• drzewko
  • od najstarszego
  • od najnowszego

Wiersze po Śląsku - przeróbki Dodaj do ulubionych

  • 19.03.08, 18:38
    PAN HILARY
    ( po śląsku)


    Loto, tyro Pan Hilary, do dekla mu piere,
    bo kaś ten boroczek stary, posioł swoje brely .
    Szuko w galotach, kabot obmacuje
    przewróciył szczewiki, psinco znejduje.
    Bajzel w szranku i w bifyju
    a już leci do antryju.
    „ Kurde”- woło- „ kurde bele”
    ktoś mi rąbnął moje brely .
    Przewraco leżanka i pod nią filuje,
    borok se wnerwił, gnatów już nie czuje .
    Szuko w kafloku, kopie w kredensie,
    glaca spocono, cały se trzynsie.
    Diabelskie berle na amym kajś wcięło,
    za oknym już downo blank se ściemnieło.
    Naroz do zdzadła zaglsdo Hilary,
    aż mu po puklu przefiurgły ciary.
    Patrzi na kichol, po łebie se puko,
    bo znejdły se brely, ty co ich tak szukoł.
    Czy to nie ma gańba, no powiedzcie sami,
    mieć brely na nosie, a szukać pod ryczkami?

    --
    Madohora
    --
    Nikiszowiec
    Edytor zaawansowany
    • 19.03.08, 18:38
      PAULEK I GUSTLIK
      ( po śląsku)

      Paulek i Gustlik razym se mieszkali,
      sfady nie mieli, ani se nie prali.
      Bo Gustlik to chłop diobelsko spokojny,
      nie cisł se nigdy ku sfadzie do wojny.
      Dycki gazeta czytoł, albo groł w szkota,
      albo se legnął, jak na stary lata.
      We swojej izbie na wierchu, był w niebo wzięti,
      Jak mioł co lubieł, czyli spokój świenty.

      Paulek w tyj chałupie, na dole mioł izba,
      i choć do tygo nie chcioł se prziznać,
      głupek z niego był fest porąbany,
      myśliwca udowoł dycki nad ranym.
      Trąbieł w gon sygnały, chytoł haziki,
      na fazany strzyloł i na inny ptoki.

      Biydok Gustlik przez ty wyrobianie,
      głowa mioł wielko, jak na jesiyń banie.
      Wali po prośbie, Pauleczku kochany,
      być tak trocha ciszi, na każdym ranym,
      bo żyje se ciężko, i usnyc nie idzie,
      czamu rojbrujesz tak przez całi tidzień?
      A Paulek na to: „ Ciś stąd głupio mołpo ,
      przeca se mogą robić co chca z moim chałupom”.

      Mozno ze dwa tydnie od zdarzynia tygo,
      w tyj chałupie dzioło se coś blank inkszygo.
      Paulek se jeszcze pod pierziną grzeje,
      a mu se na łeb coś z gipsdeki leje.
      Beztuż jaśni zmierzły i gały otwiyro,
      a tu już mokre Mo cały wyro.

      Wali na góra, fest znerwowany,
      że nie może poleżeć nad ranym.

      Klup! A dzwyrza zawrzyte. Przez dziurka kuknoł,
      i prawie z nerwów zaroz nie puknoł.
      Co zejrzoł? Woda? Co to je? – se pyto
      Czymu ti Gustlik w chałupie ryby chytosz?
      Na co ci woda w izbie i guminioki?
      Po co wędki, kibel, hoczyki i chroboki?
      A Gustlik na to :
      „ Ciś stąd głupio mołpo, przeca se mogą robic co chca
      z moją chałupom”

      Taki ze bajeczki tyj morał płynie:
      „ Nie być do innych wieprzkiem,
      a inni nie bydą do ciebie świniy
      --
      Madohora
      --
      Nikiszowiec
      • 31.08.08, 20:57
        Godka z Bogym (Filozofia po śłonsku)

        Jo – robok malućki,
        Głos wznosza do nieba,
        Że sprawiedliwości,
        Wiyncyj nom potrzeba.

        Jednym dołeś widzieć,
        Krzoki gorejonce,
        Łotwiyrosz im morze,
        Gnosz na gorke słońce.

        Inkszy zaś ze szlojdra,
        Goliata zabijo,
        Łon take chucherko,
        Tamtyn beskurcyjo.

        Noe na Twoj rozkaz
        Arka przirychtowoł,
        Jak dyszczyk pokropiył,
        Bydlynta tam schowoł.

        Ryb nachytać umiysz,
        Połazisz po wodzie,
        Cudow pora dziwnych,
        Zawdy mosz w odwodzie.

        A co nom pokożesz?
        Ino krziż na ścianie,
        Downij to się dzioło!
        Dziś nic sie niy stanie.

        Że czasym ftoś zwontpi,
        Jak się tu nie dziwać?
        We wszystko mom wierzyć,
        I jak Żyd sie kiwać?

        Jak tym niydowiarkom,
        Pokozać, żeś z nami,
        Kiej śpisz na ołtorzu,
        Miyndzy świycnikami!

        Choć jo niy jest Tomasz,
        Stanołbyś na drodze,
        Gizdom doł po gymbie,
        Poturbowoł srodze.

        Mie, co Cie wychwolom,
        I gowa mom siwo,
        Kapnij do pynzyji,
        Dyć to małe piwo!

        Autor: Krzyk
        --
        Jurek-de1

        Co się tak gapisz??? Rusz palcami i coś napisz!!!
      • 28.07.13, 00:16

        --
        MADOHORA
        FORUM NIKISZOWIEC
        • 23.01.14, 22:47
    • 19.03.08, 18:39
      OSIOŁ BEZ TASZY
      ( po śląsku)

      Roz w robocie jedyn osioł,
      kajś se swoja tasza posioł.
      Kaj na drugiy mioł śniodanie,
      sznity dwie i kompot z banie.
      Ale głód mioł pieronowy,
      i se wzioł za żarcie trowy.
      Do dziś zostoł przi tyj paszy,
      bo se jeszcze nie znod taszy.


      --
      Madohora
      --
      Nikiszowiec
      • 19.03.08, 19:43
        Murzynek Bambo

        W Africe miyszko Bambo, Murzynek,
        Blank czorny, mały lokaty synek.
        Czorno mo matka, łojca czornego,
        Ujka i ciotka, dziadka i ... kożdego.
        Mo piykno chałpa - by ją zbudować
        trza mieć patyki, deski i trowa.
        Bo przeca lepszyj chałpy nie trzeba
        Jak sie rok caly hyc leje z nieba.
        Bestoż to sagie są Afrykony
        I mało kery je łobleczony.
        Bestoż fest dużo se uszporują
        Bo czopek, mantli...nic niy kupują.

