Rymowanki Ziymi Kłodzki

[broneknotgeld]

Toż se tukej możno przido
Co stolica fraszki wydo.

[broneknotgeld]

Sami byście tyż coś wciepli
Przeca z rymym zowdy ciepli.

Kłodzko

[broneknotgeld]

Kłodzke podziymia

To co na wiyrchu - w Kłodzku podziwiali
Dyć wgłomb do piwnic tu niy zoglondali
A tam przez wieki rosło miasto druge
Studnie głymboke i chodniki duge
Wiyncyj dziur miała niż kyjza ta skała
Cud że przez lata to wszysko szczimała
Z czasym zwietrzała - wloła sie tyż woda
Już w Polsce widać było wielko szkoda
Walić zaczyły sie te chałpy piykne
Jako to retnońć? Czy czasu wystyknie?
Szpec łod gornictwa jednak sie poradził
Kaj yno umioł trzi grosze swe wsadzioł
Zaloł betonym wzmocnioł fundamynty
We tych podziymiach ujawnioł talynty
Kere w bergmonach durś przeca drzymały
No i sie łostoł tyn grod prawie cały
Zaś na pamiontka po ciynżki robocie
I by turystom dodać trocha pociech
Momy terozki tu podziymno trasa
Kaj medytujesz ło tych downych czasach
I wojnach co przez Ślonzek sie kulały
Lochach co kłodzian przed wrogym chowały.

[broneknotgeld]

Twierdza Kłodzko

Grod był we Kłodzku słowiański prastary
Jeszcze niym Polska ziymie te podbiyła
Tyndy do Rzymu szły przeca jantary
A okolica durś rosła we siyła

Za Piastow zamek stanoł tu na gorze
Kery pilnowoł durś ważnego szlaku
Załoga liczno stoła w jego murze
Kłodzko to trocha taki ślonski Krakow

Twierdza zrobiyli z niego Austryjoki
Fryc Wielki dalyj jom budowoł
Coby tu mocno stanyli Prusoki
Wielgachny donjon we środku niyj stowioł

Chwolom sie Niymcy - W Prusach yno łona
Łoparła wojskom sie Napoleona
Dyć jo tam niy wiym coby sie z niom stało
Jakby sie ze Tylży "pokoju" niy miało

Z czasym ze twierdzy zrobiyli wiyńziynie
Kere rygorym we Niymcach tyż słynie
Dzisioj zabytek to na polski stronie
Bawi turystow - twierdzy jest już koniec.

[broneknotgeld]

Pruski romans

Groźnych bańdziorow w Kłodzku wyńziyli
Jednak niy łoni sławni tu byli
Terozki wspomnieć chyba jo musza
Zakochanego dość fest karlusa

Fryderyk von Trenck - piykny i mody
Tu łod miyłości zażył ochłody
Smoloł cholywki do siostry krola
Ale niy wygroł ze Frycym fula

Chocioż Amalia nic sie niy broni
Krol sie niy godzi - do twierdzy goni
Niy chce we hrabim szwagra swojego
Widzi w tym gańba dlo tronu swego

Hareszt nakłado pryndko na szaca
Wojsko go wiezie do tego Glatza
Miało być pszonie a jest wiyńziynie
Jak kamiyń Fryca twarde sumiynie

Po prowdzie w twierdzy go niy mynczyli
Na wiela przeca mu pozwolyli
A łon durś myśloł ło lipście swoji
I ło ucieczce z wiyńziynio roji

Bestoż do skutku pitać probowoł
Aż sztyry razy rady niy dowoł
Jednak za piontym gładko mu wyszło
Choć ło Amalii marzynie prysło

We cołkich Niymcach szukali zbiega
Dyć wystraszyli jednak jak czeba
Zaocznie wyrok śmierci mu dali
I na szafocie gymba wiyszali

Wielkymu uciyk Fryderyk mały
Z miyłości nici - choć karlus cały
Taki był koniec historii cołki
Pszajesz - uwożej jednak na stołki.

[broneknotgeld]

Minerske chodniki

Minerske chodniki atrakcjom som kłodzkom
Światła tukej było choćby ciymnom nockom
A przeca wojoki musieli w niych chodzić
Jak oblegajoncym chcieli fest zaszkodzić
Żodyn niy śmioł myśleć ło świyczce pochodni
W luft by wylecieli pryndzyj niż ktoś łod nich

Po prowdzie to z tego pożytku niy było
Rzodko oblygali - czynsto sie ćwiczyło.

