Reaszki i rymowanki ze Gliwic i somsiedztwa

[broneknotgeld]

Zdo sie co dobro to dlo nich sztela
Możno i drapko przidzie ich wiela.

[broneknotgeld]

Jak inksi jesze dociepnom cosik
Wiela we wercie bydzie tyn "grosik".

Fraszki i rymowanki ze Gliwic i somsiedztwa

[broneknotgeld]

Krucafuks - plonto mi sie klawiyra
Możno za wiela już dzisioj biyra.

[broneknotgeld]

Eichendorffstadt (Bytom-Zabrze-Gliwice)

Niymcom to sie niy udało
Chocioż wiela tego chciało.

Gliwice

[broneknotgeld]

Łobrona Gliwic

Jako to było z tymi Szwedami
Kierzy se znodli pod Gliwicami?
Rożnisto godka jo słysza ło tym
Prowda to abo jakeś gupoty

Ponoć chnet mieli te mury zdobyć
Copnońć Gliwice im prawie szłoby
Dyć to skiż babow sie niy udało
Bo jim se bronić miasta zachciało

Razym ze smołom krup nawarzyły
I z tym na murach drapko stanyły
Toż loły Szwedow jako umiały
Tako Gliwice uratowały.

[broneknotgeld]

Poczebny bydzie winkel tu przeca
Bestoż go ciepia do tego neca.

Bojków

[broneknotgeld]

Bojkow

W bujakowskim borze Schonwald zrychtowali
Kery nom po polsku Bojkowym nazwali
Cystersy ze Rudow tu gospodorzyli
Niymcow aż z Saksonii we tyn las ściongnyli
Dzisioj to je piykno i staro dzielnica
Co leży na kraju we naszych Gliwicach.

[broneknotgeld]

Bojkowianom

Z Halymby na Bojkow jeździołch tam a nazod
Bo jo tam na grubie zgazowywoł azot
Doglondołch lodowy wielgachny pieronym
Terozki ta fraszka dedykuja Łonym.

[broneknotgeld]

Na "Sośnicy"

Zaś słysza kuranty Bojkowa
Grajom je na kościele
Azot tu musza zgazować
Śniyg mi pod nogi sie ściele

Zyrkom terozki na szachty
Bojkowske - z gruby "Sośnica"
Czekom już końca tyj wachty
Ło piwie myśli palica

Takim chłodzonym we śniegu
Na kerym kloźdać tu moga
Wypioł bych se je z kolegom
I poczynstowoł nim wroga

Bo jak tak siedza "na gazie"
I słysza że bijom dzwony
Myśla że trza w kożdym razie
Pszoć światu - choć zakryncony.

[broneknotgeld]

broneknotgeld 24.05.04, 11:06

Przipadła nocka mi na Bojkowie
Dwanoście godzin siedzioł tam czowiek
Tona matowy na doł żech ściepnoł
Dyć jakoś poszło - żodyn niy hepnoł

Teroz po prowdzie urlop już mom
Nad morze jada niy cołkym som
Wiocha we lesie - dość blisko plaży
Tydziyń spokoju tam mi sie marzy.

Wilcze Gardło

[broneknotgeld]

Wilcze Gardło

Niyjedyn tukej zbłonkoł sie twardziel
Bo chcioł zaliczyć ta "wilczo gardziel".

[sloneczko1]

broneknotgeld napisał:

> Wilcze Gardło
>
> Niyjedyn tukej zbłonkoł sie twardziel
> Bo chcioł zaliczyć ta "wilczo gardziel".

a jo sie tam urodziyuach

[broneknotgeld]

Toż wiym tyż czamu żeś łostro czasym
Miesionczek w pełni - czy ciongnom lasy?

[broneknotgeld]

Gliwicko palmiarnia

Gliwicko palmiarnia to perełka mało
W końcu coś wiynkszego miastu sie zachciało
Inksze pawilony majom tam dostawić
By sie lepiyj ludzie mogli tyż zabawić
Rafom koralowom łoczyska napasom
Rośliny z ciaplyty zachwycom swom krasom
Ponoć za dwa lata bydzie już to wszysko
Powiym że porzykom coby im to wyszło.

[rita100]

Łobronione Gliwice
we fraszkach widze ;)

[broneknotgeld]

Kożdo frela wiela może
Na gliwickim przeca dworze.

[broneknotgeld]

"Haus Oberschlesien" - "Dom Gornoślonski"

Nojlepszy hotel we tych Gliwicach
Kerym sie richtig szło tu zochwycać
Dyć prziszoł styczyń sztyrdziesty pionty
Ruski ze łogniym wleźli w te konty

Zas po fojerze kikut pozostoł
Kery poleku jednak łodrostoł
Stoł sie dlo Gliwic Urzyndym Miasta
Tako jest dzisioj - tu powiym - basta.

