Tragikomedyjo "Plebiscyt we Necie"

[broneknotgeld]

"Plebiscyt we Necie"

Tragikomedyjo
prawie w jednym akcie
Zdo sie to mecyjo?
-Po czyńści na fakcie!

Dyć niy cołkym przeca
-heresztym niy groźcie
Za konceptym leca
z godkom niy we poście.

[broneknotgeld]

Obsada

Sztuka w jednym akcie
Dyć scyn pora bydzie
Trza łośmiu aktorow
Inaczy we biydzie.

[broneknotgeld]

Erna ze Ignacym - cuzamyn "front" trzimie
Ze Berbelkom Lyjo - dwojka niy podrzymie
Acik wspiyro Zefla? Możno na łodwyrtka?
A siodmym jest Bolek - podobnoś niy żyrdka
Łosmym bydzie Franek - niy ze ziymi ślonski
I na tym już fertig, styknom jejich "konski".

[broneknotgeld]

Berbel - internautka - pszocielka ślonski godki

Ano - zocno ślonsko frela
Ślonzek takich mo dość wiela
Nic że prawie we diasporze
Że szwandrajom durś na dworze
Sercym zdo sie ciyngym z nami
Tako szkryfna - wiycie sami
Co przeżyła to przeżyła
Dyć łostała w niyj ta siyła
Kero durś ku dobru ciongnie
Toż se we plebiscyt wprzongnie.

[broneknotgeld]

Erna - internautka - ślonsko klachula ze Niymiec

Z niyjednego pieca istno chlyb jodała
Chyńć coby "przewodzić" w duszy niy chowała
Dyć bez okazyji i anongu przeca
Jyj to co nazgobi kej sie chyci Neca
Mustrym tu klachuli co czynsto podjudzo
A kej słonko blyśnie do ćmoka se skludzo
I choć mi godocie - w "Świynto wojna" leca
Czasym łostudnica jako "Bercik w kecach".

[broneknotgeld]

Ignac - ślonski internauta - zgobnik

Zdo sie soroń podrybnicki
Jakby blisko ty "Glywicki"
Ciyngym zgobi
Larmo robi
Mu łoszczerstwo bliske wdycki

Czy zowistny, pofyrtany?
Chce być jako "pon nad pany"?
Czy popijo?
Kryjolyjo!
Czynsto kac go tropi ranym?



Ruda Śląska - stolica fraszki

[broneknotgeld]

Hmm, to tyż trza poprawić.



Scynografijo

Na binie tepich - we piyrszym planie
Tam tref ferajny abo spotkanie
A za tym biurka z komputerami
Piyńć cołkym styknie - z monitorami

Coś ze realu - cosik ze Neca
Jako w tytule - recht we tym przeca.

[broneknotgeld]

Franek - działacz ślonski ferajny - internauta

Ano - niy łon jedyn tu "importowany"
Kwiot Polski Ślonzkowi jako gyszynk dany
Godce ponoć pszaje - trzimie sie polskego
Dyć niy we tym feler kej ducha zocnego
Czy richtig? Pierombol - se przeca dowiycie
Kunszt rymow przedstowi i fikcjo, i życie?

[broneknotgeld]

Lyjo - ślonski internauta

Lyjo w Necie czynsto bywo
Toż nikogo to niy dziwo
Że jest tam kaj coś se dzieje
Choć niy zowdy istny śmieje

Żgnońć szpyndlikym tyż poradzi
Toż niy darmo swoj post wsadzi
Cosik widzi kej pokuko
Zdowo sie co prowdy szuko.

[broneknotgeld]

Zefel - działacz ślonski ferajny

Tyn sie staro wiela robić
W czas kej godka chcom już "dobić"
W czas kej godka już sie traci
Niy łoblyko w doma laci

W gowie kodyfikacyjo
Dyć niy yno - toż mecyjo
Niych rzondzynie blyszczy wszyndy
Tam kaj nasze ślonske grzyndy.

[broneknotgeld]

Acia - działacz ślonski ferajny

W kodyfikacyji retong widzi Acik
Bez niyj - tako prawi - sie wszysko zatraci
Gowa mo do tego - dyć niy łod parady
Choć i ta ideja prowadzi do zwady

Acia sie swojego richtig twardo trzimie
Możno skuli tego niy śpi yno drzymie?
Możno skuli tego, że w śniku nachodzom
Kierzy niy som za tym. -Czy godce zaszkodzom?

[broneknotgeld]

Bolek - internauta, tyż we ferajnie

Dlo ślonski godki coniyco robi
Som łod sia - we tym niy trza mu łaski
Kogo szteruje prawi że zgobi
Dyć ponoć miyszko w stolicy fraszki

Nyncom go szpaski i limeryki
Som szkryfnoł tego tyż zdo sie wiela
Niy wystrachajom go i krytyki
Ślonski rym cieszy - styknie mu tela.

[broneknotgeld]

Łobroz I - "Tref ślonski ferajny"

Łobroz abo scyna - jako tam wolicie
Cosik kładzie Muza - cosik same życie.

[broneknotgeld]

Zefel
-----
Moji roztomili - wiycie - w ty ferajnie
Som my przeca po to coby blysła fajnie
Ślonsko naszo godka - znajom jom starziki
Dyć na nos by potrza możno jejich kryki

Bo edukacyjo z gowy jom wybijo
Co downiyj se traci tako - kryjolyjo!
Ślonsko dusza dzisioj polonizowano
Bardzi jako piyrwyj germanizowano
Dyć ciyngym coś blysko jakby z jeji ćmoka
Cosik co szteruje Niymca i Poloka
W momyncie łostatnim ziorko plon prziniesie
Trza zasioć, podlywać - nom jeszcze tu chce sie.

[broneknotgeld]

Acia
-----
Dobrze Zefel prawisz - kej my sie chycymy
Możno prawie retnońć cosik poradzymy
Z kodyfikacyjom trza pociś do przodka
We zocy mieć Ślonzok bydzie swoja godka

Jedyn muster ślonski - we tym jyj retunek
Jak jedyn echt-ślonski richtig pomyślunek
Kej już tako przidzie wiyrchym łon poleci
Jynzyk regionalny wartko sie ukleci.

[broneknotgeld]

Zefel
-----
Jynzyk regionalny - wiym - zocno ideja
Kej Sejm to zrychtuje zagro dobrodzieja
W ta strona pódymy kero sie nom jawi
Dyć cosik inkszego możno prawie sprawi
Że godka łogrzeje kożdo ślonsko dusza
Cosik doradzicie? Som dońść tego musza?

[broneknotgeld]

Bolek
-------

Piyrwyj żech już radzioł - profil w "naszy-klasie"
Toż Franek to łotwar, no i ło tym czasie
Prawie tyż już forum ferajny tam blysko
Cosik szkryfnońć idzie - dyć czy we tym wszysko?

