Dodaj do ulubionych

Niyfraszka

04.05.05, 22:33
Jo kilofym fraszki rombia
Ło tym głośno tukej trombia
Kynsy lecom i drobnica
A mie śmiejom sie durś lica.



Moj fioł

Forsa licza na biliony
Taki zy mie pomylony
Kolekcjoner co bez tydziyń
Chleba z kyjzom sie niy wstydzi
Zjodbych nawet sucho sznita
Dyć pilnuje mie kobiyta
Bych sie w foile niy zatracioł
Zdrowiym tego niy przeplacioł
Ło rodzinie durś pamiyntoł
I bez tydziyń i bez świynto
Myśla że tyż wiysz coś ło tym
Na tym dość już - reszta potym.




Jakby tak poszperać w głowie
To hobbystom kożdy człowiek.

forum.gazeta.pl/forum/71,1.html?f=28940
Edytor zaawansowany
  • broneknotgeld 04.05.05, 22:35
    ZABORCA ŚLONSKA
    Bywoł Mieszko w Czechach na zolytach
    Prziwioz sie stamtond fajno kobiyta
    I choć sie musioł przez nia tyż łochrzcić
    To ani myśloł za mocno pościć
    Zamarzoł mu sie tłuściutki konsek
    Chrapka mioł wielgo na czeski Ślonsek
    A gdy Dombrowka przikryła ziymka
    Do Gniezna pryndko przigruchoł Niymka
    Teraz już myśloł ło nowy wojnie
    Z pomocom Niymcow Ślonsk napod zbrojnie
    I w końcu siłom go Czechom zabroł
    Tak swego teścia po latach nabroł.




    Zowiść

    Zowiści u nos pełny wor
    Rośnie to choby jaki mor.



    Łostudka

    Mało łostuda w doma je dobro
    By chop durś wiedzioł kaj jego ziobro.

    --
    forum.gazeta.pl/forum/71,1.html?f=28940
  • madohora 01.09.18, 13:22
    To miał był erotyk
    Dwie ręce i dotyk

    --
    :serce:
  • madohora 01.09.18, 13:22
    Myślę o tym co bym z tobą zrobiła
    Gdybym się nie....upiła

    --
    :serce:
  • madohora 01.09.18, 13:22
    Jesteś dla mnie jak słońce na niebie
    Ale lepiej mi baz ciebie

    --
    :serce:
  • madohora 01.09.18, 13:23
    W Ogrodzieńcu "coś się stało"
    Teraz tego czegoś mi za mało

    --
    :serce:
  • madohora 01.09.18, 13:23
    Chleb z Siewierza

    Ja w to jakoś nie dowierzam
    Mojemu tacie nie smakował chleb z Siewierza

    --
    :serce:
  • madohora 01.09.18, 13:24
    Prędzej się znajdę na pełnym morzu
    Niż wyląduję w Udorzu!

    --
    :serce:
  • madohora 01.09.18, 13:24
    Siewierz

    A ja o poranku
    Siedziałam na zamku

    --
    :serce:
  • broneknotgeld 04.05.05, 22:35
    A jo żyja...

    A jo żyja z politykom
    Jo ty frelki niy unikom
    Bo jak robia coś dlo inkszych
    Toch je trocha jakby wiynkszy

    Niy trza paplać ze niom wiela
    Myśleć robić - no i tela
    Polityka piykno to je
    Take zdanie ło tym moje.



    Prowda

    Wiela we tym prowdy że lepi dwa razy
    Trza pomyśleć przodzi by prowdom niy razić
    Jednak richtig prowda mo być w wiynkszy cynie
    Niż słodke cygaństwo co niszczy sumiynie.


    Bajlaga

    Za ańfach jom kożdy mo
    Tu sie bardzi ło chlyb dbo
    Przeca łona kończy życie
    Na poczciwy chleba sznicie.

