Dodaj do ulubionych

Ślonsko polityka

27.09.03, 23:08
Zwionzek Gornoślonski

Zwionzek Gornoślonski wczas to sie niy budzi
Czy łon chce coś robić czy yno marudzić
Z tych apeli przeca niywiela nom przidzie
Łone niy pomogom wcale w naszyj biydzie

Lepiyj jednak teroz niż niy wstować wcale
Hercowa brać w łapy bo darymne żale
Łod lot Zwionzek yno polskość mioł we zocy
Możno teroz ślonskość wlyzie mu przed łoczy.
Edytor zaawansowany
  • broneknotgeld 27.09.03, 23:10
    Łod lot.

    Łod lot władza regionalno
    Mieli tukej my coś marno
    Zwionzku - w swoje gowy klupej
    U sia winy tyż poszukej
    Chcesz kamiyniym piyrszy ciepać?
    Z tego ci sie bydzie hepać.
  • broneknotgeld 27.09.03, 23:26
    W KZK GOP

    Śmiałek napomknoł ło swyj pyndzyji
    Co inksi jakoś z ulgom przijyli
    Zaroz sie miynksze stały Gliwice
    Możno i Bytom łodmiyni lice

    Dlo pasażera dobrze by było
    By jedyn bilet piekło niy wziyło
    Szło by sie we tym chyba potracić
    A w końcu wiyncyj za jazda płacić

    Kto jeździ dużo tyn mo miesiynczny
    Za taki bilet przeca jest wdziynczny
    Dyć problym wielki z tym byłby potym
    Śmiałek - niy chytej sie już roboty.
  • broneknotgeld 27.09.03, 23:28
    Zmondrzeli?

    Myńszość niy chce by z Wrocławiym "szło" do Unii te Opole
    Co sie stało że ich teroz tyn nasz konsek już niy kole?
  • broneknotgeld 27.09.03, 23:31
    "Czorno dziura"

    To ponoć teroz słowa Hausnera
    Mie zaroz przi tym biere cholera
    Po prowdzie - trocha tyż żol czowieka
    Ta "czorno dziura" na niego czeka
    To yno mały punkcik w kosmosie
    A co czerwone w nia wciepać do sie.
  • broneknotgeld 29.09.03, 18:44
    W P K i W

    Wielgi Jorg sie w grobie wierci
    Spokoju niy mo po śmierci
    Z gory na tyn park durś bliko
    Myśl ta gowa mu przeniko

    "Jo żech to dlo Ślonska robioł
    By park region nasz durś zdobioł
    Dzisioj tam sie wszysko sypie
    Nawet zoo już ledwo zipie
    A miasteczko te wesołe
    Tyż mo konto w banku gołe
    Na psy jakoś schodzi wszysko
    Zaś tu bydzie rumowisko".
  • baba2 29.09.03, 21:21
    Poruszyłeś temat który ostatnio męczył mnie na wakacjach.
    Byłem w Zoo w Hiszpani,jak sie okazuje jest własnością prywatną i nikt do tego
    noie dokłada.Dziennie przewija się tysiące ludzi,zjadają tony żarcia,wykupują
    pamiątki a unas cały czas się płacze że nie ma pieniędzy.
    Paru komuchów się trzyma stołków i jak mówi Nowo Bytomski Farosz bogaci mają
    wszystko a biednych nawet na Zoo nie stać.Najlepiej jak wejdziemy do UNI
    odbierzemy kapitalistom ich majątki
  • broneknotgeld 29.09.03, 21:31
    Farorz chyba cosik miyszo
    Czerwonego z inkszym wiyszo
    Zresztom mie tyż nasze farby
    Malujom na gowie karby

    Jorg był przeca fest czerwony
    Łon paniskym był komuny
    A zaś we tym Radzionkowie
    Sanacyji pewny czowiek

    Wyloz farorz na ambona
    Woło - chca kameleona?!
  • broneknotgeld 29.09.03, 18:45
    Na Kutza

    Kutz zachłysnoł sie Rywinym
    Popioł jednak biołym winym
    I tak głośno przi tym hepnoł
    Że na inkszych tyż coś wciepnoł.
  • broneknotgeld 29.09.03, 18:49
    Niyświynto wojna

    Kutz sie zabroł za Bercika
    Kocio chce mu grać muzyka
    Jo pamiyntom taki grzeszek
    Kutz - spadochron. Pod nim Leszek.
  • broneknotgeld 29.09.03, 19:35
    Nowo Rada

    Nowo Rada momy Radia Katowice
    Bardziyj jest czerwono niż som okolice
    Siedzom tam terozki wielgachne "radiowcy"
    Co durś majom chyntka na szcziżynie owcy.
  • broneknotgeld 30.09.03, 22:18
    Gornictwo przeca momy państwowe
    Jak Polska zdrowo i gruby zdrowe
    A że łod downa kraj nom choruje
    Bez to i wongel kiepsko sie suje
    Szpecom w Warszawie ta myśl niy nowa
    - Jak głowa choro - utnońć trza głowa.
  • broneknotgeld 30.09.03, 22:19
    To już jest staro śpiywka Warszawy
    Dzisioj coś czyńści jom słychać
    Tam sie nikerzy niy zdajom sprawy
    Że wongel niy do nom zdychać

    Styknie nom jeszcze na lata długie
    Bydzie nos grzoł i nom świycioł
    Bergmony bydom robić na grubie
    A głupio godka bych wycioł.
  • broneknotgeld 30.09.03, 22:21
    We werkach państwowych
    Tracom rozum z głowy
    Polski tyj barony
    I lud łoświycony
    Trza spytać bergmona
    Kaj jest ta mamona
    Na kero harato
    Za lichom wypłatom