[broneknotgeld]

Zeppelin w Gliwicach

Zeppelin w Gliwicach tyż przeca londowoł
We czidziestym piyrszym poczta tu przijmowoł
Było to w tym mieście jakby wielke świynto
Czy ktoś ło tym jeszcze dzisioj tyż pamiynto?

[broneknotgeld]

Magistracke fauny

Magistracke fauny cosik som zielone
Ponoć skuli wody take poplamione
Dyć ze wiosnom pewno piyknie je wyczyszczom
Coby my widzieli że w Gliwicach blyszczom.

[broneknotgeld]

Gliwice se ciyngym ponoć łodchudzajom
No i ze tym problym już terozki majom
Bo gliwiczan niy ma tych dwiesta tysiyncy
Pewno Frankiewicza to terozki mynczy

Czech radnych zarozki mu przeca łodpadnie
No i jedyn vice jego tyż se padnie
Godajom że bydzie coś myni piniyndzy
Ano - trza pomyśleć było ło tym pryndzy.

[broneknotgeld]

Gliwice

Stolicom ksiynstwa Gliwice były
Ze handlu brały tyż swoje siyły
Zamek i ratusz mury kajś widzisz
Tu historyji sie niy powstydzisz.

[broneknotgeld]

Gliwickie mury

Ponoć dwadziścia dziewyńć baszt miały
Do tego bramy dwie zocne były
Kilometr z hokym - konsek niymały
Grodu piyknego łone broniyły.

[broneknotgeld]

Sobieski w Gliwicach

U Redemptorystow zdrzymnoł se Jan III
Historyjo Gliwic cosik ło tym kleci.

[broneknotgeld]

Kaj Theodor Erdmann Kalide

Choć jego rzeźbami Gorny Ślonsk sie asi
Dynkmalym gliwickim jednak niy "marasi"
Mo być we ruinie tyn cmyntorz hutniczy?
Łon do ślonski duszy tako jakby "ryczy".

[broneknotgeld]

We Gliwicach ichni radni
Ponoć mocno niyzaradni
Ło majontku oświodczajom
Że niywiela tego majom
Mylom mocno sie w dochodach
Szkoda Gliwic! Richtig szkoda!

[szwager_z_laband]

broneknotgeld napisał:

> Łobrona Gliwic
>
> Jako to było z tymi Szwedami
> Kierzy se znodli pod Gliwicami?
> Rożnisto godka jo słysza ło tym
> Prowda to abo jakeś gupoty
>
> Ponoć chnet mieli te mury zdobyć
> Copnońć Gliwice im prawie szłoby
> Dyć to skiż babow sie niy udało
> Bo jim se bronić miasta zachciało
>
> Razym ze smołom krup nawarzyły
> I z tym na murach drapko stanyły
> Toż loły Szwedow jako umiały
> Tako Gliwice uratowały.
>


Ach te glywicke nasze matrony
Bez nich by swiat bou wyjauowiony
Dyc one dzisiej dalyj sie broniom
I chopow juzas ze doma goniom

Na gowy lejom im gorke krupy
... cosik mi rymuo sie kole ....

No to juz lepiyj pacza sie stracic
Bo byda musiou za swoje puacic
A piytnostego jeszcze niy bouo
I tyszyngeltu mi niy styknouo

:))

Toszek

[broneknotgeld]

Złoto kaczka toszecko

Jak Leopold Gaschin był tu zamku panym
Som we wielkim pryku czynsto niywyspany
Szukoł piykny frelki kero by mu dała
Miyłość i potomstwo wiela yno chciała

Stało sie - mioł ślubno - prziwioz jom z daleka
A piykno tyż była nad zochwyt czowieka
Dyć w Toszku sie łona za dobrze niy czuła
Niy miała gowiedzi keryj ziorno suła

Graf jak sie dowiedzioł kupioł kaczki kury
Gołymbie furgały jak paczołś do gory
Terozki we zamku tela było ptoctwa
Że ludzie pytali - Po co te dziwoctwa?

A wszysko skiż pszonio tyj gryfnyj Gizeli
By dobrze sie czuła we swyj nowyj szteli
Leopold w niyj widzioł wielke szczyńście swoje
Pedzioł - Dom ci dziubku wszysko co jest moje

Na pamiontka tego kaczka podarowoł
Kerom sie tyż tukej niyjedyn dziwowoł
Piyknie jom zrobiyli ze złota szczyrego
Gniozdo srebrne miała i jojka do tego

Była to terozki pamiontka rodziny
Co szczyńście niyś miała w toszecke dziedziny
Jednak niy na dugo wszysko to tak trwało
Ktosik ciepnoł urok - niyszczyńście sie stało

Dyć jednego razu po wielki zabawie
Jak wszyscy na zamku pospali sie prawie
Łogyń buchnoł kajsik - zarozki był wielki
Wiater mu pomogoł - pryndko trowioł belki

