Dodaj do ulubionych

Ślonske legyndy

28.09.03, 09:58
We inkszych konskach tyż ich jest wiela
Dyć chciołbych dlo nich mieć exstra sztela.
Edytor zaawansowany
  • broneknotgeld 28.09.03, 10:00
    Grzibowicko legynda

    Grzib tukej miyszkoł kedyś przed laty
    Ponoć był piernik richtig bogaty
    I do swojego durś prziwionzany
    Że ze tym wszyskim chcioł być chowany

    We ziymi leży przeca już downo
    A z nim tyż ślubno - kedyś szykowno
    Kota dociepli i psa starego
    Tyż wor piniyndzy co był łod niego

    Jak już mioł wszysko poszoł do Piotra
    By wrota nieba przed Grzibym łotwar
    A świynty Pioter yno zamrugoł
    W czyśću pokuta zadoł mu dugo

    Pedzioł mi kedyś tyż jedyn ołpa
    Że z tych piniyndzy co wzioł sie kupa
    Mo w Grzibowicach być coś dobrego
    Wtedy sie skończy kara łod niego

    Szukali forsy już lot za wiela
    Znojść niy umieli i majom tela
    Co dlo sia yno ciynżko zarobiom
    Ło skarb zapytej - w gowa sie szkrobiom.
  • broneknotgeld 28.09.03, 10:00
    Mikulczycko legynda

    We Mikulczycach kedyś godali
    Że tukej Zobrze siyngo nojdali
    W historio wiekow naprowdy starych
    Choć dzisioj ciynżko dać tymu wiary

    Ponoć by miały już tysionc lot
    Z czego tyż byłbych naprowdy rod
    Taki gyburstag - radości wiela
    Blysła by przeca wiyncyj ta sztela

    Drewniany kościoł kedyś tu stoł
    Łon downe daty na belce mioł
    We łoziymnostym wieku je znodli
    Na ślad historii tyj wtedy wpodli

    Jednak ze czasym niszczoł zabytek
    Remont - za wielki był dlo nich zbytek
    I Bytomiowi go łodsprzedali
    Kery mu pisoł historio dali

    We parku miejskim go postawiyli
    Świynto galerio tam sie zrobiyli
    Z czasym zaś pomnik łod ofiar wojny
    Tu drugo wojna przetrwoł spokojny

    Dalyj tyż Bytom mioł go we zocy
    Cieszoł łon kożde tukej nom łoczy
    W końcu sie spoloł choć był niywinny
    Jak nastoł w Polsce tyn "stan wojynny"

    Bestoż tam dzisioj tych dat niy szukej
    Choć szłoby zadbać ło sprawa tukej
    Czy som papiory? Wiela w tym prowdy?
    Historio swojo znać trzeba zowdy.
  • broneknotgeld 28.09.03, 10:01
    Tatarka z Mikulczyc

    W dziewiytnostym wieku stoł tu słup z kamiynia
    Ło kerym ciekawie bajała ta ziymia
    Cosik we tym było - przeca znojdowali
    Broń - jak we tym miejscu ziymia połorali

    Podobno Tatary co Krakow zdobyli
    W naszych Mikulczycach tyż dość dugo byli
    Koczowała tukej mało chańsko horda
    Łobrońcow grodziska chcieli wziońć za morda

    Z marszu sie to jednak wcale niy udało
    A jak łoblynżynie durś sie przeciongało
    Słup tyn postawiyli by wojskym kerować
    Przed łokym Tatara niy szło sie już schować

    Zaczyli na polach gryka potym sadzić
    By sie ze prowiantym w prziszłości poradzić
    Bo łoni łod downa jom przeca wcinali
    A we Polsce tego nic a nic niy znali

    Dyć choć pod Legnicom richtig nos pobiyli
    Jednak sie ze Ślonska dość pryndko cofnyli
    Na południe poszły ichnie czambuliki
    Tatarkom do dzisioj zowiom ziorka gryki.
  • broneknotgeld 28.09.03, 10:03
    Złoto kaczka toszecko

    Jak Leopold Gaschin był tu zamku panym
    Som we wielkim pryku czynsto niywyspany
    Szukoł piykny frelki kero by mu dała
    Miyłość i potomstwo wiela yno chciała

    Stało sie - mioł ślubno - prziwioz jom z daleka
    A piykno tyż była nad zochwyt czowieka
    Dyć w Toszku sie łona za dobrze niy czuła
    Niy miała gowiedzi keryj ziorno suła

    Graf jak sie dowiedzioł kupioł kaczki kury
    Gołymbie furgały jak paczołś do gory
    Terozki we zamku tela było ptoctwa
    Że ludzie pytali - Po co te dziwoctwa?

    A wszysko skiż pszonio tyj gryfnyj Gizeli
    By dobrze sie czuła we swyj nowyj szteli
    Leopold w niyj widzioł wielke szczyńście swoje
    Pedzioł - Dom ci dziubku wszysko co jest moje

    Na pamiontka tego kaczka podarowoł
    Kerom sie tyż tukej niyjedyn dziwowoł
    Piyknie jom zrobiyli ze złota szczyrego
    Gniozdo srebrne miała i jojka do tego

    Była to terozki pamiontka rodziny
    Co szczyńście niyś miała w toszecke dziedziny
    Jednak niy na dugo wszysko to tak trwało
    Ktosik ciepnoł urok - niyszczyńście sie stało

    Dyć jednego razu po wielki zabawie
    Jak wszyscy na zamku pospali sie prawie
    Łogyń buchnoł kajsik - zarozki był wielki
    Wiater mu pomogoł - pryndko trowioł belki

