godomy po naszymu

18.02.10, 20:00
rudno.com.pl/index.php?option=com_content&view=article&id=81:szymon-brzoza-godomy-po-lsku&catid=30:kultura&Itemid=59
"Konkurs gwary śląskiej


Witom Wos. Jo żech je Szymon ze Rudna. Ta dorfka to mój Hajmat. Pogodom Wom
trocha łoniej.

Tu żech się łurodzioł i godom po naszemu od bajtla. Jak żech już pedzioł
miłuja Rudno.

Najwiynjszym noszym bogactwym som ludzie, kerzy wyzgernie i z powożaniym
przajom ślonskiem życiu.

Rudno je z dowien downa.

We Rudnie som dwa szynki, w kerych gody wielkie i komunije wyprawiajom. Ale
łozyroków je mało.

Jo łażam do szuli w Rudnie. Lona stoi kole koścvioła. Do tyj szuli łaziyli
wszyscy – moja ołma, ołpa. Starzik i starka, tanty i ujek, fater i mutra. We
wiosce momy tyż przeca kościoł, fara, farorza i kerchof. We Rudnie je
fusbalplac i Kinderplac, kaj jo i synki szpilomy w bala.



Jo Wom teraz połosprawiom mało wiela o łutopcu, kery we Rudnie onegdaj
gymzioł, hauserował. Ludzi topioł, łon tam boł kaj pierwy moc wody boło. Pod
szlojsom pod jej progem mieszkoł łon. Yno żdziebko z wody wyglondoł. Kole tego
stawu i szlojzy na wierchu mieszkoł Bamber. Do łonego przychodzioł tyż taki
jeden muzykont. Ros wieczorym szoł utoplec i słyszoł muzyka, kero mu się fest
podobała.Wloz do izby, ludzie chyciyli go i na gwołt przygrzoli mu palce na
fojerce i wsadzieli do szraubsztoka. Łobrzida ryczoł!

W pojszczotku stawu mioł swoja nowo komora. Bajtle kere se tam kompały ,
fasnoł od dołu za galołty i fertig!

Staw kole młyna wyschnoł, bo iże przestali się z nim cyrkolić. Utoplec musioł
się wynosić do morza, kaj jest po dzisiejszy dzień .

I terazki we Rudnie je inakszyj.



We Rudnie je wiela zwierzont domowych jak: gynsi. Kokoty, wiepsze, cieliki,
cigi i kunie.



O pierwy chowano u nos kunie i krowy, jak to we wsi.

Jo Wom teraski łopowiem jak u nos we Rudnie świnie wyglondajom.

Moł łona ryjok- wszendy ten ryjok wrożo, aby coś wywoniać, a co zaś wywonio to
zaroski pakuje do pyska.

Momy my od masorza szinka, zjodomy jom ze smakym. Izby w kerych mieszkajom
świnie chlywikym zowiom.



Krowa mo rogi i stryszki z kerych lyci mlyko.

Krowa wonio richtig fajnie, robi to świyży wiejski luft, cuć już jom z dalyka.

Kunia zaś z koleji majom wielke pony bałery, kerych u nos w Rudnie jest mocka.
Kuń je dugi, mo na samym przodku gowa,czyli łeb. Mo po łobu stronachłoczy, a w
gymbie mo zymby, po kerych se bado czy kuń je stary czy mody. Szkoda yno dyć
je go tera corazki myniej.



Lobyczjem we Rudnie jest Wilijo. Moja ołma wiela razy łosprawiała mi jak łoni
w doma Wilijoł fajrowali. W doma wszystko musi być na glanz. Kedy je już tak
dalyko, cało familija, a najbarzi bajtliki, wyglondajom pierwszy gwiozdy kero
je znakym rozpoczyncia wieczerzy. Pod serwetym dowo mutert kopka
siana.Wszystkygo zawsze jest zatela. Jo tyż już radujam się na fajrowanie,
gyszynki, adwynt, krisbaum i śwjynta jak i na bezrok we Rudnie.



To by beło na tela mojego glyndzynia .



