Dodaj do ulubionych

Tyn Gorny Konsek Ślonska

22.01.05, 23:00
Zdo sie - bydzie to sztimować
Sami chciyjcie tyż coś dować.
Obserwuj wątek
      • broneknotgeld Re: Opole 24.01.05, 08:06
        Opolski festiwal

        Sztyrdziści lot Opole festiwalym żyje
        Niyjedny freli przi tym serce mocniyj bije
        A jo jak wsuchom sie we stare piykne szlagry
        To wiym że wcale mi niy czeba jeszcze viagry.
        • broneknotgeld Re: Opole 24.01.05, 08:20
          Osmańczyk w Opolu

          Po śmierci Osmańczyk tyż niy mo spokoju
          Ciyngym mu maraszom dynkmal na kerchowie
          Życie już niy dźwignie go z truły "do boju"
          Dyć mści sie durś na nim jakiś "polski czowiek".



          "Pieśń Rodła"

          Osmańczyk jom łoblyk w słowo
          Za to po śmierci mu sie dostowo?
    • broneknotgeld Re: Otmuchów 22.01.05, 23:06
      Otmuchów

      To piyrsze miasto co je pod krychom
      Jak ło tym myśla to ciynżko dychom
      Ponoć to wszysko je skuli szkoł
      Tam dugi wielge majom jak woł

      Yno że niy je to tyż przijymne
      Że za rzondzynie brali durś prymie
      Choć kasa gminy na krycha żyła
      I zaległości ciyngym mnożyła

      Teroz szukajom tam łoszczyndności
      Możno kumisorz u nich zagości
      Życza im z serca - niych sie poradzom
      I wiyncy robiom a myni wadzom.
      • broneknotgeld Re: Prudnik 24.01.05, 08:13
        Pod Prudnikym

        Wele tyj Rudziczki pod Prudnikym w lesie
        Źrodełko cudowne - wieść sie tako niesie
        Dyć za Niymca jeszcze na pont tam chodziyli
        I dzisioj to samo - niy mogom sie mylić.
    • broneknotgeld Re: Głogówek 22.01.05, 23:12
      We Głogowku

      U Oppersdorfa na zamku
      Beethoven kedyś zagościoł
      Koncert tu dowoł dlo pankow
      Kery zakończoł sie złościom

      Bo zamiost suchać muzyki
      Szwandrali wszyscy po cichu
      Take tam mieli nawyki
      Żodyn niy widzioł w tym grzychu.
    • broneknotgeld Re: Moszna 24.01.05, 08:09
      Zamek w Mosznej

      Tiele-Wincklerow to był zakontek
      Tako perełka jak nad Loarom
      Mioł blyszczeć przeca ślonski majontek
      Graf sie już ło to dobrze postaroł

      Kajzer tu z Franckym lubioł polować
      Bo lasy pełne były zwierzyny
      Zamek gryfniejszy chcioł durś sie stować
      Blyszczeć bogactwym naszy dziedziny

      Dzisioj mosz forsa - tyż tu przikulej
      By wykurować se słabe nerwy
      Przidziesz do zdrowia ale niy fulej
      Groszym trza sypnońć by nabrać werwy.
    • broneknotgeld Re: Krasiejów 24.01.05, 08:11
      Stowarzyszynie Dinopark

      Coś sie w Krasiejowie dzieje
      Dinozaurland możno bydzie
      Szczyńście jednak sie łośmieje
      Jak ze unii euro przidzie

      Za rok hala możno stanie
      Dlo tych gadow ślonski ziymi
      Coby były podziwiane
      Trza sie przeca asić niymi.

      forum.gazeta.pl/forum/71,1.html?f=261
    • broneknotgeld Re: Głuchołazy 24.01.05, 08:13
      W Głuchołazach

      W Głuchołazach pod Gorom Parkowom
      Łod lot źrodełeczko wodom swojom siko
      Choć za jeji jakość gowy jo niy dowom
      Niyjedyn już tukej ze szczyńścio aż rzykoł.
    • broneknotgeld Re: Kochcice 24.01.05, 08:16
      Kochcicki park

      Park przepiykny tukej we dwoch stylach stoji
      Połnoc mo angelsko francuske połednie
      Pałac Ballestrema czyńści jakby kroji
      Werci sie tu zajrzeć - dyć nojlepi we dnie.
    • broneknotgeld Re: Katowice 24.01.05, 23:43
      Katowice

      We Katowicach Korfanty stoji
      Wele marszałka na koniu
      Widać że ździebko Zefla sie boji
      Choć tyż sie mu tu niy skłonioł.


      Katowice

      Winkler Grundmann i Holtze
      To Katowic som łojce
      Kere wylecieli jakoś ze pamiyńci
      Dopiyro terozki słychać ło nich wiyncy.


      Z Kostuchny

      Pszonie to jest "utropa"
      Co siodme poty wyciongo z chopa


      Agnieszka

      Łod huty cynku szło jeji miano
      Bo jom tu piyknie "Agnes" nazwano
      Konsek a byliby my w Chorzowie
      Dyć jom przigarła gmina Wełnowiec
      Kto z wos pamiynto te piykne zdjyńcie?
      Co biydaszyby przi "Prezydyncie"
      W latach kryzysu pokazywało
      Z tego słynyła Agnieszka cało
      Dzisioj sie wspomnij ta kolanijo
      Jak czasym droga Agnieszki mijosz.


      Kostuchna

      W Kostuchnie miyszkali na "Murckach" robiyli
      No a potym jeszcze na tych "Bożych Darach"
      Coby ze grubami tu sie niy pomylić
      "Emanuelssegen" - wspomna nazwo stara

      Potym to cuzamyn we "Murcki" zebrali
      Miano łod bergmonow kere szli z roboty
      Ta gruba w Kostuchnie fedruje nom dali
      Jak na niyj durś robisz to nosisz galoty.

      I geld łostatni tyż na dodatek
      Z Kostuchny wiela to wiy mynżatek.
      • broneknotgeld Re: Katowice 24.01.05, 23:45
        Alfred

        Tyj gruby "Alfred" już tu niy momy
        Ło "Hohenlohe" zapominomy
        A na Alfredzie przeca bergmony
        We familokach byli sie pony
        To tukej po swyj ciynżki robocie
        Mieli ze życio choć trocha pociech
        W Polsce Alfreda nom podzielyli
        Do Siymianowic konsek dopiyli
        Reszta z Wełnowcym we Katowice
        W tym eku trzech miost momy granice.