    Gizela von Gaschin we izbie sie budzi
    Chce uciyc ze łognia - na darmo sie trudzi
    We strachu sie ciepie na łobroz łod przodka
    I schodzi w podziymia głymboko do środka

    Ze kaczkom tom złotom uciyko lochami
    Juz ledwo mo siyła przebiyrać nogami
    Zymdlała i ptoka po drodze straciyła
    Jakosik wylazła jak sie łocuciyła

    Śmiertelnie zmynczono do grafa dotarła
    I jymu na rynkach juz wtedy umarła
    A kaczka we lochu do dzisioj kajś leży
    Kedyś jom szukali - teroz niy chcom wierzyć

    Że to jest legynda nojczyńści godajom
    Po prowdzie to przeca pojyńcio niy majom
    Jak lochy pod zamkym sie ciongnom daleko
    Tyn skarb tam na śmiałka ciyrpliwie durś czeko.
  • broneknotgeld 28.09.03, 10:03
    Legynda ze Ksionża

    We jarze Pełcznicy olbrzim mioł lyże
    Kery był wielki choby te wiyże
    Łon na dodatek był miynsożerny
    Nawet na ludzi pieron pazerny

    Boli sie bestoż wszyscy go tukej
    Kto go pokono? - Ze świycom szukej
    Dyć uradziyli razu jednego
    Prosić ło pomoc Bolka ślonskego

    Zwołoł wojokow Bolko Wysoki
    Zaczli budować pod jego łokym
    Wele Pełcznicy wielko strażnica
    Kero wyrosła nad okolica

    W końcu sie olbrzim tym wnerwioł srogo
    Berga se dzwignoł - postompioł nogom
    A w tym momyńcie coś jego siyły
    Pieronym drapko go łopuściyły

    Berga mu spadła na samo gowa
    I pod już martwy - tako niyboga
    Zloł sie ze skałom - dyć glaca jego
    Jest czubkym Skały Olbrzima - tego.
  • broneknotgeld 28.09.03, 10:04
    Liszka z Cisow

    We stawie przi zamku miyszkała wodnica
    Nojpiyrw niy wiedziała ło tym okolica
    Karlusy ślypiami za niom durś kryńciyli
    Dobrze że sie w stawie skiż niyj niy topiyli

    Rycerz jom uwidzioł ło piykny postawie
    Zakochoł sie we niyj bez pamiyńci prawie
    Dyć tym razym Liszka dała serce swoje
    Szczyńśliwie żyć mieli przi stawie oboje

    Pech że jom podglondnoł sagato we wodzie
    No i sie skończyło na miłosnyj szkodzie
    Zniknyła wodnica - łon zginoł na wojnie
    Przi zamku zaś dzisioj w nocy niyspokojnie.
  • broneknotgeld 28.09.03, 10:05
    Generał na Wielki Sowie

    Dwiesta lot chodzioł po Wielki Sowie
    Generał ze orderami
    Skond sie tu znoloz? Niy wiedzioł czowiek
    Dowiydzcie sie tego sami

    Miejscowi ludzie znali go z tego
    Że szuły miywoł ze glasu
    Czasym dokuczoł im do żywego
    I uciekali ze lasu

    Pewnie to jakiś duch był złośliwy
    Ze downych wojynnych czasow
    W Polsce przestały dzioć sie te dziwy
    Chyba sie wynios zawczasu.
  • broneknotgeld 28.09.03, 10:06
    Kasztelanka Gośka

    Gośka w bogactwie na Grodnie żyła
    Łod kasztelana dyć cerom była
    Daleko trza by gryfniejszy szukać
    Karlusy do niyj zaczyli klupać

    Miała we życiu jednak utropa
    Fater starego chce jyj dać chopa
    Jego bogactwo jom nic niy nyńci
    Bo gryfny germek prawie z niom kryńci

    Na tych zolytach ich prziłopali
    Smutno już potym poszło to dali
    Gośka starego za nic niy chciała
    Za swoje pszonie życie łoddała

    Jom żywcym w lochu zamurowali
    A i szacowi niy darowali
    Ściepli liplinga ze stromy skały
    I na tym romans skończoł sie cały.
  • broneknotgeld 28.09.03, 10:07
    Liczyrzepa i wongel

    Liczyrzepa w Nowyj Rudzie bergmonow pilnowoł
    By pryndko niy fedrowali znakow wiela dowoł
    A dyć czowiek na tyn wongel coś za fest łapczywy
    Jak duch gor sie richtig wnerwioł problym był prawdziwy

    Dmuchnoł metan - prziszoł wybuch - wszysko sie polyło
    I gornikow łod tyj śmierci nic niy uchroniyło
    Wiela razy to sie stało - ciynżko porachować
    Do wonglo sie jadnak garli - chcieli go fedrować.
  • broneknotgeld 28.09.03, 10:07
    W Bardzie

    Mocno hulo tukej wiater
    Godoł ło tym kedyś fater
    Że skiż diobła to sie stało
    Co mu szpasu było mało

    Spotkoł sie roz z wiatrym czort
    Chcioł pokozać wiela wort
    Bestoż wloz tu do kościoła
    Niy myśloł ło archaniołach

    Michoł go fest wdeptoł w zol
    Wiater niy wiy - dyć go żol
    Diobła czeko no i wieje
    A kto z tego sie tu śmieje?
  • broneknotgeld 28.09.03, 10:08
    Kłodzki dioboł

    Na dusze wojokow czynsto polowoł
    Niyjedyn z nich wiary tymu niy dowoł
    Dyć w końcu mieli na to tyż dowod
    Jak łon soldata do piekła powiod

