Fraszki i rymowanki z powiatu puckiego

[broneknotgeld]

Choć po ślonsku naszkryflane
Przeca Ziymi Pucki dane.

[broneknotgeld]

Ze stolicy ślonski fraszki
Skiż radości te igraszki.

Puck

[broneknotgeld]

Muzeum Rybołowstwa

Muzeum take na Helu szukej
Kaj piyrwyj kościoł tam teroz klupej
Nałdki dziwej tyż zabytkowe
Siedymset lot już pływoł tu czowiek.

[broneknotgeld]

Herb

Lew na rybie - to ci gratka
Jako we tym jest zagadka?
Możno w Kocie Wazow znak?
Łon Bałtyk traktyje tak?

[broneknotgeld]

Lew z łososiym

Lew łososia chycioł - to mi niy sztimuje
Dyć Gdańsk se Krziżokom przeca tyż buntowoł
Bestoż krol Szwecyji z flotom Puck zajmuje
Czy richtig pod zastaw tyn port łon dostowoł?

[broneknotgeld]

Prastary Puck

Archeolog godo - Tyn Puck jest leciwy
Soldy bizantyjske przeca tukej znodli
Ze szostego wieku - toż naprowdy dziwy
Tako w historyjo głymboko aż bodli.

[broneknotgeld]

Pucki łodpust

Toż tukej ryboki z cołki okolicy
Nojpiyrw se zbiyrajom we porcie w Kuźnicy
By razym do Pucka zatokom przepłynońć
Łodpustu puckego niy mogom łominońć

Dopłynom do brzegu - idom z procesyjom
Do "Pyjtra i Pawła" ci co z morza żyjom
Za ty "stary piyrwy" tako to bywało
Łod ćwierć wieku jednak na powrot nastało.

[broneknotgeld]

"Zopucko"

Tako Kaszuby zwom Kympa Pucko
Dlo nich to zowdy było Zopucko.

[broneknotgeld]

Ziymia Pucko

Downiyj ta Ziymia epniejszo była
Dyć sie ze czasym jakoś kurczyła
Choć Puck ze tego możno niy rod
Tako jak dzisioj fufcig już lot.

[broneknotgeld]

7 gmin

Siedym gmin puckich dyć dzisioj mocie
Se na Pomorzu wszyske poznocie
Piykne to przeca wybrzeżo strony
Trza rymym ślonskim sypnońć na łonych.

[broneknotgeld]

Szczyńśliwo siodymka

Hel Jastarnia Kosakowo
Krokowa Władysławowo
Miasto Puck i tako "wioska"
Szczyńścio znojdziesz tu niytroszka.

[broneknotgeld]

Gisdepka

Łod połednia Gisdepka Zopucko łoblywo
Jyj piykny dolince niyjedyn se dziwo.

[broneknotgeld]

Puszcza Darzlubsko

Łod zachodu mosz Puszczy Darzlubski tu konski
Kedyś bor wielgachny dzisioj jakiś "wonski".

[broneknotgeld]

Wielke Morze

Nad "Wielkim Morzym" dziedzina leży
Sami to wiycie - niy czeba wierzyć.

[broneknotgeld]

Małe Morze

Nikierzy zatokom łod Pucka je zwom
Dyć jo se we gowie "Małe Morze" mom.

[broneknotgeld]

Fufcig rokow (1954-2004)

Rowno fufcig rokow Ziymia Pucko tako
Siedym gmin se dzisioj na dziedzina skłodo
Piyrwyj wiynkszo była dyć to już jednako
Ważne że tu Kaszub po swojymu godo.

[broneknotgeld]

Ostrowo (V tysionclecie p.n.e.)

Toz trza se cofnońć naprowdy wiela
Co archeolog przeca poradzi
Jego łopata łodkryła sztela
Czy ta nojstarszo? Idzie se wadzić

Dyć niych to bydzie - mie cołkym styknie
Wele Ostrowa zocne pradzieje
Tako zacznymy szkryflać tu piyknie
Ło ziymi kero se do nos śmieje.

[broneknotgeld]

W XII wieku

Puck kasztelańskim terozki grodym
We władzy princa gdańskego
Potrza Pomorzu siyły i zgody
Tyż mocny rynki do tego.

[broneknotgeld]

Przi cystersach

Ano przi cystersach już se Puck bogacioł
Osadom targowom dyć drapko łon stowo
Zdało sie princowi co dwor na tym stracioł?
-Tako za dziedzina Starzyno im dowo.

