Bytomiowi

[broneknotgeld]

Bytom

750 chnet miejskości lot
Z czego jo pieronym tyż jest przeca rod
Na gyburstag dowom gyszynk Bytomiowi
Te fraszki bytomske - piyknie ło niym powiym.

[broneknotgeld]

Zresztom tak po prowdzie niy trza godać wiela
Łod sia tyż dociepcie - zablyszczy ta sztela.

[broneknotgeld]

"Krol Dawid"

Wongel już tukej za Fryca brali
W Szombiyrkach było to przeca
W "Krolu Dawidzie" go fedrowali
Ślonzek już ciepoł do neca.

[broneknotgeld]

Joanna Gryzik - pani na Szombiyrkach

Młotki gornicze we herbie miała
No bo tego przeca chciała.

[broneknotgeld]

Szombiyrskie chopy ruda woziyli
Galman to był miechowicki
I choć sie na tym niy wzbogaciyli
Formon robota mioł wdycki.

[broneknotgeld]

Szombiyrki - Godula

Hasło - Szombiyrki. Odzyw - Godula
We tym wos przeca niy byda fulać
Wiela łon tukej zrobioł dobrego
No a po śmierci - majontek jego.

[broneknotgeld]

Darowizna

Na kościoł w Szombiyrkach Schaffgotsch niy żałowoł
100 tysiyncy marek przeca podarowoł
I chocioż trza było dołożyć do tego
Terozki tu ludzie majom coś piyknego.

[broneknotgeld]

"Hohenzollern" gruba - dyć "Szombiyrki" przeca
Klejnot to był czorny bytomskego neca.

[broneknotgeld]

Plac Franca Jozefa

Franca Jozefa plac kedyś wonski
Szyroki dzisioj jest fest
Chałpy rozpadły sie tu na konski
Kościuszki teroz łon jest.

[broneknotgeld]

Ło placu FJ

Pech bo tukej sie wsypało
Ździybko niżyj to być miało.

[broneknotgeld]

Pałac w Szombiyrkach

Godula w Szombiyrkach pałac wybudowoł
Jego piykno wieża sie w łoczy ciepała
Niywiela łon jednak we niym pobalowoł
W Rudzie czynsto siedzioł - lubioł to bezmała.

[broneknotgeld]

"Fazaniec"

"Fazaniec" w Szombiyrkach za Schaffgotschów słynoł
Ale te fazany nadrobiały minom
Choć strojyły piyknie wielkopańske stoły
To przeca sie z tego niy za wiela śmioły.

[broneknotgeld]

Ratusz

Szombiyrski ratusz do dzisioj stoji
Choć możno ło sia sie trocha boji
Pamiynto jeszcze rusko kanona
I czasym pyto - Kaj teroz łona?

[broneknotgeld]

Kanona - dynkmal

Ciekawy dynkmal skiż piyrszy wojny
Kery ta gmina dar dała hojny
Z ludzi zabitych na jeji frontach
Trza to pamiyntać - niy chować w kontach.

[broneknotgeld]

Podziymno kolejka

We "Hohenzollernie" na sztrom piyrszy cug
Ze przodka do szachty wozki ciongnońć mog
Był to "ewenymynt" na skala Europy
Sto dwadziścia lotek minyło już chopy.

[broneknotgeld]

Pałac Goduli

Sto lot stoł w Szombiyrkach pałac łod Godule
Kerym cołko gmina przeca sie asiyła
Niy zbulyły jego i armatnie kule
Dyć armio sowiecko cołki go spolyła

Wybulyli reszta - dzisioj niy ma śladu
W tym miejscu terozki se stoji przedszkole
Już sie niy dziwujom jak bankom tu jadom
Historyjo jednak czasym w serca kole.

[broneknotgeld]

W szombiyrskim pałacu

Tukej sie "kopciuszka" wesele łodbyło
Schaffgotscha do Rudy ze Cieplic ściongnyło
Tako se z Joannom tu gospodorzyli
Erbniony majontek jeszcze pomnożyli.

