Europa po ślonsku

[broneknotgeld]

No i zaś jo musza ciongnońć
By Europa w Ślonzek wprzongnońć.

[broneknotgeld]

Tu idzie szkryflać ło tyj Europie
My w niyj łod zowdy babo i chopie.

[broneknotgeld]

Leko ło Europie sie szkryflo po ślonsku
Bydzie tukej cołko - tak konsek po konsku.

[broneknotgeld]

Tyn słownik se chyba tu nikerym przido
forum.gazeta.pl/forum/72,2.html?f=261&w=8707774&v=2&s=0
Jeszcze wiela rymow Bronek łod sia wydo.

[broneknotgeld]

Zwiydzić Klub Strasburski
yno w jedyn rok
forum.gazeta.pl/forum/72,2.html?f=28940&w=46991052
Toż richtig ciekawy
dlo wandrusa krok.

[broneknotgeld]

Belgio

Belgio z belgijokym mi sie durś kojarzy
Krolik we chlywiku tyż sie zaroz marzy.

[broneknotgeld]

Belgio szokoladom słynie
I my ło tym cosik wiymy
Tako było w tyj dziedzinie
- Skiż kolonii maszkecymy

W szokoladzie krew i pot
Nyjgra z Konga Belgijskego
Haratoł łon wiela lot
Kakało niyszczyńściym jego.


Belgijske frytki

Belgio już sto lot frytkami stoji
Braku kartofli sie tyż niy boji
Wiydz ło tym jak som frytki zaś wcinosz
Toż Belgijoka w tym przpominosz.

[broneknotgeld]

Ło Flamandzie

Wspomnij Flamandowi tyn jynzyk flamandzki
Zarozki ci powiy że to niderlandzki.

[broneknotgeld]

Stolicom komiksu belgijsko Bruksela
Smurfy nagodały by ci ło tym wiela
Na takim kryklaniu łod lotek sie znajom
Bestoż tyż Muzeum Komiksu tu majom.

[broneknotgeld]

Biołe piwo ponoć ta Antwerpio zno
Jo zaś "tyske" wola co swoj kolor mo.


Dom Rubynsa

Dom Rubynsa w Antwerpii połoglondać idzie
Zowdy pamiyńć ło niymu już tukej żyć bydzie.



Rubynsowsko linio teroz niy jest w modzie
Dzisioj anorekcjo rzońdzi sie w urodzie.




Przi katedrze na rynku Rubyns dzisioj stoji
Ło te swoje płotna nic sie już niy boji
W świontyni tyż przeca som jego tryptyki
Ciepnij na nie chocioż ze dwa twoje bliki.



Muzeum Morske w zamku prastarym
To tyż atrakcjo jest wielki miary.



Antwerpsko legynda

Druon Antigon port tu założoł
Kupcow tym do sia fest nyńcioł
Dyć sie nad nimi pierońsko srożoł
I krod im towor ze chyńciom

Czynsto kupczyki bronić sie chcieli
A z niego siłocz był przeca
Ucinoł rynce i do topieli
Rzece je ciepoł we necach

Jednak na niego tyż kryska prziszła
Bo Brabo Sylwiusz był hardy
Z kikuta zboja mocno krew trysła
Rynka zaś zabroł nurt Skaldy

Niy dziw sie teroz fontannie ichni
Co na antwerpskim jest rynku
Za zdrowie Braba piwo se gichni
Niy mortw Druona se mynkom.


Belgijok w biołym winie

Co w Antwerpii jedzom? Ano belgijoka
W biołym winie duszom dyć tego boroka
I śliwkom suszonom nafilujom jeszcze
Niebo w gymbie potym - naprowdy mi wierzcie.

[broneknotgeld]

Holandjo

Tulipany i wiatraki
Kraju tego piykne znaki
Narkotyki możno jeszcze
Dyć mie zaroz bierom dreszcze!

[broneknotgeld]

Keukenhof

We łogrodzie tukej tulpy ciynżko zliczyć
Kajś siedym miljonow! -Holynder mi ryczy.

[broneknotgeld]

Holandio w Europie

Ponoć takego państwa tu niy ma
Tako by tyż szło zaczońć tyn tymat
Toż przeca wiymy - som Niderlandy
W kerych doszukosz se dwoch Holandii.

[broneknotgeld]

Rok 2005

We Niderlandach doszli do zgody
Latoś tu majom przeca "Rok Wody"
Toż jo se tymu nic niy dziwuja
Morze na londzie daleko czuja.

[broneknotgeld]

Brunssum

W Limburgii miasto takowe znocie?
We Polskim Domie tam wiela pociech
Choc gruby downo pozamykali
Dyć tyn nasz bergmon siedzi tam dali
Toż Niderlandy - tukej mu lepi
Ze satelity Polskom se krzepi.

[broneknotgeld]

Ponoć Wenecjo jest Amsterdamym
Łod dziejow gyszynk taki im dany
Yno gondole som richtig włoske
No bo kanały tu i tam boske.

[broneknotgeld]

Polski "ratusz"

Na polskich palach tyn "pałac" stoji
Bez nich utopioł by se w marasie
Choć wieki lecom nikt sie niy boji
Ponoć mocniejsze łone po czasie.

[broneknotgeld]

Blikom na Amsterdam

Coś z Wenecji i Paryża ze ździybkym Londynu
Na Amsterdam tako blikom durś z wesołom minom.


I amsterdam Card

Na czi dni karta se wykup bracie
Forsy niy żałuj jak stare lacie
Dyć ze ty karty profitu wiela
Jak richtig poznać chcesz gryfno sztela.


11 miljonow

Co rok zoglondo wandrusow tela
Na tyn Amsterdam zdo sie to wiela
Dyć niychej kożdy bliknie se tukej
Takego cudu kaj ińdzi szukej?

[broneknotgeld]

"Het Rembrandthuis"

Tu natchniynio szukoł i wiela malowoł
Z kunsztym w ty pracowni zdo sie boski stowoł.


"Sexmuzeum"

Nojstarsze i piyrsze we cołki Europie
Dej pozor na frelki i na sia tyż chopie.


"Troppenmuzeum"

Jedni chcom ciyngym siedzieć w tropikach
Inksi nojpryndzy zaś stamtond zmykać
Toż dlo tych drugich muzeum styknie
Tukej łoglondnom se wszysko piyknie.

[broneknotgeld]

Oceanarium

Oceanarium tukej we zoo
Niyjedyn ze tym uciecha mo.

[broneknotgeld]

"Panie pingwinie"

Choć zoo dyć tukej "panie pingwinie"
Żeś we polarny jakby dziedzinie.

[broneknotgeld]

Sail Amsterdam 17-21.VIII.2005

Zyjman zlot taki zowdy mo w zocy
Tukej szifami napasie łoczy
Epne żaglowce se porachujom
Łostatnie take co wiater czujom.