[broneknotgeld]

Puck 1309

Ze Pomorzym Gdańskim Puck w rynkach Krziżakow
Starosta rybicki we niym urzynduje
Sztela rosła dali - niy wadzioł w tym zakon
Przeca zamek tukej i mury rychtuje.

[broneknotgeld]

W krziżacki komturji gdański

W komturji gdański Puck znaczoł wiela
Tako tu za nich już wdycki
Toż jakby morza wachuje sztela
Tukej starosta rybicki.

[broneknotgeld]

W Prusach Krolewskich

Z pokojym toruńskim tako se już stało
Polska łodzyskała ze tym dyć niymało
Aż czi wojewodztwa- tyż przeca pomorske
Z cołkom Ziymiom Puckom kaj ryboki dziorske.

[broneknotgeld]

Za Zygmunta Starego

Ano krol polski myśloł ło flocie
Co na Bałtyku siyłom być miała
Ze kaprow tukej mioł trocha pociech
Potyngom morskom Polska se zdała?

[broneknotgeld]

Za Stefana Batorego

Gdańsk se krola niy chcioł słuchać
Flota pucko dyć łod czego?
Trza w gdańszczanach stympić ducha
I łod buntu łodwiyść tego

Ernest Wejher był starostom
Toż tam niyroz słoł okrynty
Choć Gdańsk zdobyć niy jest prosto
I Batory tyż niy świynty.

[broneknotgeld]

1635

Władysławowo Kazimierzowo
Na Helu rosnom tako dwa forty
Dyć ze tym rokym pokoj sie stowo
Koncept krolewski niywiela worty.

[broneknotgeld]

Starostwo pucke 1678

Już łod gdańszczan wykupiome
Juzaś cieszy łoko krola
Som starosta we koronie
Toż Jan III! -Co mom fulać?

Chcioł Sobieski czimać morze
Siyła w tym Rzeczpospolity
Blyszczy na Europy dworze
Dyć czy już łostanie przi tym?

[broneknotgeld]

Za Sasow

A dyć za Sasow było niyleko
I ziymia pucko zdało sie czeko
Choć Przebendowscy już jom czimali
Źle historyjo kulo se dali.

[broneknotgeld]

Puck 1808

Skiż reformy pruski czeba teroz ślintać
Ło downy świytności jako tu pamiyntać?
Starostwa już niy ma - grod zdoł sie za mały
Dyć tyż podupado poleku łon cały.

[broneknotgeld]

Kreis 1887

Ze tym rokym - to wom powiym
Puck zaś miastym powiatowym.

[broneknotgeld]

Port wojynny

Ano jak za krolow zaś Puck we tych szatach
Był we wolny Polsce dyć nojpiyrszym portym
Jak Gdynia urosła prziszły gorsze lata
Zdało sie co richtig myni tyn grod worty.

[broneknotgeld]

Powiat Pucki 1954-1975

Ano za komuny Puck zaś powiatowy
Ze tym we proficie - kożdy tako powiy
Se tu szporty wodne piyknie rozkulajom
A i wczasowicze ziymi pucki pszajom.

Hel

[broneknotgeld]

"Stary Hel"

W downych wiekach miasto bogate tu było
Dyć sie im we grodzie coś za dobrze żyło
Tako rozpuściyli se richtig miyszczanie
We gowach już yno ciyngym używanie

Toż morze ich srogo za to pokorało
W jedna noc "Hel Stary" se do sia zabrało
Setki rokow przeszły - zapomnieć niy idzie
Przi Zielonych Świontkach wspomnisz ło ty biydzie

Miasto sie we morzu wtedy ukazuje
Dyć borokym rybok kery zanurkuje
Widokym skuszony ty mokry dziedziny
Ponoć już na zowdy łostanie tam driny.

[broneknotgeld]

W helski latarni

Richtog morza widać wiela
I "łogonek" - tako sztela.

[broneknotgeld]

Słony Bałtyk

Ponboczek śledzie w morzu se moczy
Tako cie Bałtyk szczypie we łoczy.

[broneknotgeld]

Na Hel

Na Hel z deskom i żagelkym
Przi wiaterku choć niywielkim
Tu dlo windsurferow raj
Prawiom co te morze - naj!

[broneknotgeld]

"Krowi łogon"

Tako tyż ło Helu ryboki tu prawiom
Dyć dojyniym "krowy" sie jednak niy bawiom.

