Ło Warmii i Mazurach

[broneknotgeld]

Toż Małopolska downo tu momy
Tyż Wielkopolska no i Pomorze
Ślonsk cołki - przeca go dobrze znomy
Nawet Mazowsze we godce - Boże

Warmii i Mazur jednak brakuje
Feler to wielki i czas z tym skończyć
Niych rym ło zocny ziymi sie suje
Choćby skiż tego ktoś chcioł zaś "bronczyć".

[broneknotgeld]

Dyć wontek bydzie zaś dubeltowy
Niych internauta se ło tym dowiy
forum.gazeta.pl/forum/72,2.html?f=64&w=15994312
Zowdy łodbija w glacy co szkryfna
I se na Olsztyn rym ślonski gichna.

[broneknotgeld]

Możno pomoże ktoś w ty zabawie
Bych som niy musioł szkryflać tu prawie
Dyć na Mazury Ślonzokow ciongnie
Ktosik we wontek z czasym se wprzongnie.

[broneknotgeld]

Czy prawdziwych Mazurow już niy ma?
Możno z Niymiec se wrocom w ta ziymia.

[broneknotgeld]

Kraina Tysionca Jezior

Prowda to? -Joch nigdy tego niy rachowoł
Dyć możno recht we tym - tako mi sie zdowo.

[broneknotgeld]

Możno trefia na "kartacze"
Lepsze niż "pasztety kacze".

[broneknotgeld]

Warmio, Mazury - komu to wadzi
forum.gazeta.pl/forum/72,2.html?f=64&w=15994312&s=0
jak se i Ślonzok tako paradzi?

[broneknotgeld]

Dyć tam te Giżycko jest!
Sie kamraci z Rudom fest?

[broneknotgeld]

Mono tukej kuknie ktory
Latoś w modzie te Mazury.

[broneknotgeld]

Co we Polsce bardzi w zocy
We Mazurach wiela mocy.

[broneknotgeld]

Do Cyfusa "ślabikorza"
mojemazury.pl/125744,Moja-Warmia-moje-zycie-czyli-Edward-Cyfus-od-kuchni.html
Pewno kedyś kuknońć woża.

[broneknotgeld]

Warmińsko godka
pódzie do przodka?
www.wochenblatt.pl/index.php/wiadomosci/kultura/item/2090-olsztyn-nowa-ksiazka-o-starym-jezyku

[broneknotgeld]

"Warmia i Mazury" Erwina Kruka

Se tako ksionżka chca wom polecić
Możno se udo z niyj fraszki sklecić.

[broneknotgeld]

U Ptolemeusza

Galindy Sudowy u Ptolemeusza
To pruske plemiona - szkryfnońć tako musza
Dwa tysionce lotek tymu tukej byli
Choć pisma niy znali - po swojymu żyli.

[broneknotgeld]

"Bruzi"

"Geograf bawarski" tako już napisoł?
Ze "Bruzi" do "Prusi" czowiek pryndko prziszoł.

[broneknotgeld]

Nad jeziorym Orzysz

Wele Orzysza kurhan łodkryli
Wiedzom że tukej Galindy żyli
Była to prawie ty ajzy era
Mo archeolog uciecha teraz.

[broneknotgeld]

Truso

Legyndarne Truso Wulfstan już łopisoł
Dlo Wikingow cosik łone tyż znaczyło
Teroz archeolog na te miejsce prziszoł
We jeziorze Druzno miano se ukryło.

[broneknotgeld]

Niy znali wina

Niy znali wina - kumys lubieli
Niym fajrowali we pruski szteli.

[broneknotgeld]

Świynty Wojciech

Prziszoł biskup Wojciech do Prusow ze krziżym
Dyć ze kraju w kerym widzieli tyż wroga
Niy chcieli ze Bolkym pewnikym być bliży
I niy rozumieli "Jedynego Boga"

Zginoł Adalbertus na ty pruski ziymi
Chrobry zaś łodkupioł mynczynnika ciało
Historyjo tako ło kery my wiymy
Tysionc lot ze hokym tymu to sie stało.

[broneknotgeld]

Czyja wina?

Porzondliwym łokym Piasty zoglondali
Na Bałtow łodwieczno ta przeca dziedzina
Niy z krziżym to z mieczym se tu wyprowiali
Bydymy sie wadzić z kery strony wina.

[broneknotgeld]

Szaniec Prusow

Znosz szaniec kaj Śniardwy i jezioro Tyrkło?
Myśla co tu serce Prusa nawet pynkło
Przeca tyż zrobiyli niyjedne powstanie
Możno łod tych czasow tukej jejich szaniec.

[broneknotgeld]

A Długosz

Długosz na Prusach nudle se wiyszoł
Ło łożyrokach cosik namiyszoł
Szkryfnoł że co dziyń se tu kompali
By słepać mogli zarozki dali

Toż niy mieściyło sie w jego gowie
Że chcioł być czysty tyn pruski czowiek
Pewno w Krakowie było inaczy
Tela tyn zapis Długosza znaczy?