        Amanda

        Na mapie Katowic jom ciynżko jest znolyść
        I niy mosz dyć richtig tam za czym tyż polyść
        Choc było tu kedyś dość gwarno i ludno
        Skończyła sie gruba zrobiyło sie nudno
        Kolonia i gruba jedne miały miano
        Przepiyknie je kedyś Amandom nazwano.


        Bagno

        Bergmony z "Elfridy" tu kedyś miyszkali
        Naprowdy w marasie sie czynsto toplali
        Jak huty "Bernhardi" nastały tu czasy
        To Roździyń sie chwoloł tutejszym marasym
        A dzisioj te "Bagno" to wynzeł drogowy
        Jak z Ronda se jedziesz prosto do Mysłowic.


        Bederowiec

        Bederowiec to był Domb
        Józef Beder to był ksiondz
        Biydnie sie tu ludziom żyło
        Wiela slamsow we tym było
        Kto pamiynto te "Maroko"
        Kaj niyjedyn choncwot skokoł
        Dzisioj to jest niby szpan
        "Tysionclecie" prziszło dran
        Stojom tu wielgachne bloki
        A niy stare familoki
        Zaś po drugi stronie skarb
        Tyn nasz ślonski lunapark
        Kery dzisioj robi klapa
        Bo w niygospodarnych łapach
        Coś mi jeszcze świto teraz
        Niy ma drogi tu Bedera.



        Bogucice

        Już w wieku czinostym - łod lot to godajom
        Stoła tukej wioska na prawie niymieckim
        Dyć nojstarszy papior z kerego jom znajom
        Wionże z wojewodom sie tym sandomierskim

        Otton ze Pilicy - take jego miano
        We cztyrnostym wieku wieś mu ta nadano
        Mikołaja była we tym szczyro wola
        - Ksiyńcia Raciborza no i tyż Opola

        Potym było tukej Ksiynstwo Pszczyńske sławne
        Z kerego Salamon wykroł ordynacjo
        No i w końcu prziszły czasy niy tak dawne
        Jak po Mieroszewskim Tiele-Winckler nastoł

        Bo wszyscy my wiymy że te Bogucice
        Były ważnom czyńściom "Państwa Mysłowice"
        Przipadła im przeca ciekawo kariera
        Rosnyły se razym z majontkym Wincklera.


        Kuźnica bogucko

        Staro kuźnica przi rzyce Rawie
        Stoła tu ponoć w piytnostym wieku
        To sie niy mieści we gowie prawie
        Ajza dyrś loli - mody człowieku.


        "Ferdynand"

        Jako by żyły bogucke strony
        Bez "Ferdynanda" kerego znomy
        Ta gruba dowo durś przeca życie
        Dzisioj jyj miano to "Katowice".


        "Fanny"

        "Fanny" to miano jest huty cynku
        Kaj ciongło wiela boguckich synkow
        Dzisioj już werku tego niy szukej
        "Czas cynku" skończoł sie przeca tukej.


        Kościoł bogucki

        Matko Bosko Bogucko łaskami tu słynie
        Werci sie z pielgrzimkom być i w tyj dziedzinie.


        Bibliotyka

        We bibliotyce we Bogucicach
        Tyż notgeldami szło sie zachwycać
        I chocioż downo to już jest sprawa
        Ważne że była tam ta wystawa.
        • broneknotgeld Re: Katowice 24.01.05, 23:47
          Katowicko fojerwera

          Mo gyburstag fojerwera ze naszych Katowic
          Myśla tukej ło karlusach cołkym zawodowych
          Niymcy - Polska durś na zmiana im sie to kulało
          Ważne że te fojermany gasiyli niymało
          Sto lot - przeca przez szmat czasu służyli tu co dnia
          Życzyć im trza co by mynij jeździyli do łognia.


          Borki

          Przicupły prawie nad tom Brynicom
          W Sosnowiec ciepnoł byś stond kłonicom
          Mie gruba "Polska" zaciekawiyła
          Co w miyndzywojniu tukej stanyła
          Dyć dwóch knajpiorzy jom miało przeca
          Co z niyjednego jedli chlyb pieca.


          Boże Dary

          Tu gruba "Boer" Hohberg założoł
          Do tego kolonio doszła
          Za staryj Polski wongel tyn wożoł
          Pszczyna stond jeszcze niy poszła

          Przed drugom wojnom zmiynili miano
          Kawałka tyj ślonski ziymi
          Już "Boże Dary" wszysko to zwano
          Teroz cieszymy sie nimi.


          Boże Dary

          Kedyś we pszczyński gminie Podlesie
          Potym w Kostuchna wlepiyli
          No a za Gierka - wieść ślonsko niesie
          Do tych Katowic je wpiyli.


          Brynów

          W historio sie wpisoł we tyn wiek piytnosty
          Choć nikt tu niy miyszkoł aż po siedymnosty
          Ponoć we włodaniu kedyś był Cieszyna
          A za Salamonow przigarła go Pszczyna
          Ponow tukej było chyba aż za wiela
          W dziewiytnostym wieku we rynkach Wincklera
          Pod koniec go jednak Hohenlohe capnoł
          No i już za Polski w Katowicach klapnoł.



          W Brynowie

          W Brynowie Polokow zawsze było tela
          Że nawet z Katowic "wyciepli" ta sztela
          Jak zrobiyli ze nich miasto cołkym nowe
          Brynow gminom zostoł - co tyż było zdrowe
          Potym fest rozkwitło polske życie tukej
          A korzyni tego "U Rzychonia" szukej.



          "Oheim" - "Wujek"

          Ksionże Hohenlohe gruba ta postawioł
          Wielgachno bo łon sie drobnicom niy bawioł
          We tych Katowicach do dzisioj fedruje
          Bo przeca ze "Wujka" durś sie wongel suje.



          Burowiec

          Wedle Dombrowki tyj Mały
          Chałpy Burowca se stały
          Ziymia se leko łorali
          Aże Wincklerow poznali
          Ze hut sie tu zakopciyło
          Gruba tyż rosła aż miło
          Swoje dociepli łod Gischa
          Kajsik strociyła sie cisza
          Wongel i ajza - ołow i cynk
          Bamber ze tego tukej by pynk.



          Domb

          Łod średniowieczo już Domb był tukej
          U bożogrobcow dowodow szukej
          Przeszli jak burza przez Domb Tatary
          Zniszczyli nawet tyn Chorzow stary

          Dyć miechowitow wioski to były
          Lazarytowi ciyngiym służyły
          Tymu z Bytomia - Świyntego Ducha
          Kaj wiela chorych znodło otucha.