Trza godka lansować, trza blysnońć ferajnie
Zdałoby plebiscyt zrychtować tam fajnie
"Pszociel Ślonski Godki" - miano przeca piykne
I chyńci, i czasu do tego wystyknie

Dyć kejby to richtig rozkulać we Necie
Możno sie to wszysko ciekawie uplecie
Profit w tym medjalny dlo ferajny bydzie
Promocyjo godki - przi tymu niy w biydzie.

[broneknotgeld]

Zefel
------

A jako na forum to prawie zrychtować?
Jako we portalu richtig wypromować?
Choć koncept ciekawy niy przidze to leko
Mało wspiyrać bydzie - nojwiyncyj poczeko.

[broneknotgeld]

Bolek
------
Niy ma co sie tropić tym richtig za wiela
Trza dać regulamin na forum i tela
Som go tam zrychtuja - bele potwierdzicie
Kej forum publiczne - sie na niym dowiycie
Coniyco poprawić na wontku tam pódzie
Punktow trocha bydzie - niy godom ło cudzie
Franek moderator - ździybko przipilnuje
Zowdy może trefić ktoś kery trolluje.

[broneknotgeld]

Franek
------

No tak - forum mamy, może się to uda
Plebiscyt podobny robiła już Ruda
Zajrzałem tam wtedy - nieźle im to wyszło
Zagłosować w wątkach trzysta osób przyszło.

[broneknotgeld]

Zefel
------

No toż trza nom poprobować
Trza zielone światło dować
Godce służyć i ferajnie
Możno sie pokulo fajnie

Bolek - działej! Pomogymy
Wiym że cie wciongajom rymy
Regulamin dyć dej w prozie
Poprowiymy go tam może

Ech, po prowdzie - cosik tropi
Kej brak kasy coś sie topi
A trza grosza na nagrody
Jako wylyźć z "myntny wody"?

[broneknotgeld]

Bolek
------

Łoj - dyć geldu niy trza wiela
Bardzi chyńci i wesela
Plebiscytom my som radzi
Luft we kasie niy zawadzi

Styknom przeca tam dyplomy
Na pamiontka tyż coś domy
Teroz luty - finał z majym
Polska godce niy jest rajym
Sie coniyco jednak miyni
Na ty naszy ślonski ziymi
Jo niy widza "myntny wody"
Mie wystyknie naszy zgody.

[broneknotgeld]

Zefel
--------

Ja - som jeszcze formalności
"Kapituła" we statucie
Toż trza wybrać jom nojprości
Bolek, jo tyż widza tu cie
Ktoś z Zarzondu tam tyż bydzie
Ktosik trzeci i po biydzie.

[broneknotgeld]

Bolek
------

Kej trza tako - niy ma sprawy
W tym niy yno coś z zabawy.

[broneknotgeld]

Zefel
---------

Trojka kandydatow. -Kto jeszcze? Wystyknie?
Toż trza nom welować - niychej leci piyknie
Wszyscy "za"! -Nikt "przeciw"? -"Kapituła" momy
Wartko regulamin pewno tyż poznomy

Na tym fertig dzisioj - reszta przidzie w Necie
Kukejcie tam prawie wszyjscy kierzy chcecie
Trza ideja zocno jakosik nom wspyrać
Jo som na te forum byda fest zaziyrać.

[broneknotgeld]

Łobroz II - "We Necie na forum"

Tref ferajny już za nami
Co we Necie - tyż rymami
"Wirtualnie" - to powiycie
Dyć mie tako leci życie.

[broneknotgeld]

Bolek
------
Kożdy Ślonzok godce pszaje?
Kożdy jom we duszy nosi?
Czy Sowizdrzoł ło tym baje?
Farorz ze ambony głosi?

Jest ferajna ślonsko prawie
Ze Pszocielym Ślonski Godki
Jak "giskana" w ty zabawie
Co podlywo gryfne kwiotki

Toż plebiscyt se rychtuje
Do tytułu przezocnego
W godce szkryflosz? Jom promujesz?
Nominacje dosz do tego?

[broneknotgeld]

Franek
-------

Regulamin plebiscytu
na tym forum ułożymy
Prozą bedzie miał swój wątek
- niepotrzebne w tym są rymy.

[broneknotgeld]

Bolek
-------

Ano, ano - wszysko bydzie
Promocyjo we Nec idzie
Internauty już kukajom
Wszysko bydzie tu - niy bajom.

[broneknotgeld]

Zefel
-------

Toż sie Bolek chyć roboty
Szkryflej jako to poleci
Łodstow szpaski i gupoty
Co mo być niych proza kleci.

[broneknotgeld]

Projekt regulaminu plebiscytu "Pszociel Ślonski Godki"
-------------------------------------------------------

1. Wszyscy kierzy jakosik starajom sie ło to coby naszo godka niy uśmiyrkła, wspiyrajom i promujom jynzyk naszych rodzicieli, dbajom ło to coby sie rozwijoł, jako tyż tworzom ślonsko literatura mogom być nominowani do tytułu "Pszociela Ślonski Godki".

2. Kożdo osoba fizyczno może zaproponować nojwyży piyńciu ludzi do tego plebiscytu. Trza jednak szrajbnońć przi kożdym choć jedne zdanie uzasadniynio (wiyncy tyż niy zawadzi). Wskozano byłaby tyż gwarancyjo kontaku, co może być ważne przi nominacji mniyj znanych ludzi, kierzy som aktywni we we roztomajtych ślonskich pomyńszych dziedzinach (miasto, gmina, sołectwo).

3. Kożdo osoba fizyczno może zaproponować zarowno tych kandydatow kierzy już byli wymiyniyni, jak tyż cołkym inkszych. Zadaniym Kapituły bydzie na tym etapie porachowanie wiela razy dany kandydat był wskozany, bo prawie to zawoży nojbardzi na oficjalny nominacji do tytułu "Pszociel Ślonski Godki"

[broneknotgeld]

Erna
------

Hola, hola! Co robicie?!
Aże w Niymcach głośno - wiycie?

Prziglondnyłach se ferajnie
Wiym że leci tam niyfajnie!
Chcom Ślonzokow godki uczyć?
Kej ich czytom to mie puczy!

Hjeroglify, jakeś znaczki
Idzie dostać wartko sraczki!
Ło Steuerze coś fandzolom
Godka cukrym mu czy solom?

Jakbych w Niymcach ich dostała
We belowie bych "kompała"!

[broneknotgeld]

Ignac
-------

Richtig prowda - to "berciki"
Zdo sie jako z "rudzki kliki"
Wiece, fraszki im we gowie!
Czy borokym ślonski czowiek?

Dyć nos przeca som miljony!
Nacjonalny jynzyk momy!
Chcom by łon boł regjonalnym!
Toż sztyngs leci z ty ferajny!