[broneknotgeld]

Hrabianka Orsini

Hrabianka? - po prowdzie ze niyj mieszczka była
Z goroncego pszonio na Ślonsku słynyła
Tych liplingow swojich ponoć struła wiela
Jak już niy wydoloł to mioł z tego tela

Godajom tyż ło tym - co robiyła łona
Jak armio tu prziszła łod Napoleona
Ponoć w twierdzy kłodzki podtruła załoga
Coby sie poddali wojskom tego "boga"

Dyć za to co złego naprowdy zrobiyła
W końcu do tyj twierdzy za wiyńźnia trefiyła
Łodsiedziała tukej aż dwadziścia lotek
Wylazła - już niy był ze niyj piykny kwiotek.

[broneknotgeld]

Baron Wacław Kinski

Za tych Austryjokow Kinski w Kłodzku siedzioł
Spiskowoł i jontrzoł - Habsburg sie dowiedzioł
Wysłoł pod eskortom do zamku kłodzkiego
Dyć Kinski durś myśloł jak uciyc ze niego

No i musza pedzieć że mu sie udało
Jak wino we gowie strażnikom szumiało
Dziura pryndzyj wykuł zrobioł tyż drabina
Wszyscy tukej potym mieli kwaśno mina.

[broneknotgeld]

Andreas Faulhaber w Kłodzku

Ksiondz Faulhaber - twierdzy wiyńziyń richtig zocny
Coż - kej mioł paragraf na siebie dość mocny
Kusioł do dezercji - to mu zarzucali
Tego w wojsku Fryca niy tolerowali

Godali co było niywiela w tym prowdy
Na zimne dmuchali - to robiyli zowdy
Jego przeznaczyniym kara śmierci była
Dyć na tym historio sie niy zakończyła

Cuda z ciałym dugo sie tu potym działy
Zwłoki przeca wcale sie niy rozkłodały
W końcu pochowali je w kłodzkim kościele
Tako ta historio ciekawie sie ściele.

[broneknotgeld]

Wielko i mało.

Wielko i mało twierdza Nysa Kłodzko dzielyła
Forteczno Gora wiynkszo - Owczo myńszo zajyła
Z Czech do Ślonzka te twierdze droga fest zamknyły
Łone już prusko ziymia przed Austryjom broniyły

Bajajom ludzie - Kedyś podziymie je łonczyło
Kto szuko - możno tam trefi - oby sie spełniyło
Plany fortecy niypełne - jak chcesz licz na wiela
Dyć niyjedyn durś godo - Blyśnie jeszcze ta sztela

[broneknotgeld]

Finowie w Kłodzku

Przez drugo wojna wiyńziyli tukej
Finow - dyć dzisioj prożno ich szukej
Co do jednego wymordowali
I niy wiadomo kaj pochowali

Niy yno jyńcow ta śmierć spotkała
Bo ich cywili tyż se zabrała
Kajś ich wywiyźli w kierunku Piły
Wele Szydłowca ślady zginyły.

[broneknotgeld]

Most na Młynowce

Siedymset lot już we Kłodzku stoji
Czasu sie jakoś wiela niy boji
I choć tak dugo Młynowka spino
Przeca sie jeszcze nom niy ugino
Podobny ponoć jest yno w Pradze
Miyjcie to ludzie tyż na uwadze.

[broneknotgeld]

We Kłodzku

We Kłodzku wiyncy Europy znojdziesz
Czech z Niymcym se tukej witoł
Do Niderlandow jakby tyż dojdziesz
Byś se historji łopytoł.

[broneknotgeld]

Arcybiskup Arnost

Syn kasztelana na kłodzkim zamku
Wele Pardubic rodzony
Fater mu pedzioł - Ty mody panku
Dobrze mosz być wykształcony

U joannitow w tutejszy szkole
Leciała nojpiyrw nauka
Dyć przeca jeszcze jako pachole
Do Boga chcioł drogi szukać

Bo jak roz rzykoł w kłodzkim kościele
Wejrzoł na Marii figura
To medytować dała mu wiele
Łoczy wlepiyła do mura

Studiowoł prawo w Padwie Bolonii
Zostoł biskupym we Pradze
Myśl ło Maryji kajsik go goni
Jom zowdy mo na uwadze

Przez cołke życie Kłodzko mioł w zocy
Tu augustianow sprowadzioł
Arcybiskupym - z całyj swyj mocy
Co dobre w ziymia ta wsadzioł

Dyć prawie już go Watykan wołoł
By siednoł na jego tronie
Do sia go jednak som Bog prziwołoł
Życio wyznaczoł mu koniec

Łostatnio wola spełniyli jego
W Kłodzku go pochowoli
Zaś tu Maryja paczy na niego
Czy zocny żywot pochwoli?