          We Dymbie

          Farorz ze Chorzowa srebra tukej szukoł
          Pieronym uparcie pod ziymia durś kukoł
          Domb kolybkom bergmonow skiż tego sie stoł
          Dyć różnistych metali rudy przeca mioł.
          • broneknotgeld Re: Katowice 24.01.05, 23:50
            Dymbowe szachty

            Ta "Ksiynżno Jadwiga" i "Jadwiga Nowo"
            Gruby parafialne - tyż farorz je stowioł
            Łone już fedrunkym wonglo sie trudniyły
            A te jejich szachty jeszcze płytke były.


            Pudlingarnia

            Baildona pudlingarnia tukej
            Teroz jom w hucie "Baildon" szukej
            Chocioż zmiyniała właścicieli
            Miano łostało bo tak chcieli.


            "Waterloo"

            "Waterloo" - gruba tako tu była
            Dusza Baildona we niyj sie skryła
            Czimoł na społa łon jom z klasztorym
            Tym co pomogoł Ślonzokom chorym

            Potym wyrosła z niyj "Eminyncjo"
            Bo w wonglu przeca była potyncjo
            Za tyj komuny "Gottwald" jom zwali
            Dyć czorne złoto sypało dali

            Złonczyli jom tyż ze "Kleofasym"
            A jak czerwone przestało straszyć
            I nikt niy kłonioł sie tymu po pas
            Zrobiyli "Katowice - Kleofas"

            Dyć nojważniejsze jest to że w Dombie
            Tyn duch Baildona durś w ścianie rombie.


            Dombrowa

            Niydowno łona we Katowicach
            Durś swojym lasym może zachwycać
            Wiedzie do niego ta droba "Saska"
            Mor tukej dopod wojsko - do diaska
            Byli na służbie Augusta Sasa
            Tukej skończyli w Dombrowy lasach.


            Dombrowka Mało

            Niy wiym czy idzie godać ze mało
            Jak z samyj nazwy by wynikało
            Gmina tu przeca dość ludno była
            Co koloniami sie łobłożyła
            Norma i Pnioki Czekaj Burowiec
            Ze niyj wyrosły te sztele nowe
            A jak dołożyć gruby i werki
            Powiym że konsek Ślonska był wielki.


            Łod Gischego

            Spadkobiercy Gischego tu wiela zrobiyli
            Bo łoni we huty geld swoj durś topiyli
            Tyn ich "Gisches Erben" tu cynk srebro ołów
            Wybiyroł garściami ze Dombrowki stołu.



            "Jerzy"

            Ta gruba w Dombrowce trza tyż tu wspominać
            Bo sie niom asiyła przeca cało gmina
            Choć życie bergmona niy było wesołe
            Robota we "Jerzym" dowoł Hohenlohe
            Za tyj staryj Polski zaczły sie problymy
            Pryndko jom zamknyli ło tym tukej wiymy.



            Dobro Myśl

            Terozki tu stojom yno same bloki
            A kedyś miyszkali z Wełnowca boroki
            Roboty dyć łoni w kryzysie niy mieli
            Bez to we barakach siedzieć tu musieli
            Ło te dobre myśli niy było za leko
            No i do roboty durś mieli daleko.


            Fryderyka

            Kolanijo Fryderyka kedyś tukej była
            Dyć w Wełnowiec sie dość downo cołkym nom wtopiyła
            Hohenlohe jom założoł dlo tych z werkow jego
            Miano swoje tyż dołożoł no i tela z tego.


            Giszowiec

            Ta modo osada Gischewaldym zwano
            Łod tych z "Gisches Erben" wziyła swoje miano
            Las piyrwyj należoł do Thiele-Wincklera
            Osiedle powstało piykne jak cholera

            Dzisioj by pedzieli że było wzorcowe
            Chałpy przeca tukej tyż cołkym stylowe
            Bergmon po robocie w łogrodku sie siedzioł
            Za co tak harowoł - ło tym dobrze wiedzioł

            Leciało to dalyj za tyj stary Polski
            Dyć po drugi wojnie nastoł już czas "swojski"
            Łoboczyli my to w "paciorkach rożańca"
            Jak komuna wziyła starzykow do tańca

            "Łobalić trza stare - postawić se nowe"
            Bez to momy tu tyż osiedle klockowe
            Stare ze tym nowym dziwnie pomiyszali
            Ciekawe co piyrwyj bydzie sie zaś walić.
            • broneknotgeld Re: Katowice 24.01.05, 23:52
              Huta Arnold

              Huta cynku "Arnold" i jyj kolanijo
              Janowa to była kedyś familijo
              W Katowicach dzisioj lecom im godziny
              Arnolda poszukej wele tyj Boliny.


              Janow

              Ta janowsko ziymia kedyś w Mysłowicach
              Mieroszewskich cało była okolica
              No a polske ponki hulali za wiela
              Majontek sprzedali we rynce Wincklera
              Jak tu była gmina to ci łod Gischego
              Fedrowali wongel richtig na całego

              We Polsce w Janowie wiela sie zmiyniyło
              Koncek w Mysłowice cołkym sie wtopiyło
              Reszta zaś dotrwała do Polski Lydowyj
              Dyć pryndko jom wciepli do Szopiynic nowych
              A jak w siyła rosły potym Katowice
              Połknyły tyn Janow z miastym Szopiynice.


              "Gische"

              Kopalń janowskich było bez liku
              Zrobiyli z nich jedna - "Gische"
              Wiela pokolyń naszych gornikow
              W ziymia łod lot tu sie pisze

              I chocioż teroz inksze jyj miano
              We gymbie "Wieczorek" momy
              Fedruje bergmon tukej co rano
              Durś wongel stond dobywomy.


              We Janowie

              We Janowie malować lubiyli
              Z tego downiyj już tu zasłynyli
              Piyrszy ze nich Ociepka Teofil
              Jo bych pedzioł że łon był "carbofil".


              Jozefowiec

              Miano łostało po tym Bederze
              Zeflik mu przeca godali
              Droga Bedera - naszkryflom szczerze
              Tyż Jozefowskom nazwali

              Bo jak komuna prziszła po wojnie
              A ze niom zaś inkszo nyndza
              Farorz we grobie społ niyspokojnie
              Niy chcieli patrona ksiyndza

              Dyć zamazane to jakoś dzisioj
              Jakby historio ktoś sprościoł
              Ło tym ksiynżoszku wiyncyj by słyszoł
              Kto w Katowicach by gościoł.


