Miasta Partnerskie Zabrza

[broneknotgeld]

Z kim se kamracicie?
-Możno mi powiycie.

[Gość: Zabrze]

www.um.zabrze.pl/index.php?option=com_content&task=view&id=500&Itemid=216

[broneknotgeld]

Piykne dziynki.
Bydzie trza mi ło nich szkryfnońć jakeś rymowanki.
Po prowdzie to słabo som łopracowane na ty zajcie miejski.
No ja, we moji Rudzie Ślonski niy ma ze tym lepi.

[broneknotgeld]

A możno trza by we końcu ta miejsko zajta zaktualizować.
No bo jak Zabrze podpisało umowy partnerske ze dziewiyńcioma miastami, to czamu
do trzech jakosik niy chce se prziznać?

[broneknotgeld]

Dziewiyńć kamratow podobnoś majom
Yno do sześciu se prziznowajom?

[broneknotgeld]

Możno ktosik wiy coś ło tych partnerach kerych na zajcie miejski niy ma.
Szkryfnijcie tu ło tym cosik.

[broneknotgeld]

Wielkanocnie

Słać jajeczka trza partnerom
Niych se za wspołpraca bierom.

[broneknotgeld]

Ciyngym jakoś niy wiym nic ło inkszych partnerach.
Możno ktosik uzupełni ich lista.

Kaliningrad - Lund - Równe - Sangerhausen - Seclin

[broneknotgeld]

Prusy Ksionżynce

Piyrsze to państwo w cołki Europie
Kaj sie na Lutra tezy niy "kopie"
Princ Albrecht polskim lynnikym łostoł
Dyć wolno rynka we Prusach dostoł.


Krolewiec 1544

Dboł Hohenzollern ło swo stolica
Chcioł by gryfniejsze durś miała lica
Toż uniwerek tukej wystawioł
By uczoł ale tyż przeca sławioł.

[broneknotgeld]

W Krolewcu i Ełku (1543-1552)

Wiyncy tu ksionżek polskich drukujom
Niż w cołki Polsce - to forszelujom?

[broneknotgeld]

Krolewiec 18.I.1701

Toż elektor w końcu korony se chycioł
"Krol w Prusiech" - szpas taki inkszym tronom wycioł
Europa mo władcy zaś cołkym "nowego"
Z mianym Fryderyka Wilhelma I.


Konigsberg 1255

Przemysła Ottokara II czy znocie?
Na jego cześć miano tego grodu mocie
Krol Czech no i cysorz łon rzymsko-niymiecki
Mieczym krzcić chcioł pogan - nojlepi we plecki

No toż grod warowny tu Zakon wystawioł
Komtur ze Prusami wcale se niy bawioł
Czi ćwierci z tysionca rokow dyć minyło
Wiela sie w tym czasie tukej pomiyniyło.

[broneknotgeld]

4 grody

Piyrwyj przi Krolewcu tyż czi inksze grody
Altstadt Lobenicht Knipawa - czimały se zgody
W łoziymnostym wieku cołkym we jedno zaś zloły
Czas przi Frycu Wielkim przeca był tukej wesoły.


Immanuel Kant 1724-1804

Niy było we tym żodnego kantu
Toż filozofio z niym kwitła sam tu
Łon "Albertiny" perłom był jasnom
Idejom kero niy śmi być ciasnom.

[broneknotgeld]

"Nowo wydany Kancyonał Pruski" - Krolewiec - 1741

Łon przez czi wieki był wydowany
Ze sto sztyrdziści razy wznowiany
Toż we tych pieśniach polskość tu była
Z niymi we sercach nikerych żyła.

[broneknotgeld]

"Dom Rad"

Ruina zamku tym zamiyniyli
Niym "Dom Rad" dźwigli - zaczoł sie chylić
Możno Krziżaki tako sprawiyli
Że przegroł cołkym towarzysz Iljicz.

[broneknotgeld]

Mury miejskie

Skiż wojyn szwedzkich wzniyśli te mury
Baszty bastiony i trocha bram
Niy łodgoniyły cołkym tu chmury
Dyć cosik jednak broniyły sam.


