Ło tym co niy tak downo i teroz w Polsce

[broneknotgeld]

Tuz łod zdrowio

Wojowoł w Warszawie wojowoł na Ślonsku
Wykończyć chcioł kasy tak konsek po konsku
Dyć jednak tu u nos połomoł sie zymby
Niy zadboł ło zdrowie. Co zrobioł ze gymby?
Niych inszym to jako przestroga wystarczy
Kto babrze we zdrowiu tyn kończy na tarczy.

[broneknotgeld]

UE

Rożnie ło Unii tukej jo słysza
Roz dobrze a roz łokropnie
Jednak sie rynkom pod niom podpisza
A niych Leppera gyńś kopnie.

[broneknotgeld]

Co je grane?

Coś za głośno łostanio Bushowi klackomy
Dyć łod niego tych fligrow za darmo niy momy
Niy muszymy zapolać irackego lonta
Lepi nom niy wojować na arabskich frontach
Coś za pryndko tu keryś zaś szabelkom macho
Choć armio ciynko przyndzie i stary sprzynt dracho
A naszo gospodarka jakoś durś we krzokach
Niy trza ciongnońć na wojna polskego boroka.

[broneknotgeld]

Tatrzańsko lawina

To co nojcynniejsze zaś skradła lawina
W zimny bieli śniegu zgasło mode życie
Zostoł bol po Siedmiu kerych z nami niy ma
Som teroz wysoko wyży niż na szczycie

Znicz w łoknie zaświycić my yno mogymy
Podobnie jak świycom znicze przi ich szkole
Razym z rodzinami tyż sie popłaczymy
Bo ich niy spotkomy na ziymskim padole.

[broneknotgeld]

Prziszoł Rywin do Michnika

Prziszoł Rywin do Michnika
Momy teroz widowisko
Jadnym uśmiych z gymby znika
Inszym iskra w łoku blysko

Dyć to nasze polske piekło
To niy yno je "warszawka"
Ciaplyty trocha wyciepło
Kogo to naprowdy sprawka?

Ktoś we mediach mocno pierdzi
Bonki puszczo - choć po cichu
Wszyscy wiymy już że śmierdzi
Kogo łapnom na tym grzychu?

[broneknotgeld]

Zwionzki Zawodowe

Historio kulo sie kołym
W łoczy to ciepie sie wołym

Bo jak przed Polskom problym niywonski
Zaś na tapeta bierom go Zwionzki
Dyć rzond durś u nos kiepsko se radzi
"Warszawka" czynsto yno sie wadzi

Polok mo teroz niywiela pociech
Pierońsko mynczy go bezrobocie
Choć jo i Zwionzkow trocha sie boja
Jak majom racjo za nimi stoja.

[broneknotgeld]

Kłodki Kołodki

Ulgi w podatkach som w Polsce po to
By czowiek państwo wspiyroł z ochotom
Fakt że kosztuje to podatnika
Jednak je mondro ta polityka

Zamach na ulgi - dyć to je maras
Państwo sie same robi ambaras
Kurzo ślepota i mocka błyndu
Jak sie tu ulgi tympi z urzyndu

Dzisioj to robi minister skarbu
Chyba niy widzi swojego garbu
Zaś by chcioł wszysko czimać cyntralnie
Choć dymokracji służy to marnie.

[broneknotgeld]

Zaś

Zaś rozkrynco sie lajera
Polityczno jak cholera
Rzond chce rzondzić ze myńszości
Chyba do sie to we kości
Czy sie skończył "czas mańkuta"?
Przidzie za to już pokuta?

[broneknotgeld]

Golacz PITow

Z "ulg" te pity chce łogolić
I już zaczoł sie tym chwolić

Co łon chce retnońć kosztym rodziny?
Komu łon wcisko te wypociny?
To przeca jakeś pierońske draństwo
Myśleć - "Rodzina to niy je państwo"
Jako z tom myślom chce tukej rzondzić?
Biydno rodzina co ze nim błońdzi
Do Salomona to mu daleko
Niych kedyś ziymia bydzie mu leko.

[broneknotgeld]

Mataczyć

Te słowo teroz robi kariera
A mie pierońsko biere cholera.

[broneknotgeld]

Wojna

Na razie dlo nos to choby czyrak
Ale mie mynczy wojna ło Irak
Saddam łogłosioł już "świynto wojna"
Wiym że niy bydzie wiosna spokojna
Jak kedyś wdarli sie tu husyty
To "w imie wiary" Ślonsk dostoł lyjty.

[broneknotgeld]

Tak to zawsze z tym bywało
Jak sie gorze wojny chciało
To krew loła sie na dole
I wsionkała nom we pole

Bronić familiji swoji
Ziymi na kery sie stoji
Idzie jeszcze "Z Panym Bogym"
U sia trza wojować z wrogym

Ale ciepać sie na cudze
To niy godzi sie już - ludzie!
Zymścić sie to przeciyż może
Broń nos przed tym świynty Boże.

