Bytomiowi

[broneknotgeld]

Bytom

750 chnet miejskości lot
Z czego jo pieronym tyż jest przeca rod
Na gyburstag dowom gyszynk Bytomiowi
Te fraszki bytomske - piyknie ło niym powiym.

[broneknotgeld]

Zresztom tak po prowdzie niy trza godać wiela
Łod sia tyż dociepcie - zablyszczy ta sztela.

[broneknotgeld]

Dyć prowda jest tako - suchej mie fest tukej
Co bydzie we Rudzie - tyż w Bytomiu szukej.

[broneknotgeld]

Miastu na gyburstag swoje kwiotki ciepcie
Stare jest - dyć bestoż Wy je tyż pokrzepcie.

[broneknotgeld]

Małgorzatka

Godajom że Chrobry mioł to miejsce w zocy
Pszoł tukej na gorce Małgorzatce w nocy.

[broneknotgeld]

Miastu na gyburstag swoje kwiotki ciepcie
Stare jest - dyć bestoż Wy je tyż pokrzepcie.

[broneknotgeld]

1254

140 łanow mioł wtedy tyn Bytom
Możno i niywiela - ło to sie niy pytom
Historio już downo była tu pisano
Dyć łod tego czasu prawa mu nadano
Z Magdeburga rodym - miejske - we Europie
Ważno jest ta data pamiyntej jom chopie
Trzi ćwierci z tysionca lot już tukej kwitnie
Mieszczaństwo - kerego dyć żodyn niy wytnie.

[broneknotgeld]

Piykne miasto

Piykne było i być może
Niych im Bozia dopomoże.

[broneknotgeld]

750 fraszek

750 fraszek w tym tymacie
Musi sie pokozać choćbych zeżar lacie
Czas na to jest we tyn i nastympny rok
Wy mi kibicujcie śledźcie kożdy krok
Ktoś chciołby mie wspiyrać tukej swojim rymym
Piyknie - razym pryndzy sie z tym poradzymy.

[broneknotgeld]

"Stillerdorf" - 1396

Nad historiom Stolarzowic tynge gowy myślom
Niy som cołkym jeji pewne jak Stillerdorf kryślom
Kery Spytko ze Tarnowa przekozoł wojtowi
Rudzki łon sie dyć nazywoł - służoł Bytomiowi.

[broneknotgeld]

Stare gruby

Wszyjscy to wiymy - na dolomicie
Stojom w Bytomiu Stolarzowice
Kruszce tu downo w ziymi szukali
W sztyrnostym wieku - możno i dali
Lecioł fedrunek z galyny gruby
Choć zysk ze tego niy był za ruby.

[broneknotgeld]

Jerzy Gische w Stolarzowicach

Krol na galmanie z Gornego Ślonska
Tyż go fest targoł ze tego konska.

[broneknotgeld]

Wiek łoziymnosty wtedy już nastoł
Gwarkow se Gische sprowadzioł
Cynku ślonskego teroz sie czas stoł
Bez niego kraj se niy radzioł.

[broneknotgeld]

Joanna Gryzik - pani na Szombiyrkach

Młotki gornicze we herbie miała
No bo tego przeca chciała.

[broneknotgeld]

"Krol Dawid"

Wongel już tukej za Fryca brali
W Szombiyrkach było to przeca
W "Krolu Dawidzie" go fedrowali
Ślonzek już ciepoł do neca.

[broneknotgeld]

Szombiyrskie chopy ruda woziyli
Galman to był miechowicki
I choć sie na tym niy wzbogaciyli
Formon robota mioł wdycki.

[broneknotgeld]

Szombiyrki - Godula

Hasło - Szombiyrki. Odzyw - Godula
We tym wos przeca niy byda fulać
Wiela łon tukej zrobioł dobrego
No a po śmierci - majontek jego.

[broneknotgeld]

Darowizna

Na kościoł w Szombiyrkach Schaffgotsch niy żałowoł
100 tysiyncy marek przeca podarowoł
I chocioż trza było dołożyć do tego
Terozki tu ludzie majom coś piyknego.

[broneknotgeld]

"Hohenzollern" gruba - dyć "Szombiyrki" przeca
Klejnot to był czorny bytomskego neca.

[broneknotgeld]

Plac Franca Jozefa

Franca Jozefa plac kedyś wonski
Szyroki dzisioj jest fest
Chałpy rozpadły sie tu na konski
Kościuszki teroz łon jest.

[broneknotgeld]

Ło placu F J

Pech bo tukej sie wsypało
Ździybko niżyj to być miało.

[broneknotgeld]

Pałac w Szombiyrkach

Godula w Szombiyrkach pałac wybudowoł
Jego piykno wieża sie w łoczy ciepała
Niywiela łon jednak we niym pobalowoł
W Rudzie czynsto siedzioł - lubioł to bezmała.

[broneknotgeld]

"Fazaniec"

"Fazaniec" w Szombiyrkach za Schaffgotschów słynoł
Ale te fazany nadrobiały minom
Choć strojyły piyknie wielkopańske stoły
To przeca sie z tego niy za wiela śmioły.