[broneknotgeld]

Prusowie

"Lud srogi i okrutny" - pisoł Długosz tako
Zowdy ło poganach szkryflali jednako
Dyć pruske plemiona chciały żyć szczyńśliwie
Niy było to dane w historyji dziwie.

[broneknotgeld]

Biskup Chrystian

Chrystian mioł we misji dość dobre wyniki
Na krziż zoglondali pruske naczelniki
Surwabuno Warpode już Krystusa znajom
No a Chrystianowi mitra nakłodajom
W tysionc dwiesta piytnostym roku se to stało
Rzym tyż sie dziwowoł podobnoś niymało.

[broneknotgeld]

Bałtowie Zachodni

Prusy i Jaćwingi to już historyjo
Mieli z somsiodami pierońsko mecyjo
Dyć łoni Krziżokow na kark im ściongnyli
Terozki szkryflomy co kedyć tu żyli.
--

[broneknotgeld]

1222 - 1223

Chrystian z Konradym wyprawiy wiydli
Tako z Pomorza krziżowcy
W końcu se Prusom richtig łobrzidli
Przeca niy chcieli grać "owcy"

Bestoż wybrali sie na Pomorze
Mazowsze tyż łoberwało
Piosek w klepsydrze lecioł - łoj Boże
Nojgorsze na nich czekało.

[broneknotgeld]

Tako było

Papiyż Chrystianowi nakozoł krucjaty
By łokrzcioł te ziymie choćby i na raty
Zakony go miały we tym nawet wspiyrać
Bardzi dlo Kościoła niż do sia zabiyrać

Dyć ło tym już wiymy - inaczy sie stało
Ło cudze Krziżakom bić sie tyż niy chciało
Kaj mieczym i łogniym znak krziża pokładli
Tam tyż Prusow z ziymi normalnie łokradli

Ze rynkom w nachtopie teroz tyż Poloki
Myśleli co zyszczom - wyszło że boroki.

[broneknotgeld]

1230

Już Herman von Salza - Wielki Miszcz Zakonu
Ze ksiyńciym Mazowsza Konradym sie zgodoł
Zadboł tyż ło wsparcie papiyskiego tronu
Niym rozkaz "Na Prusy" rycerzom swym podoł

We Ziymi Chełmiński se nojpiyrw stanyli
Łoni z wojowanio przeca ciyngym żyli
Pokozali Prusom jako jejich siyła
Dyć i Polka na tym cosik utraciyła.

[broneknotgeld]

Herman von Balk

Miszczym Krajowym karlus tyn był
Dyć loł tych Prusow ze wszyskich siył
Kaj wrazioł mocno tyn czorny krziż
Już grod warowny przeca to wiysz
Kwidzyn i Elblong Bałga tyż inksze
Jedne dość małe nikere wiynksze
Już tu niy stykło sie łokrzcić yno
Zakon ło wszysko se dopomino
Łon "panym" życio i śmierci jest
Toż autochtonow umynczoł fest.

[broneknotgeld]

1242

Prusowie se dźwigli - wybuchło powstanie
Zaś tu krew i łogyń na lata łostanie
Świyntopełk pomorski tyż pomoc im doł
We końcu i jymu tyn Zakon fest wloł
Skończyło sie wszysko "christburskim pokojym"
Dyć rycerz zakonny dali mocno stoji.

[broneknotgeld]

1249 Christburg (Dzierzgoń)

Prusowie co piyrwyj sie tukej łokrzciyli
Jakby z tym pokojym ździybeczko lżyj żyli

Dyć przeca na wiela im sie to niy zdało
Nawroconym pryndko ciynższe jarzmo dało.

[broneknotgeld]

1243

Niym jeszcze Prusow cołkym podbiyli
Sztyry biskupstwa już wykrojyli
Z bullom papiyża Innocentego
Dyć ze tym mianym przeca szwortego.

[broneknotgeld]

Sztyry

Pomezańskie tyż chełmińskie
Sambijskie i te warmińskie
Toż biskupstwa teroz sztyry
Dyć niy Prusow to som "gyry".

[broneknotgeld]

Dzielom skora na niydźwiedziu

Mieli to wszysko dzielić na czi
Dwa dlo Zakonu - jedyn "dlo mszy"
Prusom niy miało łostać już nic
To jedno we tym pewne - toż wiydz.

[broneknotgeld]

W diecezjach

Dwie czecie ty ziymi noleżne Krziżokom
Reszta dlo Kościoła - co pruskim borokom?