    --
    forum.gazeta.pl/forum/71,1.html?f=28940
  • broneknotgeld 04.05.05, 22:36
    Ło rymach

    U mie z rymami je ciynżko raczy
    Że pisza tukej - Bozia wybaczy
    Chocioż sie bawia we wierszoklety
    Niy bydzie zy mie richtig poety
    Dyć wymynczone te wypociny
    Nawet niy bawiom moji rodziny
    W rymie rymować to dlo mnie tela
    Co zaharować sie we niedziela.



    Punkt

    Je punkt widzynio
    Punktym siedzynio
    Niy ma sumiynia
    Co chce to zmiyniać.



    Spowiydź

    To je w nos tyż boske - powiym na spowiedzi
    Roz dioboł roz anioł ciyngym w sercu siedzi
    Jednak człowiek wyży - to pedzieć tu musza
    Pon Boczek nom tyż doł przeca wolno dusza.
    --
    forum.gazeta.pl/forum/71,1.html?f=28940
  • broneknotgeld 04.05.05, 22:37
    I zaś reformy

    Marne to bydom reformy skutki
    Jak rozum durś je przi tym za krotki
    Cosik komorek ciyngym brakuje
    Bestoż to wszysko nom sie sam suje.


    Kolyjka

    Stoł żech w kolyjce po bożo łaska
    A Łon mi pedzioł "Ciebie dom fraszka"
    Zapomnioł jednak dodać polotu
    Bestoż to krynca ze siodmych potów.


    Niy wiym czy jeszcze roz sie łodwoża
    Stanońć we ta bosko raja
    Z tego coch dostoł przeca durś tworza
    I za to dzisioj Mu pszaja

    A Tyś we fraszkach tyż przeca majster
    Rymow tu ciepiesz durś mocka
    To niy je ańfach niy lipny klajster
    Mosz grajfka richtig w tych klockach

    Zaś co do ślubny to tyż mom problym
    Łona mie czynsto haltuje
    Ale to jedak duch je moj dobry
    Dyć przi ni fraszka sie suje.


    --
    forum.gazeta.pl/forum/71,1.html?f=28940
  • broneknotgeld 04.05.05, 22:38
    Jo szukom prowdy
    Zowdy.



    Gówno - prowda

    Tyj gówno - prowdy chyba nojwiyncy
    To jak choroba kero nos mynczy
    Zmora co w nocy durś dusi chopa
    Trza kajś przegonić tako utropa.



    Na krytyka

    W szkole żech mioł marne stopnie
    Bestoż krytyk mie niy kopnie
    Jak mi keryś chce ubliżyć
    Może przi mie sie poniżyć.

    --
    forum.gazeta.pl/forum/71,1.html?f=28940
  • broneknotgeld 04.05.05, 22:39
    Te fraszki to moj nowy fioł
    Kery już byda chyba durś mioł.


    Piniondz

    Piniondz jest starszy łod krześcijaństwa
    Wiela tyż dzisioj znoczy dlo państwa
    Jo - numizmatyk czasym sie śmieja
    Bo wiym że piniondz to tyż ideja.


    Taki kij

    Dlo jednych znak krziża jest życiowom tarczom
    Inszym zaś srebrniki za wiara wystarczom.
    --
    forum.gazeta.pl/forum/71,1.html?f=28940
  • broneknotgeld 04.05.05, 22:40
    W kijoku tyż jest zawsze środek
    Niych ło tym wiedzom stare i mode.



    Łod kijoka lepszo kryka
    Jak chce kery mocno brykać.



    Krupy nojlepsze som na żołondek
    Pieroński w trzewiach robiom porzondek.

    --
    forum.gazeta.pl/forum/71,1.html?f=28940
  • broneknotgeld 04.05.05, 22:42
    Czamu?

    Czamu we Niymcach godajom "Tod"
    Na naszo poczciwo kostucha
    Chyba żech na to terozki wpod
    Ze śmiychu czimia sie brzucha

    Bo jak tu szukać tyj płci we gnatach
    Jak kosom macho jyj łapsko
    Położ sie na nia choć stare lata
    A poznosz miydnica babsko

    Do dzisioj na to niy wpodli Niymce
    Łod nos sie tego nauczom
    Dyć to pociecha w łostatni mynce
    I niych już wiyncyj niy buczom.