[broneknotgeld]

Ratusz

Szombiyrski ratusz do dzisioj stoji
Choć możno ło sia sie trocha boji
Pamiynto jeszcze rusko kanona
I czasym pyto - Kaj teroz łona?

[broneknotgeld]

Kanona - dynkmal

Ciekawy dynkmal skiż piyrszy wojny
Kery ta gmina dar dała hojny
Z ludzi zabitych na jeji frontach
Trza to pamiyntać - niy chować w kontach.

[broneknotgeld]

Podziymno kolejka

We "Hohenzollernie" na sztrom piyrszy cug
Ze przodka do szachty wozki ciongnońć mog
Był to "ewenymynt" na skala Europy
Sto dwadziścia lotek minyło już chopy.

[broneknotgeld]

W szombiyrskim pałacu

Tukej sie "kopciuszka" wesele łodbyło
Schaffgotscha do Rudy ze Cieplic ściongnyło
Tako se z Joannom tu gospodorzyli
Erbniony majontek jeszcze pomnożyli.

[broneknotgeld]

Pałac Goduli

Sto lot stoł w Szombiyrkach pałac łod Godule
Kerym cołko gmina przeca sie asiyła
Niy zbulyły jego i armatnie kule
Dyć armio sowiecko cołki go spolyła

Wybulyli reszta - dzisioj niy ma śladu
W tym miejscu terozki se stoji przedszkole
Już sie niy dziwujom jak bankom tu jadom
Historyjo jednak czasym w serca kole.

Bobrek

[broneknotgeld]

Bobrek 1369

Na prawie niymieckim wioska lokowano
Już tu piyrwyj stoła wele jedny sztrasy
Miechowicki farorz bajtlom dowoł miano
Tako w Bobrku lecom nojdowniejsze czasy.

Bobrek

[broneknotgeld]

Bobrek Bujakowskich

Choć Bujakowscy ze Bujakowa
Bobrek tyż trzimiom - ło tym tu mowa.

Bobrek

[broneknotgeld]

Bobrek Hochbergow

Nojzocniejszy rod na Pszczynie
Trzimoł Bobrek w ty dziedzinie.

[broneknotgeld]

W ryncach Schaffgotschow

Godula pomarł - majontek łostoł
Z rynkom Joanny grof tako dostoł
"Ślonski kopciuszek" ze tym echt paniom
Se podziwejcie terozki na niom.

[broneknotgeld]

Ks. Jan Kuboth

Miechowicki farorz kościoł chcioł budować
Prawie we tym Bobrku - stropiono mo gowa
Do jego świontyni stond richtig daleko
Choć Pon Bog ciyrpliwy - na wiernych durś czeko.

[broneknotgeld]

Bajstlujom świontynia 1900-1902

Toż kunsztym Schneidera łon neoromański
Drapko postawiony - Ślonzek niy pogański
Dyć se fest ludziska terozki radujom
Zdo sie co Ponboczka jakby blizy czujom.

[broneknotgeld]

"Sutuhali"

Toż na gorce "Sutuhali"
Piyrwyj bogom cześć dowali
Krześcijany z czasym prziszli
Stało sie po jejich myśli

[broneknotgeld]

"Małgorzatka"

Godajom co Chrobry grod tukej zbudowoł
Niyjedyn w Bytomiu wiara tymu dowo
Co archeoligi prawiom ło tym dzisioj?
Ano że to z czasow jak Kazimierz prziszoł
Co Odnowicielym był przez Polan zwany
Jymu "grod Małgoli" richtig był poddany.

[broneknotgeld]

Ze Czechow

Ze Czechow na Krakow droga tyndy szła
Toż grod se mog przidać - wiycie ło tym - pra?

[broneknotgeld]

Przed 1170

Kyńdzierzawy Bolek kościoł wybudowoł
Małgoli w opieka ta świontynia dowoł
Wiymy z "tympanonu Jaksy" na Ołbinie
Bestoż pamiyńć ło tym jednak niy zaginie.

[broneknotgeld]

Benedyktyni

Łoni tyn kościołek we swy pieczy mieli
Dyć rychło to wszysko łopuścić musieli.

[broneknotgeld]

Norbertyni

Teroz w jejich rynkach świontynia Małgoli
Pewno tref formuła bardzi jejich woli
Papiyż Innocynty zatwierdzioł nadanie
Dyć z lokacjom miasta gorzy im se stanie.

[broneknotgeld]

"Ecclesia sanctae Margarite in Bitom"

Tako we nadaniu papieskim czytomy
Tysionc dwiesta jedyn - z tego roku znomy.

[broneknotgeld]

Po lokacji Bytomia

Jak miasto Bytom tu lokowali
Niy mogło lecieć już tako dali
Nowo parafio przeca wykroli
Wioski łostały se przi "Małgoli".

[broneknotgeld]

1277

Zaś parafijo myńszo se stała
Bo ty w Kamiyniu kyns siebie dała.