[broneknotgeld]

1260 -1274

Miyndzy Niymnym a Wisłom zaś teroz powstanie
Nojwiynksze co było we tym pruskim stanie
Krziżoki po rzici wiela łoberwali
Z pomocom Europy jednak wyczimali

Prusoki ze Litwom mieli w tym przimierze
Bo łoba narode we pogański wierze
Łostatni ty ziymi to jyż "zryw wolności"
Terozki w niywola pódom "ludzie prości".

[broneknotgeld]

Harkus Monte

Natangow do boju tyn Harkus prowadzioł
Przeca bić Krziżakow pierońsko poradzioł
W Magdeburgu take pobiyroł nauki?
Ci łod Helmericha przi niymu to tuki.

[broneknotgeld]

Pod Lubawom

Pod Lubawom Harkus fest Krziżakow pobioł
Ze wojsk Helmericha łon se nic niy robioł.

[broneknotgeld]

Skomand

A Skomanda znocie? Jaćwingow wiod wiela
Aze se zdowało - niy krziżacko sztela
Przeca sie pokozoł pod Toruniym z niymi
Doprze że my dzisioj cosik ło tym wiymy.

[broneknotgeld]

W Pomezanii

Nawet w Pomezanii było te powstanie
Toż se Kwidzynowi przi tymu dostanie.

[broneknotgeld]

Diwan Klekin

Ze Bartow chca wspomnieć Diwana Klekina
Spustoszoł łon przeca chełmińsko dziedzina.

[broneknotgeld]

1274

W tym roku upadło dyć Prusow powstanie
Terozki niywola na wieki nastanie
Europa rycerzy Zakonowi słała
Toż sie jego siyła ciyngym łodnowiała.

[broneknotgeld]

1283

Toż ziymie Nordowii Skalowii Jaćwieży
Cołkym już podbite - możecie mi wierzyć.

[broneknotgeld]

Pyjter z Dusburga

Karlus podboj Prusow w tych latach łopisoł
Choć możno przi tymu tyż cosik namiyszoł
Momy relacyjo yno z jedny strony
Jako ze ty drugi - tego niy poznomy.

[broneknotgeld]

"Neronis imitatores"

"Naśladowcy Nerona" tako ich tyż zwali
Bo sie z ludym Prusow niy patyczkowali
Nawroconych możnych ździybko w zocy mieli
Dyć reszty niywola czekała w ty szteli.

[broneknotgeld]

Krzysztof Hartknoch 1644-1687

W Gimnazjum Toruńskim karlus rechtorowoł
Swy ziymi wypszony historyjo dowoł
Dyć wele Pasymia w Jabłonce rodzony
Ze dziejami Mazur richtig pogodzony.

[broneknotgeld]

1307

Wenecjo już Miszcza Krziżakow żegnała
Pewno płakać po niym wcale niy musiała
Dyć w tym roku Malbork wiela se radowoł
Feuchtwangena przeca siedzibom sie stowoł
Stolicom Zakonu - ziym pruskich podbitych
Zamkym-twierdzom wielkom - tref "niypospolity".

[broneknotgeld]

uż Feuchtwangen

Już Feuchtwangen zrobioł swoje
Wpiyrw ło "jynzyk" toczoł boje
Kary kłod na tych co chcieli
Pruskim godać w jego szteli

Sprusieć tukej żodyn niy mog
Taki Miszcza był w tym wymog
Przeszło sto lot trza dyć było
Niym se "pruski" wytympiyło.

[broneknotgeld]

Winrych von Kniprode (1352-1382)

Za jego czasow niymiecki wszyńdzie
Łacina zniko nawet w urzyńdzie
Pruski se tracioł - przegrano godka
Jedna leciała yno do przodka.

[broneknotgeld]

Los powstańca pruskego

Zowdy niywola go tu czekała
Katorga kero skrocała życie
Niyjedna twierdza na tym powstała
Pot krew w kamiyniu - przeca to wiycie

I cegła z tego czerwono bardzi
Zamki kościoły jakby krasiyła
Zakon choć Prusym pierońsko gardzi
Z jego roboty biere swo siyła.

[broneknotgeld]

Niy wytli

Po prowdzie Prusow niy wytli w piyń
Dyć świat im zdoł sie jakby tyn ciyń
Niymiec czy Litwin abo tyż Polok?
W czi strony ciongnoł tyn "pruski bolok".

[broneknotgeld]

Niymcy w Prusach

Zdo sie co ciynko ziymia pokryli
Tym bracteatym tu jakby byli
Ze jedny strony bardzi blyszczeli
Drugom se asić przeca niy chcieli.

[broneknotgeld]

Zwionzek Pruski 1440

Zakon uciskoł szlachta i miasta
Toż chcieli pedzieć już tymu - basta
We Zwionzku Pruskim siyły zbiyrali
Bo już niy chcieli żyć tako dali.

