Ech, te Niymcy!

[broneknotgeld]

"Oktoberfest"

Z wrześniym jednak go fajrujom
Dyć chmiel wtedy fest żniwujom
Ze dwa tydnie piwo żłopiom
Ponoc niy som nic "pod kropom".

[broneknotgeld]

3.X. - Dziyń Jedności Niymiec

Majom w Niymcach Dziyń Jedności
Poczdam wszyskich latoś gości
Co sie dzisioj tym radujom
Toż uciecha ze tym czujom.

[broneknotgeld]

W Niymcach tynge gowy majom
forum.gazeta.pl/forum/72,2.html?f=34281&w=54533390
Czy Ślonskowi richtig pszajom?

[broneknotgeld]

Czowiek Heidelberski

Czwiek z Heidelbergu piyrszym we Europie
Poł miljona rokow na zadek se kopie
Dyć przeca we Niymcach trefiyło nom spotkać
Takego zocnego ludzkości praprzodka.


Lodowce

Skuwały lodowce pora razy ziymia
Dyć ktosik juz myśloł - "jo to wszysko szczimia".



Neandertalczyk

Rzeka Neander pewnikym znocie
W jeji dolinie Felhof jaskinia
Tako tyż sztela praprzodka mocie
Zdo sie co jego teroz dziedzina.

[broneknotgeld]

Szworty lodowiec

Ponoć szło go szczimać w kupie
Szczyńściym niy chcom przeca zgupieć
I choć trocha se tyż pszajom
Z lodym wygrać szansa majom.


Wielki rzeźbiorz

Toż lodowiec kunszt pokozoł
Ziymia po niym jest gryfniejszo
Kożdy bydzie to powożoł
Prawie kecka dyć dzisiejszo.



La Madeleine

Magdalyńsko kultura z dzisiejszy Francyji
Prziszła na te ziymie dyć niy bez mecyji
Szczyńściym co sie ciepli terozki zrobiyło
Toż i na połnocy znośni jakoś żyło.

[broneknotgeld]

Kultura azylsko (Mas d'Azil)

Zaś starom drogom co nowe idzie
Kolybka inkszo dyć tu se bydzie.


Kultura tardynosko (La Fere-en-Tardenois)

Zdo sie - tref tako samo durś plecie
We mezolicie już my som przecie.


Kultura maglemosko (Maglemose - Zelandia)

Widać w tych stronach już wiyncy mocy
Toż ta kultura przeca z połnocy
-Sie na połednie terozki wcisko
Czowiek i na tym ździybeczko zysko.

[broneknotgeld]

Wspolnota rodowo

Toż niy som czowiek swoj los budowoł
Cywilizacjo z rodu wyrosto
Rada naturze tako tyz dowoł
Ze krewniokami żyje se prosto.


Wierzynia

Kult przodkow - tako samo przirody
To religijo ty piyrszy wody.


Kunszt

Kunszt tyż u ludzi piyrwotnych widać
Szwabji jaskinio za przikłod by dać
Wogelherd - take jest jeji miano
W niyj już portrety "grawiyrowano".

[broneknotgeld]

We neolicie

Ze myśliwego no i zbiyracza
We neolicie momy oracza
Co i w zogrodzie gowiydź hoduje
Z tym krok do przodka - to forsztelujesz.


Urmitz k. Koblyncji

Neolityczno zdo sie warownia
Wrogow se boli jako i łognia.


Gorki lepiom

Gorki lepiom w neolicie
Ze tych szkorup wiyncy wiycie
Jako im se wtedy żyło
-Dyć poleku lepi było.

[broneknotgeld]

Kultura pucharow lejkowych

Poł Europy łogarnyła
Na połnocy wszyndy była
Tako w kontynyntu środku
Ta kultura tyż napotkom.


Kultura michelsbersko

Z Michelsbergu szła do przodka
Idzie tako jom napotkać
Na dziedziny tyj połedniu
Kaj Men Neckar inksze blednom.


Kultura cyramiki sznurowy

Prziszła tu ze wschodu
Niy yno jo godom.

[broneknotgeld]

Kultura amfor kulistych

We Brandynburgji richtig widoczno
Na wschod se cisła pieronym mocno
Cołkym zonikła ze neolitym
Toż wszysko tako pomiyni przi tym.


Kultura pucharow dzwonowych

Z Pirenejow tu wandruje
Bronz na drodze swoji suje
Zdo sie koniec neolitu
Toż ło niego już niy pytom.


Plymie

Ano - rody już łonczyło
Ze wodzym na przodku było
Tako naczelnikow radom
Z dymokracjom co tyż zwadom.

[broneknotgeld]

Pochowki

Toż megalityczne grobowce znojdziecie
Kaj ińdzi we ziymi cmyntorze com przecie
I ciałopolynie tyż praktykowane
A prochy we urny ze gliny dowane.


Bronz

Kaj gory Harzu tako Rudawy
Już unietycko ludność umiała
Wytopiać ruda niy dlo zabawy
Stond jeji siyła przeca se brała.


Laubinger

Grupa laubingersko cosik tukej znaczy
Se turyngsko-sasko dziedzina łonaczy.

[broneknotgeld]

58 r.p.n.e.

Germany Galijo chcieliby ucapić
Tako se rzymianom niy trza teroz gapić
Stanyły legije pod wodzom Cezara
Ech - ze tym Teutonom przidzie se fest starać.

[broneknotgeld]

"Limes"

Przed Germanami "limes" łobroni
Tako se zdowo dyć czas pogoni
Choć umocniono richtig granica
Kedyś łodmiyniom se jeji lica.

[broneknotgeld]

Państwo Frankow

Toż miyndzy Rynym a tom Sekwanom
Franki z potyngom swojom powstanom
Na wschod pociongnom - tyż na połednie
Rośnie ich siyła w nocy i we dnie.

[broneknotgeld]

Tolbiac 496

Aleman richtig tukej pobity
Dyć Chlodwig yno rośnie zaś przi tym.

[broneknotgeld]

Poitiers 732

Toż majordom merowiński Francyjo łobroni
Muzułmanow ze ty ziymi pod Poitiers przegoni
Łod Karola Młota wyńdzie wielko dynastyjo
Dlo mamlasow Merowingow yno tragedyjo.

