Tragedyjo "Skiż prow autorskich"

[broneknotgeld]

Tragedyjo "Skiż prow autorskich"

Tragedyjo na dwa fora
Zdo sie jakby boło wczora.

[broneknotgeld]

Skuli prow autorskich tako tragedyjo
Ano - w Necie ze tym ciyngym jest mecyjo
Tako i Ślonzokom utropa z plagiatym
Tela yno pedzieć? Dyć niy stanie na tym!

Kunsztym godka ślonsko blyszczy w "naszy-klasie"
Rozkwito terozki, we ciekawym czasie
Nikierzy jom prawie chcom kodyfikować
Jynzykym regjonu w polskim prawie stowiać

Inksi sie starajom ło literatura
Kej echt-ślonskom bydzie - godka z tym we gora
Konkurs ślonski fraszki gościoł w rudzkim forum
Toż komuś trza było niy yno humoru

Co skiż tego stało? Ano - chnet dowiycie
Chyńci przeca stykło, dyć zło niesie życie
Wirtualnie tako sie mnoży i rośnie
Tropi kej by mogło być richtig radośnie.

[broneknotgeld]

Berbel, Lyjo, no i Bolek
W "naszy-klasie" choć niy szkole
Sie ze Lyjnom tyż skamracom
Rudzke forum ubogaom.

[broneknotgeld]

Erna z Hyjdlom sztama trzimie
Ignac przi nich niy podrzymie
Julek tako wspiyrać bydzie
Kryjolyjo - co to przidzie?!

[broneknotgeld]

Ichnie forum mo rozkwitać
nk.pl/#forum/10/6631
W tyn czas nikt niy myśli citać.

[broneknotgeld]

Łobroz I - "Koncept"

Trza jakoś sztartnońć - tako zaczyno
Koncept konkursu tu przipomino
Wiela zocnego sie w tym zdowało
Potym dowiycie co łokozało.

[broneknotgeld]

Ignac
------

Boł na rudzkim forum konkurs ślonski fraszki
Wartko sie pokuloł, dyć yno igraszki
A zy mie romantyk - we gowie liryka
Kunszt wysoki chwola - niy szpasym mi klikać!
Ślonske wice, fraszki, rymowanki wszyndy
Jako balakwastry - trza zocnieszy grzyndy!

[broneknotgeld]

Bolek
-----

Ignac - ło co idzie? Czy fraszka ci wadzi?
Cosik na tym tracisz kej sie rym paradzi?
Szpas mo swoje miejsce we ślonski kulturze
Jo starom sie coby fraszka boła w gorze.

[broneknotgeld]

Ignac
------

Ano, przeca widać - koncept sowizdrzolski
Zdo sie "bercikowy" i przi tymu swojski
Dyć kunszt poezyji to niy "czynstochowa"
Wiersz bioły, liryka - we tym moja gowa!

[broneknotgeld]

Bolek
-----

Sie "piszesz inaczy" już na rudzkim forum
Dyć niych cie niy tropi co skuli humoru
I na labiydzynie czasu niy trza tracić
Roztomajcie idzie godka durś bogacić.

[broneknotgeld]

broneknotgeld napisał:

> Bolek
> -----
>
> Sie "piszesz inaczy" już na rudzkim forum
> Dyć niych cie niy tropi co skuli humoru
> I na labiydzynie czasu niy trza tracić
> Roztomajcie idzie godka durś bogacić.
nk.pl/#forum/17/977/48

[broneknotgeld]

Ignac
------

Ech, dyć poezyji prowdziwy fest mało
Szpasu by sie yno "bercikom" durś chciało
A to nos niy dźwigo, to prawie jest niske
Wedle mie utropy dlo godki stond wszyske.

[broneknotgeld]

Bolek
------

Fandzolisz, labiydzisz - ślimtać możno bydziesz?
Pewno ze tym richtig daleko niy przidziesz
Niy kukej na siebie, niy trop kej niy trzeba
Weż muster łodymnie - dej liryce "chleba"
Twoje forum przeca - kej liryce pszajesz
Zrychtuj zocny konkurs - kunszt niy jakeś baje

[broneknotgeld]

Ignac
------

Konkurs poezyji? Czy to tukej chyci?
Kto wiersze jakoweś do tego uklyci?

[broneknotgeld]

Bolek
------

Niy trop sie zawczasu - jo chca we tym wspiyrać
Wiela popromuja - bydom tu zaziyrać

[broneknotgeld]

Erna
------

Ignac, dyć poradzisz! Zocno mosz ta sztela
Twoje wiersze czyto niyjedna tu frela
Niyjedny przi tymu aże gorko robi
Konkurs forum prawie richtig fest łozdobi.

[broneknotgeld]

Hyjdla
-------

Ignasiu, chciyj tako - niych inksi tyż piszom
Ty frelki przinyncosz tukej nawet ciszom
Nom ckni sie bez ciebie, dyć kej dosz wiersz bioły
Choć "ołow" na dworze nom dzionek wesoły
We nocy przi tymu aż poli pierzina
I kożdo miec bydzie rozmarzono mina.

[broneknotgeld]

Ignac
-----

Frelki, moje frelki, kwiycia forum tego
Trza ty naszy godce kunsztu przezocnego
Możno na moj muster inksi poprobujom
Możno wos przi tymu i mie uradujom
Tym kierzy wygrajom prześla wierszow tomik
Kunszt ze moji rynki - żech przeca niy "komik".

