Dodaj do ulubionych

Ło twierdzach, zamkach, pałacach, dworach

30.07.06, 21:12
Ze downych wiekow stojom do dzisioj
Historji zocny som znakym
Co ło nikerych zech jo usłyszoł
We wontku szkryfna se takim

Możno przi tymu mi pomożecie
Tymat to wielki jak rzeka
Drapci leciało by to nom przecie
Niy dejcie na wos mi czekać.
--
forum.gazeta.pl/forum/71,1.html?f=28940
Edytor zaawansowany
  • broneknotgeld 31.07.06, 19:01
    Zamki pałace jejich ruiny
    Zowdy łokrasom naszy dziedziny
    Se historyjo z legyndom miyszo
    Możno i nudle ktosik tyż wiyszo
    Dyć przeca szkryflać ło nich durś idzie
    Tako niych wontek zocny tu bydzie.
    --
    forum.gazeta.pl/forum/71,1.html?f=28940
  • broneknotgeld 31.07.06, 19:23
    Sto zamkow?

    Sto zamkow krziżackich aże dzisioj momy
    Dyć wszyskich cuzamyn cołkym niy poznomy.
    --
    forum.gazeta.pl/forum/71,1.html?f=28940
  • broneknotgeld 31.07.06, 22:40
    W krziżacki ziymi zamki som gynsto
    Dyć budowali je tukej czynsto
    By mnich mog u sia yno nocować
    U cudzych niy mioł se i stołować

    Toż choć rycerzym ciongnoł we mury
    Mozno i boł sie niyjedny dziury
    Przeca niy yno skiż swoji cnoty
    Woloł w komnacie ściongać galoty.
    --
    forum.gazeta.pl/forum/71,1.html?f=28940
  • broneknotgeld 01.08.06, 20:10
    Warmińsko-mazurske zamki

    Dziyń marszu piechty i juzaś zamek
    Dyć niy wyrosły łone tu same
    Kunsztym krziżackim stowiane tako
    Coby zakonny rycerz niy płakoł
    I zowdy w murach mog przenocować
    W kerych niy kapie mu nic na gowa.
    --
    forum.gazeta.pl/forum/71,1.html?f=28940
  • broneknotgeld 01.08.06, 22:37
    Jak dymiyło

    Jak z krziżackego zamku dymiyło
    Znakym dlo inkszych warowni było
    Toż dziyń wystyknoł by prziszło wsparcie
    Stoły te sztele tako na warcie.
    --
    forum.gazeta.pl/forum/71,1.html?f=28940
  • broneknotgeld 03.11.07, 23:59
    Coś tyż szrajbniecie?
    Werci se przecie.
    --
    Ruda Śląska - stolica fraszki
  • broneknotgeld 13.02.09, 11:57
    Zaś na jakiś zamek kukna
    Możno w dźwiyrza jego klupna.
    --
    Ruda Śląska - stolica fraszki
  • broneknotgeld 06.02.10, 17:53
    broneknotgeld napisał:

    > Zaś na jakiś zamek kukna
    > Możno w dźwiyrza jego klupna.
    Abo ducha wnerwia tako
    Że w kominie ptok zakrako.


    --
    Ruda Śląska - stolica fraszki
  • broneknotgeld 22.01.11, 14:37

    Po Donnersmarckach kupić coś idzie
    www.dziennikzachodni.pl/fakty24/359796,jesli-masz-4-mln-zl-mozesz-kupic-sobie-palac,id,t.html
    Dyć jako u nos dali z tym bydzie?
    --
    Ruda Śląska - stolica fraszki
  • broneknotgeld 06.04.12, 20:05
    Pałac retli

    Pałac retli - trza radować
    bielskobiala.gazeta.pl/bielskobiala/1,88025,11495723,Czechowicki_palac_ma_szanse_na_prestizowa_nagrode.html?bo=1
    Tyż na muster inkszym dować
    --
    Ruda Śląska - stolica fraszki
  • broneknotgeld 01.08.06, 22:40
    Zamek w Gniewie

    Nojwiynkszom twierdzom Gniew na Pomorzu
    Co w rynkach Krziżakow była
    Dyć mury zamku durś wiela wożom
    Zdo sie co downo w nich siyła.
    --

    Z Gniewa

    Z Gniewa do boju ciyngym huf wiedzie
    Mistrz von Jungingen - łon durś na przedzie
    W połowie lipca śmierć mu pisano
    Dyć pod Grunwaldym zaś bydzie rano.
    --

    Kasztelan Gniewa

    Kasztelan Gniewa "zakonu mistrzym"
    Dyć ze tym zamek bardzi nom blyszczy
    "Jungingen" żywy na włości wroco
    By kasztelanić ze wiynkszom mocom.

    --
    forum.gazeta.pl/forum/71,1.html?f=28940
  • broneknotgeld 03.08.06, 18:36
    "Dziecioki zamku"

    Niyjedyn kawaler broł juz ślub na zamku
    W Wielkim Refektarzu goście sie bawiyli
    Młody pon we celi nocowoł z wybrankom
    -Dyć dzieciskow wiela w tych murach poczyli.

    --

    "Szkołka rycersko"

    Szkołka rycersko ciyngym we Gniewie
    Nauczysz se tu fechtować
    Choć se niy przido teroz w poczebie
    Bo jako do mieczy stować?
    --

    We gniewski celi

    We gniewski celi na pryczy spanie
    Rano cie czeko ciynżke stowanie.

    --
    forum.gazeta.pl/forum/71,1.html?f=28940
  • broneknotgeld 03.08.06, 18:37
    Ziymia Gniewsko

    Princ na Świeciu Warcisław cystersom darowoł
    Oliwa bogatszo - czy yno se zdowo?

    --

    Za Sambora II

    Sambor II z cystersami
    Mozno niy żył w zgodzie
    Woloł czimać z Krziżakami
    -Toż było we modzie

    Wsparcio wiela łod nich dostoł
    Łobdorzoł nadaniym
    Zakon panym tukej zostoł
    Papiyż to rozważy.
    --

    Milicz 1282

    We ślonskim Miliczu sond nad gniewskom ziymiom
    -Z wyroku papiyża Krziżaki już czimiom.

    --
    forum.gazeta.pl/forum/71,1.html?f=28940
  • broneknotgeld 03.08.06, 18:38
    Gniew 1283

    Konfraternio zakonno już we Gniewie rosnie
    Wielki Mistrz aż rynce zaciyro radośnie
    Niyzdobyto twierdza dyć tukej powstanie
    Choć po latach knifym jom Polska dowstanie
    --

    "Niyzdobyto twierdza"

    Na lewym brzegu Wisły stanyła
    Czy niyzdobyto na wieki była?
    --

    Piotr Dunin pod Gniewym (1463/64)

    Poł roku łoblygoł Dunin gniywski zamek
    Szturmym go niy zdoboł - poddali sie same
    Bo w końcu zabrakło Krziżakom tu jodła
    Tako w polskich ryncach se ta twierdza znodła.

    --
    forum.gazeta.pl/forum/71,1.html?f=28940
  • broneknotgeld 03.08.06, 18:40
    Polske starostwo XV-XVII w.