    Roz pijok wielki mioł na murach warta
    No i sie notknoł na naszego czarta
    Dusza mioł czorno downo sprzedano
    Chcioł jednak jeszcze budzić sie rano

    Ze strachu czynsły mu sie te galoty
    I na czowieka wlazły siodme poty
    Synka łobiycoł za życie dolsze
    To we tym wszyskim było nojgorsze

    Jednak sie potym trocha pomiarkowoł
    Bajtla niy łoddoł i sie tym radowoł
    Wnerwiyło diobła cygaństwo chopa
    Ze tym mioł przeca richtig utropa

    Ślecioł na niego i z gory łeb urwoł
    Ze niom do twierdzy potym sie pofurgoł
    Pamiontka po niym tyż inkszo łostała
    Bagnet co niy wloz diobłowi do "ciała".
  • broneknotgeld 28.09.03, 10:09
    Herbersteinowie w Gorzanowie

    Ponoć we skarbcu pług tu czimali
    Ło kerym dziady jejich bajali
    Że chop niym kedyś wyłoroł diamynt
    A choć mioł z tego we doma lamynt
    Chcioł podarować go cysorzowi
    Ciekaw co na to władca tyż powiy

    Tako sie stało jak se wymyśloł
    I grafym zostoł choć ło tym niy śnioł.
  • broneknotgeld 23.10.03, 21:53
    Szczyrbski upior

    Ze Szczyrby czorno legynda znocie?
    Strachu przed duchym tukej niy mocie?
    Co złe - skiż pszonio przeca sie stało
    A było tego richtig niymało

    Tu rycerz Głymbosz w wieku sztyrnostym
    Cerze powiedzioł _ Wydać sie mosz ty
    Pódziesz za Tyczka - somsiod bogaty
    I chocioż stary prziśle ci swaty

    Co miała robić ta gryfno frela?
    Pszoła modymu już downo wiela
    U fatra jeji za giermka służoł
    Dziyń mu bez lipsty jak rok sie dłużoł

    Frelka z karlusym uciykać chcieli
    Dyć sie rycerze ło tym zwiedzieli
    Zasadzka na nich szprytno zrobiyli
    No i kochankow pryndko ubiyli

    Fater som dzidom wpiyrw zabioł cera
    Mało mu było - jasno cholera
    Pod świyrkym giermka wzioł we łobroty
    Aż mu łodpadła gowa ze kloty

    Dziejom sie dziwy teroz po ćmoku
    Niy radza zbłońdzić ci tu boroku
    Bo możesz spotkać bez gowy zjawa
    Uwierz - to niy jest wcale zabawa

    Gowa pod pachom czimie łod wiekow
    Pitej stond pryndko dobry czowieku
    Bo ciała dziołchy ci koże szukać
    A jak niy znojdziesz - do grobu klupać

    Bajajom ludzie - klontwa ustanie
    Jak sie świyrk-świadek piastunym stanie
    Ze pnia kołyska czeba wystrugać
    Z keryj dzieciontko na świat mo mrugać

    Prowda czy bajda? Jo powiym tela
    Z upiorym spotkać sie niy łośmiela
    Świyrk sie już downo łobaloł tukej
    A rady na to lepi miy szukej.
  • broneknotgeld 24.10.03, 21:32
    Skarb

    Jak zamek we Szczyrbie zniszczyli husyty
    Ponoć we ruinach skarb zostoł ukryty
    Raubritter Jan Dziki przeca tu grasowoł
    Co cynnego nakrod we lochach se chowoł

    Łod lot jego cera beczek durś pilnuje
    Zaklynto we kamiyń tyż tu pokutuje
    Czi beczki som pełne - do dzisioj czekajom
    Na ludzi co Boga zowdy w sercu majom.
  • broneknotgeld 04.01.04, 19:35
    Roz piastowski ksionże gon mioł w gynstym borze
    Dyć cosik sie zwierza przed niymi pokryły
    Soronia łoboczoł i rajtnoł - moj Boże!
    Już inksi dogonić niy mieli go siyły

    A soroń pomykoł durś dali i pryndzy
    Aż stracioł sie ksiyńciu w nojwiynkszy gynstwinie
    I kapnoł sie borok że w borze łon w nyndzy
    Pewnikym niyszczyńście go tukej niy minie

    Stropiony sie błonkoł przez noc cołkym ciymno
    Beboki mu jakeś czasami świsnyły
    Aż słonko już blysło - przestało być zimno
    "O pole!" - zawołoł ze całyj swyj siyły

    Bo trefioł na wielko przi Odrze polana
    Tu znodła go w końcu stropiono drużyna
    No i ze rozkazu jasnego ich pana
    W tym miejscu jest dzisioj Opola dziedzina.
  • broneknotgeld 08.01.04, 23:05
    Ło Nyndzy wele Raciborza

    Ksionże na Raciborzu mioł w tych stronach gon
    Dyć zwiyrz przed niym jakoś se ciyngym pomykoł
    Zmynczony zgłodniały był w końcu nasz pon
    Chcioł se kajś łodpocznońć- za tym prawie rzykoł

    Malutko chatynka na polanie stoła
    Kaj ksiyńcia poniosły zmynczone już nogi
    Zoglondnoł do środka - gymba sie niy śmioła
    "Łoj nyndzo - łoj nyndzo" poratuj niybogi

    We środku chop stary na ławie se leżoł
    Jedzynio i wody niy było tam wcale
    Pewnie już nastympny nocki by niy przeżoł
    Bo na pomoc przeca szansy prawie wcale

    Pon konskym kamiynia na drzwiach szkryfnoł chaty
    "Oj nyndzo - oj nyndzo" legynda nom baje
    Niy wiymy czy pomog choć był przebogaty
    A Nyndza? - Jyj przeca tu kożdy durś pszaje.