[broneknotgeld]

Erna
------

Rychtuj Ignac, rychtuj - tyż cosik zocnego
Łod sia ci coś prziśla, wiysz żech jest do tego
I niy trop już fraszkom co podlejszy miary
We tym co jo tworza tyż kunsztu som czasy
Som żeś tako prawioł, inksi wychwolajom
Kajniykaj, nikierzy mojim wersom pszajom.

[broneknotgeld]

Ignac
-----

Wiym Erna - dyć chwola co co na forum dowosz
Niy darmo żeś tukej i wele mie stowosz.

[broneknotgeld]

Hyjdla
------

Ignasiu, dyć widzisz - niy poleci nudnie
Pewnikym na forum ze tym bydzie cudnie
Tyś tukej jest dlo nos jak gwiozdka na nieba
Sie inksi przuczom coniyco przi ciebie.

[broneknotgeld]

Ignac
-----

Łoj Hyjdla - wiersz nowy we gowie mi kluje
Niy yno tu ciebie możno uraduje
"M" durś mojom muzom - dyć zdo sie daleko
Jednak wiym, na forum twoje serce czeko.

[broneknotgeld]

Hyjdla
------

Toż liryki czekom - mie, inksze raduje
Dyć konkurs, dyć konkurs niych tyż sie szykuje.

[broneknotgeld]

Bolek
------

Toż co ci łostało kej frele fest proszom?
Skuli ty liryki cie "na ryncach" noszom
Pokoż co zrychtować tyn konkurs poradzisz
I forum w proficie - kej kunszt inkszych wrazisz
Fraszce trza dać pokoj - krytykom tyż pasie
Jo dbać byda ło to by boła "na czasie".

[broneknotgeld]

Ignac
-------

Ano - kej tako, to poprobuja
Wpiyrw regulamin tukej zrychtuja
Pomedykuja jako to ciongnońć
Tworcow we konkurs jakosik wprzongnońć.

[broneknotgeld]

Łobroz drugi - "Regulamin"

Regulamin przirychtuje
Sie to ktosik forszteluje?
Rośnie ździybko przi łostudzie?
- Ważne co we przodek pódzie!

[broneknotgeld]

Ignac
------

"Pisza inaczy" - konkurs skiż godki
Coby nom kwitła i szła z tym przodkym
Wiersze liryczne, nom niyzwyczajne
Pszonie i inksze ideje fajne
Sprobujcie tako ofyn przedstowić
Kunszt trefu życio, momynty złowić

Pod pseudonimym - terozki głosza
Jedyn, dwa wiersze prziślijcie - prosza
Kere niy boły publikowane
Mogom być biołe, tyż rymowane

Dyplomy ze tym i promocyjo
Moj tomik wierszy - niy komedyjo
Trzech we konkursie wygranych bydzie
Tomik piyrszymu dyć yno przidzie

Adres wyjowiom, na brify czekom
Do końca tydnia - czas płynie rzekom
Ze drugim lutym tu je przedstowia
Gwarancjo dowom - z tym niy zabowia

Ktoś z "klasowiczow" tam zagłosuje
Ze wolny woli - tym uraduje
Punktow zaś przidzie tela prziznować
Wiela tych wierszy zechcecie dować

Yno dejcie pozor - lutym dwudziestego
Szlus już ze tym przidzie, toż trzimejcie tego!

[broneknotgeld]

Erna
------

No toż uciecha - wiersze szkryfnymy
Kej tako wszysko we końcu wiymy
Pomedykować trza przi liryce
Poślimtać możno w papior - powiycie.

[broneknotgeld]

Bolek
------

Możno i piyknie - dyć coś ciekawi
"Jedyn, dwa wiersze" sie tukej jawi
Ło rowne szanse lepi dbać przeca
Jedyn wiersz szkryfna - w drugi poleca?

Mie styknie jedyn - padna jak sznita
Miesionc mi dychać niym z drugim witać
No i tyż lepi "jurorom" wiedzieć
Wiela autorow bydzie w tym siedzieć.

[broneknotgeld]

Ignac
------

Bolek, poradzisz ty richtig czytać?
Mogbyś pomogać, niy tako pytać
Kto chce niych prziśle jedyn wiersz prawie
Dwa tyż sie zdadzom we ty zabawie
Dyć idzie ło to coby niy wiyncy
Niych sie gowiczka twoja niy mynczy?

[broneknotgeld]

Bolek
------

A kej dwa wiersze - dwa pseudonimy?
Pytom sie ło to niy skuli "zimy"
Klar we tym przeca lepi jak bydzie
Kej konkurs sztartnie, tako niy w biydzie.

[broneknotgeld]

Ignac
-------

Tako?! Już "kłody" ciepiesz ku tymu?!
Dej pozor - trefisz do karczmy "Rzymu"!

[broneknotgeld]

Erna
------

Na "babski rozum" - Bolek szteruje
Przeca sie ze tym tyż coś klaruje
Ignac, to bydzie wedle twyj woli
Dyć czy uwogi cołkym łosmolić?

[broneknotgeld]

Bolek
------

"Nom niyzwyczajne" - tym tyż sie tropia
Mie tako prawie - w inkszych niy "kopia"
Dyć to niy godzi w regulaminie
Wyciepnij - niy rob tego dziedzinie.

[broneknotgeld]

Ignac
------

Zaś nowo "kłoda"! Zaś chcesz sie wadzić?
Jo tam nikomu niy byda "kadzić"?