[broneknotgeld]

Rod Skolimow

Prywatno wojna mieli z Zakonym
Zdo sie - Mars sprzijoł pierońsko łonym
Zwionzku Pruskego staraniym przeca
Niyjedyn komtur "wylecioł z neca".

[broneknotgeld]

Toruń 1466

Toruniu - wojna ty teroz przetni
Ciynżki był czas tyn czinostoletni
Toż cosik przinios jednak tyn boj
Bo historyjo pedziała - kroj

Prusy Krolewske - Zakonne tyż
Krolewiec rośnie - już teroz wiysz
Stolicom państwa dyć zakonnego
Zdo sie - czas lepszy prziszoł do niego.

[broneknotgeld]

Wojna 1519-1521

Skiż hołdu wojna terozki tukej
We niyj upadku Zakonu szukej
Krziżaki skarbiec se wyczyściyli
Ziymiom żołd panom czynsto płaciyli
Aż w końcu ściepli "zakonne szatki"
Toż Hohenzollern princ teroz gładki
Chocioż uklynknoł w końcu w Krakowie
Dyć cosik erbnoł ze tym tyn czowiek.

[broneknotgeld]

Hołd Pruski 1525

Dlo nos łon ciyngym wizjom Matejki
W niyj Zygmunt Stary zdowoł sie Wielki.

[broneknotgeld]

Albrecht Hohenzollern

Na Brandynburgii no i na Prusach
Mocno se zicnoł - to szkryfnońć musza
Na protestantyzm tyż łon postawioł
Zdo sie przi tymu co wiynkszym jawioł.

[broneknotgeld]

Godka prusko (XVI w)

Przi protestantach jakby coś blysła
Dyć w końcu cołkym z użycio wyszła
W Sambii i Warmii tako godali
-Możno ciut dłuży zapominali.

[broneknotgeld]

Diecezjo Warmińsko (1243)

Diecezjo Warmińsko nojwiynkszo we Prusach
Ziymie Bardow Galindow wspomnieć tukej musza
Pogezanow i Warmow z kerych miano wziyła
Siedziba biskupow zowdy w Warmii była
Z czasym Warmiom zowiom cołko diecezyjo
Prusow już niy było toż na co mecyjo.

[broneknotgeld]

Biskup Anzelm

Piyrszy na stolcu warmińskim siedzioł
I zdo sie - dobrze łon ło tym wiedzioł
Że trza na Zakon fest pozor dować
Choć przeca niy mog z niymi wojować.

[broneknotgeld]

Biskup Paweł Lagendorf

Rok se tym stolcym biskupim cieszoł
Za mało nawet by coś nagrzeszoł
Pruski rod Stango karlusa nosioł
A Jagiellończyk na Warmio prosioł
By diecezyjo przi krolu czimoł
I ze Zakonym konszachtow niy mioł.

[broneknotgeld]

Biskup Łukasz Watzenrode (1447-1512)

Przi niymu Warmio kwitnońć sie zdowo
Gowa mioł karlus niy łod parady
Toż skiż Korony nadzieja nowo
Zdo sie - tyż myni tukej jest zwady.

[broneknotgeld]

Ono ujek

Watzenrode ujkym był łod Kopernika
Toż mu prziszykowoł fara kanonika.

[broneknotgeld]

Biskup Maurycy Ferber

Warmio pamiynto to biskupowi
Że wydoł wojna jakby Lutrowi
Hohenzollerna tym wnerwioł chyba
Dyć ze Ferbera niy jakoś ryba.

[broneknotgeld]

Indygynat pruski?

We Prusach Krolewskich był gwarantowany
Dyć zdo sie - na zowdy wcale tu niy dany
Niyroz to Koronie właziyło do gowy
Wcisnońć tam swojego kaj mioł być miejscowy.

[broneknotgeld]

Biskup Jan Dantyszek (1538-1548)

Dziesiyńć lot biskupstwo w swojich rynkach czimoł
Zdowało sie tukej że nigdy niy drzymoł
Niy dość że poeta z niego wielko był
Diecezjo durś dźwigoł z cołkich swoich siył

Toż łon kanonikom kozoł sztudiyrować
Na kultura ciyngym chcioł tyż pozor dować
Dboł ło bibliotyka, zbior malarstwa zocny
I w dyplomacyji Dantyszek był mocny.

[broneknotgeld]

Biskup Thiedemann Giese (1549-1550)

Łostatni "miejscowy" na stolcu biskupa
Zdo sie - już Korona wyloła ta "zupa"
Terozki swojymi se w ty Warmii "warzy"
Toż Polokom ciyngym ta fara sie marzy.

[broneknotgeld]

Biskup Stanisław Hozjusz

Już Polska swojego biskupa tu dała
Ło indygynacie cosik zapomniała
Karlus sie z niymiecki familijo wodzioł
Rodzony w Krakowie Koronie dogodzioł

Z niym kontrreformacjo mocniejszo w tych stronach
Do nauki Lutra niy mog se przekonać
Jezuitow pryndko tyż tukej sprowadzioł
Som z protestantami by se niy poradzioł.