[broneknotgeld]

Kaplica Matki Boski i św Józefa

Pamiontak w Szombiyrkach po wielki zarazie
Cholera Ślonsk wtedy pierońsko mynczyła
Za opieka Bożo we tym ciynżkim razie
W dziewiytnostym wieku łona tu stanyła.

[broneknotgeld]

"Kopalnia Wiedzy"

Co wom pedzieć ło "Krystynie"?
Zły czas dlo niyj mono minie
www.nettg.pl/Aktualnosci/Szukaj/Kraj/Nowa-kopalnia-powstanie-na...-pokopalnianych-terenach-Bytomia,15814,1500,1
Z szachty do edukacyji
Przyńdzie teroz bez mecyji?

[broneknotgeld]

PiS przisłuży sie sie zaś RAŚ?
www.dziennikzachodni.pl/artykul/775321,ras-wrogiem-numer-1-czyli-wyscig-do-prezydenckich-foteli,id,t.html
Czy sie tako bydzie paś?

Bobrek

[broneknotgeld]

Bobrek 1369

Na prawie niymieckim wioska lokowano
Już tu piyrwyj stoła wele jedny sztrasy
Miechowicki farorz bajtlom dowoł miano
Tako w Bobrku lecom nojdowniejsze czasy.

[broneknotgeld]

Bobrek Maschkowskich

Z historyji wiymy tela
Co Maschkowskich była sztela.

[broneknotgeld]

Bobrek Nosow

Ano i Nosow dziedzina tako
Dyć chop żył tukej zowdy jednako.

[broneknotgeld]

Bobrek Bujakowskich

Choć Bujakowscy ze Bujakowa
Bobrek tyż trzimiom - ło tym tu mowa.

[broneknotgeld]

Bobrek Starzinskich

Starzinskich sztela
Na czasu wiela?

[broneknotgeld]

Bobrek Gierałtowskich

Ano - ło nich wiela wiymy
Bobrek piyrwyj tyż trzimali
Dyć niy ło tym tukej rymy
Tako leca teroz dali.

[broneknotgeld]

Bobrek Hochbergow

Nojzocniejszy rod na Pszczynie
Trzimoł Bobrek w ty dziedzinie.

[broneknotgeld]

Bobrek 1785

Szejściu bambrow w Bobrku gospodorstwa trzimie
Zogrodnikow wiyncy na ty ziymi drzymie
Bo porachowali ich aże sztyrnoście
Tako se ta wioska teroz wyłobroźcie.

[broneknotgeld]

Bobrek Goduli 1842

Ano - majontek teroz Goduli
Przeca istnego dobrze my znomy
Ktoś kto buduje a niy chce bulić
Krol cynku tako - to niy som kromy.

[broneknotgeld]

W ryncach Schaffgotschow

Godula pomarł - majontek łostoł
Z rynkom Joanny grof tako dostoł
"Ślonski kopciuszek" ze tym echt paniom
Se podziwejcie terozki na niom.

[broneknotgeld]

Ks. Jan Kuboth

Miechowicki farorz kościoł chcioł budować
Prawie we tym Bobrku - stropiono mo gowa
Do jego świontyni stond richtig daleko
Choć Pon Bog ciyrpliwy - na wiernych durś czeko.

[broneknotgeld]

Ściepa na kościoł

Grof Schaffgotsch plac łoddoł na zocno świontynia
Geld ze huty "Julia" - przeca jom niy mina
Z wolnych kuksow tako dociepli grosiwa
No i łod parafian - niy trza se im dziwać.

[broneknotgeld]

Bajstlujom świontynia 1900-1902

Toż kunsztym Schneidera łon neoromański
Drapko postawiony - Ślonzek niy pogański
Dyć se fest ludziska terozki radujom
Zdo sie co Ponboczka jakby blizy czujom.

[broneknotgeld]

31.VIII.1902

Kościoł poświyncony
Msze już łodprowiajom
Cieszom sie we Bobrku
Co go tukej majom.

[broneknotgeld]

18.VI.1905

Z wielkom asystom konsekrowany
Chnet parafialnym - tako im dany.