    Toż w Koronie zamek siedzibom starostow
    Choć zdało sie dlo nich to sprawom niy prostom
    Mało kery przeca w murach jego siedzioł
    Wygodom niy grzyszoł - kozdy ło tym wiedzioł.
    --

    Zamek podupodo

    W polskich czasach podupodo
    Starosty niy dboli
    Lepi piyrwyj było - godo
    Krziżoki mu pszoli.
    --

    Starosta Jan III Sobieski

    Ano i krol Polski był gniewskim starostom
    Zabiyrać niy dować - idejom to prostom
    Dyć Gniew już niy taki po szwedzkich podbojach
    Tela że spokojny - niypoczebno zbroja.

    --
    forum.gazeta.pl/forum/71,1.html?f=28940
  • broneknotgeld 03.08.06, 18:41
    Niy dbali

    Niy dbali Poloki łotwierdza warowno
    Toż se zatraciyła jeji świytność downo.
    --

    W siedymnostym wieku

    W siedymnostym wieku zły czas cołkym prziszoł
    Na najazdach szwedzkich tyn zamek źle wyszoł.
    --

    Gniew 1626

    Prziszło setka ludzi z dwiyma kanonami
    Capnyli tyn zamek - toż widzicie sami
    Jako se tu Szwedom leko wojowało
    Choć możno niy zowdy tyż tako bywało.
    --

    Gniew 1627

    Co Szwed leko chycioł niy tako łoddowo
    Dziesiyńć dni kanony rombiom w zamek zdrowo
    Z tym załoga szwedzko jenak se złomała
    I Konieckolskymu ta sztela łoddała.

    --
    forum.gazeta.pl/forum/71,1.html?f=28940
  • broneknotgeld 04.08.06, 21:46
    Szwedzki potop

    Ano se przeloł tyż przez tyn Gniew
    Dlo zamku richtig we tym zły tref
    Jako ze zniszczyń go dźwignońć takich?
    Ciyń downy twierdzy - los belejaki.
    --

    Gniew pruski

    Prziszoł czas we kerym polska seblykali
    Tako Ziymia Gniewsko Prusoki zabrali
    Zamek mieli zbulić - richtig źle z niym było
    Dyć szczyńściym se łostoł co przeca cieszyło.
    --

    Koszary

    Regimynt pruski tu mioł kwatery
    Dyć marzli pierońsko zimom
    W końcu "uwolnioł" ich z tego keryś
    Wiedzioł że wiyncy niy szczimiom.

    --
    forum.gazeta.pl/forum/71,1.html?f=28940
  • broneknotgeld 05.08.06, 14:31
    Zamek spichlerzym

    Toż se na spichlerz zamczysko zdało
    Zaś pomiyszali tukej niymało
    Cołkym dwie wieże z tym zatracone
    Choć tako ciyngym zamku niy koniec.
    --

    Hereszt (połowa XIX wieku)

    Z zamku co spichlerzym hereszt zrychtowali
    Nojciynższe przipodki tukej zamykali
    Niych śmierć heresztantom sie zdowo wolnościom
    Przewinioł toż ciyrpieć jego powinnościom.
    --

    Zamek gore! 1921

    Ano - se wypoloł choć przeca niy cały
    Czyje wtedy rynce łogyń podkłodały?


    --
    forum.gazeta.pl/forum/71,1.html?f=28940
  • broneknotgeld 05.08.06, 17:28
    Przez drugo wojna

    Przez drugo wojna zaś tu wiyńziynie
    Tako tyż lager przejściowy
    Toż niychej Niymcow mynczy sumiynie
    Popiołym se sypiom gowy.
    --

    Zamek dzisioj

    Dzisioj choć zamek rozbudowany
    Z heresztu yno mo przeca ramy
    Kaj mu do downy warowni zocny
    Ze wiekow w kerych richtig był mocny.

    --
    forum.gazeta.pl/forum/71,1.html?f=28940
  • broneknotgeld 05.08.06, 17:29
    Zamkowo Karczma

    Ciyngym gotykym łona tu prawi
    Nojbardzi wtedy jak se zabawisz
    Piwa zocnego we żołond wlejesz
    -Stanom przed łoczy nojstarsze dzieje.

    --
    forum.gazeta.pl/forum/71,1.html?f=28940
  • broneknotgeld 04.08.06, 18:56
    Marszałek Kapituły Rycerstwa Polskego

    Kasztelan gniewski czimie buława
    Toż i dlo zamku zocno to sprawa
    Ze tym w rycerstwie polskim mo prym
    Przeca niy yno jo ło tym wiym.
    --

    Chorongiew Komturstwa Gniewskiego

    Ciyngym na zamku "chorongiew" stoji
    I knechtow oddział tyż tako
    Juzaś pod Grunwald wyruszom w zbroji
    Kaj kończy se durś jednako.
    --

    Chorongiew Husarsko Marszałka Wojewodztwa Pomorskego

    Toz se husario tyż Gniewa czimie
    Duch Sobieskiego pewno tu drzymie.


    --
    forum.gazeta.pl/forum/71,1.html?f=28940
  • broneknotgeld 04.08.06, 18:57
    Żołty Regimynt Piechoty "Alarmetch"

    Koni dzisioj w Polsce mało
    Dyć im piechty bić se chciało
    Tako tukej stacjonujom
    Dlo zabawy powojujom.
    --

    Schola Cantorum Gymevensis

    Chór na zamku tyż zaśpiywo
    Gregoriański chorał dziwo.
    --

    Zamek Kapituły

    Kapituła Rycersko czi zamki se czimie
    Gniew z nich nojzocniejszy we polski dziedzinie.

    --
    forum.gazeta.pl/forum/71,1.html?f=28940
  • broneknotgeld 04.08.06, 18:58
    Sala Rycersko

    Bractwa Kapituły tarcze tukej majom
    Choć naskwol wojujom naprowdy se pszajom.
    --

    Order Orła z Mieczym

    Nadowo go Hetman Rycerstwa Polskego
    Jako se dorobić trza orderu tego?
    --

    Tadeusz Pagiński - Hetman Rycerstwa Polskego

    Toż szermierzy polskich tyn istny trynuje
    Tako i rycerstwu w Polsce hetmanuje.

    --
    forum.gazeta.pl/forum/71,1.html?f=28940
  • broneknotgeld 04.08.06, 21:25
    Bytowski zamek

    Toż go z bytowskich notgeldow znom
    Gryfno seryjko w kolekcji mom
    Na kery zamek we cołki krasie
    -Był taki piniondz wtedy na czasie.
    --

    W bytowskim zamku

    W bytowskim zamku muzeum dzisioj
    Tyż ło hotelu cosik żech słyszoł
    Biesiady tańce tako turnieje
    Sie we tych murach cosik durś dzieje.
    --

    Duch bytowski

    Ciyngym se w nocy po zamku snuje
    Za grzychy swoje durś pokutuje
    Krziżak na wieczność tu potympiony
    Czy winy jego my dzisioj znomy?