[broneknotgeld]

Karol Wielki (786)

Po Merowingach dynastjo owo
o ze tym władcom we chwale stowo.

[broneknotgeld]

Cuzamyn

Co piyrwyj łosobno terozki cuzamyn
Frank German Rzymianin - jednak niy na amyn
Dyć w końcu zabraknie Karola Wielkego
Chcom być zaś se łod sia - fest ciongnom do tego.

[broneknotgeld]

Wilijo w Rzymie (800)

Rzym władcy Frankow rozgłoszo chwała
Stond tyż se siyła cysorza brała.

[broneknotgeld]

Ludwik II Niymiecki (843-876)

Toż wschodni konsek cysorstwa jego
Niymcy wyrosnom richtig ze tego.

[broneknotgeld]

Otton I

Syn łod Hynryka w boj Niymcy wiedzie
Łon przeca krolym tako na przedzie
Ło władza prince se czasym wadzom
Przeskoczyć jednak go niy poradzom.

[broneknotgeld]

Świynte Cysorstwo Nacyji Niymiecki (962)

Z Ottonym I już I Rzesza
Przeca niyprowdom jo tu niy grzesza.

[broneknotgeld]

Krol Hynryk IV

Arcybiskupa krol Hynryk Szworty
Mediolanowi dowo - czy worty?
Papiyż wnerwiony tyż richtig wiela
Łon krześcijaństwym rzońdzi - toż tela
Wiela poradzi łodpor w tym dowo
Ekskomunika przed władcom stowio.

[broneknotgeld]

Rzym 1084

Z wojskym do Rzymu krol se wyprowio
Toż "Wieczne Miasto" na łasce jego
Gyszynk z korony cysorski dowo
Co Hynrykowi potrza do tego?

Bawaria

[broneknotgeld]

Ponoć Bawaria jest echt niymiecko
Ło tym tu godo i małe dziecko
Dyć w Niymcach kożdy pszaje landowi
Toż i Bawarczyk to zowdy powiy.

[broneknotgeld]

Bawario (land)

Land wielki bogaty - umynczysz tu gyry
Dyć idzie Bawario podzielić na sztyry
Jest Gorno i Wschodnio tyż Szwabia Bawarsko
Zaś szworto Frankonia se głosi tu dziarsko

[broneknotgeld]

Zugspitz

Ze Alp niy cołkym gora wysoko
W Niymcach na piyrsze miejsce se skoko
Ździybko brakuje do czech tysiyncy
Dyć to Bawarow wcale niy mynczy.

[broneknotgeld]

Bawaria

Zdo sie land Niymiec to piyrszy
Bo przeca żodyn niy wyrszy.


Perełka

Znosz Wittelsbachow perełka?
Przeciyrej zaroz se szkiełka
Przeca w Monachium żeś jest
Tu sie zabawisz tyż fest.


Bawarske zamki pałace
Zodziwiom zowdy kożdego
Zdo ci sie - mało jest paczeć
Dyć jako wkludzić do tego?

[broneknotgeld]

"Krachledern"

Ano - skora ciyngym trzeszczy
Na to Niymka dyć niy wrzeszczy.


To dziwo

Ponoć niyjednago to naprowdy dziwo
Co w krotkich galotkach lepszy smak mo piwo.


Gryfne karlusy

Pastyrz i feszter przewodnik tako
W krotkich galotkach gryfne jednako.

Neuschwanstein

[broneknotgeld]

"Krolewski zamek"

Nałoglondoł se bajek łod Walta Disneya?
Myśloł - Mom piniyndzy podobnoś za wiela
-Toż sie piykny zamek tukej wybudowoł
Choć godali ło niym że richtig zwarjowoł

Dyć dzisioj Bawarjo asi sie tym cudym
Skiż krola Ludwika myni jakby nudy
I chocioż przi tymu prawie zbankrutowoł
Łon to przeca cołki historyji dowoł.

[broneknotgeld]

Krol Ludwik II Bawarski
W Hochenschwangau se karlus przezocnym wychowoł
Możno bestoż ideje romantyka stowioł
Zowdy z przodka choć przeca dziwaczne to było
No i zdo sie Bawarii jakoś niy służyło

Ludwik w gowie mioł czynsto średniowiecze downe
Abo tyż to co starsze a ponoć cudowne
Stond te zamki turnieje pieśni trubadurow
I Ryszarda Wagnera głos germańskich chorow

Nić że bez to Bawario nawet ziymie traci
Nic że skarbiec durś ciyrpi bo za wiela płaci
Wieczne zamki pałace wieczno tyż muzyka
W tym kunszt co krolowi zdoł sie Nieba tykać.


Bawarske dzisioj

Co wpiyrw krolewske bawarske dzisioj
Bych na Ludwiku nudli niy wiyszoł
Łostoł w legyńdzie w piśmie we gowie
Co? -Że niyrichtig był z niego czowiek?

Monachium

[broneknotgeld]

Monachium

Co nojgryfniejsze bywo po lecie?
Grod nad Izarom w tym recht jest przecie
Turystow ciongnom tu richtig krocie
Toż Oktoberfest wtedy tu mocie

Ludwik princesa Tereska broł
Toż przi weselu gest wielki mioł
"Theresienwiese" jeszcze niy było
Dyć se tu wiela piwa wypiyło

I łod tych czasow - chnet dwiesta lot
Po lecie Bawar richtig jest rod
Słonko se skryło we biyrze złotym
Uciechy trza nom - to niy gupoty.


"Niymiecki Paryż"

"Niymieckim Paryżym" Monachium tyż zwom
Cosik mi sie zdowo - inksze zdanie mom.


Blik na Monachium

Z telewizyjny zoglondnij wieży
Atrakcjo piykno możecie wierzyć
Przeca z niyj Alpy tyż widać czynsto
Bele we lufcie niy było gynsto.

[broneknotgeld]

Wele Monachium

Kaltenberg wele Monachium leży
Tukej turnieje wielke rycerzy
Prawnuk Ludwika tako zrychtowoł
By sie land cały tymu dziwiwoł.