        Bambo Murzinek to mądry synek....
        I niy mo w szkole samych jedynek.
        Bo sie mądrości wkłodo do gowy
        W swyj afrykońskij szkole ze trowy.
        W szkole tyj niy ma ławek, tablicy
        I gimnastycznyj sali - by ćwiczyć.
        Tam wszyscy afrykońscy szkolorze
        Mają sie od nos troszyczka gorzyj,
        Bo brak im heftów, taszy z książkami,
        Bestoż po piosku piszą palcami.
        Lecz skuli tego tyż fajnie mają,
        Bo im nic do dom niy zadowają!

        Jak już Murzinki w szkole głód mają
        To przerwa robią i se śniodają.
        Ale niy mają tasz ze sznitami,
        Ani sklepiku ze kołoczkami.
        Głodny Murzinek se w las zaleci,
        By se na drzewie fest pomaszkecić.
        Może se urwać figi, daktyle
        Lub po banany na drzewo wylyźć.
        A jak go suszy to zamiast Coli
        Na fest sie wielko palma wgramoli,
        Kaj sie napije bardzo zdrowego,
        Mlyczka z łorzecha kokosowego.

        My tu na Śląsku, czy tam daleko,
        Za siódmom górą, za siódmom rzeką...
        Mieszkają ludzie - kożdy w swym domu
        I to niy wadzi przeca nikomu,
        Że jedyn jy kołocz a inny daktyle.
        Porozmyślej o tym choćby przez chwilę!
        --
        jurek-de1
    • 19.03.08, 20:23
      Jeszcze jedno fajno spiywka, melodia se dospiywocie, bo na pewno znocie

      Kiedyś na Ślonsku

      Kiedyś na Ślonsku cołkimi dniami,
      bjoły hanysy sie z gorolami.
      Z godki szło poznać kery je kery,
      bezto sie prali jak indjanery.

      Chłopy z chłopami, baby z babami,
      tłokli sie solo i rodzinami.
      Chude szkelety, wyżarte byki
      furgaly kable i scyzoryki.

      Różne tu boły łomoty i trzaski,
      lamynty, przeklyństfa, skomlynja i wrzaski.
      W końcu Pon Boczek te larmo usłyszoł,
      poważnie sie wnerwioł i wszystkich wymiyszoł.

      Malice doł Zynka, Zbychowi doł Hajdla,
      wcisnoł gorola rodzinie łod Zajdla.
      Hanysa kupjoła se baba z Rzeszowa,
      wdowa po jednym górniku z Knurowa.

      Jygna łod Dziubów wyszła za wdowca
      co Gierek w aktówce go przywióz ze Sosnowca.
      Ginter kobjytka wzion se z Czeladz,
      Pon Boczek pedzioł: że se poradzi.

      Ksiegowo Kowalsko co mieszko w bloku
      dostała Hanysa banioka z przetoku.
      Zep z warszawiankom krótko jest w związku,
      a juz zajyżdżo dziołcha po ślonsku.

      Bajtle zaś łod nich próbują mówić
      i choć to krojcoki dajom sie lubić.
      Małe hanysy lubiom fandzolić
      jak chcom znerwować małych goroli.

      I teroz już wszyndzie, w kościele i szkole,
      som i hanysy, som i gorole.
      Jedni chcom drugim sie przypodobać,
      bo hanys chce mówić, a gorol godać.
      --
      jurek-de1
      • 20.03.08, 19:27
        Lokomotywa!
        Jest na banhowie ciynszko maszyna
        Rubo jak kachlok - niy limuzyna
        Stoji i dycho, parsko i zipie,
        A hajer jeszcze wongiel w nia sypie.
        Potym wagony podopinali
        I całym szwongym kajś pojechali.

        W piyrszym siedziały se dwa Hanysy
        Jeden kudłaty, a drugi łysy,
        Prawie do siebie niy godali,
        Bo się do kupy jeszcze niy znali.

        W drugim jechała banda goroli
        Wiyźli ze soba krzinka jaboli
        I pełne kofry samych presworsztóf
        I kabanina prościutko z rusztu.
        Pili i żarli, jeszcze śpiywali,
        Potym bez łokno wszyscy rzigali.

        W czecim Cygony, Żydy, Araby
        A w czwartym jechały zaś same baby.
        W piontym zaś Ruski. Ci mieli życie!
        Sasza łożarty siedzioł na tricie.
        Gwiozda mioł na czopce, stargane łachy,
        Krziwiył pycholem i ciepoł machy.
        A w szóstym zaś były same armaty,
        Co je wachował jakiś puklaty.
        W siódmym dwa szranki, pufy, wertikol,
        Smyczy maszyna może donikąd.
        Jak przejyżdżali bez Śląskie Piekary
        Kaj wom to robiom kółka do kary,
        Maszyna sztopła! Kufry śleciały
        I każdy latoł jak pogupiały.

        To jakiś ciućmok i łajza!
        Ciupnął i ślimtoł sygnal na glajzach.
        Mog iść do haźla abo do lasa,
        Niy pokazywać tego mamlasa!
        Potym mu ale do szmot nakopali,
        Maszyna ruszyła, cug jechoł dali.
        Bez pola, lasy, góry, tunele,
        Dar za sobom samym te duperele
        Aż się zagrzoły te biydne glajzy,
        Maszyna sztopła i koniec jazdy.
        --
        jurek-de1
    • 20.03.08, 19:34
      Slonski Hilary

      Na Nikiszu w familoku starym,
      Miyszkoł jedyn chop, Hilary.
      Mioł on pamiynć pieronowo
      I jak yno ruszoł gową,
      To dzieje spominoł stare:
      - Kiedy piyrszy mioł zygarek,
      - Jak konie były na grubie,
      - Godoł jak sie piyrze szkubie,
      - Kaj utopki w stowie żyją,
      - Czamu łożyroki piją,
      - Na co były biydaszyby,
      - Kiedy rosną wielge grziby
      - Kaj król dycki piechty łazi...
      ...ale kaj se brele wraził,
      To Hilary zapomino,
      Choć jeszcze mioł je przed chwilą!
      Bestoż z niyszczynśliwą miną
      Cołko chałpa przeszukuje
      I pierońsko pieronuje.
      Ale se niy myślcie wcale,
      Że w tym poszukiwań szale,
      W izbie delówka pozrywo.
      Tak to na Śląsku niy bywo!
      Wiync co zrobioł nasz Hilary?
      A dyć obyczajym starym,
      Jak to pobożno duszyczka,
      Porzykoł do Antoniczka,
      Tego patrona świyntego,
      Od wszyskigo zgubionego.
      Świynty drapko go wysuchoł
      I tak padoł mu na ucho:
      Ach Hilary! Ty Gorolu!
      Dyć mosz brele na kicholu!

      --
      jurek-de1
    • 20.03.08, 19:35
      Uwe i Wili

      Uwe i Wili w jednej stali wili,
      Uwe na wierchu, a Wili na dole.
      Uwe spokojny nie wadzi nikomu,
      a Wili wyrabioł choby we stodole.

      To pies, to hazok, ciepał w nim ryczkami,
      Gupioł i turpioł durch trzaskoł dźwierzami.
      A kady szczykać naczął z gazpatronów,
      To dymu pełno było w cołkim domu

      Uwe sie wnerwił i ślozł na dół do niego
      I pado: "Wili, jo nie strzymia tego!"