[broneknotgeld]

Parafijo we Bobrku 20.III.1906

Konsekrowano sto rokow tymu
Przi gyburstagu jak skompić rymu?
Ponboczku - miyj we łopiece Bobrek
Niych parafiany wiedzom co dobre.

forum.gazeta.pl/forum/71,1.html?f=28940

[broneknotgeld]

Dynkmal poległych 1925

Wele kościoła dynkmal stowiajom
Tym co w pamiyńci na zowdy majom
Poległo wiela we piyrszy wojnie
Niych tako w ziymi se śpiom spokojnie.

[broneknotgeld]

Gmina Bobrek-Karb 1928

Bobrek z Karbiym skuplowali
Obszar dworski tako dali
Toż zocniejszo teroz gmina
Wiela znaczy ta dziedzina.

[broneknotgeld]

Kościoł wangelicki 1932

Wangeliki se terozki kościoł wystowiajom
No bo przeca do Miechowic za daleko majom
Choć ze drewna tako służy zocnie Ponboczkowi
I ze gminy parafianom - kożdy tako powiy.

Bobrek

[broneknotgeld]

Bobrek 1859

Cug z Tarnowskich Gor do Chebzio
Przez Bobrek se jedzie
Toż i gmina we proficie
Trza nom ło tm wiedzieć.

[broneknotgeld]

Bobrek 1872

Ze Bobrka do Zabrza tyż cugym pojedziesz
Toż niy jedna glajza terozki tam wiedzie
A i banhof zocny tako zbajstlowali
Dziedzina durś rośnie - co tu bydzie dali?

[broneknotgeld]

Banka w Bobrku 1898

Som cug terozki zdo sie za mało
Tako i banki ludziom zachciało
Co ze Bytomia na Zabrze wiedzie
Chocioż łod cuga drapci niy jedzie.

[broneknotgeld]

Huta "Vulkan" 1856

Huta ajza wytopiała
Dyć profitu coś niy dała
Drapko se bankrutym stała
We gyszywcie Pecha miałem.

[broneknotgeld]

Huta "Moritz" 1870

Kaj piyrwyj "Vulkan" - "Moritz" terozki
Dlo Friedlanderow tyż powod troski
Trzinoście rokow i bankrutujom
To co łostało Caro kupujom.

[broneknotgeld]

Huta cynku "Bobrek" (XIX w.)

Ano - Ślonzek cynkym słynoł
Gyszeft Bobrka niy łominoł.

[broneknotgeld]

Huta cynku "Flora" (1901-1908)

Krotko bo krotko dyć w Bobrku była
Choć cynk na Ślonsku tracioł już siyła.

Łagiewniki

[broneknotgeld]

Łagwie

Łagwie z drewna czy ze gliny?
-Waże to co kładli driny
Stond je bierom bytomiany
I kuplujom tako z mianym.

[broneknotgeld]

Łagiewniki

Skuli łagwi Łagiewniki
Zocne miano tukej majom
Jo zaś prawia za Karlikym
Co Ślonskowi tukej pszajom.

[broneknotgeld]

Łagiewnicke trojaczki

Piyrwyj Gorne, Średni, Dolne
Dyć niy zowdy były wolne.

[broneknotgeld]

Na trzi

Na trzi konski se dzielyły
Trzi folwarki tyż tu były
Ze Średnich do dzisioj majom
Chocioż zdo sie co jo bajom.

[broneknotgeld]

Były wielke

Łagiewniki wielke były
Aż po Rawa se ciongnyły
Dyć Krolewsko Huta na nich
W czyńści dźwigli - ktoś cygani?

[broneknotgeld]

Wieś łanowo

Była wioska to łanowo
Tako sie nom niy wydowo
Wojt Bytomia mioł jom w ryncach
Szczyro prowda - dyć niy krynca.

[broneknotgeld]

Łagiewniki 1254

Jak tyn Byto lokowali
Łagiewniki wspominali
Historyjom zocne tako
Że niyjedyn grod zapłako.

[broneknotgeld]

Wojtowo wieś

Toż wójtowi butomskiymu
Dali wioska - niy skiż rymu.

[broneknotgeld]

Łagiewniki 1369

Bytom podzielony - dwa prince tu siedzom
Łagieniki przeca Oleśnicy miedzom.