[broneknotgeld]

Gouda

Jakbyś łoboczoł ze kyjzy hołda
Pewnikym bydzie to jejich gouda
Z miasta Holandji nazwa sie wziyła
W cołko Europa pryndko ruszyła.

[broneknotgeld]

Utrecht

"Domtoren" nad miastym jak gdyby kroluje
Ty wieży kościelny kożdy se dziwuje
W cołkich Niderlandach lona wiedzie prym
Był żech we Utrechcie toż przeca to wiym.

[broneknotgeld]

Zwolle

Pod Hanzom se żyło
Warowniom tyż było.

[broneknotgeld]

Middelburg

Niy trza wcale być Flamandym
By tam trefić we Zelandii
Toż prowincji jest stolicom
Bestoż tyż se nim zochwycom.

[broneknotgeld]

Maastricht

Tukej ta UE se narodziyła
Choć ze EWG jest jeji siyła
Traktat był przeca tu podpisany
Łod historyji znak jakby dany.

Haga

[broneknotgeld]

"Madurodam"

"Madurodam" w Hadze to miasteczko mini
Co Niderlandami cołkymi se miyni
Niy yno dlo dzieci uciecha jest tako
Ołpy łojca bajtla raduje jednako.

Apeldoorn

[broneknotgeld]

"Apenheul"

Czista afow ci niy wadzi?
We tym parku se paradzi
Na wolności jakby tako
Czy to dlo nich już jednako?

Biddinghuizen

[broneknotgeld]

"Six Flags - Walibi Word"

Richtig park uciechy wielki
Ciongnom tu karlusy frelki
Matki łojce ze bajtlami
Toż wybiercie se tyż sami.

[broneknotgeld]

"Goliat"

Rollercoaster wielki zdo sie
Seta szwongu na niym mo sie
Żołond kaj przi tymu złazi
Dyć nikogo to niy razi.

[broneknotgeld]

"La Vija Volta"

Tym se karniesz we dwie strony
Chocioż wcale to niy toni.

[broneknotgeld]

Dlo bajtli

Dlo bajtli zdo sie to bajka
Dlo kogosik "złote jajka".

Kaatshuevel

[broneknotgeld]

"Efteling"

Światym baśni tyn park zdo sie
W niym uciecha zowdy mo sie
Cwergi elfy czarodzieje
Bajtel se do tego śmieje
Matki łojce spokoj majom
Tyż z uciechom se dziwajom.

[broneknotgeld]

Hotel przi parku rozrywki

Kożdy pokoj bajkom tukej
Kogo lubisz tego szukej
Muster jakiś ci sztimuje
Bier jak dobrze se w niym czujesz.

Wassenaar

[broneknotgeld]

Park wodny "Duinrell"

Stond żol ci wyjechać bydzie
Toż czas taki w końcu przidzie
We pamiyńci dyć łostanie
To żeś mioł tu używanie.

[broneknotgeld]

Aquapark "Tiki Bad"

Cudo - se tako yno tu szkryfna
Recht - toż zarozki skiż tego kichna.

[broneknotgeld]

Lunapark

Toż niy yno te basyny
Som łobrozym ty dziedziny
Karuzele klajnecugi
Skiż niych czas tu niy jest dugi.

[broneknotgeld]

650 lot tymu

Grof tutejszy princym zostoł
Ze tym szwongu wiyncy dostoł.

[broneknotgeld]

Wilhelm II (1840-1849)

Niy yno z miana był wielkim princym
Łon konstytucjo doł piyrszo
Łod niego piniondz tu znaczy wiyncy
Sztela choć mało - dyć wyrszo.

[broneknotgeld]

Wielke Ksiynstwo Luksymburga

Skiż Waterloo gorom łone
Kongres w Wiedniu tyż je dzwignoł
Choć to jeszcze niy był koniec
Dyć szczyńśliwy los niy mignoł

Yno łostoł sie na dugo
Dzisioj ksiynstwu tyż durś mrugo.

[broneknotgeld]

W Szengen

W Szengen nad Mozelom granice zmazali
We Unii ich przeca jakby prawie niy ma
Terozki to poszło ło dziesiyńć państw dali
I bestoż tyż tukej europejski tymat.

Niemcy

[broneknotgeld]

Niymcy teroz kaj ińdzi już lecom
forum.gazeta.pl/forum/72,2.html?f=59&w=19671960&v=2&s=0
Kliknij - fraszki tam piyknie sie klecom

[broneknotgeld]

Downo tymu

Dwiesta lot ze hokum - Co Danio nom dała?
-"Czeci rozbior Polski" łoprotestowała
Dyć w Europie była ze tym "aż" jedyno
Tako historyjo dzisioj sie wspomino.

[broneknotgeld]

Gorm Stary

Łon państewka duńske chycioł twardom rynkom
Bo przeca by niy szło zrobić tego miynkom
Jutlandiom Wikingi ciongnyli falami
Jednak już tu teroz rzońdziyli se sami.

[broneknotgeld]

Christiansenowie z Billund

Jutlandzki stolorz stracioł na meblach
Dyć niy łodłożoł łon cołkym hebla
Drewniane graczki strugać niym zaczoł
Nawet sie trocha na tym wzbogacioł

Dali zaś poszoł jednak syn jego
Dyć se wymyśloł te klocki lego
Co w świat zarozki drapko ruszyły
Cołki rodzinie dodały siyły

Dzisioj to wszysko wnuk mocno czimie
Łon na piniondzu możno durś drzymie
Bo klocek lego - groczka dlo dzieci
Z Danii w świat cołki tonami "leci".

[broneknotgeld]

Danowie

Ze Szwecji Danowie swoj rod wywodziyli
Połtora tysionca lot tymu to było
Jak te ziymie mieczym do sia zagarnyli
Ich miano sie z państwym na zowdy stopiyło.

[broneknotgeld]

Kanut II Wielki (krol Anglji)

Syn Swena to Kanut. Wielkim zwali jego
Angliki se richtig suchali ichniego
Przeca wzioł do łożka ślubno Ethelreda
Wdowa - dyć z niom cołko ta wyspiarsko "scheda".

[broneknotgeld]

Arcybiskup Absalon

Twierdza we wiosce rybokow stowioł
Havn piyrwyj jom nazywali
Kamiyń pod nowo stolica dowoł
Tako poleci z tym dali.

[broneknotgeld]

Krolowa Małgorzata

W czech krajach już łona richtig krolowała
Danii i Norwegii a potym Szwecyji
Skiż Unii Kalmarski ta władza dostała
Dyć tyż ze tym mieli za wiela mecyji

Bo Duńczyki rośli we tych krajach wszyndy
Skandynawio cołko jejich grzondkom była
Na nich durś zoszczytne czekały urzyndy
Szwecji i Norwegii myńszo we tym siyła.

[broneknotgeld]

"Wojny Hrabiow"

Toż skiż Reformacji te wojny tyż były
Brat bratu korona torgoł z cołki siyły
We końcu wygrały te wojska Krystiana
Piyrszego na tronie w Danii luterana.

