pawel.zary
07.02.07, 23:10
No i proszę - w Chociebużu nauka polskiego idzie pełną parą - w 12 kursach
języka polskiego uczestniczyć będzie 266 kursantów (w 14 kursach
serbołużyckiego 522 kursantów).
www.serbske-nowiny.de/index.php?main=docs/wobraz
(niestety link do tekstu zmieni się od jutra na aktualny, więc poniżej
przytaczam tekst, ale zdjęcia już nie będzie ) :-(
Serbske Nowiny, Budyšin, 07.02.2007
Zajim za pólšćinu dale přiběra
Choćebuz.
Šula za delnjoserbsku rěč a kulturu w Choćebuzu njeposkića jenož kursy
delnjoserbšćiny, ale tež pólšćiny. Rěč słowjanskeho susoda nabywa w
Braniborskej lěto wob lěto wjetši zajim. K tomu přinošuje tež Choćebuske
kubłanišćo. „Loni zapisa so na našej šuli za cyłkownje dwanaće kursow pólšćiny
266 ludźi a za 14 serbskich 520“, zdźěla nawodnica šule Marja
Elikowska-Winklerowa. „Nadźijamy so, zo budźe to w nalětnim kursu, za kotryž
přijimujemy hač do 15. februara přizjewjenja, znowa wjele młodych a staršich
zajimcow.“
Wot lěta 1993 wuwučuja na Choćebuskim kubłanišću tež pólšćinu. Wot toho časa
přizjewja so tam dale a wjace kursistow. Přičiny stupaceho zajima widźi Marja
Elikowska-Winklerowa w přiběracych wosobinskich stykach a w přewjedźenju
dowola w susodnym słowjanskim kraju. Wjetšinu kursistow wučinjeja młodostni a
rentnarjo, ale tež předewzaćeljo so za pólšćinu přizjewjeja. Tući pytaja
partnerow w Pólskej abo hižo tajke kontakty wudźeržuja.
„Dźe nam wo posrědkowanje interkulturneje kompetency. Kursisća maja so do
druheje kultury zanurić, ju zrozumić a akceptować“, tak nawodnica šule. Jeje
kubłanišćo poskići w nalětnim semestrje šěsć kursow za započatkarjow, dwaj za
pokročowarjow a štyri za konwersaciju w pólšćinje. Při někotrych kursach je
samo kubłanski dowol móžny, měni Elikowska-Winklerowa. Dale planuja wuprawu na
mjedowy swjedźeń w Ochli pola Zieloneje Góry. We wšěch kursach zasadźuje šula
pólskich wučerjow-maćeršćinarjow. Tole zaruča wysoki niwow kursow, kotrež samo
intensiwnosće dla do wjacorych skupin rozdźěla. (AW)