[broneknotgeld]

W husyckich czasach

Bytom łotworzoł bramy husytom
A "Małgorzatka"? -Po co sie pytom
Ciynżke to były czasy na Ślonsku
Tabor go łupioł konsek po konsku.

[broneknotgeld]

16.XII.1400

Kościoł mariacki i "Małgorzatka"
Som na papiorze we jednych "gatkach"
Opat farorzy na Bytom "dowoł"
Dyć to za mało ciyngym sie zdowo

Prepozyt farorzym w końcu tu se stoł
Przeca profit z tego zowdy wiynkszy mioł
"Małgola" przi tymu zatraciyła lica
Łostała ze tego cmyntorno kaplica.

[broneknotgeld]

27.II.1827

Toż Mansfeld z wojskym Bytom zagarnoł
Zaś parafijo bardzi jest marnom
W końcu z bytomskom jom połonczyli
Bo se już cołkym poczyła chylić.

[broneknotgeld]

1682

Biskup nowy kościoł Małgoli poświyńcioł
Stary wpiyrw zbulyli by se już niy mynczoł
Dyć i ta świontynia jest cołkym drewniano
Wieża z sygnaturkom na dachu dodano.

[broneknotgeld]

Nowy ołtorz

Ołtorz do świontyni Śliwiński zrychtowoł
Sztyrdziści talarkow prepozyt zań dowoł
Dyć musioł dołożyć żyta sztyry miary
Dwa viyrtle pszynicy i trocha swy wiary.

[broneknotgeld]

Jan Nepomucen (1734)

Tako sygnaturka na wieżyczce zwali
Zrobić jom Frankymu z Opawy kozali

[broneknotgeld]

1880

Zaś se "Małgorzatka" pochylyła mocno
Trza było wybulić - dyć ideja zocno
Łod ksiyndza Bonczyka tako wtedy była
By za rok świontynia już nowo stanyła..

[broneknotgeld]

12000 marek

Tela majontku se tu łostało
Dyć to na nowy kościołek mało.

[broneknotgeld]

Johann Kowollik

Johann Kowollik wszysko postawioł
Choć przi robocie se łon niy bawioł
Dyć czas był wtedy richtig dyszczowy
Poleku dźwignoł kościołek nowy

Ze własny kapsy fundnoł już bruk
I dwa witraże - tako chcioł Bog
Do tego jeszcze go posztrajchowoł
Muster dlo inkszych tym przeca dowoł.

[broneknotgeld]

Datki

Niyjedyn parafianin doł choć drobny datek
Tysionc dwiesta marek wyszło na łostatek

Stykło na ołtorz i łobroz nowy
Toż tyn wydatek mieli już z gowy.

[broneknotgeld]

Nowy ołtorz

Carl Buhl ze Wrocka go wyrychtowoł
Fahnroth wyń łogroz patronki dowoł
Niym parafiany przeca sie aszom
Dyć dali swoja świontynia kraszom

forum.gazeta.pl/forum/71,1.html?f=261

[broneknotgeld]

7.VI.1881

Już nowy kościoł jest wyświyncony
Organow niy mo dyć gro nom dzwonym.

[broneknotgeld]

1934

Werbisty teroz tu se wkludziyli
Konsek cmyntorza łoni kupiyli
Choć wiela grobow trza ekshumować
Pryndko klasztor zaczyli stowiać.

[broneknotgeld]

1934/1935

Toż stanoł klasztor Ehla projektu
W zocy architekt tyn przeca jest tu
Tyż w Małgorzacie patronka mioł
Tako niyjedyn w Bytomiu chcioł.

[broneknotgeld]

22.IV.1935

Klasztor misjonarzy teroz poświyńciyli
Z tom datom i w kościoł jakby ducha tchnyli.

[broneknotgeld]

1936

"Wzgorze Małgorzatki" mo Droga Krziżowo
Toż se bardzi świynte jakby teroz zdowo
Tyż Ehla z Bytomia we tym widać rynka
Łod siostry Paschalis zaś "Krystusa mynka".

[broneknotgeld]

Ołtorz św. Józefa (1872)

Ło niym coś szkryfna do tego neca
Toż tako samo dzieło Mrowetza
Figurek świyntych tukej niymało
Dyć i aniołow niy brakowało.

[broneknotgeld]

Nowy ołtorz św. Józefa (1893)

Na miejscu starego nowy ołtorz stoji
Co Buhl ze Wrocławia gryfnie wyrychtowoł
Toż we neogotyk tyż se cołki stroji
Zefel w jego środku przed łoczy nom stowoł.

[broneknotgeld]

W 1925 roku

Przeniyśli tyn ołtorz do Zabrski Ligoty
Dyć tam świynty Józef mioł wiyncy roboty
Do dzisioj go znojdziesz w ligocki świontyni
Rok za rokym leci a łon se niy miyni.

[broneknotgeld]

Organy 1857/1858

Haas ze Głubczyc nowe organy zbudowoł
Wekerych piszczołek z hokym dwa tysionce
Piykny ton insztrumynt parafianom dowoł
Zdowało se gro im las woda i słońce.