[broneknotgeld]

Fryderyk V

Po fatrze łon jakby za wiela folgowoł
Taki muster Danii swojim zyciym dowoł
Czas już był nojwiynkszy - piyknie sie to stało
Do życio kultura łobudzioł tu cało.

[broneknotgeld]

Tyn Krystian wyży mioł numer siedym
Toż łodyjmijcie mu teroz jedyn.

[broneknotgeld]

Przi Kristianie VII

Przi Kristianie VII dochtor Daniom rzońdzioł
Nikierzy godali co pierońsko błońdzioł
Toż w końcu se stało - stykło dworski zmowy
By Struensa cołkym pozbawić ty gowy.


Zmiana kliki

Ano - dyć zmiyniyła se cołkym ta klika
Co sie panoszyła u boku krolika
Teroz to co duńske jednak bardzi w zocy
A Dania nabiyro poleku durś mocy.


W Lidze Państw Neutralnych (1780)

W Hameryce Anglio kolonie już straci
Dania sie ze Ligom na tym ubogaci.

[broneknotgeld]

W Drugi Lidze Państw Neutralnych

Angljo ze Francyjom już se fest hatrusi
Danio neutralno być przi tymu musi
Postrachano jednak szifami Nelsona
Chyciyła se w końcu tyż Napoleona.


Przi Napoleonie

Ciyngym fest utropa dlo Danii z tym była
W końcu wiela na tym przeca tyż straciyła
Traktat we Kilonii - zdo sie dlo niyj dno
Dyć kraj durś istnieje choć zocy mniyj mo.


Fryderyk IV

Choć ksiyńciym ciyngym był na Holsztynie
Utropa ze tym Danii niy minie
Toż "absolutyzm" zdo sie chnet kończy
A "liberalizm" ze gminym łonczy.

[broneknotgeld]

Narodowy Ruch Romantyczny

Thorvaldsen z Kirkegaardym pospołu to ciongnom
Grundtvig - choć teolog tako se w to wprzongnoł
Rzeźbiorz filozof pastor - ciekawo to trojca
Co flance wsadziyła do tego "ogrojca".


Szlezwik i Holsztyn

Wloz Holsztyn do zwionzku tych krajow niymieckich
Za ksiyńcia mioł jednak durś duńskego krola
I Szlezwik mniyj chce sie czimać "duński kecki"
Chnetko z tym utropa - niy byda wos fulać.


1837

Już rajcow miejskich szło tu welować
Chnetko ło wiyncy trza bydzie stować.

[broneknotgeld]

1841

Toż w duńskich hrabstwach i parafijach
Władze z welunku teroz - niy z "kija".


Krystian VIII

Łon konstytucjo Norwegom doł
Przeca tam gowom był państwa
Niy Duńczykowi - chocioż tyż chcioł
Kurde - niy było w tym draństwa?


Fryderyk VII

No - liberały se teroz cieszom
Absolutyzmym już tu niy grzeszom
Toż podpisano konstytucyjo
Rigsdag to przeca niy jest mecyjo.

[broneknotgeld]

Riksdag

Z dwoch Izb se Rigsdag tyn duński skłodo
Konstytucyjo coś ło tym godo
Folketig izbom co niży leży
A landsting wyży - możecie wierzyć.


Szlezwicko-holsztyńsko utropa

Szlezwik ze Holsztynym chce sie już połonczyć
I tako we zwionzek niymieckich państw włonczyć
Na to krol i Rigsdag zgody dać niy może
Toż se zamotlali pierońsko - łoj Boże

Szlezwicko-holsztyński już rzond tymczasowy
Rychtujom w Kolonii - krol Prus co im powiy?
Dyć dobrze my wiymy co mu sztimowało
I wojna cziletnio w te ziymie przignało

Prusy pomoc cofły - z tym danio wygrywo
Choć możno nikogo to teroz niy dziwo
Czy koniec już na tym ty utropy jest?
Łoj - jeszcze rozkulo se tu wojna fest.


Nowo konstytucyjo

Toż Krystian IX - krol Danii już nowy
Handszrift swoj położoł - dyć drapko sie dowiy
Że Szlezwik w tym kraju niy chce cołkym być
Pryndko zaś skiż tego zaczli se tu bić.

[broneknotgeld]

Zaś wojna

Zaś wojna ło Szlezwik - terozki przegrano
Ta ziymia już Niymcom cołkym jest łoddano.


Zjednoczono Lewica (1872)

Po przegrany wojnie zowdy tako bywo
Że to co jest "lewe" bardzi gowa dźwigo
Folketing se zdowo terozki "ludowy"
Dyć jakoś "prawica" na to tyż łodpowiy.


Zjednoczono Prawica

Co "prawe" to przeca na "lewe" niy przyńdzie
Toż se historyjo tako dzieje wszyńdzie
Dwie siyły ło władza durś durś sie potym wadzom
Utropie przi tymu jednak niy zaradzom.

[broneknotgeld]

"Lewo" władza

Nic jo na to niy poradza
Kryńci Daniom "lewo" władza
By uczimać cugle w rynkach
Dlo "konserwy" dyć w tym mynka

A czas zdo sie niyspokojny
Już u proga piyrszy wojny.


Neutralno Dania

Toż niy myślała Dania ło wojnie
Szczyńśliwo - u niyj teroz spokojnie
A że jom Niymcy w końcu przegrały
Profit w tym miała choć możno mały.


Plebiscyt w Szlezwiku

Granica przetła Szlezwik na poł
Skiż Plebiscytu co tukej boł.

[broneknotgeld]

Kryzys Wielkanocny 1920

Nowy muster welunku mieli już wprowadzić
Dyć skiż tego se zaczli tu pierońsko wadzić
Krol "lewica" "prawica" zwionzki zawodowe
Komuś pomiyszało sie przi tymu w gowie
Strajki demonstracje na ulicach wojsko
Toż niy było teroz tukej cołkym swojsko
W końcu jednak wszysko prziszło dyć do normy
I Dania poleku nabiyro zaś formy.


W dwudziestoleciu miyndzywojynnym

Fionia z Jutlandiom chcieli zepinać
Przez Mały Bełt most trza im zaczynać.


"Stormstromsbro"

Folstar z Zelandiom razym być mogom
Z wyspy na wyspa tyż suchom nogom.

[broneknotgeld]

9.IV.1940

Przez telefon Dania se Niymcy zajyli
Wystykło że łostro tako postraszyli
Kapitulacyjo pryndko richtig była
Ja no - kraj malutki a somsiod mioł siyła


Okupacyjo

Ciynżko jom niy przeszli - dyć zowdy mecyjo
Niywiela tu cieszy ta okupacyjo
Ruch oporu nawet rozwinoł sie z czasym
Chocioż go niy kryły przeca rzodke lasy.


