ło swoja "fikcjo" rozpytoł na forum
    Kere zdo sie jako ze Adminow dworu

    nasza-klasa.pl/forum/20/2/4140
    Wartko wontek wytli - cynzury niy widać
    Toż kaj informacjo ło szykanie by dać?

    --
    Ruda Śląska - stolica fraszki
  • broneknotgeld 26.06.11, 18:20
    Hyjdla

    Możno ktosik sie gańbuje
    Bestoż wartko to gumuje.
    --
    Ruda Śląska - stolica fraszki
  • broneknotgeld 26.06.11, 18:21
    Bolek

    Jakby sie tym gańbowali
    Drap "realność" by prziznali
    Dyć kej wytli cosik wiymy
    Trza mi było taki szprymy.
    --
    Ruda Śląska - stolica fraszki
  • broneknotgeld 26.06.11, 18:55
    broneknotgeld napisał:

    > Bolek
    >
    > Jakby sie tym gańbowali
    > Drap "realność" by prziznali
    > Dyć kej wytli cosik wiymy
    > Trza mi było taki szprymy.
    Drap "realność: by łoddali

    --
    Ruda Śląska - stolica fraszki
  • broneknotgeld 26.06.11, 19:36
    Hyjdla

    Bolek - musisz jeszcze strzimać
    My tyż niy bydymy drzymać
    Forum przeca rośnie piyknie
    Wiela nos tu cosik kliknie.
    --
    Ruda Śląska - stolica fraszki
  • broneknotgeld 26.06.11, 19:37
    Bolek

    W piyrszo środa po wyroku
    Kara ciyngym mie nerwuje
    Konstytucjo majom w kroku?
    Łona cosik gwarantuje

    Z rownych w prawie już łodstowom?
    Obywatel gorszy masy?
    "Fikcyjnościom" chopa dłowiom
    Niy ma mie kaj moje klasy

    Ślubno tyż sie ciyngym tropi
    Mo "fikcyjne" zy mnom dzieci?
    Trza na smutno mi sie łopić
    Gorzołeczka "fikcjom"? -Leci!

    Czy łoszczerczo łoskarżony
    Bronić nawet sie niy może?
    Kapturowo łosondzony?!
    Ech, wyboczcie, dyć - Szczyńść Boże.
    --
    Ruda Śląska - stolica fraszki
  • broneknotgeld 26.06.11, 19:44
    Hajnel

    Miano deptać ku zabawie?!
    Ano - Bolek, żeś we prawie!
    --
    Ruda Śląska - stolica fraszki
  • broneknotgeld 26.06.11, 19:45
    Bolek

    Swoje miano mom we zocy
    Fikcjo śmiom mi ciepać w łocy
    "Podczłowiekym" tyż niy byda
    Sie niy godza na ta "biyda".
    --
    Ruda Śląska - stolica fraszki
  • broneknotgeld 26.06.11, 20:03
    Hajnel

    Trza słąć brify z protestami
    Chnet doczkomy tego sami?
    Chocioż włos niy zleci z myjny
    Kożdy może być "fikcyjny"
    Zło z zowiści z łoszkliwości
    Niych we trule gyry prości.
    --
    Ruda Śląska - stolica fraszki
  • broneknotgeld 26.06.11, 20:03
    Hyjdla

    Brif Adminom żech wysłała
    Inksi tyż - dyć ło tym piszom
    Łodpowiedzi niy doszkałach
    Inkszym łodpedzieli - ciszom?
    --
    Ruda Śląska - stolica fraszki
  • broneknotgeld 26.06.11, 20:04
    Bolek

    Za te brify - wszyskim dziynki
    Niy "fikcyjny" dowom rynki
    Jedno wom tu łobiycuja
    Strzimia - som niy zrezygnuja
    Choć pewnikym ło to idzie
    Kej sie straca tako bydzie
    Z woli Administracyji
    Niy skiż jakiś komedyji.
    --
    Ruda Śląska - stolica fraszki
  • broneknotgeld 26.06.11, 20:54
    Hajnel