      A Wili na to: "Co komu do jemu, a jemu do komu,
      Ty giździe pieroński, jo jest w swoim domu."

      Uwe po gowie poskrobał sie ino,
      Poszoł do siebie i coś medytował...

      Rano Wili jeszcze na szezlongu chrapie,
      Naraz mu coś z gipsdeli na kichol kapie.
      Serwał sie Wili, leci ku górze.
      Stuk! Puk! Zamknione!!!

      Filuje se przez dziurka: Hen Jezu, cało izba w wodzie,
      A Uwe se siedzi z wędką na komodzie.

      "Was machts du, Uwe", "Jo se fisza łowie"
      "Du bist Idiot, mnie kapie na gowe!"
      A Uwe mu na to: "Co komu do jemu, a jemu do komu,
      Ty giździe pieroński, jo se w swoim domu."
      --
      jurek-de1
    • 21.03.08, 10:51
      Na lipę

      W hyc pod moimi liściami dychnąć se możesz.
      Prosza, siednij se tukej, witom cie: Szczynść Boże!
      Bo choć słoneczko gynał ze nieba blynduje,
      To sie na moich liściach ukrop tyn sztopuje.
      Tukej dycki fajnisty wiaterek zawiywo,
      A we liściach szpok abo słowik piyknie śpiywo.
      Powoniej tyż moje kwiotki. To z nich spijają
      Pszczoły, kere potym złociutki miód dowają.
      Legnij se tu ku mie! Niych listek mój opowiy
      Ci jako bojka, cobyś lepij społ na zdrowie.
      Widzisz tera, wiela poradza dać uciechy,
      Choć niy rosną na mie jabka ani łorzechy.
      --
      jurek-de1
    • 21.03.08, 10:52
      LYŃ

      Na szezlągu siedzi lyń
      Nic nie robi cołki dziyń,
      - O nie godejcie, że jo nic nie robia !
      A kto siedzi na kanapie i drapie sie po szłapie ?
      A kto zjod dwa kołoczki, co je dostoł łod ciotki ?
      A kto dzisioj ze sznojdra szczyloł ?
      A kto bombony z tytki wybiyroł ?
      No i co, to wszystki to je nic ?

      Na szyzlagu siedzi lyń
      Nic nie robi cołki dziyń.
      - Wyboczcie, a nie jodłech wodzionki ?
      A nie ukroiłech se wyndzonki ?
      A nie uciyrołech dziś kichola ?
      A nie przezywołech gorola ?
      No i co, to zaś nic ?

      Nie boł we szkole, bo mu się nie chciało,
      Nie łodrobiuł zadanio, bo czasu mioł za mało.
      Nie zawiązoł szpotloków łod szczewików, bo ni mioł ochoty,
      Nie pedzioł "Szczynść Boże", bo za dużo z tym roboty.
      Nie wykludziił Azorka, bo mysloł, że to zrobi starka.
      Nie ciepnoł gołymbiom kaszy, bo stoła na bifyju w taszy.
      Mioł zjeść wieczerza, ino gymbom mlasnął,
      Mioł sie legnąć, nie zdążył - zasnął.
      Śniło mu sie, że na grubie robioł,
      Łobudzioł sie i w gowa zachodzioł
      Czy łon sie doprowdy tak ciynżko narobioł ?
      --
      jurek-de1
    • 21.03.08, 10:53
      ABECADŁO

      Abecadło roz z bifija,
      Sleciało na łeb, na szyja,
      Bestóż sie fest potrzaskało
      i sie cołkiem pofyrtało.

      A - ledwo stoi i sapie,
      Ą - mo bolok na prawyj szłapie
      B - sie coś z basami stało
      C - blank sie wnerwiyło
      bo Ć - kryski zazdrościyło
      że sie aż D - fest dziywiyło
      E i Ę - dolne łone wyleciały
      i choćby F - wyglądały
      G - juz niy chce byc tak gupie
      a H - ważne jak magi w zupie
      I - sie fet powykrziwiało
      i sie blank na J - podało
      K - mo prawo szłapa krziwo
      L - sie do Ł - niy łodzywo
      M - je choby klopsztanga złomano
      N i Ń - robią na grubie na noc
      O - sie koloczym nafutrowało
      a Ó - coś na łeb sleciało
      P - na jedna szłapa kuśtyko
      i bestóż R - chodzi z kryką
      S i Ś - z rajmatyką dwa boroki
      wygły sie choby hoki
      T - hut mo za fest srogi
      U - je jak pusty garniec ubogich
      W - jak colsztok się zgiyło
      a z Y - by sie chyntnie sznojder zrobiyło
      zaś Z,Ż i Ź - są złe skuli tego
      że niy moga stoć za pierwszego.
      --
      jurek-de1
      • 21.03.08, 15:07
        Dobryś Jurek. Fto by sie spodziywoł, że takigo Goethego tukej goszczymy
        --
        Kożdo prowda potrzebuje odważnego co jom wypowiy
        • 21.03.08, 15:30
          Witej cirano downo Cie tu niy bylo.
          Cos byl moze na rybach,
          zeby miec dzisiej na lobiod.
          Abo kaj indzi sie Walesa-sz.
          Napisz cos lo gorolach. Pyrsk.

          --
          jurek-de1
    • 31.03.08, 00:50



      DZIOŁSZKA ZE SZTRACHYCLAMI

      Kozoł sztrachycle sprzedować ij fater;
      w rzici mioł, że na placu boł wiater.
      Mogła do dom wrócić dopiyro,
      jak na jabola łojcowi uzbiyro...

      Sztrachycle niesła w mantlu ze skóry,
      kaj mioła dziury, wygryzione bez szczury.
      Widok tyn boł pierońsko ponury;
      jak siwe, po burzy - na niebie chmury!

      Niymiłosiernie wtedy piździało,
      wszyndzie wiało, z gulika śmierdziało!
      Lazła po bosoku, niy mioła tyż mycki,
      z zimna sine mioła niydojrzałe cycki.

      Nikt jednak niy chcioł sztrachycli pozyskać,
      a śniyg zaczoł z wichrym jeszcze barzij "tryskać".
      I tak dziołszka nic niy sprzedała,
      i skuli tego do dom wrócić sie bała...

      Wykamano była, bo nic niy jadła,
      besto ze zmynczynio na zolu przysiadła!
      Zimno ij boło, besto sie skuliła,
      aby sie łogrzoć strachycle spoliła!

      I jak sztrachycle sie dziołszcze skończyły,
      na zot ze zimna zamarzły ij żyły!
      Strzimała jeszcze ino pora godzin;
      umarła w nocy, w przeddzień urodzin!

      Jak kedyś łoboczycz jakoś dziywucha,
      co sztrachycle sprzedowo w zawiyrucha,
      kup łod nij łoroz sztrachycle wszyskie,
      by łojciec łod nij nacieszoł sie piwskiym!
      --
      jurek-de1
    • 12.04.08, 11:09
      Żuraw i czapla


      Zmierzło sie już żurawiowi
      sztyjc samymu ryby łowić...
      łoroz, luknył ku przikopie:
      czapla gryfnie woda słopie.