[broneknotgeld]

Łagiewniki 1532

Se podzielyła terozki wioska
Nad Dolne Gorne wyłazi troszka.

[broneknotgeld]

Łagiewniki Średnie

Gorne wiynksze piyrwyj były
Niym te Średnie se zjawiyły.

[broneknotgeld]

Łagiewniki Gorne

Wieki tu leciały - dziedzice miyniyli
Kamieńscy, Gałkowscy Foglerowie byli
W dziewiytnostym wieku już Thiele-Wincklera
Karlus se wzbogacioł - panym wielkim teraz.

[broneknotgeld]

Łaziska Gorne - Kattowitzer A.G. (1889)

Gruby werki wiela znaczom
Łagiewniki tyż łonaczom.

[broneknotgeld]

Łagiewniki Średnie XVII-XIX w.

Rod Mikuszow mo dziedzina
Łojciec dowo zowdy syna?

[broneknotgeld]

Łagiewniki Średnie XIX w.

"Krolewsko Huta" i "Laura" tako
Te Łagiewniki trzimiom jednako
Toż przemysłowo richtig osada
Yno niy robcie ło to mi zwada.

[broneknotgeld]

Łagiewnicko szkoła 1874

Piyrszo w ty szteli
Z tym rokym mieli
Choć krotko tako
Dyć nikt niy płakoł.

[broneknotgeld]

Nowo szkoła 1879

Ech - nowiuśko cołkym szkoła
Bajtli w mury chce sie wołać
Łagiewniki we proficie
Choć niy leci lekci życie.

[broneknotgeld]

Szkoła drugo 1910

Toż dziedzina naszo rośnie
Już potrzebno szkoła drugo
Dzieci śmiejom se radośnie
Rechtor łokym srogym mrugo.

[broneknotgeld]

Szkoła trzecio 1912

Na Hubertusie wybudowali
Bo stond do szkoły było im dali
A se dzieciskow tyż namnożyło
W czas "prorodzinny" przeca to było.

[broneknotgeld]

Szkoła szworto 1936

Już w miyndzywojniu ta szkoła szworto
Dyć przez to przeca niy myni worto.

[broneknotgeld]

"Hihenlinde" 1904

Gorne ze Średnimi se pokuplowały
Tako nowe miano z niymieckego brały.

[broneknotgeld]

"Linde" - lipa

Z łagiewnikow Gornych godła se nom wziyła
Toż wiymy co piyrwyj już ta lipa była.

[broneknotgeld]

Łagiewnicki ratusz 1904

Zocno gmina - ratusz zocny
Toż do dzisioj stoji mocny
Choć przichodnia we niym gości
I policjo - dyć niy złości.

[broneknotgeld]

Parafiany

Parafiany z Łagiewnikow
w Bytomiu rzykajom
Trza daleko łazić z rana
Toż kościoł stowiajom
Grunt kupujom, cegły tako
trza dzwignońć go rychło
Jyż niy bydzie tu jednako
Zło jakby fet zcichło.

[broneknotgeld]

Parafijo 1894-1896

Ksiondz Bonczyk budowy kościoła pilnowoł
Ze tym parafijo mo dziedzina nowo
Jaskisch architekta kunsztu niy żałowoł
Z Ponboczka pomocom świontynia chnet stowo.

[broneknotgeld]

Ks. Rudolf Jauernick

Toż ty parafiji istny farorzowoł
Piyrszy przi ołtorzu we kościele stowoł.

[broneknotgeld]

Kaplica św. Jana Nepomucena

Ech - we downych rokach ta kaplica była
Ze dwudziestym wiekym prawie se straciyła.

[broneknotgeld]

Łagiewnicki krziż pokutny

Jako mu rachować setki rokow tych?
Czy styknie co wiymy że stoji przez grzych.

[broneknotgeld]

Morowy kerchof 1872

Kogo mor ze świata wzioł
Pochowany tukej boł
Z parafijom jednak nowom
Wszyskich wiernych już tam chowiom.

[broneknotgeld]

Nowy cmyntorz 1901

Dzisioj zdowo sie tyz stary
Dyć był piyrwyj richtig jary.