Po wojnie

Przeczimała ta wojna se Danio bez strat
Chocioż ze wygranych nikt niy był jyj brat
Dyć tyz erbła cosik przi Planie Marshala
I tako szif duński pruł zaś łostro fala.

[broneknotgeld]

Dania 1947

Niy chciała Dania być fest sagato
Toż jom już majom terozki w NATO
Tela że bez tych bomb atomowych
-Wolom je mieć tu cołkym ze gowy.


Dania 1973

Do EWG tyż Duńczyki chcieli
Toż se znoleźli i we ty szteli.


Dzisioj

Dzisioj Dania mocno siedzi we Uniji
Nawet skuli euro niy było mecyji.

[broneknotgeld]

Przez Wielki Bełt

Fionia ze Zelandiom zepli se tu mostym
Na sucho przez woda - sposob teroz prosty.

[broneknotgeld]

Zamek Hammershus

Na Bornholm zoglondnońć a ruin niy widzieć
Toż utropa możno jakoś z tego przidzie
Trza se bydzie wrocić - połazić w tych murach
Historiom podychać i niy myśleć - "dziura".

[broneknotgeld]

Kaj Danio siyngo nojdali wschodu?
ło tym toch wiedzioł jo już za młodu
Bornholm na morzu mi sie zamarzoł
Dyć jak przepłynońć - siech niy łodważoł.


Amstkomune Bornoholm

Cobyście ło tym zowdy wiedzieli
Na piyńć gmin okryng se cołki dzieli.


Bornholmske lasy

Niych to wcale wos niy straszy
Danii tu nojwiynksze lasy
W jedny pionty wyspy som
Bestoż rym tyż taki dom.

[broneknotgeld]

Bornholmske słowiki

Tela tu nakwilom tela naśpiywajom
Że "obywateli wyspy" tytuł majom.


Drzewka figowe

Toż drzewka figowe na Bornholmie rosnom
Czy to mi sie yno coś myli ze wiosnom?
Bałtyk przeca niy jest te Środziymnomorze
Dyć figi z ty wyspy dej mi Panie Boże.


Almindingen

Nojwiynkszy las duński na Bornholmie znojdziesz
Siedmiopiynne drzewo - do niego tu dojdziesz.


Wodospady

Mo Danio tukej tyż wodospady
W żlebie Dandalen - niy łod parady.

[broneknotgeld]

Koncerty

Co na Bornholmie polecić babie?
-Możno sie wsucho w koncerty żabie
Rzekotki piyknie tukej rechocom
Niyjedna frela tym rozochocom.

"Zielono mi..."

Tako tu zowdy ekolog nuci
Zdo sie w raj chnetko wyspa łobroci.


Erika

We wrześniu ta wyspa se robi lilowo
Ciyngym ta erika przed łoczy ci stowo
Skały Hojlygenu czy cypel Hammeryn
Zdo sie nojgryfniejszy terozki to teryn.

[broneknotgeld]

Hammerso

Nojwiynksze jezioro - na cyplu połnocnym
Gryfne nawet wtedy jak czas tukej nocny
Stojom po somsiedzku aże dwie latarnie
By rybok na morzu niy stracioł se marnie.


Plaża

Łod Łod Renne do Dueodde podziwej se plaży
Kero i bez zima bydzie ci sie marzyć
Na świecie niywiela wiynkszych i gryfniejszych
Tela yno szkryfna we tyn czas dzisiejszy.


"Ekkodalen"

Toż "Dolinom Echa" Duńczyki jom zowiom
Ano sie z tym echym czasami tu bowiom
Jo jednak zoglondna do zamkow prastarych
Lilleborg Gemleborg - w niych som jakeś czary.

[broneknotgeld]

Chlyb bornholmski

Piykorz go tu robi zowdy po starymu
Bestoż trza wom wierzyć richtig tyż i tymu
Że łon potym świyży przez cołke czi tydnie
Smak tego pecynka nigdy wom niy zbrzidnie.


W dziyń św. Jana

W dziyń świyntego Jana heksy tukej polom
Jak stos sie hajcuje ździybko poswawolom
Biyr w gowie zaszumi - chocioż niy za wiela
To noc w kero dzieje sie niy yno tela.


W Almindingen

Torym wyścigowym tyn bor w Danii słynie
Rajtujom tu konie z wiosny do podzima
Jedyn grosik zysko inkszego to minie
Szczyńście czasym bywo a kej ińdzi niy ma.

[broneknotgeld]

Z romantyczkom

Jest żeś z frelkom romantyczkom
Toż do lasu jedź se z bryczkom
Almindingen wos zasłoni
Yno wy i porka koni.


Miyndzynarodowy Konkurs Skokow

Zowdy w lipcu tu zawody
Szwecjo z Daniom fest rajtuje
Dyć ze sportu niy ma szkody
Choć se w tym historio czuje.

[broneknotgeld]

Wiatraki

Kajniykaj tu stojom jakby w Holandyji
Tukej z mloniym zboża niy było mecyji
Młynorzym mog zostać kożdy kery chcioł
Bele grosz na wiatrak czy młyn wodny mioł.


16.VI. - Dziyń Młynorza

Skuli downych czasow te świynto powstało
No i niy dziwota - młynow durś niymało.


Nowe wiatraki

Mloć niy muszom - robiom sztrom
Toż skiż tego tukej som.

[broneknotgeld]

Golf

Tu pola golfowe ludzi prziciongajom
Podobnoś nojbardzi tych co geld durś majom.


Dni Pstronga

W te dni se moczom tu gynsto kije
Mom taki toast - Niych pstrong nom żyje!


W jedyn dziyń

W jedyn dziyń na kole zjedziesz Bornholm cały
Choć zic może pedzieć - "To wyczyn niymały"
Kilometrow dwiesta "ścieżek rowerowych"
Na zwiydzanie wyspy muster to niy nowy.

[broneknotgeld]

Windsurfing

Kto lubi popływać na zyjmański desce
Tyn na pewno wroci se na Bornholm jeszcze.


Zatoka Balka

Rajym jest dlo rozin z małymi bajtlami
Myni tu utropy z morskimi falami
No i w tym uciecha że płytko przi plaży
Nic złego se tukej tym brzdoncom niy zdarzy.


"Bornholmske złoto"

Bornholmske złoto - wyndzony ślydź
Nojlepsze to to. Jeronie - jydz.

[broneknotgeld]

Lars Hansen (1813-1872)
Malyrz czy możno botanik bardzi?
Toż żodnom astom łon niy pogardzi.


Kristian Zahrtmann (1848-1917)

Na jego płotnach czynsto łogrody
Do dzisioj łone niy wyszły z mody
Wszyndy te kwiotki fest kolorowe
Zdo sie - na grzondce jest ciyngym czowiek.


Helge Nielsen (1893-1980)

Pejzarze słońcym mo malowane
Co Bornholmowi yno jest dane.