[broneknotgeld]

Bolek
-------

Dyć jako "kłoda"? Jako łostuda?
Czy poezyjo to prawie cuda?
Echt "niyzwyczajno" we ślonski duszy?
To mo prziciongać? Kunsztym poruszyć?
Żech rymopisym, a ździybko tropi
We tym jest szpyndlik - Ślonzok spokopi.

[broneknotgeld]

Ignac
------

Łod zowdy żyja jo romantykom
Niy przeciwstowiej mie tu lirykom
Tako niy wmowiej złych intyncyji
I niy wynokwiej skiż komedyji.

[broneknotgeld]

Bolek
------

Epno tyż utropa welowanie niesie
Kej wierszy dwadziścia - jurorom zechce sie?
Stykłoby trzi wiersze punktami łobdarzyć
Kej trzech lauryatow, choć wszyskim to marzy.

[broneknotgeld]

Ignac
------

Czy ze ślonski godki spokopisz niywiela?
Za wiela sztyjc pytosz - szkryfna prawie tela
Kej wiersze już przidom, wszyskim tu łogłosza
Jako punkty dować - "kamiyni" niy prosza
Dyć możno wysujesz ich wiyncy na "cesta"
Jak wierszow dwadziścia, "bergow" wciepniesz dwiesta?

[broneknotgeld]

Bolek
------

Kej som chca wysłać na konkurs cosik
Toż niych niy dziwo ofyn moj "głosik"
Zdo ci sie wszysko "kamyniym", "kłodom"
Mom wontpliwości ło kerych godom

Lepi terozki pomedykować
Niż potym "fikcjom" noty rachować
Trefi i tako - "profilow" setka
Jakiś "klasowicz" może mieć chnetka
I ze wszyskimi welować bydzie
Skiż szpasu tako. Uciecha przidzie?

[broneknotgeld]

Erna
------

Łoj, już balakwastrow wiela
Mo lirykom blysnońć sztela
Trza coniyco popoprowiać
No i drapko wiyrchym dować

Ignac - zrychtuj wedle siebie
Żeś na Bolka niy jest "chlebie"
Tyś romantyk, liryk przeca
Forum ze twojego neca.

[broneknotgeld]

Bolek
------

"Balakwastry"? Ło co idzie?
Dyszkyrs tukej jest we biydzie?
Wontek przeca niy zawarty
Lepsze z tym konkursu "karty"
Sama szkryflosz coś - "poprowić"
Chca niy darmo tukej "bowić"
Że tym jego coś szteruja?
Kunsztym godki tyż raduja
Intyncyjow złych w tym niy ma
"Kłody"! "Kamyń"! Srogo zima?

[broneknotgeld]

Hyjdla
-------

Ech, dopiyro teroz kukom
Co inkszego we tym szukom
Bydzie godka z tym w proficie
Choć durś kwardo - przeca wiycie
Kej liryka - jakby miynkszo
Dyć przi kunszcie takim wiynkszo
I przepiykno jako kwiycie
Z wierszym lepsze dlo niyj życie.

[broneknotgeld]

Bolek
------

Niych tako bydzie - swoje żech pedzioł
Niy yno Bolek ło tym dowiedzioł
Uwog już niy mom, poczkom co bydzie
Czy regulamin poprowić przidzie?

nk.pl/#forum/10/6631/36?page=1

[broneknotgeld]

broneknotgeld napisał:

> Bolek
> ------
>
> Niych tako bydzie - swoje żech pedzioł
> Niy yno Bolek ło tym dowiedzioł
> Uwog już niy mom, poczkom co bydzie
> Czy regulamin poprowić przidzie?

Niy yno Ignac ło tym dowiedzioł.
>
> nk.pl/#forum/10/6631/36?page=1

[broneknotgeld]

Ignac
------

"Pisza inaczy" - konkurs skiż godki
Coby nom kwitła i szła z tym przodkym
Wiersze liryczne ze ślonski duszy
Zocne ideje, pszonie niym ruszyć
Sprobujcie tako ofyn przedstowić
Kunszt trefu życio, momynty złowić

Pod pseudonimym - terozki głosza
Jedyn wiersz yno prziślijcie - prosza
Co nikaj niy boł publikowany
Może być "bioły", tyż rymowany

Dyplomy ze tym i promocyjo
Moj tomik wierszy - niy komedyjo
Trzech we konkursie wygranych bydzie
Tomik piyrszymu dyć yno przidzie

Adres wyjowiom, na brify czekom
Do końca tydnia - czas płynie rzekom
Ze drugim lutym tu je przedstowia
Gwarancjo dowom - z tym niy zabowia

Ktoś z "klasowiczow" tam zaweluje
Ze wolny woli - tym uraduje
Niyważne głosy anonimowe
"Profil fikcyjny" tyż trzimie czowiek
Dyć roz je yno trza porachować
Toż "niyfikcyjnie" zechciyjcie dować

Trzi, dwa i jedyn - toż take noty
Trzi wiersze wiyrchym - zrachuja potym
Pewno przi tymu już wos niy dziwo
Kaj wiyncy punktow - tyn wiersz wygrywo

-----

Yno dejcie pozor - lutym dwudziestego
Szlus już ze tym przidzie, trzimejcie sie tego!

-----
nk.pl/#forum/10/6631/37

Ruda Śląska - stolica fraszki

[broneknotgeld]

Łobroz trzeci - "Promocyjo"

Przi promocyji wiela sie dzioło
Leciało zgodnie no i wesoło.

