Miasto Łeba 1357-2007

[broneknotgeld]

Łeba

Zocne to miasto lymborski ziymi
Se rozłożyło kaj dwa jeziora
Toż tyknom Łeby te ślonske rymy
Tako pomyśloł żech richtig wczora.

[broneknotgeld]

"Letnio Stolica Polski"

Niy wiym czy dobrze z tym Łeba żyje
Toż durś ze Ustkom se ło to bije.

[broneknotgeld]

"Perła Bałtyku"

Te miano jakby z Sopotym dzieli
Niy jest "własnościom" ty jedny szteli.

[broneknotgeld]

Sztyry tysionce z hokym

Latym do Łeby wiela se kludzi
Dyć przeca mało mo swojich ludzi
Hehe - podziwej se tako plaży
We lipcu siyrpniu tłum sie tam praży.

[broneknotgeld]

Ślonsko fraszka Łebie

Za dwa lata bydom tu gyburstag mieli
Aż szejset piyńdziesiont rokow miejski szteli
Toż trza szkryfnońć cosik ło łebski dziedzinie
Niychej ślonsko fraszka tego niy łominie.

[broneknotgeld]

"Wszysko dlo wszyskich"

"Wszysko dlo wszyskich" tukej znojdziecie
Ze turystyki żyje to przecie
Trza geldu chycić wiela w sezonie
Bo jak se skończy to prawie koniec.

[broneknotgeld]

Łeba 1282

Princ pomorski Mestwin Drugi
Łotwar ciong historii dugi
Toż na jego to papiorze
Jest osada jakby w gorze.

[broneknotgeld]

Łeba 1309
Jako Krziżokow tu prziwitała?
Prawiom co tego wcale niy chciała.

[broneknotgeld]

Łeba 1357

Dyć na krziżackim "wikcie" urosła
We prawa miejske tako łobrosła
Se historyjom przeca trza asić
Radości z tego nigdy niy gasić.

[broneknotgeld]

Łeba 1466

Pokoj Toruński - czy miasto polskim?
Niby - dyć przeca lynnym pomorskim.

[broneknotgeld]

"Staro Łeba"

Na zachod łod rzeki ta sztela leżała
Ratusz był i kościoł domow trocha miała
Dyć skiż morza ciyngym wiela se tropiyła
Aż w szesnostym wieku cołkym przekludziyła.

[broneknotgeld]

Kościoł św Mikołaja

Sie yno ściana w Łebie łostała
Cegła palcowka ciyngym tu widać
Piyrwyj rybokow durś wyziyrała
Dzisioj znak krziża yno trza by dać.

[broneknotgeld]

Marina - Łeba 1998

Ano - zyjmanow ciongnie już Łeba
Choć geld w to wsadzić było im czeba
Jak se stolicom letniom chce głosić
To i "marina" inkszych wykosi.