Kościoł Wniebowziyńcia NMP

[broneknotgeld]

Kościoł Wniebowziyńcia Nojświyntszy Maryji Panny


1231
Tako data Liebental szkryfnoł we kronice
Jedni tymu wierzom dlo inkszych to wice.

[broneknotgeld]

1253

W tym roku naprowdy tyn kościoł już stoł
Kto godo inaczy to winny jest fioł.

[broneknotgeld]

Z dolomitu

Z dolomitu kościoł tyn wybudowali
Wapiyń i piaskowiec tyz jeszcze dodali
Byłby styl romański dyć przerobek wiela
Dzisioj cołkym inkszo jest ta świynto sztela.

[broneknotgeld]

Portal połedniowy

W niym łobroz se łostoł ty piyrszy świontyni
Dyć lata durś lecom i kościoł se miyni.

[broneknotgeld]

Cudowny łobroz Matki Boski Bytomski

Namalowany w piytnostym wieku
Do dzisioj łostoł - cud to czowieku
przecase Bytom niy roz hajcowoł
A łobroz ciyngym nadzieja dowoł.

[broneknotgeld]

"Bytom umiera" - ktoś szkryfnoł tukej
Nadzieji we tym łobrozie szukej.

[broneknotgeld]

1675

Pożar chnet tukej wypoloł wszysko
We środku wielke pogorzelisko
Pusty stoł kościoł przez sztyry roki
W końcu przewioło tu wszyske ćmoki
I se za remont jakoś zabrali
W dwa lata wszysko wyrychtowali
Zaś ta świontynia Bytom zdobiyła
Dziw że utropa wielko "przeżyła".

[broneknotgeld]

1739

Dzwoni ze wieżyczki sygnaturka nowo
Doleczek ze Strzelec tako wyrychtowoł.

[broneknotgeld]

1851-1857

Ksiondz Szafranek cołki kościoł teroz przebudowoł
Dyć czas na to był nojwyrszy - kipnońć se wydowoł
W neogotyk go przi tymu zarozki łoblykli
Tak łostało se do dzisioj - wszyscy my prziwykli.

[broneknotgeld]

39255

Tela talarkow remont kosztowoł
Niyjedyn piniondz na to swoj dowoł
Łod Friedlandera nawet pożyczki
Na kościoł wziyli - by cieszoł wdycki.

[broneknotgeld]

1854

Łod zachodu kościoła już wyńście łotwarte
Chnetko łod piyńciuset lot było zawarte
Jak ksiyndzow mieszczany dwoch pomordowali
Toż na amyn dzwiyrza tu zamurowali.

[broneknotgeld]

5.X.1857

Po ty przebudowie zaś kościoł świyńciyli
W dziyń świynty Jadwigi na to zezwolyli
No i gyburstagu łod krola pruskiego
Właśnie we tym czasie im panujoncego

[broneknotgeld]

Świynty łobroz (1857)

Wniebowziyńcie Maryji Elmer namalowoł
We Wiedniu aż znodli artysty istnego
W ołtorz jeszcze Gruner kunszt snycerski dowoł
Ozdobom kościoła był łon "mariackego".

[broneknotgeld]

Suchatelnice

Z downych wiekow dwie tukej se jeszcze łostały
Wiela naszych grzychow rożnistych poznały.

[broneknotgeld]

Ołtorz św. Anny (1861)

Fundowoł go ktosik co niy chcioł być znany
Z łobrozym łolejnym łod ty świynty Any
Stolarka tyż swoja Gruner w ołtorz doł
Przeca dlo kościołow zowdy robić chcioł.

[broneknotgeld]

Ołtorz św. Walyntego (1864)

Dzieło Mrowetza ze Raciborza
Łoczy na świyntych tukej łotworza
Dyć miyndzy niymi Barborki szukom
Jedyno frelka na kero kukom.

[broneknotgeld]

1898

Widniyj w kościele sie tym zrobiyło
Bo przeca piyrwyj sztromu niy było
Teroz już byrny świycom tu jasno
Dyć se zrobiyło tyż myni ciasno.

[broneknotgeld]

1894

Kruchta już teroz w kościele jest
Zdo sie że dlo mie bo grzysza fest.

[broneknotgeld]

Remont 1935-1936

Choć czasy w Niymcach som niyciekawe
Na remont piniondze znodli
Toż jedna czecio ze państwa prawie
Na kościoł cosik tyż kłodli.

[broneknotgeld]

Pieler

Pieler mi teroz chodzi po gowie
Cyntralno stacja robioł tyn czowiek
Wele "Rozbarku" - ta ratowniczo
By ratowała nom brać gorniczo.

[broneknotgeld]

Synagoga

Synagoga bytomsko tam kaj Plac Grunwaldzki
Zdobiyła tyn Bytom stylym mauretańskim
W proch jom łobrociyła "kryształowo noc"
Tako wtedy była niynawiści moc.

