hanys_hans
21.12.09, 08:49
Pyto sie mje połowica,
Kiedy sie za dieta chyca?
Żić jak kalfas, pysk jak lampa,
z przodku wisi piwno wampa!
Tak mi godo: chopku złoty,
musisz schudnyć boś bahraty,
nie pasujom ci galoty
i za małe inksze szmaty!
Szłapy ledwo za sia smyczysz
i przi myciu sie naryczysz
jak drzesz pjynty we łaziynce,
że za krótki twoji rynce!
To ni rynce mosz za krótki,
yno wampa je za wielko,
twego żranio to som skutki!
Ustoń - godom - moja frelko,
ale łona nie ustowo,
yno dalij mi nadowo!
Pojrzi na sia, citni w żdżadło,
już małego se nie widzisz,
dyć cie yno samo sadło,
czy sie som sobom nie brzidzisz?!
Tego było już za wiela!
Przez toch padoł, że w niedziela:
po śniodaniu i łobiedzie, po kołoczu i po kawie,
po trzech piwach na zabawie,
zrobia wszysko cobych schud,
zastosuja dieta cud!
We pyndziałek, zaroz z rana,
jak ze wyrka yno stana,
póda gibko do aptyki
po te pile z Hameryki,
co to prosto ze żołondka
ciongnom fet jak jako gombka!
Starać sie przi tym ni musisz,
czy to kaczka, czy golonko
wszysko leko we sia wdusisz,
niech żyje dobre jedzonko!
Po tym idziesz se poleku,
tam kaj król se piechty chodzi,
robisz dżist i już czowieku
nadmiar fetu ś cia wychodzi...
Bez liczynio kaloryjów
pijesz piwko za piweczkiym,
ni mosz w doma komedyjów
z kochanym twojim dzióbeczkiym.
Tak na tym papiórku stoło,
co skowany był w pojszodku!
Co sie potym sy mnom dzioło
jak ech siedzioł na wychodku
lepszy wcale nie spominać!
(jak ech musioł sie wypinać)
Ale ło tym po koleji
cobyście i Wy wiedzieli,
jakich przeszoł straszne mynki,
zanim wloz ech do łaziynki...
Po pamjyntnym tym zakupie,
wunderpilów z Hameryki,
poleciołech zaroz du dom,
jak ech wyloz ze aptyki.
Już we siyni głośno rycza,
że cudowne pile smycza
i spróbuja tego czaru,
co bych jeść mog bez umjaru...
Najprzod były dwa kotlety,
z zimiokami i kapustom,
a na lepszy wirkung diety
poloł ech to zołzom tłustom.
Potym pila, kompot, szpajza
podle znanej mi reklamy
do klopika mało rajza
spuścić zbyndne kilogramy.
Siedza ci jo na wychodku,
na wyniki diety czakom,
fucza, cisna z zadku z przodku,
a co przi tym sie nabakom
zanim wreszcie coś wykakom ...
Coś mi tukyj nie pasuje,
myśla se wałażonc z klopa.
Tyn fet tak nie wylazuje
jak z łopisu tego chopa
kiery wynod wunderpila,
ale wonpjył ech na chwila,
bo jak rod mosz wszysko masne,
a galoty som za ciasne,
to nojwyższy przeca czas,
coby zredukować bas.
Rezygnować z pokuszynio
i łodmawiać se jedzynio?
Łykać wola już ta pila
i na haźlik iść na chwila!
Przed wieczerzom, po tym zaroz,
żeby z lepszym chudnyć skutkiym
sztyry pile wzion ech na roz
przigryzajonc gynsim udkiym.
Po tym yno jajec pjynć,
chlyb ze szpyrkom, knebel wusztu,
no ich jeszcze dostoł chynć
na świyżutki mjynso z rusztu.
Po skromniutkij tyj wieczerzy,
a że było tego marnie,
to sie teroz przinoleży
iść szpacyrkiym do kawiarnie.
Tak idymy se po leku,
sy mnom idzie ślubno moja,
aż tu łoroz, jak mje ściśnie
ledwo na giyrach ustoja.
Bas mje boli, co za gafa,
skocza po rantach jak afa!
Mjyjsca szukom, dziury w płotach...
Za nieskoro, mom w galotach!
Co za gańba, co za smród!
Trziimjom sie galoty dupy.
Trza sie tera zadać trud
iść łokrynżnie do chałupy...
Leca gibko, pot na czole
a tu w basie zaś mi wjerci!
Coroz bardzij tam na dole
czuja podmuch bliskij śmierci ...
Już ratunek widza z dala,
pod tym stromkiym sie wywala!
łodpinom już pas z galotów,
wypnyć sie już ech je gotów!
I ...Z nadzieji uzaś nici,
we galoty leci z żici ...
Du dom jeszcze metrów dwiesta,
uciaprano cało westa,
boch pysk przipod sztyry razy!
I tak myśla, bez łobrazy,
jak bych dopod tego gizda
chyciyłbych go tak jak glizda
i bez trichter do gymbulki
wsuł bych wszyski mu globulki!
Chałpa widza, całkiym blisko,
skradom sie jak jake psisko
co ochota mo na kota.
Pora metrów mom do płota,
już bez niego przelazuja
i...Do galot juzaś suja!
Je żech w doma, Bogu Dziynki!
Konsek yno do łaziynki!
Bez pol siyni na wjyrch jeszcze,
(mojim ciałym szarpiom dreszcze! )
na łostatni wbjegom schodek
i już siodom na wychodek!
To je koniec mej gehynny,
leci sy mie choby z rynny!
Żić mom cało łobszczypano,
klapa z hajźla łobesrano
i na diobła dieta cud,
zamjast schudnyć, to żech shrub…