Bamberg

[broneknotgeld]

Bamberg

Bamberg Frankonii perłom jest przeca
Ze bawarskego landu tyż neca.


"Rauchbiyr"

Yno z Bamberga jest take piwo
Dyć niychej wos to wcale niy dziwo
Toż recyptura znoł wiek szesnosty
Słod przipolony w tym koncept prosty
Choć zdo sie jeszcze że cosik wiyncy
No to pijymy - niy trza sie mynczyć!


Kajzer Hynryk II

Kajzer Hynryk II w jedynostym wieku
"Rzym" chcioł tu zbudowć - poskopisz czowieku?
Choćcioż se dziwujesz dyć dobrze sie stało
Przeca cosik z tego do dzisioj łostało.

Marktl am Inn

[broneknotgeld]

Marktl am Inn

Mało mieścina latoś coś budzi
Toż stond se karlus w Watykan kludzi.

[broneknotgeld]

W Wielko Sobota (16.IV.1927)

W Wielko Sobota Zefel rodzony
Toż we Wielkanoc zarozki krzczony
Wodom co była świyncono rano
Z niom wiara wielko bajtlowi dano.

[broneknotgeld]

Żywiciel

Inn Marktl tyż żywioł tako jak niwy
Z rzekom i ziymiom czowiek szczyńśliwy.

[broneknotgeld]

Czi sklepy

Toż pamiontkarske czi sklepy majom
Ze Janym Pawłym tyż coś sprzedajom
Jednak Benedykt we raji piyrszy
Dlo Marktl łon przeca teroz nojwyrszy.

[broneknotgeld]

Gyszeft

Gyszeft przestawić na Ratzingera?
Profitu z tego może być wiela.

Badenia - Wirtembergia

[broneknotgeld]

Z Bawarii na zachod pódziesz we tyn land
Toż przeca tu Niymiec jakby jedyn rand.

[broneknotgeld]

Czi krainy w tym landzie przepiykne znojdziecie
Badynio i Szwarcwald - te już znocie przecie
Wirtembergia miejscowi ciyngym Szwabiom zowiom
Toż na take miano jo tyż tukej stowiom.

Brackenheim

[broneknotgeld]

Brackenheim

W południowych Niymcach te miasto jest zocne
Kaj wino czerwone robiom nawet mocne
Winorośl "Lamberger" tukej sie udowo
Godajom co łona jest jak ta krolowo

Z czinostego wieku już znomy ta sztela
Rudolf Habsburg miastu przisłużoł sie wiela
Możno tyż lubowoł sie w tutejszym winie
Kere ciyngym majom w niymiecki dziedzinie.

[broneknotgeld]

Muzeum Heussa

Heuss Theodor tukej przeca sie urodzioł
Swojym piorym łostro we Hitlera godzioł
Dyc skrył sie na Ślonsku w małym Gościszowie
Historio nom godo że wielki był czowiek

We tym NRFie zostoł prezydyntym
Dziesiyńć lot kraj czimoł co już niy był "dynty"
Niy dziwota tymu że muzeum tu mo
Europa pamiynto i nad niym tyż dumo.

Stuttgart

[broneknotgeld]

Stuttgart

Stuttgart stolicom landu jest tego
Znojdziesz we Niymcach se bogatszego
Miasta co tako miyszkańcom zdo sie
Na samym wiyrchu te przeca mo sie.


Stadnina (Stutengarten) 950

Ano skiż koni se tu zaczyło
We downych Niymcach cosik znaczyło.


Stolica krolewsko

Toż "napoleońsko" stolica sie zdo
Wirtembergio krola już terozki mo
Choć yno stulecie jedne take było
Dyć sie ze tym richtig miasto podźwignyło.

[broneknotgeld]

Ludwigsburg

Ze Stuttgartu metrym drapko se tu znojdziesz
Przi pałacu tako do zochwytu dońdziesz.


Pałac

Niymiecki barok w pełny swyj krasie
Toż tukej wybrać naprowdy trza sie.


"Marhengarten"

Łogrod dlo bajtli ze baśni braci
Grimm jejich miano - pewnikym znocie
Zoglondnońć tukej wom se łopłaci
Wiela radości dzieciom tyż docie.

[broneknotgeld]

Cannstatt

Podzim - toz trza tyż zoglondnońć tukej
W Cannstatt radości życia poszukej.


Festiwal piwa

Nic że bawarski "Oktoberfest"
Richtig we Niymcach nojwiynkszy jest
Wola we Cannstatt piwa se napić
Niy na Bawario ciyngym se gapić.


Biyr

Biyr jest słonkym
We niym życie
Ło tym tukej
Wszyscy wiycie.

[broneknotgeld]

Łogrod "Wilhelma"

Zwiyrza i ziela
Tu coś za wiela
Toż we Europie tyn łogrod znajom
I sie tyż jymu wiela dziwajom.


"Mineralbad Lauze"

Potoplać se możesz
W mineralny wodzie
Zdrowie poratujesz
-Pokłonisz tyż modzie.


Telewizyjno wieża

Ze wieży na miasto niy yno se blikniesz
Łoczami na Alpy przeca tako mykniesz.

[broneknotgeld]

Chocioż niymiecko to cołkym łonka
www.stuttgart.de/sde/menu/frame/top_11021.htm
Możno se przido tu tako stronka.


Muzeum Mercedes-Benz

Tu mosz auta historyjo
To dlo Niymca niy mecyjo.


Muzeum Porsche

Łod Mercedesa łone niy gorsze
Pewno zochwyci Muzeum Porsche.

Hesja

[broneknotgeld]

Sercym Niymiec mi sie zdo
Dyć czy rola tako gro?

Frankfurt n. Menem

[broneknotgeld]

Frankfurt

Zaroz we gowie mi franfuterki
Burczy coś cicho ze brzucha
Skiż nich tyn Franfurt tyż przeca wielki
Bo dbo ło ciało i ducha.

[broneknotgeld]

Torgi Ksionżki

Nojwiynksze na świecie tu jest ksionżki świynto
Zowdy we "Oktober" - piwosz zapamiynto
Choć do chmielu ksionżka cosik niy pasuje
Bo pryndko sie wtedy ćmok we łoczy "suje".