    Jo tysz Wom powiym tukej - Na zdrowie
    Dyć już procyntow trocha mom w gowie
    Wiym że tu majom być te "niyfraszki"
    Niy szkryfna jednak że yno flaszki.


    Numizmatyka

    Leci mojyj freli czeci tysionc lot
    A przeca jo richtig durś jest ze niyj rod.

    --
    forum.gazeta.pl/forum/71,1.html?f=28940
  • broneknotgeld 04.05.05, 22:42
    Niy jest ważne że jest staro
    Bele by durś była jaro
    Niy znom do cna mojyj frelki
    Bez to pocing do niyj wielki.


    • Re: Niyfraszka
    broneknotgeld 26.09.2003 11:45 + odpowiedz

    Komunije

    Z komonijom teroz krzestny mo utropa
    Niy styknie zygarek - bajtel chce laptopa.


    • Re: Niyfraszka
    broneknotgeld 26.09.2003 11:50 + odpowiedz

    Szcziga

    Szcziga to jest wampiyrz baba
    Przidzie do cia w nocy saga
    Piykno - świycom sie jyj cycki
    Chop sie za nia chyto wdycki
    A jak myśli że mo niebo
    Wbijo zymby w karkol jego.

    --
    forum.gazeta.pl/forum/71,1.html?f=28940
  • broneknotgeld 04.05.05, 22:45
    Dioboł

    Dioboł na Ślonsku to niy mioł leko
    Ślonzok przed diobłym nic niy uciekoł
    Duszy czortowi w strachu niy dowoł
    A czynsto zrobioł mu nawet kowoł
    Dyć łon sie czasym tyż boł bergmona
    Pitoł - żeś ledwo widzioł łogona.


    I zaś kłokoczka

    Na szczigi zmory
    Diobły potwory
    Dobro kłokoczka
    Przegno boroczka.



    Karuzela

    Kto wyleci z karasola?
    Czyja we tym bydzie wola?
    Tańcujom durś polityki
    Kryncom sie wele motyki
    Keryj miano piykne - władza
    Nic jo na to niy poradza
    Że idejom stołek yno
    Prowda richtig jest na wynos
    Jeji zresztom już tu niy ma
    No i na tym skończa tymat.

    --
    forum.gazeta.pl/forum/71,1.html?f=28940
  • broneknotgeld 04.05.05, 22:46
    Ich portki

    Z gorzkego śmiychu chyba jo skonom
    Czynsom sie portki czasym "baronom".



    Wiewiora jedna ryszawo
    Ze lewa poszła na prawo
    I terozki głośno woło
    - Paczcie jako żech bioło!


    Polityk

    W poglondach łon czynsto poli...
    W jednym mono - władza woli.
    --
    forum.gazeta.pl/forum/71,1.html?f=28940
  • broneknotgeld 04.05.05, 22:47
    "Komorkowy" czowiek

    Żyje czowiek dzisioj czynsto "komorkowo"
    Niy powiym że dobrze - a ponoć niyzdrowo
    Jak niy mosz komorki to ześ jest do zadku
    A przeca nikt niy chce takego przipadku

    Dzisioj mały bajtel SMS wysyło
    Choć wczoraj sie jeszcze bez komorki żyło
    Szwongu coroz wiyncy - pryndko sie to kryńci
    Jo jednak do tego coroz mniyj mom chyńci.



    Na mownicy

    Szczylać chce mi sie z auspufa
    No a w gymbie stoji klucha.