[broneknotgeld]

Franek
--------

Steur, Pani Erno, może Pani nie wie
Myślał w międzywojniu o swym "śląskim drzewie"
Katowickiej szkole on dyrektorował
Język stron ojczystych już kodyfikował
Pisywał dialektem co bardziej opolski
Dla Górnślązaka jednak też on swojski.

[broneknotgeld]

Erna
-----

Patrzcie go, gorola! Ślonzoczka pouczo!
Jeszcze możno hadziaj bydzie mi tu buczoł
Słoma z szułow leci! Ło godce śmiy prawić!
Możno uczyć dzieci? Chciołby Ślonzek "zbawić"?
Zdo sie dwa feniki niy być i we wercie
Ferajna gorolsko! Goroli se biercie!

[broneknotgeld]

Ignac
-------

Erna, wiysz - sie zdowo - prawie pewnych tego
Że w ty "klice" kożdy na muster istnego
Przi Poloku Ślonzok - dyć to jakeś cuda
Chcom "kodyfikować", czy robić łostuda?

Pewnikym tak kryncom jak koże Warszawa
W rzici majom ślonskość - dlo nich to "zabawa"
Taki ty ferajny "publiczny użytek"
Że nom z tego biyda, a im aże zbytek

Godka dlo kosmitow śmiom ludziom rychtować
Drapci z tym na Marsa sie bydom wyprowiać
Groszym z naszy kapsy "warszawka" im sypnie
Ferajna niym drzistnie wpiyrw sie na nos wypnie.

[broneknotgeld]

Erna
-------

Ech, jo tyż bych za to swoja gowa dała
Choć szkryflom z daleka byda wachowała
Geld kery z Uniji nom Polska zabiyro
Czymu może służyć - widza z tym dopiyro

Dyć niydoczekanie łoszustow pierońskich!
Trza z ryjow im wyrwać te zofcite konski!
Ciyngym by sie paśli przi biydzie Ślonzoka!
Niy ma na to siyły? Puściyłabych w zokach!

[broneknotgeld]

Zefel
------

Pani Erno - leko łoszczyrstwami ciepać?!
Na łotwartym forum - dyć to idzie hepać
Ferajna mo z zocy "publiczny pożytek"
Ofyn godce służyć - we tym jakiś "zbytek"?

Finanse tyż ofyn - co rok "przeświytlajom"
Nawet wiyncy razy kej dotacjo dajom
Toż sie pohaltujcie - tako Wom niy godzi
-Ze marasu czynsto coś gorszego rodzi.

[broneknotgeld]

Erna
-------

Znom jo wos podciepy "pajonkow czerwonych"!
Ze prowdy robicie durś jakesik kromy
Niy wszyndy w Uniji echt-demokracyjo
Komuna durś żyje - łoszkliwy mo ryjok!

Niy darmo żech przed niom ze Polski pitała
Coby mie i tukej szterować durś śmiała
Z daleka jom czuja jako szponder zgniyły!
Żech niy modo frela - dyć wystyknie siyły
Coby tym terozki krebsy wyfutrować
Coby sie szkarada niy rodziła z nowa!

[broneknotgeld]

Ignac
--------

Futruj krebsy, futruj - w tym Ślonska nadzieja
Kery tu "bercikym" chce grać dobrodzieja
Bałamoncić bydom ta ślonsko dziedzina
Erna, dyć ty zowdy poznosz skur.....a!

Kery cie poczyto, wiy - recht w tym co prawisz!
Kej jo ci pomoga i portal wybawisz
Łod tego marasu: wicow, fraszek, szpasu
Trza do hajźla wciepać to wszysko zawczasu

Wiysz, zy mie romatyk, jakby "Juliusz Ślonski"
Ty jako "Grażyna" - wartko wyrżniesz gonski!
Ściongniesz na "krucjata" tyż inksze klachule
-"Berciki" im bydom tańcować przi rule!

[broneknotgeld]

4. Czas zbiyranio propozycji potrwo rowno miesionc.

5. Członkowie Kapituły na tym etapie niy mogom wystowiać swojich kandydatow.

6. Po zamkniyńciu listy propozycji i porachowaniu zgłoszyń kere przipadły kożdy osobie Kapituła typuje swoje piontki kandydatow, tak coby ze tego wywelować oficjalnie 10 nominowanych.


Ruda Śląska - stolica fraszki

[broneknotgeld]

Berbel
--------

Kukom w regulamin - widza coś zocnego
Bych dokuplowała jakosik do tego
Choć szkryflom z daleka - Ślonzek w duszy czuja
Trza go ciyngym dźwigać - se to forszteluja

Niychej siył i chyńci Wom zowdy wystyknie
Wspiyrać bych Wos jakoś chciała we tym piyknie
Chocioż tyn plebiscyt kajsik popromuja
"Trzi grosze" dom łod sia - dusza uraduja.

[broneknotgeld]

Lyjo
------

Łoj Berbel - sie ciesza kej Cie czytom tukej
Jako z godkom naszom? Łodpowiedzi szukej
Niy w jakiś konkursach abo plebiscytach
Choć intyncje zocne może być ciaplyta

Tyż sie tymu forum ździybeczko dziwuja
Tym "Pszocielym..." możno prawie uraduja
-Dyć niych wpiyrw dokulo sie wszysko do końca
Tela wiym - trza tego jak po dyszczu słońca.

[broneknotgeld]

Berbel
--------

Lyjo - tu we Niymcach niy wszysko klarowne
Choć sama pamiyntom słowa godki downe
Dziecioki niywiela, a wnuki szwandrajom
Ano - trza im tego - dyć niy godce pszajom

Czy spokopiom tela coch niy przepomniała?
Jo bych za to przeca gowy niy dowała
Wiym yno - żol bydzie kej sie to zatraci
Co ciyngym Ślonzokow richtig fest bogaci.

[broneknotgeld]

Lyjo

U nos tyż utropa - trza Ci ło tym wiedzieć
Szczyńściym skuli godki nikt niy poloz siedzieć
Młodzioki już myni po ślonsku godajom
Choć kejniykej słychać co godce durś pszajom

Konkurs "Po naszymu..." doł Ślonzokom siyła
Kero zdo sie samych ich już zodziwiyła
Ech - literatury, ty ślonski, tyż wiyncy
Ciyngym coś nowego - to nawet niy mynczy

Ja, chcom krok po kroku z godki jynzyk zrobić
Kery jest przeciwko tyn bydzie im zgobić
Kaszuby Ślonzokom mustrym w tych staraniach
Coś idzie do przodka - we tym niy cygania

Dyć droga daleko mie przinojmni zdo sie
Ślonskowi Sejm Polski chce zagrać na nosie
Ze godkom kuplujom tam autonomijo
A ty fest strachajom. Ło cie! Kryjolyjo!

[broneknotgeld]

Berbel
-------

Wiym, niy bydzie leko, dyć nadzieja trzimie
Niyjedyn to wspiyro - diaspora niy drzymie
Lyjo, zdo sie idzie jednak w dobro strona
Dziynki żeś to szkryfnoł, żech jest bardzi "w doma".