    Recht mosz - toż sie trzimej fest
    Z tobom wiela nos tyż jest.
    --
    Ruda Śląska - stolica fraszki
  • broneknotgeld 26.06.11, 20:55
    Bolek

    Na brif mi niy łodpedzieli
    Cynzurować wontek chcieli
    Dyć żech łotwar prawie drugi

    nasza-klasa.pl/forum/20/2/4152
    Czy sie zrobi richtig dugi?
    --
    Ruda Śląska - stolica fraszki
  • broneknotgeld 26.06.11, 20:55
    Hajnel

    Swoje trzi grosze żech tam już wciep
    Coby wiedzieli żech jo niy "kiep".
    --
    Ruda Śląska - stolica fraszki
  • broneknotgeld 26.06.11, 20:56
    Hyjdla

    A mie jakoś ciynżko coś na wontku szkryfnońć
    Bych im tam musiała żolami aż gichnońć.
    --
    Ruda Śląska - stolica fraszki
  • broneknotgeld 26.06.11, 20:56
    Bolek

    Dziynki - dyszkurs już tam leci
    Toż niyjedyn post se skleci
    Choć moj piyrszy wontek wytli
    W tamtym chyba nic niy przitli.
    --
    Ruda Śląska - stolica fraszki
  • broneknotgeld 26.06.11, 20:57
    Hyjdla

    Ech, by ze tym już skończyli
    Ci "realność" prziwrociyli.
    --
    Ruda Śląska - stolica fraszki
  • broneknotgeld 26.06.11, 20:59
    Bolek

    Dowejcie pozor - możno zaraza
    Za "fikcyjnymi" czasami łaża
    Toż pewno łod nich chyciołch bakcyla
    Mor chnetko przidzie? -Czy jo se myla?
    --
    Ruda Śląska - stolica fraszki
  • broneknotgeld 26.06.11, 21:00
    Hajnel

    Hehe - przeszła już ci ora?
    Żeś inaczy szkryfloł wczora.
    --
    Ruda Śląska - stolica fraszki
  • broneknotgeld 26.06.11, 21:02
    Bolek

    Sie dziwujom w moji klasie
    "Fikcjom" teroz chwolić trza sie?
    We portalu tako moda?
    Niypotrzebno na to zgoda?
    --
    Ruda Śląska - stolica fraszki
  • broneknotgeld 26.06.11, 21:02
    Hyjdla

    Dyć mie szpas we tym nic niy raduje
    Korajom ślonskość kero promujesz?
    Wiym że gupota w tym wykpić idzie
    Dyć jako dali to richtig bydzie?
    --
    Ruda Śląska - stolica fraszki
  • broneknotgeld 26.06.11, 21:04
    Bolek

    Hyjdla - retunek jedyny widza
    Brif nowy wyśla - nad nim sie biydza.
    --
    Ruda Śląska - stolica fraszki
  • broneknotgeld 26.06.11, 21:05
    Hyjdla

    Aże sie biydzisz? Toż mie ciekawisz
    Możno coś ło tym wiyncy wyjawisz
    Przeca ze tobom sztama trzimiymy
    A co szykujesz niywiela wiymy.
    --
    Ruda Śląska - stolica fraszki
  • broneknotgeld 26.06.11, 21:06
    Bolek

    Dyć niy kryja co szykuje
    Tako brifym wyklaruja.


    Ponie Prezydyncie

    Ponie Prezydyńcie tu fest szanowany
    Na nasz rudzki stolec niy roz welowany
    Żeś po to by wspiyrać w biydzie rudzianina
    Tyż nadziejom mojom na weselszo mina

    Toż ło poświodczynie pokornie jo prosza
    Wiydz że ślonske słowo w "naszy-klasie" głosza
    Dyć władcy portalu "fikcjom" mie tam darzom
    Poświodcz żech realny - możno coś zajarzom

    Wybocz żech Cie przeca rymym rzduchoł piyrwyj
    Co złe ze pamiyńci możno nawet wyrwij
    Tyś we Rudzie władzom - w Swoji łaskawości
    Dej rymopisowi patynt realności

    Bo jako mi przidzie wiyźć "fikcyjne" życie?
    Jako mi rymować w tym po ślonsku? -Skrycie?
    Mieć "fikcyjne" dzieci ze prowdziwom ślubnom?
    Jako gurt popuszczać kej galoty rubnom?