    --
    forum.gazeta.pl/forum/71,1.html?f=28940
  • broneknotgeld 01.08.06, 22:41
    Golub-Dobrzyń

    Krziżacki zamek nad drwyncom stanoł
    Kaj ze Torunia dziyń marszu ino
    Czas niy łoszczyńdzioł choć coś scyganioł
    Warowni mnichow niy przipomino.
    --

    Zamek Wysoki

    Ta czyńść łostała z cołki warowni
    Dyć niy wyglondo tako jak downi
    Gorom attyka dobudowano
    We siedymnostym wieku mu dano.
    --

    Końske schody

    Wjyżdżoł niymi rycerz aż na piyrszy sztok
    Toż we pełny zbroji łoszczyndzoł se krok
    Tukej go ze ajzy cołki seblykali
    A konia do stajni potym sprowodzali.

    --
    forum.gazeta.pl/forum/71,1.html?f=28940
  • broneknotgeld 04.08.06, 21:27
    "Se niy łoglondej"

    Se niy łoglondej na końskich schodach
    Bo ze tym przidzie na ciebie szkoda
    I zarzysz niyroz jako twoj koń
    Lepi Ponboczku łod tego broń.
    --

    Bioło Dama w Golubiu-Dobrzyniu

    Siostra łod krola tukej miyszkała
    Toz ciyngym po zamku łazi
    Prawiom - ło smierci swyj zapomniała
    Dyc duch jyj jakoś niy razi.
    --

    Miss Polonia w Golubiu-Dobrzyniu

    Co roku inkszo zoglondo frela
    Za Bioło Dama przebrano
    Bawi sie w nocy mozno za wiela
    Zniko ze słonkym we rano.

    --
    forum.gazeta.pl/forum/71,1.html?f=28940
  • broneknotgeld 04.08.06, 21:28
    Golub-Dobrzyń 1977

    Piyrszy rycerski turniej tu nowy
    Tako se bawiom zakute gowy
    Fioł richtig zocny nom sie rozwijo
    Choć dlo nikerych to komedyjo.
    --

    Reguła Rycersko i Kodeks 1997

    Dwadziście rokow rożnie se dzioło
    Terozki klar z tym - "rycerske koło"
    Zocno "reguła" na sia nakłodo
    Na stary muster choć przeca młodo.
    --

    Kapituła Rycerstwa Polskego

    Hetman przewodzi ty Kapitule
    W konwyncie tuzin rycerzy
    Mioł stan rycerski już być we trule
    Dyć jakby przestoł w to wierzyć.

    --
    forum.gazeta.pl/forum/71,1.html?f=28940
  • broneknotgeld 04.08.06, 21:35
    "Ło miecz Jana III Sobieskiego" 29-30.2006

    Zaś w Golubiu turniej bydzie
    Z tym wiela uciechy przidzie
    Rycerz co tyn miecz dostanie
    Mustrym inkszym tako stanie.
    --
    forum.gazeta.pl/forum/71,1.html?f=28940
  • broneknotgeld 01.08.06, 22:44
    Zamek w Malborku

    Zwiedzić twierdza - potrza dnia
    Choć i to za mało - pra?
    --

    Nojwiynksze zamczysko

    Nojwiynksze zamczysko we Polsce dzisiejszy
    Dyć przeca tyż było za czasow downiejszych
    Wawel zdo sie mały i Ksionż ślonski tako
    Toż jo sie tym ciesza - niy byda tu płakoł.

    --
    forum.gazeta.pl/forum/71,1.html?f=28940
  • broneknotgeld 04.08.06, 21:16
    Zamkowo mynnica

    Zamkowo "mynnica" ciyngym "piniondz" bije
    Choć krziżacke państwo łod wiekow niy żyje.

    --
    forum.gazeta.pl/forum/71,1.html?f=28940
  • broneknotgeld 01.08.06, 22:47
    Nidzica

    Zamek krziżacki wpiyrw tukej był
    Przi niymu osada rosła
    Jak Zakon bardzi nabiyroł siył
    I łona praw miejskich doszła

    Winrych Kniprode przeca je doł
    Wiek jeszcze lecioł sztyrnosty
    Dyć dźwignońć tako ta sztela chcioł
    Koncept w tym richtig był prosty.

    --
    forum.gazeta.pl/forum/71,1.html?f=28940
  • broneknotgeld 01.08.06, 22:49
    Johannisburg

    Zamek nad Pisom krziżacki stoji
    Johannisburgym go zwali
    W mazurski godce Jańsbork - niy w moji
    Toście już forsztelowali.
    --

    Pisz

    Skond se wywodzi grodu te miano?
    Ano łod "pisy" rzecz to już znano
    Prusy na bagno tako godali
    Zdo sie - w pamiyńci naszy łostali.

    --
    forum.gazeta.pl/forum/71,1.html?f=28940
  • broneknotgeld 01.08.06, 22:51
    "Rast"

    Prusy osada mieli przi borze
    Spokojnie w niyj kedyś żyli
    Dyć krziż już mieczym za cosik korze
    Bestoż trza pedzieć - tu byli.
    --

    "Rastenburg" - 1329

    Już tu Krziżakow strażnica stoji
    Łognia se jednak przi tymu boji
    Bo przeca ciyngym jeszcze drewniano
    Trza by zrychtować chnet murowano.
    --

    "Rastenbburg" 1374

    A no zamczysko już stoji zocne
    W murach krew jakby - toz richtig mocne
    Dobudowali przez wieki wiela
    W łostatni wojnie w łogniu ta sztela
    Dyć dzisioj zamkym Kyntrzyn sie asi
    Łodbudowany zaś miasto krasi.

    --
    forum.gazeta.pl/forum/71,1.html?f=28940
  • broneknotgeld 01.08.06, 22:54
    Zamek w Morongu

    Na brzegu jeziora warownia stanyła
    Wpiyrw ponoć ze drzewa yno łona była
    Pryndko murowany zamek postawiyli
    Krziżaki w tym majstry na mazurach byli
    --

    Modry zamek

    Tako za komuny go posztrajchowali
    Sond se tukej wkludzioł i było tyż kino
    Ło zabytek jednak za wiela niy dbali
    Tela to sie jeszcze ludziom przipomino

    Jedne krzodło zocne do dzisioj łostało
    Możno je poleku zaś wyremontujom
    Niywiela - dyć przeca tyż richtig niymało
    Teroz w rynkach ludzi co ducha w niym czujom.

    --

    Duch zamku

    Wielki Mistrz von Plauen tu wyzionoł ducha
    Jak zakon hołd łoddoł krolowi polskymu
    Błonko sie po zamku i durś szuko zucha
    By Krziżakow powiod - bo siył brakło jymu

    --
    forum.gazeta.pl/forum/71,1.html?f=28940
  • broneknotgeld 01.08.06, 22:56
    Won!

    Tako von Plauen ryczy tu basym
    Bo godka durś słyszy polsko
    Idzie wystraszyć se tego czasym
    Dyć dlo nikerych to swojsko.
    --

    Piotr von Dohna

    Rod jego downo Krziżakom służoł
    Przi nich wyrosnoł i wiela użoł
    Pyjter w Morongu burgrabiom łostoł
    Zameczek zocny przi tymu dostoł
    Dyć sie ze czasym zamek stoł ciasny
    Syn - Piotr Achacy - postawioł własny.