Przebudowa murow miejskich (1843-1864)

Ano - łoblykły se w cegła piyknie
Urody jejich i dzisioj styknie.


Baszta Wrangel

Zdo sie - wyłazi jakby z jziora
Coby Krolewca tako wachować
Chocioż minyła już jeji pora
Werci se na nia tu podziwować.

[broneknotgeld]

Brama Krolewsko

Dwoch krolow tu szukej ze ksiyńciym Albrechtym
Głow jednak niy majom - som wiysz jaki pech w tym
Choć w łostatni wojnie bomby tu niy ściepli
Dyć Ruski na władcow niy yno se hepli.


Brama Sackenheimsko

Piyrwyj grafy jom zdobiyli
Dyć przi Ruskach sie straciyli
Kaj te Yorcki i Bulowy?
-Se łopytej swoji gowy.


Brama Frydlandzko

Na Frydland z Krolewca tyndy żeś wyłazioł
W czasach jak tyn Prawdinsk do gowy niy włazioł.

[broneknotgeld]

Kościoł w Emalienau

Krolowa Luiza postawić kozała
Dyć pewnikym tego se niy pomyślała
Że tu czas tyjatru lalkowego przidzie
A Ponboczka pszonie i we tym durś bydzie.


Zoo

Po berlińskim i londyńskim łogrod krolewiecki
Jednak wszysko se zmiyniyło - prziszoł czas radziecki
Downy blask se pryndko stracioł - zoo jednak durś stoji
Ło ta reszta co łostała ktoś sie ciyngym boji.

[broneknotgeld]

Muzeum Kanta

Dzisioj myśliciel muzeum mo
Toż Kaliningrad jednak go zno.

[broneknotgeld]

Tako dziedzina
pl.wikipedia.org/wiki/Kaliningrad
Kamrat Olsztyna.

Lund - Równe - Sangerhausen - Seclin - Trnava - Za

[broneknotgeld]

Lund

Dania se piyrwyj Lundu trzimała
Jednak Szwecyji we końcu dała.

[broneknotgeld]

Czy ta szwedzko Skania znocie?
Z niyj partnera przeca mocie!

--

Skania spichrzym

Ano - spichrzym dlo Szwecyji
Niy ma we tym komedyji.

--

Skania

Naprzeciw Danii ta Skania momy
Możno jom w końcu dobrze poznomy.

[broneknotgeld]

Lund w Szwecyji leży!
Czy ktosik niy wierzy?

Lund w Szwecyji leży!

[broneknotgeld]

Lund w Szwecyji leży!
Czy ktosik niy wierzy?

[broneknotgeld]

Dziyń św Łucji w Szwecyji

Choć sie urodziyła w ciepły Italyji
Nojmocni jest czczono we zimny Szwecyji
W łopiece mo ślepych i tych co ich lyczom
Bestoż frelki dzisioj chodzom se ze świycom

W kożdym mieście szwedzkim terozki wybory
Nojgryfniejszy Łucji co łodwiydzo chorych
Niesie im pociecha i żymły rozdowo
Nom by sie przidała - tako mi sie zdowo.

[broneknotgeld]

"Waza"

"Wazy" wydobyli - piykny to zabytek
Bog jednak im pedzioł że to dlo nich zbytek
Przeca jak go piyrwyj yno zwodowali
To sie niy uczimoł na ty morski fali.

[broneknotgeld]

Greta Garbo

Godali że greta "zimny łogyń" poli
Ze niom "Casablanka" kożdy jednak chwoli.

[broneknotgeld]

Femokracjo

Możno ździybeczko to czasym złości
We Parlamyńcie chopy w myńszości
W rzońdzie podobnoś tyż majom tako
Baba ze chopym już niy jednako?

[broneknotgeld]

Już Tacyt

Już Tacyt chwoloł łod Swewow łodzie
Groźne być miały w przibrzeżny wodzie
Dyć wtedy jednak bez żagla były
Na oceanie by sie straciyły.