[broneknotgeld]

Hanza na Bornholmie

Ta wyspa - wpiyrw duńsko - Hanza w końcu wziyła
Chnetko przez dwa wieki Bornholmym rzońdziyła.


Po Hanzie

Jak Hanza se traci to zaroz tu zwada
Kto terozki wyspom bydzie richtig władać
Krol Danii Lubece w zastawie łostawioł
Ale po Roskilde Szwed tukej "zabawioł"

Dyć tyn Peter Olsen zagrzywoł do buntu
I juzaś przi Danii bornholmczyki som tu
Na wyspie Christianso powstała forteca
By przipilnowała tyż duńskego neca.

[broneknotgeld]

Runy

Dwa tuziny znakow miały
Ludy niymi tu szkryflały.


Runiczno kronika

Runami wykuli jom se na kamiyniach
Coby nom pedziała ło downych istniyniach.


Zdo sie

Zdo sie w tych kamiyniach som dusze zaklynte
Runy czasym prawiom co łone niy świynte.

[broneknotgeld]

Sztyry rotundy

Nyker Nylars Osterlas Osker
Sztyry rotundy w łobronie proste
W kerych se piyrwyj trza było chronić
Życie przed Wendym swoje łobronić

Bornholm se asi niymi do dzisioj
Pewno żeś ło tym karlusie słyszoł
Toż nikaj ińdzi takich już niy ma
Yno je nosi ty wyspy ziymia.


22kościoły

Na jedna wyspa styknie ich zdo sie
Dyć Boga w sercu tyż ciyngym mo sie.

[broneknotgeld]

Bornholmske zygory

Łod ćwierć tysionclecio tukej je rychtujom
Na stare zbiyrocze naprowdy "polujom".


1774

Ze zygorami trefioł tu szif
Na skale dyć wylondowoł
Towor był zocny - skiż tego knif
I muster tyż przeca dowoł.


Muster

Mustrym tu zygor z Anglyji boł
Co stoł we izbie i piyknie bioł
Do dzisioj asi sie Bornholm tym
Skiż tego przeca coś ło tym wiym.


Warsztat Petersenow w Ronne

Łostatni kierzy zygory robiom
Co kozdo izba piyknie łozdobiom.

[broneknotgeld]

Bornholmski Zwionzek Rolnikow - 1805

Nojstarszy w Danii - dwiesta lot mo
Rolnik tu panym - ta prowda zno.


Nojmyńszy powiat

Richtig nojmyńszy Danii to powiat
Rym go powiynkszy - możno to sprowia.


Rada Powiatu

We Ronne siedzi powiatu Rada
Stolicom przeca - ło to niy zwada.

[broneknotgeld]

"Sol over Gudhjem"

Filet ze śledzis jajko cebula
Rediski sznitloch - toż forszteluja.


Do śledzia

Co do śledzia ciyngym trza?
Biyr - toż napić czas nom - pra?


"Bornholms Mejeri"

Ichnio kyjza pokosztujesz
Zdo sie - wiater z morza czujesz.


"Żytni kyks"

To bornholmske richtig cudo
Co kaj ińdzi se niy udo.

[broneknotgeld]

Dzieło Thora

Toż bog Skandynawio cołko już postawioł
Zocnymi resztkami żdziybko se pobawioł
Aż w końcu je ciepnoł znudzony we morze
Za Borncholm ci dziynki - twoje dzieło boże.

[broneknotgeld]

"Krolle Bolle"

Bornholmczyki w zocy
tego trolla majom
Pomogoł bić Szwedow
bestoż jymu pszajom.

[broneknotgeld]

"Bornholmer"

Ze strzybnego śledzia robiom złoto fisza
Ło "złocie" Bornholmu ciyngym przeca słysza.

[broneknotgeld]

Ronne

Bornholmu to jest stolica zocno
Tu wyspy jedna czecio ludności
Przi inkszych miastach zdowo sie mocno
W lato - jak wiyncy ludzi se gości.


Tyjater w Ronne

Cołki Bornholm tyjatrym we Ronne se asi
Prywatny - nojstarszy ze duńskich łon jest
I godka bornholmsko tukej wszyskim "pasi"
Chnetko dwiesta rokow - fajer bydzie fest.


Ronne 1327

Ledwo kupcy z Hanzy port tu założyli
Zaroz prawa miejske osadzie nadali
Na bałtyckim szlaku dyć panami byli
Łoni ze wszyskimi przeca handlowali.

[broneknotgeld]

Muzeum Ceramiki

Tu niy lubiom garkotłuka
Dyć tych niy trza wiela szukać
Szczyńściym sami wypolajom
To co potym rozwolajom.


50 warsztatow

Piyńdziesiont warsztatow garcarskich tu było
Toż po nich muzeum cosik zgromadziyło
Godajom - We Danii stond ekstra szkorupy
Łoboczysz - poskopisz - czimie sie to kupy.


Muzeum Sztuki w Ronne

Łobrozy miejscowych mo impresjonistow
Zoglondnij bo werci se richtig ci prziś tu.

[broneknotgeld]

Lars Ipsen (1806-1874)

Chocioż w rynkach kowola fach solidny czimoł
Toż łogrodnik zdo sie we duszy mu drzymoł
Wele Ronne założoł se na wrzosowiskach
Łogrod botaniczny - niym sława mioł zyskać.


Łogrod Thomasa Erichsena

Z dziewiytnostego wieku go majom
Toż łogrodowi we Ronne pszajom
W chałpie muzeum wyrychtowali
Coby ło tworcy durś pamiyntali.

[broneknotgeld]

Ronne 1227

Zaś skiż "Pascala" feler wyskoczoł
Dobrze że teroz żech go łoboczoł
Ło sto lot starsze te Ronne przeca
Bestoż se fraszka ciepia do neca.


Ronne 1684

W tym roku stolicom tu Ronne se stało
Bo se Akirkeby fest rozhajcowało
Bestoż zdo sie życie pryndzy leci tukej
Mosz spokoj we zocy - za miastym go szukej.


Muzeum Broni

W stary wieży łotwarło se swoje podwoje
Co miasta broniyło tu mo miejsce swoje.


Urzond celny

Jak yno stolicom te Ronne se stało
Zarozki "zollamtu" tyż poczebowało
Łostoł tu zabytek tyn aż do terozki
Uciecha z niym dzisioj bo przeca niy troski.


W Ronne

W Ronne nojstarszy duński tyjater
To na Bornholmie powiy ci wiater.

[broneknotgeld]

Muzeum Rolnictwa

Zoglondnij na farma Malstedgardym zwano
Skansyn - zdo sie lepsze teroz dlo niyj miano
Zoglondnońc se możesz jak piyrwyj tu żyło
Skond płotno biyr masło w zogrodzie sie wziyło.


Łogrod w Malstedgard

Kaj w Europie rosnom jeszcze take ziyla?
Wiela z nich już nikaj - przeca sie niy myla.