[broneknotgeld]

Bolek
------

Zima sie nom rozkulała
Mrozik z nowym rokym dała
Popruszyła tyż na bioło
Coby było nom wesoło

Przi niydzieli medytuja
-Jako konkurs wypromuja?
nasza-klasa.pl/forum/10/6631/37?find=last#post1
Czy łon blyśnie w "naszy-klasie"?
Ech - naklikać bydzie trza sie!

Czy ktoś przidzie mie w tym wspiyrać?
Słać znajomym by zaziyrać?
Z promocyjom niy ma leko
Ciyngym Ślonzek na to czeko.

nk.pl/#forum/17/977/48?page=32

[broneknotgeld]

Ignac
------

Łoj, coby yno wiersze przisłali
Liryka u nos dyć niy "na fali"
Dyrś wice, fraszki, szpas z rymowanki
Kultura wiyrchnio tukej ze mankym.

Ruda Śląska - stolica fraszki

[broneknotgeld]

Bolek
-------

Dyć sie tym Ignac niy trop zawczasu
Trza promocyji, jak zwiyrzom lasu
I tworcow tako ofyn niy tykej
By wiersze prziszły chocioż porzykej

Jo swoje zrobia - niy pożałyja
Choć powodzynio niy gwarantuja
Dom na "profile", wciepna na fora
Dyć tako dzieje sie już łod wczora

Kej poprowiony jest regulamin
Kosa niy trefi na twardy kamiyń
Lirykom drapci tu pożniwuje
Kunsztym przezocnym Ślonsk uraduje.

[broneknotgeld]

Ignac
-------

Kej nawet prziślom jak dom to tukej
Kaj tych "jurorow" ze świyczkom szukej
Niywiela czyto ślonsko liryka
Wic, fraszka woli - tymu zaś - kryka!

[broneknotgeld]

Bolek
------

Dyć niy fandzol i niy kwynkej
Kej galoty mosz - niy pynkej
Frelki fest cie tu czytajom
Wirtualnie jakby pszajom
Trza prziciongać, trza promować
Wszyndy wieści ło tym dować.

[broneknotgeld]

Lyjo
-----

Tyż to czytom - już sie ciesza
Już coś szkryfnońć medykuja
Prziśla, choć tym możno "zgrzesza"
Sie konkursym dyć raduja.

[broneknotgeld]

Bolek
------

No, dyć prawie ło to idzie
Piyknie ze konkursym bydzie
Wieści ło tym sie rozłażom
Skiż liryki niy łobrażom
Ci co durś kicholym kryncom
Kej ich "giyry" w godce mynczom.

[broneknotgeld]

Lyjo
------

Hehe - "giyry", "giyrki", "szłapy"
- Szukosz wyny kaj fuzlapy?

[broneknotgeld]

Bolek
-------

Kaj fuzlapy jednak niy
Giyrki w gowie? -Dyć kto wiy?
Kej łod frelki piyny w mini
Cis bych sie jyj do "świontyni".

[broneknotgeld]

Poprowka:

Kej łod frelki piykny w mini.

[broneknotgeld]

Lyjo
------

Do "świntyni"? - Idź porzykać!
Chciołbyś miyndzy giyrki blikać?
Dyć niy małpuj Sztaudyngera
Kej liryki konkurs teraz.

[broneknotgeld]

Bolek
------

Ech - liryka! Wola fraszka!
Czy Euterpe ześle łaska?
Zagro w nocy mi na flyjcie?
Piyknie by to było - wiycie.

[broneknotgeld]

Erna
------

Sprobuj jako jo - chyć blaja
Fraszka pasie nawet haja
Dyć inaczy ze lirykom
Zdo mi sie co ze niom rzykom.

[broneknotgeld]

Bolek
------

Dyć sprobuja - coś uklyca
Tropia tym, czy punkty chyca
A jak niy, tyż jakoś strzimia
Wele fraszki se podrzymia
Wierny byda jyj do końca
Styknie wiosny, lata, słońca

[broneknotgeld]

Erna
------

Bolek - wygrosz - to co przidzie?
Ze wiernościom jako bydzie?

[broneknotgeld]

Bolek
------

To se liryka na blacha wkuja
Ślubny we wyrku zadeklamuja
Pewnikym drapko uśnie przi tymu
Niyważne - "bioło" abo do rymu.

[broneknotgeld]

Ignac
-----

Dyć łod jurorow zoleżeć bydzie
Wygrosz, czy przi tym trefi być w biydzie
Zdo mi sie, bydziesz sztartowoł prawie
-Bestoż chcesz miyszać we ty "zabawie"?

[broneknotgeld]

Bolek
------

Pierombol, Ignac - strachom sie "zera"
Tropia już ździybko tym richtig teraz
Ślubny do wyrka wlyźć uślimtanym
To na delinie łobudzić ranym.

[broneknotgeld]

Erna
-----

A jo już pioro tonkom we tincie
Niy medykuja ło jakiś "piyńcie"
Fraszkom niy tropia, pszaja liryce
Sama coś szkryfna, wyśla, toż wiycie.

[broneknotgeld]

Bolek
------

Już żech szrajbnoł! Już jom mom!
Bez pomocy! Cołkym som
Dziesiyńć minut mi wystykło
W sercu yno coś zapiykło
Dyć terozki tropia sie
Słać na konkurs zaroz chce
Prawie taki forumowy
Kaj i głos Ślonzoka zdrowy
Cołkym jawnie bydzie dany
Trza liryce ździybko szpany.