              Jozefowiec

              Skiż Hohenlohego - pana na Bytkowie
              Pryndko sie rozwinoł tyn nasz Jozefowiec
              Ci ze werkow jego musieli kajś miyszkać
              Po blisku - by piechty zadreptać na szychta
              Były jednak tukej tyż przeca i szkoły
              Chor i rożne zwionzki co Polsce durś pszoły
              Już we polskich czasach pryndko Jozefowiec
              Włonczyli na amyn we gmina Wełnowiec
              Jak po drugi wojnie rosły Katowice
              To sie upomniały ło te okolice
              Miano nom łostało - tako zwom osiedle
              Droga Jozefowsko co leci tyż wedle
              Yno zaginyło nazwisko Bedera
              Choć myśla ło ksiyndzu - biere mie cholera.


              Karbowa

              Dzisioj to historio - miano zaginyło
              Ze Katowicami w jedno sie stopiyło
              Była to osada Bogucki Kuźnicy
              Folwark piykny leżoł na samy granicy
              Huty i cegelnie powstały tyż tukej
              Dzisioj jednak lepiyj ich wcale niy szukej
              Jak zajrzysz to widzisz teroz blokowisko
              Kaj? -"Na Paderewskim" - powiy kto tu miyszko.


              Katowicko Hołda

              Kto dzisioj tyj nazwy używo?
              Chyba jakiś trocha dziwok
              Wyleciała już ze mapy
              Choć tam czynsto niesom szłapy
              Jak w Kościuszki żeś jest parku
              To na Hołdy tyj kawałku
              Rondym Mikołowskym karniesz
              Zaś ta Hołda cie przigarnie
              Nawet konsek autobany
              Tukej jest wyrychtowany
              No i "Wujek" durś fedruje
              Przeca Brynow prawie tu jest.


              Klizmowiec

              W Katowicach z Klizmowca nic niy ma
              Szłoby tukej łopuścić tyn tymat
              Dyć przez pamiyńć zocnego młynorza
              Jednak szkryflać sie ło tym łodwoża

              Domki kedyś te fińske tu stoły
              Teroz w niebo sie dropiom "pachoły"
              Beton jakoś niy cieszy mie wiela
              Wolołch staro spokojno ta sztela

              Tysionclecie tu dzisioj jest Gorne
              Chocioż życie wydaje sie chmurne
              Jada bankom i blikom ze glajzow
              Widza yno tyn kopiec amajzow.


              Kokociniec

              Konsek Katowic przi samy Rudzie
              Możno Kłodnicom spłynońć tam pódzie
              Jest tu osiedle bergmonow "Ślonska"
              To tyż ze Rudom nitka niywonska

              Piyrwyj tu były jednak dziedziny
              Łod tych Hochbergow ksionżont ze Pszczyny
              Huta i gruba tu postawiyli
              Wonglym już przeca ajza topiyli.


              Kolonio Wysockiego

              Na trasie z Giszowca do tego Nikisza
              Po drodze kolonio se leży
              Terozki niywiela jo ło niyj już słysza
              Wysocki jyj patron - uwierzysz?

              Dyć był to se karlus co Flawian mioł miano
              Łon kedyś harowoł na "Gischu"
              Komunie pszoł mocno i bestoż tak zwano
              Osada przi sławnym Nikiszu.


              Kopaniny

              Prawe i lewe te Kopaniny
              Kedyś Hochbergow piykne dziedziny
              Dzisioj przigarły je Katowice
              Przi Mikołowie te okolice.
              • broneknotgeld Re: Katowice 25.01.05, 08:32
                Kostuchna

                Staro osada to jest Piotrowic
                Kero sie tak rozwinyła
                Że nim włonczyli jom do Katowic
                Miastym być tyż już zdonżyła.



                Koszutka

                Kolanijom Bogucic swego czasu była
                Ponoć łod młynorza miano swoje wziyła
                Jak te gruby i werki zaczli tukej stowiać
                To i chałpow trza wiyncyj było wybudować
                Z czasym familoki klocki zastompiyły
                We mojyj pamiyńci yno łone były.


                Kuźnica Bogucko

                Kuźnica Bogucko tukej piyrwyj była
                Łona nad Roździankom sie nom rozwinyła
                Dyć ło niyj Walynty Roździeński napisoł
                Że Jurga Kleparski kuźnikym tu prziszoł

                Bez lata jom zwali durś łod tyj kuźnice
                Choć rosła tyż tukej ta wieś Katowice
                Po myśli inkszego kuźnika - Andrzeja
                By z czasym zastompić jom we dalszych dziejach.


                Huta "Marta"

                Dzisioj jom niy ma choć dugo była
                Prawie przi rynku miasta nowego
                Tam kaj ta sławno kuźnica żyła
                Wspomnij kuźnika tu boguckego.



                Ligota

                Łod Staryj Ligoty wszysko sie zaczyło
                Choć we downych czasach ciynżko tukej było
                Rzondziyła tu przeca czynsto tyż zaraza
                Po polach sie huloł wiater we tych razach

                Jak sam zaś nastały czasy huty "Idy"
                Poleku Ligota wylazła ze biydy
                Doszła jeszcze gruba kerom "Szadok" zwali
                Wongel do tyj huty we niyj dobywali

                Dobrze tyż sie stało że cug tu puściyli
                Bo małe letnisko z Ligoty zrobiyli
                Przi banhofie rosła osada łod nowa
                Ta staro przi nowyj zaczyła sie chować

                Wszysko to sie dzioło tu za Niymca jeszcze
                We powiecie pszczyńskim była wtedy - wierzcie
                A już za tyj Polski cołko okolica
                Czwortom tajlom była we tych Katowicach

                Dyć do dzisioj to jest Katowic dziedzina
                Chocioż tak niydowno włodała niom Pszczyna
                Jak tam kedyś zajrzysz wspomnij moje słowa
                I tyskego piwa chlapnij se dlo zdrowia.


                Muchowiec

                Mucha tu miyszkoł chop małorolny
                Niy mioł za wiela dyć czuł sie wolny
                Lotoł sie czynsto nad łonkom nisko
                Bestoż zrobiyli potym lotnisko.