Nadrenia-Palatynat i Saara

[broneknotgeld]

Ren ze Mozelom se tukej płynom
Do końca świata tego niy minom
A jo wesoło ciyngym mom mina
Jak tutejszego wypija wina.

[broneknotgeld]

Land Katedr romańskich - takim go znocie
We Spirze Wormacji te kościoły mocie
Moguncjo i Trewir dołożcie do tego
Wiela dlo Kościoła znaczyły naszego.


Niymiecki Szlak Winny

Łoj bych se puścioł jo szlakym tym
Na razie musi wystyknońć rym.


Dolina Mozeli

W Dolinie Mozeli rizling zocny płynie
Trza łostać na dugo w ty piykny dziedzinie.

[broneknotgeld]

Mozelske zamki

Arras Eltz i Cochem - zamki przi Mozeli
Niymi tyż se idzie zochwycić w ty szteli.


Lorelei

Se Rynym płyna - ślyp szuko skał
Możno na keryś ta Lorelei.


Ryńske Gory Łupkowe

Kaj Ryn se wcisko w Gory Łupkowe
Zochwyt na gymbie mo zowdy czowiek
Choćbyś Lorelei niy spotkoł nawet
Zdo ci sie - cuda widzisz na jawie.

Bad Dürkheim

[broneknotgeld]

Z Mannheim

Z Mannheim do Bad Dürkheim bankom se zajedziesz
Dej pozor na glajzy jak Bachus cie wiedzie.

[broneknotgeld]

Bad Dürkheim ok.1000 r.p.n.e.

Ano - już Celty tukej siedzieli
Radochy jednak z winnic niy mieli
Niy rosły jeszcze we ty dziedzinie
Dyć se niy tropcie - to przeca minie.

--

Rzymiany nad Rynym

Jakby niy godać - coś szteli dali
Wonorośl drapko zielyni wzgorza
Na dobrym winie tyż se już znali
Hehe - co dali przeca niy wroża.

[broneknotgeld]

Kaj jest?

Kaj tyn Bad Dürkheim?
Chciyjcie mi wierzyć
To już połnocne
Richtig Wogezy.

[broneknotgeld]

Z XIV wiekym

Z sztyrnostym wiekym już miejske prawa
Dziedzina rośnie richtig na winie
Ech - we Bad Dürkheim zocno zabawa
Niychej i ciebie to niy łominie.

[broneknotgeld]

"Bad Dürkheim" - 1904

"Badym" już na gymba cało
Moga tako szrajbnońć śmiało
Bo im wlazło to do miana
-Se kurujom tukej z rana
Solankami miejscowymi
Potym winkym - przeca wiymy.

[broneknotgeld]

Bad Dürkheim 1969

Kreisu z rokym tym stolica
Toż weselsze ciyngym lica
Teroz se naprowdy kraszom
Tako tyż mieszczany aszom.

[broneknotgeld]

Kaplica św. Michała 1990

Ano - kapliczka stanyła nowo
Worsztu trza pojeść i popić zdrowo
Przeca to miastu richtig na chwała
No i ucieszy tako Michała.

[broneknotgeld]

1,7 mln litrow

Łoj - tela wina jako wysłepia?
Na tako beka niy idzie hepać.

[broneknotgeld]

Targi wina i szampana

W targi wina i szampana
Bych bych zabawioł se łod rana
Z bachantkami tyż gryfnymi
Dlo mnie prawie raj na ziymi.

[broneknotgeld]

Łod wiosny

Łod wiosny na podzim festyny w winnicach
Życiym se raduje cołko okolica
Przi zimie se cosik robi tu smutnawo
Jakoś to szczimiymy by wiośnie bić brawo.

[broneknotgeld]

Skiż kamracynio

Skiż kamracynio - to se niy zdowo
Kluczbork z Bad Dürkheim winko dostowo
Trza by z tym eksra fajer zrychtować
Za zdrowie wypić - podegustować
Kto se kamraci - dobrze to wiycie
Dbo coby wszyscy byli w proficie.

[broneknotgeld]

Klasztor Limburg

Miano łod rzeźbiorza - znomy
Dyć tu klasztor downy momy
Co w dostojny już ruinie
Ciyngym stoji - to niy minie.

[broneknotgeld]

"Dom Catoir" (1781)

"Dom" mo muster barokowy
Ano - niy jest tyż łon nowy
Dyć ośrodkym tu kultury
Ciyngym dźwigo jom do gory
Tako w niym muzeum majom
Historyji przeca pszajom.

[broneknotgeld]

Uzdrowisko

Ech - uzdrowiskym Bad Dürkheim słynie
Werci tyż wspomnieć ło ty dziedzinie
Wodom już mnichy se kurowali
Tako nom dzisioj swoj muster dali.

[broneknotgeld]

W herbie powiatu
--

W herbie Bad Dürkheim
oreł jest bioły
Bliko na wino
toż fest wesoły.

[broneknotgeld]

Kreis Bad Dürkheim 1.VII.1969

Z tym rokym Bad Dürkheim
Powiatu stolicom
Kerego grynościom
I jo se zochwycom.

[broneknotgeld]

W środku

W środku powiatu Bad Dürkheim lezy
Przi "Drodze Winny" - możecie wierzyć
Toż napijymy se tu biołego
Potym skosztować trza czerwonego.

[broneknotgeld]

Las Palatynacki

Bor to nojwiynkszy zdo sie we Niymcach
Tako w Bad Dürkheim do lasu skrynca.

[broneknotgeld]

Na "winny sztrasie"

Hambach ty sztrasy pympkym se zdowo
Dyć i Bad Dürkheim we łoczach stowo.

[broneknotgeld]

Risling - krol wina

Ano - nad Rynym zdo sie kroluje
Tako w Bad Dürkheim dobrze tyż czuje.

[broneknotgeld]

Winno turystyka

Tako łona richtig winno
Dyć niy może być dziecinno
Pełnoletnim w tym być trza
By po winko siyngać - pra?

[broneknotgeld]

"...heim"

Kaj z "...heim" se kończy dziedziny miano
Sztela łod Frankow pewnikym brano.