Som Arnost wiedzioł jak ze tym bydzie
Że za swo pycha zapłaci
Figura jego skruszonom bydzie
A gymba rysy zatraci

To co jest boske i co czowieka
Chyba sie tu powadziyło
A jednak zgoda wlazła w ta eka
Bo dali już lepiyj było

Jak ze okładym sto lot minyło
Z grobu Arnosta naszego
Cudnym balsamym mocno gichnyło
Koniec pokuty był jego

Dzisioj już szło by do świyntych grona
Arcybiskupa postawić
Maryja - możno sprawi to Łona
My sie mogymy tyż wstawić.

[broneknotgeld]

Kłodzki dioboł

Na dusze wojokow czynsto polowoł
Niyjedyn z nich wiary tymu niy dowoł
Dyć w końcu mieli na to tyż dowod
Jak łon soldata do piekła powiod

Roz pijok wielki mioł na murach warta
No i sie notknoł na naszego czarta
Dusza mioł czorno downo sprzedano
Chcioł jednak jeszcze budzić sie rano

Ze strachu czynsły mu sie te galoty
I na czowieka wlazły siodme poty
Synka łobiycoł za życie dolsze
To we tym wszyskim było nojgorsze

Jednak sie potym trocha pomiarkowoł
Bajtla niy łoddoł i sie tym radowoł
Wnerwiyło diobła cygaństwo chopa
Ze tym mioł przeca richtig utropa

Ślecioł na niego i z gory łeb urwoł
Ze niom do twierdzy potym sie pofurgoł
Pamiontka po niym tyż inkszo łostała
Bagnet co niy wloz diobłowi do "ciała".

[broneknotgeld]

forum.gazeta.pl/forum/72,2.html?f=28940&w=23051868&a=59393060
Ech, te Kłodzko!

[broneknotgeld]

Toż Dni Kłodzka se szykujom
www.twierdza.electro-robot.com/home.php
Richtig wiela uradujom.

[dzidzia_bojowa]

Pisałam o tym już, Bronku:)))

Kudowa Zdrój

[broneknotgeld]

Kudowa Zdrój

Na Wyżynie Czeski Kudowa już leży
Do Pragi stond blisko - możesz tymu wierzyć.

[broneknotgeld]

Kaplica Czaszek

Czerepow zdo sie ze czi tycionce
W nich historyji tyż downy konsek
Wojny ofiary pomoru tyż
Farorz je tukej zebroł - dyć wiysz

Tako staraniym fatra Tomaschka
Słynie w Europie ze Czermny czaszka
Inksze som w Rzymie i Kutny Horze
Kaplicom sztela asić se może.

[broneknotgeld]

Kudowa Zdroj

Park zdrojowy tukej cudym
W niym rotunda - toż pijalnia
Spokoj cisza bez łostudy
Lepsze to niż kajś pływalnia.

[broneknotgeld]

Zdrojowe wody

"Marchlewski" "Śniadecki" "Moniuszko"
Toż chnetko zapomnisz te łożko
Co wpiyrw i we dziyń cie kusiyło
Bo życie za wiela mynczyło.

Polanica Zdrój

[broneknotgeld]

Polanica Zdroj

Ze sudeckich zdrojow łona ciyngym modo
Choć tyż historyjo wiela ło niyj godo.

[broneknotgeld]

"Wielko Piyniawa"

W niyj se tu kompiesz
Niom inhalujesz
Toż na dwa fronty
Tako kurujesz.

Duszniki Zdrój

[broneknotgeld]

"Homole"

Zamek Homole na gorze stoł
I Polskich Wrot tu pilnowoł
Był czas że kożdy se jego boł
Bestoż tyż wiynkszy sie zdowoł.

[broneknotgeld]

W XIV wieku

Se Panewicze w Homolu siedzom
Siyła we zamku - dyć ło tym wiedzom
Ze Kłodzkym nawet zadziyrać chcom
Normalka tukej - skond jo go znom.?

[broneknotgeld]

"Duszniki"

Choroby "duszne" tu kurowali?
Ta siyła źrodeł już piyrwyj znali?

[broneknotgeld]

Z nudow

Mody Chopin se tu nudzioł
Dyć muzyka jakby budzioł
Doł koncerty przeca dwa
Dzisioj pamiyntajom - ja.

