broneknotgeld
26.12.03, 21:22
We tym szwortym roku czeciego tauzyna
Niychej szczyńście gości we wszyskich rodzinach
Mo mieć durś nadzieja kożdo dusza naszo
Że co lepsze – przidzie. Złym niych nos niy straszom
Słońce mo durś świycić – nawet z nos blyndować
By sie lepszym zdrowiym w tym roku radować
Pszonio miyndzy ludzmi niychej wiela bydzie
Dyć łod nos zależy czy wszysko to przidzie
Winszuja powiatom miastom no i gminom
Coby mogli chwolić się swojom dziedzinom
By jedne przed drugim bardzi się asiyło
Tym że bez rok cały dobro u nich było
Nasze wojewodztwa niych rosnom w regiony
Zocne i bogate – rzykom ło to dlo nich
By niy zaglondały yno na „warszawa”
Co w regionie „piszczy” jejich mo być sprawa
No a co do całyj tyj Rzeczpospolity
Życza by w tym mianie niy był yno przityk
Kożdy Obywatel – tako mi się zdo
Niych w Nowy Rok powiy – „Polska to je jo”
Na koniec ło Unii tyż chca cosik szkryfnońć
Za nia trza w Sylwestra szampanym fest gichnońć
Jo wiym że tam Polsce leko tyż niy bydzie
Dyć za to wypija – Niych nom Unia przidzie!
Jeszcze mało prośba mom do internautów
Ciongcie tymat w gora – szkoda go dlo autu.