[broneknotgeld]

Gryfno sztela

Sztela Celtow, Rzymian tyż
-Z winoroślom se wkludziyli
Zdroj - to przeca dobrze wiysz
Z konskym raju idzie mylić.

[broneknotgeld]

Limburg (XI w.)

Benedyktynow piyrwyj to sztela
Toż dlo kultury znaczyli wiela
Jak Konrad II tukej ich wkludzioł
Ze tym ta ziymia do życio budzioł.

[broneknotgeld]

Zamek Hardenburg 1212

Z czinostego wieku - już szteli pilnowoł
Schroniynie rycerzom duge wieki dowoł.

[broneknotgeld]

Dynkmal Bismarcka 1903

Dynkmal Bismarcka richtig łogromny
Kto go zbajstlowoł zdoł sie niytomny
Sztyrdziści metrow dźwigli kanclerza
Toż przeca richtig to jakby wieża.

[broneknotgeld]

W "Brunnenhall"

W "Hali Studziynny" muzyka bywo
Tu przeca koncert wcale niy dziwo
Tela że czasym jakiś "dźwiynk studni"
Aże we duszy głośno zadudni.

[broneknotgeld]

Winogronowe kuracyje

z dwudziestych rokow łońskego wieku
Tu je stosujom zocny czowieku
Werci se zowdy tako kurować
Jeszcze flaszeczkom zdrowio dodować.

[broneknotgeld]

Wrzesiyń w Bad Dürkheim

Wrzesiyń w Bad Dürkheim "Wurstmarktym" blyśnie
Aże sie ślina na jynzyk ciśnie
Wina ryńskego trza pokosztować
Prowda co inksze mogom sie schować?

[rita100]

>Wina ryńskego trza pokosztować
>Prowda co inksze mogom sie schować?

Prawda, reńskie mszalne jest znakomite.

[broneknotgeld]

Z "mszalnym" człowiek bliży Boga?
Handszrift dać jo pod tym moga?

Hassloch

[broneknotgeld]

Hassloch

We cołkich Niymcach nojwiynkszo wioska?
Dyć se niy tropiom tym ani troszka
Niy chcom być miastym - tako im lepi
Bo jak luft wiejski to ciało krzepi.

[broneknotgeld]

20,5 tys. dusz

Jak na wioska - dużo luda
Ze tym Hassloch take cuda.

[broneknotgeld]

Łoczyszczalnio na biogazie

Łoczyszczalnio w Hassloch
Jest tako frechowno
Niczego jyj niy trza
Do tego szykowno
Styknie piyńciu chopa
I wszysko se kulo
Toż w tym niy utropa
Prziroda niy fulo.

[broneknotgeld]

Virofly - Francjo
Gebesse - Niymcy
Silifke - Turcjo
Wołczyn - Polska

Kamrat kamrata
-tyż konsek brata.

[broneknotgeld]

Ratusz w Hassloch

Łod niego zwiydzać ta sztela trza
Choć yno gminny dyć zocny - pra?

[broneknotgeld]

Holiday Park

Łod marca do października
Idzie tukej wiela brykać
Pozowiścić tako gminie
"Parku" tego we dziedzinie.

Deidesheim

[broneknotgeld]

Deidesheim

W skuplowany gminie
Jest take miasteczko
Trza ło ty dziedzinie
Rymow wciepać deczko.

[broneknotgeld]

Ratusz XVI w.

Na placu targowym ratusz stoji stary
Dlo istny dziedziny łon nojlepszy miary.

[broneknotgeld]

Kościoł w Deidesheim 1440-1480

Katolicki koscioł ta dziedzina stroji
Dugo budowany ciyngym mocno stoji.

[broneknotgeld]

W łogrodzie botanicznym

Łogrod zodziwi wos florom swojom
Tako rośliny dziedzina strojom.

Grünstadt

[broneknotgeld]

Grünstadt

We średniowieczu już handlym kwitło
I wino zocne robiyło
Szczyńście ze Grünstadt nikaj niy pitło
Jest jako piyrwyj tu było.

[broneknotgeld]

Dzisioj na zamku

Dzisioj na zamku jest bibliotyka
No i muzeum dziedziny
Zoglondnońć w ksionżki wola niż klikać
Czas przidzie - znojda se driny.

[broneknotgeld]

1 luty w Grünstadt

Jak karnawał to karnawał
Wielko w mieście z tym zabawa
Korowody przebiyrańcow
Wina wiela, śpiywu, tańcow.

[broneknotgeld]

Grünstadt - Carrieres-Sur-Seine

Grod se kamraci ze Francuzami
Tyż pszajom winu - to wiycie sami.

[broneknotgeld]

Grünstadt - Westerburg

Na Grünstadt bliko turyngsko sztela
Bo se kamraci ze niym już wiela.

Neustadt

[broneknotgeld]

Hambacher Schloss w Neustadt

Znojdziesz taki zamek w tutejszy dziedzinie
Skiż niego tyn powiat w cołkich Niymcach słynie.

[broneknotgeld]

Zamek Kasztanowy

Ano gryfnie se szlos zwoł
Dugo take miano mioł?

[broneknotgeld]

"Maxberg" 1842

Maksymilian Bawarski erbnoł go przi ślubie
Drapko we tych murach se istny podubie.

[broneknotgeld]

Zamek Hambach dzisioj

Dzisioj zamek Hambach przi Bad Dürkheim mocie
Powiatu perełkom - z ty strony go znocie.

Nadrenia Północna - Westfalia

[broneknotgeld]

Wiela tu znojdziesz ludzi ze Ślonska
Kierzy ściongnyli do tego konska
Tako łod downa już przeca było
Zdo sie - niywiela z czasym zmiyniyło.

Iserlohn

[broneknotgeld]

Iserlohn

Z jegłow i szpyndlikow słynie
W cołki niymiecki dziedzinie.

Kolonia

[broneknotgeld]

Kolońsko katedra

Szejset lot dźwigali
W koncu zrychtowali
Niychej se niom aszom nojmni druge tela
Bo czym bez katedry jest ta miejsko sztela?