[broneknotgeld]

Miejske mury

Po wiek dziewiytnosty mury tukej stoły
W nich serce Bytomia tyntniyło
Dyć wojska sie żodne już jejich niy boły
Trza zbulić - to zdanie stanyło

Dwie bramy ze murow tych zaprowadziyły
Na Krakow no i na Gliwice
A czecio - co troszka i może dziwuje
Zawiodła cie na Pyskowice

Godajom że furty tyż były tu zocne
Z nich jedna Piekarskom nazwali
A drugo Źrodlanom - znaczynie jyj mocne
Po woda sie niom wybiyrali.

[broneknotgeld]

Stary ratusz

Stary ratusz we styczniu sie poloł
Dugo stoł łon dyć teroz łoboloł
Łostro wieża co niebo dropała
W końcu wojny spokoju niy miała
Pech jyj przinios tyn sztyrdziesty pionty
po ratuszu durś puste som konty.

[broneknotgeld]

Na rynku

Na rynku bytomskim pomnik stoł ze lwym
Ze staryj pocztowki ło tym teroz wiym
Czcioł łon bytomiokow co w wojnie zginyli
W tyj francusko-pruski sie fest łostro biyli.

[broneknotgeld]

"Piwnice Gorywodow"

Dom Gorywodow downo zbulyli
Gotycke piwnice łostały
W nich my niyjedne wino wypiyli
Zysk na nos mieli niymały.

[broneknotgeld]

Kościoł Wniebowziyńcia NMP

Princ opolski Władysław kościoł tyn fundowoł
Nim jeszcze nom Bytom prawa miejske chowoł
Wiela łon uciyrpioł jak wieki leciały
Dyć do dzisioj blyszczy nom piykny i cały

We szesnostym wieku pożar Bytom trowioł
I tyn kościoł wtedy łogyń niy łostowioł
Jednak zaroz potym kruchta mu dodali
Ta wieża wysoko tyż dobudowali

W dziewiytnostym wieku dali rosnoł tukej
Hełmu szpiczastego łod tych czasow szukej
Generalny remot świontyni zrobiyli
I sie niom w Bytomiu naprowdy asiyli.

[broneknotgeld]

Niymcom to sie niy udało
Chocioż wiela tego chciało.

[broneknotgeld]

Browar

We Bytomiu Browarniano
Browar tukej stoł
Piwo w beki nalywano
Chop zowdy je chcioł.

[broneknotgeld]

Stary zamek

Bytomski zamek kaj Plac Grunwaldzki
Jak średniowieczo był czas tu
Czy tyn co najazd zniszczoł tatarski?
Czy łod bytomskich już Piastow?

[broneknotgeld]

"Dolomity"

We bytomskich "Dolomitach"
Zima idzie już prziwitać
Pakuj narty i jedź tam
To jest prowda a niy spam.

[broneknotgeld]

Już prziszoł tyn rok rocznicowy
Trza teroz dać coś ze gowy
Bo fraszek miało być tela
Wiela mo lot miejsko sztela.

[broneknotgeld]

Komitet Honorowy 750-lecia

Honorowy Komitet se skompletowali
Akty mianowania nawet łodbiyrali
Ponoć w Komitecie ludzi richtig wiela
Bo blysnońć chce Bytom - gornoślonsko sztela,

[broneknotgeld]

Teroz "feta" - 22.05.2004

Dyć jak by było ze tym inaczy?
Czas wielki prziszoł już połonaczyć
I sie zabawić fest we sobota
Wielko rocznica - toż niy gupota

Rada i Zarzond blyśnie tu piyknie
Glorji na cołko kadyncjo styknie
Vipow se zleci na "tokowisko"
Przeca wybory do UE blisko

Bytom w Europie łod setek lot
Z tego tyż kożdy dzisioj jest rod
I chocioż widać tu kryzys wielki
Zowdy poczebne som fojerwerki.

[broneknotgeld]

"600 vipow"

Szejset vipow zaprosiyli
By z Bytomiym sie cieszyli
Dyć po mojymu cosik za mało
Siedymset piyńdziesiont przeca by sie zdało.

[broneknotgeld]

Hejnał Bytomia

Małgola Kaniewska hejnał ułożyła
Podobno jest we niym jakby wielko siyła
Czy Bytom ze tego richtig bydzie rod?
Czy szczimie przi niymu druge tyla lot?

[broneknotgeld]

Ańproba

Łańcuchy ze srebła fundli bytomianie
W sobota sie zacznie jejich "używanie"
Richtig insygniami miasta tego bydom?
Ło tym jo "wyroku" przeca tu niy wydom.

[broneknotgeld]

"Opozycjo łańcuchowo"

W Bytomiu teroz już opozycjo
Skuto łańcuchym we koalicjo
No toż bydymy sie wiela dziwać
Mocy im styknie - pynknom ogniwa?