Gizela von Gaschin we izbie sie budzi
Chce uciyc ze łognia - na darmo sie trudzi
We strachu sie ciepie na łobroz łod przodka
I schodzi w podziymia głymboko do środka

Ze kaczkom tom złotom uciyko lochami
Juz ledwo mo siyła przebiyrać nogami
Zymdlała i ptoka po drodze straciyła
Jakosik wylazła jak sie łocuciyła

Śmiertelnie zmynczono do grafa dotarła
I jymu na rynkach juz wtedy umarła
A kaczka we lochu do dzisioj kajś leży
Kedyś jom szukali - teroz niy chcom wierzyć

Że to jest legynda nojczyńści godajom
Po prowdzie to przeca pojyńcio niy majom
Jak lochy pod zamkym sie ciongnom daleko
Tyn skarb tam na śmiałka ciyrpliwie durś czeko.

[broneknotgeld]

Toszek

Łoziym wiekow tymu graf miyszkoł tu zocny
We pobliskich lasach łon lubioł polować
Gon prowadzioł Toszek - pies we łowach mocny
Dyć inksze przi niymu niy śmiały se stować

Roz łodbioł daleko - stracioł swego pana
Pogonioł za dzikym - łapy fest poniosły
Aż trefioł na pełno tych zwiyrzy polana
Tam lochy odyńce w szczympy go rozniosły

Graf nadjechoł w końcu - wzion to co łostało
Pochowoł go we wsi - tyż dynkmal postawioł
No i take miano już miejsce to miało
Toszek przeca swoje i psa imie wsławioł.

[broneknotgeld]

Bioło Dama ze Toszka

We piyrszy dziyń Wielkanocy
Zamek toszecki łobchodzi
Spotkosz jom tu ło połnocy
Szterować freli niy godzi

Bo łona fatra durś szuko
Co pomarł z wielki żałości
We dzwiyrza komnat postuko
Czasym wystraszy tyż gości

Tako tu bywo łod wiekow
Skiż historyji ponury
Kero cie wzruszy czowieku
Choć żeś ze gruby jest skory

Grof srogi zamkym tym włodoł
Gnymbioł poddanych i sługi
"Djoboł" - niyjedyn nań godoł
Taki niy znoloz sie drugi

Wiela skiż niego ciyrpiało
Głod lochy inksze mynczarnie
Na nic to wszysko sie zdało
Ludzie kończyli tu marnie

Dyć grof mioł sługi wiernego
Co dboł ło pana jak umioł
"Dioboł" żył możno skiż niego
Choć małowiela rozumioł

Sługa zaś cera mioł szwarno
Skarb to był jego jedyny
Bez niyj toż życie już marność
Grof niy zastompi rodziny

Zło jednak wielke czychało
Do Gliwic fatra posłali
Panu sie cery zachciało
Jyj łojciec mioł być kajś dali

Dyć frela sie łopiyrała
Choć boła tyż zymsty srogi
Życie za cnota łoddała
Syn wieczny był dlo niyj błogi

Do studni wciepli jyj ciało
Fater znojść cery niy umioł
Ale sie w końcu wydało
Pan błond swoj wtedy zrozumioł

Bo sługa pomarł z żałości
Niym jednak ducha wyzionoł
Klontwa nań ciepnoł we złości
Grof zginoł a zamek runoł

Yno ta dziołcha na bioło
Ciyngym ło wszyskim pamiynto
łojca na murach durś woło
Co roku - jak momy świynto.

[broneknotgeld]

Toszek

Już na ty zajcie siedza troszka
Może wyjada z tym do Toszka
Bele niy tam kaj niy ma klamek
Mie by sie marzoł yno zamek.

[broneknotgeld]

Toszecki zamek

W lochach tego zamku znojdziesz złoto kaczka
Choć mie sie coś zdowo że to ta "dziwaczka".

[broneknotgeld]

Stary Toszek

Łoziymset lot już cieszy nos Toszek
Rosł sie poleku jakby po trosze
Piyrwyj siedzibom był kasztelana
Potym w biskupie mieli tu pana.

Chudów

[broneknotgeld]

Bioło Dama z Chudowa

Graf ze Chudowa we Czechach bawioł
Tam poznoł tyż zakonnica
Ło jyj urodzie kożdy durś prawioł
-"Gryfne niy yno som lica"

Prziszło ze tego pszonie im wielke
Frelka z zakonu uciekła
Za nic przeszkody były w tym wszelke
Razym niy boli sie piekła

W Chudowie cicho sie już pobrali
Dyć radość krotko ich była
Ślubno choroba pryndko powali
Kostucha do sia jom wziyła

Rycerz pochowoł jom we Orzeszu
Żył som we srogi żałości
Wiedzioł że przeciw Bogu fest zgrzeszoł
W duszy niy chowoł łon złości

Dyć co sie dzieje? W nocy przichodzi
Do zamku przepiykno zjawa
Strach z pszoniym jakoś sie razym godzi
Choć to już niy jest zabawa

Co noc doglondo chopa swojego
Na droga jednak narzeko
Bo gynstym lasym łazi do niego
Wiy że łon na nia tyż czeko

Dyć graf nad duchym sie ulitowoł
Tunel kopali mu sługi
Tym jakby znak swyj miłości dowoł
Aż do Orzesza jest długi

Choć z downych wiekow historio cało
Godajom ło tym w Chudowie
I Bioło Dama tu zno niymało
Niyjedyn widzioł jom czowiek

Bo wieczno jeji przeca pokuta
Do dzisioj łazi po murach
Słychać tyż czasym smutnawo nuta
Co traci sie kajsik w dziurach.