[broneknotgeld]

Ruiny zamku Homole

Jak ci sie w Dusznikach ździybeczko już nudzi
Zamczysko Homole ciekawość łobudzi.

[broneknotgeld]

22-23.VII.2006 Świynto Papioru

Ano - przi starym dusznickim młynie
Wielgachny festyn we ty dziedzinie
Papior robiyli tu przed wiekami
Jako i dzisioj - wiycie to sami

Szłoby zowiścić tego Dusznikom
Coby durś było - jo se porzykom
Sztela to w Polsce przeca jedyno
A we Europie? Spokopcie yno.

[broneknotgeld]

"Origami i shibori"

Chciała se bawić papiorym tako
A szac jyj czekoł i aże płakoł.

[broneknotgeld]

W "Hercbergerowce"

W "Hercbergerowce" fisze som złowisz
A czy som dobre na miejscu dowiysz
Przeca zarozki grilla mosz tukej
Toż we ta sztela drapko zaklupej.

[broneknotgeld]

We "Wyszehradzki"

Czeskich knedlikow se tukej zjycie
Tako Pepikow tyż inksze jodło
Ich biyrym popić - toż teroz wiycie
Idzie tu zadbać ło swoje sodło.

[broneknotgeld]

"Jarzymbina"

Hotel mo apartamynta
Dyć portmanyj - moja piynta.

[broneknotgeld]

Dusznicke pamiontki

Galanteryjo tu papiyrowo
Durś se nojlepszom pamiontkom zdowo.

[broneknotgeld]

Na Wybickiego

Poniymiecke wille ciyngym przi ty sztrasie
Ano tako prziszło w powojynnym czasie.

[broneknotgeld]

"Ponderoza"

Trocha se tu porajtujesz
Toż i ze tym uradujesz.

[broneknotgeld]

Stolicom świata w siyrpniu Duszniki
forum.gazeta.pl/forum/72,2.html?f=72&w=45836207
Tych kierzy ciongnom do pianistyki.

[broneknotgeld]

Festiwal Steinway'a i Yamahy

Se do Dusznik pozjyżdżały
Forteklapow konkurs cały
Kero fyrma gorom bydzie?
Jako latoś tukej przidzie?

[broneknotgeld]

"Jacek" i "Agatka"

Te zocne źrodełka szteli skarbym wielkim
Minerałow wiela a nawet bombelki.

[broneknotgeld]

We igliwiu

Ano sosny świyrki jodły
Cie jegłami tu niy bodły
W wodzie z nich se kompać zdrowo
Siyła z tego zdo sie nowo.

[broneknotgeld]

Zamek Homole

Przi bursztynowym szlaku Duszniki
Toż niych niy dziwo tyn zamek
Przełynczy bronioł z dobrym wynikym
Dzisioj ruiny tu same.

Srebrna Góra

[broneknotgeld]

Srebrno Gora

Choć Fryc Wielki Ślonsk ucapioł i czimoł go mocno
To Austryjom chcioł mu łodbić ta dziedzina zocno
Kero piyrwyj jego była - Ślonsk był przi Austyji
Przi Habsburgach - tyj Europy wielki familiji
Boł sie Frycek ło swo zdobycz - twierdze tu budowoł
Zaś nojwiynkszo nojmocniejszo w Srebrny Gorze stowioł.
--

Dyć czasym bywo

Pechowo wszysko "Riese" nazwali
Legynda z Ksionża tym wspominali
Już kamiyń dzwignoł już blisko był
Dyć sie przeliczoł - łopod ze siył.
--

Twierdza

Na głownym grzbiecie Gor Sowich
Ta twierdza łopasło stanyła
Historio tyż tako wom powiy
Że łona zdobyto niy była

Chocioż za Napoleona
Możno by sie to już stało
Dyć niy trza jom było pokonać
Po Tylży już niy wypodało

Potym swyj roli niy grała
Prawdziwy fest groźny warowni
Wiyńżiyniym nojciynższym sie stała
Bo tak tyż z nom było tu downi.