Dienkujam Wom piyknie."
    • ballest Re: godomy po naszymu 18.02.10, 20:02
      https://rudno.com.pl/images/stories/Godomy/Godomy1.jpg

      Godka o familijny pamiontce



      Witom piyknie zebrano tukej czelodko

      Dzisiok byda Wom rzondzić ło takij ważnyj dlo moi familiji pamiontce. A wiycie
      czamu ło pamiontce, a niy ło berze do chichranio? NIi wiycie? Toż posłuchajcie
      co wóm nojpiyrw powiym ku przestrodze! Tako familijo i wieś, w kerej ludzie niy
      chcom pamiyntać ło swoi historii jest jak Tyn, niy przymierzajonc głupi ptok,
      kery se wytargoł piórka ze skrzideł a potym chcioł furgać. Prowda? Abo kiej tyn
      strom kerymu uciupali korzyni. Te skrzidła i korzyni to nosze downe pamiontki,
      tradycjo, roztomajte godki, pieśniczki i zabytki, kere nos Ślonzoków trzimajom w
      kupie i pokazują kaj je nasze miyjsce na tyj roztomiłej ziemiczce. Dobrze godom?
      Ja? Bez nich, jak powiada moja oma, ni ma zocy i pszonia ani we familiji, ani
      pomiyndzy ludziami.

      No już dość tygo rzondzynio. Terozki połosprawiom wóm ło tyj naszyj familijnej
      pamiątce, kero nos i cołko wieś tak piyknie, jak żech już pedziała, trzimie w
      kupie. Tom pamiontkom je murowany krziż, kery z dowiyn downa stoi w Rudnie, na
      naszy łonce, kero nazywo się Dołki. Tyn krziż ufundowała moja praprapra…oma. A
      pewnikiem niy wiycie czamu, bo ło tym wiy yno moja familijo? Ta bojka, abo
      Rychtyn, jak kto woli czysto prowda, łosprawiała mi moja oma, a omie zaś jyjj
      mamuliczka, a tyj mamuliczce jyj oma i tak dali i tak dali. Tak se łosprawiali z
      dziada pradziada, aże dotarła ta godka do noszych czasów.

      Toż posłuchejcie! ( Przerwa) Kiejsik za wsiom, tam kaj stoi tyn krziż boły yno
      same doły i bażoły, a wedle nich wiodła cesta ku chałupom. Zawdy tam cosik
      bulgotało, szumiało, jynczało, a tumany wiły sie po polach i szłapach ludzi,
      kerzy w strachu drapko lecieli ku chałupom. Kożdy boł już rod kiej nareszcie
      naloz się doma. Niy jedyn słyszoł jak cosik wołało to z jednyj, to z drugiej strony:

      - Sam pódź, tu je dobro droga!

      - Pódź sa mnom, jo cie powiede ku chałupie!

      No i niyjedyn biedny człek złaził z tygo chodniczka i loz w te doły i bażoły
      jak tyn gupielok jaki, totyż chyba już niy musza wóm godać, że nikt go wiyncyj
      we wsi niy łobaczył. Ludziska mieli już dość tygo, poszli do farorza po rada, a
      tyn kozoł im z poświynconygo stroma zrobić krziż i postawić go w tych dołach.
      Potym farosz łodprawił msza świynto, poświyncił ta ziemia, porzykoł z ludziami i
      przegnoł wszelakie złe dioski i łoszkliwe duchy, kere to miejsce nawiedzały.

      I tak kończy sie, ta bojka, a naczyno szczyro prowda. Na poczontku XX wieku
      drzewiany krziż łobalił sie na ziymia. Kiej to się stało moja praprapraoma
      łoślepła, niy pomogoły żodne kuracyje, toż z tego jankoru ło mało co nie
      dostała do gowy. Cołe dnie rzykała do Pon Bóczka i tyn jom wspomóg. W podziynce
      za to, tam kaj stoł stary, drzewiany krziż postawiła w 1925 roku nowy, murowany
      i do dzisiok stoi łon na naszyj łonce, a downe doły i bażoły yno przipomino
      przikopka z wodom.