    Jak syn marnotrawny łojca prosioł swego
    Duch stolicy fraszki mie prziwiod do tego
    Że klupia we dźwiyrza burgemajstra miasta
    Choć jo tyn zokalec ze Twojego ciasta

    Ech - popiołym suja zapocono glaca
    Z żolu chnetko ślimtom, myjny niy łonaca
    Z "konta fikcyjnego" mosz siyła wybowić
    Rynkom możno kiwnońć i już tako sprowić

    Nic że w Rudzie Ślonski słychać bydzie wrzaski
    Broneknotgeld klynko - doproszi sie łaski!
    Niy spokopi tego kto "fikcjom" niy tkniynty
    Toż chciyj mie wybowić z ty medialny "piynty".
    --
    Ruda Śląska - stolica fraszki
  • broneknotgeld 27.06.11, 21:44
    Hyjdla

    Toż kunsztownie przirychtowoł
    Lachać potrza sie, czy ślimtać?
    Brif tyn wyślesz? Sie niy zdowo
    Choć szpas ślonski to niy piynta.
    --
    Ruda Śląska - stolica fraszki
  • broneknotgeld 27.06.11, 21:45
    Bolek

    Hyjdla - wyśla - ździybko czekom
    "Fikcjo" jeszcze dzionek strzimia
    Czy inaczy mie "łoblekom"?
    Już z tym coś za dugo drzymia.
    --
    Ruda Śląska - stolica fraszki
  • broneknotgeld 27.06.11, 21:46
    Hajnel

    "Drzymiesz" - tako tukej prawisz
    Dyć łostudy ze tym wiela
    Kunsztym te felery jawisz
    Czy wystyknie yno tela?
    --
    Ruda Śląska - stolica fraszki
  • broneknotgeld 27.06.11, 21:46
    Bolek

    Ech, spokopiom małowiela
    Wykpić moga - yno tela
    Sie kajś coś ze tego robiom?
    Jako mie tyż inkszym zgobiom
    A Adminy niy sprowdzajom
    "Fikcjom" darzom - dyć niy bajom.
    --
    Ruda Śląska - stolica fraszki
  • broneknotgeld 27.06.11, 21:47
    Hajnel

    Bolek - niy popuszczej ze NK Adminom
    Możno nos tyż "fikcje" w końcu niy łominom.
    --
    Ruda Śląska - stolica fraszki
  • broneknotgeld 27.06.11, 21:47
    Bolek

    Sie zanosi na "wojynka"?
    Mom klawiyra yno w rynkach
    I rym ślonski na łobrona
    Chocioż zy mie słabszo strona
    Przeca poddać se niy poddom
    Realności swyj niy łoddom.
    --
    Ruda Śląska - stolica fraszki
  • broneknotgeld 27.06.11, 22:10
    Hyjdla

    Bolek - my cie w tym wspiyromy
    Brifow poszło wiyncy przeca
    Lepi dyć jak czasu im domy
    Tako teroz tu zaś skleca.
    --
    Ruda Śląska - stolica fraszki
  • broneknotgeld 27.06.11, 22:10
    Bolek

    Recht - dyć trocha już zetrwało
    Jutro pionty dziyń - niymało
    Jutro "profil" niy łodmiyniom
    "Drif łotwarty" wszyndy wtryniom
    Wyśla tyż prezydyntowi
    Byda ciekow czy łodpowiy.
    --
    Ruda Śląska - stolica fraszki
  • broneknotgeld 05.11.11, 12:29
    Hyjdla

    Pionty dziyń - toż prawie kukom
    Bolek, "fikcji" twoji szukom
    Żeś "realny" - gratuluja!!!
    Sie festelnie tym radyja!