  • broneknotgeld 12.01.04, 18:17
    Raciborsko legynda

    We tyj okolicy miyszkała rodzina
    Raci - tako zwani i mieli tyż syna
    Kery chcioł se uczyć kowalskego fachu
    W świat szoł po nauka bo niy mioł łon strachu

    Robota se znoloz w kuźni u Madziara
    Już nawet ło cera majstra mioł sie starać
    Roz poloz na rynek - złodzieja ścinali
    Skiż niego mu życie inaczyj szło dali

    Bo rabczyk przed śmierciom coś godoł ło złocie
    Przi Odrze ukrytym - "Tam dymby czi mocie
    Ze skarbym bogatym - som beczki pod niymi
    Dyć trza je wykopać terozki ze ziymi"

    Niym ducha wyzionoł - zgładziyli go kaci
    Dowiedzioł se jeszcze tyn nasz Antek Raci
    Że jedna z tych beczek na kościoł mo dać
    Drugo do ubogich - trzecio dlo sia brać

    W mig wrocioł czeladnik do swoji rodziny
    Wykopali beczki ze boru dziedziny
    Bogaci se teroz pierońsko tu stali
    Łoni tyn Raciborz ciyngym budowali

    Jejich miano nosioł i fortuny z bora
    Na starość mynczyła jednak Antka zmora
    Poszły na to przeca cołke beczki czi
    A Ponboczek paczy - ło grzysznikach wiy

    Jak już Raci pomar - mioł grob we kościele
    Strach wielgachny naszoł raciborske sztele
    Co nocy świontynia łopryskano juchom
    Wlyź tam - to niy zdało sie nojwiynkszym zuchom

    W końcu poszukali jednego skazańca
    Śmierć abo tyn kościoł? - spytali "wybrańca"
    Wolnościom do tego mocno połechtali
    No i poleciało to wszysko już dali

    Farorz go w kościele na nocka łostawioł
    Uwidzioł co Raci we połnoc wyprawioł
    Bo wyloz ze grobu - seblyk śmiertelnica
    I zaroz krew wyszła trupowi na lica

    Co potym sie dzioło - naszkryflać niy idzie
    Potympione dusze zebrały sie w biydzie
    I Antka smagały kaj yno sie dało
    Stond sie juchy tela w kościele zbiyrało

    Kur zapioł -już dniało - duch wdzioł swo koszula
    I poloz do grobu - dziyń noc mioł utulać
    Skazaniec co widzioł pedzioł farorzowi
    A łon na to godo co mu niy łotworzy

    Mioł schować koszula - no ta śmiertelnica
    I ducha zapytać ło swo tajymnica
    Za kero durś ciyrpi na padole naszym
    Bogobojnych ludzi w Raciborzu straszy

    Dyć tako sie stało - ksiondz sie chnet dowiedzioł
    Za co Antek Raci we czyśćcu durś siedzioł
    Majontek po niymu łon zocnie podzieloł
    Raciborz już szczyńście swym miyszkańcom ścieloł.
  • broneknotgeld 18.01.04, 11:07
    Ło Koźlu

    Wszyskim tukej wele Odry czynsły sie galoty
    Jak przez las jechali ciymny - niy skuli gupoty
    Raubriter tu w zamku siedzioł - Kozioł miano jego
    Grabioł wszyskich - nikt niy wiedzioł jak dopaść istnego

    Ślonskym niosła sie zło sława - dyć trefiyła dali
    Na dwor w Wiedniu kaj sie dycki piyknie fajrowali
    U cysorza służoł Kozioł - brat łod rozbojnika
    Pedzioł że sie z niym rozprawi i dosiod konika
    Wzioł wojokow do pomocy - oficer był wyrszy
    I zajechoł pod tyn zamek - łon na przodzie - piyrszy

    Jak brat z bratym sie spotkali - wiela tyż cieszyli
    Zbojnik nawet skarb pokozoł - to co zagrabiyli
    Dyć do dzisioj łosprowiajom - było tego tela
    Że zowiścić mogła złota i cesarsko sztela

    Jak na wieży byli łoba rabczyk dojrzoł kupcow
    Już chcioł pryndko zrobić ze nich yno gołodupcow
    Dyć brat na to niy zezwoloł - ściepnoł go ze wieży
    Uślintany potym paczoł jak łon w dole leży

    Coby zmazać bratobojstwo - pokuta dać Bogu
    Swoj majontek i skarb jego łostawioł w tym progu
    Pryndko rosło miasto Koźle bogate i zocne
    Fundowane skuli zbrodni ale przeca mocne.
  • broneknotgeld 27.01.04, 21:36
    Pieczara w gorze wele Cisowy
    Ło niyj legynda to głosi
    Dwa bratki tukej chroniyli gowy
    Ło litość niy mogli prosić

    Kozłami przeca sie nazywali
    Niyczyste sumiynie mieli
    Po świecie zocnych frelek szukali
    I ciongli je do ty szteli

    Zowdy już pszonio koniec był tukej
    Śmierć je czekała z ich rynki
    Ciał jejich nawet na prożno szukej
    Choć czasym słyszeli jynki

    Roz jednak to sie im niy udało
    Dziołcha sie kapła w co grali
    Przez las uciykła bo była śmiało
    Rano już na nich czekali

    Żywych z pieczary ich niy wyciongli
    Czi dni sie bracia broniyli
    Sami w kostuchy kosa sie wprzongli
    Wzajym se życie skrociyli

    W te miejsce dzisioj strach nawet chodzić
    Jak połnoc rowno już bije
    Sercu to przeca może zaszkodzić
    Chyba ci życie jest miłe

    Ło tym bajajom - Na samyj gorze
    Byki sie w noc pokazujom
    Ryczom upiory we nocnym chorze
    Łoczami łogyń aż sujom

    Dyć łod tych Kozłow cołko dziedzina
    Koźlym nazwali łod downa
    Prowda w tym abo nawet jyj niy ma
    Niy chca cie robić za błozna.

