bratjakuba
16.05.10, 23:11
Chobyście ani nie chcieli iść na ta wandrowka to poczytać se opłaci
bo je napisane we piyknej godce.
Nowinka Tôwarzistwa Piastowaniô Ślónskij Môwy Danga 01/2010
Co tam rzegoce we krzipopie?
Danga zaprôszô na wieczornõ wandrówkã po czyszeckich barzołach
Na mokrich łónkach, w kanarkach i we krzipopach bez dziyń dzieje se małowiela. Ale na wieczór, jak skoro słóneczko straci se za lasã, zdô se, iże barzoły se budzóm do nowégo życiô. Òrôz poczynô wszandzie rzegotać, kumkać, kwakać a żwakać. Wodnô gadzina mô sam swojé coroczné weselné zgrómadzynié – przepiykni wiosynno-letni żabi kóncert!
Na całim Górnim Ślónsku żyje do kupy siedminôście gatónków żabów, chrostawich żabów, kumków i wodnich jaszczurków. Na naszi wandrówce spróbujymy niechtoré ś nich znejś, chycić do ranki i se jé òbejzdrzeć blank z bliska. Òsobliwie interesujóm nôs kumki i zielóné żabki, co nôleżóm do gatónków fest zagrożónich. Przi tim nauczimy se jé rozeznôwać po głojsie. Ò jejich życiu i òbyczajach bydymy rozprawiać po ślónsku.
Tóż Tôwarzistwo Piastowaniô Ślónskij Môwy „Danga“ w Czyszkach projsi Wôs piyknie na wieczorni szpacyr po czyszeckich barzołach i na spólnõ wieczerzõ na Ketzlerowym statku w Kotlinach – we gniôździe naszégo tôwarzistwa.
Kedy? W sobotã, 22 môj, trzi sztwierci na dziewióntõ na wieczór (godz. 20:45)
Kandy? Na parkingu przi kaczmie „Garden Cafe” we Czyszkach (Cisek) wele Kojźlô.
Szpacyr bydzie twać ze dwie godziny i kosztuje do kupy z wieczerzóm 10 zł (dzieci za darmo). Chto chce prziś, musi se nôprzód zamelduwać u Alojza Ketzlera, tel. 774 87 11 14 (zwónić nejlepszi popołedniu!).
Dejcie pozór: Na naszã wandrówkã bierymy nejwyżi 15 ludzi. Na szpacyr pódymy nawet wtedy, eźli bydzie lôć jak z kónwié. Nóm psota nie wadzi, bo żaby bardzo radé kómpióm se w dyszczu. Òbujcie se gumiôki a sprôwcie se małõ siyć do chytaniô szmaterlôków.