[broneknotgeld]

Koniec czy poczontek?

Czy sie Polska Helym zaczyno - czy kończy?
-Wiym co "krowi łogon" ze resztom se łonczy.

[broneknotgeld]

Hazardzistom

Bałtyk hazardzistom służy
Trza mieć szczyńście by se użyć.

[broneknotgeld]

"Maszoperia" w helu

Kotwic wiela sieci tako
W "Maszoperii" niy jednako
Dyć tu richtig dobrze zjysz
Po kaszubsku - przeca wiysz.

[broneknotgeld]

Dyć "Helu" być miało
Feleru se chciało?

[broneknotgeld]

Kaszubsko prażnica

Smażonka na alu
Zdo sie żeś na balu
Aż chce sie tańcować
I frelkom coś dować

[broneknotgeld]

Kaszubsko rybonka

Zupa rybno ze kloskami
Czy smakuje? -Wiycie sami.

[broneknotgeld]

"Bantczi"

Suszono na słonku - grillym dopieczono
Takom flondrom zdo sie dusza napasiono.

[broneknotgeld]

Fokarium w Helu

Łostatnie foczki tu sie łostały
Dyć piyrwyj jejich Bałtyk był cały
Możno im jeszcze czas taki przidzie
Co morze domym na powrot bydzie.

[broneknotgeld]

"Ksyne z pulkami"

Kartofle w mundurkach i flaki ze ala
Krucafuks - coś zaroz przi tymu łobala.

[broneknotgeld]

"Stary Hel"

W downych wiekach miasto bogate tu było
Dyć sie im we grodzie coś za dobrze żyło
Tako rozpuściyli se richtig miyszczanie
We gowach już yno ciyngym używanie

Toż morze ich srogo za to pokorało
W jedna noc "Hel Stary" se do sia zabrało
Setki rokow przeszły - zapomnieć niy idzie
Przi Zielonych Świontkach wspomnisz ło ty biydzie

Miasto sie we morzu wtedy ukazuje
Dyć borokym rybok kery zanurkuje
Widokym skuszony ty mokry dziedziny
Ponoć już na zowdy łostanie tam driny.

[broneknotgeld]

"Hael"

Dlo Duńczyka to był - hok
Niym Hel w miejskość zrobioł krok.

[broneknotgeld]

"Gyńsi kark"

Pedzioł mi na Helu smark
Co mo gowa gyńsi kark.

[broneknotgeld]

[broneknotgeld]

W średniowieczu

W średniowieczu na śledziach tyn Hel se bogacioł
Tran tu wytopiali - tyż na tym niy tracioł.

[broneknotgeld]

Nowo Hela 1430

Z tym rokym zyszczy już miejske prawa
Dwie Hele w kupie - to ci zabawa.

[broneknotgeld]

Nowo Hela 1572

Łogyń trowi Nowo Hela
Niy podźwignie se już tela
By ty Stary wlyźć w parada
Z tym niy grozi tukej zwada.

[broneknotgeld]

Hel 1872

Czista lot lymu pożar Hel trowioł
Aże do teroz purtek go dowioł
Toż prawa miejske z tym rokym stracioł
Tako uciyrpioł a niy wbogacioł.

[broneknotgeld]

Bliza piyrwyj?

Jeszcze niym tu piyrszo bliza zaświyciyła
Zapolali łogyń na wieży kościoła
Mozno sie skiż tego świontynia spolyła
Szify za daleko by na pożar wołać.

[broneknotgeld]

Helsko bliza 1667

Staro bliza wypolono - nowo wnet stowiajom
Niychej w nocy i ryboki na Hel se wrocajom.

[broneknotgeld]

Bliza 1826/27

Ano już bliza jest murowano
Przeszło styrdziści metrow dźwigano
Blask ze niyj lecioł mil siedymnoście
Łolyj z rzepoku polom jyjmoście.

[broneknotgeld]

Bliza 1926

Łolyj ze rzepoku na nafta zmiyniyli
Ciekawe czy dali ze tym zablyńdziyli.

[broneknotgeld]

Bliza 1942

Dziesiyńć metrow łod ty stary
Nowo bliza teroz stowo
Dyć to niy som jakeś czary
Wcale se nom to niy zdowo.

Osłonino

[broneknotgeld]

Piwo z Osłonina

Downiyj tyn majontek skiż biyra tyż znali
Lepsze łod angelskich - tym se dziwowali
Dyć Anglik dwor czimoł - zwali go Gibsone
Toż "słońce ze chmielu" było tu warzone.