  • broneknotgeld 22.01.04, 07:45
    Jak coś jeszcze byś mioł - wciepnij
    No i tukej czyńści wdepnij.
  • broneknotgeld 08.02.04, 10:24
    Ło Rudach Wielkich

    Władysław Opolski gon wiod przez te lasy
    Bor gynsty i zwiyrza tyż było tu mocka
    Dzik ranny - bok cołkym już mioł przeca krasy
    Umykoł przed ksiyńciym - dopadła ich nocka

    Zabłonkoł sie pan nasz i fesztrow potracioł
    Aż ujrzoł polana ze dymbym pośrodku
    Zmynczony lyg pod niym - niymocom zapłacioł
    Nikt niy mog pocieszyć chociożby tom godkom

    Na noc jakby jedna łon tukej zamiyszkoł
    I w końcu na niego syn prziszoł głymboki
    Przezocno opieka - ta Bosko - mu blysko
    To wiedzioł - w tym miejscu niy bydzie borokym

    Jak słonko ło ranku nad lasym stanyło
    Łobudzioł sie zdrowy i nic niy zmynczony
    Dyć jakby to cudym we gowie sie wziyło
    Że klasztor przez niego tu mo być fondniony

    Tyż tako sie stało - cystersy tu prziszli
    Ta leśno dziedzina zajyli dlo siebie
    I na chwała Boga - po ksionżyncy myśli
    By na Ślonsku było tyż trocha jak w niebie.
  • broneknotgeld 07.03.04, 14:58
    Toszek

    Łoziym wiekow tymu graf miyszkoł tu zocny
    We pobliskich lasach łon lubioł polować
    Gon prowadzioł Toszek - pies we łowach mocny
    Dyć inksze przi niymu niy śmiały se stować

    Roz łodbioł daleko - stracioł swego pana
    Pogonioł za dzikym - łapy fest poniosły
    Aż trefioł na pełno tych zwiyrzy polana
    Tam lochy odyńce w szczympy go rozniosły

    Graf nadjechoł w końcu - wzion to co łostało
    Pochowoł go we wsi - tyż dynkmal postawioł
    No i take miano już miejsce to miało
    Toszek przeca swoje i psa imie wsławioł.
  • broneknotgeld 26.04.05, 18:21
    Łobrona Gliwic

    Jako to było z tymi Szwedami
    Kierzy se znodli pod Gliwicami?
    Rożnisto godka jo słysza ło tym
    Prowda to abo jakeś gupoty

    Ponoć chnet mieli te mury zdobyć
    Copnońć Gliwice im prawie szłoby
    Dyć to skiż babow sie niy udało
    Bo jim se bronić miasta zachciało

    Razym ze smołom krup nawarzyły
    I z tym na murach drapko stanyły
    Toż loły Szwedow jako umiały
    Tako Gliwice uratowały.
    --
    forum.gazeta.pl/forum/71,1.html?f=28940
  • broneknotgeld 08.11.08, 23:33
    Pyskowicko zjawa

    Biołom Damom jom tu zowiom
    Bo se tako nocom zjawio
    Jo wom ło niyj połosprowiom
    Czamu strach nom ciyngym sprawio

    Se w niymieckich czasach dzioło
    Gastaus stanoł w Pyskowicach
    Służbie było w niym wesoło?
    Mo Szolcowo sroge lica!

    Toż wszyskimi poniywiyro
    Za harowa licho płaci
    Na biydokow źle zaziyro
    Bele łona sie bogaci!

    Ech, "Germania" w Pyskowicach
    Z gospodyni swyj słynyła
    Dyć wiedzieli - sekutnica!
    Istno tego tyż niy kryła

    W końcu śmiertka jom skosiyła
    Pani Szolc na marach leży
    -Bioło Dama se zjawiyła
    W to musicie teroz wierzyć

    Na nic ksiondz mogiła kropi
    -Dusza błonko kajś po grodzie
    Jako żywy to spokopi?
    Niychej z bliźnim zowdy w zgodzie

    Bo za zło co inkszym sprowi
    Może ciynżko pokutować
    Bioło Dama ktoś wybowi?
    Na jyj grobie z downa trowa.

    --
    Ruda Śląska - stolica fraszki
  • broneknotgeld 31.01.04, 09:50
    "Jako było na poczontku"

    Ponboczek w świata poczontku
    Ciźba we tym raju mioł
    Szkryfna - niy poskompia wontku
    Jak sie za aniołow broł:


    Liczba jejich wielko była
    Czyńść sie nawet buntowała
    W hardych zło siedziała siyła
    Dyć w tym miara sie przebrała

    Pedzioł w końcu - "Z raju fora"!
    Tym co mu sie przeciwiali
    Tako prziszła na nich pora
    Bestoż pryndko uciekali

    Nojgorsi do piekła wdepli
    Bo podpadli aż na amynt
    Mieli teroz richtig ciepli
    Dyć sie na nic zdoł ich lamynt

    Inksi poszli se na bory
    Tam ich spotkosz przeca dzisioj
    Duchy złe - tyż jakeś zmory
    Pewnie ło nich żeś usłyszoł

    Wiela tyż nurknyło w morze
    Stawy rzeki i jeziora
    To utopce - broń cie Boże
    Z niymi zowdy ciynżko pora.
  • broneknotgeld 31.01.04, 21:33
    Rydułtowski utopek