[broneknotgeld]

Hyjdla
-------

Toś ze kapsy jom wysypoł?!
Chwila stykła - żeś niy zipoł
A po nocy - co to bydzie?
Możno Muza do cia przidzie?

[broneknotgeld]

Bolek
------

Jedyn wiersz styknie, bo hercklekoty
To dlo mie niy som jakeś gupoty.

[broneknotgeld]

Hyjdla
------

Niy wymigosz sie jyj fraszkom
Kej cie już łobdorzo łaskom.

[broneknotgeld]

Bolek
------

Moji "liryczny Muzie"

Wlazłaś mi na plynckyrz w nocy
Toż żech szrajbnoł "bez pomocy"
Serce mie przi tymu piykło
Szczyńściym - dziesiyńć minut stykło

Toż se teroz richtig trop
Wiysz żech "wrazidlaty" chop
Kij se wraża kaj amajzy
Taki zy mie kyns tyż łajzy

Lubia czynsto sowizdrzolić
Tu popieprzyć, tam posolić
Plynckyrz pynknoł - to niy "plota"
Se sztacheta zerwia z płota!

We konkursie punkt dostana?
Jak niy - pod Dortmundym stana
I na "Muza" zapoluja
Sztachecie niy pofolguja!

[broneknotgeld]

Erna
------

W dziesiyńć minut? Dyć fandzolisz
Coby wnerwić - mi sie chwolisz
Chcesz bych wiersza niy wysłała?
Strachać byda sie musiała?
Chca - to wyśla. Niy - to niy
Stracha niy mom - kożdy wiy!

[broneknotgeld]

Bolek
-----

Na tyn konkurs cosik szkryfniesz?
Biołym wierszym w serce gichniesz?
Możno po starymu - rymym?
Czy se tukej to dowiymy?

[broneknotgeld]

Hyjdla
-------

Możno na brifmarka ci Erna niy styknie
Dyć chyntnie to fundna, szkryflosz przeca piyknie.

[broneknotgeld]

Erna
-----

Brifmarkom niy tropia
Flachy żech sprzedała
Dyć we gowa dropia
Wyna bych mieć chciała.

[broneknotgeld]

Hyjdla
-------

Żeś poetkom cołkom gymbom
Niy trop sie "fraszkowym zymbom".

[broneknotgeld]

Bolek
-------

Niych kto szkryflo jako woli
Wierszym naszo godka chwoli.

[broneknotgeld]

Ignac
------

Jo wos tu niy rozwesela
Wierszy prziszło małowiela
Czy na konkurs tego styknie?
Wartko leci czas. Niypiyknie.

[broneknotgeld]

Hyjdla
-------

Ignac - konkurs promujymy
Już niy yno w tym portalu
Niy ma leko - tela wiymy
Styknie czasu - niy trza szmalu

Przeca czynsto tako bywo
Nojpiyrw nic - pod koniec - dziwo!
Lepi za drap sie niy tropić
Dyć poetow trza spokopić

[broneknotgeld]

Bolek
------

"Pisza inaczyj - konkurs liryki ślonski"

Jeszcze yno tydziyń prawie
-Blyśnie ślonsko nom liryka!
Kunszt posłuży zocny sprawie
Do Erato trza porzykać?

nasza-klasa.pl/forum/10/6631/37

Dyć jurorym tyż być możesz
Klasowiczu - chciyj dać noty
Trzi nojlepsze wiersze wskożesz
Kto wygrany - dowiysz potym.

[broneknotgeld]

Hyjdla
-------

Promocyjo leci wszyndy
Poezyjo ślonski "grzyndy"
Pewno do cia Ignac idzie
Toż sie niy trop - dobrze bydzie.

[broneknotgeld]

Erna
------


A to znocie?
Poczytocie?

----
Ło tyszance co Niymca niy chciała

Wiycie ło tyszance co Niymca niy chciała
Ciekawo historio - dramat to bez mała
Łon sie po nia wybroł zbrojny we "armata"
Bo bez niyj niy widzioł dlo siebie już świata

Uprowadzioł z doma - w Gliwicach ich znodli
Dyć Niymca na krotko do heresztu kłodli
Kaucjo doł i wyloz skiż łaski Tymidy
Ale frelka w gowie durś tego łobrzidy

Jeszcze roz chcioł copnońć ta piykno tyszanka
Terozki we życiu narobioł już manka
Siedzi zaś w hereszcie - euro niy pomoże
Myśli dzisioj pewnie jak tyn sond go skorze.

[broneknotgeld]

Bolek
------

Historyjo znom tyszanki
Dyć ktosik przi tymu z mankym
Dyszkurs leci tyż na forach
Coby zadbać ło autora.

nk.pl/#forum/17/977/78

[broneknotgeld]

Hyjdla
-------

Ano, być może ło to łostuda
Autora "mażom" choć to niy cuda
Dyć kej to bierom, niych majom w zocy
Trza czytelnikom dać go przed łoczy.

[broneknotgeld]

Bolek
------

Mosz recht - tyż za tym jo ciyngym stoja
Bierom kajniykaj już fraszka moja
Bierom "perełki" rudzkego forum
Kej bez autora - mniyj w tym humoru.

[broneknotgeld]

Ignac
------

Bolek - fraszka jako wic
Choć wesoło - prawie nic.