"Żywo siyła"

Z fligow tepichym Kolonia pokryli
Yno katedra durś stoła
W Niebo wołała - Bydymy tu żyli!
Nawet sie łognia niy boła

Kaj łona przeca - chnet wszysko łodrośnie
W niyj siyła żywo "zaklynto"
Czowiek - nadzieja - blikanie ku wiośnie
A niy zaś jakeś "memynto".

[broneknotgeld]

20 Światowe Dni Młodzieży

Co czi dni znaczom w historii miasta?
Z krześcijańskego dyć rosło ciasta
I tako dali niychej tu bydzie
Ze Dni Młodzieży dobro w świat idzie.



Jako ku dobru?

Jan Paweł II zwołoł tu modych
Papiyż Benedykt jednak ich witoł
Jedyn zakonczoł życio przigody
Drugi za Niego Ponboczka pytoł

Jako ku dobru wiyźć modych dali?
Jako w ich dusze wloć pszonie świata?
W ty intyncyji tyż z Niym rzykali
Ci przed kerymi prziszłe som lata.



"Przybyliśmy oddać Mu pokłon"

Dyć prziszli młodzi - w Kolonii siyła
pont znakym wiary dlo nich głymbokim
Co ciyngym bydzie jako i była
Pokłon dać Jymu richtig głymboki.

[broneknotgeld]

Mu ulżyło

Już dwa tysionce rokow niom rod
Zdo sie w ramiona jeji łon wpod
Prawiom - Rynowi przi niyj ulżyło
Wpiyrw gorzi ze niym podobnoś było.


Kolonia 33 r.p.n.e

Ciśli w ta strona łostro Rzymiany
Chocioz broniyli se fest Germany
Tako nad Rynym rodzi se sztela
Historio do jyj gyszynkow wiela.


Kolonia 50 r.n.e.

Sie Agrypina Młodszo w niyj rodzi
Co za cysorza Rzymu wychodzi
Klaudiusz szczyńśliwy nadaje prawa
Miasta rzymskego - toż niy zabawa
Stond tyż Koloniom zwać sie już może
Rzymskom - tref ze tym wcale niy korze.

[broneknotgeld]

Kolonia IV w.

Stolicom biskupstwa Kolonia sie stała
Krześcijaństwu tako wiela łod sia dała.


Krzescijaństwo

Z połnocy cysorstwa zdo sie być na kraju
Bestoż krześcijany myślom tu ło raju?
Dyc stare we nowe sie leko niy miyni
Mynczyństwym znaczono przemiana ty ziymi.


Seweryn Gereon Urszula

Wspomnieć trza te miana
Jejich śmierć za wiara
Łokwieci se rana
Zdo sie już na marach

Życiym bogobojnym
Świyntości służyli
Przikłodym dostojnym
Dlo pokolyń byli

Z jejich mogił aże
Wyrosły kościoły
Ponboczek niy karze
Z Niymi jest wesoły

Chwała tymu światu
Za dzieci przezocne
Z niych mosz wiela blasku
I korzynie zocne.

[broneknotgeld]

Wolne Miasto Rzeszy

Łod średniowieczo po nowsze czasy
Biydom Kolonia Niymiec niy straszy
Toż ciyngym rośnie - durś sie bogaci
Profity zbiyro rzodko zaś traci.


Woda kolońsko (XVIIIw.)

Ze Italyji koncept tyn wziyła
Se na ty "wodzie" tyż wzbogaciyła
Niuchoł ktoś kwiotki na szpyrytusie
Toż ze tym jakby kłonioł i tu sie.


"Eau de Cologne"

Yno jom niy myl z "wodom łognistom"
Zdrowi jak gymba przepłokosz "czystom".

[broneknotgeld]

Katedra kolońsko

Toż drugo wojna jom łoszczyńdziyła
Stoji durś tako jako wpiyrw była
Alianckim fligrom latarniom zdo sie
Poczebnom - z tego cud jakby mo sie.


12 kościołow

Dwanoście kościołow romańskich tu przeca
Kożdy zocnom gwiozdom na kolońskim niebie
Łozdoby to wielke tutejszego neca
Na chwała dźwignione Ponboczku dyć Ciebie.


Kościoł sw Gereona

Konstrukcyjom swojom zodziwi kożdego
Bydziesz we Kolonii zoglondnij na niego.

Brema i Dolna Saksonia

[broneknotgeld]

Piyrwyj w tych ziymiach Sasy miyszkali
Toż je po wojnie tako nazwali.

Brema

[broneknotgeld]

Roland w Bremie

Rycerz Roland na rynku we tym mieście stoji
"Muzykantow z Bremy" łon sie nic niy boji
We "Freimarkt" mo przeca serce ze piernika
Luftbalony czimie - gro mu durś muzyka.


"Freimarkt" - 1035

Dyć skiż tego łon jest "frei"
Że dlo wszyskich przeca naj
Cieszy biydnych i bogatych
Tych w pelcmantlach i "sagatych"
Chnetko cołke tysionc lot
Ze jarmarku kożdy rod.

Bremerhaven

[broneknotgeld]

Tako se czasym ciekawie plecie
forum.gazeta.pl/forum/72,2.html?f=59&w=19764660&a=21495082&s=1
Ze Bremerhaven szif to jest przecie.

Hamburg i Szlezwik-Holsztyn

[broneknotgeld]

Dania z Niymcami durś se spiyrała
U sia te ziymie mić przeca chciała
Był kedyś nawet plebiscyt tukej
Po piyrszy wojnie w historii szukej.

Lubeka

[broneknotgeld]

forum.gazeta.pl/forum/72,2.html?f=64&w=15994312&a=19831921

[broneknotgeld]

Mocno tyn Hammerhus Lubeka czimała
forum.gazeta.pl/forum/72,2.html?f=67&w=10225394&v=2&s=0
Stond cołkym Bornholmym toż przeca włodała.

Meklemburgia - Pomorze Przednie

[broneknotgeld]

Miyndzy Odrom a Łabom leży ta dziedzina
Tu czasy komuny tyż przidzie wspominać

Rugia

[broneknotgeld]

Przilondek Arkona

Ponoć łon Rugia przed morzym broni
Dyć czas rachunek dowo niytoni
Kredowo skała niy szczimie wody
Arkonie z falom brakuje zgody.