[broneknotgeld]

Franek
--------

Oj, Ślązacy mili - żyjecie w diasporze
A przecież czas taki - nie dzieli i morze
A przecież czas taki - pieniędzy potrzeba
Można językowi przechylić i nieba

Jam biedny - Wy macie pękate portfele
Czy dla śląskiej "godki" chcielibyście wiele?
Nie wystarczy pisać tylko w Internecie
Euro niech dowodem tego czego chcecie!

[broneknotgeld]

Berbel
--------

Panie Franek - bych nawet grosz swoj jakiś dała
Dyć możno tyż ora ździybko potym brała
Kejby ktoś scyganioł - niych piyrwyj pokoże
Co zocnego robi, a geld przidze może.

[broneknotgeld]

Erna
--------

Patrzcie go, hadziaja! Już po fechcie łazi!
Łon ze tych "krwiopijcow"? Jeszcze tu łobrazi!
Kejbych go trefiyła, to strzaskom soronia!
W portmanyj mi kuko - do piekła przegonia!

[broneknotgeld]

Lyjo
-------

Franek - coś wynokwiosz! Tyn koncept Ci wadzi?
Jest żeś z ty ferajny? Czy piec u wos czadzi?

Godołch już to piyrwyj - trza richtig poczekać
Karawana przyńdzie? -Czy werci tu "szczekać"?

Ruda Śląska - stolica fraszki

[broneknotgeld]

Bolek
--------

7. Kapituła na tym etapie może wykryślić jakegoś kandydata ze powodow formalnych (np. niymożności skontaktowanio sie ze niym) abo nadzwyczajmych (co jednak musi zrobić jednogłośnie i publicznie uzasadnić)

8. Łod momyntu zamkniyńcio listy zgłoszonych kandydatow do publicznego łogłoszynio 10 oficjalnie nominowanych, niy może upłynońć wiyncy niż dwa tydnie.

9. Właściwy plebiscyt "Pszociela Ślonski Godki" polegać bydzie na wywelowaniu ze oficjalnie już nominowanych kandydatow piyńciu kierzy erbnom tyn tytuł.

[broneknotgeld]

Ignac
---------

Zdrada! Ludzie - zdrada! Zdrajce tukej momy!
Bolkowi sie za nos wodzić durś dowomy!
Ze niego sprzedowczyk jako ta ferajna!
Richtig niy czujecie krowskego tu łajna?

Czy downy "bezpieki" łon jakowymś sługom?
Zdrajcom jest Ślonzokow!!! -Kryskom szkryfna rubom
Niych ło sprzedowczyku ślonske fora wiedzom
Zdrajca!!! -Tam durś wołom kaj Ślonzoki siedzom.

[broneknotgeld]

Erna
------

Mosz recht - trza wypolić zdrodziecke nosiynie!
Plebiscyt rychtujom, a w rzici sumiynie!
Bolka kajsik momy - łoberwoł już zdrowo
Kej skiż prow autorskich "apel" przirychtowoł

Dyć przeca pamiyntosz ta piyrszo "krucjata"
Prow autorskich bronioł, my mu - "sratata"!
Tako ze tym bydzie terozki jednako
Przi tymu ferajnie tyż wrona zakrako.

[broneknotgeld]

Ignac
------

Dyć pamiyntom - prow autorskich
chciołby "bercik" uwachować
Szkoł niy kończoł - śmiy coś "pisać",
"czynstochowsko" sztyjc rymować
Wiym - mo hilfka - to za mało,
połanalfabetom przeca
Kej go czytom gańba czuja,
zwrocać drap do hajźla leca!

[broneknotgeld]

Erna
------

Ignac - z Rudy go wspiyrajom
Pewno gupsze som łod niego
Kej tam kukom aże wajom
Styknie już gorolstwa tego!

[broneknotgeld]

Ignac
--------

Erna - przi nos jest kultura
Tyś kobiyta mondro przeca
Ruda - "bercikowo dziura"
Wiym, tam kuknońć czynsto leca

Im niy w gowie romantyka
Kunszt niy leży w ich naturze
Za prostokow styknie rzykać
No bo co? Pochować w dziurze?

[broneknotgeld]

Erna
-------

Hehe - kerchof łotworzymy!
Tam "ryżokow" pochowiymy
Na klachulek zocnym forum
Wykopiymy grob potworom

"Błechy", "rusy", "wancki", "myndy"
Wszyske ze ty "rudzki grzyndy"
Dlo przikłodu "zakopiymy"
Ślonskim mustrym "skrymujymy"
Tych iptoniow, pofyrtańcow
Szkaradnikow, łobesrańcow
Już niy bydom nom fandzolić
Gupsze to to łod goroli.

[broneknotgeld]

broneknotgeld napisał:

> Erna
> -------
>
> Hehe - kerchof łotworzymy!
> Tam "ryżokow" pochowiymy

nk.pl/forum/6/8046/63?page=9

[broneknotgeld]

Ignac
--------

Piyknie, piyknie - yno mało
Cosik wiyncyj by sie zdało

"Pszociel" przez "sz" wszyndy kładzie
A w ferajnie na paradzie
Kero chce - "kodyfikować"
Pofyrtano jego gowa
Sztyjc go przeca tam słuchajom
Ofyn tako - jo niy bajom

Zdo sie to "Hitlerek" nowy!
Tuk, richtig niy cołkym zdrowy
Dyć co historyjo jawi?
Wygro kery sie tak "bawi"?

[broneknotgeld]

Erna
-------

Ślonzek z niym w utropie bydzie?
Co do tego to niy przidzie!
Trza zawczasu wyautować!
Kark niy darmo nosi gowa

Mu ferajna rozpieprzymy
Kej "pożytkym hitlerowskim"
Tam niy wiedzom co my wiymy!
Trza brać za to sie zarozki!

[broneknotgeld]

Ignac

Pozor - Erna - tu szkryflomy
A nikt przeca niy wycino
W moderacji wsporcie momy?
Ktoś tu kuko jak we kino?

Sie tyn wontek możno straci
- Słać na priva brif łopłaci
Do działaczy ty ferajny
Z tym niy wyprom że łon - "fajny"

Brifow wiyncy by im zdało
Wszyske tako "zachowało"
Tych sie wyprzić niy ma siyły
Niych im Bolek bydzie - "zgniyły".

[broneknotgeld]

Erna
------

Dobrze godosz - pewno styknie
Niy pokulo sie to piyknie
Ofyn bydom udowali
Czas pokoże jako dali.

[broneknotgeld]

Bolek
--------

10. Kożdo osoba fizyczno może brać udział we finale plebiscytu. Styknie yno łoddać swoj głos maksymalnie piyńciu nominowanym (nojlepi szrajbnońć prosto - "moj głos")

11. Ło fakcie prziznanio tytułu "Pszociela Ślonski Godki" zadecyduje liczba głosow we plebiscycie kery bydzie trwoł rowno miesionc.