[broneknotgeld]

Sigrida

Toż Eryk Zwyciynzca piyrszym jeji chopym
Możno jeszcze niy mioł z niom wiela utropy
Dyć po jego śmierci wdowa ze niyj "dumno"
Cera łod Chrobrego - tyż bestoż fest szumno.

[broneknotgeld]

Sigrida - Świyntosława

Ślubno Eryka - siostra Chrobrego
Swionow krolowa - szczepu zocnego
Wdowom we końcu przeca łostała
Siył wszysko strzimać durś wiela miała.

[broneknotgeld]

Państwo Odyna

Państwo Swionow bog załozoł
Dlo nich richtig wiela wozoł
Mondry był - toż przeca wiycie
Przepowiodoł śmierć i życie.

[broneknotgeld]

Tor

Z łonym zowdy po zwyciynstwo
Ze niym siyła no i mynstwo.

[broneknotgeld]

Staro Uppsala

Dlo Swionow jako świynto stolica
Tu żeś zoglondoł we bogow lica
W pogańskich czasach kwitła Uppsala
Tako ci szumi jeziora fala.

[broneknotgeld]

Ech, tyn "blotfest" był co dziewiyńć rokow - toż wyboczcie feler.

"Blotfest"

W Stary Uppsali to "świynto krwi"
W ofierze ludzi Swiony skłodali
Co dziewiyńć rokow - niych kożdy wiy
Tako do bogow swojich "rzykali".

[broneknotgeld]

Swionowie - Swewowie

Dwa miana w jedne cuzamyn zloły
Plymiona kerych wrogi se boły.

[broneknotgeld]

Eryk VII Zwyciynski

Piyrszy krol Swewow co krzest przijmowoł
Dyć niy do końca za "Krziżym" stowoł
I Świyntosława nic niy poradzi
Jako ze tingym ło to se wadzić?

[broneknotgeld]

Olof Skotkonung 1008

Gotow i Swewow władcom był tako
Krzest jako łojciec przijoł jednako
Dyć w nowy wierze wytrwoł do końca
Chnet Odynowi zabraknie słońca.

[broneknotgeld]

Sigtuna (XI w.)

Krol nowe miasto w Upplandzie stowio
Jako stolica terozki dowo?
Przeciw Uppsali (Birka se traci)
Sigtuna drapko bezto bogaci.

[broneknotgeld]

Kościoł w Szwecyji

Kościoł Szwecyjo tako kupluje
W tym ze krolami dyć wspołpracuje
Nawet wyprawy głosi krziżowe
Coby podbijać ziymie durś nowe.

[broneknotgeld]

Krol Eryk IX

Choć do Finlandji powiod krucjata
Chocioż założoł już dynastyjo
Zginoł ze rynki duńskego "brata"
Uppsala widzi ta tragedyjo.

[broneknotgeld]

Krol Waldemar I Birgersson

Po fatrze chycioł se władzy tako
Dyć krol ze niego że Szwecjo płako.

[broneknotgeld]

Szwecjo płako

Birger, Waldymar i Eryk tako
Ciyngym se wadzom a Szwecjo płako
Bo na trzi czyńści już podzielono
Słabszo dziedzina ktosik pokono.

[broneknotgeld]

Mor w Szwecyji 1350

Ech - zaraza łostro kosi
Choć ło litość kożdy prosi
Biere starych tako dzieci
Traci człowiek se co trzeci.

[broneknotgeld]

Świynto Brygida (1300-1373) - cera Birgera Perssona

"Prawo Upplandu" fater łopisoł
Cera widzynia zaś miała
Dyć jyj we głowie nikt niy namiyszoł
Ślubnego drapko dostała

Bo jak jyj klupło rokow trzonoście
Już za karlusa wydano
Łosmiorga dzieci matkom - toż proście
Jom ło potomstwo co rano

Dyć chop jyj pomarł - wdowom łostała
Dali juz zyje w świyntości
Na nic jyj przeca pociechy ciała
Ponboczek w duszy durś gości.