    Rydułtowski utopek wele drogi miyszkoł
    We przikopie co latym durś zalono była
    Nocom z niyj wychodzioł - na zielono blyszczoł
    A jak szoł łożarciuch - był już w jego siyłach

    Naprane chopisko smyczoł we barzoły
    Nad grobla prowadzioł kaj woda głymboko
    Przestało mu w gowie tompać ze gorzoły
    Stykło sie przerzegnać i dychnońć głymboko

    Dyć stracony czowiek jak wypioł za wiela
    Som włazioł do wody - choćby tego chcioł
    Przeznaczono była już mu inkszo sztela
    A utopek dusza pod garniec se broł.
  • broneknotgeld 01.02.04, 10:12
    Przekludzka utopka

    Wele Rydułtow jechoł Sikora
    Naroz habeta samo stanyła
    Choć nocno była już przeca pora
    Droga sie jakby blaskym pokryła

    Czowieczka dojrzoł wele maneli
    Ło przewoz tego łon grzecznie prosi
    Bo sie przekludzo do inkszy szteli
    I przeca sypnie tyż za to "grosik"

    Jako se życzoł tako se stało
    Kajś wele stawu z fury to ściepli
    Sypnoł Sikorze złotkow niymało
    Zaroz ze tego było mu ciepli

    Jak trefioł do dom i przespoł nocka
    Na swoj zarobek furmon se kuknoł
    A tam piniyndzy niy było mocka
    Yno guziole. Utopek - mruknoł.
  • broneknotgeld 03.02.04, 20:39
    Chlyb dlo utopka

    Rozmoczony chlyb we wodzie
    Utopkowi fest "smakowoł"
    Starzik prawioł ło przigodzie
    Keryj som sie fest dziwowoł

    Wele stawu szoł we nocy
    Łod piekorza z mitagszychty
    Dojrzoł chopka co mioł łoczy
    W kerych było coś niyrichtig

    Dyć zapaczoł sie w nie jakoś
    Wloz do wody po kolana
    Naroz coś go capło - psiakość!
    To ci była wielko szpana

    Mioł dwa chleby w swojim necu
    Kaj głymboko tam je wciepnoł
    Jak ofiara skiż poczeby
    A na koniec głośno hepnoł

    Cud sie stoł - bo z wody wyloz
    Szułow nawet mokrych niy mioł
    Pryndko do chałupy prziloz
    Choć za serce durś sie czimoł

    Chlyb powszedni miyj we zocy
    Łod utopka łon tyż "broni"
    Łodbiyro to jymu mocy
    Se uciekniesz bo niy goni.
  • broneknotgeld 30.11.04, 10:17
    Jedyn utopek ze Ornontowic
    Pszoł gryfny frelce - dyć chopie to wiydz
    Że łona w zocy go nic niy miała
    Z utropy wysła mu woda w gałach
    Podobnoś dostoł chnet "wodowstryntu"
    I se zatracioł - aż do imyntu.
    --
    forum.gazeta.pl/forum/71,1.html?f=261
  • broneknotgeld 05.12.04, 10:09
    Cd. - ło utopku ornontowickim

    Morał w tym taki - płaczki utopka
    Umiom wykończyć nawet i chopka
    Ornontowicki freli zaś mało
    Łogyń w niyj wiynkszy niżby se zdało.
    --
    forum.gazeta.pl/forum/71,1.html?f=261
  • broneknotgeld 10.12.05, 13:57
    Muzykalny djoboł ze Knurowa

    W samym poczontku łońskego wieku
    Knurow mioł piykno swoja aptyka
    Z kery pigulorz żył dyć czowieku
    Djoboł go zaczoł zaroz fest tykać

    Dom chnet przi zamku kościoł po blisku
    Tu łorganista mioł swoja szkoła
    Trza se kurować czynsto ludziskom
    Choć som we strachu skuli djoboła

    Toż tuplowano utropa tako
    Gyszeft źle idzie - dusza mynczono
    Czort już se cieszoł - aptykorz płakoł
    I zdało mu sie że w końcu skono

    Szczyńściym nad samom aptykom prawie
    Ślusorczyk mody se pomiyszkiwoł
    W dziyń ni mog myśleć łon ło zabawie
    Nocom na krzipkach przepiyknie grywoł

    A że mioł grajfka richtig do smyka
    Djoboł pod dźwiyrza jego prziłazioł
    Karlus skiż tego czyńści chcioł rzykać
    Bies jednak w końcu i tu pysk wrazioł

    Drapko mu krzipek smyk w graba dowo
    Grif insztrumynta wkłodo do drugi
    Dyć recht w tym - wcale sie niy wydowo
    Szpon jego wiela zdo sie za dugi

    Toż do szraubsztoka wkłodo pazury
    Coby ślusorczyk je łofajlowoł
    Czy mioł żałować djobelski skory?
    Dokryńcioł mocno i niy folgowoł

    To ci dopiyro prziszła utropa
    Z kopyta wielke iskry leciały
    Tako w niywoli teroz u chopa
    Wył aże słyszoł go Knurow cały

    W końcu łobiycoł dom niy nowiydzać
    Że sie doł chycić gańba fest była
    Dyć jak krzipkowi nauczka by dać?
    -Przeca po jego stronie zło siyła

    Nic yno zdybać go trza kajś ińdzi
    Tako durś czimoł sie łon Knurowa
    Tref w szponie graby karlusa wpyńdzi
    Piekło go czeko - jego w tym gowa!