Rzucewo

[broneknotgeld]

Aleja Lipowo

Z Osłonina do Rzucewa przyńdziesz se alejom
Lipy chnetko lot sztyrysta do ludzi sie śmiejom
Prowda co to nojgryfniejszo tukej drzew jest droga
W cołki Polsce - to tyż szczyrze tukej szkryfnońć moga.

[broneknotgeld]

Rzucewo Wejherow

Ernest Wejher kupioł - Jan erbnoł po fatrze
Zamek i aleja lipowo skiż niego
Historyjo przeca tego już niy zatrze
Majontek ze klucza był wejherowskiego

Zaś Jakub z Wejherow - pan na swojim grodzie
Se łod Radziwiłłow wzioł za ślubno frela
Toż po śmierci jego Rzucewo we rodzie
Tym litewskim było chocioż małowiela

[broneknotgeld]

Rzucewo Sobieskich

Se Michał Radziwiłł z Sobieskom łożynioł
Łona zaś bratowi te Rzucewo dała
Zamek sie krolewskom jakby dongom miynioł
Bo przi Janie III Polska zablyszczała.

[broneknotgeld]

W dobrach Przebendowskich

Łod Sobieskich je kupioł Pyjter Przebendowski
Toż zamek już stary - mioł z niym ździybko troski.

[broneknotgeld]

Rzucewsko aleja

Marysiyńka Sobiesko czista lip sadziyła?
Niy ma sie co wadzić - prowda inkszo była.

[broneknotgeld]

Angliki w Rzucewie

Dwor kupioł ze Gdańska rezydent angielski
Biyr broł z Osłonina i żywot mioł sielski
Pomarł bezpotomnie - siostrzyńce to wziyli
Grafy Keiserlingki teroz tu rzońdziyli.

[broneknotgeld]

Rzucewo Belowow

Emma z Keiserlingkow wyszła za Belowa
Rzucewo już niy mo nic do Wejherowa
Po prowdzie ze zamku tyż była ruina
Dyć pryndko zaś blysła łod nowa dziedzina.

[broneknotgeld]

Pałac w Rzucewie

W Rzucewie łod nowa pałac trza budować
Architekt z Berlina styl Tudorow doł
Do dzisioj se tymu idzie fest dziwować
Bo przeczimoł wojny - szczyńście take mioł.

[broneknotgeld]

Rzucewo - 28.VII.1851

Krol pruski w Rzucewie słonku se dziwowoł
Zaćmiyło sie cołkym - słowo na to dowoł.

[broneknotgeld]

Archeolog w Rzucewie

Dyć tukej lot tymu ze tysionce sztyry
Łowcow fok bałtyckich prziniosły tyż gyry
Se mieli osada z kamiynio epoki
Dlo archeologa to "milowe kroki".

[broneknotgeld]

"Zamek Jana III Sobieskiego"

Piyknie kajsik dzwoni - dyć w kerym kościele?
Pałac łod Belowow wziyli we hotele.

[c.kapturek]

cudne fraszki))))

[broneknotgeld]

Łoj! -Witej Kapturku. Bydzie tu tego jeszcze trocha wiyncy, jak znojda na to
czas.
Pozdrowiom ze stolicy ślonski fraszki.

[c.kapturek]

racja Bronek i na wene musi być dobra pora hihi)))))
również pozdrawiam)))))

[broneknotgeld]

Łoj, niy idzie tu ło wyna - czasu brakuje.

[c.kapturek]

acha....tyż prowda))))))

[broneknotgeld]

"Ksyne z pulkami"

Kartofle w mundurkach i flaki ze ala
Krucafuks - coś zaroz przi tymu łobala.

[broneknotgeld]

"Kaptain Morgan"

Po piracku zjysz popijesz
Z bekom piwa wiysz że żyjesz.

Celbowo

[broneknotgeld]

Redeneckerowie

W Gdańsku na piwie zbiyli majontek
Choć niy był we tym jakiś wyjontek
Tyż skuli tego - tako se zdowo
Pryndko kupiyli tyn dwor Celbowo.

[broneknotgeld]

Cmyntorz w Celbowie

Po Redeneckerach tyn cmyntorz se łostoł
Widać że po wojnie wciyry jakby dostoł
Taki historyjo palec położyła
Wszysko skuli wojny kero jednak - była.