    --
    forum.gazeta.pl/forum/71,1.html?f=28940
  • rita100 04.08.06, 22:57
    media.putfile.com/MORAG
    Tylko glośniczki włączcie i już będzie opowieśc o zamku
    schlesien.nwgw.de/board/viewtopic.php?t=156
    A tu zdjęcia zamku
  • broneknotgeld 02.08.06, 18:07
    Grodziec

    Grod to był łod Biebrzan nim Polanie prziszli
    Dyć i piyrsze Piasty mieli go we myśli
    Bestoż łosadziyli tukej kasztelana
    By ziymia niy przeszła pod inkszego pana

    Zamek w Grodzcu stary - znoł go wiek cztyrnosty
    A możno i piyrwyj te mury urosły
    Choć z czasym sie wszysko fest tu pomiyniyło
    Za tych ślonskich Piastow ciekawie tyż było

    Robioł tu turnieje ksionże na Legnicy
    Kere głośne były w cołki okolicy
    A jak na tym Ślonsku dżuma żniwowała
    Dwor sie tukej kludzioł w całości bezmała

    Inkszy Piast we Grodźcu groł za raubrittera
    Brata czynsto grabioł - tako był cholera
    Dwa razy chcioł do sia ucapić tron Polski
    W Krakowie go struli bo niy był im swojski

    W siedymnostym wieku Wallenstein grod zdoboł
    Załoga na zamku podstympym łon pobioł
    Wpuściyła ich baba co zwała sie Meta
    Mamona - to była jyj zdrady podnieta

    Dyć w końcu jak zamek zaś Szwedy zajyli
    Wojoki cysorza go krwawo łodbiyli
    I pedzioł generał - "Trza mury wysadzić"
    Jeronie - już niy szło nic na to poradzić

    W dziewiytnostym wieku ta staro ruina
    To była Hochbergow ciekawo dziedzina
    Łoni zaś tyn zamek se łodbudowali
    Potym tyż turystow do niego ściongali

    Z czasym Grodziec przeszoł we Dirskena rynce
    Dobry to był okres - choby we podziynce
    Za te downe lata czynsto niyszczyńśliwe
    Teroz zamek blysnoł jasno i prowdziwie

    Z końcym drugi wojny prziszła ciynżko dola
    Drzwi Rusom sie tukej łotwarły do mola
    Wiela dobra we nim pryndko nagrabiyli
    Mało brakowało - wszysko by zniszczyli

    Terozki poleku zamek nom łodżywo
    Zaś sie tu turysta niyjedyn podziwo
    Na mury co pedzieć nom umiom durś wiela
    Yno trza mieć w zocy ta fajnisto sztela.




    Pałac w Grodzcu

    Niy yno ze zamku tyn Grodziec nom słynie
    Bo pałac rokoko tyż we tyj dziedzinie
    Za Dirskenow Fajnie go tu łodnowiyli
    Prawie po krolewsku we nim łoni żyli

    Willi - fater piyrszy tukej rezydowoł
    A jak syn to erbnoł łod sia wiela dowoł
    Yno że pszoł przeca łon tyż tym bronotnym
    Bestoż koniec prziszoł na Grodziec sromotny

    I zamek i pałac Ruske rozgrabiyli
    Szczyńściym że niy cołkym to wszysko zniszczyli
    Werci sie tu zajrzeć - historii pomacać
    By wiedzieć że niy trza w niyj za wiela gracać.

    --
    forum.gazeta.pl/forum/71,1.html?f=28940
  • broneknotgeld 02.08.06, 18:09
    Zamek Grodztwo w Kamiynny Gorze

    Hans Schof ze Chojnika zaczoł go budować
    Wiynkszym i piykniejszym z czasym mioł sie stować
    Ważny był to zamek jak tu rezydowoł
    Prezydynt co Ślonskym w Prusach zawiadowoł
    Z tych Wernigerode przeca tyż pochodzioł
    Molo - łon we Niymcach Reichstagym przewodzioł
    Dyć za republiki było to już gminne
    A po drugi wojnie choć niczymu winne
    Poszło jakoś wszysko na te zatracynie
    W końcu zamek zjadły polske już płomiynie.

    --
    forum.gazeta.pl/forum/71,1.html?f=28940
  • broneknotgeld 02.08.06, 18:10
    Zamek Radosno

    Zamek ksiyńcia na Świdnicy
    Pilnowoł tyj okolicy
    Łon do Ksionża dronioł drogi
    Z czasym raubritterske progi
    Szellendorfy tu siedzieli
    Co rabować wszyskich chcieli
    Skończyło sie niyszczyńśliwie
    Stryczek łogyń i po piwie
    Wejrzyj jednak we ruiny
    Niyradosnyj tyj dziedziny.

    --
    forum.gazeta.pl/forum/71,1.html?f=28940
  • broneknotgeld 02.08.06, 18:11
    Rogowiec

    Wylyź na Rogowiec - zamek tukej stoji
    Nojwyży we Polsce roztomili moji
    Dzisioj to ruina - możno niyciekawy
    Dyć kedyś łon bronioł ze Czech tu przeprawy
    Jednak go złupiyli pepicke husyty
    I niy szło już godać że jest niyzdobyty
    Był łon jeszcze potym w Schellendorfow rynkach
    Co siedzom do dzisioj we piekle na mynkach
    Skiż nich przeca mury te marnie skończyły
    By gniozdym łod zbojcow już nigdy niy były.

    --
    forum.gazeta.pl/forum/71,1.html?f=28940
  • broneknotgeld 02.08.06, 18:12
    Mokrzeszów

    Zamek w Mokrzeszowie to richtig koszary
    Dyć łon nawet niy jest za wiela tyż stary
    Nojpiyrw tu kadetow do armii szkolyli
    Zaś bez piyrszo wojna lotnikow lyczyli

    Kariera łon zrobioł jednak w III Rzeszy
    Farorz by mi pedzioł - Chopie możno grzeszysz
    Lebensbornym Niymcy dzisioj sie niy chwolom
    Ło tym teroz jakoś zapomnieć już wolom

    A ponoć jeździyli tu do Mokrzeszowa
    By rasa "nadludzi" Hitlerowi chować
    Znomy ta historia - nic z tego niy wyszło
    Pryndko potym Niymcom biyda klepać prziszło.



    Pałac

    Mioł Hochberg tyż pałac we tym Mokrzeszowie
    We dzisiejszy szkole poznowo go czowiek
    Tunel kolejowy do niego prowadzioł
    Ale jo niy byda ło to sie tu wadzioł.

    --
    forum.gazeta.pl/forum/71,1.html?f=28940
  • broneknotgeld 02.08.06, 18:12
    Zamek Książ

    Wiela uciyrpioł tyn zamek - cholera!
    Jak szykowali kwatera Hitlera
    Za to by szło im w galoty kopać
    Dyć szkoda mynczyć starego chopa

    Tych co niszczyli prawie już niy ma
    Terozki z zamkym durś tyn som tymat
    Czy tak jak kedyś łon nom zablyśnie?
    Take pytanie w gowa sie ciśnie



    Banhof w Książu

    Pod zamkym w podziymiach banhof sie zrobiyli
    Chcieli coby cugym aż tukej jeździyli
    Tuneli do niego i dzisioj szukajom
    Bo durś jakeś skarby we gowie tu majom.