12. Kapituła tyż mo prawo do welowanio, dyć prziznowo swoje głosy już po tym terminie, a przed oficjalnym podaniym wynikow.

[broneknotgeld]

Bolek
-------

Regulamin fertig zdo sie
Coś pozmiyniać jeszcze idzie
Ktoś mi tukej "groł na nosie"
Dyć plebiscyt niy we biydzie

Zefel! Acia! -Co myślicie?
Możno tela punktow styknie
Sprowdzom sie - pokoże życie
Wierza że poleci piyknie.

[broneknotgeld]

Zefel
------

Mi sie zdo co piyknie
-prawie to być może
Kej chyńci wystyknie
ktoś kogosik wskoże

Plebiscyt mo szansa
sie wartko rozkulać
Przepomnom ło "ansach"
Niy czas coby fulać.

[broneknotgeld]

Acia
------

Mi sie tyż podobo, wyglondo ciekawie
Może sie przisłużyć ślonski godki sprawie
Toż niychej promuje tych kierzy coś robiom
Zocnego ku tymu, a inksi niy zgobiom.

[broneknotgeld]

Bolek
------

Dziynki - dyć sie ciesza - wieści w świat polecom
Że w naszy ferajnie coś zocnego klecom
Że tako służymy tym co godce pszajom
Tytuły prziznomy - ło tym już niy bajom

Dyć czas wartko leci - idzie nominować
Kogosik zgłosicie? Trza przikłod w tym dować!
Zachyńcić tym inkszych by dokuplowali
Kej wartko sztartnymy pokulo fest dali.

[broneknotgeld]

Zefel
-------

Dwie kandydatury moga dać tu prawie
Toż niychej szwong majom w ty zocny zabawie
Ze trojkom sie wstrzimia - możno popra inszych
Plebiscyt mieć bydzie rozgłos coroz wiynkszy.

[broneknotgeld]

Acia
-------

Jo tyż dwojka kłada - jeszcze medykuja
Dyć czasu ździybeczko na to potrzebuja
No i skuli zgody musza poczkać przeca
Niym w końcu ta trojka tyż wraża do Neca.

[broneknotgeld]

Erna
--------

Mom wos tukej! Hochsztaplery!
Ani miauknie teroz kery?!
Regulamin zatwierdzony?!
To cygańske zdo sie kromy!

W tym "pożytek" jest ferajny?!
Zaleciało "krowskim łajnym"!
Rudzkom "klikom" i komunom!
Śmiycie ciś to ofyn ku nom?!

Psinco z waszy "Gorolyji"!
Balakwastry z komedyji!

[broneknotgeld]

Zefel
--------

Pani Erno - kukom prawie
Horror we Necie? Śnik na jawie?
Tref ferajny chnetko bydzie
Do porzondku wszysko przidzie
Toż niy tropcie sie za wiela
I haltujcie - szkryfna tela.

[broneknotgeld]

Ignac
---------

"Sie haltujcie" - Zefel prawi
- Niy wiy co mie wiela jawi!
Brify ślom durś - czytom wszysko
- Toż to richtig dziwowisko!

Mody prawnik - ze Opola
Siedzi prawie w Hameryce
Sie dowiedzioł tam - to chwola
Cołki prowdy ło ty "klice"
Kero wasz "Hitlerek" trzimie
W Hameryce! -Świat niy drzymie!

Mo papiorow czorno tasza
Chyntnie niom tyż umarasza
Dyć sie werci - "ciynki Bolek"!
Ciynki łon jako gorole!

Jeszcze wiosnom - w to jo wierza
Żgnymy fest "ryżego zwierza"
- Nic że prawie istny łysy
- Dyć Unijo aż usłyszy!!!

Dziesiyńć rokow - sztraba, kamiyń
Hereszt kraty zawrze za niym
Dejcie pozor - wy haltujcie!
Sami przed niym drap ratujcie!

[broneknotgeld]

Łobroz ("scyna") III - "Drugi tref ferajny"

Z drugom "scynom" fertig na tym
Tref ferajny niy "sagatym"
Wiela bydzie sie zaś dzioło
Dyć po prowdzie - niywesoło.

[broneknotgeld]

Zefel
-------

Zaś sie tukej my trefiyli
Coby ło tym połosprowiać
Jako z godkom ludzie żyli
Jako z niom żyć cołkym z nowa

Trza nom chycić wpiyrw jednego
Ze czym prawie jest utropa
Koncept Bolka niy łod tego
Coby w Necie ze tym skokać

Toż po prowdzie - dzisioj myśla
Niypotrzebny jest ferajnie
Handszrift swoj pod tym wykryśla
Choć sie zdo, co to niyfajnie.

[broneknotgeld]

Acia
------

Roztomili - trza nagrodzić
Ludzi kierzy służom godce
Dyć sie zdo - tyż idzie szkodzić
Nojzocniejszy ty czelodce

Kej plebiscyt jest we Necie
Niy my - inksi decydujom
Czy naprowdy tego chcecie?
Jo niy - tako bych to ujon

Nom z tym koszty w końcu przidom
Dać ze składek - małowiela
Mie plebiscyt zdo sie biydom
Żech jest przeciw - godom tela.

[broneknotgeld]

Franek
----------

Co do spraw finansowania
Nie mam odmiennego zdania
Składki? Trzeba mieć sponsora!
Nie znajdziemy go na forach
Co popieram? Rezygnujmy!
Uciąć szybko się nie bójmy.

[broneknotgeld]

Bolek!
--------

Łoj! Mie teroz zodziwiocie!
W gowie mi sie aże kurzy!
Dobrze słysza? Co godocie?
Dyć sie krew przi tymu burzy!

Regulamin już szkryfniony
Żech rachowoł - prziklapnymy
- Toż utropa teroz momy
-"Rakym" sie wycofujymy?

Miało światło być zielone!
Profit bołby tyż medjalny
Co terozki? Marny koniec?
Dyć i gańba dlo ferajny!

Czyście przedszkoloki w Necie?
"Pnioki" kere ze łosiki?
W to wierzycie co ktoś plecie?
Styknie wos wystrachać blikym?!

[broneknotgeld]

Zefel
---------

Bolek, haltuj - dyć wiysz przeca
- Ło dotacje sie staromy
Trza utropy nom ze Neca?
Tam niy my kładymy kromy

Niypotrzebno nom łostuda
Zowdy lepi kej spokojnie
Som wiysz - psoczom tam na "Ruda"
Ło "krucjacie" coś, ło "wojnie"...