[broneknotgeld]

Wele starego buka

Stoji stoł z kamiynia wele tego buka
Historyji jego kaj dzisioj nom szukać?
Czy tukej żniwiorze se łodpoczywali?
Czy syńdzie wyroki na ludzi dowali?
A możno łon czasy pogańske pamiynto?
Dyć mogła ta ziymia tyż dlo nich być świynto

Sławutówko

[broneknotgeld]

Stary Młyn

Młyn na Gisdepce łod von Belowa
Jakby pod ziymia chcioł se już schować
A przeca piyrwyj ciyngym mloł zboże
Co ze niym bydzie? -Przidać se może.

[broneknotgeld]

Pałac w Sławutówku

Von Belowy tyn pałac za Niymca czimali
Zocnościom niywiela inkszym ustympowoł
Nojczyńści w niym jednak yno zimowali
Ponoć wiyncy ciepła familiji dowoł.

[broneknotgeld]

Grob von Belowow

W Sławutówku znojdziesz - krziżym cie powito
Gustel ze Henriettom leżom w niym spokojnie
Dziedzice majontku - jakby sie ktoś pytoł
Bo może niy wiedzieć tela lot po wojnie.

[broneknotgeld]

Gustaw von Below (1855-1940)

Toż na bezrok bydzie sto piyńdziesiont lot
Jak muter rodziyła a fater był rod
We młodości wiela karlus sztudiyrowoł
Potym w dyplomacji pruski "arbajtowoł"

Ambasadorowoł przeca we Lizbonie
Tako samo w Sofii choć na tym niy koniec
Przeca w Watykanie potym dali służoł
Niym pomarł to jeszcze coś von Below użoł.

[broneknotgeld]

Henrietta von Below

Możny rod Quistorp doł nom ta frela
Gustaw von Below przed ołtorz prosioł
Szczyńścio z tym było w "Zopucku" wiela
Na rynkach ślubno ponoć łon nosioł

Henrietta chopu swojymu pszoła
Ze niym we świecie tyż "brylowała"
Wpiyrw Gustla świynty Pyjter chcioł wołać
Toż w Sławutówku go pochowała

Ponboczek wojna zezwoloł przeżyć
Ze Ruska rynki jednak zginyła
We tańcu - tymu możecie wierzyć
Przeca "harmoszkom" pepecha była.

[c.kapturek]

hiehiehie super!

[broneknotgeld]

No toż trza by zaś cosik wciepnońć ze nowszych rymowanek.

Władysławowo

[broneknotgeld]

Ścieżka rowerowo

Z Chałup do Juraty przejedziesz na kole
Dyć ścieżka pociongnom do Władysławowa
Zic cie niy umynczy - rowno jak na stole
Burgemajster Drzeżdżon dowo za to gowa.

[broneknotgeld]

27.08.2005 Władysławowo

"Żegnej Lato" - festyn taki
Zowdy jakby łon jednaki
Niy rozpieszczo nasze morze
Przeca lato durś na dworze.

[broneknotgeld]

"Jazz z piwkym"

Do "Irisch Pubu" w szwortki na piwo
Z jazzu niy yno gowa sie kiwo.

Rekowo

[broneknotgeld]

Pałac w Rekowie

Niyherski dzisioj tyn pałac tukej
Piyrwyj z niym tako niy było
Na przedwojynno kartka pokukej
Blyszczoł w Rekowie aż miło.

[broneknotgeld]

Paweł Mencke

Mencke gospodarzoł w majontku Rekowo
Daleko stond szukej lepszego
Rechtorym w tym jakby - to mi sie niy zdowo
Von Krockow szkolorzym u niego.

[broneknotgeld]

Źrodełko

We lesie wele Rekowa
Już widać Gisdepki gowa.

Mechowo

[broneknotgeld]

Mechowo 1300

Radysław z Darżlubia - toż se niy wydowo
Cystersom oliwskim sprzedoł te Mechowo
Tako z historyjom sie wioska witała
Wieki fest kulały a łona durś trwała.

[broneknotgeld]

Mechowsko parafijo 1300

Toż ze cystersami parafiom se stowo
I kościoł przi tymu piyrszy budowany
Już wiyncy znaczyło te zocne Mechowo
Słonko blyszczy jaśni jakby tukej ranym.

[broneknotgeld]

Piyrszy kościoł 1300-1583

Ty parafiji dość długo służoł
Skuli pożaru wiyncy niy użoł.