[broneknotgeld]

Glashuta

W cołki Danii znajom tutejszy "werk szklany"
Glas stond kunsztowniejszy łod bańki mydlany
Z gryfnym szkłym dyć wiela znojdziesz galeryji
Kup coś na pamiontka ze ty ekskursyji.


Bokul

Wele Gudhjem gorka Bokul znojdziesz
Piechty ze miasteczka pruyndko do niyj dojdziesz
Z wiyrchu archipelag przepiykny łoboczysz
Ertholmene zowiom czym pasiesz se łoczy.


Dej pozor

Dej pozor we Gudhjem richtig na sztalugi
Kunsztowi zaszkodzisz i lizniesz jak dugi.

[broneknotgeld]

Bornholmske Cyntrum Średniowiecza

Chcesz se pobawić ze historyjom
Zoglondnij do ty "osady"
We średniowieczu przeca tu "żyjom"
Wiela w tym piykny parady.


Dlo nauki

Bajtle poznowajom wyspy historyjo
Ta "osada" przeca wcale niy mecyjo
Dyć tukej i fatry widzom coś "nowego"
Trza jednak zoglondnońć - inaczy nic z tego.


Gudhjem

Gudhjem "średniowiecznom" turystykom żyje
Radochy z tym wiela i ze geldu tyje.

[broneknotgeld]

To ci przipomni

To ci przipomni te Gudhjem w mig
Jak se poniuchosz aroma fig.


Muzeum w Gudhjem

W starym banhofie muzeum majom
Łoni zobytkom richtig tu pszajom.


Na stoku

Te gryfne Gudhjem stoji na stoku
Toż se niy szwyndej wiela poćmoku.

[broneknotgeld]

Wiatrak w Gudhjem

Zdo mi sie znakym miasteczka tego
Nikaj niy znojda już gryfniejszego?

[broneknotgeld]

Hasle

Osada rybacko wyndzarniami słynie
Ślydź w Hasle cie przeca nigdy niy łominie
Smak kolor mu dowo te drewno łolchowe
Czym "złoto bornholmske" tu dowiy se czowiek.


Wyndzarnio-skansyn

Zoglondniesz se richtig we wiek dziewiytnosty
Dyć zowdy wyńdziyli na muster tu prosty.

[broneknotgeld]

Ze śledzi

Hasle do dzisioj żyje ze śledzi
Złowi uwyńdzi - tako se biedzi
Zocne som ciyngym w Hasle wyndzarnie
Z nich grosz do dzisioj ta wioska garnie.


Ekologicznie

W Hasle tyż robiom klinker szamota
Ekologicznie - to niy gupota.


"Muzeum śledzia"

"Muzeum śledzia" te Hasle mo
Możno jedyne - to mi sie zdo.

[broneknotgeld]

Banka we Svaneke

We Swaneke banka mo napynd na siano
Kopyta ło droga sukajom już rano.


Wesołe miasteczko

We Svaneke muter niy może być zło
Tu przeca dlo bajtli piykne mini-zoo
Basyny wyciongi i djobelske młyny
Niy majom dziecioki ty stropiony miny.

[broneknotgeld]

Ziela ze Svaneke

Ze Svaneke sława zyskujom już ziela
Chnetko w cołki Danii bydzie tego wiela.


Dzike rozy

Do lipinsztiftow liście dowajom
Z tych roz bo wiela ich tukej majom.


Figurki ze Svaneke

Stond figurki som ze gliny
Archeolog robi miny
Jak je na tysionce kopie
To se po palicy dropie.

[broneknotgeld]

Złoty Medal Rady Europy

Za łochrona zobytkow Svaneke dostało
Toż ze tym zrobiyli tu richtig niymało.


"Siemens Gaard"

Hotel mo cołke sztyrysta lot
Z takego wieku kożdy jest rod.


Wiatrak (1737)

U wrot Svaneke wiatrak cie wito
Richtig jest stary - jakby kto pytoł.


Łabońdź

Jest w herbie miasta i na kościele
Niy trza bych musioł przeciyrać brele.


Glashuta "Pernille Bulow"

Som se wydmuchosz tu coś szklanego
Pozor na zymby jednak kolego.

[broneknotgeld]

Christianso

Wele Bornholmu wyspa z fortecom
Krol Christan V jom stowioł
Myśloł że wrogi se tu niy zlecom
Dyć bestoż fortyfikowoł.


Djobelsko Wyspa

Dlo heresztantow łona Djobelsko
Przeca niy mieli tu wcale sielsko
Robota ciynżko i dożywocie
Toż ze kostuchom niy było pociech.


Plyner

Dzisioj napotkosz czynsto malyrzy
Zdo sie ze kunsztym som tukej wyży.

[broneknotgeld]

Zamek Hammerhus

Arcybiskup Lundu tyn zamek wystawioł
Utropa pierońsko krolowi tym sprawioł
W końcu łobie strony Hanza "pogodziyła"
Lubeka Hammerhus tyż wtedy zajyła.

[broneknotgeld]

Hammerhus

Mnichy ze Hammerhus na ziylach se znali
Wiela tego tukej przeca hodowali
Dzisioj rożne cuda rosnom przi ruinie
Toż niyjedyn ziylorz tego niy łominie.


"Ziyle czarownic"

Wele Hammerhus rośnie do dzisioj
Niyjedne dziwo żech ło niym słyszoł
Toż bol nojgorszy ze niym sie straci
A i ryboka nawet wzbogaci
Bo śnik zesyło na morske ryby
W sieć chnetko same przi tymu "szły" by.

[broneknotgeld]

Zamek arcybiskupi 1250

Zefla erlandsena stanoł tukej wolom
Zaćmić tyn Lilleborg było jego rolom
Kościoł z krolym Danii czynsto se tu wadzioł
Bez zamku by możno niywiela poradzioł.


Na warcie

Nojpiyrw Kościoła - potym był szwedzki
Z koleji Hanzy - zdo sie niymiecki
W końcu krol duński mioł w niym łoparcie
Stoł mocno tukej - jakby na warcie.


W Slotsgerden

W Slotsgerden muzeum zamku znojdziesz
Ze ruin drapko se tukej dojdziesz.

[broneknotgeld]

Browar

To mi sie podobo - we twierdzy tyn browar
Bez niego załodze ciynżko by sie żyło
Wiela tu ktoś znaczoł jak dobry piwowar
Przi złym - cudze wojsko by zamek zdobyło.

[broneknotgeld]

Ny-Kirke

Kościoł -rotunda ze downych wiekow
Jak se tu wszyscy Kaszubow boli
Malutki zdo sie dyć wiydz czowieku
Że dzisioj se niym Bornholm fest chwoli.


Ny

Łod Nikolausa wzioł pewno miano
Przeca jak rybok wypływoł rano
Tyn świynty chronioł go durś na morzu
I dziynki niymu powrotu dożoł.