                Murcki

                Ponoć tukej właśnie łod lot pany Pszczyny
                Dobywali wongel z tyj swojyj dziedziny
                Łodrywali chopa ze uprawy roli
                Kopać musioł w ziymi wedle jejich woli

                Chodzioł umurckany potym do zagrody
                Bo mu na tyj grubie żałowali wody
                "Emanuelssegen" kopalnia ta zwano
                Łod murckow osada pryndko wziyła miano.


                "Emanuelssegen"

                To jest richtig staro naszo ślonsko gruba
                Chop tukej fedrowoł ściongniynty łod pługa
                Tu już sztrajkowali w łoziymnostym wieku
                Bo sztajger bergmonom ubliżoł - czowieku

                W dziewiytnostym wieku ta gruba durś rosła
                I wtedy tyż tukej ajzynbana doszła
                Wonglo coroz wiyncy trza było fedrować
                Bo Hochberg we Wrocku zaczoł go przedować

                Za tyj staryj Polski zaś tu sztrajki były
                Kryzysym sie przeca gruby niy karmiyły
                Ciyrpieli bergmony wtedy wielgo biyda
                Niy było tu leko - godać ło tym byda

                Już po drugiyj wojnie "Murckami" jom zwano
                Jak piyrwyj osada - łod niyj teroz miano
                Ważne że durś tukej wongel nom fedrujom
                We Polska łon idzie - niych dalyj go sujom.
              • broneknotgeld Re: Katowice 25.01.05, 08:35
                Co to jest?

                Dzielnica i gruba jedne majom miano
                Skiż wonglo tak piyknie je przeca nazwano
                Kedyś było tukej "Wolne Państwo Pszczyna"
                Dzisioj to Katowic ciekawo dziedzina.



                Nikiszowiec

                Dyć niy było by "Nikisza"
                Jakby tu zabrakło "Gischa"
                Ze tyj gruby szachty miano
                Do osiedlo przipisano

                Zillmann to zaprojektowoł
                Swojo dusza w cegły dowoł
                Wyszło piykne mini-miasto
                Juz docynić prziszoł czas to

                Bo perełka naszo ślonsko
                Tyż historio mo niywonsko
                To jest jakby jedyn świat
                W Ślonsku ślonski richtig brat.


                "Perła"

                Ta "Perła w koronie" widziołch pora razy
                Tam ze Nikiszowca som piykne łobrazy
                Dziynki Kutza sztuce Polska to widziała
                Dyć jednak pewnikym pryndko zapomniała
                Trza to jakoś zmiynić - Nikisz nom promować
                Nowe klocki przi tym powinny sie schować
                Chyba niy przipadkym ta "janowsko grupa"
                Właśnie tu sie jakoś zebrała we kupa
                Pyndzle se chyciyli - malowali piyknie
                Było tego tela że dzisioj nom styknie.


                Norma

                Piyrwyj tukej huta cynku nosiyła to miano
                I szyb gruby "Ferdynanda" tako tyż nazwano
                Katowicko kolanijo we Dombrowie Małyj
                To ślad kery nom pozostoł po imprezie całyj.


                Nowy Czekaj

                W młynie na Brynicy Czekaj mieloł zboże
                Dzisioj sie to w gowie pomieścić niy może
                Dyć łod niego nazwa osady sie wziyła
                Gmina Huta Laura dugo tukej była
                Potym to przeciepli w miasto Szopiynice
                No a teroz widzisz - som te Katowice.



                Obroki w Załynżu przi Chorzowie leżom
                Rosły nom skiż gruby - w to tyż świyńcie wierzom
                Wszysko sie kryńciyło wele "Kleofasa"
                Nic sie niy zmiyniyło - jest tak we tych czasach.



                Ochojec

                Nad rzekom Ślepotkom ta wioska leżała
                Z czasym sie rozrosła trocha wybujała
                No a na łostatku lazaryt tu powstoł
                Kaj niyjedyn bergmon koncek zdrowio dostoł.


                Osiedle Belojannisa

                Był pieroński pożar na tym "Kleofasie"
                Bergmonow uczciyli już we Polski czasie
                Kery na osiedlu se tukej zamiyszkoł
                Nazwiskym boroka nom czasym zablyskoł
                Bo do dzisioj drożki ze osiedlo tego
                Noszom miano ofiar - wiela w tym dobrego.


                Osiedle Modych

                Na Osiedlu Modych
                Szukej swyj przigody
                Przijedź do Zadola
                Jak mosz tako wola
                Schowej sie w malinach
                Tam zrzyndnie ci mina
                Jak szukosz dobroci
                To skryj sie w paproci
                Podzimki borowki
                Wlezom ci do gowki
                Mynczy cie rodzina
                Łostow jom w jeżynach.


                Osiedle Paderewskiego

                Paderewski możno mynczy sie we grobie
                Jak na wielgo płyta tukej gafto sobie
                Pryndko by zaś zamknoł jakoś forteklapa
                No i przi okazji komuś prziczas łapa.


                Osiedle Roździeńskiego

                Nastowiali tukej trocha tych wieżowcow
                I dali im miano Katowic "gwiazdowcow"
                Dobrze że to niy som cołkym te "gwiazdory"
                Jak żech wloz tam na wiyrch toch był ździybko chory.


                Osiedle Francka Rybki

                Do Sosnowca stond jest blisko
                Bestoż Rybka tukej blysko
                Jest w tym jednak wiela racji
                Zginoł łon za okupacji

                Za komuna dołbych krycha
                Krziżyk zrobia z tego grzycha
                To mu prziznom za Oświyńcim
                Rybka mo być we pamiyńci.
              • broneknotgeld Re: Katowice 25.01.05, 08:37
                Osiedle Staszica

                Wdepły te klocki nom do Giszowca
                Chciałyby dalyj dyć już niy potrza.


                Osiedle Tysionclecia

                Tysionclecie poleku rośnie nom tu dali
                Nawt kościoł do tego piykny zbudowali
                Doszły tukej tyż nowe jakeś "kukurydze"
                Mozno kedyś ze tego dobry "popcorn" bydzie.