[broneknotgeld]

"Z pruskego muru"

Z pruskego muru świontynia drugo
Możno niy stoła tyż tukej dugo
Opat Rybiński tym se fest wsławioł
Że czeci kościoł tukej wystawioł.

[broneknotgeld]

-Czeci kościoł 1742

Jacek Rybiński - opat w Oliwie
Stowio te cudo w Mechowie
Sie barokowi gryfnymu dziwej
Uciecha łazi po gowie

Kto przi ołtorzu do świyntych rzyko
Maryji Pannie paciyrz tyż dowo
Tego utropa myni już tyko
I jakby Niebo przed łoczy stowo.
-
forum.gazeta.pl/forum/71,1.html?f=28940

[broneknotgeld]

Łobroz Nojświyntszy Maryji Panny

Ze szkoły Strobla wyloz czy Hana?
Wadzom sie czasym tukej łod rana
Dyć Marja Panna Koronowano
Ku podziwianiu nom wszyskim dano!

[broneknotgeld]

Mechowski dwor

Piyrwyj pewno był we krasie
Zaniydbany ło tym czasie
Po von Bronke dyć erbniony
Tako dzisioj podniszczony.

[broneknotgeld]

Mechowski kościoł

Dyć z łobrozow tyż go znocie
Bo malyrzy łon prziciongo
Barok przed łoczami mocie
Do palety czy wos wciongo?

[broneknotgeld]

Tabula

Tabula ksionżoszkow nońdziesz na kościele
Zły tref do Piaśnicy wiod ich ze ty sztele.

[broneknotgeld]

Ksiondz kanonik Bolesław Witkowski

Richtig dugo istny był tu za farorza
Możno skuli tego Bolkow teroz wiela
Posłowoł łon nawet - se szkryfnońć łodwoża
W czasach kedy prusko była cołko sztela.

[broneknotgeld]

Jan Dzieżdżon

Na cmyntorzu znojdziecie tu jego mogiła
Tako porzykejcie i świyczka łoświćcie
Kaszubsko dziedzina we sercu mu była
Trza pamiyntać ło tym tako i wy dziydzcie.

[broneknotgeld]

Pioro Dzieżdżona

Czy Smyntek po kartach mu pioro prowadzioł?
Som by tela szkryfnońć czowiek niy poradzioł!

[broneknotgeld]

Jan Dzieżdżon 1937-1992

Donatowo go witało - Mechowo żegnało
Dlo wypszony Ziymi Pucki zrobio łon niymało
Zdo sie jako "krol kaszubski" bogactwo łostawioł
Dziynki niymu cołki Polsce tyn region se jawioł.

[broneknotgeld]

Ksiondz Bolesław Witkowski (1895)

Dugo farorzowoł we ty wsi Mechowo
Ziylorstwa se czimoł i kurowoł ludzi
Drugo wojna richtig naprzeciw mu stowo
Kulka hitlerowsko - już se niy łobudzi.

[broneknotgeld]

Darżlubske Buki

Rezerwat taki kaj wieś Mechowo
Buk co mo sto lot tu niych se schowo.

[broneknotgeld]

Grota w Mechowie

Malutki rezerwat taki se tu majom
Grota niy głymboko dyć przeca jyj pszajom
Poranoście metrow richtig jest szyroko
I dwa razy tela z tym dugo na łoko.

[broneknotgeld]

Richtig?

Richtig do Żarnowca mog żeś ciś z Mechowa?
Grota tu malutko. Czy ciyrpisz na gowa?

Domatowo

[broneknotgeld]

Domatowo

Domatowo jezioro swoje mo we zocy
Bielawa zodziwi dyć niyjedne łoczy
Kaj łabońdź se lyngnie wyspa tam znojdziecie
Niy z biołości ptoka te miano jest przecie.

[broneknotgeld]

Bioły łabońdź - stond Bielawa?
Toż ciekawo richtig sprawa.

[broneknotgeld]

"Dutki ziemskie brzeskie" 1402

Piorym łod Kaszuby te "akta" szkryfnione
Widać w nich zaczontek dyć przeca niy koniec
Ty godki kaszubski w tutejszy dziedzinie
Toż łona na wieki im tako niy minie.

[broneknotgeld]

Domatowo 1303

Piyrszy zapis ło ty szteli
Historyjo tako dowo
By my ło tym coś wiedzieli
Jake stare Domatowo.