      Nasz krziż chnet bydzie mioł 100 lot i nigdy nikomu nie wadził. Dopiero terozki
      dały mu rade chachory, kere nojpiyrw szczaskały figurke Maryji, a potym Pon
      Bóczka. Maryje mój opa pochowoł w ziymi, a konski figurki Pon Bóczka farorz
      schronił w kościele. Moja oma zaś kupiła nowe figurki, krziż łodnowiła i pora
      razy w roku w Dni Krziżowe, majowe i wielgi piontek spotykomy sie pod nim coby
      porzykać i w przikopie umyć gamba, dlo zdrowia, urody i na pamiontka mynki
      pańskiej, bo choć w Biblii ło tym niy stoi, ale kożdy porzondny Ślonzok wiy, że
      to Żydy wciepały Pon Buczka do wody kiej szoł na Golgota. Dobrze godom, pra?

      Musza Wom też pedzieć, że tako staro pamiontka to je bardzo ważno rzecz w kożdej
      wsi i familiji. Kożdy staro sie jak umiy, coby ło niom dbać. Chopy krziż
      pomalujom, trowa wedle niego wysieczom, a baby kwiotki nasadzom, bajtle je
      podlejom i piyknie Pon Bóczku pośpiywajom. A na kuniec to wóm powiym tak!

      Moja oma zawdy mi łonaczy tak: Dziołszka pamiyntej, miyj w zocy kożdygo człeka i
      żyj tak coby żodyn skuli ciebie niy loł ślozów i pamiyntej se, że nie jesteś
      soma na tym bożym świycie. Jedni majom złość kero ich wszistkich trziymie w
      kupie, inksi zaś stołki i piyniodze ło kiere się bijom, a jeszcze inksi, tacy
      jak my, majom swoje małe i wielgie krziże, kere ich łonczom i czyniom lepszymi,
      toż miyj je w zocy dziołszka, a bydzie ci dobrze!



      Dziynkuja piyknie żeście mie wysłuchali.

      rudno.com.pl/index.php?option=com_content&view=article&id=82:laura-gomolla-qgodomy-po-naszymuq&catid=30:kultura&Itemid=59
      • anton_28 Re: godomy po naszymu 18.02.10, 20:21

        Nasz krziż chnet bydzie mioł 100 lot i nigdy nikomu nie wadził
        . Dopiero terozki
        dały mu rade chachory, kere nojpiyrw szczaskały figurke
        Maryji, a potym Pon
        Bóczka. Maryje mój opa pochowoł w ziymi, a konski figurki Pon Bóczka
        farorz
        schronił w kościele. Moja oma zaś kupiła nowe figurki,
        krziż łodnowiła i pora
        razy w roku w Dni Krziżowe,

        fajno gyszichta, ale widza ze niy do konca sam je po Slonsku
        szkryflane!!!
        • ballest Re: godomy po naszymu 18.02.10, 20:26
          Na drodze z Plawniowitz do Rudzinca stoji krzyz co ufundowali Ballestremowie,
          ale godlo Ballestremow juz ukradli zlodzieje
          • sloneczko1 Re: godomy po naszymu 18.02.10, 20:47
            to je pościongane z różnych opowiadań
            a kuń to u nos sie niy godo;)

            ciekawe z jakego Rudna to som dzieci;)
            • ballest Re: godomy po naszymu 19.02.10, 23:06
              [i][sloneczko1 napisała:

              > to je pościongane z różnych opowiadań
              > a kuń to u nos sie niy godo;)
              >
              > ciekawe z jakego Rudna to som dzieci;)/i]

              Przeca znom te dzieci!
              Wiuym, ze u wos tak nie goudajom!
              U wos Tysz wszyscy do wojska szli;)
          • ballest Re: godomy po naszymu 18.02.10, 20:49
            www.gimnazjum.rudziniec.pl/osign.htm
    • szwager_z_laband Re: godomy po naszymu 18.02.10, 20:09
      Obrzida, dyc jo go znom - to je tyn som co u nos we Kuodce Zakanaum
      wele mosta miyszkou, a potym jakos sie straciou ...
      • ballest Re: godomy po naszymu 18.02.10, 20:11
        ;) jou tysz takich wiela znom
Pełna wersja