                Panewniki

                Nojpiyrw był tukej jedyn Panewnik
                Starym go zowiom do dzisioj
                Panwie robiyli tu w dziyń powszedni
                Downo to było - joch słyszoł

                W cztyrnostym wieku był wele Kłodki
                Teroz żech tyż to łoboczoł
                Czimie sie jeszcze małyj Ślepotki
                I nigdy jom niy przekroczoł

                Domb tukej rosnoł wele zajazdu
                Co blikoł na Jana wojsko
                Pod Wiedyń ciongnoł łon wielkom jazdom
                Armia z łodsieczom szła polsko

                Dyć niydaleko łod Panewnika
                Klasztor zaczyli budować
                Wyrosła piykno tyż bazylika
                Stary sie zaczoł dziwować

                Bo pryndko inksze chałpy tu doszły
                Urzyndy knajpy i szkoły
                W Nowym już łone piyknie wyrosły
                Tyn kont był teroz wesoły

                Panewnik zmiynioł sie w Panewniki
                I w Polsce już tak go zwano
                Czy dzisioj wiedzom to małe smyki
                Że jest łod panwi to miano?


                We Piotrowicach

                We Piotrowicach "tyske" sie loło
                Jak yno je zaczli warzyć
                Do "ksionżyncego" łoko sie śmioło
                Szło sie tyż przi nim rozmarzyć

                Dyć tukej była ta "pszczyńsko ziymia"
                A na niyj był browar tyski
                Chocioż tych starych czasow już niy ma
                Tonknońć trza w kuflu zaś pyski.


                Piotrowice

                Wioska Uniszowy i jyj okolice
                Podzielyli kedyś - wyszły Piotrowice
                Tukej za rektora Karol Miarka robioł
                Nim sie w Mikołowie drukarni dorobioł

                Kedyś piykno gmina była ze Piotrowic
                Yno że traciyła wiela do Katowic
                Już za staryj Polski czyńść ziym jyj łodepli
                I w somsiednie miasto pryńdziutko se wepli

                Dyć jeszcze przed wojnom straciyła je Pszczyna
                Stała sie ze tego Katowic dziedzina
                Dzisioj byś niy pedzioł że z inkszego ciasta
                Bo wprzongły sie mocno już do tego miasta.


                Pnioki

                Coingnyły te Pnioki w strona Siymianowic
                Choć należom teroz do miasta Katowic
                Kolonio to była tyj Dombrowki Mały
                Z niom we Szopiynice potym sie dostały
                Jak dalyj leciało to już dobrze wiycie
                Terozki to wszysko przeca Katowice.
                • broneknotgeld Re: Katowice 25.01.05, 23:24
                  Podlesie

                  We pszczyńskim Podlesiu po czeskich husytach
                  Niy ujrzoł żeś chopa ani tyż kobiyta
                  Dyć poleku wioska sie zaś zaludniyła
                  Podlesie urosło - ziymia sie blyszczyła

                  A tutejszy sołtys pod Wiedniym bioł Turkow
                  Z pszczyńskimi chopami nasiekoł z nich wiorkow
                  Kedyś tu kwatery miały wojska Sasa
                  Chop przi nich zaciskoł richtig swego pasa

                  Nastoł w koncu tukej tyn wiek dziewiytnosty
                  Łon tyż dlo Podlesia wcale niy był prosty
                  Choć durś przeca rosła cołko okolica
                  Ze klucza wyrskego hrabiego Promnica

                  Kmiycie już pańszczyzny płacić tu niy chcieli
                  W końcu i na swojim gospodarzyć mieli
                  Bo w połowie wieku uwłaszczynie prziszło
                  Kere niy kożdymu fest na dobre wyszło

                  Z powietrzym morowym tu sie tyż mynczyli
                  Chocioż coroz gyńści we tyj gminie żyli
                  Nowy wiek im przinios same "Boże Dary"
                  No i tyż sie wynios porzondek tyn stary

                  Jakoś sie kulało w tyj Polsce do przodu
                  I durś przibywało we gminie narodu
                  Za Gierka Kostuchna jednak tu rzońdziyła
                  Krotko - bo poznała tych Katowic siyła.


                  Pod Młynym

                  Młynorza Kaśka młyn tukej miała
                  Tyż tu sie kończy Dombrowka Mała
                  Mielyła zboże po naszyj stronie
                  Bo przeciyż Ślonska tukej był koniec.


                  Downy Roździyń

                  Łon już nom wyrosł w cztyrnostym wieku
                  Ponow mioł wiela - niy licz człowieku
                  Tukej tyż staro kuźnica była
                  Kero nad Rawom sie rozłożyła

                  Wtedy jom zresztom Roździankom zwali
                  Sławny Roździeński tukej był dali
                  Co pisoł wierszym ło swyj robocie
                  Z keryj durś wiela mioł przeca pociech

                  Do wieku pary kuźnica doszła
                  Z czasym historiom swojom łobrosła
                  I choć jom potym wcale niy było
                  Ło jyj kuźnikach durś coś sie śniyło.



                  Roździyń

                  Łod Mieroszewskich Winckler go chycioł
                  I wiela konskow pod przemysł wycioł
                  Ta huta "Dietrich" i "Wilhelmina"
                  "Bernhardi" - wszysko sie przipomina

                  Ci z "Gisches Erben" tyż sie dociepli
                  Rosł Roździyń pryndko a łoni krzepli
                  Lazaryt był tu szkola wiyńziynie
                  Kościoł i browar na pokuszynie

                  "Konsum" na Ślonsku piyrszy był tukej
                  Nawet drukarni w Roździyniu szukej
                  Tych rzemieślnikow bez liku było
                  Wszysko dość pryndko sie tu kryńciyło

                  Dyć był wrośniynty we Szopiynice
                  Niy było miyndzy nimi granice
                  Za staryj Polski tyż tak łostało
                  A i po wojnie dalyj kulało

                  Zrobiyli z niego przeca dzielnica
                  Co ciyngiym tkwiyła we Szopiynicach
                  Choć to za dugo jednak niy trwało
                  Jest w Katowicach terozki całość.


                  Sośnina

                  Była nad Rawom Sośnina
                  Terozki jednak jyj niy ma
                  Ta kolanijo ze Dymba
                  Wyglondo choby we zymbach
                  Gyjbis tu Piastow sie leży
                • broneknotgeld Re: Katowice 25.01.05, 23:26
                  Stawiska

                  Miano łod stawow wele Boliny
                  Konsek janowski to jest dziedziny
                  Łon sie rozwinoł skiż "Uthemanna"
                  Szopiynic huta tak była zwana
                  Dzisioj sie kończom tu Katowice
                  Pryndko przekrokniesz we Mysłowice.


                  Szabelnia

                  Kuźnica Turzonów kedyś tukej była
                  Kero sie w szabelnia pryndko zamiyniyła
                  Szabla szopiynicko niy słynyła może
                  Pamiyńć nom łostała i za to - szczyńść Boże.