[broneknotgeld]

Bolek
-------

"Prawie nic" - dyć mo autora
"Błonko" w Necie niy łod wczora
"Błonkać" mo anonimowo?
-Tako mi sie niy wydowo!

[broneknotgeld]

Erna
------

Ech, na forum "Ślonsko Godka"
Ze wierszami szło sie spotkać
Pyjter P. je wklejoł piyknie
Cosik stamtond dom - wystyknie?

------

Kej gyńsipympek

Kej gyńsipympek rozkwito wiosnom
Kej mojik żołci łonki swym kwiyciym
Herske uczucia we sercach rosnom
We dyszach fakla grzeje i świyci

Frelki bez mantlow już w swoji krasie
Kajniykaj słonko chalo promykom
Karlusom ździybko haltować trza sie
Dyć jak te cuda łominońć blikym?

Jako natury prowu łopiyrać?
Ciała som gorke i dusze – wiym to
Mo szac na lipsta yno zazierać?
Ło świynty Jonie – som byś zaślimtoł!

Ech – lato idzie, ze nim spełniynie
Kupluje dusze, ciału folguje
Natura zdo sie dać jedne tchnienie
Kto pszoł, kto pszaje – to forszteluje

Toż niy na darmo – pewnikom wiycie
Tako Ponboczek zocnie świat stworzył
Coby rodziło na nim sie życie
-Zowdy po zimie na nowo ożoł

Kej gyńsipympek wiosnom rozkwito
Kej mojik kwieciym zażółci łonki
Bociek w tym czasie dyć tyż zawito
Na ciosto życia wystyknie monki.

[broneknotgeld]

Lyjo
----

Witom - kukom tukej prawie
Wierszyk jako śnik na jawie
-Bez podpisu klarownego
Pyjter richtig tworcom tego?

[broneknotgeld]

Erna
------

Lyjo - przeca żech szkryfnyła
Coch to yno przeklejyła
Pyjter tako samo zrobioł
Jo niy zgobia - łon niy zgobioł.

[broneknotgeld]

Lyjo
------

A jo prawie znom autora
Niy jest dlo mie anonimym
Wiersz we Necie niy łod wczora
forum.gazeta.pl/forum/w,28940,23540974,115598470,Re_Jak_chop_z_babom.html
Z pory kej zielone brzimy.

[broneknotgeld]

Erna
------

Dziynki, dziynki - toż już wiym
Skond tyn piykny ślonski rym
Dyć niy nerwuj sie za wiela
Żech niy złodziyj - szkryfna tela.

[broneknotgeld]

Lyjo
------

Roztomajcie ze tym bywo
Kto autorym kuko krziwo
Robiom z niego anonima
Promocyjo? Trza "na przima"?

Lepi na to pozor dować
Bez autora niy "promować"
Trza szanować jego prawa
Może skończyć źle "zabawa".

[broneknotgeld]

Berbel
-------

Witom - kukłach prawie
Koncept jako śnik na jawie
Wiersz na konkurs żech wysłała
"Pseudo" swoje tyż podała.

[broneknotgeld]

Hyjdla
------

Witej Berbel - gratuluja!
Tym sie richtig fest raduja
Blysłaś fraszkom sowizdrzolskom
Blyśniesz tyż lirykom swojskom.

[broneknotgeld]

Berbel
--------

Ech, już fraszki mi kopiujom
W Necu zdo sie tyż "promujom"
Choć podpisza - miano wytnom
Czamu zowdy tako przitnom?

[broneknotgeld]

Hyjdla
-------

Dyć sie ciesz, kej podobajom
Niy inaczy - jo niy bajom
Wiysz, ze twoje to som rymy
Czasym nawet i my wiymy.

[broneknotgeld]

Lyjo
-----

Kejby zowdy z mianym brali
Prawo tako szanowali
Tym cieszyli by autora
No i bogaciyli fora.

[broneknotgeld]

Bolek
------

Piyknie dyszkurs wom sie kleci
Dyć chnet luty - tyn czas leci
Toż trza noty bydzie dować
No i konkurs durś promować

Jo rudzianom śla stond linki
Tela kłada z moji rynki
We jurorow sie zabowiom?
Niychej tako radość sprowiom.

[broneknotgeld]

Erna
------

Czamu yno tkosz kaj Ruda?
Ślonzek mo tyż inksze cuda.

[broneknotgeld]

Bolek
------

Żech rudziokym - bestoż kłada
Kunszt mo blyszczeć, a niy zwada
Kto chce - ciongnie to u siebie
Mie tu prawie jako w niebie
Żech na Wiyrku jest rodzony
We Halymba zaś wżyniony
Toż sie niy trza tymu dziwać
Rudzie Ślonski styknie kiwać.

[broneknotgeld]

Erna
-----

Wiyncy tworcow z Rudy Ślonski
Prziśle na tyn konkurs konski?
Wiyncy w tym pojuroruje?
Wiyncy tako uraduje?

[broneknotgeld]

Bolek
-------

Ano - na to fest rachuja
Jedno wiym - tym uraduja
Dyć czy richtig tako bydzie?
Łoboczymy - konkurs przidzie.

[broneknotgeld]

Erna
-----

Przidzie, przidzie - prawie chnetka
Tu liryka to niy betka.

[broneknotgeld]

Bolek
-------

Konkurs chnetko sie zaczyno
Wierszy niychej wiela przidzie
W lutym już lektura yno
Ze notami jako bydzie?