[broneknotgeld]

Jo tyż tu myśla że trza nom lepi
Na własnych śmieciach "wojować"
By dobrze miały sie nasze dzieci
Tego nom trza przipilnować.

[broneknotgeld]

"Niy zabijej"

"Niy zabijej" - papiyż godo
"Niy zabijej" - kożdy zno
Dymokracjo momy modo
A Polok sie w wojna pcho.

[broneknotgeld]

Polok to je Polok i tak już być musi
To co trocha śmierdzi durś przeca nos kusi
Zakazany owoc - choćby nawet gorzki
Zawsze sprobujymy niy patrzonc na troski
Dwóch Polokow ciyngym bydzie mieć trzi zdania
Choby nawet za to dostali po baniach
No a jak se czasym wspomnymy "Niy krodnij"
Co potym robiymy? Som już se to zgodnij.

[broneknotgeld]

Tyn nasz Lepper
To niy śleper
Łon sie ryncy
Niy umyncy
Dyć terozki
Jak som troski
Łon na biydzie
Łostro jydzie
Coś wytyko
Kit nom wtyko
Dyrś w tym miyszo
Koty wiyszo
Coś nom mońci
Bałamońci
No i Polska jego jest
Dyć mu ło to chodzi fest.

[broneknotgeld]

Tako polityka
To przeca tyż państwo
Niy idzie umykać
Jak wszyńdzie to draństwo

Kożdy w tyj ciaplycie
Mo swoja kwatera
Jo to wiym - Wy wiycie
I we tym cholera.

[broneknotgeld]

Alianty

Hamerykon z Kurdym we jednym szeregu
To niy jest utropy zaczimanie biegu
Kurd durś bydzie krojoł przeca swoje państwo
A z tego tyż jeszcze może wylyźć draństwo
Może być to tako nastympno ciaplyta
Skond wiela problymow idzie tyż przipytać.

[broneknotgeld]

No i zaś po świyntach
Trza sie nom spamiyntać
Stanońć we szeregu
Tyż sztartnońć do biegu
W referendum meta
Unia na podnieta.

[broneknotgeld]

We wiosna

Jak przichodzi wiosna i słonko nom grzeje
To we cołki Polsce richtig źle sie dzieje
Trowy tukej przeca ciyngym wypolajom
Szłoby se powiedzieć - rozumu niy majom

Jadom do pożary nasze fojerwery
Kosztuje to drogo - Czy pomyśli kery?
Trza by nom wszyskich piromanow chytać
Dyć kożdy niywinny - niy werci sie pytać

Prośby groźby grziwny - nic to niy pomoże
Bydle mo sztrachecle i chodzi po dworze
Chocioż grzych to czasym jo takymu życza
By mu ta fojera spolyła palica

Bo żol mi jak widza cołkym czorno łonka
Nad kerom niy słychać świyrgotu skowronka
I wiym że ta ziymia niy bydzie zaś zdrowo
Pożar niy użyźnio - robi jom jałowo.

[broneknotgeld]

Politykom

Kaj som te firmy coście wspiyrali?
Ze rad nadzorczych piniondze brali
Możno som łone w prokuraturze
Choć polityki durś na tyj gorze.

[broneknotgeld]

Ordynacko

Coś ordynaci sypać sie zaczyli
Czarzasty z Kwiatkowskim tyż z tyj kamaryli
By chycić ławica w ordynacko sieć
Łona wszyske łoka mocne musi mieć.

[broneknotgeld]

Prokurator

Słyszołch co tyż ta figura
Nitkom ze grubszego sznora.

[broneknotgeld]

To ci wozyk

Jechoł Miller na Buzka
A teroz jak ciongnie?
Kedy z tego wozka
Ktosik go wyprzongnie?

[broneknotgeld]

Miller

Już go richtig nic niy niesie
Sprzontanie po AWS-ie
Jego gwiozdka leci w doł
Miller? - Politykym chyba boł.

Łobiycywoł piykno sztela
Ale pryndko napsuł tela
Że pamiyntać go niy chcymy
Jego rzondym sie wstydzymy.

[broneknotgeld]

Take gruchy

Urosło ich przi nich tela
Że sie zliczyć niy łośniela
Piyknie - yno do cholery
Jejich gruszki to afery.

[broneknotgeld]

Obiycanki

Obiycanka Leszka
Jak na gowie weszka
Krwi sie jusz napiyła
We niyj jeji siyła

Choć sie czowiek dropie
Przi taki urtopie
Niy mo łona biydy
Dyć som jeszcze gnidy.

[broneknotgeld]

Koniec

Bydymy widzieć czy chop jest z niego
Jak skończy ze tym co dzisioj jego.

[broneknotgeld]

Polske zboże

Państwo we zbożu sie umoczyło
Bo choć być miało - to go niy było
Szachrajstwa przi tym zaś było kupa
Co z tego wyszło? - Dyć goło dupa.