[broneknotgeld]

Łobjawiynia świynty Brygidy

Toż łopuszczały Brygida siyły
Dyć przez to rosła juj dusza
Czy se Ponboczka myśli w tym kryły?
Dzisioj już pytać niy musza

Co łobjawione Isny łostało
To w końcu prziszło naprowdy
Cudym potomnym se wydowało
Skiż tego świyntom na zowdy.

[broneknotgeld]

Świynto Brygida - Rzym +1373+

Ze Ziymi Świynty we "Wieczne Miasto"
Niywiasta naszo w koncu se wroco
Dzisioj już wiymy - wypełnioł czas to
Coś niyziymskego życie Jyj skroco.

[broneknotgeld]

Świynto Brygida a Krziżaki

Toż w łobjawiyniach tako widziała
Co ich potynga cołkym zmalała
Jagiełło we to richtig uwierzoł
Choć Zakon jeszcze wojna z niym przeżoł.

[broneknotgeld]

Hakon

W Norwegji krolym syn łod Magnusa
-Biere za ślubno cera Duńczyka
Szwigrowi prziszło richtig go z muszać?
Czy Małorzacie ło to durś rzykać?

[broneknotgeld]

Małgorzata I 1388

Włado Szwecyjom jako krolowa
Dyć trza na krola dać mynsko głowa
Syn Warcisława - ksiyńcia słupskego
Siostrzyniec przeca - wyznoczo jego!

[broneknotgeld]

Eryk XIII

Mieli w Szwecjo go za złego
Richtig wiela tyż chciwego
Ze Jagiełłom se kamracioł
Dyć we końcu tron swoj stracioł.

[broneknotgeld]

Krzysztof Bawarski +1448+

Choć trzi korony istny kuplowoł
Drapko przed "tronym niybieskim" stowoł.

[broneknotgeld]

Bitwa pod Bunkebergiem (1471)

Tako Swen Sture tukej wygrywo
Sztokholm se tymu ze bliska dziwo
Już niy mo życio kto przi uniji?
Szajdong z tym wygroł cołkym w Szwecyji?

[broneknotgeld]

Arcybiskup Gustaw Trolle

Głowa Kościoła we niym szwedzkiego
Dyć do heresztu posłano
Chce Chrystian II uwolnić jego?
Czy krola Szwecji mieć wiano?

[broneknotgeld]

"Krwawo łaźnia sztokholmsko"

Nakłonioł Trolle krola do tego
Coby winnymi uznać przegranych
Miast amnestyji prziszło do tego
-Za heretyka kożdy uznany!

Toż se masakra krwawo zaczyła
Ciała spolyli - nic niy łostało
Wiynkszo niynowiść zaś w duszy tlyła
Ze tego siyły bydzie tyż brało.

[broneknotgeld]

"Wyścig Wazy"

Ze downych czasow ta tradycyjo
Po śniegu Wazy ścigali
Coby ich w boj wiod - niy komedyjo
Z niym wroga stond przegoniali.

[broneknotgeld]

Reformacjo w Szwecyji

Krol Gustaw ubogi a Kościoł bogaty
Potrza reformacji coby był sagaty
Toż se na tym richtig korona dźwignyła
Wiela co kościelne dlo sia teroz wziyła.

[broneknotgeld]

Gustaw Waza +1560+

Szwecjo podzwignoł z upadku tako
Teroz dziedzina za istnym płako
Dyć feler zrobioł we łożu śmierci
To co krolewske dzieli na ćwierci.

[broneknotgeld]

Eryk XIV

Duńczyk se ciśnie - brat tako zdrodzo
Szczyńscie krolewske kaj niy trza chodzo
Toż w końcu istny tyn tron utraci
Trza dować pozor na swojich braci.

[broneknotgeld]

Krol Zygmunt Waza

Syn Jana III - krola Polski znocie
Wzioł korona szwedzko - niy mioł ze niyj pociech.