    --
    forum.gazeta.pl/forum/71,1.html?f=28940
  • broneknotgeld 02.08.06, 18:13
    Sztolnie w Ksionżu

    Po zamkowych sztolniach szło po wojnie chodzić
    Wyńście szpryngli Ruskie jak mieli łodchodzić
    Dzisioj zwiydzać idzie konsek tych podziymi
    Kto wiy jednak ło tym co wiyncyj we ziymi?

    --
    forum.gazeta.pl/forum/71,1.html?f=28940
  • broneknotgeld 02.08.06, 18:14
    Ksionż - bolkowo warownia

    Łod Bolka sie zaczło - łon zamek zrychtowoł
    By spokoju ziymi tyj richtig pilnowoł
    Ksionż, Cisy, Świybodziec drog ksiynstwa broniyły
    Dyć w czinostym wieku już tu łone były.



    Hochbergowie w Ksionżu

    Czimali sie Ksionża dość dugo i krzepko
    We Pszczynie im było jednak bardzi ciepło
    Bo wiyncyj piniyndzy suł im Gorny Ślonzek
    Choć i na tym Dolnym łakomy był konsek

    Ksionż był jednak wtedy richtig perłom naszom
    To niy to co teroz - jak te mury straszom
    Hochbergi we zamku fortuna topiyli
    Cysorzy i krolow przeca tu gościyli

    Jednak jak se Hitler łapa nań położył
    Zamek tyn już jakoś naprowdy niy ożył
    I choć dzisioj przeca tyż go podziwiomy
    Do ksionżyncych czasow w tych ścianach wzdychomy.

    --
    forum.gazeta.pl/forum/71,1.html?f=28940
  • broneknotgeld 02.08.06, 18:15
    Ogiery ze Ksionża

    We ksionżyncych stajniach dzisioj ujyżdżajom
    Ogiery - bo przeca warunki tam majom
    Jak widać tradycjo durś jest tukej żywo
    Piyknym koniom zowdy cołki Ksionż sie dziwoł.



    Zamkowe tarasy

    Tarasy we Ksionżu i dzisioj som piykne
    Już tego widoku naprowdy nom styknie
    Jo przi tych fontannach wpodom w zochwyt wielki
    Chyntnie bych tam gonioł jakeś gryfne frelki.



    Stary Ksionż

    W łoziymnostym wieku już ta moda była
    Na ruiny zamkow w kerych jakoś siyła
    Zło - dobro - niyważne bele tajymniczo
    W czowieku uczucie niypokoju wzniyco

    Stało sie - Jan Hochberg zbudowoł ruina
    Bo chcioł mieć ciekawszo ta swoja dziedzina
    Po prowdzie fundamynt był tukej prastary
    W kerym sie już piyrwyj dzioły jakeś czary

    Gront że już stanyły "stare mury nowe"
    Dziwowoł sie nimi tyż niyjedyn czowiek
    Goście łod Hochbergow we nich "balowali"
    Turnieje pamiontki - wszysko podziwiali

    Dyć downo minyły dni jejich świytności
    Stary Ksionż niy dowo dzisioj tyj radości
    Możno jednak kryje niyjedna zagadka
    Bo przeca choć "nowy" mo już swoje latka.

    --
    forum.gazeta.pl/forum/71,1.html?f=28940
  • broneknotgeld 02.08.06, 18:15
    Palmiarnia Hochbergow

    Cieszoł sie Jan Hynryk swojom gryfnom frelkom
    Kerom przeca darzoł miyłościom tyż wielkom
    Chcioł coby codziynnie tonyła we kwiotkach
    Ze niyj zresztom była przepiykno "stokrotka"

    Bestoż ta palmiarnio w Lubiechowie zrobioł
    Kwiotkami z niyj nawet i Ksionż swoj łozdobioł
    Co ze jego pszonio do dzisioj łostało?
    Wejrzyj na to wszysko - dyć tego niymało.



    Jeziorko Daisy

    Kedyś to był kamiyniołom - zaloli go wodom
    We pamiyńci Daisy czimie - widziało jom modom.

    --
    forum.gazeta.pl/forum/71,1.html?f=28940
  • broneknotgeld 02.08.06, 18:16
    Zamek Cisy

    Dzisioj to jest yno ciekawo ruina
    A kedyś bolkowo warowno dziedzina
    Kero pilnowała ksiynstwa świdnickego
    By wrog tu niy prziszoł i niy podbioł jego

    Dyć czeskim husytom już sie niy łoparła
    A w nastympnych wojnach tyż ciyngi fest garła
    Bestoż już łod downa stojom resztki murow
    W kerych wiater hulo i niy łoto dziurow

    Ponoć we tym zamku romantyzmu wiela
    Wybrały go parki se za swoja sztela
    Czasym tu widujom wodnica we nocy
    I ducha rycerza co wlypio w nia łoczy.

    --
    forum.gazeta.pl/forum/71,1.html?f=28940
  • broneknotgeld 02.08.06, 18:17
    Zamek Nowy Dwor

    Jest żeś we Wałbrzychu - na Nowy Dwor wdepnij
    Ciekawo ruina - łokym na nia ciepnij
    W jedynostym wieku stoł tu grod warowny
    A som zmek przeca tyż naprowdy downy

    Jak Jorg z Podiebradu Ślonzek do sia zgarnoł
    Tyn zamek był zocny choć prziszłość mioł marnom
    Bo po wojnie przeca - tyj czidziestoletni
    Dzieje tego zamku jakosik już przetli

    Ponoć tu we lochach - jak legynda głosi
    Skarb łod raubritterow łodkrycio sie prosi
    Wiela w tym jest prowdy? Możno sie łokoże
    Bo cosik szukajom w starym Nowym Dworze.

    --
    forum.gazeta.pl/forum/71,1.html?f=28940
  • broneknotgeld 02.08.06, 18:18
    "Duch" z Grodna

    W zamku Grodno straszy Gośka
    Jo żech tyż jom boł sie troszka
    Aż mi to wyklarowali
    Szkelet naskwol tukej dali

    Dlo turystow to jest bajka
    Miała prziniyść "złote jajka"
    Co mi szkodzi - kożdy prowi
    - Wciepnie grosz kościotrupowi

    Potym jeszcze roz tu wdepnie
    Nici z zamkym już niy przetnie
    Coś w tym "duchu" jest takego
    Że sie wroco durś do niego.