    Rym

    Rożnych poczeba do życio łatek
    A rym? - Znak "Zorro" na gumce batek

    --
    forum.gazeta.pl/forum/71,1.html?f=28940
  • broneknotgeld 04.05.05, 22:47
    Binder

    "Krawat" jest lepszy - po prowdzie powiym
    Pryndzyj historio swojo łopowiy
    Downo nosiyli go we Kroacji
    Dzisioj bych pedzioł jaśniyj - w Chorwacji
    Dyć we wojynny pechowy dobie
    Czidziestoletni - klaruja tobie
    "Krawat" wyruszoł w podboj Europy
    Na karku noszom go teroz chopy
    Skond do nich prziszoł raczyj niy wiedziom
    Choć ze nim chodzom i czynsto siedzom
    Bo przeca cosik do bindra czujom
    No i łon baby pierońsko ujon.



    Kery satyryk może być w niebie?
    - Tyn co sie umi pośmioć tyż z siebie.



    Hereszt "Elita" by sie nom przidoł
    Na to Skarb Państwa forsa by wydoł
    Trza nom budować taki przibytek
    Elity rosnom - to niy jest zbytek

    Bo mycka prawa dlo nich za ciasno
    Tymida w łoczach tyż niy mo jasno
    Przeca czasami komuś przisuje
    No i za kratki buks zawyndruje

    Jakby ściongnyła jednak łoposka
    Wtedy by szpana była - do dioska
    Szli by do kozy ministry posły
    I z samorzondow tuzy by doszły

    Hereszt "Elita" by zapełniyli
    Postawić trza go bo czas nos pili
    Już prawie som my we tyj Europie
    --
    forum.gazeta.pl/forum/71,1.html?f=28940
  • broneknotgeld 04.05.05, 22:48
    Biglowanie

    Biglowoł żech swoje koszule galoty
    Na glaca ze pary aż prziszły mi poty
    I myśl tako zaczła sie kłymbić we gowie
    - Jakby wybiglować swe życie mog czowiek

    Przidało by mi sie do życio żelozko
    Wygładził bych zmarszczki i czuł bych sie bosko
    Na falty specjalnie niy tracioł bych czasu
    Choć możno bych jednak je robioł dlo szpasu.



    Kaj żeś jest?

    Kaj żeś jest? Powiydz. Cicho sie pytom
    Przez lata na drodze swoji
    Wy mie? We inkszych? Tu abo niy tu?
    Czamu sie serce dyrś boji?
    Że możno Ciebie niy ma że yno
    Ktoś kedyś tak Cie wymyśloł
    Jeronie - cosik sie przipomino
    Czy jo Cie latoś niy prziśnioł?
    Syn to był piykny żech jest we niebie
    Zło kajś w niypamiyńć wleciało
    A dobro było wy mie i w Ciebie
    Chciołbych by to sie nom stało!



    Zło

    Zły go w inkszych widzi
    Dobry som sie wstydzi.

    --
    forum.gazeta.pl/forum/71,1.html?f=28940
  • broneknotgeld 04.05.05, 22:49
    Zapłata

    Pon Boczek bez nos - bez świata
    Bez życio kere som stworzoł
    Tako mo teroz zapłata
    - Joch powstoł by Łon tyż ożył.


    Już

    Już to zablysło w czowieka jaźni
    Co we nim boske? - Łut wyobraźni!
    Ludzko pragliwość do tego dodać
    Wtedy sie kulo że szkoda godać.



    Dwie świyczki

    Czorno i bioło świyczka w duszy swoji chowom
    Kero dzisioj łoświyca? - Pytanie se dowom.
    --
    forum.gazeta.pl/forum/71,1.html?f=28940
  • broneknotgeld 04.05.05, 22:49
    Strach

    Siebie sie boja - tego co czorne
    We moji duszy - ciongnie na morne.



    "I łodpuść nom nasze winy"

    A czy jo łodpuszczom winowajcom swojim?
    Moja dusza przeca gniywu sie niy boji
    I czynsto - choć w myślach - trocha tym pogrzesza
    Jak sie to porzykom - zaś Bogym sie ciesza.



    Fraszka to jest blysk
    Czasym choby w pysk.


    --
    forum.gazeta.pl/forum/71,1.html?f=28940
  • broneknotgeld 04.05.05, 22:50
    We tym iskra tyż jest Boga
    Bestoż diobła szczimać moga.