[broneknotgeld]

Chudów

Zamek zaś rośnie
Choć był w ruinie
Chnetko radośnie
Chudów zasłynie.

[broneknotgeld]

Chudow Foglarów

W łoziymnostym wieku tyn zamek rozkwitoł
Bo tyż rod Foglarów w te progi zawitoł
Chudow i Paniowki potym Bielszowice
W jejich rynkach były piykne okolice

W końcu wieku jednak dzioło sie już gorzyj
Pożar tyż go trowioł choby dopust Boży
Dugi czas to była wielgachno ruina
Dopiyro łostatnio łodżywać zaczyna.

[broneknotgeld]

Kartoflada 2003

Zaś teroz do siebie zaproszo tyn Chudow
W nojbliższo niydziela - pełno przeca cudow
Pudzie sie pobawić - namioty tam bydom
Bo trza tyż zaradzić jak dyszcze nom przidom

Kartofle nom tukej Sobieski sprowadzioł
Ze Wiednia se wrocoł - we Polsce je sadzioł
Bestoż we Chudowie kartofel jest w zocy
Sproszo na zabawa aż do samyj nocy.

[broneknotgeld]

Gierałtowscy w Chudowie

Dzwigli tyn Chudow - tego sie dowiydz
Ci Gierałtowscy ze Gierałtowic
Ich Jan ze Paniow zamek fundowoł
Sto lot z okładym rod tu panowoł.

[broneknotgeld]

Foglerowie

Mikołaj Fogler zamek w Chudowie
Zamiynioł w pałac - taki był czowiek
W końcu i tyn rod łopuścioł włościa
A w murach wiater gonioł fest gościa.

[broneknotgeld]

Franc von Bally

Za von Ballyego zaś prziszła wiosna
Sztela piykniała i jakby rosła
Klontwa durś jednak jakoś wisiała
W silwester spoloł sie dyć bez mała

Łod tego czasu wszysko w ruinie
Ale historio jeszcze niy minie
Teroz Fundacjo łodbudowuje
Chudow zaś Ślonzek piyknie promuje.

[broneknotgeld]

Chudow - 1845

Aleksander von Bally tu browar postawioł
Ło kerym historio jakby zapomniała
Pon przi własnym piwie gości swojich bawioł
Choć już zaboczyli ło tymu bezmała

Dyć jednak terozki we gymbie tyn browar
Chocioż yno jego fundamynta majom
Pewnie by sie cieszoł chudowski piwowar
Że pamiontki po nim jednak poznowajom.

[broneknotgeld]

Husyty w Chudowie

Husytom sie zamek łopiyroł chudowski
Dlo Ślonska ich wojska to był "dopust Boski".

[broneknotgeld]

"Izba Łod Starki w Chudowie"

Zrychtowała to tukej nom Organiścioczka
Ze Chudowa przeca nojpiyrszo Ślonzoczka
W stary szkole izby jako piyrwy blyszczom
Chudowianie na tym przeca yno zyszczom.

[broneknotgeld]

Wieża

Wieża zamku w Chudowie łodremontowano
W piwnicy "muzeum" połoglondać idzie
Na gorze latryna piyknie zrychtowano
Dyć jak wos tam nadrze - z tego nic niy bydzie.

Pilchowice

[broneknotgeld]

Cudowne źrodło stanicke

We Pilchowicach jest tyż Stanica
Za niom źrodełko cudowne
Wiy ło tym cołko ta okolica
Bajajom legyndy downe

Princ Raciborza tu przed wiekami
Błonkoł stanickim se borym
Wilki go chciały rozszarpać kłami
Jeszcze do tego był chory

Dyć to źrodełko znoloz ze wodom
Łostatkym siył sie jyj napioł
Zdrowy szczyńśliwy wrocioł łon do dom
Zwiyrz żodyn go niy ucapioł

W Stanicy coś tyż inkszego prawiom
Jak chyńć mosz nagło na picie
To cie te wody wcale niy zbawiom
Na łodwrot - skończysz już życie

Rożnie godajom ło źrodła cudzie
We zocy ciyngym je majom
Niyjedyn bez to po woda pódzie
Choć możno yno jo bajom.