    Pionty dziyń - dość dugo trwało
    Szpany było z tym niymało
    Toż terozki cieszyć chca sie
    Jako my - żeś w "naszy-klasie"!
    --
    Ruda Śląska - stolica fraszki
  • broneknotgeld 05.11.11, 12:29
    Hajnel

    Bolek - pynkli - gratuluja!
    Razym z Hyjdlom tyż raduja!
    Razym ze inkszymi tukej
    Teroz klasom swojim kukej
    Trza łod nowa sie logować
    Dyć ci przi kamratach stować
    Jako nowy za inkszymi
    Ubliżyli ci - my wiymy
    Ktoś tyż możno mioł nauczka
    Ważne żeś sie niy boł "tuczka"
    Żeś to strzimoł, swoje pedzioł
    Żeś ze nami tukej siedzioł
    "Fikcjo" przeszła - niy "zabiyła"
    Wiydz że tako tyż wzmocniyła.
    --
    Ruda Śląska - stolica fraszki
  • broneknotgeld 05.11.11, 12:29
    Bolek

    Toż witejcie roztomili
    Zdo sie jaśni w jedny chwili
    Z prow czowieka mie łodarli
    Sie przi tymu tyż zaparli

    Konstytucji niy czytali?
    Bestoż godność podeptali?
    Ślonzok dlo nich to niy czowiek?
    "Fikcjom" cołkom, czy w połowie?

    Ciśnie gowa pytań wiela
    Niyobywatelsko sztela?!
    Ano - prawie tako zdo sie
    Doświodczynia teke mo sie.
    --
    Ruda Śląska - stolica fraszki
  • broneknotgeld 05.11.11, 12:30
    Hyjdla

    Co złe - przeszło. Po co tropić?
    Ciynżko możno to spokopić
    Łod zowiści do gupoty
    Dyć niych już spokojni po tym
    Bolek, strzimoł żeś to piyknie
    Tela szkryfna - mi wystyknie.
    --
    Ruda Śląska - stolica fraszki
  • broneknotgeld 05.11.11, 12:30
    Bolek

    Ano - idzie sie radować
    Dyć tyż tymu trza dziwować
    Jako leko "fikcjom" zrobić
    Bele kto może nazgobić

    No a Administracyjo
    Na zielono - kryjolyjo
    Świyci tym co chcom coś niszczyć
    Co "we trowie" richtig "piszczy"?
    --
    Ruda Śląska - stolica fraszki
  • broneknotgeld 05.11.11, 12:31
    Hajnel

    "Piszczy" zgobnik ze Adminym
    Łoba "w trowie" siedzom driny
    Zdo sie jako dwa kamraty
    Tympić ślonskość - łoba za tym
    Tyn nazgobi, tyn prziklepnie
    Ślonzokowi z tym sie hepnie.
    --
    Ruda Śląska - stolica fraszki
  • broneknotgeld 05.11.11, 12:31
    Bolek

    Szczyńściym krotko to dość trwało
    Sie tym razym niy udało
    Som bych pewno w "fikcji" łostoł
    Dyć żech wsparcie łod wos dostoł.
    --
    Ruda Śląska - stolica fraszki
  • broneknotgeld 05.11.11, 12:31
    Hajnel

    Czy cie chocioż przeprosiyli
    za to jako ukrziwdziyli?
    --
    Ruda Śląska - stolica fraszki
  • broneknotgeld 05.11.11, 12:32
    Bolek

    Hajnel - ty mi poczta czytosz?
    Prawie teroz ło to pytosz
    Ano - brif terozki prziszoł
    Choć durś niy wiym kto namiyszoł
    Do feleru sie prziznali
    Yno tym uradowali.
    --
    Ruda Śląska - stolica fraszki
  • broneknotgeld 05.11.11, 12:32
    Hyjdla

    Ano widzisz - coś do przodka
    Tu nom kwitnie dali godka
    Po tym nawet żeś mocniejszy
    Toż z uciechom dziyń dzisiejszy.
    --
    Ruda Śląska - stolica fraszki
  • broneknotgeld 05.11.11, 12:32
    Bolek