    By cie niy dopadła "kryska"
    Śmiyj sie ze całego pyska.



    Jo "piekło-niebo" w siebie durś mom
    Jeszcze sie jakoś rada z tym dom
    Bo przeca bardzi niebo mie kusi
    Choć i tyn dioboł narzyńdzia brusi.
    --
    forum.gazeta.pl/forum/71,1.html?f=28940
  • broneknotgeld 04.05.05, 22:51
    Jo niy cygania jak pisza - "śleper"
    Bestoż w te fraszki skokom na keper.




    Stoć - to prawie jakby niy być
    Życie zowdy chce sie wybić.



    Nasz smrod

    Niyjedyn tukej na Ślonsku twierdzi
    Że przeca piniondz nigdy niy śmierdzi
    Dyć to we stary Romie prawiyli
    Hajźle podatkym tam łobłożyli

    Niy czuć jak śmierdzi samo mamona
    Choć czowiek cuchnie że idzie skonać
    Wiynkszość jak może tyn piniondz kradnie
    Chocia niy myśli że to szkaradnie

    A jak katolik godo ze niy wiy
    To som Pon Boczek sie tymu dziwi
    I na te swoje tabule bliko
    Jak złodziyj czynsto do niego rzyko

    Zaś trzeba zerknońć do stary Romy
    Bo ze tych czasow Tymida momy
    Łopaska nosi ślepo na łoczy
    Dyć smrod złodzieja bez nos mo wskoczyć

    Yno że u niyj w tym smrodzie całym
    Dziurki w kicholu sie zatykały
    Trza by nom tego coby zawyła
    Jak łapa w todze łapowa skryła.

    --
    forum.gazeta.pl/forum/71,1.html?f=28940
  • broneknotgeld 04.05.05, 22:52
    Spokoj już cołkym miołbych tyn złoty
    Yno że chodzić trza do roboty
    Mie sie już teroz pyndzyjo marzy
    I te leżynie na naszyj plaży.




    Zbudzioł żech sie rano - a piniondze kaj?
    Myśloł żech że bydzie terozki moj raj
    Stropiony sie dropia we zmorszczone czoło
    Pacza we potmanyj - tam tyż geld wywioło!



    Nowe czasy

    We tych nowych czasach nojgorsze co momy
    To te bezrobocie. Jak mu rada domy?!

    --
    forum.gazeta.pl/forum/71,1.html?f=28940
  • broneknotgeld 04.05.05, 22:53
    Ciyngym mi jednak coś brak piniondza
    Choć wiym że we tym jo jakoś błondza
    Miołbych mamona kupioł bych czas
    Jak niy mom czasu pyndza w tyn las
    Kaj drzewa w uszy mi yno szumiom
    Że "czas to piniondz" pedzieć mi umiom.



    Fraszka jest jak ziorko piosku
    Bydzie ciongła cie po troszku
    Ciynżko potym cosik zmiynić
    Jak jużeś jest na pustyni.



    Diobłanioł

    Anioł czy dioboł? Już mie to niy mynczy
    Bo przecza durś wy mie wolno dusza brzynczy
    Wdycki trza to yno mocno mieć we zocy
    I tymu co teroz twordo blikać w łoczy.

    --
    forum.gazeta.pl/forum/71,1.html?f=28940
  • broneknotgeld 04.05.05, 22:53
    Śmiych

    Kożdy ci powie
    Że śmiych to zdrowie
    A jakbyś wieczność chcioł spyndzić w niebie
    Śmiyj sie już teroz z samego siebie.



    Plaża

    Już mi sie plaża złocisto marzy
    Klara co grzeje chocia niy parzy
    Ło lecie myśla - tym nad Bałtykym
    Kaj sie co roku jeżdża ze smykym
    Taszcza ze sobom tyż familijo
    Urlop tam przeca szczyńśliwie mijo
    Bajtle ze ołmom wakacje majom
    Przed rokym szkolnym łodpoczywajom.
    Potym je koniec jak ucioł nożym
    W zima zaś myśli mom nad tym morzym.