      Gibko pylnoł sie bez woda
      i zaczyno do ni godać:
      Moja czaplo roztomiło,
      niebo mi cie tu skludziło!

      W ajncli kustu mom za tela,
      drap sie rychtuj do wesela!
      Jak sie czapla rozciepała:
      Chcesz, bych cie po dzióbie sprała?

      Czy mi co na dekel pizło?
      Dom sie skusić jakomś glizdom?
      Jeszczech na łeb nie upadła,
      coby wydać sie skiż jadła!

      Żuraw łokropnie zgańbiony
      pofurgoł hań, w swoji strony.
      Czapla zaczła (zaroz po tym,
      jak ji przeszły hercklekoty)

      myśleć, czy dobrze zrobiyła:
      „Tak żurawia zbamonciyłach...
      Borok przaje mi, to prawie
      poleca za nim ku stawie

      i dom kusku mu na zgoda!
      Gzuja na przimo, bez woda!”
      Chnet do ajncle przifurgała
      i we dźwiyrze zaklupała.

      Żuraw tak sie drabko zwyrtnoł,
      że bez cufal by kopyrtnoł...
      „Kiej mi przajesz - z wolom bożom
      - mogymy iść ku ołtorzu.

      Niy maś borok ni oszkubek,
      beztoż dej na zgoda dzióbek.”
      „Przifurgałaś sam na darmo!
      Terozki mie możesz charnonć!

      Nie chca widzieć takij jyndzy!
      Patrz mi sie sam nie molyndzić”.
      Czapla na to: „On mo ała…!”
      Ku przikopie pofurgała.

      A żurawia w chałpie nosi:
      „Możno póda jom przeprosić...
      jako szwarno je, to przeca
      wysztrychna sie i poleca”.

      Oblyk ancug i glazyjki,
      klupie w dźwiyrze beskurcyjki.
      „Co chcesz, giździe zatracony?
      Zaś żeś prziszoł szukać żony?!

      Ciong mi stond, bo sie zapomna
      i z bifyja nóż wyciongna!
      Z tobom ciyngiym mom utropa.
      Niy chca mieć takigo chłopa!”

      Żuraw choćby bez pysk dostoł,
      ani chwilki tam nie postoł
      farońsko pogorszony
      wyparził stela pieronym.

      A czapla juzaś żałuje
      i przi oknie poślintuje:
      „Po co żech mu tak nazdała?
      Czamuch trocha nie doczkała.

      Żurawiowi ni ma gany,
      (chocioż troszka je oklany...)
      Chyba piykny klajd oblecza,
      za karlusym drab poleca.”

      Szkuty w zdrzadle prziczosała,
      stary parfin wysznupała,
      i tak gryfnie wystrojono
      idzie, coby zostać żonom.

      Łażom już tak pora roków,
      na zgoda ni ma widoków.
      Łażom dycki jednom drogom,
      a pożynić sie ni mogom.

      --
      Jurek-de1

      Co się tak gapisz??? Rusz palcami i coś napisz!!!
      • 19.04.08, 13:27
        "Masara"

        Z brałzy kożdy korzysto,
        A masara chciała być czysto.
        W niydziela siadła na czornym murze,
        A w poniydziałek toplała sie we żurze,
        We wtorek we ajnlaufie chyba,
        A zajś we środa – siadła na oberiba,
        We czwortek siupła na ciotce Rołzie
        A we piontek we tatarskij zołzie,
        W sobota – w apfelmusie...
        Cy łona sie tak marasić musi?
        Co potym miała? Zmartwiynie miała,
        Chciała być szykowno, nic niy wyłazi,
        Nale jak durch siado w belejakij mazi...
        Łona niy wiy, że to je we modzie,
        Coby się wykompać we wodzie.

        --
        Jurek-de1

        Co się tak gapisz??? Rusz palcami i coś napisz!!!
        • 22.04.08, 11:54
          ŚLONZOKI I GOROLE
          (Przypowieść o dobrym Gorolu)

          Opowieść trza napoczynać:
          W imię Ojca, Ducha, Syna!
          Bydzie ona o Ślonzoku,
          Co jeszcze łońskiego roku,
          Wszystkim godoł naokoło,
          Że na śląsku nie wesoło
          Narobiyło się od czasu,
          Jak Gorole przyszli z lasu.
          Z cołki Polski sie zjechali
          I nom tu nawyrobiali.
          Chop tyn, kery tak przezywoł,
          August Kula sie nazywoł.
          Kludzioł tyz swe narzykanie
          Na te gorolskie godanie,
          Że po śląsku sie mądrują,
          Śląski godki niy szanują,
          Że są za inteligentni
          I Ślonzokom fest niychyntni.
          Godoł tyz że tak od niego
          Byłoby coś zależnego,
          To Gorole by jechali
          Tam kaj downi se mieszkali!
          Roz na wiosna, praje w maju,
          Kedy ptoszki juz spiywają,
          Poszoł August w ponć, do Piekor,
          A to niy ma fest daleko.
          Bo tradycjo Śląsko koże,
          Do Piekor, do Matki Bożej
          Iść roz na rok i porzykać,
          Za siebie, za fest grzysznika.
          August tam oprócz rzykania
          Wysuchoł msze i kozania,
          A potym jak juz do dom szoł
          To przygoda fest szpetno mioł.
          Dwa chachary go chyciyły,
          Po gymbie mu nawaliły
          Potym nowo tasza wziyli
          A zbitego zostawili.
          Przy piekarski leży drodze
          August Kula zbity srodze.
          I ratunku nawołuje.
          Możno kto sie ulituje.
          Łoroz parafiony idą,
          Możno do mie dobrzy bydą?
          Wszyjscy różaniec rzykają
          I do Augusta godają:
          Po cos chopie na pielgrzymka,
          Wzion ze soba piwa krzinka
          I naprany teraz leżysz.
          Czy w Ponboczka aby wierzysz?
          August fest był załomany.
          Przeca wcake nie naprany.
          Ale możno mu pomorze,
          Chop co jedzie na motorze?
          Dobry! Jada pograć w szkata
          I po drodze wezna brata.
          Możno inny ci pomoże?
          No to trzimej sie Szczynść Boże.
          Potym chop jechoł na kole.
          Pieronie! Musi cie boleć!
          Pogapioł sie pożałowoł
          I dalij popyndalowoł.
          Aż wreszcie przejeżdzoł Gorol,
          Stanoł swym wolkswagyn polo
          I Augusta pobitego
          Wsadził do auta swojego.
          Potym zawioz do szpitala
          Som na rynkach wniosł na sala
          I doł siostrze dziesięć złotych
          By mu sok kupiła potym.

          Morał z tego taki płynie,
          że Ślonzoki i Gorole
          Moga byc czasami święci
          Ale mogą byc tyz świnie!
          Po co więc uogólnienia
          Po co zatem te podziały,
          Skoro to w codziennym życiu,
          Bywa z nich pożytek mały."