[broneknotgeld]

Bytom w Europie" - 22.05.04

Toż po połedniu zajrzyj na rynek
By sie w tych czasach ździybko ucieszyć
Frelka żeś abo tyż mody synek
Toż mosz dyspynsa trocha pogrzeszyć

We rytmy salsy Jose Torresa
Niyjedna dziołszka wciongnie karlusa
Choć wiek już inkszy jo tyż sie ciesza
Dyć ołpy nawet niy trza by zmuszać

Przidźcie bo przeca tyż Karin Stanek
Do rodzinnego miasta zaś wdepnie
Uciechy wszyske bydom udane
Z radości kożde serce łokrzepnie.

[broneknotgeld]

Georg Bruning

Oberburgemajster Bytomia zocnego
Łańcuch swoji władzy zowdy szumnie nosioł
We tym niy pobije już żodyn istnego
No choćby tyn Wójcik - ło muster sie prosioł.

[broneknotgeld]

Jan Drabina

Ło Bytomiu wiela prawi
Historyjom fest nos bawi
Piyknie - bo jom poznać trza
Bez niyj jakby biydni - pra?

[broneknotgeld]

Nojkrotszo historyczno fraszka bytomsko

Bul
"Ul".

[broneknotgeld]

Hala przi Krziżowy

Hala szportowo Bytom se "fundnie"
Jak piniondz z Unii jednak w to wprzongnie
Liczy że skapnie tyż coś z Warszawy
Dyć jo mom ło to wiela obawy
Czy sie w dwa lata to wszysko udo?
Choć możno krakom bo zy mie "cudok".

[broneknotgeld]

Rewitalizacjo Bytomia

Program taki miasto już przirychtowało
Yno czy piniondze na to bydzie miało?
Możno coś sie udo - unio grosz dołoży
Boże - niych nom bydzie dane tego dożyć.

[broneknotgeld]

Na kutym płocie

Na kutym płocie cwergi łoboczysz
Jak do downego starostwa zboczysz
We kerym filio muzeum dzisioj
Czy ło koncertach tukej żeś słyszoł?

[broneknotgeld]

Wieżyczka starostwa

Godajom co w wieży downego starostwa
Frelka kedyś wiyńzioł landrat jakiś srogi
Możno jednak było yno to na postrach
Historyjo niy zno przeca ty niybogi.

[broneknotgeld]

Bytomske Starostwo

Postawiyli budynek starostwa w Rozbarku
Możno coby Bytom niy mioł go na karku
Dyć po prowdzie yno dwa kroki tam było
Toż w dwodziestym siodmym nawet Rozbark wciyło
Bo już niy był wtedy som łod sia łon gminom
Bytomia se łostoł w tym roku dziedzinom.

[broneknotgeld]

Rodziny Bytomskich

Rodziny Bytomskich Bytom do sia woło
Toż przi gyburstagu bydzie im wesoło
Zlot ponoć we wrześniu zrobiom tukej zocny
Bytom z Bytomskimi pewno razym mocny.

[broneknotgeld]

Bytomske beamtry

Beamtry z Bytomia w wojewodztwie blyszczom
Mozno bytomianie cosik na tym zyszczom
Dyć "test kompetyncji" im doł miejsce piyrsze
Bestoż sie wydowo że teroz som wyrsze.

[broneknotgeld]

750

Choć niy wypija czech z gwinta ćwierci
Zdrowie Bytomia golnońć se werci.

[broneknotgeld]

Bytomske powinszowania

Miastu winszuja tysionca lot
Choć ze czech ćwierci tyż żech jest rod.

[broneknotgeld]

Bytomiowi

Niych blyszczy Bytom w tym naszym wieku
Tako tyż zowdy - wiydz to czowieku.

[broneknotgeld]

"Parada pojazdow - Bytom 2004"

Kto w starych autkach fest sie lubuje
Tyn we niydziela tu przidrałuje
Na rynku miejskim prawie w połednie
"Landarow" bydzie że słonko zblednie

[broneknotgeld]

Coś mie tropi

Jo ło tyn Bytom dzisioj sie tropia
Bo miyj robota tukej dlo chopa.

[broneknotgeld]

No toch z tym jakby jest we połowie
Latoś dokończy to jeszcze czowiek.

[broneknotgeld]

Cosik mie kusi bych to se wciep
forum.gazeta.pl/forum/72,2.html?f=261&w=8259768&a=8581425
Choćby ktoś szkryfnoł że jo jest kiep.

[broneknotgeld]

Tukej Bytomia cołko uroda
www.um.bytom.pl/dbytom/
dziwać se styknie i nic niy godać.

[broneknotgeld]

"Targom" jo łostro teroz w tyn Bytom
Już se nikogo ło nic niy pytom
No bo powiydzcie - co tukej słysza?
Nikt niy łodpowiy - ano toż cisza.

[broneknotgeld]

Możno poskopić jest problym jaki
forum.gazeta.pl/forum/72,2.html?f=261&w=8707774
Dom link na słownik - niy ma w tym "draki".

[broneknotgeld]

1928

Prezydynt Niymiec łodwiedzioł Bytom
Sie mu spodoboł? -Tako zapytom
Możno Hindenburg we zocy mioł
Toż skuli miana pewno mu pszoł?