[broneknotgeld]

W Sassnitz

Blikej na piykne kredowe ściany
Jeszcze brzeg cołkym morzu niy dany.


Sassnitz

Leży se te Sassnitz we rugijski wyspie
Dyć trza tyż pamiyntać że i na połwyspie
Kery tu Jasmundu nosi przeca miano
Klif z kredy podziwej se tukej co rano.


"Tron"

Na kredowym klifie tyn "tron" se znojdziecie
Pewne że na niego zarozki wyńdziecie
Przeca kto tam zicnie krolym Rugii bydzie
Dyć czy richtig tako wom we życiu przidzie?

Ponoć wiynkze szanse we tym jednak mo sie
Jak prosto łod morza wylyźć tukej zdo sie.

Rostock

[broneknotgeld]

Rostock - 1161

Nad rzekom Warnow już Rostock stoł
Słowiański przeca rodowod mioł
Dyć chnetko se to fest pomiyniyło
Bo coroz wiyncy Niymcow tu było.

[broneknotgeld]

We Hanzie

Choć sercym Hanzy Lubeka była
Toż Rostockowi tyż dałą siyła
Przi niyj urosnoł bałtycki port
Ze roku na rok wiyncy był wort.

[broneknotgeld]

W Rostocku

W NRD na stoczniach tu se bogaciyli
Toż zdowo sie teroz że cosik straciyli


Port

Port ciyngym jest w ruchu - nojwiynkszy w tych stronach
Niy szkryfna ładunku wom tukej we tonach
Dyć przeca i promow wiela dali wpływo
Rostock se podździgnie - niych to wos niy dziwo.

Anklam

[broneknotgeld]

Anklam

Kaj rzeka Piana durś wody toczy
Tam miasto Anklam możesz łoboczyć
W kerego herbie gryf jest na murach
Sławne czowiekym co lotoł w chmurach.

[broneknotgeld]

W Muzeum Lilienthala

Na krzidłą tukej przidź se poblikać
Zawiodły Otta - niy zdonżoł rzykać.

[broneknotgeld]

Anklam 1243

We papiorze znodli starym
Że w tym roku Anklam było
Niy wiym czy grod cołkym jary?
Dyć dość ludzi tukej żyło

A jak przeszło lot sztyrdziści
Miasto z Hanzom se rozrosło
Swe bogactwo ze tym ziści
Przeca do znaczynio doszło.

[broneknotgeld]

W łoziymnostym wieku

Teroz pruski Anklam już
Dyć za Piana ani rusz
Ciyngym jeszcze tam Szwecyjo
Choć czas pryndko przeca mijo.

Meklemburgia

[broneknotgeld]

Jezioro Muritz

Zdo sie jakby godali Słowianie
Jejich słowo ukryte w tym mianie
Dyć jezioro jest wielke jak "morze"
Sztorm cie chyci - Bog yno pomoże.

Krakow

[broneknotgeld]

Krakow

Miast Wisły mo tukej Jezioro Krakowskie
Dyć grod ło tym mianie tyż wpiyrw był słowiański
Ano - niyzbadane som wyroki boske
Krakow jednak mały i niy "wielkopański".

Darss

[broneknotgeld]

Połwysep Darss

Czi wyspy kedyś to były
Cołkym łosobno se żyły
Jedna Fischlandym tu zwali
Darss Zingst - te były zaś dali

"Kraj ryb" w lond jednak se wklejoł
Darss drugi był za kolejom
Zingst zrobioł to na łostatku
Bo ktoś mu pedzioł - gagatku.


Wustrow

Choć to malutko rybacko wiocha
Zdo sie zoglondnońć tukej na trocha
Na "pniu słowiańskim" kościoł tu stoji
Domki pod trzcinom. -Łogyń niy broji?

Hiddensee

[broneknotgeld]

Hiddensee

Wiycie - dyć były tu take czasy
Jak rosły stare i gynste lasy
Wallenstein jednak ze wojskym wloz
Łogołociyli z niych wyspa w roz.


Grob Hauptmanna

Na kerchofie Hiddensee Hauptmanna znojdziecie
Choć pszoł łon Ślonskowi tukej pomarł przecie.

Berlin i Brandenburgia

[broneknotgeld]

Stolica Niymiec we samym środku
Wlyźć tukej pódzie z niyjednom godkom.

Berlin

[broneknotgeld]

Kolin i Berlin

Kolin i Berlin w jedno sie zloły
Z tym jakby szwongu dostały
Brandenburg w końcu łostoł se goły
Margrabia dwor tu doł cały

[broneknotgeld]

Dwa niydźwiedzie herbowe

Czorny i bronotny teroz w godle som
Miyndzy niymi oreł - czy jo fioła mom?

[broneknotgeld]

Z łobrożom

Niydźwiedz bez orła bywo łodmianom
Dyć ze łobrożom zowdy dodanom.

[broneknotgeld]

1.X.1875

Już niydźwiydź niy mo znaku niywoli
Tym sie w cysorstwie Berlin chce chwolić.

[broneknotgeld]

"Parada Miłości"

Dyć piyrszo skiż pszonio parada zrobiyli
Niym jeszcze w Berlinie tyn mur łobalyli
Wolnościom i sexym wiela sie radujom
Ołpy tyż se tymu coś chyntnie dziwujom.

[broneknotgeld]

4 miliony

Chnet berlińczykow sztyry miljony
Zachod ze wschodym już se wymiyszoł
Blisko tyn Berlin tyż łod sia momy
Za Odrom chnetko go bydziesz słyszoł.


Turecki Berlin

Wiyncy ich yno we Turcji szukej
Jak ci tu mało tam se pokukej.


Lata dwudzieste

Lata dwudzieste dlo berlińczyka
To nojciekawszo ponoć "muzyka".

[broneknotgeld]

Dwanoście dzielnic

Dwanoście dzielnic - Berlin Zachodni
Żyło se ludziom tu przeca godni
A co za murym sie kedyś dzioło?
-Ano niy było wcale wesoło

Dyć to już przeszłe terozki czasy
Zdo sie stolica jedny jest krasy
Ossis łod Wessis daleko niy som
Jeszcze roz rymym yno zamiyszom.