          --
          Jurek-de1

          Co się tak gapisz??? Rusz palcami i coś napisz!!!
    • 22.04.08, 12:09
      Nasze korzynie

      Jest take miyjsce na ziymi
      Kaj zawsze wrocić chcesz
      To jest plac miyndzy swojimi
      Piykny choć padze deszcz

      To jest tyn na ziymi punkt
      Chocioż żeś objechoł świat
      Czujesz, że na cia czekajom
      Matka z ojcym, siostra i brat

      Nasze ślonskie korzynie
      Wrostajom w ziymia głymboko
      Naszo pieśniczka niech płynie
      Jak Olza sie ciongnie szyroko

      Bo to jest nasze miejsce
      to jest nasz ślonski świat
      Cudowny jak wspomniyne
      Paproci cudny kwiat

      To som nasze korzynie
      Tam my sie wychowali
      Godzina po godzinie
      Tam my po ślonsku godali

      Jest taki miejsce na ziymi
      Kaj som my zawsze u siebie
      Tam dobrze sie czujymy
      Tam som my w siodmym niebie

      --
      Jurek-de1

      Co się tak gapisz??? Rusz palcami i coś napisz!!!
      • 22.04.08, 15:01
        To jest piekne
        --
        Madohora
        --
        Nikiszowiec
    • 24.04.08, 10:58
      Kto ty jesteś?

      Czyś ty Polok? Jo Polokiym,
      Ale żech tyż je Ślązokiym!
      Kaj ty miyszkosz? Tu na Śląsku,
      Na tym pięknym Polski konsku!
      Kim je Polska? Mą Ojczyzną!
      A kim Śląsk? Je Ojcowizną!
      Przejesz Polsce? Toć, że przaja!
      A Śląskowi? On Mo raja
      Piyrszo, on je dycki piyrszy,
      Najważniejszy, nojpiykniyjszy!
      Skąd się Śląsk wziął? Wziął się z tchnienia
      Ponboczkowego stworzenia!
      Jaką godką godosz? Godom
      Naszą piykną polską mową,
      No, ale tyż fest się storom
      Godać śląską godką, gwarą!
      Dbosz o gwara? Chca by była,
      Żeby nigdy ny zginyła,
      Bo Slązoki to niy gynsi!
      Niych się nom Ślązakom szczynści!

      --
      Jurek-de1

      Co się tak gapisz??? Rusz palcami i coś napisz!!!
      • 15.05.08, 21:36
        Czyś ty Polok? Jo Polokiym,
        Ale żech tyż je Ślązokiym!
        Kaj ty miyszkosz? Tu na Śląsku,
        Na tym pięknym Polski konsku!
        Kim je Polska? Mą Ojczyzną!
        A kim Śląsk? Je Ojcowizną!
        Przejesz Polsce? Toć, że przaja!
        A Śląskowi? On Mo raja
        Piyrszo, on je dycki piyrszy,
        Najważniejszy, nojpiykniyjszy!
        Skąd się Śląsk wziął? Wziął się z tchnienia
        Ponboczkowego stworzenia!
        Jaką godką godosz? Godom
        Naszą piykną polską mową,
        No, ale tyż fest się storom
        Godać śląską godką, gwarą!
        Dbosz o gwara? Chca by była,
        Żeby nigdy ny zginyła,
        Bo Slązoki to niy gynsi!
        Niych się nom Ślązakom szczynści!

        --
        Jurek-de1

        Co się tak gapisz??? Rusz palcami i coś napisz!!!
      • 15.05.08, 21:36
        BLOKI CZY FAMILOKI

        JAK WCIŚLI LUDZI DO SROGICH BLOKÓW
        I STAŁA MODNO SIĘ WIELKO PŁYTA,
        POMAŁU ZNIKO MIT FAMILOKÓW,
        STĄD CHCIOŁECH W SPRAWIE KOGOŚ SIĘ SPYTAĆ:

        KAJ MAJOM DZISIOJ CHOWAĆ KRÓLIKI
        CI CO SPYNDZAJOM CZAS NA PYNDZYJI?
        SKORO JUŻ CAŁKIYM ZNIKŁY CHLYWIKI
        A HASIOK STOŁ SIĘ ZSYPYM NICZYIM.

        WE FAMILOKACH WSZYJSCY SIĘ ZNALI
        JEDYN DRUGIMU KLUCZE ŁODDOWOŁ,
        JAK NA URLOPY KAJŚ WYJYŻDŻALI,
        ABO JAK CZASYM KTOŚ ZACHOROWOŁ.

        NA ZMIANA MYLI SIYNIE I SCHODY,
        I WSZYŃDZIE BYŁO CZYSTO AŻ MIŁO.
        WELE CHAŁUPY MIELI ŁOGRODY,
        A NA ŁAWECZCE SIĘ POGWARZYŁO.

        A TERA KOŻDY W BLOKU SIĘ ZAWRZE
        NA PORA MOCNYCH ZOMKOW I HOKOW,
        ŻODYN SIĘ NIY ZNO,CZORNO JAK W LAGRZE,
        BRAKUJE BARDZO NOM FAMILOKÓW.

        KIEDYŚ NA PLACU CHOPY SIĘ ZESZLI,
        I PRZI KLOPSZTANDZE STÓŁ POSTAWIYLI,
        DO SKATA KISTA PIWA PRZINIYŚLI
        TAK WOLNE CHWILE FAJNIE SPYNDZIYLI.

        DOWNIJ CHOP PRZINIOS WONGLO Z PYWNICY
        NAPOLYŁ W PIECU-TO JEST KACHLOKU,
        W IZBACH NIY BYŁO NIGDY ZIMNICY,
        TAK DOBRZE ŻYŁO SIĘ W FAMILOKU.

        A TERA INO JEDYN DRUGIMU
        DURCH INO CIYNGIYM CZEGOŚ ZAZDROŚCI.
        TO NIY PO ŚLĄSKU,NIY PO NASZYMU.
        ZA WIELA ZWADY,ZA DUŻO ZŁOŚCI!

