anton_28
17.01.09, 15:14
Downi piyrwy, niydaleko uot Glywic, na pojszczodku lasa, Niymiecke
uosadniki napoczli stowiac se nowy siedlung. Tam kaj niydowno
jeszcze blank gynsty las roos, w kerygo chaszczach szuo sie sofort
stracic, stouy teroski drzewiane chaupy, a pszi korzdy wyflyjgowano
zogroodka. Nowe miyszkance nazwali swoj ort - "Schönwald" co
miauo "piykny las" znaczyc. Dzisiej je to dzielnica uot Glywic -
Bojkow. Bez 30-letnio wojna pszeuaziouy tamtyndy schwedzke wojoki,
ale bes zufall ty wsie niy dojrzeli. Jak sie jusz te wojsko
stracioouo, chopy polecieli na tamta droga i znodli 3 zabitych
wojokoow i jednygo rannygo oficyra. Pochowali tych umrzikoow, a
oficyra wezli mit do wsi, coby go proobowac lyczyc.
Tamtyn miou ale za wielko rana i pora dniow poozni umar. Zanim go
ponboczek zawouou do siebie, podaroowou tyn oficyr wszystek geld i
inksze wertsachy tymu chopowi co go flyjgowou. Jedne czego mu niy
chciou na chama dac, to boou pas ze skoory ze zuotymi medaloma,
wtory boou do niygo jedynoom pamioontkoom po mutter. Padou
uon: "Pochowcie mie prosza razym s tym pasym".
Tak tysz zrobiyli i pochowali go wele tych inkszych wojokoow.
Znod sie ale jedyn taki we wsi, kerymu sie tyn pas pieronowo
spodobou. Polos uon bez noc do lasa, uodkopou tyn groob i symnoou
schwedowi tyn zuoty pas. Nie boua to za dobro idea!! Bes nostympne
pora nocoow, kej pizuo dwanoscie, pokozywou mu sie tyn toter oficyr
i guosno wouou coby mu tyn pas uoddou.
Tamtyn sie tak wystroszoou ze po kerys taki nocy zaleciou nad tyn
groob i kej trocha ziymie wykopou, wciepnoou tyn pas nazot.
Borok boou ale tak fest tym pszejynty, ize som poru tydniach umar...
Te schwedzke groby we Schönwaldzie bouy ponoc jescze bis 1850 roku
widoczne.