    A mioł ślusorczyk lipsta łognisto
    Gorko choć chudo jak szczapa łona
    Dyć w Szlostauchu woda durś czysto
    Lubieli na niym pływać łodkoma

    Tako przi stowie bies se pojawioł
    Już mioł liplinga do piekła porwać
    A dziołcha z kerom dobrze sie sprawioł
    Zdo sie terozki chce biesa dorwać

    Kece we gorze - doł w cołki krasie
    Toż tyn rogaty zaczoł aż skokać
    Czamu uciekosz gupi mamlasie?!
    Bies tako woło - Niy chca szraubsztoka!

    Jest we Knurowie aptyka zocno
    Świynto Barbara mo nad niom piecza
    Słychać tam krzipki durś porom nocnom?
    Czy jo na prożno tako wom kleca?

    --
    forum.gazeta.pl/forum/71,1.html?f=28940
  • broneknotgeld 01.09.08, 20:07
    Knif na utopka

    Trza plaskowka w kapsi nosić
    Jak utopek bydzie prosić
    To niych se napije z gwinta
    Dali to już jego piynta.
    --
    Ruda Śląska - stolica fraszki
  • broneknotgeld 01.09.08, 20:21
    W toni bydom potym harce
    Połodkrywo wszyske garce
    Puści dusze łod topielcow
    Som zaś chyci se widelcow
    I pogoni utopkowo
    Dyć - se możno yno zdowo.
    --
    Ruda Śląska - stolica fraszki
  • broneknotgeld 20.10.08, 09:05
    Na dobranoc
    =====================

    Utopkowo tragedyjo?

    Familjo utopkow we Kłodce miyszkała
    Kajsik blisko dworu łod grofa zocnego
    Kuźnica halymbsko coś ło tym wiedziała
    Dyć jako mom siyngnońć pamiyńciom do tego?

    Ponoć jedyn starzik piyrwyj ło tym prawioł
    Ćwierć tysionca rokow tymu to sie dzioło
    Tref Donnersmarckowi koniec życio jawioł
    Bestoż i utopkom niy było wesoło

    Pon ducha wyzionoł - w żałobie Halymba
    Farorz chnet łodprowio mszo za dusza jego
    Uwidzieli na niyj i utopca gymba
    Poczontkym niyszczyńścio to było istnego

    Fest sie parafiany kochłowicke burzom
    Stwor z Kłodki w kościele! Jako to sie godzi?!
    Już nikierzy nawet koniec świata wróżom
    Ze tego niyszczyńście nojwiynksze sie rodzi

    Uradziyli tako - w noc świyntego Jana
    Ksionżoszek kropidłym nurt wody pokropi
    Bydom we świontyni rzykać aż do rana
    Kłodka niychej poli łobrzidy co topi!

    Ech - wrała fest woda aż wyparowała
    Familji utopkow już jednak niy było
    Sie furka ze niymi ku Odrze kulała?
    A możno to yno tu komuś prziśniyło?

    --
    Ruda Śląska - stolica fraszki
  • broneknotgeld 07.02.11, 14:09
    Jest coś na forach
    www.dziennikzachodni.pl/fakty24/365873,potwory-na-naukowe-spory,id,t.html
    Ło ślonskich stworach.
    --
    Ruda Śląska - stolica fraszki
  • broneknotgeld 08.02.11, 00:12
    Niy ma sie co śmioć
    Trza beboka boć.
    --
    Ruda Śląska - stolica fraszki
  • broneknotgeld 10.02.11, 08:46
    Podciep

    Podciep w doma -durś łostuda
    Kaj utropa tam niy nuda
    Łocyganioł rodzicieli
    Strzimać bydom to musieli
    Kara - niy dopilnowali
    Podciep chałpa im łobali.
    --
    Ruda Śląska - stolica fraszki
  • broneknotgeld 10.02.11, 08:48
    Dejcie pozor

    Dejcie pozor na podciepa
    Z niego wcale niy przilepa
    Kej dzieciontko pociep w lesie
    Zły tref familiji niesie.
    --
    Ruda Śląska - stolica fraszki
  • pejsaty 31.03.04, 09:35
    legendy, podania, mity, basnie,
    w nich pamiec pokolen nie zagasnie
  • broneknotgeld 31.03.04, 17:56
    Ano ano - jest i bydzie
    Wiyncyj legynd tukej przidzie
    Dyć do tego trza spokoju
    Niy forumowego boju.

    Trocha legynd jest jeszcze w tymacie "Tyn Dolny konsek Ślonska".
    --
    forum.gazeta.pl/forum/71,1.html?f=261
  • broneknotgeld 04.05.04, 08:41
    Bioło Dama z Chudowa

    Graf ze Chudowa we Czechach bawioł
    Tam poznoł tyż zakonnica
    Ło jyj urodzie kożdy durś prawioł
    -"Gryfne niy yno som lica"

    Prziszło ze tego pszonie im wielke
    Frelka z zakonu uciekła
    Za nic przeszkody były w tym wszelke
    Razym niy boli sie piekła

    W Chudowie cicho sie już pobrali
    Dyć radość krotko ich była
    Ślubno choroba pryndko powali
    Kostucha do sia jom wziyła

    Rycerz pochowoł jom we Orzeszu
    Żył som we srogi żałości
    Wiedzioł że przeciw Bogu fest zgrzeszoł
    W duszy niy chowoł łon złości

    Dyć co sie dzieje? W nocy przichodzi
    Do zamku przepiykno zjawa
    Strach z pszoniym jakoś sie razym godzi
    Choć to już niy jest zabawa

    Co noc doglondo chopa swojego
    Na droga jednak narzeko
    Bo gynstym lasym łazi do niego
    Wiy że łon na nia tyż czeko

    Dyć graf nad duchym sie ulitowoł
    Tunel kopali mu sługi
    Tym jakby znak swyj miłości dowoł
    Aż do Orzesza jest długi

    Choć z downych wiekow historio cało
    Godajom ło tym w Chudowie
    I Bioło Dama tu zno niymało
    Niyjedyn widzioł jom czowiek

    Bo wieczno jeji przeca pokuta
    Do dzisioj łazi po murach
    Słychać tyż czasym smutnawo nuta
    Co traci sie kajsik w dziurach.