[broneknotgeld]

"Lazaryt gminny" 1867

Ano - gmina wystawiyła
Lazarytym se chwolyła
Zachorzałych kurowali
Bo bliźniymu przeca pszali.

[broneknotgeld]

"Florentinegrube" 1822

Piyrszo gruba w Łagiewnikach
Zaczli do Barborki rzykać
Czy już ciyngym tako bydzie?
Z wonglym Ślonzek niy we biydzie.

[broneknotgeld]

Szachta "Schwerin"

"Florentinegrube" szachta tako miała
Dyć nojwiynkszo była - wiela wonglo dała.

[broneknotgeld]

"Florentinegrube"

Donnersmarckow gruba była
Tiele Winckler mioł jom potym
Tu nojstarszo - we niyj siyła
Wongel przeca naszym złotym.

[broneknotgeld]

Gruba "Cons. Florentine"

Ciyngym rosnońć se zdowała
Wiela szachtow juz z tym miała
Ciynzko dzisioj je zrachować
Tako samo rymy dować.

[broneknotgeld]

"Życzynie Marii" 1832

Toż cynkownia tu stanyła
Aresina jeszcze była
Pomarł - chnetko łod Wincklera
Erbnoł z wianym wszysko teraz.

[broneknotgeld]

Huta "Hubert"

Tyn werk łagiewnicki Hubert wybudowoł
Toż se niy dziwujcie - miano swoj dowo
We piecach surowki wiela wytopiajom
Toż i z gusu tukej cosik łodlywajom.

[broneknotgeld]

Hubert von Tiele-Winckler

Grajfka do gyszeftu richtig mioł tyn istny
Niyjedyn był ło to nawet i zowistny.

[broneknotgeld]

Huta "Zygmunt" 1937

Miano "Hubert" se straciyło
Teroz już "Zygmuntym" było
Ło Wincklerze trza zapomnieć?
-Spytom tako se niytomnie.

[broneknotgeld]

Przez II wojna

Przez II wojna wiela roboty
Łodlywy stond szły na te U-booty
Tankom niymieckim tyż werk coś dowoł
Skuli armiji zocnym se zdowoł.

[broneknotgeld]

Łagiewniki w Bytomiu 1951

Krotko po wojnie tako se stało
Bytom był ze tym richtig w proficie
Ano - dzielnica przeca niymało
Bogaci miasto - wszyscy to wiycie.

[broneknotgeld]

"Zgorszenie publiczne"

W Łagiewnikach ło tym prawiom
katowice.naszemiasto.pl/artykul/521980,zgorszenie-publiczne-juz-dotarlo-na-slask-zobacz-zwiastun,id,t.html?kategoria=678
Co przez Fytel Ślonzek jawiom
Bydzie z tego wiela szpasu?
Dlo nikerych kyns marasu?

Rozbark

[broneknotgeld]

"Mons rosarum"

"Wzgorze róż" - czy tu widziecie?
W downych wiekach - to powiycie?

[broneknotgeld]

"Rosenberg"

Ze niymiecka tako zwane
Do dzisiejszych czasow dane.

[broneknotgeld]

"Rozbark"

Na "Sroczym Wzgorzu" tyż róze kwitły?
Minione wieki pewno je wytły.

[broneknotgeld]

Kościoł św. Jacka

Wele drogi co na Szarlej kościoł zbudowali
Do Ponboczka parafiany w świontyni rzykali.

[broneknotgeld]

Piyrwyj kaplica

Piyrwyj kaplica w tym miejscu stoła
Kaj dzisioj epno świontynia
Tako świyntymu Jackowi pszoła
Bo zowdy Jego imiynia.

[broneknotgeld]

Kaplica św. Jacka 1740

Ech - to jeszcze cieśli rynkom
Tukej postawiono
W myślach przed niom yno klynkom
Historio niy kono

Trzi ołtorze w środku miała
Dzwon w wieżyczce zocny
Tako wielko sie zdowała
Świynty Jacek mocny.

[broneknotgeld]

Kaplica św. Jacka (1801)

Na miejscu kaj piyrwyj już niyjedna stoła
Dość wielko dźwignyli kaplica
Rownała do prawie małego kościoła
Ze cegły zaś były jyj lica.