                  Kedyś w Szopiynicach

                  Husyty do Szopiynic prziszli ze Zagorza
                  Ciynżko dlo tyj wioski była ta ich burza
                  Dyć poleku jednak zaś sie zaludniyła
                  A przed wiekym pary Mieroszewskich była
                  Wszysko sie zmiyniyło łod tyj "Wilhelminy"
                  Cynk we niyj topiyli ze ślonski dziedziny
                  A do tego doszło pryndko grubow pora
                  No i cug - przemysłu ślonskego podpora.


                  Szopiynice

                  Roździyń-Szopiynice tako gmina była
                  Zanim sie tu Polska naprowdy zaczyła
                  Dyć jeszcze za Niymca sie nom rozłonczyły
                  Niydugo - a jednak już osobno były

                  Jak zaś tukej Polska głośno zaklupała
                  Szopiynicom gminno miejskość sie dostała
                  Miastym cołkom gymbom by wtedy se były
                  Yno prziszła wojna i już niy zdonżyły

                  Stało sie to jednak w piyńdziesiontym roku
                  Nawet powiat miejski wykroli na boku
                  Bo tyn Janow Ślonski i Dombrowka Mało
                  Do powiatu wlazły - tako była całość

                  Problym jednak we tym że te Katowice
                  W końcu połaszczyły sie na Szopiynice
                  I choć jest tyż ze nich osobno dzielnica
                  To jakoś niy wszyscy chcom sie tym zachwycać.


                  Wełnowiec

                  Bogucice z Bytkowym pasły tukej owce
                  I możno skiż tego nazwali Wełnowcym
                  Tako myśl terozki chodzi mi po gowie
                  Powiym że bajdurza ale we połowie
                  Tyżłod Wełny było podobno to miano
                  Yno że młynorza tako tukej zwano.


                  Hohenlohe w Wełnowcu

                  Nic sie tu niy dzioło bez Hohenlohego
                  Bo była to przeca dziedzina łod niego
                  Łon założoł kedyś piyrsze gruby tukej
                  W Wełnowcu tyż jeszcze huty jego szukej
                  W sawnyj "Hohenlohe" juz koksym polyli
                  We piecach kaj ruda na ajza topiyli
                  Dołoż tyż do tego jeszcze huta cynku
                  Wiela łon roboty mioł dlo ślonskich synkow
                  W końcu tu zbudowoł gmaszysko te wielke
                  Kaj dyrekcjo była "Hohenlohe Werke".


                  "Hohenlohe"

                  Jedna gruba i dwie huty
                  W nie Wełnowiec był łobuty
                  Wszyske miały take miano
                  Na cześć ksiyńcia je nadano.



                  Wełnowiec

                  Za Niymca i za Polski staryj
                  Była tu samodzielno gmina
                  Losu niy bierom już na bary
                  Dzisioj Katowic to dziedzina.
                • broneknotgeld Re: Katowice 25.01.05, 23:28
                  Wilhelmina

                  Na Wilhelminie już niy te czasy
                  Kere tu kedyś bywały
                  W łoczy sie ciepiom yno te sztrasy
                  A piyrwyj świat tu był mały

                  Kery sie kryńcioł wele tyj huty
                  Łod "Spadkobiercow Gischego"
                  Ze "Wilhelminy" suchali nuty
                  Żyli do rytmu takego.


                  Wymysłow

                  Piyrwyj jak keryś jechoł z Wrocławia
                  Tym traktym na Mysłowice
                  To za Ślepotkom mioł już zabawa
                  Bo bliske to okolice.



                  Zadole

                  Na Zadolu nad Ślepotkom miyszko sie spokojnie
                  Możesz nawet tu sie dychnońć jak mosz życie znojne
                  Trocha jest za dużo blokow ale szczimać idzie
                  Te Zadole do sie lubić i niych już tak bydzie.


                  Załynsko Hołda

                  Dwie Hołdy były - jedna przi drugi
                  I tyj Załynski żywot jest dugi
                  Bergmon z hutnikym tykej miyszkali
                  Stond do roboty niy mieli dalyj
                  Bo gruby huty i inksze werki
                  Wszyske tu rosły - wysyp był wielki.


                  Osiedle Witosa

                  Na Hołdzie Załynski wyrosło osiedle
                  Jak jedziesz A - 4 to łone jest wedle.


                  "Bugla"

                  Bugla - tak sie chop tyn zwoł
                  Co gront czimoł bo durś sioł
                  Ziymia łorać zboże sioć
                  Niy ma co sie z tego śmioć

                  Dyć choć mocno tym sie smucioł
                  Kijym rzeki niy zawrocioł
                  Jakbyś był tu cołkym blisko
                  Wlyź na "Bugla" - kompielisko.


                  Załynże

                  Załynże to richtig jest staro już wiocha
                  Tych kuźnic tu było łod diobła i trocha
                  Panow tyż zmiyniało choby rynkawiczki
                  Ważne że istniało nom przeca tu wdycki.


                  Kramsta w Załynżu

                  We Wrocku handlowoł
                  W Załynżu fedrowoł

                  "Charlotte" i "Victor" te dwie kopalynki
                  "Oheim" potym capnoł - poszło to łod rynki

                  Dyć Kramście sie jeszcze huta zamarzyła
                  Nazwoł jom tyż "Victor" - cynk tukej topiyła.


                  "Kleofas"

                  Załynski "Kleofas" Godula rychtowoł
                  Nojpiyrw ze wspolnikym potym som jom stowioł
                  Ta Joanna Gryzik gruba dziedziczyła
                  W końcu tych łod Gischa durś wonglym karmiyła.
                • broneknotgeld Re: Katowice 25.01.05, 23:30
                  Wilhelmina

                  Na Wilhelminie już niy te czasy
                  Kere tu kedyś bywały
                  W łoczy sie ciepiom yno te sztrasy
                  A piyrwyj świat tu był mały

                  Kery sie kryńcioł wele tyj huty
                  Łod "Spadkobiercow Gischego"
                  Ze "Wilhelminy" suchali nuty
                  Żyli do rytmu takego.



                  Wymysłow

                  Piyrwyj jak keryś jechoł z Wrocławia
                  Tym traktym na Mysłowice
                  To za Ślepotkom mioł już zabawa
                  Bo bliske to okolice.


                  Zadole

                  Na Zadolu nad Ślepotkom miyszko sie spokojnie
                  Możesz nawet tu sie dychnońć jak mosz życie znojne
                  Trocha jest za dużo blokow ale szczimać idzie
                  Te Zadole do sie lubić i niych już tak bydzie.


