Suwalszczyzna

[broneknotgeld]

Suwalszczyzna

Serce Suwalszczyzny bije nad Wigrami
Dyć se przekonocie ło tym drapko sami.

[broneknotgeld]

Wigry

Toż Suwalszczyzny jezioro piykne
Nojwiynksze tukej - niychej ci styknie.

Jezioro Wigry

[broneknotgeld]

Wigiersko sieja

Toż nad Wigrami ło tym durs prawiom
Co djoboł wciep do jeziora sieja
Możno se łoni tako tu bawiom
Jakoś ze tego jo sie niy śmieja.

[broneknotgeld]

Wigierski Park Narodowy

Ze rejsu "Trytonym" se na park dziwuja
Natura jest wielko - tako forszteluja.

[broneknotgeld]

Wyspa

Kaj klasztorny połwysep piyrwyj wyspa była
I dworek myśliwski bo zwiyrza tu siyła
Se litewske pany tukej fajrowali
Jak gon im poszczyńścioł i tura "wybrali".

[broneknotgeld]

W Starym Folwarku

Jakby se łodka tu wypożyczyć
Na Wigrach fest pozyjmanić
Zdo sie przigoda tako aż ryczy
Dyć wos niy byda cyganić

Piechty łobyńda piykne jezioro
Tyż wiela ze tym radości
Wigryna za to mie niy pokoro
Jeszcze przi brzegu ugości.

[broneknotgeld]

"Dom Krolewski"

W pokamedulskim klasztorze
Tyż czowiek pojeść se może.

[broneknotgeld]

Klasztor nad Wigrami

Jan Kazimierz kamedułom wyspa podarowoł
Dyć se drapko na niym zakon siedziba zbudowoł
Piyrszo chnet ze dymym poszła bo była drewniano
W drugi zdo sie wiynkszo siyła - przeca murowano.

[broneknotgeld]

Po drugi wojnie

Po drugi wojnie ruinom zdo sie
Co z czasym jednak dźwignońć dyć do sie
Kultura z Kunsztym tu zagościyła
Zniszczony klasztor fest łodmiyniyła.

[broneknotgeld]

8-10.VI.1999

Papiyż na Wigrach dychnoł se trocha
Szif po jeziorze z Niym pływoł
Łon rajzy przeca musioł ukochać
Cudom Ponboczka sie dziwoł.

[broneknotgeld]

W kościele

W kryptach znojdziecie nawet biskupa
Za Karpowiczym chcesz tu "posznupać"?

[broneknotgeld]

Wigryna

Cera ryboka - gryfno Wigryna
Przi brzegu jeziora stoła
Choć zochmurzono tako dziedzina
Łona sie burzy niy boła

Blysko sie niebo - pierony lecom
Na Wigrach fala łogromno
Dyć jeji łoczy skry yno niecom
Durś stoji jakby niytomno

Głośni łod grzmota w końcu jynknyła
Na wodzie coś wypatruje
Richtig - toż łodka do niyj płynyła
Z tym frela dreszcze aż czuje

Dyć wielko fala zwyrtła łupina
Ktosik do wody wlatuje
Drapko w jezioro włazi Wigryna
Pewno że go poratuje.

Możno tref świata był we tym yno
Możno Ponboczka w tym wola
Toż zakonnika ratuj dziewczyno!
Za samo proba cie chwola

Tako braciszka wyciongo z wody
Mu w sine lica sie śmieje
Widzi co przeca łon tyż jest mody
I paczy aż serce grzeje

[broneknotgeld]

Jako z retunkym tym richtig było?
-Godajom dzisioj rożniście
Dziołuszce łodkom se wypłynyło
W to pryndzy wierzyli byście

Miyndzy modymi jednak coś blysło
W sercu braciszka Wigryna
Dyć u niyj tako samo z tym było
Natury zdo sie dziedzina

Historio niy zno karlusa miana?
Z lipstom utropy tu niy ma
We jeji gowie lipling łod rana
Toż po to nosi jom ziymia

A kameduła? -Usycho w celi
Z rzykaniym ciyngym utropa
Gowa we myślach ło gryfny freli
Mynczy to pszonie fest chopa

Na nic sie zdały sztrofy przeora
Na nic som posty i baty
Z tynsknoty prziszła na niego pora
I pochowali go braty

Ze jego lipstom tako tyż było
Bez szaca świat był utropom
Drapko jom wieko truły przikryło
We ziymi frela zakopiom

Jezioro pszoniu se dziwowało
Modymi jakby tropiyło
Zdo sie co śmierci fest przeciwiało
Do tako dali z tym było

We jedny nocy cudym natury
Wyspy sie jawiom na wodzie
Pszonie podobnoś przenosi gory
Toż se niy dziwej narodzie

Wyspy Brzozowe do dzisioj tukej
Wigier przepiyknom łozdobom
Śladow kochankow we dziyń niy szukej
W nocy gwieździsty sie robiom

Bo przeca słychać jejich tu głosy
Z toni na wyspy wyłażom
Dyć zowdy śmiałkom stowajom włosy
Jak gaftać na to sie ważom

Wigryna rynce przed sia wyciongo
Mnich do niyj tyż tako samo
To jakby wyspy zaroz prziciongo
Dyć niy łoboczysz we rano

Bo jak naprowdy łod sia som blisko
Jak rynce splyść sie chnet majom
We rożne strony wiatr wyspy cisko
Na darmo smyntnie wołajom

Tako sie dzieje tukej łod wiekow
W gwioździste noce siyrpniowe
Sie nad Wigrami dowiysz czowieku
Coś co pomiyszo we gowie

Dyć styknie co sie pojawi porka
Co pszonie wiynksze mo w duszach
Czar tyn mo prysnońć ze legynd worka
-Toż som pojechać tam musza.

[sudar]

broneknotgeld napisał:

W Sobolewie

W końcu skończyły se lasu drzewa
Już żech na kraju jest Sobolewa
Szukom marnego chociożby baru
Bo go mi czeba

Bar "Pod dąbkiem" jestuj zaraz przy wjeździe drogo z Sobolewa do Płocicna, a i
z drugiego końca tej drogi, w Krzywem, tes sie znajdzie cości z "małej
gastronomji".

[broneknotgeld]

Z Wigrow

Przi kraju ida Zatoki Wschodni
Ze lewa plusko jeziorko
Czerwony Folwark - w tym my som zgodni
Wigerske zdo sie nom "ziorko".

[broneknotgeld]

Płos Zakontowski

Łod Łapy do Rogu tu Łukaszowego
Tyn zakontek wodny - wiysz ło tym kolego.

[broneknotgeld]

Jezioro Krusznik

Czas mi nad Krusznik - jeziorko małe
Możno łobyńda je nawet całe.

[broneknotgeld]

Na Gawrych Ruda

Na Gawrych Ruda z samego ranka
By niy mieć z czasym ździybeczko manka
Płociczno-Tartak jeszcze zalicza
I dali w droga - rym yno sklyca.

[broneknotgeld]

Do Biołego

Dobrze co przi mie nikogo niy ma
Ukrodkym przyńda se tam na przima.