[broneknotgeld]

Domatowo 1310

We krziżackich ze tym rynkach
Czy je czeko teroz mynka?

[broneknotgeld]

Domatowo 1333

Cystersow oliwskich już te Domatowo
Tako pobożniejsze - czy sie yno zdowo?

[broneknotgeld]

Domatowo 1772

Klosztory piyrwyj richtig bogate
Majom być teroz jakby sagate
Toż Domatowo Skarbu Pruskego
Kaszuba zyszczy? -Psinco ze tego!

[broneknotgeld]

"Bielawa"

Ze kaszubski godki tako torfowisko
Dyć w tym ślonski "maras" zdo sie tyż nom blysko.

[broneknotgeld]

--Kaj "bielawy"?

Bielawy tam zowdy kaj smok pod ubity
Torfowisko przeca ze bestyji juchy
Z sierści mech se robi richtig drapko przi tym
Dyć czy sie tu znodli kedyś take zuchy?

Potworowi łoni mogliby dać rady
Co ponoć i łogniym bor darżlubski poloł
Ło to roz Kaszuby wziyli se do zwady
Joch widzioł stolyma - bestoż żech ich smoloł.

forum.gazeta.pl/forum/71,1.html?f=28940

[broneknotgeld]

Kaszubski Smyntek

We czasach pogańskich Smyntek był tu bogym?
Z doma niy gonionym - witanym ze progym?
Dyć przi krześcijaństwie co ze niym se stało?
Aże mi sie teroz na smyntek zebrało.

forum.gazeta.pl/forum/71,1.html?f=28940

[broneknotgeld]

Dom Dzieżdżona

Tu sie wychowoł i miyszkoł dugo
Teroz tabula już do nos mrugo
We Domatowie tyż rechtorowoł
Tako szkolorzom łod sia coś dowoł.

[broneknotgeld]

Smyntek djobłym

Djobła nikerzy w niym dzisioj widzom
Tako sie jego naprowdy wstydzom
Tam kaj niywola łon sie pojawio
I jeszcze wiyncy utropy sprawio.

[broneknotgeld]

Smyntek złom siyłom

Smyntek złom siyłom w duszy Kaszuby
Kero go wiedzie ciyngym do zguby
Pszonie swyj ziymi przi istnym straci
Dyć czym se potym jom ubogaci?

[broneknotgeld]

Rożniste gymby

Zdo sie mo Smyntek gymby rożniste
Co dlo Kaszubow richtig niyczyste.

Leśniewo

[broneknotgeld]

Leśniewo

Puszcza darżlubsko wszyndy dokoła
Toż i Leśniewo trza już prziwołać.

[broneknotgeld]

Piyrwyj "Nowe Mechowo"

Toż Leśniewo - sie niy zdowo
Zwali wpiyrw "Nowe Mechowo".

[broneknotgeld]

Nowe Mechowo 1432

Nowe Mechowo już wzmiankowane
Z tym historyji polski jest dane
Dyć z czasym miano Leśniewa przidzie
Te piyrsze tako w łodstawce bydzie.

[broneknotgeld]

Kościoł w Leśniewie 1892

Toż wangeliki go budowali
Tref tako sie kulnoł tukej
Że katolikom służy łon dali
A protestantow kaj szukej?

[broneknotgeld]

Szkolno tabula

Tabula Dambka możno niy miniesz
Był partyzantym łon tukej
Dyć wpiyrw rechtorym w pucki dziedzinie
-Już go po wojnie niy szukej.

[broneknotgeld]

TOW "Gryf Kaszubski" 1940

Rechtor Dambek se chyto już konspiracyji
Choć przeca przi Niymcach z tym wiela mecyji
Prawiom co "Jur" strachu przed istnymi niy mioł
Bo mu "ruch oporu" ciyngym w duszy drzymoł.

[broneknotgeld]

TOW "Gryf Pomorski" 1941

"Gryf Kaszubski" ciongnie inksze zbrojne grupy
Terozki w "Pomorskim" cuzamyn do kupy.

[broneknotgeld]

"Gryf Pomorski" 1942

"Gryfowcy" ciongnyli do Armji Krajowy
Złym trefym niy wyszło ze tego im nic
Niymiec se ło wszyskim juz terozki dowiy
Stutthof im pisany - a to inkszy "wic".