[broneknotgeld]

Biskup Marcin Kromer

Już indygyna tukej niy bydzie
Zowdy z Korony nominat przidzie
I choć niy tykom se jo Kromera
Coś mie przi tymu biere cholera

Dyć co sie tyczy tego biskupa
Szłoby tu szkryfnońć ło niym tyż kupa
Warmii ze stolca swojego bronioł
Zdo sie przed Polskom nawet jom chronioł.

[broneknotgeld]

Dziejopis Marcin Kromer 1512-1589

Zocny dziejopis dwou w Krakowie
Toż Jagiellonow łoddany czowiek
Biskupym w końcu zostoł w Lidzbarku
Była ta Warmio na jego karku.

[broneknotgeld]

W biskupich dobrach gracjalnych

Chnet kożdy biskup niy indygyna
Ściongoł tu swoja tyż familijo
A jako monka ze tego "młyna"?
-Warmia poleku jak kolanijo.

[broneknotgeld]

Prusy Ksionżynce

Piyrsze to państwo w cołki Europie
Kaj sie na Lutra tezy niy "kopie"
Princ Albrecht polskim lynnikym łostoł
Dyć wolno rynka we Prusach dostoł.

[broneknotgeld]

Krolewiec 1544

Dboł Hohenzollern ło swo stolica
Chcioł by gryfniejsze durś miała lica
Toż uniwerek tukej wystawioł
By uczoł ale tyż przeca sławioł.

[broneknotgeld]

Mazury

Mazury z Mazowszo prziszli
Dyć skiż wojny stond tyż wyszli.

[broneknotgeld]

Ło mazurskości

Ło mazurskości jako tu prawić
W szesnostym wieku zaczła sie jawić
Czynsto siyngomy w wiek dziewiytnosty
Dyć z niom jest problym - richtig niyprosty

Łod Prus Ksionżyncych zdo sie to idzie
Z wangelikami we zgodzie bydzie
Polski ze pruskim se razym zmiyszo
Niymiec dołoży - nudli niy wiyszo.

[broneknotgeld]

Przi Hohenzollernie

Przi Hohenzollernie Krolewiec to zyszczy
Że polskościom jakby teroz bardzi blyszczy
Albrecht reformacjo wspiyroł we Koronie
Dyć i katolikom niy powiedzioł - koniec.

[broneknotgeld]

W Krolewcu i Ełku (1543-1552)

Wiyncy tu ksionżek polskich drukujom
Niż w cołki Polsce - to forszelujom?

[broneknotgeld]

Dlo Arian

Kontrreformacjo w Rzeczpospolity
Prusy dlo Arian krajym łodkrytym.

[broneknotgeld]

Prusy ze Szwecyjom

We Prusach Ksionżyncych niy było wesoło
Jak sie wojsko szwedzke na Polska wyloło
Brandynburczyk zgodoł sie ze krolym szwedzkim
I doszło skiż tego w tych stronach do sieczki

Toż Gosiewski prziszoł razym z Tatarami
Pokozoł co umioł w bitwie pod Prostami
Tysionce poległy - tysionce w niywoli
Mor zabroł nojwiynce - serce z tego boli.

[broneknotgeld]

Traktat welawsko-bydgoski 1657

Prusy skiż wojny fest uciyrpiały
Fryderyk Wilhelm jednak mioł profit
"Wielki Elektor" wpiyrw "lynnik mały"
Dostoł nagroda - niy coś ze sztrofy

Już hołdu skłodać przeca niy musi
Prus Brandynburgii pan absolutny
Zdo sie tyż wiynkszo rola go kusi
Downiejszy wasal teroz fest butny.

[broneknotgeld]

Krolewiec 18.X.1663

Hołd złożyły pruske stany
Władca "z boży łaski dany"
Dziyń "Wielkego Elektora"
Absolutyzm - tako pora.

[broneknotgeld]

Edukacjo w Prusach

Piyrsze państwo we Europie co lud kształcić chciało
No i przeca na ty drodze zrobiyło niymało
Pryndko co wpiyrw tukej polske szło we zapomniynie
Geld kariera inkszy profit - niy mynczy sumiynie.

[broneknotgeld]

Samuel Przypkowski (XVI w)

Samuel przypkowski osiod w Kozinowie
Toż ze Braci Polskich richtig zocny czowiek
Ściongali do niego Z Korony ariany
Dyć w Polsce już niy mog być spokoj im dany.

[broneknotgeld]

Fryderyk von der Groeben (1645-1712)

Fater sie ksiyńciu tukej sprzeciwioł
Toż nikt synowi se tyż niy dziwoł
Że z regimyntym swojym pod Wiedniym
Druh Sobieskiego zdo sie łon przedni.