Pławniowice

[broneknotgeld]

Pławniowice

Zaś zaczoł blyszczeć pałac nom tukej
Choby epigram w poezji
Tako ci powiym - Boga tu szukej
Bo je glywicki diecezji.

[ballest]

No ja, jest nasz, bronek je tera juzas nasz !

Knurów - Krywałd

[broneknotgeld]

Kościoł w Krywałdzie

W knurowskim Krywałdzie ciekawy kościołek
Joch sie nim dziwowoł bo roz żech tam bołech
Dyć jest to budynek po staryj cechowni
Kero kedyś była w tutejszy prochowni

Jak w dwudziestym piyrszym czyńść werku tu szpryngło
To sie wiela ludzi w ta ideja wprzyngło
By ze ty cechowni kaplica powstała
W keryj co dziyń potym załoga rzykała

Z czasym msze robiyli. Kapelon z Knurowa
Łod Wawrzyńca chodzioł liturgio łodprowiać
Potym ze Cyryla no i Metodego
W końcu parafijo wyrosła ze tego

Sześdziesiont lot była to jednak kaplica
A że sie rozrosła cołko okolica
Do rangi kościoła dzwignońć było czeba
Antoni Padewski patronym mu z nieba

Pyskowice

[broneknotgeld]

W starym pyskowickim ratuszu

Co we tym ratuszu mi sie fest podobo?
Hajziel pod "czinostkom" - wcale niy pechowo.

[broneknotgeld]

Pyskowicki "Krziż Golgoty Wschodu" (17.IX.2005)

Przi kościele dynkmal chnetko łodsłoniajom
Pamiyńci poległych na Wschodzie Polokow
Kresowioki przeca ciyngym pamiyntajom
A i nom trza wspomnieć straconych Ślonzokow.

Przyszowice

[broneknotgeld]

W Przyszowicach

Pałac Raczkow remontujom
Szczyńściym latoś zaś łon blyśnie
Los sie nad niym jakby ujon
A i park urodom "tryśnie".

[broneknotgeld]

Przyszowice 1305

Toż majom ponoć siedymset lot
Z czego niyjedyn jest tukej rod
Zocny gyburstag - idzie se bawić
Żdziybko tyż duszy radości sprawić.

Wielowieś

[broneknotgeld]

Pałac

Wielowieś jeszcze pałacym blyśnie
Na razie remont fest majom
Tam Urzond Gminy cały sie wciśnie
Downo już ło tym godajom

Ważne że zysko na tym zabytek
A nawet gmina tyż cało
To przeca dzisioj niy żodyn zbytek
Mieć w zocy co sie łostało.

[rico-chorzow]

Sztela dobro,niy pedzieć,
coś nowygo,zowdy siy idzie,
dowiydzieć;))

Ujazd

[annak12]

na pagórku obok kościoła
ruiny zamku,zieleń dookoła
od wiosny do jesieni bociany tu królują
i na samym szczycie gniazdo budują
na pobliskiej łące żabek szukają
i o najpiękniejszych latach mych opowiadają:))
przybysza z Gliwic powita studzionka
spragnionego ukoi woda ze żródełka
dla wszystkich gościnne to miasteczko stare
i najbardziej mi bliskie ,tak bardzo kochane

[broneknotgeld]

Tyż piykne.
Przidało by se we tym wontku
forum.gazeta.pl/forum/72,2.html?f=28940&w=23051868
Pozdrowiom i zaproszom.

[ballest]

Fajnie tukej piszecie, Bronek, fajnie se to czytou!

[broneknotgeld]

Spokopić idzie
Toż dobrze bydzie.

[broneknotgeld]

Toż niych Ujazd żyje!
W niym niy ma mecyje!

[annak12]

"Wiersz o Ujeździe

Ujazd - takie miasto małe
Niby małe, lecz kochane
Tutaj w lecie zawsze słońce świeci
Tutaj w zimie zawsze biały puszek leci
Wiosną drzewa zakochane
A jesienią zadumane
Jest t o popis wyobraźni i fantazji wybujałej
Historii i legendy niezapomnianej
Nie dziw się więc, gdy zamiast ludka
Spotkasz w parku krasnoludka
Pięknie płynie tu Kłodnica
Którą każdy się zachwyca

Jest tu też Studzionka - kościołek mały
Który pamiętają mamy, mam mamy...
Obok płynie tajemnicze cudowne źródełko
W legendzie, o którym jest na pewno prawdy ziarenko
Leczyło już ono ludzi tak wielu
Uzdrowi i Ciebie, nasz przyjacielu
Kościół świętego Andrzeja
Również przed Tobą szeroko drzwi otwiera.
Ludzie są tutaj mili, uprzejmi, kochani
Są tak dobrzy jakby byli zaczarowani
Więc przybywaj, skądkolwiek wiatr Cię niesie
I odkryj naszego miasteczka zaklęcie!