[broneknotgeld]

Wiyńziynie we Srebrny Gorze

Sławnych ludzi tu wiyńźiyli
Ponoć pitnońć niy szło
Dyć sie we tym tyż mylyli
Poru szprytnych wyszło

Roz kominiorz to dokozoł
Uciyk im z fasonym
Zaś go capli - dyć pokozoł
Kaj był feler łonych

Nawet w czasie drugi wojny
Jyńcy uciykali
Niymiec był coś za spokojny
Jak łoni pitali.
--

Fort Ostrog

Tyn fort srebrnogorski twierdzy dostoł sie młodzieży
Wiluś (drugi) im go łoddoł - możesz mi uwierzyć
Tym gyszynkym sie asiyli - gowy mieli w chmurach
Piyrwszym ich schroniskym było we tutejszych gorach.
--

Łod wojny do wojny

Bez piyrszo wojna w tyj twierdzy srogi
Choć przeca już cołkym stary
Broń rychtowali "frontowe bogi"
Co ludzi słała na mary

We miyndzywojniu tyż sławno była
Turystow tukej dość wiela
Jeździyli blikać na jeji "siyła"
We zocy była ta sztela

No a w nastympnyj wojnie zaś tukej
Oboz jyniecki zrobiyli
Skarbow wojynnych jak chcesz tyż szukej
Ponoć tu Niymcy coś skryli.

[broneknotgeld]

Schronisko w Srebrny Gorze

Seckendorfowie ze Srebrny Gory w masoński siedzieli loży
A na dodatek fantazjo ludzko chciała im cosik dołożyć
Dzisioj we chałpie jejich schronisko - spokojnie czas sie tu kulo
Yno że nocom straszy syncysko - niy byda wcale wos fuloł.
--

Srebrnogorski Donżon

Łon jest nojwiynkszy - podziwu godziyn
To byda godać choćby i co dziyń
Z niego łoboczysz poł Ślonska prawie
Chocioż niy służoł taki zabawie

Wojska w niym wiela szło kwaterować
Na forant mocka prowiantu chować
No i sie bronić pieronym dugo
Szczimać natarcie jak odsiycz mrugo.

--

Masyw Grochowyj

Tukej kedyś wiedźmy sabat se robiyły
By w czarach mieć grajfka z diobłami sie gziyły
Kto dzisioj w to wierzy? - Znojdziesz kajś takego?
Chce nocka tam przeżyć? - Niy ma tyż istnego.

[broneknotgeld]

We Srebrny Gorze

We Srebrny Gorze srebra szukali
Niywiela znojdli - poszli sie dali
Jednak kajniykaj som sztolnie tukej
Lepiyj w nich żodnych skarbow niy szukej.

Lądek Zdrój

[broneknotgeld]

Londek Zdroj

Czi ćwieci z tysionca rokow zdo sie zdrojym
Chocioż dlo nikerych yno wodopojym.

[broneknotgeld]

"Wojciech"

Ciyngym tukej badywanny
A w basynie gryfne panny
Chcesz - niy skompiom borowiny
Toż zożywej ty dziedziny.

Bardo

[broneknotgeld]

Matka Bosko Bardzko

Jakby we legyndy wierzyć sie nom chciało
Tyj figurce latek doszło by niymało
Ponoć we poczontkach wieku dwunostego
Maryjo tu naszła karlusa jednego
Ło cześć dlo niyj tukej piyknie poprosiyła
No i stond sie pryndko ta rzeźba skondś wziyła
Z bukowego drzewa piyknie wystrugano
Keryj moc niyziymsko richtig jest tu dano
Bo przeca tyloma cudami słynyła
Że na cołkym Ślonsku w zocy wiernych była.

--

Bardzko Madonna

Legyndami łobrosł tukej jyj poczontek
Prawdziwy jest pewnie tyn cysterski wontek
Z romańskich rzeźb Ślonska łona richtig piyrszo
Śmiało idzie pedzieć że tyż jest nojwyrszo

Piyrwyj we niywielki kapliczce tu była
Aż sie do kościoła czeskego wkludziyła
Z czasym "kirch" niymiecki stanoł wele niego
Z nacji tych na Ślonsku wiela jest dobrego

Po latach sie piyknie barok tu rozgościoł
Nawiedzynio Marii momy teroz kościoł
Willmann go łozdobioł - tyn nasz ślonski "flamand"
Chocioż był tronkowy - sztuki wielki amant

Madonna sie śmieje - radośnie tronuje
Ze ołtorza szczyńściym na cołki Ślonsk suje
Jak bydziesz we Bardzie do kościoła wdepnij
Porzykej i cosik na ofiara wciepnij.

--

Madonna i husyty

Husyty do Barda wdepli
Na czeski kościoł sie ciepli
Potym w niymieckim szukali
Niy było - bestoż sklinali

Łoba kościoły spolyli
Madonny dyć niy zniszczyli
Bo łona we Kłodzku była
Tam sie przed niymi schroniyła.