        --
        Jurek-de1

        Co się tak gapisz??? Rusz palcami i coś napisz!!!
        • 17.05.08, 11:40
          Zepsuja wszystko jak swoje trzy grosze wraża
          Tu niy potrzeba wcale komentarza
          --
          Madohora
          --
          Nikiszowiec
          • 17.05.08, 16:02
            To sie nadaje do watku.
            Powiedzenia używane przez naszych rodziców....
            --
            Jurek-de1

            Co się tak gapisz??? Rusz palcami i coś napisz!!!
            • 17.05.08, 16:19
              Górniczo dola
              Robił Alojz na grubie i niy myśloł chorować
              bo tyn twardy wongiel, musioł durch fedrować
              wiertoł dziury w ścianie, zakłodoł patrony
              zapoloł cynsznura - a huku w pierony
              a jak dymy wyszły, broł sie za łopata
              i cIepoł na pancer, tak jak jego tata
              łoba fedrowali tak jak gupie ciele
              bo kieryś wymyślył - planowe niydziele
              kcieli żyć jak ludzie, sił niy żałowali
              a kożdy se myśloł - co to bydzie dali?
              teroz sie doczkali takij smutnyj chwili
              gruba jym zawarli , a łonych zwolnili
              niy pomogły strajki i lamyntowanie
              że stracili zdrowie na pierońskij ścianie
              teroz Alojz żyje na grubowyj łasce
              ponoś mo fedrować wongiel na Alasce
              przi siarczystym mrozie i z eskimosami
              cheba łogupieje pomiyndzy fokami
              łociec niy pojedzie, bo już jest za stary
              pod nosym mu przyńdom zielone dolary
              za to Alojz jedzie po ciynżko robota
              choć już na Alasce - downo nima złota
              niyroz mu sie przyśni, ta ślonsko wodzionka
              i tyn świyży chlebuś - łoćby z fetym kromka
              a jak mu sie przyśni ło ślonskiym łobiedzie
              pociepnie Alaska i nazod przijedzie
              choć już w życiu tela ton wonglo wyromboł
              bydzie z familoka na hołda zaglondoł
              tela lot fedrowoł, w przodku i na ścianie
              i niygdy niy myśloł - że ELWRYM łostanie

              --
              Jurek-de1

              Co się tak gapisz??? Rusz palcami i coś napisz!!!
              • 21.05.08, 17:48
                Lyń
                w starym pryku leży lyń
                nic niy robi cołki dziyń
                nawet tyju niy zaparzy
                ani jajec niy usmaży
                matka woło - pościel wyro
                i dyliny powyciyroj
                kaj łonymu do roboty
                dyć by zmazoł se galoty
                i tak leży cołki dziyń
                bo łon jest śmierdzoncy lyń

                --
                Jurek-de1

                Co się tak gapisz??? Rusz palcami i coś napisz!!!
              • 21.05.08, 17:50
                Śląsko atmosfera

                Nom na Śląsku jest jak w raju,
                Richtig jak w oliwnym gaju.

                Taki lufcik, tako gwara,
                Chlebik z tłustym, mało ćwiara.
                Czasym nom sie odechciywo,
                Ale żodyn sie niy gniywo.

                Czasym piwka sie napiją,
                Do połednia w pryku gniją.
                Ale co tam jak na szychta,
                Żonka chłopa wyrychtuje,
                Chleba z kawką naszykuje.

                A na plantach siedzą starki i starzyki,
                Szuko opa, szuko oma swoi kryki.
                To gołymbi pofutrują,
                To sie gacie komuś prują.

                A widoki piykne momy,
                Momy lasy, momy domy,
                Nasze hołdy, nasze kominy,
                Nasze miasta, nasze gminy.

                --
                Jurek-de1

                Co się tak gapisz??? Rusz palcami i coś napisz!!!
    • 29.05.08, 10:14
      Haja z kuli kaji

      Dzisioj była w doma haja,
      Bo straciła mi sie kaja.

      Żonka ryczy szukej czopki,
      Mi stowiają sie sam chopki,
      Łod szukanio moji kaji,
      Jo niy robia przeca baji.

      Szukom w kuchni i w antryju,
      Nima w szranku i w byfyju.

      W kożdy izbie żech poszukoł,
      I w żyrandol żech zakukoł.

      Jak do żadła żech sie wejżoł,
      To na gowie kaja łobejrzoł.

      --
      Jurek-de1

      Co się tak gapisz??? Rusz palcami i coś napisz!!!
    • 29.05.08, 10:16
      SKULI GIPKIEGO WYJAZDU DO FATERLANDU SPRZEDOM DRAPKO;

      Wertiko na wysoki glanc
      Szrank z trzyma dzwierzami
      Szyslong odwanckowany
      Dwa kronloitry
      Dwa nachtiszle
      Tepich wyklupany
      Cztyry gardinsztangi
      Gramofon na kurbla
      Jedyn landszaft zagraniczny
      Blumsztynder z myrtom
      Doniczka sznitiochu
      Byfyj
      Durszlok na nudle
      Szuflodka z nicmi i jeglami
      Sztriknadle,Tolszeta,Cwitry,
      Biksa z magi wyrflof
      Flaszynpucer
      Szpangi do wlosow
      Szranczek na szczewiki
      Kwyrloki ,Ausgus ,Kibel
      Nachtop zalyjtowany
      Kokotki ,Badywanna ,Kolkastla
      Hok z masingowym gritym
      Zdzadlo , Klajder ,
      Sztynder z pelcmantlym i nutym
      Oberchymdy z zapasowymi sztulpami i kraglami
      Holzyntryjgry , Spodnioki ,
      Trzy pary fuzekli (posztopowane)
      Szesc bindrow na gumach
      Cwiter z rolkraglami
      Slubny ancug z kulkami na mole
      Szczewiki z wysokimi krontflekami
      Plisz hut z szyrokom krympom
      Holebajn
      --- Po tym jeszcze....
      Kryka po fatrze
      Gybis po mutrze
      Briftasza , Taszyntuchy ,Bigelbert
      Dwa struzoki bez rusow
      Brotbiksa , Kloper , Szlynzuchy
      Bigle obchynklowane
      Sztrozaki ze szmat , Dwa male lojfry
      Krauzy z flaumami i apfelmusym.

      Wszystko to loglondac mozna u ;

      Gryjty Harbol
      FRIDENSHITA--wele Kochlowic
      JUGENDALEJ 8/10
      (drugi sztok- przyjsc przeazajnfart do hinterhausu).

      --
      Jurek-de1

      Co się tak gapisz??? Rusz palcami i coś napisz!!!
    • 29.05.08, 10:20
      O hasioku i klopsztandze
      Dzisiej powiym Wóm sam trocha,
      O tych czasach, co minyły,
      Jak to dziecka z familoka
      Przi klopsztandze sie bawiyły.

      Tak za chałpóm, przi hasioku,
      Kaj stoła staro klopsztanga,
      Tam od rana do cimoka
      Trefy miała dziecek banda.

      Kole lauby, zaroz z przodku,
      Klachały na ławkach matki,
      A kole nich, w kupce piosku,
      Dziecka se stawiały babki.

      Tam na trowie, kónsek dali,
      Dziołchy sie bawiyły w szkoła,
      Synki fuzbal pod oknym grali,
      Abo jeżdziyli na kołach.

      Czasym keryś mocni kopnył,
      Abo strzelył za daleko,
      Wyszklył sómsiadowi okno
      I dostoł bez łep warzechóm.

      Larma było kupa wszyndzie,
      Sztyjc sie coś przed laubóm dzioło,
      Ryku, butlu, jak na grzyndzie,
      Ale było sam wesoło.

      Teraz wszyndzie stojóm auta,
      Niyma fuzbal kaj pokopać,
      Jak byś wyloz se przed chałpa,
      To zapłacić możesz sztrofa.

      Tak to prziszły nowe czasy,
      I klopsztangi wyciepali,
      "Szanuj zielyń" napis straszy,
      Co by fuzbal tam nie grali.