    Zamek Grodno

    Wele Zagorza jest zamek Grodno
    Dzisioj turystow sztela to modno
    Piyrwyj warownia na gorze Chojnie
    By tukej ludzie żyli spokojnie

    Bolko Wysoki jom wybudowoł
    Bolko Surowy z niyj se polowoł
    Jejich burgrabia na zamku siedzioł
    Co tu sie dzioło łon wszysko wiedzioł

    Z czasym - jak władza ksiyńcia łosłabła
    To raubritterom warownia wpadła
    Puczek Czetryce - miana niysławne
    Czasy to były tyż niyzabawne

    W końcu Hochbergi zamek objyli
    Potym von Logau ze kamaryli
    Tego von Salza - biskupa Wrocka
    Zresztom tych panow była tu mocka

    Werci sie jeszcze Ebenow wspomnieć
    Chocioż ktoś powiy - Lepiyj zapomnieć
    Bo chopow łoni gnymbiyli tela
    Że bunt przeżyła ta ślonsko sztela

    Złe czasy zamku nastały dali
    Możno by nawet go łozebrali
    Jednak sie znoloz ciekawy kupiec
    Profesor Busching - niy jakiś gupiec

    Łon wszysko piyknie wyremontowoł
    I turystykom sie tu zajmowoł
    Było to - dej se pozor czowieku
    Z poczontkym dziewiytnostego wieku

    Co erbli inksi po śmierci jego
    Sprzedali w rynce jednak hrabiego
    Tego von Burgaus a po nim przeca
    Grodno Zedlitze wziyli do neca

    Łoni sie chcieli tym zamkym chwolić
    Wiela zrobiyli - widać mu pszoli
    Atrakcjo była to ślonski ziymi
    We tym jo zgodzom sie tyż ze niymi

    Tu dzisioj przeca werci sie wdepnońć
    Z zochwytym łokym na wszysko ciepnońć
    By coś łostało głymboko w duszy
    Nim trza zaś bydzie dalyj wyruszyć.


    Na zamku Grodno

    Za drugi wojny tu tysz szukali
    Skrziniow co Niymcy ponoć schowali
    Jednak niczego niy znojdli tukej
    Podziwiej zamek - skarbow niy szukej.

    --
    forum.gazeta.pl/forum/71,1.html?f=28940
  • broneknotgeld 02.08.06, 18:19
    Pałac w Bożkowie

    Perłom Ziymi Kłodzki tyn pałac i dzisioj
    Downiyj było lepiyj - kożdy ło nim słyszoł
    Hrabiego Magnisa we tym była gowa
    By gościyła tukej tyż prusko krolowa
    Na Grodziszcze wstawioł wieża widokowo
    Z niyj widok na pałac wiela wszyskim dowo
    Dziqwejcie se jednak tyż na park ciekawy
    A kedyś tu cuda była dlo zabawy
    I dzisioj sie jednak idzie pozochwycać
    Pałac park i cołko piykno okolica.

    --
    forum.gazeta.pl/forum/71,1.html?f=28940
  • broneknotgeld 02.08.06, 18:33
    "Zameczek" w Bożkowie

    Ta sztuczno ruina we parku durś jest
    Grafini von Gotzen miała taki gest
    Dwiesta lot już idzie łoglondać to tukej
    Moda tako była - w tym prziczyny szukej
    Dyć w Europie wtedy romantyzm był w zocy
    Stowiali "ruiny" by cieszyć tym łoczy
    Tukej tyż dynkmale stare sie ściongnyli
    Bestoż miano "zamek" dubeltowo myli.

    --
    forum.gazeta.pl/forum/71,1.html?f=28940
  • broneknotgeld 02.08.06, 18:21
    Srebrno Gora

    Choć Fryc Wielki Ślonsk ucapioł i czimoł go mocno
    To Austryjom chcioł mu łodbić ta dziedzina zocno
    Kero piyrwyj jego była - Ślonsk był przi Austyji
    Przi Habsburgach - tyj Europy wielki familiji
    Boł sie Frycek ło swo zdobycz - twierdze tu budowoł
    Zaś nojwiynkszo nojmocniejszo w Srebrny Gorze stowioł.



    Dyć czasym bywo

    Pechowo wszysko "Riese" nazwali
    Legynda z Ksionża tym wspominali
    Już kamiyń dzwignoł już blisko był
    Dyć sie przeliczoł - łopod ze siył.



    Twierdza

    Na głownym grzbiecie Gor Sowich
    Ta twierdza łopasło stanyła
    Historio tyż tako wom powiy
    Że łona zdobyto niy była

    Chocioż za Napoleona
    Możno by sie to już stało
    Dyć niy trza jom było pokonać
    Po Tylży już niy wypodało

    Potym swyj roli niy grała
    Prawdziwy fest groźny warowni
    Wiyńżiyniym nojciynższym sie stała
    Bo tak tyż z nom było tu downi.

    --
    forum.gazeta.pl/forum/71,1.html?f=28940
  • broneknotgeld 02.08.06, 18:22
    Wiyńziynie W Srebrny Gorze

    Sławnych ludzi tu wiyńźiyli
    Ponoć pitnońć niy szło
    Dyć sie we tym tyż mylyli
    Poru szprytnych wyszło

    Roz kominiorz to dokozoł
    Uciyk im z fasonym
    Zaś go capli - dyć pokozoł
    Kaj był feler łonych

    Nawet w czasie drugi wojny
    Jyńcy uciykali
    Niymiec był coś za spokojny
    Jak łoni pitali.



    Fort Ostrog

    Tyn fort srebrnogorski twierdzy dostoł sie młodzieży
    Wiluś (drugi) im go łoddoł - możesz mi uwierzyć
    Tym gyszynkym sie asiyli - gowy mieli w chmurach
    Piyrwszym ich schroniskym było we tutejszych gorach.



    Łod wojny do wojny

    Bez piyrszo wojna w tyj twierdzy srogi
    Choć przeca już cołkym stary
    Broń rychtowali "frontowe bogi"
    Co ludzi słała na mary

    We miyndzywojniu tyż sławno była
    Turystow tukej dość wiela
    Jeździyli blikać na jeji "siyła"
    We zocy była ta sztela

    No a w nastympnyj wojnie zaś tukej
    Oboz jyniecki zrobiyli
    Skarbow wojynnych jak chcesz tyż szukej
    Ponoć tu Niymcy coś skryli.

    --
    forum.gazeta.pl/forum/71,1.html?f=28940
  • broneknotgeld 02.08.06, 18:23
    Schronisko w Srebrny Gorze

    Seckendorfowie ze Srebrny Gory w masoński siedzieli loży
    A na dodatek fantazjo ludzko chciała im cosik dołożyć
    Dzisioj we chałpie jejich schronisko - spokojnie czas sie tu kulo
    Yno że nocom straszy syncysko - niy byda wcale wos fuloł.



    Srebrnogorski Donżon

    Łon jest nojwiynkszy - podziwu godziyn
    To byda godać choćby i co dziyń
    Z niego łoboczysz poł Ślonska prawie
    Chocioż niy służoł taki zabawie

    Wojska w niym wiela szło kwaterować
    Na forant mocka prowiantu chować
    No i sie bronić pieronym dugo
    Szczimać natarcie jak odsiycz mrugo.

    --
    forum.gazeta.pl/forum/71,1.html?f=28940
  • broneknotgeld 02.08.06, 18:25
    Zamek

    Ta Gora Bardzko zamek tyż miała
    Dyć sie historio z niym niy cackała
    Czeske husyty go zrujnowali
    Żodyn niy miyszkoł w niym potym dali
    Chnetko po zamku zniknołby ślod
    Ale archeolog ze łopatom wpod.