    --
    forum.gazeta.pl/forum/71,1.html?f=261
  • broneknotgeld 13.05.04, 16:42
    Cudowne źrodło stanicke

    We Pilchowicach jest tyż Stanica
    Za niom źrodełko cudowne
    Wiy ło tym cołko ta okolica
    Bajajom legyndy downe

    Princ Raciborza tu przed wiekami
    Błonkoł stanickim se borym
    Wilki go chciały rozszarpać kłami
    Jeszcze do tego był chory

    Dyć to źrodełko znoloz ze wodom
    Łostatkym siył sie jyj napioł
    Zdrowy szczyńśliwy wrocioł łon do dom
    Zwiyrz żodyn go niy ucapioł

    W Stanicy coś tyż inkszego prawiom
    Jak chyńć mosz nagło na picie
    To cie te wody wcale niy zbawiom
    Na łodwrot - skończysz już życie

    Rożnie godajom ło źrodła cudzie
    We zocy ciyngym je majom
    Niyjedyn bez to po woda pódzie
    Choć możno yno jo bajom.
    --
    forum.gazeta.pl/forum/71,1.html?f=261
  • broneknotgeld 15.05.04, 20:40
    Bioło Dama ze Toszka

    We piyrszy dziyń Wielkanocy
    Zamek toszecki łobchodzi
    Spotkosz jom tu ło połnocy
    Szterować freli niy godzi

    Bo łona fatra durś szuko
    Co pomarł z wielki żałości
    We dzwiyrza komnat postuko
    Czasym wystraszy tyż gości

    Tako tu bywo łod wiekow
    Skiż historyji ponury
    Kero cie wzruszy czowieku
    Choć żeś ze gruby jest skory

    Grof srogi zamkym tym włodoł
    Gnymbioł poddanych i sługi
    "Djoboł" - niyjedyn nań godoł
    Taki niy znoloz sie drugi

    Wiela skiż niego ciyrpiało
    Głod lochy inksze mynczarnie
    Na nic to wszysko sie zdało
    Ludzie kończyli tu marnie

    Dyć grof mioł sługi wiernego
    Co dboł ło pana jak umioł
    "Dioboł" żył możno skiż niego
    Choć małowiela rozumioł

    Sługa zaś cera mioł szwarno
    Skarb to był jego jedyny
    Bez niyj toż życie już marność
    Grof niy zastompi rodziny

    Zło jednak wielke czychało
    Do Gliwic fatra posłali
    Panu sie cery zachciało
    Jyj łojciec mioł być kajś dali

    Dyć frela sie łopiyrała
    Choć boła tyż zymsty srogi
    Życie za cnota łoddała
    Syn wieczny był dlo niyj błogi

    Do studni wciepli jyj ciało
    Fater znojść cery niy umioł
    Ale sie w końcu wydało
    Pan błond swoj wtedy zrozumioł

    Bo sługa pomarł z żałości
    Niym jednak ducha wyzionoł
    Klontwa nań ciepnoł we złości
    Grof zginoł a zamek runoł

    Yno ta dziołcha na bioło
    Ciyngym ło wszyskim pamiynto
    łojca na murach durś woło
    Co roku - jak momy świynto.

    --
    forum.gazeta.pl/forum/71,1.html?f=261
  • broneknotgeld 18.09.04, 15:24
    Jak Lubsza powstała

    Na gorze Grojec był dwor bogaty
    Rycerz tam miyszkoł ze familijom
    Skiż gryfny cery łaziyli swaty
    Dyć żodyn jeji rynki niy przijon

    Na tych galantow niy spoziyrała
    Była przi tymu w wielki utropie
    Bo parobkowi downo już pszała
    Co z tego wyszło? -Dyć wiymy chopie

    W końcu se przeca wszysko wydało
    Łojciec dziołucha zawarł do wieży
    Sługi se z zamku psami przegnało
    Ciynżko mu było ta krziwda przeżyć

    Pon cera jednak uwolnioł z czasym
    Czynsto markotno po prowdzie była
    Śpiyw jeji nocom lecioł w dal lasym
    We pszoniu richtig wielko jest siyła

    Jak roz dziedzice stond sie wybrali
    Do Koszyńcina na mszo w kościele
    Lipling przijechoł ze wielki dali
    Ze swojom lipstom poczynoł śmiele

    Dyć fater zdonżoł z kościoła wrocić
    Mieczym cioł mocno - zleciała gowa
    Tyż przeciw cerze mioł se łobrocić
    Pochłoń jom ziymio! -To jego mowa

    I tako tukej pryndko se stało
    Zamek ze frelom zapod we ziymia
    Serce rodzica ze żalu łkało
    Do szczyńścio jednak powrotu niy ma

    I choć mioł dworow inkszych łon wiela
    Tu za gniyw srogi mioł pokutować
    Była mu LUBSZO niyszczynsno sztela
    Swoj proch we ziymi tukej chcioł "schować".

    --
    forum.gazeta.pl/forum/71,1.html?f=261

Popularne wątki

Nie pamiętasz hasła

lub ?

 

Nie masz jeszcze konta? Zarejestruj się

Nakarm Pajacyka