[broneknotgeld]

Kaplica św. Jacka 1801-1868

Miyszkańcom dziedziny dośc długo słuzyła
Choć zdała sie z czasym już ciasno
Jak Rozbark rozgorzoł se tyż wypolyła
Łoj było w tym czasie tu straszno.

[broneknotgeld]

Łodbudowa kaplicy św. Jacka (1875)

Po pożerze parafiany jom łodbudowali
Tako na znak swoji wiary Ponboczkowi dali.

[broneknotgeld]

Kościoł św. Jacka (1908)

Cołkym nowy kościoł stoji
Przi stary kaplicy
Se wiezami gryfnie stroji
Słuzy okolicy

Epny że katedrom zdo sie
Rozbarczan raduje
Tym djoskowi gro na nosie
Kozdy forszteluje.

[broneknotgeld]

Jako gora

Toż jako gora kościoł sie zdowo
Ty świynty Jacek wysoko stowo
Zdo sie co Niebo dropie wieżami
Tuście z Ponboczkym toż nigdy sami.

[broneknotgeld]

Rozbark 1927

Ano sie stało - gminy już niy ma
Bytom w proficie - niy mynczy tryma
Teroz dzielnicom wielkego miasta
Niy ma co ślimtać - wystyknie - basta!

[broneknotgeld]

Urzond Gminy Rozbark

Gmina se gmachym jego asiyła
Tako i Bytom miywoł go w zocy
Po drugi wojnie rynka zbulyła
Już niy nacieszom se nasze łoczy.

[broneknotgeld]

Dynkmal poległych 1924

W dziesiyńciolecie wybuchu wojny
Dynkmal tu stanoł - na czas spokojny
By rozbarczanie durś pamiyntali
Tych co zginyli choć życiu paszali.

[broneknotgeld]

Dynkmal poległych 1945

Ech - take czasy! Możecie wierzyć?
Dynkmal poległych we gruzach leży
Toż drugo wojna to napochała
Ło piyrszy tako pamiyńć mazała.

[broneknotgeld]

"Fiedlerglücksgrube"

Tako gruba Rozbark mioł
Ze niyj cynk i ołow broł.

[broneknotgeld]

"Heinitz"

Znocie gruby piyrsze miano?
"Rozbark" jeji potym dano.

[broneknotgeld]

Restauracyjo "Pod czornym orłym"

Toż mioł tyn lokal Oscar Pogoda
Dzisioj by wiela ło tym szło godać
Dyć kamiynica downo zbulyli
I epno kostka tu postawiyli.

[broneknotgeld]

"Pogoda"

Po Pogodzie co łostało?
Miano zocne - toż niymało

Jakby jeszcze dzisioj żył
To by z tego kontynt był.

[broneknotgeld]

Rozbarski browar

Na Rozbarku piyrwyj stoł
Zocne piwo richtig loł?

[broneknotgeld]

Wiatrak

W dziewiytnostym wieku
wiatrak tu mloł zboże
Potym mu pedzieli
-Mloć dali niy możesz.

[broneknotgeld]

W miyndzywojniu

Ze Krolhuty do Bytomia
Bankom żeś se kuloł
Dyć po drodze miołs granica
Niy byda cie fuloł.

[broneknotgeld]

Na Sroczy Gorze

Na Sroczy Gorze kapliczka stoła
Niym ta piaskownia tu mieli
Niy szło na sroki tako już wołać
Straciyły sie ze ty szteli.

[broneknotgeld]

Ze Sroczy Gory

Ze Sroczy Gory już wysypisko
A ponoć tu sie zaczyło wszysjo
Gorka zdowała sie jakby świynto
Czy jeszcze ło tym ktosik pamiynto?

Karb

[broneknotgeld]

"Karb"

Cosik tukej "karbowali"?
Drewno z bora wycinali?

[broneknotgeld]

"Karp"

Kaj stow dziedziny
Tam karpie driny.

[broneknotgeld]

"Karwi" 1451

Z dokumyntu princa tako ło tym wiymy
Stow "Karwi" bogactwym tutejszy dziedziny.