[broneknotgeld]

Świetlik

Stanoł se Świetlik na ty Dworcowy
Zdo sie w Bytomiu łon cołkym nowy
Dyć przeca żeście go prziwitali
Co ze niym bydzie terozki dali?

Możno wom frelki tu zbałamuci
Bajtli narobi, pitnie, niy wroci
Ciyngym mo banhof łon za plecami
To może pedzieć - Łostońcie sami.


Bytomski zbereźnik

Zepsuł ponoć Świetlik jedna bytomianka
Deliberowali nad tym już łod ranka
Jako to napochoł? Przeca dziod już stary?
Toż wy nic niy wiycie? -Zrobioł to cygarym!


Gyszynk

Toż na gyburstag gyszynk "Plejady"
Fajnisty - ło to niy bydzie zwady.

[broneknotgeld]

Ło Świetliku nikt niy szkryfnie
choć karlus se prosi
Toż zaś Bronek teroz gichnie
Wciepnie inkszy "grosik"


Downymi czasy

Było to richtig downymi czasy
Jeszcze niy znali Dworcowy sztrasy
Stond żeś łoglondoł Bytomia mury
W ziymi zaś yno głymbokie dziury

We jedny Świetlik se pomiyszkiwoł
Dniym krył zaś w nocy na miasto dziwoł
Dyć jak se keryś po ćmoku błonkoł
Do bram go powiod - w wodzie niy tonkoł

Dostowoł za to czasym tyż grosik
I uszporowoł se tego cosik
Z czasym bajali ło skarbie jego
Jak roz szukali wciyło istnego

Dyć zaś łostatnio Bytom go mo
Czy jego dzieje naprowdy zno?
A jo żech dzisioj wejrzoł mu w łoczy
Już wiym - wachuje we dnie i w nocy.

[broneknotgeld]

Jagna i Świetlik

Godała tako z Bytomia Jagna
Że Świetlik wywiod jom roz na bagna
Jednak niy było skiż tego zwady
Przeca se łona dała z niym rady
A że w barzołach nikt im niy wadzioł
Nawet cygarym wiela niy kadzioł

Wziyło roz Jagna z tym na wspominki
Ale kamratki zrobiyły minki
Zaroz wylazły tyż na Dworcowo
I podszczypujom Świetlika zdrowo
Dyć łon durś kwardy jako tyn "spiż"
Teroz już ło niym to wszysko wiysz.


Świetlik i Łożyrok

Szoł łożyrok Dworcowom - niy minoł Świetlika
Toż dzisioj z daleka chce łod niego zmykać
Po prowdzie to nawet niy wiym co sie stało
Styknie że istnymu pić se łodechciało
Już terozki ponoć gorzoły niy chyci
I jakby nabożnie sie życie mu klyci.

[broneknotgeld]

Feler

Mo feler Świetlik - toż niy ma rady
Droga prziświyco durś do "Plejady".


Cygaro Świetlika

We gymbie czimie cygaro z Kuby
Niyjedna frelka myśli se - Luby
Choć żeś jest mały i richtig stary
Dyć wiela zdziałosz ze tym cygarym.


Przesond

Karlus Świetlika w pysk mocno trzaśnie
-Niychciane pszonie gibko wygaśnie

Jedyn już ponoć tego probowoł
Wiym yno tela - rynka w gips dowoł.

[broneknotgeld]

Struty Świetlik

Napioł gorzołki se z formalinom
Stanoł jak wryty ze gupiom minom
Możno trza bydzie sie już kurować
Dyć zaś welunek - wszysko łod nowa.

Pistulka i Świetlik

Bliknoł se Pistulka na jego cygaro
Jakby tu karlusa zrobić tyż na szaro?
W końcu Bytomiowi łostawioł boroka
Trza było kaj ińdzi na robota skokać.


Świetlik wandrus

Wyloz ze banhofu prosto na Dworcowo
Przi Placu Kościuszki jak ze muru stowo
Niy umi poskopić - cołki kwartał wciyło
Dyć richtig tu gryfnie piyrwyj przeca było.

[broneknotgeld]

Bytomske władze

Łoswiycone władze cygarym Świetlika
Podobnoś niy bydom kaj ćmok wiyncy blikać.


Kedy świyci

Cygaro blyszczy se na czerwono
Jak naprzeciwko niytkniynte łono.


Samotny

Świetlikowi zdo sie
Że tu dobrze mo sie
A jo godom wom
Durś tyn karlus som.


Podobnoś

Podobnoś Świetlik prziszoł ze wschodu
Bebok skiż niego aże se wkurzoł
Łoj - coś niy bydzie mioł tukej miodu
Dyć tela jego co yno użoł.

[yoanna]

Bronek...czyżby wena odeszła?:(

[broneknotgeld]

Świynty Jan Kapistran w Bytomiu 1453

We cołki Europie piyrszy kaznodzieja
Tyż cosik naszkryfloł przi bytomskich dziejach
Wybroł se z Krakowa w tyn czas do Wrocławia
Pewnikym pomyśloł - "W Bytomiu zabawia"

Tu jego kozania mieszczan prziciongały
Richtig fest pobożny ze tym grod aż cały
Bractwa religijne drapko rozkwitnyły
Słowa Kapistrana dugo w ludziach żyły.