    Spytejcie hajera
    A powiy cholera
    Jo robia na siebie i państwo
    Płacom mi niywiela
    Ta ich karuzela
    To jednak pierońske je draństwo
    A ci tam na gorze
    We biołym som piorze
    I śmiejom sie pewno we duchu
    Że jo tu fedruja
    Żyły sie wypruja
    A łoni czimajom sie puchu
    I straszom mie jeszcze
    programy złowieszcze
    Kaj piszom że zamknom mi gruba
    Iść na bezrobocie
    I zdychać przi płocie
    To musza już zrobić rozruba
    Im wyży kajś siedzom
    Tym myni to wiedzom
    Że w wonglu podatków jest kupa
    Bez piniondza tego
    Niy bydzie niczego
    I rzond niych nom niy rżnie tu głupa.
  • broneknotgeld 30.09.03, 22:36
    Sztrajk na "Silesii"

    "U tych panow z inkszych stanow piniyndzy jest dość"
    Staro śpiywka dyć terozki zaś robiom na złość
    Gruby chcom nom pozamykać - myni wonglo mieć
    No a bergmon to jest dlo nich czasym choby śmieć
    Sztrajk zaś momy na tym dole bo to draństwo jest
    Niych nad wonglym sie pogłowiom ci ze rzondu fest.
  • broneknotgeld 30.09.03, 22:36
    Szachta jak nowo

    Na "Bobrku" "Bolek" zaś sie nom kryńci
    Wongel wyciongo do gory
    Łostanie jednak to we pamiyńci
    Że miały z niego być wiory.
  • broneknotgeld 30.09.03, 22:37
    Karyta

    Już czorno "karyta" do nos zajechała
    Stanyła przi szachtach wongel wysypała
    Ponoć łon już Polsce na nic sie niy przido
    A gruby trza zamknońć by rzond wyni wydoł

    Bergmon jednak godo - Jo niy grom cholera
    Z "warszawkom" kartami w takego pokera
    Karyta jest mocno dyć jo jom mom w rzici
    Bo karty znaczone. Aż w łoczach sie świyci!
  • broneknotgeld 30.09.03, 22:37
    Dożynki

    Plon niesymy plon
    Kyns wonglo i złom.
  • broneknotgeld 30.09.03, 22:38
    W Polsce "plonu" tego niy chcom
    Tak se nowe czasy pichcom.
  • broneknotgeld 01.10.03, 19:38
    "Rodzina Gornoślonsko"

    W "Wiadomościach Rudzkich" Leszczyny cytujom
    Jak sie pod tom Ankom ślonske nacje sujom
    Słyszołch że tam było łostudy za wiela
    Bo sie narodowi durś ta naszo sztela.
  • broneknotgeld 01.10.03, 23:07
    Cugi coroz rzodzi jeżdżom po tym Ślonsku
    Glajzy rozkrodajom tu konsek po konsku
    Wiela już banchowow nom pozamykali
    Rychło łoboczymy co bydzie z tym dali.
  • broneknotgeld 01.10.03, 23:08
    Ale kaj niykaj jest trocha lepi
    Miasta som jakby gryfniejsze
    Może coś z tego sie nom ulepi
    I życie bydzie fajniejsze.
  • broneknotgeld 01.10.03, 23:08
    Mało takich wyspow ale przeca som
    Jo ze Rudy Ślonski take konski znom
    Tam kaj dyły hołdy markety nom rosnom
    No i jakoś piykni stowo sie tu wiosnom
    Dzisioj tu niyjedno staro kamiynica
    Chocioż łod fasady łoko mi zachwyco
    Jo wiym - to niywiela - chciałoby sie wiyncy
    Ale jo pamiyntom jak żech sie tu mynczył
    Jeszcze rokow może poranoście tymu
    Ciynżyj mi sie żyło skiż sadzy i dymu.
  • broneknotgeld 02.10.03, 18:37
    No przeca

    Na Ślonsku wiy ło tym kożdy woł
    Że już Archanioł we tromba doł
    I bez to u nos kożdo kapela
    Chce za patrona mieć Gabriela
    A zaroz potym rosnom im piorka
    Zapominajom ło swych podworkach
    Niy yno grajki marzom ło puchu
    Niy pamiyntajonc ło ślonskim duchu
    Bez to jo wola na Ślonsku siedzieć
    I "Zdrowych wiatrow" wszystkim stond pedzieć.
  • broneknotgeld 02.10.03, 18:37
    Dobrze by było siednonć przi piwie
    I połosprowiać ło ślonskim dziwie
    Mo recht kto pisze że jest czerwony
    Ale som tukej jeszcze Pierony
    Kere to widzom richtig inaczy
    A co rot kolor dlo Niymca znaczy?
    We barwach czorno-czerwono-złotych
    Niy szło sie przeca durś do roboty
    Niyjedyn Niymiec zdobywoł sława
    Pod tym sztandarym rodym z Wrocławia
    No a terozki jakoś sie boczy
    Że Polska jednak w ta strona kroczy.
  • broneknotgeld 02.10.03, 18:38
    Robioł Ślonzok na Berlin robioł na Warszawa
    Jak chce robić na siebie zarozki jest wrzawa.
    Tak już jest łod downa - jo tego niy zmiynia
    No a robić byda bo niy grom za lynia.
  • broneknotgeld 02.10.03, 19:08
    Klachule godały
    Że Ślonsk bydzie cały
    Za region w Europie sie liczoł
    Niych Breslau prowodzi
    Bo komu to szkodzi?
    Łon Ślonska duchowom stolicom.

Popularne wątki

Nie pamiętasz hasła

lub ?

 

Nie masz jeszcze konta? Zarejestruj się

Nakarm Pajacyka