[broneknotgeld]

We downych czasach

We downych czasach wioski niy było
Dyć wiela karpi w stowie tu żyło.

[broneknotgeld]

Karb XIX w.

Skiż grubow galmanu Karb drapko nom rośnie
Dyć czy sie bergmonom żyje w niym radośnie?
Robota przi tymu richtig ciynzko przeca
Śmiertka fest żniwuje do swojego neca.

[broneknotgeld]

Cug w Karbiu

Przez karb ze Chebzio w Tarniwske Góry
Glajzy już wiedom - niy yno chmury
Maluśki banhof stanoł w dziedzinie
Toż co przejyżdżo szteli niy minie.

[broneknotgeld]

Kolanijo "Worpie"

Miano łod hołdow se tako wziyła
Że przi nich rosła tego niy kryła.

[broneknotgeld]

Nowy banhof (1897-1900)

Przi starym stanoł se banhof nowy
Karb nom urosnoł - zdowo sie zdrowy.

[broneknotgeld]

Karb Miejski

W Bytomiu downo Karbia kawałek
Z czasym dziedziny mu weznom całe
Dzielnicom miasta tako już bydzie
Z nim we bogactwie abo tyż biydzie.

[broneknotgeld]

Do Rokitnicy (1840-1842)

Droga z Bytomia do Rokitnicy
Prawie w tych rokach już zbajstlowali
Karb zkiż uciechy możno niy kwiczy
Dyć ze tym wiyncy życio mu dali.

[broneknotgeld]

Do Wygody (ok. 1850)

Nowo droga na Wygoda
Przez nasz Karb tyż wiedzie
Szkryfnońć ło tym mi niy szkoda
Furmon drapci jedzie.

[broneknotgeld]

Banka (1913)

Do Bytomia bankom
-Tako tyż Miechowic
Glajzy ze mijankom?
Historyjo - powiydz.

[broneknotgeld]

Szkoła 1860

Muster w karbiu miechowicki
Filjom przeca yno
Dyć niy bydzie to na wdycki
Wiydz ło tym dziecino.

[broneknotgeld]

Nowo szkoła (1865-67)

Ano - budujom bo Karb nom rośnie
-Chnetko zawoło bajtli radośnie
Dzwonek do gryfny nowiutki szkoły
Niyjedyn rechtor bezto wesoły.

[broneknotgeld]

Drugo szkoła (1895)

Drugi szkoły trza dziedzinie
Drapko pewno tyz i trzaci
Dzieci wiyncy - to niy minie
W przodek ze tym Karb durś leci.

[broneknotgeld]

Gmina Karb 1875

Piyrwyj Miechowic to kolanijo
Terozki gmina - toż niy mecyjo
Yno dlo Karbia wielko radocha
Tako dźwigniony przeca niy trocha.

[broneknotgeld]

Gminny ratusz (1908)

Ano - dyć gminie ratusza trza
Już postawiony - se cieszom - ja!

[broneknotgeld]

Ratusz 1908-1008

Nic że niy ma naczelnika
Dyć budynek ciyngym stoji
Idzie se na niego blikać
Przi stuleciu se łobstroji?

[broneknotgeld]

Karb 1928

Karb ze Bobrkym skuplowany
"Bobrek-Karb" terozki dany.

[broneknotgeld]

Karb 1951

Cołki Karb z tym Bytom mo
Tako kożdy go już zno.

[broneknotgeld]

Karbsko parafijo

We miechowicki Karb dugo był
Dyć przeca ciyngym nabiyroł siył
Bezto se niy ma czymu dziwować
Że tukej kościoł zaczyli stowiać.

[broneknotgeld]

Karbski kościoł (1907-1909)

Ano - stowiajom kościoł w dziedzinie
Projekt łod Śliwki z Zabrza ciekawy
Neogotyku muster niy minie
A wiernym radość świontynia sprawi.

[broneknotgeld]

Kościoł pw. Dobrego Pasterza 7.XI.1909

Kościoł w parafiji stoji
Ze tym dniym konsekrowany
Tako Karb na wieki stroji
Zgodni we tym parafiany.