[broneknotgeld]

Jan Władysław Suchodolec (1687-1751)

Kartograf fater - inżynier syn
We tym woda już na ichni młyn
We Wyngorzewie wodociong przeca
Zdo sie co wyloz ze jego neca
Wyregulować Wisła planowoł
Kanały "Wielkim Jeziorom" dowoł.

[broneknotgeld]

Komornictwa

Biskupstwo Warmińske tako se dzielyło
Aż dziesiyńć komornictw przeca we niym było
Siedym czimoł biskup mocno w swoji rynce
Czi zaś kapituła - czy przez to we mynce?

[broneknotgeld]

Frombork Pieniężno Olsztyn

Toż te komornictwa czimie kapituła
Myni tu znaczyła łod biskupa stuła.

[broneknotgeld]

Warmiński synator

W Koronie zesel mioł synatora
Ze "wysokego" przeca był "wora"
Tyn co w lidzbarskim zamku se siedzioł
Trza byś i ło tym czowieku wiedzioł.

[broneknotgeld]

Biskup Szymon Rudnicki (1605-1621)

Tymu przi dworze stykło być prawie
Sakra biskupio dostoł w Warszawie
Ło swe owieczki jednak fest dboł
I Świynto Lipka we zocy mioł

Gościoł w Lidzbarku brandynburczyka
Dyć to chca wciepnońć tyż do koszyka
-Łon po niymiecku wcale niy umioł
Szczyńściym elektor go wyrozumioł.

[broneknotgeld]

Stefan Sadorski (XVII w)

Przi krolu polskim sekretarzowoł
Dyć wiela łod sia Warmii tyż dowoł
Dboł ło ta ziymia kaj mioł majontek
Chcioł ciyngym dźwigać tyn zocny kontek

[broneknotgeld]

"Potop"

Kaj Karol Gustaw wpiyrw mioł kwatera?
-Wybroł se Frombork - jasno cholera
I brandynbuczyk po jego stronie
Toż sie zdowało że z Polskom koniec

Fest kapituła wtedy ciyrpiała
Łogołocono cołkym bez mała
Dyć jak już Szwedy wyleźli z "wora"
Warmio we rynkach jest elektora

Stropiono ciyngym biskupio dusza
Doczkała w końcu - szkryfnońć to musza
Po łośmiu latach djecezji wolny
Czas ze tym prziszoł bardzi spokojny.

[broneknotgeld]

Mor w Prusach 1709-1711

Ano toż prziszły czasy zarazy
Godali - "skuli boski łobrazy"
Dyć mor wzioł cosik dwiesta tysiyncy
Toż niy dziwota że ziymia jynczy
I zdo sie woło ło nowych ludzi
Przeca chce życie nazod łobudzić

Prziszli z Salzburga Nassau Szwajcarii
Na prusko ziymia jednak sie garli
By zaś wydała swoj nowy plon
I niy pedziała nikomu - won!

Kanał Elbląski

[broneknotgeld]

Kanał Warmiński

Ze takim mianym
Tyż czasym dany.

[broneknotgeld]

Kanał Elblonsko-Mazurski

Ano - co chcecie?
Tyż prowda przecie.

[broneknotgeld]

Kanał Staropruski

Prusow downo niy ma
Niy jejich już ziymia.

[broneknotgeld]

Kanał Ostródzko-Elblonski

Tako zowdy zwać go pódzie
Jak bydziecie we Ostródzie.

[broneknotgeld]

Kanał Elblonski

We Elblongu majom recht
Po co łazić z tym na fecht?

[broneknotgeld]

Kanał Elblonsko-Ostródzki

Stare Jabłonki kaj? A Iława?
Ze Miłomłynym tyż tako sprawa.

[broneknotgeld]

Kanał Elblonski!

Coby ze prowdom na wiyrchu stować
Wystyknie yno tako mianować.

[broneknotgeld]

Na muster "Morris"

Mustrym był kanał hamerykański
Co dzisioj zdo sie jakby cygański
Bo przeca z cołkym nowom technikom
Tu na historio i tako blikom.

[broneknotgeld]

82 km

Ze elblonga do Ostródy kilometrow tela
Dyć se niychej ci niy zdowo że to cołko sztela.

[broneknotgeld]

129,8 km

Tela kilometrow kanału zrachujesz
Tyż ze łodnogami - przeca forsztelujesz.

[broneknotgeld]

1860-2010 Gyburstag Kanału Elblonskego

Za sztyry roki gyburstag przidzie
Jako fajrować ta sztela bydzie
Możno czas ło tym pomyśleć prawie
By niy skończyło sie na zabawie.

[broneknotgeld]

Jakub Georg Steenke

W kanale "Morris" już muster mioł
Dyć przeca dzieło take nom doł
Co aże dzisioj cudym sie zdowo
Kunszt Steenke światu durś na wiyrch stowio.