Punkty jakeś tam dostana?
Byda zera durś rachowoł?
W ty intyncji chlapnołch z rana
-Niych se wszysko kulo zdrowo!

[broneknotgeld]

Łobroz szworty -"Konkurs"


Łobroz szworty - konkursowy
Kunszt w niym wiyrchym - ktosik powiy
Tako wiyrchym tyż liryka
A co potym? Przidzie rzykać?

[broneknotgeld]

Bolek
------

Pewno dzisioj konkurs ruszy
Blyśnie ze tym naszo godka
Kamyń zimny jakiś duszy
Se łogrzeje drap łod środka

nasza-klasa.pl/forum/10/6631/37
Chciyjcie ta ideja wspiyrać
I znajomym ło niyj głosić
Coby zaczli tam zaziyrać
Ło to jo Wos śmia dyć prosić.

[broneknotgeld]

Erna
------

Toż czas wielki z tym zaczynać
Ignac wontki nom zrychtuje
Mioł niyjedyn autor wyna
Niych lirykom uraduje.

[broneknotgeld]

Berbel
-------

Ech, zbudziyła żech sie z rana
Wartko kukom - już tu szpana
Trza ździybeczko poczkać ino
Konkurs lepszy jako kino?

[broneknotgeld]

Lyjo
-----

Tyż żech ciekow jako bydzie
Wiela wierszow czytać przidzie.

[broneknotgeld]

Hyjdla
-------

Co sie tak niyciyrpliwicie?
Ignac szkryfnie - chnet dowiycie
Mie żol teroz tego prawie
Że łon niy "gro" w ty "zabawie"
Wiyrchym fest by "szoł" pewnikym
Zbiyroł punkty klik za klikym.

[broneknotgeld]

Ignac
-----

Już na forum som - czytejcie!
Noty swoje wierszom dejcie!
Toż na wontek styknie klikać
Roztomajto tam liryka

Ech, sztyrnoście w tym autorow
Jest wybiyrać w czym tom porom
Jest lektura dość ciekawo
Jest - choć szło to wpiyrw niymrawo.

[broneknotgeld]

Bolek
------

Kej autorow aże tela
Blyśnie ze tym drap ta sztela
Czy "niymrawo"? -Bych niy pedzioł
Przi promocji durś żech siedzioł
- Toż już sukces we tym widza
Choć tym lansowaniym biydza.

[broneknotgeld]

Berbel
------

Jest co czytać - trza radować
Wszyskim wierszom podziwować
Żol dać notu trojce prawie
Kej kunszt jaki śnik na jawie.

[broneknotgeld]

Lyjo
-----


Piyknie! Niy po znajomości
Noty bydom - toż niy prości
Ździybko dyć pomedykuja
Niym te punkty swoje wsuja.

[broneknotgeld]

Erna
------

Ano - autorow poznać niyleko
Ciekawy finał konkursu czeko.

[broneknotgeld]

Hyjdla
-------

No, toż my sie doczekali
Wiela tym uradowali
Aż sztyrnoście wierszy momy
Punkty nojgryfniejszym domy.

[broneknotgeld]

Erna
------

Punktow momy małowiela
Trza promować - szkryfna tela
Kej jurorow wiyncy przidzie
Autor we proficie bydzie.

[broneknotgeld]

Bolek
-------

"Pisza inaczyj - konkurs liryki ślonski"
----------------------------------------

Już ruszoł!!!

Ze lirykom godka rośnie
Toz se tymu niy dziwejcie
Z wierszym lekci ciś ku wiośnie
Jako szkryfli - pokukejcie

nasza-klasa.pl/forum/10/6631/41
Po lekturze strof przezocnych
Se w jurorow zabawicie
nasza-klasa.pl/forum/10/6631/42
Na Ślonzokow niy ma mocnych
-Tako prawi same życie!

[broneknotgeld]

Erna
------

Konkurs tako reklamujesz
Możno wygrać to rachujesz?

[broneknotgeld]

Bolek
-------

Toż promuja ta liryka
Coby ludzie chcieli blikać
Coby noty swoje dali
Wszyskich tworcow radowali

Dyć w tym żech "wyrachowany"
Kaj co rudzke tam link dany
Niych w stolicy ślonski fraszki
Poezyjo mo łoklaski.

[broneknotgeld]

Hyjdla
-------

Ja - dlo ciebie wiyrchym Ruda!
Dyć to niy som jakeś cuda
Gruby, werki, familoki
Co nowszego? Zdo sie bloki.

[broneknotgeld]

Bolek
------

Żech ze Wiyrka w Rudzie Ślonski
Znom łod bajtla dyć te konski
Pszaja moji Laurasztrasie
Wszyndy i ło kożdym czasie

Kery Ślonzok tymu dziwi?
Ptokym czy owocym - kiwi?

[broneknotgeld]

Hyjdla
--------

Dyć niy yno ślonsko sztela
Twoja Ruda - szkryfna tela.

[broneknotgeld]

Bolek
-------

Dyć niy yno - kej mosz swoja
Stoj sie za niom jak jo stoja
Bronić tego ci niy byda
Zy mie przeca niy łobrzida.

[broneknotgeld]

Lyjo
-----

Tu niy ło to idzie - sie niy przegadujcie
Lepi ło konkursie tu zaś cosik wsujcie
Jako sie wom widzi na wontku liryka?
nasza-klasa.pl/forum/10/6631/41
Wertało by prawie coś ło tym poklikać.