    Roztomili - koniec sprawy
    Koniec tragikomedyji
    Stało sie niy skiż zabawy
    Niy trza wiyncyj z tym mecyji

    Forum rośnie nom przepiyknie
    Wiyncyj klasowiczow kuko
    Tako fertig - już wystyknie
    Niych sie cosik ktoś kajś bluko

    Za asysta w tym dziynkuju
    Wszyskim kierzy mie wspiyrali
    Koniec, fertig - tym raduja
    Żeście swoje tyż szkryflali.
    --
    Ruda Śląska - stolica fraszki
  • broneknotgeld 05.11.11, 12:33
    I SZLUS!

    Z tragikomedyjom szlus
    "Fikcjo" przeca to niy mus
    Możesz być tym z wolny woli
    Niy z admina ani "trolli".

    ======================
    --
    Ruda Śląska - stolica fraszki
  • broneknotgeld 15.04.12, 15:34
    "Ślonzok fikcjom" - "tako to leciało".

    www.facebook.com/photo.php?fbid=278335558908021&set=a.278332652241645.64630.195759197165658&type=1&permPage=1
    Ano - richtig "tako to leciało". Moja tragikomedyjo to przeca ślonsko sztuka faktu, kero łosprowio ło tym co mi sie richtig przitrefiyło we portalu "nasza-klas.pl".
    Założoł żech tam ślonske forum, coby prawie tako zrychtować kolejno edycyjo nagrody "Notgelda". "Notgeldy" som prziznowane we naszym mieście tym, kierzy chcom i poradzom sie dzielić ze bliźniymi dobrym, som takimi wolontariuszami-dobrodziejami.
    Toż udało sie zrychtować i rozkulać take forum, a som plebiscyt nagrody łokozoł sie sukcesym, choć leko niy było. Jednak wiela mie we tym wspiyrało, pomogało to wszysko rozkulać. Jakosik krytyka już wtedy tyż boło widać, dyć na nic sie to zdało.
    Toż po sukcesie ze tom idejom, a możno prawie skiż tego, administracyjo NK zdegradowała mie do "profila fikcyjnego". Pewno wystykło do tego pora zowistnikow, kierzy klikali we "zgłoś profil fikcyjny", no i indolyncjo adminow tego portalu.
    Niy boło leko ze tego wylyźć i możno bych nawet niy wyloz, kejby niy wsparcie inkszych forumowiczow. Szykana jako mi ofyn przirychtowali adminy NK richtig łodebroł żech jako podeptanie mojich prow obywatelskich. Skończyło sie jednak dobrze i mozno nawet ktosik cosik spokopioł, choć pewności niy ma.
    "Jako to leciało" poczytejcie sami - zaproszom:

    forum.gazeta.pl/forum/w,28940,126348953,,_Slonzok_fikcjom_tragikomedyjo_.html?v=2

    Trza jeszcze pedzieć, że to już drugo tragikomedyjo kero żech szkryfnoł i wydoł. Po prowdzie to jakby piyrszo ze cyklu. Co ciekawe, trzecio ze tego cyklu wydano boła łońskego roku - mianowała sie "Plebiscyt we Necie":

    rudaslaska.naszemiasto.pl/artykul/1087061,bronislaw-watroba-napisal-tragikomedie-po-slasku-dzielo-ma,id,t.html
    Toż jest czyńść piyrszo i trzecio już wydano. Drugo czeko we raji - pewnikym jom wydom na bezrok. Możno nawet na takim "literackim tryptyku" sie niy skończy.
    --
    Ruda Śląska - stolica fraszki
  • broneknotgeld 29.05.12, 19:11
    Tref autorski - niy "fikcyjo"
    filia18halemba.blox.pl/2012/05/Slonzok-fikcjom.html
    Kryjolyjo! Kryjolyjo!
    --
    Ruda Śląska - stolica fraszki

Popularne wątki

Nie pamiętasz hasła

lub ?

 

Nie masz jeszcze konta? Zarejestruj się

Nakarm Pajacyka