[broneknotgeld]

Ciynżke czasy

Jorguś z Podiebradow Bardo tyż nachodzioł
Wtedy Czech z Madziarym ło tyn Ślonsk sie wadzioł
Madonna do Kłodzka zaś se pojechała
Kaj te ciynżke czasy jakoś przeczekała.

--

Ślonsko Salamandra

Ślonskom Salamandrom tyż jom nazywali
Przetrwała pożary i była tu dali
Roz jedyn zakonnik chcioł jom wyniyść z łognia
Niy zdonżoł - spoloł sie jako ta pochodnia
We pogorzelisku Madonna leżała
Niyspolono rynka mnicha jom czimała
Wszysko było yno mocno łokopcone
Cud w tym jednak wielki że nic niy spolone
W łoziymnostym wieku zaś braciszek inkszy
Wyciongnoł jom z łognia - u Boga był wiynkszy

Dyć sie przed niyszczyńściym tukej durś chroniyła
By Bardo jyj miało opieka i siyła.

--

Pechowy tron

Tron Bardzki Madonny złotnik se rachowoł
Na kupa piyniyndzy - opat ich niy dowoł
Możno łon był jednak we wercie tyż tela
Ze srebra był cołki łozdobiyń mioł wiela

W końcu ło tyn mebel do łostudy doszło
Klasztor niy zapłacioł - do sondu to poszło
Złotnik tron swoj zabroł - kupioł go ktoś inkszy
Bestoż wstyd opata był w tym nawet wiynkszy.

[broneknotgeld]

Sekularyzacjo

Skiż Napoleona Bardo uciyrpiało
Dyć to gorsze było co ze niym sie stało
Jak krol Prus powiedzioł - Sekularyzować
I wszyske zakony pod upadłość stowiać

Utropa z tym wielko przeca tukej była
Majontek cystersow krolowa kupiyła
Aże z Holandyji - richtig dość daleki
Gorzyj że pielgrzymow szło mniyj do ty eki.

--

Pontniki

Ci co ta Madonna Bardzko łodwiydzali
Przez caluśke wieki durś jom całowali
Że łona kusiole te wszyske szczimała
Tyż se idzie pedzieć - Cud to jest bezmała
Bestoż sto lot tymu relikwiorz jyj dali
Co by go pontniki teroz całowali.

--

Za komuny w Bardzie

Choć z wiarom we Boga ofyn sie pogryźli
To jednak czasami tyż sie w klota piźli
W sześdziesiontym szostym ta figurka świynto
Ukoronowali - wiela to pamiynto
Bo tyż mocka ludzi na to sie zebrało
Chocioż tyj komunie to niy sztimowało.

[broneknotgeld]

Kościoł bardzki

Prziklosztorny kościoł Bardo fest łozdobio
Barok we niym blyszczy - wszyskim sie podobo
Czista lot już we niym Madonna przebywo
Tukej teroz na nia pontnik se podziwo
Łorgany świontyni tyż som richtig zocne
Tony ze nich słychać przepiykne i mocne
Legynda głosiyła że Fryc je fondowoł
Choć dowodu niy ma coby piniondz dowoł.

--

Muzeum Sztuki Sakralnej

We tym zocnym Bardzie muzeum tyż majom
Łobrozy monstrancje tukej podziwiajom
Rzeźby i ornaty wyszyte przepiyknie
Tukej se podziwosz - czasu niych ci styknie.

--

Bardzko szopka

We stary krypcie łod zakonnikow
Kotłownia piyrwyj być miała
Dyć szopka teroz kusi pontnikow
Atrakcjo ta sie przidała.

[broneknotgeld]

Cud na Bardzki Gorze

Matka Bosko Płaczonco pastyrza zbudziyła
Niyszczyńścia i szczyńścia tu prorokowała
Ślady stop w kamiyniu łod sia łostawiyła
A potym do nieba sie nazod zabrała

Jak sie inksze ło tym ludzie dowiedzieli
Zaczli tu zaglondać na ślady dziwować
Pamiontka po cudzie wszyscy mieć tyż chcieli
Niy dało sie tego jakoś upilnować

Arcybiskup fondnoł kapliczka ze czasym
Ołtorz stanoł w miejscu kaj były te stopy
Kalwariom sie stała ta gora ze lasym
Ciongnyły tu teroz baby no i chopy

--

Osuwisko

Sztyrysta lot tymu we Bardzie sie dzioło
Bez lato tu richtig pieronym fest loło
Woda Gora Bardzko jakosik podmyła
Skały poszły na doł - tako we niyj siyła

Wiela sie tych bergow do Nysy wkulało
I rzeka we biegu to przitamowało
Z miasta już sie ludzie myśleli wynosić
Dyć dzieci Madonna zdołały uprosić

Łona łod powodzi Bardo łobroniyła
I rzeki koryto ździybko przełożyła
Pamiontkom jest po tym wielke osuwisko
Nojwiynksze w Sudetach - łodwiydź jak żeś blisko.

