Gość: Reden
IP: *.katowice.cvx.ppp.tpnet.pl
24.01.02, 19:47
List łotwarty do miyszkańców Chorzowa.
Miyszkom w Chorzowie, kaj wychowuja z żonom mojygo bajtla jak go
nazywom „ksiynciem Hajduk”. Niy łotym ale chca sam napisać yno o zbiżajoncych
sie po leku wyborach samorzondowych i łotym jak to niekere sie do nich pryndko
szykujom.
W kożdy czwortek kupuja „Gońca Górnośląskiego” mimo że wiyncy tam je gupotów co
mie niy interesujom niźli historji abo ciykawych informacji i fotografji
miasta. Jo tyż ale niy łotym. Wejrzołech sie na okładka i dupny tytuł: „Chorzów
na krawędzi bankructwa”. W środku zaś mogymy sie poczytać o rzondach prezydenta
mgr inż. Marka Kopla kere doprowadzili do „bankructwa” chorzoskij kasy (dług 27
milionów), stuprocyntowego wzrostu bezrobocio łod 1995 roku (23 procent), że
geltag jaki biere z kasy to 140.000 zł. i inksze take machloje.
Jo go nigdy niy lubiołech (nojbardzij to te wsziskie zdjyncia we folderach
miyjskich kaj durch sie asi tym filokiym) a tyn cołki klub „Wspólnie dla
Chorzowa” kojarzyłech yno z karierowiczami co sie miyjsca we kapsach porobili
na haby. To że miasto sie wcale niy rozwijo to kożdy już downo widzioł i niy
musioł sie tego cajtunga kupować. Niejedyn słyszoł fto sie niyźle zarobioł na
brukowaniu Wolki etc.. Niy ma co sie sam rospisywać, je gorzij i koniyc...
Po leku, po leku... Przeca idom wybory samorzondowe niy? Na stronie
piontyj „Gońca” mogymy sie poczytać że som już przedstawiciele tych wsziskich
wnyrwionych chorzowianów. „Społeczna Odnowa Samorządowa” (SOS) jak sie
nazywajom, tyż majom doś i wiydzom jak wyprowadzić miasto z kryzysu.
Postanowiłech sie im trocha bliżyj przijrzeć. Kogo momy w tym klubie? Piotr
Wolak- członek rady miasta z AWSu, Eugeniusz Kosmała z Unii Wolności radny
łostatnich dwóch kadyncji, Ryszard Anders radny AWS, Witold Pelka
radny „Wspólnie dla Chorzowa”, Henryk Wróblewski AWS, członek rady miasta
łostatnich dwóch kadyncji. Musza dodać że ta „reklama” „SOS-u” je
zatytułowano „Dość bezradności”.
Pierona! Łone majom tupet. Kożdy sie stołek swojom rziciom zagrzoł a teroz im
szkoda. Wybory sie zbliżajom czeba bydzie coś wymyślić, pra? Jedyn na drugiygo
bydzie wyzywoł i łoskarżoł. Po trupach sie muszom dostać do koryta. Przeca łone
już rzondzili... Co mie interesuje ta godka że rzondzioł „Kopel i ekipa” a im
durch gemby zawiyrali i rynce wionzali? Mie sie to yno kojarzy z polskim
parlamyntem kaj momy take polityczne warcholstwo i walka ło stołki. Jo niy chca
takich powadzonych, umywajoncych rynce radnych! Jo myśla co by to mioło być
prezydium ludzi robotnych i mondrych. Co niy patrzom wiela sie zarobi yno wiela
mogom zrobić. A muszom kupa roboty łodwalić. Podziynkuja tym co już byli,
karierowiczom kere w rzeczywistości cisnom na Warszawa jak niy jedyn sie już
wycis. Na pewno wybiera ludzi co kochajom te miasto, kochajom Górny Ślonsk,
znajom problemy ślonzoków i widzom jak je rozwionzywać. Niy bydom sie bawili w
koalicje abo opozycje, lewica abo prawica, Bo my w końcu niy mieszkomy we
Warszawie ale to na naszym Ślonsku! Nie muszymy przeca być durch kierowane
przez partyjne centrale z Warszawki, niy?
Jestech apolityczny i mom kajś te wsziskie gry. Ciekawy żech je jaki mo w tym
interes naczelny „Gońca Górnośląskiego” Andrzej Krzyształowski? Ale w sumie co
mie to...
Nie byda Wom godać kaj mocie głosować bo chyba sami wiycie. Mom recht?
Reden
reden@poczta.onet.pl
www.reden.republika.pl