    --
    forum.gazeta.pl/forum/71,1.html?f=28940
  • broneknotgeld 02.08.06, 18:26
    Twierdza Kłodzko

    Grod był we Kłodzku słowiański prastary
    Jeszcze niym Polska ziymie te podbiyła
    Tyndy do Rzymu szły przeca jantary
    A okolica durś rosła we siyła

    Za Piastow zamek stanoł tu na gorze
    Kery pilnowoł durś ważnego szlaku
    Załoga liczno stoła w jego murze
    Kłodzko to trocha taki ślonski Krakow

    Twierdza zrobiyli z niego Austryjoki
    Fryc Wielki dalyj jom budowoł
    Coby tu mocno stanyli Prusoki
    Wielgachny donjon we środku niyj stowioł

    Chwolom sie Niymcy - W Prusach yno łona
    Łoparła wojskom sie Napoleona
    Dyć jo tam niy wiym coby sie z niom stało
    Jakby sie ze Tylży "pokoju" niy miało

    Z czasym ze twierdzy zrobiyli wiyńziynie
    Kere rygorym we Niymcach tyż słynie
    Dzisioj zabytek to na polski stronie
    Bawi turystow - twierdzy jest już koniec.



    Pruski romans

    Groźnych bańdziorow w Kłodzku wyńziyli
    Jednak niy łoni sławni tu byli
    Terozki wspomnieć chyba jo musza
    Zakochanego dość fest karlusa

    Fryderyk von Trenck - piykny i mody
    Tu łod miyłości zażył ochłody
    Smoloł cholywki do siostry krola
    Ale niy wygroł ze Frycym fula

    Chocioż Amalia nic sie niy broni
    Krol sie niy godzi - do twierdzy goni
    Niy chce we hrabim szwagra swojego
    Widzi w tym gańba dlo tronu swego

    Hareszt nakłado pryndko na szaca
    Wojsko go wiezie do tego Glatza
    Miało być pszonie a jest wiyńziynie
    Jak kamiyń Fryca twarde sumiynie

    Po prowdzie w twierdzy go niy mynczyli
    Na wiela przeca mu pozwolyli
    A łon durś myśloł ło lipście swoji
    I ło ucieczce z wiyńziynio roji

    Bestoż do skutku pitać probowoł
    Aż sztyry razy rady niy dowoł
    Jednak za piontym gładko mu wyszło
    Choć ło Amalii marzynie prysło

    We cołkich Niymcach szukali zbiega
    Dyć wystraszyli jednak jak czeba
    Zaocznie wyrok śmierci mu dali
    I na szafocie gymba wiyszali

    Wielkymu uciyk Fryderyk mały
    Z miyłości nici - choć karlus cały
    Taki był koniec historii cołki
    Pszajesz - uwożej jednak na stołki.

    --
    forum.gazeta.pl/forum/71,1.html?f=28940
  • broneknotgeld 02.08.06, 18:27
    Minerske chodniki

    Minerske chodniki atrakcjom som kłodzkom
    Światła tukej było choćby ciymnom nockom
    A przeca wojoki musieli w niych chodzić
    Jak oblegajoncym chcieli fest zaszkodzić
    Żodyn niy śmioł myśleć ło świyczce pochodni
    W luft by wylecieli pryndzyj niż ktoś łod nich

    Po prowdzie to z tego pożytku niy było
    Rzodko oblygali - czynsto sie ćwiczyło.



    Hrabianka Orsini

    Hrabianka? - po prowdzie ze niyj mieszczka była
    Z goroncego pszonio na Ślonsku słynyła
    Tych liplingow swojich ponoć struła wiela
    Jak już niy wydoloł to mioł z tego tela

    Godajom tyż ło tym - co robiyła łona
    Jak armio tu prziszła łod Napoleona
    Ponoć w twierdzy kłodzki podtruła załoga
    Coby sie poddali wojskom tego "boga"

    Dyć za to co złego naprowdy zrobiyła
    W końcu do tyj twierdzy za wiyńźnia trefiyła
    Łodsiedziała tukej aż dwadziścia lotek
    Wylazła - już niy był ze niyj piykny kwiotek.

    --
    forum.gazeta.pl/forum/71,1.html?f=28940
  • broneknotgeld 02.08.06, 18:27
    Baron Wacław Kinski

    Za tych Austryjokow Kinski w Kłodzku siedzioł
    Spiskowoł i jontrzoł - Habsburg sie dowiedzioł
    Wysłoł pod eskortom do zamku kłodzkiego
    Dyć Kinski durś myśloł jak uciyc ze niego

    No i musza pedzieć że mu sie udało
    Jak wino we gowie strażnikom szumiało
    Dziura pryndzyj wykuł zrobioł tyż drabina
    Wszyscy tukej potym mieli kwaśno mina.



    Andreas Faulhaber w Kłodzku

    Ksiondz Faulhaber - twierdzy wiyńziyń richtig zocny
    Coż - kej mioł paragraf na siebie dość mocny
    Kusioł do dezercji - to mu zarzucali
    Tego w wojsku Fryca niy tolerowali

    Godali co było niywiela w tym prowdy
    Na zimne dmuchali - to robiyli zowdy
    Jego przeznaczyniym kara śmierci była
    Dyć na tym historio sie niy zakończyła

    Cuda z ciałym dugo sie tu potym działy
    Zwłoki przeca wcale sie niy rozkłodały
    W końcu pochowali je w kłodzkim kościele
    Tako ta historio ciekawie sie ściele.

    --
    forum.gazeta.pl/forum/71,1.html?f=28940
  • broneknotgeld 02.08.06, 18:28
    Wielko i mało.

    Wielko i mało twierdza Nysa Kłodzko dzielyła
    Forteczno Gora wiynkszo - Owczo myńszo zajyła
    Z Czech do Ślonzka te twierdze droga fest zamknyły
    Łone już prusko ziymia przed Austryjom broniyły

    Bajajom ludzie - Kedyś podziymie je łonczyło
    Kto szuko - możno tam trefi - oby sie spełniyło
    Plany fortecy niypełne - jak chcesz licz na wiela
    Dyć niyjedyn durś godo - Blyśnie jeszcze ta sztela



    Finowie w Kłodzku

    Przez drugo wojna wiyńziyli tukej
    Finow - dyć dzisioj prożno ich szukej
    Co do jednego wymordowali
    I niy wiadomo kaj pochowali

    Niy yno jyńcow ta śmierć spotkała
    Bo ich cywili tyż se zabrała
    Kajś ich wywiyźli w kierunku Piły
    Wele Szydłowca ślady zginyły.

    --
    forum.gazeta.pl/forum/71,1.html?f=28940
  • broneknotgeld 16.02.07, 17:16
    Ernst Gutschow

    We Dreznie mioł gyszeft co stoł na cygarach
    Dyć i cygartow wiela istny robioł
    Prziszło mu ło tytuł grofa tako starać
    Do śmietonki Niymiec ze geldym se dobioł

    Toż terozki w wiyrchu - zamku trza zocnego
    A na Ślonsku Czocha niszczoł zapuszczony
    Wkludzioł se dość drapko nasz Ernst już do niego
    Choć prawiom co remont kosztowoł miliony.
    --

    Remont zamku Czocha

    Bodo Ebchardt go prowadzioł
    Zocnie tako dyć poradzioł
    Koncept richtig mu se udo
    Tako momy dzisioj cudo.
    --

    Gotyk z renesansym

    Gotyk z renesansym kunsztym kuplowany
    Potomnym tyn zamek jako perła dany.