Wpiyrw

Wieża kościoła płaski dach miała
We niyj se ludność wioski zbiyrała
Dostympu Wendom mocno broniyła
Kaszubsko horda jom niy zdobyła

Zagrody jednak zowdy grabiyli
Niym se przez morze do sia wrociyli
Ciyngym tyn Bornholm tako nynkali
-W końcu Duńczyki łupnia im dali.


Przi Ny-kirke

Przi Ny-kirke kamiyń z lot pradownych stoji
Zygor - toż i dzisioj klara go durś "stroji".

[broneknotgeld]

Dzwonnik z Bodilsker

Ponoć jak yno przestowoł dzwonić
Chcioł do łogrodka swojego gonić
I sztudiyrowoł przez cołke życie
Ta botanika - przeca to wiycie.

[broneknotgeld]

"Bornholm"

W Dueodde to hotel kolos
Jo bych do niego wcale niy poloz.


Brzeg w Dueodde

Ruchome wydmy laguny klify
Sama prziroda niy jakeś knify.


Latarnio

Se do latarni na szpacyr idźcie
Yno ło jednym tyż richtig wiydźcie
Za widok ze niyj zapłacić trza
Co łaska - to zdo sie tonio -pra?

[broneknotgeld]

W Snogebaek

Tawernow tu wiela - zicnijcie przi piwie
I deliberujcie ło bornholmskim dziwie.


W glashucie

Zarobić glashucie pora euro dejcie
Dyć szkła z tego werku yno niy szczaskejcie.


Jarmark Staroci

To sie podobo mi ludzie złoci
Że tukej czynsto jarmark staroci.

[broneknotgeld]

Nexo 1364

Mo prawa miejske tyn zocny port
Choć mały przeca wiela jest wort.


Skiż wojny

Skiż wojny Nexo fest uciyrpiało
Wojsko tu przeca stacjonowało
Niymcy sie Ruskom poddać niy chcieli
Toż zbombardować wszysko musieli.


Kościoł św. Mikołaja

Świynty Mikołoj rybokow chroni
Łod lot patronym majom go łoni
Toż w Nexso mo tyż świontynia łon
Niychej niy dziwi że tu se wzion.

[broneknotgeld]

Akirkeby

Jedyne miasto łod morza dali
Stolica piyrwyj tu zakłodali.

W Akirkeby

Zdi sie te miasto nojstarsze tukej
W nojwiynkszy kościoł przeca tyż kukej
Niyjedne w Danii przi niymu blednom
Łon piyrwyj nawet był tyż katedrom
Toż przeca wiek dwunosty nań blikoł
W niym arcybiskup Lundu tyż rzykoł.


"Automobilmuseum"

Zoglondnij tukej chocioż na chwila
Przeca sie kochosz w automobilach
Choć na tych se już wcale niy karniesz
Dyć napaś łoczy pewno tyż garniesz.

[broneknotgeld]

Ro

Na wschod łod Gudhjem jest tako wiocha
Werci rozglondnońć se tam tyż trocha.


Ro Plantage

Tam kaj erika park zrychtowali
Jak tu zoglondniesz niy chcesz iść dali.


"Helligdomsklipperne"

Niydaleko Ro znojdziecie
Groty - chocioż lepi przecie
Z Gudhjem szifym tam przipłynońć
Niy do sie ich przeca minońć.

[broneknotgeld]

Moselokken

Toż kamiyniołomym piyrwyj se asiyło
Bestoż tyż muzeum take tu stanyło.


W muzeum

Rożniste granity w muzeum tym majom
Narzyńdzia kerymi już niy łobrobiajom.


W warsztacie

Jak chcesz som łobrobić granitowo berga
Chytej se roboty - niy czekej na cwerga.

[broneknotgeld]

W Vang

Czynny kamiyniołom do dzisioj w Vang znojdziesz
Chocioż niy skiż tego do wioski ty dojdziesz.


Młyn wodny (XVIII w)

Młyn wodny - toż przeca niy był tukej zbytek
A dzisioj se łostoł ciekawy zabytek.


Kaplica Jona

Skała przi brzegu stoji tu jedna
Zlyźć z niyj na plaża - ździybeczko bledna
Schodkow w doł bydzie tu przeszło sto
Z klifu powiedom jakby na dno.

[broneknotgeld]

Allinge

Letnikow wiyncy tu niż ludności
Dyć te miasteczko chyntnie ich gości.


Allinge Kirke

W sztyrnostym wieku już tu kaplica
Potym świontynia co gryfne lica
Przez wieki pora razy zmiyniała
Do naszych czasow tako dotrwała.


Ratusz

Ratusz stanoł wele portu
Wzywo kutry do raportu?
Zaczoł czecio setka lot
Burgemajster z tego rod.

[broneknotgeld]

Sandvig

Ze Allinge zdo sie razym
Jakby jego jest łobrazym.


"Madsebakke Helleristninger"

W cołki Skandynawii dziwym jest ta skała
Skond chyńć do rysunku w tych ludach se brała?
Prehistorio tako tu "wymalowano"
Prziszłym pokolyniom łod tych downych dano.

[broneknotgeld]

"Kopynhaski syrynka"

Jak na nia blikom łoko sie śmieje
W tyj rzeźbie łonczom sie czi ideje
Duch Andersena - kunszt Eriksena
No i mamona łod Jacobsena

Skiż tego czasym "carlsberga" pija
Tom "trojidejom" jakby se żyja.

[broneknotgeld]

W Kopynhadze

W Kopynhadze se łobudzisz
Przez dziyń cołki niy zanudzisz
Choć se Dania śpioncom zdowo
Niy stolica - na to słowo.


A po ćmoku

Tu we nocy niy ma ćmoka
Dośc uciechy dlo boroka
Co w tym czasie spać niy umi
Toż niy yno w gowie szumi.


Ze Dunkom

Jak ze Dunkom se zabawisz
To i jyj radocha sprawisz.

[broneknotgeld]

"Port Kupcow"

Tako po duńsku te jeji miano
Łod wiekow z handlu przeca jest znano
Wiochom rybackom z poczontku była
Z czasym stolicom Danii - w tym siyła.


1443

Krol Danii wtedy se tukej wkludzioł
Port i te miasto jakby tym zbudzioł.


Amalienborg 1669

Fryderyk III czimoł tu stolec
No a że richtig niy był łon golec
Pałac dlo ślubny gryfny zbudowoł
Zifii Amelii hołd tako dowoł.

[broneknotgeld]

"Saga Queen"

Szif z kopynhagi zatokom płynie
Byś zjeść mog dobrze w morski dziedzinie
Rejs dobro kuchnia - czy trza cos wiyncy?
Choroby morski? -Niych cie niy mynczy!

Zelandia

[broneknotgeld]

Zelandia

Zelandia tu wyspom nojpiyrszom
Na niyj stolica tyż leży
I bestoż zowdy nojwyrszom
Dobrze tu zyć - chciyjcie wierzyć.