[broneknotgeld]

"Jur" - 4.III.1944

Wele Gołubia "Jur" złozoł gowa
Dopod go gdański tu gestapowiec
Możno to była djobołow zmowa
Co łon sie miynioł Jan Kaszubowiec.

Kaszuby

[broneknotgeld]

Co kaszubske pucke tako
Toż niy bydzie ktoś tu krakoł.

[broneknotgeld]

Kaszuby dzisioj

Puck Jastarnio Kartuzy i Władysławowo
To sztele kaj słychać durś kaszubske słowo
We Żukowie Rumi Redzie Wejherowie
Kaszubskim korzyniom tyż fest pszaje czowiek

Trza by tu rachować jeszcze Kościerzyna
Bo ciyngym tam przeca ty godki dziedzina
Miast wiyncy tu jakoś dołożyć niy idzie
Dyć gmin richtig mocka - tam Kaszub se bydzie.

[broneknotgeld]

Na Uniwerku Gdańskim

Kaszubskego lektoratu tyż se dorobiyli
Toż tukej jynzyka za "dialekt" niy wziyli.

[broneknotgeld]

Biblio po kaszubsku

Nowy Testamynt wydany majom
Teroz za Stary już se chytajom.

[broneknotgeld]

Kaszubske "beloki"

Na ucho ich tako zowdy tu poznocie
Kaj "ł" tam "l" ciyngym se u nich "beloce".

[broneknotgeld]

"Rodno zemia" - TVP Gdańsk

Po kaszubsku tyn program ciyngym tukej leci
Gdańsk richtig promuje lokalno kultura
Jynzyka se uczom w szkołach małe dzieci
Słychać go na polu i we miejskich murach.

[broneknotgeld]

"Plińce"

Ze "plińcow" na Helu aże mie brzuch boli
Plackow kartoflanych - jak ktosik z wos woli.

[broneknotgeld]

"Maszoperia"

Tako zowiom na Helu chnet co drugo knajpa
Jak gyszeft rybokow co czimali łajba.

[broneknotgeld]

"Mniyjszość etniczno"

"Mniyjszości etniczne" ciyngym w Polsce siedzom
Ślonzoki Kaszuby Mazury to wiedzom
Piyrwyj niż Polany przeca u sia byli
Przez wieki tyż zowdy po swojymu żyli.

[broneknotgeld]

"Dux Slavorum et Cassubie"

To miano Gryfici mieli łod Barnima
Kaszuby łostały choć princow już niy ma.

[broneknotgeld]

Wejherowo - duchowo stolica Kaszub

Kaszubskim duchym dycho ta sztela
Toż ło Kaszubach szkryfna tu wiela.

[broneknotgeld]

"Gbur to je mur"

Gbur to Kaszuba co z ziymi żył
A łona wiela mu dała siył
Czasym mocniejszy łod "ponka" bywoł
Toz se harowy mioł take "żniwo".

[broneknotgeld]

Kaszubom to dobrze

Kaszubow jest myni dyć dobrze sie majom
Łoni swoji godce ciyngym przeca pszajom.

[broneknotgeld]

"Norda" - tygodniowy dodatek "Dziynnika Bałtyckego"

Kaszuby se "Norda" w kaszubskim szkryflajom
Wiyncy łod Ślonzokow ze tym ciyngym majom.

[broneknotgeld]

Som "krole kaszubske"

Som na Kaszubach - wiela tyż było
Tu tradycyji durś se czimali
Dlo inkszych zowdy coś sie robiyło
Tako jest dzisioj i bydzie dali.

[broneknotgeld]

Biskup Mirry

Mo biskup Mirry Kaszubow w pieczy
Niych se niy zdowo co yno dzieci.

[broneknotgeld]

Gbur

"Gbur" na Kaszubach to niy przezwisko
- Gospodorz dobry co czimie wszysko.

[broneknotgeld]

Wiara

Godajom - "Kaszuby wiarom łoddychajom"
Dyć djobła za skorom tyż czasami majom.

[broneknotgeld]

Legynda z Osłonina

Kaj wysoki brzeg jest ty Pucki Zatoki
Ponoć śpiom we zbrojach kaszubske wojoki
Kedyś se łobudzom - na Gdańsk pokerujom
Czas jeszcze niy prziszoł - Kaszuby to czujom

Rycerze to przeca pomorskego ksiyńcia
Co chcom być świodkami regionu poczyńcia
Kery choć przi Polsce tyż som by sie rzońdzioł
I niy skiż wszyskego we Warszawie błońdzioł.