[broneknotgeld]

Göteborg 1607

Coby Duńczykow durś niy bogacić
Geldu na cudzy handel niy tracić
Göteborg teroz Szwecjo wystowio
Tref powodzynie tyż miastu dowo

[broneknotgeld]

Rozyjm Altmarski (1629)

We Polsce Waza tyż przeca rzońdzi
Dyć do Szwecyji już niy zabłondzi
I choć go możno to nawet dziwo
Polska ze Szwecjom wojna przegrywo
Toż władza tako w Inflantach traci
Se Gustaw Adolf na tym bogaci
Dlo niego robiom tyż pruske porty
Geld co sie suje wojny jest worty?

[broneknotgeld]

Marny koniec! (1632)

Nic że se zdowoł richtig wygranym
Że Wiedyń mogby być jymu dany
Po niymcach z wojskym wiela rajzuje
Jakby tyż końca cołkym niy czuje
Dyć prziszło Lützen tako pechowe
Choć krol mocarny - śmiertelny człowiek.

[broneknotgeld]

Kanclyrz Axel Oxentierna

Krol we Europie ciyngym wojuje
A Oxentierna Szwecjo buduje
Z tym rosnom w siyła jyj sztyry stany
Zdo sie czas lepszy jakby im dany.

Równe - Sangerhausen - Seclin - Trnava - Zabrze -

[broneknotgeld]

Zabrze - Równe 25.01.2001

Z nowym tysioncleciym kamracynio wiela
Wiy to kożdy karlus - tako samo frela.

[broneknotgeld]

Równe - Zabrze 2001

Ano - se dwie sztele zaczyły kamracić
Tako by mieć profit a niy yno tracić.

[broneknotgeld]

Zabrze z Równym przirychtuje?
forum.gazeta.pl/forum/72,2.html?f=26289&w=61210943
Muster pewno forszteluje.

Równe na ty Ukrainie

[broneknotgeld]

Dyć rym tego niy łominie
Równe na ty Ukrainie!

[broneknotgeld]

Jak blikom dzisioj na Ukraina
To mi sie zdowo że apruzina.

[broneknotgeld]

Cerkew św. Sofii 1037

Toż Jarosław Mondry ta cerkew zbudowoł
W podzience co prawie Pieczyngow pokonoł
Tym znak swoji wiary Ponboczkowi dowoł
Tako i potomnym ło tym co dokonoł

Znaczynie ta cerkew zaroz wielke miała
Do niyj zoglondali przeca dyplomaty
Sercym ruski władzy łona sie zdowała
Podpisane tukej niyjedne traktaty

Niż że przi Tatarach zły los na nia prziszoł
Niyjedna armijo po nich Kijow wziyła
Czas tom Ukrainom pierońsko zamiyszoł
Cerkew se łostała świadkym tego była.

[broneknotgeld]

W XIV wieku

Litwa ze połnocy na ta Ruś ciongnyła
Z zachoda zaś garła se tu polsko siyła
Niy szczimali tego słabe już Tatary
Teroz pana miynioł tyn kraj ruski stary.

[broneknotgeld]

Kozok ukraiński

Kozok ukraiński niy chce łaski pana
Z wolnościom tańcuje łod samego rana.

[broneknotgeld]

Wojny kozacke

Polska w nich bunty motłochu widziała
Dyć tako wolność pynta zrywała
Co dlo Poloka grzychym tu zdo sie
To Ukrainiec za świyntość mo sie.

[broneknotgeld]

Wschodnio Ukraina 1654

Ano sie stało co stać musiało
Za Dnieprym Rosji dziedzina cało
Dlo Chmielnickiego to myńsze zło
Dyć to co przidzie czy cołkym zno?

[broneknotgeld]

A w Rosyji

Ukrainiec Rosyji zdo sie gorszym Rusym
Kerego trza czimać tu ciyngym pod musym
Tympić jego godka - durś rusyfikować
By wolnośc we duszy niy śmioł w końcu chować.

[broneknotgeld]

"Wyzwoliciele"

Toż po "głodowy okupacyji"
Ze Niymcym zdo sie myni mecyji
Doł Ukraińcom nawet nadzieja
Choć wcale niy chcioł grać dobrodzieja.