[broneknotgeld]

Nowy Plac Grunwldzki

Plac grunwaldzki mo być "nowy"
Wlazło to do jejich gowy
Na gyburtag Bytom "fundnie"
Bydzie gryfnie i porzondnie.

[broneknotgeld]

Trza szukać śladow

Jak plac bydom remontować
Richtig pozor muszom dować
Przeca zamek tu mioł stoć
Ło ślad po nim trza sie boć.

[broneknotgeld]

Wykopaliska archeologiczne

Zrobiom tu małe wykopaliska
Historio na tym może coś zyskać

[broneknotgeld]

Synagoga przi Placu Grunwaldzkim

Synagoga kedyś przi tym placu stoła
Godali co richtig go tukej zdobiyła
Dyć se za Hitlera wiela ło sia boła
We czidziestym łosmym już spolono była

[broneknotgeld]

Bytomsko synagoga

Kaj piyrwyj zamek ksionżyncy był
Kaj potym koniom brakło tyż siył
Tam synagoga w końcu stanyła
Piyrszo i drugo bo w Żydach siyła
Gmina ich rosła i piniondz miała
Toż na świontynia niy żałowała

Dyć niy myślały pejsate gowy
Że styknie nocy ty "kryształowy"
By wszysko w popioł se przemiyniyło
A życie jasne w ćmok sie ukryło.

[broneknotgeld]

Toż donosza

Toż ze Bytomia teroz donosza
Że znodli tukej łod zamku fosa
Podobnoś wiyncy niy bydom szukać
Bo kaj ło forsa im dali klupać?

[broneknotgeld]

Tablica pamiontkowo

Po synagodze bydzie tablica
Niych wiy już ło tym ta okolica
Już autochtonow tukej niywiela
A ło historio mo dbać ta sztela.

[broneknotgeld]

"Boulevard"

Dzisioj już tego niywiela mocie
Ze historyji bardzi poznocie.

[broneknotgeld]

Nojgryfniejszy

Tyn downy plac mom we pamiyńci
Żol - toż nikerych to dzisioj mynczy
Że w naszych łoczach go zatraciyli
Gupota tako tukej przeżyli.

[broneknotgeld]

1830

Tu przed tym rokym niywiela było
Dyć mury miejske sie wybulyło
W strona Pyskowic no i tyż Gliwic
Tyn Bytom "ruszoł" - przeca to niy wic.

[broneknotgeld]

Dwa banhofy

Toż dwa banhofy we mieście były
Skiż tego wiyncy tu jakby siyły
A miyndzy niymi pysznioł se Bytom
Skiż czego? -Po co jo sie to pytom.

[broneknotgeld]

Plac Kościuszki

Rożniste miana "Boulevard" mioł
Franza Josefa - tako tyż zwoł
Dyć se historio zmiynio cholera
Asioł sie nawet że był Hitlera
Potym utropa zaś prziszła drugo
Placym Stalina dyć był niydugo
Terozki wiymy - Kościuszki jest
Choć umynczony tyż przi tym fest.

[broneknotgeld]

Piyrwyj

Piyrwyj na tym placu był postoj dorożek
Ze knajp richtig blisko - dziynki za to Boże.

[broneknotgeld]

Zaś cosik forum koślawo chodzi
Toż ślonskim rymom przeca to szkodzi.

[broneknotgeld]

Przed piyrszom wojnom

Przed piyrszom wojnom poczta jest tukej
Dyć dzisioj darmo jom jednak szukej
Na jeji miejscu dom PSS
Wiynkszy gryfniejszy toż dobrze jest

[broneknotgeld]

Fontanna

Za Niymca plac tyn fontanna mioł
Dzisioj tyż możno Bytom by chcioł
Teroz tyn plac jest wiynkszy dwa razy
Dyć se ło downym blasku durś marzy.

[broneknotgeld]

"Z woli ludu"

"Z woli ludu" cołki kwartał przi placu zbulyli
Toż to wiymy że sie tako wiela namynczyli
Nawet szpryngnońć trza tu było jedna kamiynica
Dzisioj Plac Kościuszki wielki dyć brakuje lica.

[broneknotgeld]

Detale

Detali z kamiynic ździybeczko łostało
Coś se tyż muzeum ze tego dostało
Dyć reszta przipadła ty naszy Warszawie
Cyntrum Zdrowia Dziecka tam strojyli prawie.

[broneknotgeld]

Franciszkanie

Zakon fechciorski ksionże osadzioł
By przi mieszczanach jakoś se radzioł
Toż pryndko Klosztor tu postawiyli
A potym kościoł i jakoś żyli.

[broneknotgeld]

1258

Ze tradycyji data se wziyła
Rok w kerym już tu świontynia była
Nikt z historykow jom niy podwożoł
Czy richtig keryś na to sie wożoł?