Dodaj do ulubionych

Ślonsko dusza

26.09.03, 10:42
Jako jest dzisioj ta ślonsko dusza?
Ciynżko łodgodnońć - prziznać to musza
Wiym że spolszczono jest chnet w całości
Durś jednak wongel na dnie jej gości
Kajś tam w czeluściach ciyngiym sie kryje
I choć wyloli już nań pomyje
Łone mu niy som w stanie zaszkodzić
Tyn wongel czeko by sie łodrodzić
Jest jak rycerze kajś spod Giewonta
Stanie łogrzeje posprzonto w kontach
Potym rozbłyśnie nom na Europa
Kto go łobudzi ? Szukejmy chopa !!!
Edytor zaawansowany
  • broneknotgeld 26.09.03, 10:43
    Niylekko pisać ło sprawach Ślonska
    No a jo pisza ze Polski konska
    Tyn wongel tukej trza w sercach szukać
    Do korzdych dzwiyrzy za tym poklupać
    To jest zadanie właśnie Ślonzoka
    By znod tyn wongel tyż u Poloka
    I bez różnicy kaj kery siedzi
    Niych kożdy Hanys nad tym sie biedzi.
  • broneknotgeld 26.09.03, 10:44
    ORDER ŚLONSKA
    Ze krziża czornego
    Cołkym żelaznego
    Promiynie wychodzom gwioździste
    Koloru biołego
    No i czerwonego
    Niy mogom być tukej srebrzyste
    Odznaka ta szczodro
    Tarcza mo tyż modro
    Ze orłym co macho skrzidłami
    Łon złote mo piora
    I dumno figura
    Bo piecza durś czimie nad nami.

    Takim tyn order jo widza
    Pomysłu tego sie niy wstydza
  • broneknotgeld 26.09.03, 10:46
    Z Niymcym i Polokym Ślonzok mo być w kupie
    Bo som to zawsze dostanie po dupie.
  • broneknotgeld 26.09.03, 10:49
    We żolu i złości pryndko idzie burzyć
    Bo take uczucia tymu bydom służyć
    Niych we głowie siedzi nadzieja i radość
    Co szkody naprowio i robi im za dość.

    Zapomnioł żech wyżyj napisać ło Czechu
    Bez rym zaś żech sie dopuścioł grzechu.
  • broneknotgeld 26.09.03, 10:50
    Co Ślonsk dzisioj znaczy
    Głośno wołać trzeba
    Bo przeca inaczy
    Niy bydzie tu nieba

    Trza tyż sie zaprzonc w te sanie
    Ciongnońć je gibko wzdłuż Odry
    Wtedy to lepi sie stanie
    Na Ślonsku tym złoto-modrym.
  • broneknotgeld 26.09.03, 10:50
    Ślonsk we godce Ślonsk we rymach
    A kaj ślonsko naszo ziymia?
    Jo wiym co nom w duszy gro
    Yno co Ślonsk z tego mo?
  • broneknotgeld 26.09.03, 10:53
    Trzeba nom trocha tyż sie rozerwać
    I smyntno godka ło Ślonsku przerwać
    Ale tu jeszcze wciepna tyn tymat
    To bydzie wrocać jak staro ryma.
  • broneknotgeld 26.09.03, 11:08
    Pielgrzym śląski

    Zbłąkany w czasie na przestrzeni wieków
    Tułacz co zgłębić chce tej ziemi sedno
    Szukając śląskiej iskry dziś w człowieku
    Podlewa kwiaty - nie daje im zwiędnąć.
  • broneknotgeld 26.09.03, 11:25
    Istnym

    Chocioż te forum istnym coś krzipi
    Ważne że tukej Ślonzek durś kipi.
  • broneknotgeld 26.09.03, 11:26
    I w Rudzie znojdziesz tyż takich wiela
    Kerych nerwuje ta ślonsko sztela
    Na miejskim forum som żeś to czytoł
    Wiym - "retorycznie" tukejś sie spytoł.
  • broneknotgeld 26.09.03, 11:27
    Niy leko

    Niy jest sam leko - jo ło tym wiym
    Niyjedne lacie tu jeszcze zjym
    Dyć rymy ciepać to jednak sztuka
    No i tyż dlo nos jakoś nauka.
  • broneknotgeld 26.09.03, 11:55
    Niy idzie

    Niy idzie na to poradzić
    Ludzie lubiom sie durś wadzić
    Wspominajom stare dzieje
    Dioboł zaś sie z tego śmieje

    Niby pamiyńć ważno rzecz
    Dyć trza prziszłość w łoku mieć
    A tak zaś sie fest powadzom
    I paluchy kajsik wsadzom

    Mocny w gymbie czy w klawiyrze
    I tak zamknie potym dzwiyrze
    Durś niynawiść bydzie dusioł
    A czort dusza jego kusioł