[broneknotgeld]

"Miynso armatnie"

Miynso armatnie ze Ukraińca
Może ucieszyć zowdy tu Niymca
Dyć państwa z tego jednak niy bydzie
Yno nastympno niywola w biydzie.

[broneknotgeld]

Dzisioj

Dzisioj Ukraina apruzinom zdo sie
We tym tyż nadzieja i lepszy na lepszy los zdo sie
Możno do Uniji jom drapko powiedzie
Przidzie czas że łona w Europie na przedzie.

Sangerhausen - Seclin - Trnava - Zabrze - Kalining

[broneknotgeld]

Sangerhausen

We wschodnim landzie sztela znojdziecie
Kaj Sachsen-Anchalt i łona przecie.
--

Stare miasto

Sangerhausen - miasto stare
Dyć nom zdo sie ciyngym jare.
--

Gruba Łupkow Kukfru

Ano - w Sangerhausen zobytek przezocny
Toż piyrwyj skiż kukfru niyjedyn tu mocny.

[broneknotgeld]

Staro gruba kukfru

Łoziym wiekow mi sie zdo
Tela rokow gruba mo.

Sangerhausen we Niymcach

[broneknotgeld]

Toż we Niymcach ta dziedzina
Historyji niy łomina.

[broneknotgeld]

"Oktoberfest"

Z wrześniym jednak go fajrujom
Dyć chmiel wtedy fest żniwujom
Ze dwa tydnie piwo żłopiom
Ponoc niy som nic "pod kropom".

[broneknotgeld]

Czowiek Heidelberski

Czwiek z Heidelbergu piyrszym we Europie
Poł miljona rokow na zadek se kopie
Dyć przeca we Niymcach trefiyło nom spotkać
Takego zocnego ludzkości praprzodka.


Lodowce

Skuwały lodowce pora razy ziymia
Dyć ktosik juz myśloł - "jo to wszysko szczimia".



Neandertalczyk

Rzeka Neander pewnikym znocie
W jeji dolinie Felhof jaskinia
Tako tyż sztela praprzodka mocie
Zdo sie co jego teroz dziedzina.

[broneknotgeld]

Kultura azylsko (Mas d'Azil)

Zaś starom drogom co nowe idzie
Kolybka inkszo dyć tu se bydzie.


Kultura tardynosko (La Fere-en-Tardenois)

Zdo sie - tref tako samo durś plecie
We mezolicie już my som przecie.


Kultura maglemosko (Maglemose - Zelandia)

Widać w tych stronach już wiyncy mocy
Toż ta kultura przeca z połnocy
-Sie na połednie terozki wcisko
Czowiek i na tym ździybeczko zysko.

[broneknotgeld]

We neolicie

Ze myśliwego no i zbiyracza
We neolicie momy oracza
Co i w zogrodzie gowiydź hoduje
Z tym krok do przodka - to forsztelujesz.


Urmitz k. Koblyncji

Neolityczno zdo sie warownia
Wrogow se boli jako i łognia.


Gorki lepiom

Gorki lepiom w neolicie
Ze tych szkorup wiyncy wiycie
Jako im se wtedy żyło
-Dyć poleku lepi było.

[broneknotgeld]

Kultura amfor kulistych

We Brandynburgji richtig widoczno
Na wschod se cisła pieronym mocno
Cołkym zonikła ze neolitym
Toż wszysko tako pomiyni przi tym.


Kultura pucharow dzwonowych

Z Pirenejow tu wandruje
Bronz na drodze swoji suje
Zdo sie koniec neolitu
Toż ło niego już niy pytom.


Plymie

Ano - rody już łonczyło
Ze wodzym na przodku było
Tako naczelnikow radom
Z dymokracjom co tyż zwadom.

[broneknotgeld]

58 r.p.n.e.

Germany Galijo chcieliby ucapić
Tako se rzymianom niy trza teroz gapić
Stanyły legije pod wodzom Cezara
Ech - ze tym Teutonom przidzie se fest starać.