    Łoni...

    Łoni łonych łonaczom
    I do tego krziwo paczom
    A już cołke we tym dziwo
    Że na sia paczymy krziwo

    Idzie szczimać jakeś heksy
    Bardzi mynczom nos kompleksy
    Trza z minusa zrobić plus
    No i ryknońć głośno - szlus!
    --
    forum.gazeta.pl/forum/71,1.html?f=28940
  • broneknotgeld 04.05.05, 22:54
    Czamu jo tukej te fraszki ciepia?
    Dyć tym sie trocha tak jakby krzepia
    Jo w to sie chowom czymu som pszaja
    A na dodatek robia tyż jaja
    I chocioż w koło coś groźnie warczy
    Myśla żech jeszcze niy jest na tarczy.



    Polityka

    Łod downa mortwi mie polityka
    Lepi by było wrogow unikać
    Bo we robocie mynczy niyzgoda
    Pryndko ci wpieprzom pod nogi kłoda
    We tym trza przeca grać Salomona
    Grajfka cynniejszo je niż mamona
    Rożniste zdania połonczyć w jedno
    Tela powiedzieć by trefić w sedno
    A cołki problym yno we tym tu
    Jak prowdy czimać sie do imyntu?



    Państwo

    Państwo to przeca jo ty łon my
    Ponoć tu kożdy dobrze to wiy

    A jak sie w łoczy ciepnie draństwo
    Kto w pierś sie piźnie powiy - państwo?

    Kto przizno sie do tego złego?
    Wskoże na siebie - niy inszego

    Łod lot to niszczy nasze państwo
    Zowiść złodziejstwo i cygaństwo

    Głymboko to we dusza wlazło
    Choćbyś chcioł dobrze - robi na złość

    Dyć zanim zlygniesz człeku w grobie
    Sproboj zbudować coś we sobie

    Wypol choć jedna zdrowo cegła
    Z prowdy co w głymbi duszy zległa

    I zaniyś jom na plac budowy
    Kaj kościoł trza postawić nowy.
    --
    forum.gazeta.pl/forum/71,1.html?f=28940
  • broneknotgeld 04.05.05, 22:55
    To ci lokator

    Za miyszkanie łon niy płaci
    Coby autym mog piracić.



    Moj Idol

    Kogo jo moga mieć za idola?
    Dyć Sztaudyngera łod inkszych wola
    Z żyjoncych dzisioj yno papiyża
    Ale sie jymu z tego niy zwiyrza
    Bo gwoźdź do truły miołby zaś wiyncy
    Niy chca przikłodać do tego ryncy



    Czynsto we fraszkach jo pisza - łon
    Zowdy sie boja że wklepia - lon
    I niy som wcale to yno żarty
    Durś mom problymy ze prawym "altym".
    --
    forum.gazeta.pl/forum/71,1.html?f=28940
  • broneknotgeld 04.05.05, 22:56
    Jake jajco tako kura
    Godo zowdy nom natura.


    • Re: Niyfraszka
    broneknotgeld 05.10.2003 19:23 + odpowiedz

    A dyć dlo jajec rymnyło mi sie
    Bo niy utonie co musi wisieć.


    • Re: Niyfraszka
    broneknotgeld 06.10.2003 20:22 + odpowiedz

    Ślubno a taszyngeld

    Tyn taszyngeld mo zostawić
    Jak niy - to mie to niy bawi
    W potmanyju niych coś brzynczy
    Wtedy chopa myni mynczy
    Wiym że my i tak boroki
    Przeca zowdy to klepoki
    Jak na piwo tego styknie
    Życie jakoś bardzi piykne.
    --
    forum.gazeta.pl/forum/71,1.html?f=28940

Popularne wątki

Nie pamiętasz hasła

lub ?

 

Nie masz jeszcze konta? Zarejestruj się

Nakarm Pajacyka