[broneknotgeld]

Ksiondz Aureliusz Barabasch

Piyrszy farorz na dziedzinie
Parafijo se kupluje
Wiara przeca tu niy minie
Tako kożdy forszteluje.

[broneknotgeld]

Karb 1925

Przi kościele dynkmal stoji
Ofiar wojny - trza pamiyntać
Karb ło pokoj dyć se boji
Wojna to ludzkości piynta.

[broneknotgeld]

"Elizabethgrube" 1822

Toż we niyj galman durś fedrowali
Trza by cynk z czegoś tu wytopiali
Dzisioj łostała we mianie sztrasy
Trwo tradycyjo w dziedzinie naszy.

[broneknotgeld]

"Johannagrube" - 1857

Ano - w tym czasie cynk tu krolowoł
Potrza galmanu - toż gruba stowo.

[broneknotgeld]

"Grafin Johanna" (1907-1908)

Toż gruba w Karbiu terozki stowo
Już niy galmanu yno wynglowo
Bergmon fedruje te czorne złoto
Bo przeca Ślonzek łod downa mo to.

Kościoł Wniebowziyńcia NMP

[broneknotgeld]

Kościoł Wniebowziyńcia Nojświyntszy Maryji Panny

1231
Tako data Liebental szkryfnoł we kronice
Jedni tymu wierzom dlo inkszych to wice.

[broneknotgeld]

1253

W tym roku naprowdy tyn kościoł już stoł
Kto godo inaczy to winny jest fioł.

[broneknotgeld]

Z dolomitu

Z dolomitu kościoł tyn wybudowali
Wapiyń i piaskowiec tyz jeszcze dodali
Byłby styl romański dyć przerobek wiela
Dzisioj cołkym inkszo jest ta świynto sztela.

[broneknotgeld]

Cudowny łobroz Matki Boski Bytomski

Namalowany w piytnostym wieku
Do dzisioj łostoł - cud to czowieku
przecase Bytom niy roz hajcowoł
A łobroz ciyngym nadzieja dowoł.

[broneknotgeld]

Portal połedniowy
W niym łobroz se łostoł ty piyrszy świontyni
Dyć lata durś lecom i kościoł se miyni.

[broneknotgeld]

Portal połedniowy
W niym łobroz se łostoł ty piyrszy świontyni
Dyć lata durś lecom i kościoł se miyni.

[broneknotgeld]

1675

Pożar chnet tukej wypoloł wszysko
We środku wielke pogorzelisko
Pusty stoł kościoł przez sztyry roki
W końcu przewioło tu wszyske ćmoki
I se za remont jakoś zabrali
W dwa lata wszysko wyrychtowali
Zaś ta świontynia Bytom zdobiyła
Dziw że utropa wielko "przeżyła".

[broneknotgeld]

1739

Dzwoni ze wieżyczki sygnaturka nowo
Doleczek ze Strzelec tako wyrychtowoł.

[broneknotgeld]

1851-1857

Ksiondz Szafranek cołki kościoł teroz przebudowoł
Dyć czas na to był nojwyrszy - kipnońć se wydowoł
W neogotyk go przi tymu zarozki łoblykli
Tak łostało se do dzisioj - wszyscy my prziwykli.

[broneknotgeld]

39255

Tela talarkow remont kosztowoł
Niyjedyn piniondz na to swoj dowoł
Łod Friedlandera nawet pożyczki
Na kościoł wziyli - by cieszoł wdycki.

[broneknotgeld]

1854

Łod zachodu kościoła już wyńście łotwarte
Chnetko łod piyńciuset lot było zawarte
Jak ksiyndzow mieszczany dwoch pomordowali
Toż na amyn dzwiyrza tu zamurowali.

[broneknotgeld]

5.X.1857

Po ty przebudowie zaś kościoł świyńciyli
W dziyń świynty Jadwigi na to zezwolyli
No i gyburstagu łod krola pruskiego
Właśnie we tym czasie im panujoncego.

[broneknotgeld]

Świynty łobroz (1857)

Wniebowziyńcie Maryji Elmer namalowoł
We Wiedniu aż znodli artysty istnego
W ołtorz jeszcze Gruner kunszt snycerski dowoł
Ozdobom kościoła był łon "mariackego".