Bez Kopynhagi

Bez Kopynhagi czym jest ta wyspa?
- Szłoby se yno tu dobrze wyspać.


Zelandzke "cimple"

Roskilde, Koge, Rigsted, Helsingor
Dyć Kopynhaga tu jakby "indor".

[broneknotgeld]

Downe stolice

Roskilde Ringsted - downe stolice
Ci rozespane pokożom lice
Chocioż jak lubisz ta historyji
Zoglondniesz - przeca to niy mecyjo.


Zelandia Staro

Zelandia staro - Zelandia Nowo
Daleko łod sia - to mi sie zdowo


Na Zelandii

Na Zelandii krole siedzom
Czamu? -Łoni dobrze wiedzom.

[broneknotgeld]

Dziyń św Łucji w Szwecyji

Choć sie urodziyła w ciepły Italyji
Nojmocni jest czczono we zimny Szwecyji
W łopiece mo ślepych i tych co ich lyczom
Bestoż frelki dzisioj chodzom se ze świycom

W kożdym mieście szwedzkim terozki wybory
Nojgryfniejszy Łucji co łodwiydzo chorych
Niesie im pociecha i żymły rozdowo
Nom by sie przidała - tako mi sie zdowo.

[broneknotgeld]

U nos

Szwedzkich Wazow tyż my mieli
No i "potop" w polski szteli.

[broneknotgeld]

"Waza"

"Wazy" wydobyli - piykny to zabytek
Bog jednak im pedzioł że to dlo nich zbytek
Przeca jak go piyrwyj yno zwodowali
To sie niy uczimoł na ty morski fali.

[broneknotgeld]

Szwecji Łucja patronuje
Dzisioj to tam kożdy czuje.

[broneknotgeld]

Greta Garbo

Godali że greta "zimny łogyń" poli
Ze niom "Casablanka" kożdy jednak chwoli.

[broneknotgeld]

Podobnoś

Podobnoś Szwedy ło dom durś dbajom
Łoni "Ikea" we duszy majom.

[broneknotgeld]

Femokracjo

Możno ździybeczko to czasym złości
We Parlamyńcie chopy w myńszości
W rzońdzie podobnoś tyż majom tako
Baba ze chopym już niy jednako?

[broneknotgeld]

Rudy ajzy

Na hematycie i magnezycie
Rośnie we Szwecji jakby tyż życie.

[broneknotgeld]

Już Tacyt

Już Tacyt chwoloł łod Swewow łodzie
Groźne być miały w przibrzeżny wodzie
Dyć wtedy jednak bez żagla były
Na oceanie by sie straciyły.

[broneknotgeld]

Birka

Jak u nos w niywola ludzi nachytali
Ze czyńściom do Birki zowdy przipływali
Niyszczyńśnikow klontwa dyć dopadła miasto
Tysionc lot już tymu - richtig dugi czas to.

[broneknotgeld]

Sigrida

Toż Eryk Zwyciynzca piyrszym jeji chopym
Możno jeszcze niy mioł z niom wiela utropy
Dyć po jego śmierci wdowa ze niyj "dumno"
Cera łod Chrobrego - tyż bestoż fest szumno.

[broneknotgeld]

Sztokholm

Na sztyrnostu wyspach ta stolica leży
Jezioro łod morza łone łoddzielajom
Werci sie jom zwiydzić - możecie mi wierzyć
Zabytkow tyż wiela tukej piyknych majom.

[broneknotgeld]

Visby

Czasy świytności już sie skończyły
Dyć tu Gotlandii jest dusza
Tyn port mioł downiyj za wiela siyły
Se kedyś zajrzeć tyż mysza.

[broneknotgeld]

Arcybiskup Lundu Bornholmu se czimoł
forum.gazeta.pl/forum/72,2.html?f=59&w=19764660&a=21799600
Zamek tam wystawioł bo Kościoł niy drzymoł.

Nykoping

[broneknotgeld]

Do Nykoping

Ze Gdańska fligrym lecisz godzina
Toż cie prziwito szwedzko dziedzina
Co nojzocniejsze mo to pokoże
Tyś przeca gościym na jeji dworze.

[broneknotgeld]

We Wieży Krolow

Gora jak gora - lochy ciekawsze
Mogbyś w nich łostać przeca na zawsze
Styknie taszlampa dzisioj do tego
By szczura spotkać dwumetrowego.

[broneknotgeld]

Zoo

Wele Nykoping Kolmarden nynci
Gowiedzi wiela - aż łeb se mynczy
We Skandynawji nojwiynksze zoo
Tako se przeca niy yno zdo.

[broneknotgeld]

"Zoo-landia"

Tam i "safari park" dyć znojdziecie
Se cołko Szwecjo asi niym przecie.

[broneknotgeld]

"Przistanek w krainie Bamse"

Tu krolujom szwedzke misie
Raj bajtlowi tako śni sie.

[broneknotgeld]

Tukej Norwegii kontek zostawia
Fraszkom se potym jednak zabawia.

[broneknotgeld]

"Pożegnanie ciepłych gaci" - 17.V.

Z tym dniym richtig wiosna we Norwegii mo sie
Piyrszy roz posmykać tyż po dworze zdo sie
Zima już niy wroci - natury to prawo
Choć czasym ta wiosna bywo tyż niymrawo.


Narty

Narty z Norwegii przeca pochodzom
Bestoż narciarze tukej se rodzom.


Saamowie

Saamowie piyrsi mieli te ziymie
-Niym tukej prziszło normańske plymie
Toż nawet dzisioj Sameting majom
Tymu co jejich nojbardzi pszajom.


Jedyny feler

Jedyny feler Norwegii w tym
Drogo gorzoła - teroz już wiym.

[broneknotgeld]

Lipiec w Elga

We jeziorze Femund pomoczysz te kije
Ryb tu ciyngym wiela i dobrze se żyje
Możno nawet trefisz na festyn ludowy
Zjeść popić tańcować zowdy żeś gotowy.

[broneknotgeld]

Lapończyk

Lapończyk w ty ziymi siedzioł se łod zowdy
Fin go prawie wyciep - wiela we tym prowdy.

[broneknotgeld]

"Nokia"

Wybijesz Finowi z gowy
Tyn telefon komorkowy?

Laponia

[broneknotgeld]

W Laponii

Kopruch tu latym gro rola króla
Przeca niy byda cie ze tym fulać
Chcesz to przekonej se tako som
Bo jo kopruchy kajś teroz mom.

Laponia

[broneknotgeld]

Zimom

Zimom w Laponii jasno na dworze
Bo przeca świycom polarne zorze
Łoziym miesiyncy jednak to trwo
Za dugo cosik - tako sie zdo.

[broneknotgeld]

Fińsko "stuga"

Jako tu to wyłonaczyć?
Z ruska byłoby "na daczy"
Stuga z saunom - to jest życie
Fina drapko tym skusicie.

[broneknotgeld]

Jynzyk fiński

Jako spokopić?
Możno trza łopić?