Ło Siymianowicach

[broneknotgeld]

Skond te Siymianowice?
(I niy yno)

Czech bratkow ślonsko ziymia wydała
Co wele siebie miyszkali
Siemian zoglondoł se do Michała
Tyż na Macieja blikali

Siemian doł miano Siymianowicom
Łosiod tu ze familijom
Drugi wiadomo - Michałkowicom
Jego potomki w niych żyjom

W Maciejkowicach łostoł se Maciej
Na swojym fest gospodarzoł
A jo se teroz łobleka lacie
Ło czasach tych byda marzoł.

-----------------------------

Drugo legynda takoż ło bratkach
Macieja Jakub zastompioł
Czy znocie możno tego gagatka?
W Jakubowice żech zwontpioł

Aż jedyn starzik ło tym mi prawioł
Co wioska piyrwyj spolyli
Jak tyn Zamojski na Ślonsku "bawioł"
Ło tron Korony se biyli

Kaj richtig były Jakubowice?
-Podobnoś Lompa coś wiedzioł
Tam huta "Laura" dźwigli - toż wiycie
Przeca Donnersmarck tu siedzioł.