broneknotgeld
16.07.05, 20:36
Kurde, zdo mi sie co tako sie terozki dzieje ze tom naszom ślonskościom.
Jo jest ze takego rocznika kery jeszcze pamiynto dobrze tympiynie tego za komuny.
Trocha żech to tyż na własny skorze łodczuł. Zdo sie jakby nawet przi tymu łod
ślonskości ździybko żech łodloz - doł żech sie jakby spolszczyć.
No dyć na fali łostatnich przemian do ty ślonskości sie wroco.
Terozki za godka idzie w szkołach nawet chycić dobry stopiyń (joch mioł za to
obniżane stopnie), bo niby edukacyjo reginalno szkoły majom w zocy.
Dyć wyraźnie widać, że cosik jest z tym niy tako.
Ta nasza ślonskość sztimuje wszyskim jako ciekawe wspominki, jako konsek
historyji, cosik co jest piykne i idzie sie tym poasić jakby jakomś przesłom
atrakcyjom.
Cołkym zaś marginalizuje sie to, że ślonskość ciyngym jest i sie jakoś rozwijo.
Zdo sie jakby sie rozwijać ni miała łona prawa. To właśnie prowadzi do łostry
łostudy. Som ludzie kierzy chcom jom rozwijać, dyć ciynżko sie z tym przebić,
bo paczy sie na ślonskość jakby na piykny i ciekawy skansyn.
Jo to moga pokozać nawet na mojim przikładzie.
Chcioł żech tukej rozkryńcić ciekawy wontek papieski, podlinkowany na inkszych
forach, dyć wlazła zarozki w to cynzura.
Pytanie - czamu?
Były tukej dwa piykne wontki ślonske ło Europie i Niymcach, dyć tyż niy
pasowały do tego forum (podobnoś).
Admin wpiyrw sie na nie zgodzioł, a potym som je chcioł wciepnońć kaj ińdzi,
nawet wbrew zasadze niypszenoszynio wontkow z renomowanego forum publicznego
na niszowe forum "prywatne".
No toż wszysko to tyż udowodnio to, że "gora" zainteresowano jest zamykaniym
ślonskości we skansynie, a i "dołom" tyż to czynsto sztimuje.
Hehe - możno ktosik mo ło tym i inksze zdanie, możno jo jest we tym
subiektywny, dyć werci sie to przedyskutować.