[broneknotgeld]

Bolek
-------

Ło jeronie - co poradza?!
W Necie "trolle" durś furgajom
Kaj jo posty ofyn kłada
Tam zlondujom tyż - niy bajom

Jo tam zowdy "swoje zrobia"
"Troll" gro czynsto za lampasa
Som nikomu niy nazgobia
Dyć łon jako kyns mamlasa

"Elefantym w porcynalu"
Zdo sie być z natury swoji
Możno bezto że niy chalom
Łon łoszkliwszy, bardzi broji.

[broneknotgeld]

Zefel
------

To co? Łodpuszczymy?
Skiż geldu, łostudy
Swoje przeca wiymy
Skiż cudzy łobłudy
Dlo nos to niy szprymy
A tropiom paskudy.

[broneknotgeld]

Bolek
-------

Pierombol - żech godoł, niy bydzie trza wiela
Dyplom i pamiontka - medal fundna - tela
Plebiscyt zabawom - to przeca wystyknie
Kej kosztow niy momy, może lecieć piyknie

Take moje zdanie - coś jeszcze dołoża
Koncept to przezowcny, bestoż tako woża
Szłoby tyż zrychtować odznaka z tym mianym
Kery godce pszaje bydzie odznoczany
Ze mocy Zarzondu - jako zdo sie chcecie
Dyć niychej już kulo plebiscyt we Necie.

[broneknotgeld]

Acia
-------

Bolek - Ty durś swoje - wiym żeś falerysta
Dyć to by nos kosztło nojmniyj tysionc trzista.

[broneknotgeld]

Bolek
-------

Wiym - som niy wyłoża - sponsorow trza szukać
Kajniykaj za niymi moga jo pokukać
I przeca niy musi to być drap, zarozki
Pszociel Ślonski Godki tyż niy dopust Boski.

[broneknotgeld]

Acia
-------

Jeronie - toś richtig pieronym uparty
Czy Ty czasym niy grosz w jakeś "rudzke karty"?
Rzodko z nami bywosz i deliberujesz
Jest żeś kej dlo Rudy cosik potrzebujesz.

[broneknotgeld]

Bolek
-------

Pierombol - "dlo Rudy" - toż niy skiż prywaty!
Richtig żech kamela? Zdom Ci sie puklaty?
Wiela rudzian momy w ty naszy ferajnie?
Jo coś z godkom robia, sie starom - niyfajnie?

[broneknotgeld]

Zefel

Hola chopy, hola - niy trza nom łostudy!
Kożdy jest potrzebny, z Chorzowa, czy z Rudy
Ze Bytomia, z Glywic jako Mikołowa
Kożdy jest potrzebny, kożdo ślonsko gowa.

[broneknotgeld]

Acia

No toż co terozki? Możno głosujymy?
Jako nom to wyńdzie, tako sie chycymy.

[broneknotgeld]

Zefel
------

Ano - koncept w tym nojlepszy
Bo zacznymy już tu pieprzyć
Toż trza richtig zagłosować
"Za" abo i "przeciw" stować

Kery "za" - za plebiscytym
I odznakom możno przi tym
Wygro "przeciw" - inkszo sprawa
Już niy naszo to "zabawa".

[broneknotgeld]

Acia
------

Toż jo wartko to zrachuja
Ofyn "przeciw" zagłosuja

"Za" - piyńć głosow - małowiela
"Przeciw" - dziesiyńć - aże tela.

[broneknotgeld]

Bolek
-------

Szkoda - stało sie - niych bydzie
Dyć i tak ferajna w biydzie
Po tym co upublicznione
Jako pedzieć - "cołkym koniec"?

Koncept moj chca ciongnońć dali
-Byście mu patronowali
Forum jest - ludzi ciekawi
"Pszociel..." niych autorskim jawi

Tako przeca mogby lecieć
Myni gańby - jako chcecie?
Jo nadstowia "trollom" kloty
Niy pociepna ty roboty.

[broneknotgeld]

Zefel
-------

Może być - patronat styknie
Niych plebiscyt leci piyknie
Jest warunek - nikt z ferajny
W niym niy sztartnie - chocioż fajny.

[broneknotgeld]

Bolek
------

Tym sie niy trza wcale tropić
-Bele ktosik niy chcioł topić.

[broneknotgeld]

Acia
------

A mie tropi cosik jeszcze
Bo kej czytom bierom dreszcze
Strowioł drapci bych "Pszociela"
Ze "erzetym" - powiym tela.

[broneknotgeld]

Bolek
-------

Teroz żeś to wyciep z gowy?
Dyć to koncept niy za nowy
Już autorski ofyn prawie
Przez "esz" Pszociel w ty "zabawie".

[broneknotgeld]

Acia
------

Chcymy dyć kodyfikować
Inkszym coś na muster dować
Czy przez "esz" sie szkryflać godzi?
Taki feler godce szkodzi!

[broneknotgeld]

Bolek
-------

Chciołbyś muster tkać na siyła?!
Godka bydzie jako była
"Pszociel" tak i tak szkryflajom
Możno powiysz że jo bajom?

[broneknotgeld]

Acia
------

Ano - tako - w tym utropa
Bestoż ciynżyj wylyźć z ćmoka
Lepi trzimać sie jednego
Przez "erzet" dyć szkryfnionego.

[broneknotgeld]

Bolek
-------

"We pszynicy wele Pszczyny
Pszociel z Pszowa boł w niyj driny"

-Przez "erzet" se szkryfnij to
Bydzie dobrze - ci sie zdo?

[broneknotgeld]

Acia
------

Mie niy ciepej na wyjontki
Kere ze ty polski grzondki
"Przociel" i dzie ze "przatela"
Szkryfna ło tym tukej tela.

[broneknotgeld]

Bolek
-------

Przijociela mom we zocy
Dyć niy pszaja sie z niym w nocy
Sie ze ślubnom wtedy pszaja
-Byłaby bez tego haja!

[broneknotgeld]

Acia
------

Bolek - niy bier mie pod pic
Ślonsko godka to niy wic.

[broneknotgeld]

Bolek
------

Dyć jako Ci tuplikować?
Jako do palicy dować?
"Pszociel dlo mie "miłośnikym"!
Zdo Ci sie co jo zgobnikym?

Bardzi "lipling" by sztimowoł?
Możno "szaca" byś tam dowoł?
Ano - stowiom na "Pszociela"
Ciebie tyż niych pszaje frela.

[broneknotgeld]

Zefel
------

Ech - sie już niy przegadujcie!
Inkszych tako niy szterujcie
Jako chce niych Bolek robi
Łod nos nikt mu niy nazgobi
Feler jest, czy kedyś bydzie
Godka ze tym niy we biydzie
Dzisioj fertig z tym tymatym
Coś inkszego chytom za tym.