    To niymiecko-polsko cycha
    Ślonzok niy znoł tego grzycha
    Dyć terozki tyż go mo
    Czi kamiynie - jedno dno.
  • broneknotgeld 26.09.03, 11:58
    Łostatni gyszynk

    Choć Niymcy Ślonskowi dali richtig wiela
    Po "łostatnim darze" mynczy sie ta sztela
    II wojna - wielki prezynt III Rzeszy
    Z tego sie tu nigdy niy bydymy cieszyć
    Chcesz poznać Ślonsk dzisioj - ło tym durś pamiyntej
    Jak to przikozanie kere przeca świynte.
  • broneknotgeld 26.09.03, 11:59
    Gorol tyż czowiekym jest
    Bestoż niy tymp go za fest
    W zocy trza mieć przeca pniokow
    W dupie - co nojwyży ptokow
    Byle niy wylywać złości
    Na prawdziwych naszych gości
  • broneknotgeld 26.09.03, 12:01
    Godka

    W polski szkole mie uczyli
    Godka ślonsko w niyj tympiyli
    Za Gomułki i za Gierka
    Niy szło wygrać we tych "bierkach"

    Dzisioj asić trza sie godkom
    Łona mowom naszom słodkom
    Kero nawet w dziegciu garcu
    Smak zachowo tego malcu.
  • broneknotgeld 26.09.03, 12:02
    Sowizdrzoł

    Sowizdrzoł kedyś po Ślonsku chodzioł
    Szpas na tyj ziymi łon ciyngym wodzioł
    Z niymiecka zwali go "Eulenspiegel"
    Zrobioł miastowym niyjedyn figel.
  • broneknotgeld 27.09.03, 09:02
    W moji duszy Ślonzek rymym malowany
    To mie czynsto cieszy no i lyczy rany.
  • broneknotgeld 28.09.03, 22:56
    Jo sie w naszy godce germanizmym ciesza
    Bestoż polonizmym tyż ździybko pogrzesza.
  • broneknotgeld 29.09.03, 20:57
    Ślonske dzieci? - Tu rodzone!
    To poczontek jest - a koniec?
    Blyszczy teroz kajś przed nimi
    - Nowom solom staryj ziymi.
  • broneknotgeld 29.09.03, 20:58
    Zowdy

    Na nauka zowdy czas
    Przi niyj Ślonsk niy pódzie w las.
  • broneknotgeld 29.09.03, 20:58
    Autonomio?

    Autonomio - dzisioj mit
    Dziwi teroz taki sznit
    W miyndzywojniu dyć to było
    Ślonsku w Polsce tyż służyło
    Dzisioj Ślonzek w Polsce leży
    Prawie cały -Kto niy wierzy?
    Autonomio teroz przeca
    To ideja kero z neca
    Może nawet być wyjynto
    By wspiyrać ta ziymia świynto
    Po kery durś Ślonzok chodzi
    Wspiyrać - powiym - a niy szkodzić.
  • broneknotgeld 29.09.03, 20:59
    Niy chciało Opole razym z "dziurom czornom"
    I dzisioj sie dali tukej tyż niy gornom
    Inkszo rzecz - smarkate przeca Katowice
    Niy chciały w Opolu mieć swoji stolice
    Dyć tyn Gorny Ślonzek niy mog stać sie cołki
    Bo wszyscy - po polsku - chcom czimać durś stołki.
  • broneknotgeld 29.09.03, 21:00
    Tymat Ślonzokow terozki gorki
    I literaty i profesorki
    Ło nos godajom cosik za wiela
    Dyć jakoś cicho ta ślonsko sztela

    "Dni Ślonska" zrobić - to moja rada
    Gryfno i głośno tako "parada"
    Co do Sztrasburga aż by zablysła
    By nom ta UE naprzeciw wyszła.
  • broneknotgeld 29.09.03, 21:01
    Coż kej Ślonzokow niy ma za wiela
    A jeszcze kondow u nos tyż tela
    Myśla - trza wspiyrać już tu rodzonych
    Bo Ślonzek bydom budować łony.
  • broneknotgeld 29.09.03, 21:01
    Ślonzok

    Zaś jedni "niymczom" tego Ślonzoka
    Inksi w nim widzom yno Poloka
    A Ślonzok sobom być przeca może
    Dlo łobu stron to za twardy łorzech.
  • broneknotgeld 29.09.03, 21:02
    Ślonske trwanie