--

Słyszoł żech...

Śłyszoł żech to tukej - Jak gora ruszyła
To sie w Zombkowicach wieża pochylyła.

[broneknotgeld]

Zamek

Ta Gora Bardzko zamek tyż miała
Dyć sie historio z niym niy cackała
Czeske husyty go zrujnowali
Żodyn niy miyszkoł w niym potym dali
Chnetko po zamku zniknołby ślod
Ale archeolog z łopatom wpod.

--

Kalwario

Na Kalwario w Bardzie trzi drogi prowadzom
Polok Pepik Niymiec tukej sie niy wadzom
Ta droga niymiecko to Droga Krziżowo
Przi kożdy kapliczce pontnik zowdy stowo
Zajrzy tyż na pewno do Źrodła Maryji
Woda stond pomogo choryj familiji
Kuruje fest gowa no i słabe łoczy
Wszyscy w okolicy majom jom we zocy.

--

Rożańcowo

Z Kalwarii blikom na Rożańcowo
Jeji sie teroz byda dziwowoł
Austrioki forty tu budowali
No a Prusoki ciongli to dali

Wtedy jom Łyso Gorom tu zwali
Dyć już historio leci se dali
Teryn kupiyli redymptorysty
Jak wiek dwudziesty był mody czysty

Pryndko stanyły tukej kaplice
Choby rożańca te tajymnice
Zajrzyj do kożdy bo przeca czeba
Poczujesz wtedy sie bliżyj nieba.

Wambierzyce

[broneknotgeld]

Ło Wambierzycach trza wiyncy fraszki
Przeca to niy som yno igraszki.

[broneknotgeld]

7.VI.1678

Już Osterberg kupioł dlo sia Wambierzyce
Cud sie stoł kolejny - dyć ło tym tyż wiycie
Cudowne źrodełko trysło przi kościele
W Annie Scholz przi tymu życie sie zaś ściele
A przeca już była w grobie jednom nogom
Ze Bogym niy take dziwy dzioć se mogom.

[broneknotgeld]

Ślonsko Jerozolima (1683-1725)

Dugo Wambierzyce rozbudowywali
Dyć "Jerozolima" tym Ślonskowi dali
Barok italijski tako ciyngym blyszczy
Miłosierdzie Boga dlo Wambierzyc zyszczy.

[broneknotgeld]

Wambierzycki cud

Jako Jan z Ratna znoloz ta lipa
Z Maryjom miyndzy astami?
Choć ślepy przeca chyba niy klipa
Toż spokopicie to sami

Do Matki Boski tako łon rzyko
Ćmok z łoczu drapko se traci
Utropa cołko przeca umyko
Wiarom za cud tyn łodpłaci.

[broneknotgeld]

Wambierzycki Cedron

We Wambierzycach Cedron tyż płynie
Jako w Świyntego Miasta dziedzinie.

[broneknotgeld]

79 kapliczek

Wiyncy kaj ińdzi zrachować idzie?
Ano szukejcie! -Jak ze tym bydzie?

Gorzanów

[broneknotgeld]

Zamek w Gorzanowie

Wele Bystrzycy we Gorzanowie
Na wielki zamek dziwo se czowiek
W szesnistym wieku go zbudowali
Chocioż rosł przeca łon tukej dali

Jak Herbersteiny se go kupiyli
Za rozbudowa pryndko se wziyli
Izbow mioł w koncu aż sto dwadziścia
Wloz żeś - dyć ciynżko trefić do wyńścia

Park wele zamku dobytku tela
Dziw broł jak wejrzoł żeś na ta sztela
Browar spichlerze stajnie kurniki
Stawy łogrody w klotkach kroliki

Oranżeryje groty altany
Sad nawet kościoł jak malowany
Szkołka i tory do rajtowanio
Osobno sala do tańcowanio

Szło by tu jeszcze wiela tyż dodać
Dyć po prożnicy terozki godać
Po drugi wojnie wszysko sie chyli
Bestoż na zamku duch jakiś kwili.