                  Załynsko Hołda

                  Dwie Hołdy były - jedna przi drugi
                  I tyj Załynski żywot jest dugi
                  Bergmon z hutnikym tykej miyszkali
                  Stond do roboty niy mieli dalyj
                  Bo gruby huty i inksze werki
                  Wszyske tu rosły - wysyp był wielki.


                  Osiedle Witosa

                  Na Hołdzie Załynski wyrosło osiedle
                  Jak jedziesz A - 4 to łone jest wedle.


                  "Bugla"

                  Bugla - tak sie chop tyn zwoł
                  Co gront czimoł bo durś sioł
                  Ziymia łorać zboże sioć
                  Niy ma co sie z tego śmioć

                  Dyć choć mocno tym sie smucioł
                  Kijym rzeki niy zawrocioł
                  Jakbyś był tu cołkym blisko
                  Wlyź na "Bugla" - kompielisko.


                  Załynże

                  Załynże to richtig jest staro już wiocha
                  Tych kuźnic tu było łod diobła i trocha
                  Panow tyż zmiyniało choby rynkawiczki
                  Ważne że istniało nom przeca tu wdycki.


                  Kramsta w Załynżu

                  We Wrocku handlowoł
                  W Załynżu fedrowoł

                  "Charlotte" i "Victor" te dwie kopalynki
                  "Oheim" potym capnoł - poszło to łod rynki

                  Dyć Kramście sie jeszcze huta zamarzyła
                  Nazwoł jom tyż "Victor" - cynk tukej topiyła.



                  "Kleofas"

                  Załynski "Kleofas" Godula rychtowoł
                  Nojpiyrw ze wspolnikym potym som jom stowioł
                  Ta Joanna Gryzik gruba dziedziczyła
                  W końcu tych łod Gischa durś wonglym karmiyła.
                • broneknotgeld Re: Katowice 25.01.05, 23:32
                  Kościoł pw. Niypokalanego Poczyńcia Nojświyntszy Maryji Panny

                  Kościoł mariacki we Katowicach
                  Neogotykym moze zochwycać
                  Wiluś korony cysorza niy mioł
                  A łon już w kupie sie tukej czimoł

                  Przi placu ksiyndza świontynia stoji
                  Bestoż ło los swoj nic sie niy boji
                  Dyć tyn ksiondz Szramek był tu farorzym
                  W obozie w Dachau dni swojich dożył

                  Tukej zaś momy po niym witraże
                  No i tabula - już sie niy zmaże
                  Pamiyńć ło niymu na naszym Ślonsku
                  Cołkym - niy yno malutkim konsku.



                  Katowice? -Tako wiocha
                  Co wyrosła jakby trocha
                  Na tym wonglu ajzie cynku
                  Tela powiym jo ci synku.
      • broneknotgeld Re: Mysłowice 25.01.05, 23:42
        Pani Skarbnik w Mysłowicach

        Majom teroz tukej nowo skarbnik - modo
        Pedziołbych że Bozia urody tyż dodoł
        Bele by piniondze solidnie liczyła
        No i ani razu niy zamataczyła.


        • Re: Tyn Gorny konsek Ślonska
        broneknotgeld 02.10.2003 21:07 + odpowiedz

        Ze Brzynczkowic

        W Brzynczkowicach kościoł teroz łodnowiajom
        Dobrze że we zocy ta świontynia majom.


        • Re: Tyn Gorny konsek Ślonska
        broneknotgeld 02.10.2003 21:07 + odpowiedz

        Schody

        Mysłowicke schody teroz jakby pańske
        Chciało by sie pedzieć prawie że "hiszpańske"
        Yno że do przyjścio pod ziymiom prowadzom
        Tu pokazow mody zrobić niy poradzom.


        • Re: Tyn Gorny konsek Ślonska
        broneknotgeld 02.10.2003 21:08 + odpowiedz

        Kosztowy

        Stond jazda do cyntrum pierońsko kosztuje
        Nerwy - bo sie wiadukt tukej remontuje.


        • Re: Tyn Gorny konsek Ślonska
        broneknotgeld 02.10.2003 21:09 + odpowiedz

        Leśny kerchof

        Kerchof w mysłowickim lesie
        Pamiyńć tyj historii niesie
        Ło obozach drugiyj wojny
        Na uboczu i spokojny
        Ło ciyrpiyniu szymro cicho
        Nad utropom jyńcow wzdycho.


        • Re: Tyn Gorny konsek Ślonska
        broneknotgeld 02.10.2003 21:10 + odpowiedz
        • broneknotgeld Re: Mysłowice 25.01.05, 23:43
          Re: Tyn Gorny konsek Ślonska
          broneknotgeld 02.10.2003 21:21 + odpowiedz

          Urzond Miasta mo mieć swoja gowa
          Wybiyrano czasami łod nowa
          Max na jedna yno kadyncyjo
          Tako miejsko to jest elekcyjo

          W Mysłowicach to jest gowa piyrszo
          Lud powiedzioł - "Nad nami nojwyrszo"
          Choć znom tako co leży na tacy
          Wos niy spadnie już ze moji glacy.


          • Re: Tyn Gorny konsek Ślonska
          broneknotgeld 02.10.2003 21:21 + odpowiedz

          Świynty Janie Mysłowicki
          Chronić mosz te miasto wdycki
          Tam już mlyko przeca were
          Ora ludzi trocha biere.


          • Re: Tyn Gorny konsek Ślonska
          broneknotgeld 02.10.2003 21:22 + odpowiedz

          W rankingu "Trybuny" Osyra przoduje
          Ktoś pieronym szczodrze kupony mu suje
          Możno w Mysłowicach fest go majom w zocy
          Tyn cajtong niych teroz Ci sie śni po nocy.
      • broneknotgeld Re: Świyntochłowice 30.01.05, 20:53
        Lipiny

        Lipiny palcym wytykajom
        I tacy som co je kochajom
        Choć richtig biydy wiela tukej
        W Lipinach ślonski duszy szukej.


        Świyntochłowice

        Wicow stond dużo
        Yno niy swiyntych
        W Ślonsku sie nurzo
        Że idzie w piynty.


        We Lipinach

        Piyrszo społka akcyjno na tym Gornym Ślonsku
        Tukej była -we richtig dzisioj biydnym konsku
        To jest naszo kolybka wonglo ajzy cynku
        Ło tym żech sie dowiedzioł we lipińskim szynku.