Biskupice

[Gość: Bronek]

Biskupicko rocznica

Siedymset sześdziesiont klupło im tych lot
Z czego jo jest przeca richtig teroz rod
Na gyburstag ciepia rymow mojich trocha
Yno tela moga w tym szczyńściu popochać.

[Gość: Bronek]

Biskupicko parafio św Jana Krzciciela

We "Rejestr Ujazdu" łoka jo niy wroża
Dyć wiym że pisali ło łanach farorza
Kery w Biskupicach na parafii siedzioł
Siedymset lot tymu - szmat czasu - bych pedzioł

Kościoł tu być musioł malutki drewniany
We tych downych czasach czynsto łokrodany
Bo tu buszowali husyty tatary
Pewnie tyż sie spoloł kościołek tyn stary

Nowy kościoł z drewna potym postawiyli
Jak sie wiek piytnosty już cołkym pochylił
Osobno dzwonnica jymu zbudowali
I Jana Krzciciela miano świynte dali

Za reformacyji żle sie tukej dzioło
Przeca katolikom niy było wesoło
Z czasym jednak wszysko wrociyło do normy
A farorz z Biskupic nabroł wiynkszy formy

Dyć za Ballestremow w dziewiytnostym wieku
Niy wyczimoł burzy tyn kościoł - czowieku
Nowy pryndko stanoł staraniym hrabiego
Do dzisioj łon blyszczy - przyńdź sie wele niego

Jest neogotycki wyglondo se piyknie
Wszyskim parafianom jednak krotko styknie
Przeca jak tu przemysł zaczyli budować
To pryndko za ciasny poczoł sie zaś stować

W downych czasach na mszo Ruda tu chodziyła
A i dlo Zaborzo parafio ta była
Odpadła ta Ruda to samo Zaborze
W końcu inkszy kościoł stanońć sie tyż może

Jednak parafiany wszyske ło tym wiedzom
Że Jan Krzciciel zaczoł co stoji za miedzom
Siedym wiekow wiara ciyngym kwitnie tukej
Jak u ciebie słabo - w tym kościele szukej.

[Gość: Bronek]

Dziedzice Biskupic

Jak trza było forsy z Wrocka biskupowi
Bierawskymu przedoł je Mikołajowi
Ze Rudom je czimoł tyż Jan Gierałtowski
Syn zaś po nim erbnoł dyć dopustym boskim
Pomarł dosyć pryndko a po nim ta wdowa
Coś drapko za Prażmy była wyjść gotowa
Zastawiyła nawet swoje Biskupice
Bestoż tu Koniccy stali sie dziedzice
W siedymnostym wieku - we jego połowie
Zwolski na tyj ziymi był nojpiyrszy czowiek
Potym je ucapioł baron Jerzy Welczek
Jak pomarł to wdowa rzońdziyła tu wielce
Dyć po jeji śmierci zaś erbli to Prażmy
Potym hrabia Dunin był tu richtig ważny
Stechowowi przedoł wioska za guldyny
Łon majorat zrobioł ze swojyj dziedziny
Jak syn jego pomar dostała to cera
Ballestrema ślubno i łon mioł to teraz
Ze ślubnom te piykne Biskupice dostoł
Majorat we rynkach Ballestremow łostoł
Czimali to wszysko jak mogli nojduży
Aż po wiek dwudziesty by Ślonskowi służyć.

[Gość: Bronek]

Biskupice

Biskup ze Wrocławia mioł te Biskupice
Już w czinostym wieku - chyba mi wierzycie
A jak niy wierzycie pytejcie ta Viola
No i Władysława - ksiyńcia ze Opola
We piytnostym wieku tu Husyty wpodli
Pokradli zniszczyli co cynnego znodli
Po czeskich honcwotach prziszli te Tatary
Niy było tu szczyńścio yno same mary
Możno tyż skiż tego we wieku nastympnym
Biskup je chcioł sprzedać i znoloz sie chyntny
Dyć nazwa łostała - do dzisioj jom znomy
Przeca to dzielnica kero w Zabrzu momy.

[Gość: Bronek]

Borsig w Biskupicach

Przikuloł sie cugym aże ze Berlina
Spodobała mu sie Biskupic dziedzina
Po prowdzie to jednak wongel go tu ciongnoł
Kery do roboty w swojich ciuchciach wprzongnoł

Szachty jego grubow pryndko tu stanyły
Niy yno "Jadwigi" tyż "Ludwika" były
Świtoł mu we gowie plan pieronym wielki
I tukej postawioł inksze swoje werki

Wielke piece kuźnia stalownia walcownia
Pryndko tyż dołożoł do tego gazownia
Piykny pałac tukej dlo siebie postawioł
Bo we Biskupicach wiyncyj czasy bawioł

Zaś dlo robotnikow stowioł familoki
By blisko tych werkow miyszkali boroki
Z czasym wszysko razym "Borsigwerkym" zwano
Przilgło do Biskupic na amyn to miano.

[Gość: darek]

Super!!! Bardzo mi sie tyn wierszyk podobo. A som tam u wos w Biskupcach jesce
jakieś Ślonzoki bo wiym, ze kupa ludzi wyjechało do Reichu?

[Gość: Bronek]

Dyć jo niy jest z Zabrzo yno ze Rudy, ale w Zabrzu robia juz 25 lot.
Wiyncyj ślonskich wierszykow znojdziesz na forum "Igraszki - fraszki"
www.echoslonska.com/forum2
Zaproszom. Bronek

[Gość: Bronek]

Problym

Niy wiym terozki czy Biskupice
W Zobrzu nojstarsze, czy Mikulczyce?

[Gość: Bronek]

Biskupice - Zaborze

Legły sie Biskupice przi borze
A za niym było Zaborze.