"Złoto Kaczka"

Minerolki miano
Słynoł niom Gorzanow
W Hrabstwie Kłodzkim znano
Cieszyła tu panow.


Gorzanowsko brama

Brama do przeszłości w Gorzanowie stoji
Ło downiejszych wiekach godać sie niy boji
Graf chcioł coby antyk mu przipominała
Chop tu jednak wiedzioł że to jakoś chała

Bo serce mioł zimne jak dyjamynt w nocy
Pańszczyzny dołożoł - niy stykło już mocy
Ze jego majontkow chopy uciykali
Było że i zbrojnie tyż sie buntowali

W łoziymnostym wieku krew sie loła tukej
Szczyńścio na tyj ziymi niy za wiela szukej
Brama ło tym godo choc niy kożdy słucho
Bo niyjedna dusza na krziwda jest gucho.

[broneknotgeld]

Tyjater w Gorzanowie

Tyjater w zamku - dyć dlo odmiany
Bawiyli tukej sie możne pany
Śmietonka kłodzko miała go w zocy
Paśli tu uszy i paśli łoczy

Herberstein na to durś suł markami
Asioł sławnymi sie aktorami
Kerych z Europy już ściongoł prawie
Bo ło tyjatrze łon śnioł na jawie.


Misterja Pasyjne

Za zocne te pasje - tu do Gorzanowa
Niyjedna gaftała przeca yno gowa
Zjyżdżały sie wiernych aż tysionce tukej
Sławniejszych misterjow w Europie niy szukej

Kożdy chcioł je widzieć - walyły tu tłumy
Szkoda że tych pasji łod downa niy momy
Skończyło sie wszysko z wyborym Hitlera
Pryndko zakozali - a niych ich cholera!


Na Dymbowy Gorze

Na Dymbowy Gorze kapliczka durś stoji
Cicho tu i pusto - czowiek aż sie boji
Bo może napotko ducha pustelnika
Co rzykoł tu kedyś durś do Antonika

Jak już bydziesz jednak wele Gorzanowa
Zajrzyj a spodobo ci sie ta Dymbowa
Pozdrow tyż łodymie tego Onufrego
Muster eremity przeca jest ze niego.

Czocha

[broneknotgeld]

Ernst Gutschow

We Dreznie mioł gyszeft co stoł na cygarach
Dyć i cygartow wiela istny robioł
Prziszło mu ło tytuł grofa tako starać
Do śmietonki Niymiec ze geldym se dobioł

Toż terozki w wiyrchu - zamku trza zocnego
A na Ślonsku Czocha niszczoł zapuszczony
Wkludzioł se dość drapko nasz Ernst już do niego
Choć prawiom co remont kosztowoł miliony.

[broneknotgeld]

Ech - se dzioło!

Grof -nuworysz wiela bawioł
Herb swoj tako szlachci - prawioł
Arystokracyji tela
Niy widziała nigdy sztela

Kajzerowskim Niymcom przeca
Potrza i takego neca
Z ruskom zaś rewolucyjom
Tu uciekiniery żyjom.

[broneknotgeld]

Sala Rycersko

Tu se śmietonka wytańcowała
Dyć i kapela radocha miała
Dlo zocnych gości tako przigrywać
A na nikerych trocha podziwać.

[broneknotgeld]

Z wieży zamkowy

Z wieży se Kwisie tukej podziwosz
Co niydaleko mo zalyw swoj
Tako dziedzinie zocny tyż kiwosz
Koniec tyż przeca mo urlop twoj.

Gory Stołowe

[broneknotgeld]

Gory Stołowe

Jedyne w Polsce z pioskowca gory
Zdo sie wylazły sztokami
Łoczy napasie tu richtig ktory
Toż bydźcie teroz ze nami

Skałki iglice bramy coś z grziba
Niyjedyn szczyt jak blat stołu
Przi kerym olbrzim jod kedyś chyba
Dyć niy ze nami pospołu.

[broneknotgeld]

"Błyndne Skały"

Kamiynnym miastym te "Błyndne Skały"
Obyś ze we nich niy stracioł cały
Bo tyn rezerwat jest labiryntym
Możesz umynczyć tam richtig piynty.

[broneknotgeld]

700 schodkow

Ano karlusie - to cie niy minie
Siedymset schodkow i tyn Szczeliniec.

Słownik ślonski

[broneknotgeld]

mhk.katowice.pl/korfanty/dane/gwara.htm
Prawie taki link może se tukej przidać.