    Widać że Ślonzok durś tukej trwo
    Wiela łon siyły u sia tyż mo
    Choć go ciongajom nacje somsiednie
    Bez jego upor ich siyła blednie.
  • broneknotgeld 29.09.03, 21:02
    Ślonsk Ślonzokowi we duszy gro
    Yno niywiela durś z tego mo
    Była z tym nawet kedyś utropa
    Te granie dzwigo jednak boroka
    Łone go zowdy z kolan dzwigało
    Bo wielgo siyła przeca tyż miało
    Teroz te granie w Europie słychać
    - We tym jest wolność - niy trza już wzdychać
    Ślonzok sie przeca jakoś poradzi
    Bele by wreszcie przestać sie wadzić.
  • broneknotgeld 29.09.03, 21:03
    Zwada

    Łod Poloka my my jom momy
    Dobrze ze nim sie tu znomy
    To tyn konsek polski duszy
    Czynsto ciongnie nos za uszy.
  • broneknotgeld 29.09.03, 21:04
    Ślonzok

    Ślonzok tustym jest w klapsznicie
    Łod downa mo take życie
    Łobie sznity ciongnom tuste
    Bo bez niego cosik puste.
  • broneknotgeld 29.09.03, 21:04
    Ślonske fraszki

    Forum fraszek trza promować
    Ludzie bydom sie dziwować
    Cołki Ślonsk nom tukej kipi
    Choć tyż słysza że mom ipi.
  • broneknotgeld 29.09.03, 21:05
    Jo sie starom ciepać wiela
    Na ta naszo ślonsko sztela
    Czasym rym mi blyśnie w gowie
    I przi inkszych pisze czowiek
    Przez komorka tyż nagrywom
    Jak sie życiu trocha dziwom
    I we gowie rym sie suje
    Potym słysza - "Łon wariuje".
  • broneknotgeld 29.09.03, 21:09
    Jakbych

    Jakbych wiyncyj czasu mioł
    To bych inksze fora "grzoł"

    -"Piszesz fraszki? Tyś jest chory!
    A to cug przed symaforym
    Droga wolno niych mu dajom
    I wajhami tak ciepajom
    Coby zjechoł Ślonzek cołki
    I słyszały go tyż "stołki".
  • broneknotgeld 29.09.03, 21:09
    Piyknie sie tu poszkryflomy
    W godce szczyńścio poszukomy
    I doczkomy takich czasow
    Że niy pódzie to do lasu.
  • broneknotgeld 29.09.03, 21:13
    Narod

    Konsek ziymi swoji
    Za tym Ślonzok stoji
    Dyć chocioż jest u sia
    Markotno mo dusza

    Niy majom go w zocy
    Niymcy i Polocy
    Szarpiom na dwie strony
    Mo być rozdwojony

    A przeca łon może
    Być sobom - moj Boże
    Sprow coby to było
    By sie już spełniyło

    Bo dzwignoł już gowa
    I słychać kajś słowa
    Że trza to szanować
    Jak niy chce sie chować

    W palica sie dropia
    Terozki już skopia
    Jest - głośno to pedzioł!
    Tymu kto niy wiedzioł!
  • broneknotgeld 29.09.03, 21:17
    Terozki po gowie chodzi taki rym
    Pon Boczek jest w Tobie wy mie i we nim
    Bestoż mie rzykanio za wiela niy czeba
    Chciołbych jo we inkszych znojść swoj konsek nieba
    Niy zowdy znojduja po prowdzie to powiym
    A czy niebo wy mie? - Łod kogo sie dowiym?
    Dyć som wontpić musza - znom czyńść swojich grzychow
    Jednak ślonsko dusza jest mi w tym pociychom.
  • broneknotgeld 29.09.03, 21:18
    Silesia

    To jest naszo piykno frela
    Godać szło by ło tym wiela
    Łona choby ta Europa
    Niyjednego szczimie chopa
    Byk - tyż dlo niyj nic wielkego
    Bo Ślonzoka mo szwarnego.
  • broneknotgeld 29.09.03, 21:18
    Krytyki w tym polskim piekle potrzeba nom wiela
    Coby kożdy jasno widzioł jako naszo sztela
    Klara niychej nom prziświyci - wyraźnie pokoże
    Co we ślonskim tym łogrodku rosnońć już niy może

    Pewnie fest sie podziwomy ze tych wszyskich chwostow
    Dyć rynkowy zakosomy - zrobiymy kompostu
    Zaś na grzondkach wyplewionych ołberiba wzrośnie
    A i blumkol możno z czasym zamrugo radośnie

    Niy mogymy jednak czekać - teroz czeba sadzić
    Czas po tymu już nojwyrszy - niy werci sie wadzić
    Plewy zgnijom by z nich potym jakiś był pożytek
    Dobra dzisioj jednak czeba - to wcale niy zbytek.
  • broneknotgeld 29.09.03, 21:19
    Filory

    Filory już podebrali
    Bestoż nom cosik sie wali.

Popularne wątki

Nie pamiętasz hasła

lub ?

 

Nie masz jeszcze konta? Zarejestruj się

Nakarm Pajacyka