      Teraz inksze sóm zabawy:
      Zalogować z rana trza sie,
      Starzi, młodzi, chłopy, baby.
      I poklikać w "naszej klasie".

      --
      Jurek-de1

      Co się tak gapisz??? Rusz palcami i coś napisz!!!
      • 06.11.09, 11:29
        Świynty Mikołaju
        Nosisz na puklu srogi miech z gyszynkami,
        kere dzielisz miyndzy dzieciskami.
        Włązisz kominem do kozdyj chałpy,
        Doowosz bajtlom lalki, koła i pluszowe małpy.
        I synki i dziolchy cieszą się z Twoigo byzuchu,
        choć zanim dosz paket powiysz coś do słuchu.
        Jo tyż mom do Ciebie zamowienie na tyn rok:
        chciołbych dostac z gumijagód sok.
        Do tego fojerwera z klocków lego i pistola na placpatrony,
        I byda fest zadowolony.
        Moga Ci łobiecać, że niy byda muter robioł scynek,
        bo jo jest prawie zawsze grzeczny synek.
        Jak kożdy bajtel czsym napasztna bracika,
        A potym w kupie suchomy muzyka.
        Mógłbyś nom dać tyż bala do fusbalu,
        bi wiymy,że z Ciebie super gość w kożdym calu...
        • 06.11.09, 13:49
          Witej, witej ale fajnie sie zrobiło. Już mi sie zatynskniło za tym Mikołajemsmile

          --
          Madohora
          --
          Nikiszowiec
    • 05.06.08, 08:25
      R y n t a



      Baba ciyngiym po mie rycy,

      Koty szczajom mi w pywnicy,

      Psy zaś srajom na chodniku,

      Bez to zmartwiyń mom bez liku.



      W sklepie szajsli mie o ceski,

      Z bryny nochol mom niybieski,

      W szkata mi niy idom karty,

      Somsiod głosi, żech łożarty.



      Puszki mi ukradli z miecha,

      Same straty, niy uciecha,

      Flaszek przijońć mi niy chcieli,

      Kozali przijść po niydzieli.



      Synek sucho disko-polo,

      Mie łod tego uszy bolom,

      Cera chopa mo gorola,

      Mie to wisi! Jo to smola!



      Niy trza mi wiynkszego świynta,

      Niźli dziyń, jak przidzie rynta.

      Serce rade, żyć sie chce,

      Niy zawodzo mi to, że...



      ( da capo al fine )

      po naszymu: juzaś od poczontku do końca.





      Gorol / Styczeń 2008

      --
      Jurek-de1

      Co się tak gapisz??? Rusz palcami i coś napisz!!!
    • 06.06.08, 17:53
      Ciufa

      Stoi se ciufa dupno jak szrank
      Stoi na glajzach, czorno jest blank
      Czorno spocono jak bot na szlapie
      Lolyj i smiyra z basa ji kapie
      Stoi i sapie, dycho i chepie
      Bo hajcer bergi miast wonglo ciepie

      Wagonow ciufie dokuplowali
      Ze poruscialy mocno już stali
      Zice porzniynte w srodku ze skaju
      I lobabrane szyby lod szpraju
      A w pierwszym wagonie wyrsze banioki
      Siedzom i jedzom tuste krupnioki
      Jedzom i glyndzom ganby niy majom
      Mało co robiom a durs godajom
      I skuli tego calo lostuda
      Bo lobiecujom nom same cuda

      W drugim i trzecim siedza gorole
      Co przyjechali na Slask na kole
      I tak furgali po cugu ptice
      Aze lobsiedli nojlepsze zice
      Jedyn sie wkupiol drugi sie wzyniol
      I tak sie gorol na Slasku pleniol
      Dzisioj gorole rzadzom już wszyndzie
      W cugu,w robocie i we urzyndzie

      W czwortym burmistrze,rajce,sołtysy
      Dziepiero w piatym siedzom Hanysy
      Siedzom hanysy siedzom tam kurde
      I przeklinajom tyn cały burdel
      A w reszcie skladu same belery
      Szpicle,agenty,i seks afery
      A ze głosnikow gro melodyja
      Ojca Rydzyka z Radia Maryja

      I nic w tym cugu nic tam do szpasu
      Połno ciaplyty,połno marasu
      I chocby przyszło tysiac sprzataczek
      Kożdo by miała proszku sto paczek
      Kibel,odkurzacz,ajaks i cif
      To nie domyjom,taki to syf,Taki to syf

      Loroz gwizd,loroz swist
      Para buch,W motor gruch
      Już gwizdnol dyzurny,juz hajcer za cypel
      Szarpnol i ciagnie do prawa już knypel
      I para juz cisnie sie rulom pod tloki
      I piszcza już glajzy,i zgrzypia fest boki

      Juz kola sie kryncom,pomalu po glajzach
      I ze banhowu cug ruszo w rajza
      Wichajstry smigajom,telepie fest motor
      A kola turkocom tak to to tak to to
      Tak toto tak to to we cugu durs gro
      A kaj to a kaj to, tak cug nom kaj gno
      A czymu,poczymu i kajże tak pyndzi
      A czymu tyn komin durs truje i smyndzi

      I bucho tak z niego smrod bucho buch buch
      Bo motor jest stary i mocno juz spuch
      Lecz para kaj szpara, durs cisnie sie tko
      I tloki w cylinrach pocisko i pcho
      A tloki w te,nazod,do gory,i w dol
      Lonaczom ta sila na osie do kol
      I koła sie kryncom jak ktos by je cis,Platforma to cisnie a moze to PIS

      A moze to narod do przodu cug pcho
      Tak to to,tak to to,tak to to i to
      A moze to narod do przodu cug pcho
      Tak to to,tak to to,tak to to i to


      --
      Jurek-de1

      Co się tak gapisz??? Rusz palcami i coś napisz!!!
    • 08.06.08, 22:56
      Elwer

      Ciongnie elwer wozek z surowcem po drodze,
      Kundel mu zawszony lasi sie przy nodze.
      Na wozku mo rulki, zarusciale gitra
      Sprzedo te klamory i kupi pol litra.

      Ciongnie elwer wozek za drewniany dyszel,
      Wozek sie ugino, elwer sie kolysze
      Wisi staro tasza z flaszkami u boku,
      Nazbierol tych flaszek pod grubom w hasioku.

      Nazbierol tam gazet, partyjnych broszurek,
      Znoloz na hasioku ormowski mundurek,
      Popiersie Bieruta i portret Gomulki,
      Znoloz "Nowe Drogi" i dwie suche bulki.

      Znoloz na hasioku kawalek oplerka
      I zdjyncie z podpisym towarzysza Giyrka,
      Przeczytol niyswieze z gazet wiadomosci
      I odezwa staro po Solidarnosci.

      Znoloz dwa szczewiki, kralza znoloz z miynsym
      Plakat Tyminskiego i folder Wałysy
      Portmanyj tam znoloz, w nim pora talonow
      I kartki na cukier i trzysta milionow.

