Pisza inaczyj - konkurs liryki ślonski

12.01.09, 13:07
Zima sie nom rozkulała
Mrozik z nowym rokym dała
Popruszyła tyż na bioło
Coby było nom wesoło

Dyć terozki medytuja
-Jako konkurs wypromuja?
nasza-klasa.pl/forum/10/6631/37?find=last#post1
Czy łon blyśnie w "naszy-klasie"?
Ech - naklikać bydzie trza sie!

Czy ktoś bydzie mie w tym wspiyrać?
Słać znajomym by zaziyrać?
Z promocyjom niy ma leko
Ciyngym Ślonzek na to czeko.
    • agusia_b26 Re: Pisza inaczyj - konkurs liryki ślonski 15.01.09, 21:50
      fajnie, że ktoś sie tyż znaloz co by odważne o Ślonsku godoł :) może akurat ktoś
      coś mondrego napisze:) Powodzynia życza!Czimej sie!
      • broneknotgeld Re: Pisza inaczyj - konkurs liryki ślonski 16.01.09, 10:22
        Jo myśla, że jakoś dycha ślonskich wierszy lirycznych we tym
        konkursie na pewno bydzie.
        Ktosik ze Tarnowskich Gor tyż jakiś wiersz mogby tam posłać.
        • broneknotgeld Re: Pisza inaczyj - konkurs liryki ślonski 26.01.09, 13:52
          Trza na konkurs słać liryka
          Za wygrano byda rzykać.
    • broneknotgeld Re: Pisza inaczyj - konkurs liryki ślonski 06.02.09, 22:58
      "Pisza inaczyj - konkurs liryki ślonski"
      --------------------------------------
      • broneknotgeld Re: Pisza inaczyj - konkurs liryki ślonski 10.02.09, 10:45
        10 luty

        Luty se ustrzeloł "dycha"
        Prawie z Jackym i Elwirom
        Coś zrymuja niy skiż grzycha
        Na "profile" pozaziyrom

        Coroz bardzi rok dojrzywo
        Straci zima, wiosna przidzie
        Wartko leci czas - niy dziwo
        Szczyńściym "naszo-klasa" bydzie.
    • broneknotgeld Re: Pisza inaczyj - konkurs liryki ślonski 14.02.09, 12:21
      Walyntynkowo
      =================

      Jako żyć bez drugi duszy?
      Dyć po prowdzie jakoś idzie
      Jako szczyńscio bez niyj ruszyć?
      Łoj - som czowiek już we biydzie!

      Jako zmysłym tyknońć Nieba?
      Tego życie niy poradzi?
      Poprobować zowdy trzeba
      Ponboczkowi niy zawadzi

      Świat ze pszonio Jego przeca
      Nom Łon mustrym - dobrze wiymy
      Zdo mi sie - do Niego leca
      Jakby prawie ślonskim rymym

      Ech - naturom pszonie rzońdzi
      Z tego siyła, szczyńście, życie
      Chocioż czasym bliźni zbłońdzi
      Idejałym kto? -To wiycie

      Toż trza brać co nom szkryflane
      Mieć we zocy ciała cuda
      Tym niych se zaczyno ranek
      Dziyń niy leci jako "gruda"

      Słonko przeca po to świyci
      By natury gryfność widzieć
      Rymym nawet se niy sklyci
      Tego co już za tym idzie

      Tako sami forsztelujcie
      Jako pszonie blysko w nocy
      Na swoj skarb se podziwujcie
      Nawet jak zamkniecie łoczy

      Kaj dwie dusze czucio styknie
      Raj tym wzajym trza łotwiyrać
      Pokuplować idzie piyknie
      By na Niebo stond zaziyrać.
      • Gość: poziomek Re: Pisza inaczyj - konkurs liryki ślonski IP: *.neoplus.adsl.tpnet.pl 21.02.09, 10:38
        Gory lepsze som niż Ruda!
        Chyba bydzie sam łostuda?
        Bo na Gorach szynków kupa!
        I sie idzie zaloć w trupa!
        • broneknotgeld Re: Pisza inaczyj - konkurs liryki ślonski 24.02.09, 12:28
          Ślydź

          Ślydź dzisioj rzońdzi!
          Tako świat prawi
          Ze niym niy zbłońdzi
          Tyn kto sie bawi

          Przed Epnym Postym
          Bajsnij go w łogon
          Koncept w tym prosty
          -Niy kopnie nogom

          Ślydź chocioż fisza
          Niy guchy przeca
          Kaj niy brzmi cisza
          We tan poleca

          Ślydź lubi pływać
          Toż trza napitku
          Jako se dziwać?
          Chnet koniec zbytkow!
    • broneknotgeld Re: Pisza inaczyj - konkurs liryki ślonski 20.02.09, 23:50
      Ruda Ślonsko to wygrała
      Bydzie teroz fajrowała.
Inne wątki na temat:
Pełna wersja