Brama Brandynbursko

Mioł kedyś Berlin sztyrnoście bram
Jedna łostała sie teroz sam
Toż niy tak downo Berlin dzielyła
A dzisioj zdo sie nowo w niyj siyła.


Zjednoczynie Niymiec

Zdo sie ta brama symbolym tego
Na dziyń dzisiejszy styknie kolego.

[broneknotgeld]

Brama Brandynbursko 1791

Lanhaus wzioł muster peryklesowy
To Propyleje! Akropol kaj?
Toż niych i dzisioj czowiek se dowiy
-Z militaryzmu niy wyńdzie raj.


Brama Brandynbursko 1806

Była w tym roku tukej parada
Napoleońsko dyć defilada
Cysorz z kwadrygi łograbioł wrota
Dyć czas pokozoł co w tym gupota
Wiktoria cudzo niesie utropa
Ło tym wiy przeca cołko Europa.


Krziż Żelazny

Na wiyńcu Wiktorii Krziż Żelazny widać
Łod kedy? -Ta fraga dyć tukej trza by dać
Zdo mi sie ze czasow jak tyn order był
No i "pułkom ślonskim" dokłodoł już siył.

[broneknotgeld]

Dzieło Schadowa

Kwadryga z Nike - dzieło Schadowa
Dźwignij se wyży karlusie gowa
Wiktoriom zowiom jom tyż nikerzy
Dyć to ganc-egal możecie wierzyć.


Nike wygrała

Jak kwadryga z Nike na brama wrocała
Schinkel wiyniec z orłym i ajzynkrojc dowo
Terozki to richtig już na Prus jest chwała
W kerych chyńć do glorii zdo sie ciyngym nowo.


Brama Brandynbursko 1815

To historyjo ty bramy zno
Tu defilada - po Waterloo
Prusy radościom sie zachłysnyły
Napoleońske jarzmo ściepnyły..

[broneknotgeld]

Brama Brandynbursko 1871

Zaś tukej wojokow krok
Toż Drugi Rzeszy to piyrszy rok
Francjo na klynczkach - Niymcy we gorze
We wagnerowskim słysza to chorze.


Cholera

Ano - choć biere przi tym cholera
Grały te wrota tyż za Hitlera.

[broneknotgeld]

Reichstag 1884-1894

Rosnoł parlamynt Niymiec w tych latach
Godali - Bismarck to jego tata
Cysarstwo zdo sie tyż richtig sławioł
Wcale niy naskwol tako se "bawioł".


Reichstag 1918

Z balkonu tukej to łogłosiyli
Że w republice bydom se żyli
"Weimar" w Reichstagu zaczoł se przeca
A Wiluś uciyk ze tego neca.


Reichstag 22.II.1933

Pożar - nojgorszy zdo sie tu dziyń
We cołkich Niymcach bronotny ciyń.

[broneknotgeld]

Reichstag po wojnie

Po łostatni wojnie ło niym zapomnieli
Stoł choć go łodnowić tu przeca niy chcieli
Zdo sie cicho czekoł aż przidom te czasy
Jak we cołkich Niymcach nabiere zaś krasy.


Nowy Reichstag 1998

Ano w końcu prziszoł tyn czas przebudowy
Łoddali go w rynce teroz Anglikowi
Forster se nazywoł dyć był tyż Normanym
Ze tym parlamyntym tako poszoł w tany
Że łostała staro sie yno fasada
Reszta nowomodno już cołkym parada
W kero durś zoglondo czecie tysionclecie
Tako se historio fest ciekawie plecie.


Szpacyr

Na wiyrchu Reistagu se poszpacyrujesz
Możno zjysz wypijesz - jak geld w kapsi czujesz.

[broneknotgeld]

Plac Poczdamski

We miyndzywojniu pympek stolicy
Zdo sie na cołko Europa rycy
Źle mu sie dzioł w tym NRD
Teroz łod nowa pympkym być chce


"Sony"

We połokryngu wieżowcow siedym
Przeca niy styknołby im tu jedyn
Siyła w tym widać - niy yno zdo sie
Reszpekt przi tymu naprowdy mo sie.


"Deimler Benz"

Wyglondo jakby mało dzielnica
Toż wielko fyrma - wielko stolica.

[broneknotgeld]

"Tiergarten"

Piyrwyj elektory tukej wiydli gon
Bestoż take miano mo do dzisioj łon.


"Zwierzyniec"

W łoziymnostym wieku już były tu planty
Zwiyrza im zabrakło - czy to jakeś kanty?


W XIX wieku

W dziewiytnostym wieku zrobiyli te cudo
Zrychtować go lepi chyba sie niy udo
Peter Lenne przeca kunszt swoj w park tyn wsadzioł
"Tiergarten" wygryfnioł i dobrze se radzioł.

[broneknotgeld]

"Złoto Elza"

Łoziym mo metrow - stoji dyć dumnie
Ciyngym w Berlinie na ty kolumnie
W kery jest chwała pruskich wojokow
I gańba wrogow - zdo sie borokow.


Na "Wielki Gwioździe"

Na "Wielki Gwioździe" "Elza" stanyła
Wpiyrw przi Reichstagu przeca tyż była
A wszysko ponoć to skiż mecyji
Łod Austrio-Wyngrow, Danii, Francyji.

Przeca bogini wygrany wojny
W zocy jak ciyngym czas niyspokojny
Se na nia blikosz ło tym pamiyntej
Czasy pokoju som richtig świynte.


Kolumna Zwyciynstwa

Choć richtig blyszczy "Elza" we gorze
Zoglondosz teroz co tu "na murze"
Postać Bismarcka we ślyp se ciepiesz
I ciyngym wojna - aż z tego hepiesz.

[broneknotgeld]

Charlottenburg

Tako sie zowie cołko dzielnica
W kery krolowy kryjom se lica.


Park

Szprewa zoglondo na park ciekawie
Toż serenady słychać tu prawie.


Sophie-Charlotte

Sophie-Charlotte ślubno łod Fryca
Tu pałac jyj barokowy
I park co krasioł niyjedne lica
Kożdy w Berlinie to powiy.