      Znoloz czorne teczki, zmaraszono bluzka
      Plan Balcerowicza, i ekspose Buzka
      Znoloz dwa rynkowy ze starego cwitra
      Sprzedo te klamory i kupi poł litra.

      --
      Jurek-de1

      Co się tak gapisz??? Rusz palcami i coś napisz!!!
    • 09.06.08, 21:05
      "Pytok"

      Na łosiedlu w Bykowinie
      miyszko jedyn taki synek
      co jes mały i niy czyto,
      za to sie durch w kołko pyto.

      Kaj poczontek jes na kulce?
      Czymu sie kluc krynci w dziurce?
      Na co som roladzie nici?
      Z czego sie karbitka świyci?
      coch jom widzioł u starzika
      jak my roz szli do chlywika?
      Czymu kibic nosi szalik,
      kej na karku mo mydalik?
      Czymu w biksie siedzom śledzie,
      a niy jeżdżom na rolerze?
      Wiela wosów jes na gowie,
      fto mi na to dziś łodpowie?
      Wiela knefli mo nosz farorz?
      Jo chca wiedzieć i to zaroz!
      Starzik szuko łodpowiedzi,
      cały czos przi piecu siedzi.
      Kurzi fajka, kombinuje,
      "już ci godom" - łobiecuje.
      Starka tyż trocha myślała,
      dała pokój - łosiwiała.
      Tacie łeb spuchnoł jak bania,
      skuli ciągłego pytania.
      Nic niy godo, gowom kiwo,
      wzion 3 złote, szoł na piwo.
      Matka zaś pedziała tak:
      "zaroz mie sam trefi szlag,
      abo zaroz po niydzieli
      jasny pieron wy mie szczeli.
      Nerwica mie jakoś chyci
      I naszczylo mu po rzici".

      Jak pedziała tak zrobiła
      i pytania zakończyła.

      --
      Jurek-de1

      Co się tak gapisz??? Rusz palcami i coś napisz!!!
    • 27.06.08, 17:23
      Lyń

      W starym pryku leży lyń
      Nic niy robi cołki dziyń
      Nawet tyju niy zaparzy
      Ani jajec niy usmaży
      Matka woło - pościel wyro
      I dyliny powyciyroj
      Kaj łonymu do roboty
      Dyć by zmazoł se galoty
      I tak leży cołki dziyń
      Bo łon jest śmierdzący lyń!

      --
      Madohora
      --
      Nikiszowiec
    • 03.08.08, 12:16
      Umar, nie umar

      Powadzioł opa sie skuli gratow
      I zbyt go chyba poniosła duma
      Bo jakby na złość całymu światu
      Wzion se normalnie, wzion se i umar

      Wzion se i umar, połomol kryja
      Wielki łostawioł po sobie bajzel
      Zniszczoł mandołla, wyciepnoł cyja
      Szrałbsztok i fajla, pyrlik i majzel

      Narobioł starzyk wszystkim mecyji
      I już godały w sieni klachule
      Że nie dostaną jego pyndzyji
      Jak go łobejrzy briftriger w trule

      Siedzi więc opa w nowym ancugu
      Taki szykowny cały wymyty
      Siedzi se w łoknie w swoim wycugu
      Jak malowany, jak nie umrzyty

      Siedzi na krześle, dekom przykryty
      Bo mu zięć ręka podpiął na guma
      I bydom z tego same profity
      Starzyk jak żywy jakby nie umar

      --
      Jurek-de1

      Co się tak gapisz??? Rusz palcami i coś napisz!!!
    • 03.08.08, 12:18
      Chlyb łod sztajgra



      Łociec zmynczony prziszeł z roboty,

      Na to czekały w doma honcwoty,

      Patrzały kedy z tasie wysunie,

      Sznitka ze smalcym w tustyj „Trybunie”.



      Na chlyb łod sztajgra bajtle czekały,

      Z głośnym mlaskaniym gibko zjodały,

      Tyn chlyb co w doma, niydobry wcale,

      Choć do popicio som kakałszale.



      Co obce lepsze, downo to wiymy,

      Własnym gardzymy, cudze chwolymy,

      Dzieciom sie wcale dziwić niy trzeba,

      Czy jest coś lepsze niż kromka chleba?



      G O R O L

      --
      Jurek-de1

      Co się tak gapisz??? Rusz palcami i coś napisz!!!
    • 14.08.08, 20:27
      Śląsko atmosfera

      Nom na Śląsku jest jak w raju,
      Richtig jak w oliwnym gaju.

      Taki lufcik, tako gwara,
      Chlebik z tłustym, mało ćwiara.
      Czasym nom sie odechciywo,
      Ale żodyn sie niy gniywo.

      Czasym piwka sie napiją,
      Do połednia w pryku gniją.
      Ale co tam jak na szychta,
      Żonka chłopa wyrychtuje,
      Chleba z kawką naszykuje.

      A na plantach siedzą starki i starzyki,
      Szuko opa, szuko oma swoi kryki.
      To gołymbi pofutrują,
      To sie gacie komuś prują.

      A widoki piykne momy,
      Momy lasy, momy domy,
      Nasze hołdy, nasze kominy,
      Nasze miasta, nasze gminy

      --
      Jurek-de1

      Co się tak gapisz??? Rusz palcami i coś napisz!!!
    • 14.08.08, 20:28
      Na plantach

      Dwa starzyki sie trefili,
      Opa Ewald, opa Willi.
      Jedyn ślepy, drugi głuchy,
      Mają opy jeszcze ruchy.

      Dwa kumpliki łosprawiali,
      Jak to kiedyś w bala grali,
      Za dziołchami sie łoglądali.

      Potym my sie łożynili,
      Opowiado dali Willi.
      Kawalerka sie skończyła,
      Potym wojna zaro była.

      Po wojnie niy było roboty,
      Naprawiali my klamoty.
      Dwóch bajtli żech zmajstrowoł,
      Na ludzi żech ich wyrychtowoł.

      Godo ślepy do głuchego,
      Jak zaś kiej sie trefiymy,
      To sie piwka napijymy,
      A tyn głuchy do ślepego,
      Niy zapomna moi kryki,
      I ... rozeszli sie starzyki.

      --
      Jurek-de1

      Co się tak gapisz??? Rusz palcami i coś napisz!!!
  • Powiadamiaj o nowych wpisach

Wysyłaj powiadomienia o nowych wpisach na forum na e-mail:

Aby uprościć zarządzanie powiadomieniami zaloguj się lub zarejestruj się.

lub anuluj

Zaloguj się

Nie pamiętasz hasła lub loginu ?

Nie masz jeszcze konta? Zarejestruj się

Nakarm Pajacyka
Agora S.A. - wydawca portalu Gazeta.pl nie ponosi odpowiedzialności za treść wypowiedzi zamieszczanych przez użytkowników Forum. Osoby zamieszczające wypowiedzi naruszające prawo lub prawem chronione dobra osób trzecich mogą ponieść z tego tytułu odpowiedzialność karną lub cywilną. Regulamin.