[broneknotgeld]

Berbel
-------

Sie kuknijcie w wiersz łod "Trudy"
Wioski swyj niy przepomniała
Strofy zdajom mi sie cudym
Dzisioj tyż by jom poznała?

[broneknotgeld]

Bolek
------

No a "Kole familoka"
Richtig wiela sie tam dzioło
Szłoby tańcnońć i we zokach
Piyrwyj boło fest wesoło.

[broneknotgeld]

Erna
-----

Czy skiż tego pseudonima
w "Kole familoka" ni ma?

[broneknotgeld]

Bolek
------

Z pseudonimym abo bez
Kaj familok kunszt tyż jest.

[broneknotgeld]

Hyjdla
-------

"Acik" wirsz "biblijny" doł
Pewno prawie tako chcioł
Coby w raju być z lirykom
Jo tyż tam kaj Edyn blikom.

[broneknotgeld]

Berbel
------

"Agnes" zdo sie lamyntuje
Richtig gdowom tako czuje?
Już ślubnego pochowała
Jo tyż slimtom kej mu pszała.

[broneknotgeld]

Lyjo
-----

A "Berała" - pszaje wiela
Czy mo w doma "świynto frela"?
Tako sie go prawie wziyła
Choć - czy zocnie utrefiyła?

[broneknotgeld]

Erna
------

"Dziołcha łod bergmona" po swojymu prawi
Ano - szczyro prowda w swojich strofach jawi
Chop robi na grubie - łona mu fest pszaje
Jak jyj mamuliczka łojcowi - niy baje.

[broneknotgeld]

Bolek
------

Czy "Francik" za Francka coś szkryfnoł ciekawie?
- Wspomino zolyty lirykom se prawie
Trzidziści lot nazod - sie wtedy trefiyli
Ech, my tyż jak łoni ździybko młodsi byli.

[broneknotgeld]

Hyjdla
-------

"Kiki" niy przepomni tego
Co tref przinios jyj zocnego
Dyć skiż bliźnich tako stało
Modrym kwiotkym zawoniało?

[broneknotgeld]

Berbel
--------

A jo prawie czytom "Male"
Sie niy tropia teroz wcale
Uierzyłach - kej pszajymy
Wiyrchym tako durś stojymy
Czowiek zdo sie siyngać Nieba
Pszoć nom wiela ciyngym trzeba.

[broneknotgeld]

Lyjo
-----

Kej jo czytom tam "Marcela"
To zarozki sie wesela
Szejk, niy szejk - radościom życie
Pewno już to sami wiycie.

[broneknotgeld]

Bolek
------

A "Serce"? Matula tak yno poradzi
Pszoć dziecku - z lirykom to wcale niy wadzi
Wiersz krotki, dyć kunszt w niym i serca dość wiela
Pewno niyjednego cieszy rodziciela.

[broneknotgeld]

Hyjdla
--------

"Szarotka" erotyk se szkryfnoł - szkryfnyła
Toż "grajdoł" wspomino w kerym frelka była
Z karlusym pospołu, a słonko ich grzoło
Dyć jako skończyło? -Dzisioj im wesoło?

[broneknotgeld]

Erna
-----

"Ślonzok" doł coś prawie ło swojim "hajmacie"
Teroz mu Niymcowi prziszło godać - bracie
Dusza zdo sie czyńściom na Ślonsku łostała
Rozdarto? -Sie tako w tym wierszu zdowała.

[broneknotgeld]

Bolek
------

A "Tomek" popyloł jakby we klasyka
Możno mioł we gowie z Litwy romantyka?
Jako marnotrawny synek wspomnioł Muter
I zdo sie co wcale niy darymny futer.

[broneknotgeld]

Berbel
-------

Niy "darymny futer" - kuknijcie na noty
Możno konkurs wygro - niy ma w tym gupoty.

[broneknotgeld]

Lyjo
-----

No, sie tukej łosprowiomy
-Kej na wontek noty domy?
Sie niyjedyn tymu dziwo
-Durś jurorow tam przibywo.

[broneknotgeld]

Bolek
------

Durś przibywo, bo promuja
Jurorami fest raduja
Ze tym forum piyknie rośnie
Jo zaś kukom tam radośnie.

[broneknotgeld]

Erna
-----

Bolek - jo już noty dała
Tako prawie jako chciała
Inkszych wiela tyż na wontku
A ty siedzisz we tym kontku.

[broneknotgeld]

Bolek
-------

Dyć niy "siedza" - brify śla
Prawie tako richtig trza
W komyntarze tkom, na fora
Ślonsko godka to niy zmora

Durś promuja tak kaj Ruda
A kaj noty widza "cuda"
Wiela ich ze Rudy dowo
Mi promocjo niy przistowo

Forum "klasowiczow" zbiyro
Co rusz nowy ktoś zaziyro
Sztela ze tym fest urośnie
Zdo sie - idzie już ku wiośnie.

[broneknotgeld]

Ignac
------

Lecom z Rudy yno noty?!
Bolek - niy tkej tu gupoty!
Z inkszych miejscowości widza
Twojom Rudom sie niy biydza.

[broneknotgeld]

Bolek
-------

Dlo mie prawie to jest piyknie
Kej rudzianin w wontek kliknie
Ze stolicy ślonski fraszki
Potrza przeca tyż igraszki

Bestoż wcale mie niy mynczy
Dołbych łod sia możno wiyncy
Yno czasu mom za mało
By sie go mieć fol durś chciało.