[broneknotgeld]

2310 m po glajzach

Tela po glajzach se "popływajom"
Toz richtig we tym radocha majom.

[broneknotgeld]

"Canal Trophy"

Wiela uciechy piyrwyj z tym było
Na bele czym s4e go przepłynyło
Mozno tradycjo wroci se jeszcze
Przi gyburstagu? Ano - w to wierzcie!

[broneknotgeld]

Kanał Elblonski 1860

Gyburstag chnetko bydzie mioł zocny
Kanał Elblonski do dzisioj zocny.

[broneknotgeld]

Kanał Oberlandzki

Oberlandu miano dzisioj zapomniane
Dyć ze tym kanałym piyrwyj kuplowane.

Mazury Garbate

[broneknotgeld]

"Mazury Garbate"

Po ślonsku szkryfnońć - bydom "puklate"
Jedno jest pewne - niy som sagate
Choć je tyż czasym "Alaskom" zwom
Teroz we gowie je prawie mom.

[broneknotgeld]

Kaj łone?

Puszcza Romnicko tako Borecko
Wiy ło nich możno i nawet dziecko
A te "Mazury Puklate" kaj?
Dyć miyndzy niymi to zdo sie raj
Wele Gołdapi mosz Szeske Wzgorza
Ty ziymi lepsze czasy jo wroża.

[broneknotgeld]

Śniyg

Śniyg mazurski dugo leży
Niy trza jechać by uwierzyć
Se do puszczy tyż weź narty
Bez biegowek to niy żarty.

[broneknotgeld]

"Alaska"

Mazury zimom tyż przeca piykne
Tako "Alaska" zdo sie wystyknie
Na Piykno Gora zowdy bier narty
Sztela mo przeca i take "karty".

[broneknotgeld]

"Tatarsko Gora"

Aszom se tym parkym Mazury Garbate
We dziko zwierzyna ziymie przebogate
W Polsce tu hodowla nojwiynkszo takowo
Możecie mi wierzyć terozki na słowo.

[broneknotgeld]

Marale

Ałtajskim Jelyniom jedynym w Europie
Na Tatarski Gorze podziwej se chopie.

[broneknotgeld]

Tadeusz Rudziewicz

Skuli pomyślunku jego
Choć i geldu tyż trza było
Zoo-safari tu istnego
Sie Mazurom przitrefiyło.

[broneknotgeld]

Bezkrwawe Safari

U Rudziewicza w dżipie se siedzi
I tako wjyżdżo w środek gowiedzi.

[broneknotgeld]

Pynsjonat "Bioły Dwor"

Tego szukej w Dubiennikach
Kuszom skoki we Stańczykach.

Gołdap

[broneknotgeld]

Gołdap-Zdroj

Ponoć luft nojczystszy tukej
W cołki Polsce już niy szukej
Bestoż płuca se kurujom
Ci co dychawica czujom.

[broneknotgeld]

Zdroj

We warmińsko-mazurski terozki dziedzinie
Miano take yno Gołdapi niy minie.

[broneknotgeld]

Na nerwy

Nerwy słabe - do Gołdapi
Tam niy yno nic niy capi
Zdo sie dusza tyż ukojisz
Profit - życio se niy bojisz.

[broneknotgeld]

Kant w Gołdapi

We Gołdapi Kant przebywoł
Pomnik jego tu niy dziwo.

[broneknotgeld]

W Gołdapi

Niy zapomnij tego wdycki
Że przi puszczy jest Romnicki
Ano - zicnij se na koło
Popyndaluj tam wesoło.

[broneknotgeld]

Na Piykny Gorze

Na Piykny Gorze stare grodzisko
Żodyn z Jaćwingow już tam niy miyszko
Dyć wiater cosik szumi ło Prusach
Wsłuchać se kedyś w to richtig musza.

[broneknotgeld]

Poszli we tany

Gołdap z Gołdapom poszli we tany
Tako Gołdapi poczontek dany.

[broneknotgeld]

Spływ Gołdapom

Z jeziora rzekom aż do Rożyńska
Cie na tym konsku niy czeko klynska
Dalo - do Wrobla już gorzi bydzie
Szczimież - toż radość ze tego przidzie.

[broneknotgeld]

"Janczes" - Gołdap

Tukej liny we śmietanie
Toż jeronie - leca na nie!

[broneknotgeld]

W restauracyji "Janczesu"

Kartacze z krautym tyż tukej zjym
I niy za drogo - dobrze że wiym
We samym środku Gołdapi przeca
Bestoż na łobiod drapko tam leca.

[broneknotgeld]

"Janczes" - łogrodek letni

Łogrodek letni - zupa grzibowo
Golonko z krzonym podjym se zdrowo
Wszysko zaś biyrym zocnym zapija
No toż zarozki wiym że jo żyja.