Aleksandra Krzemińska, Gimnazjum, kl. IIa"

[szwager_z_laband]

posuouech Hanysowi pora nagranych moich konskow, wprowdzie niyma zech talynt do
recytowania, ale przinajmiyj zakasuja sam czyms Bronka :))

Jak Hanys je sam do to tera bydzie kolyj na Cia Bronek!!!

szwager_z_laband - LIVE -

[hanys_hans]

mitglied.lycos.de/corvey1/Laband/Laband+Blues.mp3

mitglied.lycos.de/corvey1/Laband/Nazod.mp3

mitglied.lycos.de/corvey1/Laband/Rapitouza.mp3

mitglied.lycos.de/corvey1/Laband/Zykanie.mp3

mitglied.lycos.de/corvey1/Laband/handszuiczki.mp3

Laband :))))))))))))))))))))))))

[sloneczko1]

jakbyś bou kole mie

[szwager_z_laband]

:)))

dziynki Hanys!

[broneknotgeld]

Szwager, szkryfnij mi tukej, czy żeś wysłoł wiersze we naszy godce na tyn
rudzki konkurs.

[rita100]

pominełam ten watek, ale głosniki wieczorkiem będą :)
Bronek - dobrze, że jesteś
bądź i trwaj !

[szwager_z_laband]

Bronek, przemyslouch se to wszysko gruntownie i powia tak. Paprom sie jakimis
konskami i legyndami, proboja tysz i Stary Testamynt tuplikowac, i idzie sie z
tym wszyskim fajnie rody dowac, ino momy jescze wszyske jedyn problym 0 mie sie
zdo ize lepiyj je poczekac na zauatwiynie sprawy z naszym szkryflaniym do
konca, a we tyn czas bydzie szuo ze czystym sumiyniym sprobowac w oficjalnyj
slonskyj godce cos pokozac. Wez np te ksionzki od D.J. kere naprowdy se mocka
cynia, i wez trea pomysl ize one by moguy byc szktryfniynte po slonsku, wiysz
ize miauy by wiyncyj powwodzynia, a tak pou z tego co poradzom pomoc slonskyj
sprawie tracom ino bezto ize som szkryfninte niy po slonsku.

ps

Som autor zdowo se z tego zresztom sprawa, bo nawionzuje do tego we wstympie,
ale jo osobiscie uwazom ize bydzie poczebne je wydac jeszcze roz po slonsku. Co
Ty o tym myslisz?

[ballest]

Laband, a kedy bydziesz z tym S-T. fertig

[szwager_z_laband]

:)), chyba dopiyro jak byda na ryncie :))

a kto padou ize mo by ccouki i to juz ...(?)

[broneknotgeld]

Ano, jak sie mo robota to zowdy tako sie zdowo, że na pyndzyji lekci przidzie
to ciongnońć.
Szwager, z jednym mosz recht - trza wiyncy szkryflać po naszymu, dyć niy yno we
internecie. Trza coby sie to wylywało na papior, właziyło do szkoł i kaj yno
idzie. No dyć ani jo, ani Ty, sami wiela niy zrobiymy. To wszysko jest ciyngym
yno jakby czyszczyniym przedpola. Co nojwożniejsze dopiyro przed nami.
Pożyjymy łoboczymy, a możno to nasze dzieci łoglondnom.
Pozdrowiom.

[olandi1]

Bronek ciepie sam fraszkami,
choćby przekupa na torgu jajmi.
Tako już jest dola jego:
ciepać fraszkami - kolego.

[broneknotgeld]

Ano - se tukej porymujymy
Zocno zabawa to przeca wiymy
Jeszcze przi tymu ślonskość nom blyśnie
Jako Słoneczka z likerym wiśnie.

[olandi1]

Öo tych wi

[olandi1]

Ło tych wiśniach nic niy godej
ino drugo krzynia podej

[broneknotgeld]

Co by Ci pedzieć?
-Przi wiśniach siedzieć?

[olandi1]

Przy wiśniach niy musisz,
bo diobła kusisz

[broneknotgeld]

Frelka rady do djobłowi
Tako kożdy chyba powiy.

[olandi1]

Czy do rady - tego niy wiym
ale coś ci skrycie powiym:
Dobro frelka niy jest zło
zawsze coś po cichu do

[szwager_z_laband]

wy sam tak o wisniach godocie piyknie, ale co je ze tymi odnich pestkoma?

:)

[broneknotgeld]

Na pestkach z wiśni chopy klynkajom
Co ślubnym swojym pszoć przestowajom.

[szwager_z_laband]

jo je mom w bojtliku i ogrzywom we piecu - jak mie przewieje kark to tyn
bojtlik dowom fajnie nagrzny na kark :)

[broneknotgeld]

Szwager - we piecu to yno śmiych
Grzoć w cycyhaltrze ślubny - niy grzych!
Toż wtedy drapko se wykurujesz
Chyńci do pszonio tyż wiyncy czujesz.