[broneknotgeld]

Łobroz (scyna) IV -"Piyrszo tura plebiscytu"

Szworty łobroz - coś we Necie
Leci tako jako chcecie
Trza plebiscyt z tym rozkulać
Choć zaś ktoś tam bydzie fulać

[broneknotgeld]

Bolek
------

Plebiscyt łogłoszom!
"Pszociel Ślonski Godki"!
Tym co godka noszom
Kerym jynzyk słodki
Co ze doma prawie
Tyż ze placu tako
Jako śnik na jawie
W duszy durś jednako

Regulamin znocie
Kandydatow czekom
Pewno wiela mocie
Tukej - niy za rzekom

Tutuł laureatom
Niychej zocny przidzie
Godka niy sagatom
Jynzyk niy we biydzie
Medal na pamiontka
Prziznany im bydzie
Ze ślonskego kontka
"Pszociel..." wiyrchym idzie!

[broneknotgeld]

Ignac
------

Patrzcie go - "łogłoszom"!
"Cysorz" ze ferajny!
Ło medal poproszom?
Wic ze tego fajny?
Do heresztu w końcu przimknom sprzedowczyka!
Komuna sie wroco? Czy szpaskom mi rzykać?!

[broneknotgeld]

Erna
-----

Z leberwosztu medal!
Pluć na niego bydom!
Masorz to niy Dedal
A "Cysorz" łobrzidom!
Kejbych go na gnotek pod rynka dostała
Bych za swoje krziwdy se poużywała!

[broneknotgeld]

Bolek
--------

Żech przepomnioł cosik
Teroz ofyn jawia
Niym docie swoj głosik
Wiydzcie - tako sprawa
Plebiscyt autorski - jo nadstowiom klota
Ferajny niy tropi z tym jakoś gupota.

[broneknotgeld]

Ignac
-------

Ze "ciynkego Bolka"
"Bolek Wielgi" zdo sie?
Dzbonek to niy szolka
Bajtlom dubać w nosie!
Co ferajny boło już mo istny w rzici!
Ano - jako "Cysorz"! -Sługi - cicirici!

[broneknotgeld]

Erna
------

A dyć wiysz - Polaczek
Swojich tyż łokrodo
Ktoś ślimto, ktoś "płacze"
Wiym boch już niy modo
Łordery we gowie "pomiotom Stalina"
Coby se to wspomnieć niy trza lyźć do kina.

[broneknotgeld]

Ignac
-------

Erna - co dziwuje
Franek pewno kuko
Przeca moderuje
A nawet niy bluko
We Bolku Ponboczka zdo sie uwidzieli
Antychrysta gonić nom przidzie z ty szteli.

[broneknotgeld]

Erna

Ano - niy wystyknie
Gorola Franeczka
"Cysorz" cosik kliknie
Nic że "śmiychu beczka"
Dyć kej prowda szkryfniesz, na priv prziślom - "Wara!"
Hadziaj jako hadziaj - durś rzyko do "cara".

[broneknotgeld]

Bolek
------

Moji roztomili
Darmo łoszkliwości
Szkoda na to chwili
Szkryfna tu nojprości
Trza nom już wskozywać tych co do "Pszociela..."
Piyrszo piontka kłada, choć to małowiela.

[broneknotgeld]

Lyjo
------

Bolek - dyć poleci
Swojich już typuja
Kożdy coś tam kleci
Jo skiż nich raduja
Ciekawe czy przyńdom do ty drugi tury
Niych wontek "typowań" durś bydzie u gory.

[broneknotgeld]

Berbel
--------

Ło jeronie - chopy!
Jo tu niy nazgobia
Trocha z tym utropy
Kej ze Niymiec "szkrobia"
Toż niychej sie "sujom" zocne kandydaty
Poczytom coś ło nich i szkryfna żech za tym.

[broneknotgeld]

Bolek

Berbel - lista rośnie
Mosz we czym wybiyrać
Już kukom radośnie
Tako trza zaziyrać
Kandydatow tuzin - niy sztopnie dyć na tym
Ślonzek we "Pszocieli..." zdo sie być bogatym.

[broneknotgeld]

Berbel
--------

Ano, ano - widza
Jednak to ruszyło
Jo sie tym niy biydza
Dyć przeca mi miło
Kej Ślonzokow idzie za godka nagrodzić
Dziw w tym, że nikierzy chcom tymu durś szkodzić.

[broneknotgeld]

Lyjo
-----

Chnetko dwa tuziny
Toż richtig uciecha
Wiyncy nos tu driny
Forum niy mo pecha
Przidzie gratulować pewno tyż Bolkowi
Wartko sie to kulo, choć nikerych dłowi.

[broneknotgeld]

Berbel
--------

Jo sie fest raduja
Że widza tu Kutza
Łon co ślonske czuje
Do filmow zaś wroca
"Perła we koronie", "Sol ty ziymi czorny"
Szkoda że na razie mo wynik dość morny.

[broneknotgeld]

Lyjo
------

Mosz recht z tym Berbelko
Typujom go mało
Kej dusza mo wielko
By sie wiyncy zdało
Dyć spokopić musisz - tako jest ta sztela
Kto zalogowany - szanse wiynksze - tela.

[broneknotgeld]

Berbel
------

A tyn poseł Plura?
Co mi szkryfniesz Lyjo?
W Niymcach ło niym -"dziura"
Głosować mecyjo
Cosik bych sie ło niym wiycy dowiedziała
Możno tyż przez "google" byda go szukała.

[broneknotgeld]

Lyjo
------

Ech - istny probuje
Naszo godka dźwigać
Nikerych szteruje
Niy chce wcale migać
Czy we tym Rolwaga richtig po popiyro?
Jo niy cołkym wierza - przekonom dopiyro.

[broneknotgeld]

Berbel
-------

Podobnoś łon wspiyro
Kodyfikacyjo
Wysoko zaziyro
Wiym - ze tym mecyjo
We Necie jak szkryflać zdo sie durś łostuda
Zgoda we tym bydzie? Mom wierzyć we cuda?

[broneknotgeld]

Lyjo
------

Patrz - już typowano
Prawie Pańczykowo
Niy dziw że tyż dano
Za godkom fest stowo
Dyć niy chce by ślonski boł jynzykym w prawie
Kij w mrowisko wrazisz? -Co po ty zabawie?

[broneknotgeld]

Berbel
------

Możno choć ździybeczko
Tyn plebiscyt sprawi
Zgody wiyncyj deczko
I dobra wyjawi
Na zocnieszo sztrasa wszyskich pokeruje
"Pszociel Ślonski Godki" tako uraduje.

[broneknotgeld]

Bolek
------

Kulo sie piyknie!
Widzicie przeca
Chyńci nom styknie
Kukać do Neca
Już kandydatur richtig jest wiela!
Chnet trzi tuziny - szkryfna - aż tela!

[broneknotgeld]

Lyjo
------

Ano - dość wiela
Z Rudy nojwiyncy
Ciekawo sztela
Możno to zmynczy
Dyć jak na razie szanse ich rosnom
Czy skuli tego że dzieje wiosnom?