[broneknotgeld]

Narciarski Bieg Jaćwingow

Co roku w styczniu kaj Piykno Gora
Gołdap to przeca niy jakoś dziura.

[broneknotgeld]

Zajazd "Pod Piyknom Gorom"

Komu kartacz zasmakuje
Tu se pympkym świata czuje
Wiela łon dyć przeca znaczy
W Cyntrum Smakoszy Kartaczy.

[broneknotgeld]

"Kartaczewo"

Połowa siyrpnia - świynto kartaczy
W Gołdapi kożdy se tym łonaczy
To wtedy zdo sie tu pympek świata
Trza jeszcze czekać mi tego lata.

[broneknotgeld]

"Pod Piyknom Gorom"

Te "Kartaczewo" w zajeździe takim
Toż łobżarciuchy - szykować smaki!

[broneknotgeld]

"Leśny Zakontek"

W "Lesnym Zakontku" nad samom wodom
Dychniesz se dobrze - tela ci godom
Ździybko portmanyj uciyrpi na tym
Dyć geld trza wydać tyż do wypłaty.

[broneknotgeld]

Dom "Pod Dzikom Różom"

Na d rzeczkom i przi jeziorze
Trza polecić teroz może
Niy za drogo z familijom
Choć problym z restauracyjom.

[broneknotgeld]

Skiż Gryfny Góry

Do Gołdapi jedź na narty
We Garbate te Mazury
Richtig wypad tego warty
Choćby skiż ty Gryfny Góry

[broneknotgeld]

Gryfno Gora (272 m n.p.m.)

Narty ci tu pożyczajom
Przeca wszyskim tako pszajom
Kierzy geldu coś łostawiom
I na śniegu sie zabawiom.

[broneknotgeld]

Niy musisz

Jak cie umynczy stok Gryfny Góry
Bar ciepły w dole pokusi
W kominku łogyń rozjaśnio chmury
Drapko stond wylyżć niy musisz.

[broneknotgeld]

X Miyndzynarodowy Konkurs Krzikoczy

Larma w Gołdapi dzisioj za wiela
Karlus to wygro czy możno frela?

[broneknotgeld]

Ogolnopolski Zjazd Internowanych i Represjonowanych
23-24.IX.2006 Gołdap

"Stanu wojynnego" tako we ćwierćwiecze
Trza pamiyntać jako historyjo plecie.

Puszcza Romnicka

[broneknotgeld]

Puszcza Romnicko

Puszcza Romnicko tajgom nom zdo sie
Niy yno zimom myśl tako mo sie.

[broneknotgeld]

"Rechot"

W Puszczy Romnicki ścieżka jest tako
Z edukacyjom żabom jednako
Ludzi natura jednak ciekawi
To przeca uczy niy yno bawi.

[broneknotgeld]

Wiynkszo

Puszcza jest wiynkszo niż sie nom zdo
Dwie czecie przeca z niyj Rusek mo.

[broneknotgeld]

Kajzerowskie kamiynie

Na zielonym szlaku w puszczy je znojdziecie
Toż lubioł polować tukej kajzer przecie
Kaj Wilusia kula jelynia siyngnyła
Tak kamiyń dowali - jest ich tukej siyła.

[broneknotgeld]

Zielony szlak

Z Jurkiszek łon wiedzie cie przez rezerwaty
W kere bor do dzisioj przeca jest bogaty.

[broneknotgeld]

Dziko

Puszcza Romnicko ciyngym jest dziko
Czy kajzer Wiluś tako wyrzykoł?
By zwiyrz mioł tukej zowdy ostoja
Dyć jo sie dzisioj ło nia tyż boja.

[broneknotgeld]

Agroturystyka "Czi Świyrki"

Jezioro Ostrowek już w Puszczy Romnicki
Dyć pod te "Czi Świyrki" wrocać byś chcioł wdycki
Kuchniom regjonalnom skuszom niyjednego
Atrakcyji wiela dołożom do tego.

[broneknotgeld]

Agroturystyka "Puszcza Romnicko"

Na skraju puszczy w chałupie stary
Zdowć sie bydzie żeś ciyngym jary
Jeszcze jak babka zjysz kartoflano
Chuć tura może bydzie ci dano.

[broneknotgeld]

Agroturystyka "Cicho Dolina"

Chałupa leży tu we kotlinie
Swoja zatoczka na rzeczce mo
We ty gołdapski piykny dziedzinie
"Cicho Dolina" niyjedyn zno.

Banie Mazurskie

[broneknotgeld]

Banie Mazurske

Przi tankszteli auto stanie
Noclegym cie skuszom Banie.

[broneknotgeld]

Bar "Młyn"

Bar "Młyn" w Baniach
- Niy cygania
Dobrze zjysz
Już to wiysz.