[szwager_z_laband]

padosz byda lotac jak oparzony?

[broneknotgeld]

Ślubno ucieszy tyż se z tym wiela
Bestoż trza przi sia mieć zowdy frela.

Knurow

[broneknotgeld]

We chlywiku knurow wiela
forum.gazeta.pl/forum/72,2.html?f=34281&w=30387861
Tym zocniejszo przeca sztela.

[broneknotgeld]

15.VI.1903

Gustaw von Velsen kozoł budować
Gruba dlo skarbu pruskego
Trza geldu było na to wydować
Dyć w końcu profit był z tego.

[broneknotgeld]

VI.1906

Dyć niy było to za dugo
I skończono szachta drugo
We tym roku już fedrunek
Ze tym radość - niy frasunek.

[broneknotgeld]

VII.1908 - Velsen I i Velsen II

Łojca gruby tako pamiyńć zachowano
Co szachty knurowske noszom jego miano.

[broneknotgeld]

Sepera 1910

Ło jeronie - toż radocha
I niy yno przeca trocha
Frele już som na seperze
Tako szkryfna tukej szczerze

Nic że ciynżko to robota
Możno keroś straci cnota.

[broneknotgeld]

III.1912

Już bergmony tu sztrajkujom
Mało geldu w kapsi czujom
Dyć Skarb Pruski twardo stoji
Nawet zwolniać se niy boji.

[broneknotgeld]

IV szachta fertig (1915)

Choć wojna w Europie fertig szachta szworto
Ze tym cołko gruba zdo sie wiyncy worto.

[broneknotgeld]

Wrocajom z wojska (1917)

Na wschodzie tako mniyj trza wojoka
Toż z frontu wroco - tu musi "skokać"
Przeca "maszyna" wojny światowy
Bez wonglo stanie - kożdy to powiy.

[broneknotgeld]

IV kolanijo 1919

Toż familokow ciyngym przibywo
Niych to nikogo tukej niy dziwo.

Ludzie Glywic

[broneknotgeld]

Możno se tu przidadzom fraszki i rymowanki ło tych kierzy jakosik byli ze
Gliwicami zwionzani.

[broneknotgeld]

Giovanni Angelus Ballestrem

Przodek rodu ślonskego z pomnika zaś patrzy
Na tyn piykny pałac swojego prawnuka
I dlo jego ducha wiela tyż to znaczy
Że sie tukej łonczy religio i sztuka.

[broneknotgeld]

Karol Franciszek von Ballestrem

Majontek erbnoł po tych von Stechov
O jakim wcześni niy marzoł
I w nim niy zrobioł za wiela grzechow
Godula mu gospodarzoł.

[broneknotgeld]

Franciszek Karol von Ballestrem

Zaczoł w armiji kariera
Loł Austryjoka Francuza
Koń jednak - tako cholera
Porzondny zrobioł mu uraz

Cugle chcioł czimać we rynkach
Habeta podmiynioł pryndko
Reichstag mioł ze nim udrynka
Bo łon przed nikim niy pynkoł.

[broneknotgeld]

Walynty Wolfgang von Ballestrem

Rzońdzioł majontkym przez dziesiyńć lot
Potym ze świata tego nom spod
Jednak je z nami tukej do dzisioj
W świyntym Józefie żech ło tym słyszoł.

[broneknotgeld]

Mikołaj Wolfgang von Ballestrem

Pan majoratu łostatni
Z drezdyński niy wyloz matni
Grad bomb pożary i gruzy
Widzioł u końca podróży.

[broneknotgeld]

Laurka

Ballestrem Francek mo tu laurka
Bo łon bergmonom płacioł "barborka".

Marszałek ślonski - Konstanty Wolny

[broneknotgeld]

Toż pomiyszkiwoł tyż we Gliwicach ,bestoż rymowanki ło niym mogom tu być.

[broneknotgeld]

"Konstanty"

Ksiondz Słota dzwon taki parafii fundowoł
Dokładnie połtora wieku ponoć tymu
Serce "Konstantego" - toch sie forsztelowoł
Ciyngym telepało we duszy istnymu

Dyć Wolny se przeca rodzioł w Bujakowie
Miano jakby ze tym wzioł łod tego dzwona
Ponboczek tyż pedzioł - "To jest ślonski czowiek"
No toż teroz wszyscy my som jakby w doma.

[broneknotgeld]

Połsiyrota

Kostek mioł czi lata jak matka pomarła
Utropa z tym wielko we rodzinie była
Akuszerka jakby jego se przigarła
Fater we "Baildonie" roboty mioł siyła

Jak już mu klupnyło rokow jedynoście
Łojciec z Bujakowa wzioł go do Katowic
Dyć miyszkoł u ujka - se to wyobroźcie
Zawodzki Drajoku - ło Kostku coś powiydz.