[broneknotgeld]

Ignac
-------

Wiyncy ze wiosnom
chacharstwa z Rudy?
Tako urosnom?!
To niy jest cudym!
Mie ta ferajna teroz dziwuje
Ich i nos ofyn ktoś łoszukuje!

[broneknotgeld]

Erna
------

Franka niy widać!
Czego wachuje?
Kej cicho - biyda!
Z Bolkym szachruje?
Łoba niyworte som i fynika!
Medale dować?! -W piekle im rzykać!

[broneknotgeld]

Franek
---------

Szanowni Państwo
Prawdy tu chcecie?
Może w tym draństwo?
-Bywa na świecie
Pomysł na konkurs - stowarzyszenia
Dlatego piszę wedle sumienia

Komu to służy?
-Sami widzicie
Kto, jak chce użyć?
-Pokaże życie
"Przyjaciel Śląskiej Mowy" otwarty
Na forum Waszym - to nie są żarty

Kandydatury
Zgłaszać możecie
Ciągnąć do góry
Na pewno chcecie
Myślę - nie trzeba zaraz medali
Byście ideę taką wspierali.

[broneknotgeld]

Erna
------

Kej sie we stoł pizło
Wyłazi łobłuda
Łoszkliwość łoślizło!
"Kerhof" mo już Ruda!
Wystykło przicisnońć dździybeczko hadziaja
Plagiatory łoba! -Niy darmo ta haja!

[broneknotgeld]

Ignac
-------

Erna - Franek wiela
Zdo sie niy poradzi
Prowda szkryfnoł - tela
U nos tyż jom "sadzi"
Bolek niymi kryńci - zdo sie jak "firerek"
Dlo nos łon połgłowek - dlo nich szpec łod "bierek".

[broneknotgeld]

Erna
------

Do nos z prowdom włazi
Tu drzisto w galoty!
Co jeszcze nom wrazi?
Doczkomy sie potym
Cosik chce naprawić? -Dyć styknie mu kliknońć
Cygaństo "Pszociela..." może z forum zniknońć.

[broneknotgeld]

Ignac
------

Patrz jako na wontku
Mu tam maras leci
Wiyncy we tym kontku
Hilfkorz już niy skleci
Szczyńściym co gorola sumiynie ruszyło
Możno w ty ferajnie tyż coś łodmiyniyło.

[broneknotgeld]

Bolek
-------

Franek! Dyć - jeronie!
Co wynokwiosz tukej?!
Z "Pszocielym..." niy koniec
We gowa sie klupej
Koncept jest autorski - ofyn żech to szkryfnoł!
Czamuś mi przi tymu plagiatym w ślyp gichnoł?

Publicznie kajś zgobisz
"Podrobkom" we Necie
Kogo gupkym robisz?
Jako z tym łobleczesz?
Plagiatorstwo tympia! Mie śmiysz je wytykać?!
Przeprosin domogom! Przestoń tako klikać!

[broneknotgeld]

Franek
--------

"Przyjaciel..." jest inny
Tykam "miłośnika"?
Kto złodziej? Kto winny?
Nie tu o tym klikać
Dlatego zejdź ze mnie szybko "mościpanie"
Trzymaj się swojego - wtedy nic nie stanie.

[broneknotgeld]

Erna
------

Hadziaj ze jajami?
Możno to i lepi
"Ciynkimi Bolkami"
Ślonsk sie niy pokrzepi
Zowdy gorol lepszy jest łod sprzedowczyka
"Pszocielowi..." łorder? Niy - "kocio muzyka"!

[broneknotgeld]

Ignac
-------

Franek - łosrej Bolka
Kontek na Glywicki
Łoszczyrbiono szolka
Styknom mu na wdycki
Takich pofyrtańcow zawrzić trza na amyn
Bo jako inaczy? Sznora abo kamyń?!

[broneknotgeld]

Franek
--------

Pamiętam z młodości
-Ciotka tak mówiła
Wcale nie ze złości
Mądra przecież była
"Bóg chce kogoś skarać - rozum mu odbiera"
Warto o tym sobie przypomnieć i teraz.

[broneknotgeld]

Ignac
------

Downo "gowom pustom"
Ponboczek pokoroł
Widać co z kapustom
Groch by mu wygoroł
Ciotka mondro boła - warjotow poznała
Dyć by sie Bolkowi pewno dziwowała.

[broneknotgeld]

Bolek
------

Franek - żeś łoślepnoł?
Tukej moderujesz
Czyś za mocno kepnoł?
Coś niy forsztelujesz
Plagiatorstwa teroz już ci niy daruja
Łobrazić śmiysz ofyn - to tyż dorachuja

Możno i wokanda
Trza bydzie łotworzyć
Łobroni stond "banda"?
Sprobuja to dożyć
Sie porachujymy z tym we końcu przeca
Piyńć razy pomyślisz niym coś dosz do neca.

[broneknotgeld]

Erna
--------

Patrzcie go - łoklańca!
Śmiy tu jeszcze grozić
Wziyłabych "do tańca"
Niy mogby już pożyć
Jako "krisbaum" blysnołby mi łorderami
Potym już na gnotku? Po co? Wiycie sami!

[broneknotgeld]

Ignac
-------

Franek - groźby widać
Niy trop sie soroniym
Śmiy ci strachym kidać!
Łosioł niy jest koniym
Wytnij pofyrtańca i dali rob swoje
Dyć wiysz co my wiymy - tyn Bolek to po..b!

[broneknotgeld]

Franek
----------

Bolek - chcesz - przepraszam!
Niech będzie na twoje
Tu ci to ogłaszam
Jawności nie boję
Nie we swoje przecież "odchody" wdepnąłem
Przepraszam i za to, że nic ci nie wziąłem.

[broneknotgeld]

Bolek
-------

To ci przeprosiny
W cudzo klota klupie
Trza nadrobiać miny
Choć kajsik coś łupie
Tref ferajny przidzie - coś sie wyklaruje
Dyć terozki kukna na plebiscyt - gzuje!

[broneknotgeld]

Lyjo
-----

Ano - Bolek - sie wadzicie
A ideja widać zocno
Net niy zowdy jako życie
Szczyńściym "Pszociel..." trzimie mocno
Kandydatow trzi tuziny, nawet z hokym już do tego
Sie we wontku dzieje driny! Aż niyjedyn dziwo z tego.

[broneknotgeld]

Berbel
-------

Coroz wiyncyj tam weluje
Joch tyż swoje "typy" dała
Setki ludzi to raduje
Widać z tego niy jest "chała"
Trza zabawy, promocyji, trza uciechy ślonski godce
Niy te czasy, moji mili, coby jom zawiyrać w klotce.

[broneknotgeld]

Bolek
--------

Ano - zgobniki
Niy sztopli tego
Widać wyniki
Toż coś zocnego
Co ślonske teroz rozkwito wiela
Dyć ciongnom ludzie durś do "Pszociela..."