    --
    Ruda Śląska - stolica fraszki
  • broneknotgeld 17.02.07, 15:38
    Remont zamku Czocha

    Bodo Ebchardt go prowadzioł
    Zocnie tako dyć poradzioł
    Koncept richtig mu se udo
    Tako momy dzisioj cudo.
    --

    Gotyk z renesansym

    Gotyk z renesansym kunsztym kuplowany
    Potomnym tyn zamek jako perła dany.
    --

    Ech - se dzioło!

    Grof -nuworysz wiela bawioł
    Herb swoj tako szlachci - prawioł
    Arystokracyji tela
    Niy widziała nigdy sztela

    Kajzerowskim Niymcom przeca
    Potrza i takego neca
    Z ruskom zaś rewolucyjom
    Tu uciekiniery żyjom.

    --
    Ruda Śląska - stolica fraszki
  • broneknotgeld 17.02.07, 22:27
    Kolekcjoner

    Ernst von Gutschow co kupowoł?
    Toż istny kolekcjonowoł
    Te pamiontki co po carach
    -Romanowy już na marach.
    --

    W bibliotyce

    Zamek Czocha - biliotyka
    Kto bibliofil tu chcioł rzykać.
    --

    Sala Rycersko i Marmurowo

    Sala Rycersko i Marmurowo
    Przi karnawale rajym se zdowo
    Tela grofiniow tu i princesow
    Znojdziesz kniazinie ze ruskich kresow

    Wszysko tańcuje, wszysko se bawi
    Radości wiela Ernst Gutschow sprawi
    Dyć cosik jednak w tym niy sztimuje
    Czy już se koniec epoki czuje?

    --
    Ruda Śląska - stolica fraszki
  • broneknotgeld 17.02.07, 22:30
    Sala Rycersko

    Tu se śmietonka wytańcowała
    Dyć i kapela radocha miała
    Dlo zocnych gości tako przigrywać
    A na nikerych trocha podziwać.
    --

    Sala Marmurowo

    Ech - by se chciało pobiesiadować
    Tako jak piyrwyj w ty sali przeca
    Pewno bydziecie to forsztelować
    Że do lodowki zarozki leca.
    --

    Komnata Cesarsko

    Łoze tu ponoć zapadnia miało
    Tako i "kosom" cie czynstowało
    Dzisioj nocować tam wom poradza
    Choć som se ło to ze ślubnom wadza.

    --
    Ruda Śląska - stolica fraszki
  • broneknotgeld 18.02.07, 10:50
    Na służbie

    Ano - za komuny wojokom łon służoł
    Niyjedyn generał wiela se tu użoł
    Wojsko Polske w zamku zdowało se panym
    Rano, we dnie, w nocy, no i zaś nad ranym.

    --

    Jedli, piyli

    Jedli, piyli generały
    Sztab narombol se chnet cały
    Toż wojokow w tym radocha
    Że fajrujom w zamku Czocha.
    --

    Kominek

    W Sali Marmurowy kominek ciekawy
    Przi niymu se dzioły roztomajte sprawy.

    --
    Ruda Śląska - stolica fraszki
  • broneknotgeld 18.02.07, 11:25
    Z wieży zamkowy

    Z wieży se Kwisie tukej podziwosz
    Co niydaleko mo zalyw swoj
    Tako dziedzinie zocny tyż kiwosz
    Koniec tyż przeca mo urlop twoj.
    --

    "Gdzie jest generał?"

    Kaj jest generał? -Na zamku Czocha!
    Toż powspominosz tyn film se trocha.
    --

    "Wiedźmin"

    Widzioł tyn zamek dyć i "Wiedźmina"
    Dlo mie to wcale niy jest nowina.

    --
    Ruda Śląska - stolica fraszki
  • broneknotgeld 02.08.06, 18:29
    Pałac w Kamiyńcu Zombkowickim

    Pałac we Kamiyńcu tyż Ślonska był cudym
    Schinkel go budowoł pod koniec żywota
    Siedym lot dzwigali ta budowla z trudym
    Kosztowoł łon yno ze trzi tony złota

    Marianna Orańsko to finansowała
    Za syna łod krola piyrwyj sie wydała
    A jak na pałacu postawiyli wiecha
    Cołke Prusy miały pierońsko uciecha

    Bo znojdła sie szaca w swoji stajni blisko
    Ze Hohenzollernym szajdong pryndko wziyła
    Z liplingym w pałacu łona sie zamiyszko
    Bo we jeji pszoniu była tako siyła

    Choć mury eks-chopa czynsto tyż widziały
    Dyć przeca Kamiyniec był richtig niymały
    Niy to co dzisiejsze małe nasze budy
    Jak sie niy widzieli niy było łostudy.



    To ci jazda

    Marianny Orański żywot był burzliwy
    Dyć nawet po śmierci czekały jom dziwy
    Jak ruske soldaty Kamiyniec zajyli
    To i jeji zwłokom tyż niy łodpuściyli

    Wyciongli jom z truły - wietrzyli na dworze
    No i łobwoziyli nawet na motorze
    Ciekawe co potym ze niom tu sie dzioło
    Pewnie jyj z Ruskimi niy było wesoło.

    --
    forum.gazeta.pl/forum/71,1.html?f=28940
  • broneknotgeld 02.08.06, 18:30
    Pałac Kultury i Nauki

    Uczyli mie w szkole że Pałac Kultury
    Jest darym Sowietow dlo tyj naszy dziury
    Ze Kamiyńca jednak poszły tam marmury
    Powiydz czym durś blyszczom te warszawske mury

    Bestoż tukej godom że ślonsko to sprawa
    Jako i ta cegła z keryj jest Warszawa.



    --
    forum.gazeta.pl/forum/71,1.html?f=28940
  • broneknotgeld 02.08.06, 18:31
    Stolecko ruina

    Wele Zombkowic we wiosce Stolec
    Pałac stoł piykny choby pachole
    Z łoziymnostego był wieku ino
    Terozki to sie nom przipomino

    Jak drugo wojna w świecie nastała
    To SA dlo sia połac zabrała
    Potym zaś Ruski wiela pokradli
    No i Cygany jeszcze tu wpadli

    Dzisioj niywiela z niego łostało
    Ło piykne mury nic sie niy dbało
    Mogby tu blyszczeć - łoczy nom cieszyć
    Dbać trzeba było - a niy durś grzeszyć.

    --
    forum.gazeta.pl/forum/71,1.html?f=28940
  • broneknotgeld 02.08.06, 18:31
    Zamek w Zombkowicach Śl.

    Dzisioj we ruinie zamek zombkowicki
    Dyć przeca niy było tak ze niym tu wdycki
    Pepikow to kedyś solidno forteca
    Potym piykny zamek z renesansu neca

    Problym we tym jednak że durś zdobywany
    W końcu przestoł lyczyć swoje wielke rany
    Łostatnio łod Szwedow uciyrpioł pieronym
    Potym jeszcze landrat trocha chodzioł po niym

    W koncu łopuszczony w łoziymnostym wieku
    We ruina pryndko miynioł sie czowieku
    Pożar strowioł dachy fosa zasypali
    No i jak niszczoł niszczy sie nom dali.

    --
    forum.gazeta.pl/forum/71,1.html?f=28940

Popularne wątki

Nie pamiętasz hasła

lub ?

 

Nie masz jeszcze konta? Zarejestruj się

Nakarm Pajacyka