Na Zawodziu

Walynty z Konstancjom wziyli go pod krzidła
Przi nich i nauka Kostkowi niy zbrzidła
Fater chocioż biydny geld na synka łożoł
Ksiyndza w niym chcioł widzieć dyć tego niy dożoł.

[broneknotgeld]

1892

Terozki Gimnazjum w mieście Katowice
Dało karlusowi zaś inkszejsze lice
Z jedny strony wiedza - ciyngym tu poczebno
Z drugi kulturkampfu strona bardzi wredno.

[broneknotgeld]

Po prowdzie

Po prowdzie kusiyła go tyż medycyna
Z tym we Wrocku sztartnoł dyć zmiynioł dziedzina
Po roku był pewny - jego drogom prawo
Choć fater przi tymu wcale niy bioł brawo.

[broneknotgeld]

"Zet"

W Zwionzku Młodzieży Polski tyż Kostka widzieli
Ferajna z nich była jednak cołkym tajno
I bestoż prziznować se nawet niy śmieli
Policyjo prusko dyć niy była fajno.

[broneknotgeld]

1901-1907

W fachu adwokackim praktyka zdobywoł
Niyjedyn sond wtedy na niego se dziwoł
W Trzebnicy Zgorzelcu Świdnicy Wrocławiu
Widzieli że Kostek niy yno sie bawioł

Wpiyrw referyndorzym - asesorym z czasym
Zdoł w końcu egzamin "adwokacki klasy"
By kancelaryjo mog som już łotworzyć
W Gliwicach na rynku - śmioł se na to wożyć.

[broneknotgeld]

Prezes Okryngowego Zwionzku Ślonskich Koł Śpiywaczych

Ponoć muzyk z Kostka żodyn
Dyć niy brakło ty przigody
Przeca mioł do ludzi grajfka
Był jak tako ślonsko szlajfka
Choć tyż możno i pieśniczka
Co krasiyła frelkom liczka.

[broneknotgeld]

1917

Toż Wolny teroz we wojsku służy
Przi koniach jakoś czas mu sie dłuży
W końcu go jednak do sztabu wziyli
By roztomajty godki niy mylić.

[broneknotgeld]

W Sosnowcu

Toż zza Brynicy na Ślonzek blikoł
Ło inkszo dola dlo niego rzykoł
Drapko tyż prziszło piyrsze powstanie
Wolny z pomocom zarozki stanie

Z ksiyndzym Pośpiechym Dreyzom Rymerym
Dbo by niy ciyrpioł uchodźca kery
Ściongali dary ze cołki Polski
Zdało sie - kraj tyn bardzi im swojski.

[broneknotgeld]

Komisjo Samorzondowo

Niom nasz adwokat tyż reskiyrowoł
W niyj autonomii zaczontek
Bestoż jyj łojcym sie nom wydowo
Ciekawy życio to wontek

Tu sie ze Buzkym czynsto spotykoł
Kerego Zeflym tyż zwali
Łon do Warszawy czynsto pomykoł
Co uradziyli słoł dali.

[broneknotgeld]

Tymczasowo Rada Wojewodzko VI.1922

Sejmu ślonskego jakby zaczontek
Kostek już znaczoł tu wiela
Przeca sie niy krył we ciymny kontek
Już w Polsce ślonsko chnet sztela.

[broneknotgeld]

Piyrszy welunek Sejmu Ślonskego
24.IX.1922

Chocioż utropy było z tym wiela
Wywelowali posłow i tela
Ze czach łokryngow - łoziym sztyrdziści
Autonomijo cołkym se ziści

Wolny wzioł mandat ze "Zjednoczynio"
W niym mioł kamratow i głos sumiynio
Ferajna dała posłow nojwiyncy
Trza było teroz fest sie umynczyć
Deliberować do gorki gowy
By rosnoł w Polsce Ślonzek już nowy.

[broneknotgeld]

Ze Grażyńskim

Ze Grażyńskim Wolny niywiela se pszoł
"Malutkim Piłsudskim" przeca jego zwoł
Dyć przewrot majowy przinios w taśce chopa
Co dlo korfanciorzy był jak ta utropa.

[broneknotgeld]

Co by powiedzieć?

Co by ło Wolnym teroz powiedzieć
Zdi sie że czeba ło tym nom wiedzieć
Że autonomii richtig wachowoł
Na wrogow jeji pozor łon dowoł
W tym widzioł Ślonska w Polsce fundamynt
To nojważniejsze - wiydzcie na amynt.

[broneknotgeld]

Wrzesiyń 1939

Kostek wojynno tułaczka zaczoł
Ku Zaleszczykom jednak niy skryńcioł
We Lwowie osiod - na zachod paczoł
Tukej z utropom se swojom mynczoł

Zdowało mu sie że Francjo ruszy
Dyć cierń skiż tego urosnoł w duszy
Ło familijo wiela se tropioł
Ło Ślonsk i Polska co ktosik topioł.