[broneknotgeld]

"Limes"

Przed Germanami "limes" łobroni
Tako se zdowo dyć czas pogoni
Choć umocniono richtig granica
Kedyś łodmiyniom se jeji lica.

[broneknotgeld]

Państwo Frankow

Toż miyndzy Rynym a tom Sekwanom
Franki z potyngom swojom powstanom
Na wschod pociongnom - tyż na połednie
Rośnie ich siyła w nocy i we dnie.

[broneknotgeld]

Tolbiac 496

Aleman richtig tukej pobity
Dyć Chlodwig yno rośnie zaś przi tym.

[broneknotgeld]

Poitiers 732

Toż majordom merowiński Francyjo łobroni
Muzułmanow ze ty ziymi pod Poitiers przegoni
Łod Karola Młota wyńdzie wielko dynastyjo
Dlo mamlasow Merowingow yno tragedyjo.

[broneknotgeld]

Karol Wielki (786)

Po Merowingach dynastjo owo
o ze tym władcom we chwale stowo.

[broneknotgeld]

Cuzamyn

Co piyrwyj łosobno terozki cuzamyn
Frank German Rzymianin - jednak niy na amyn
Dyć w końcu zabraknie Karola Wielkego
Chcom być zaś se łod sia - fest ciongnom do tego.

[broneknotgeld]

Wilijo w Rzymie (800)

Rzym władcy Frankow rozgłoszo chwała
Stond tyż se siyła cysorza brała.

[broneknotgeld]

Ludwik II Niymiecki (843-876)

Toż wschodni konsek cysorstwa jego
Niymcy wyrosnom richtig ze tego.

[broneknotgeld]

Otton I

Syn łod Hynryka w boj Niymcy wiedzie
Łon przeca krolym tako na przedzie
Ło władza prince se czasym wadzom
Przeskoczyć jednak go niy poradzom.

[broneknotgeld]

Świynte Cysorstwo Nacyji Niymiecki (962)

Z Ottonym I już I Rzesza
Przeca niyprowdom jo tu niy grzesza.

[broneknotgeld]

Krol Hynryk IV

Arcybiskupa krol Hynryk Szworty
Mediolanowi dowo - czy worty?
Papiyż wnerwiony tyż richtig wiela
Łon krześcijaństwym rzońdzi - toż tela
Wiela poradzi łodpor w tym dowo
Ekskomunika przed władcom stowio.

[broneknotgeld]

Rzym 1084

Z wojskym do Rzymu krol se wyprowio
Toż "Wieczne Miasto" na łasce jego
Gyszynk z korony cysorski dowo
Co Hynrykowi potrza do tego?

Seclin - Trnava - Zabrze - Kaliningrad - Lund - Ró

[broneknotgeld]

Połedniowe dźwiyrza

Połedniowe dźwiyrza jak do Lille se jedzie
Droga ze Paryża tyndy przeca wiedzie.

[broneknotgeld]

Zabrze - Seclin 2007

Zafajrować możno przidzie
Z kamracynio radość bydzie.

[broneknotgeld]

Przeca Seclin ze Francyji
Toż niy robcie komedyji.

Seclin we Francyji

[broneknotgeld]

Francyjo jak wino kożdymu smakuje
Bo tyż tu nojwiyncy se go produkuje
Zaś lawyndom wonio podobno łod zowdy
Parfin tukej krolym - wiela we tym prowdy.

[broneknotgeld]

22 regiony

Na tela regionow se Francyjo dzieli
Szkryfna byście ło tym już teroz wiedzieli.

[broneknotgeld]

Normandio

Kusi Normandio ciyngym kyjzami
I jabłecznikym - toż wiycie sami.

[broneknotgeld]

Galowie

Plymiona celtycke tu prawie łod zowdy
We kerych Francuzy przodkow swojich majom
Toż idzie se asić tym dzisioj naprowdy
Co we nich poczontku swojego szukajom.

[broneknotgeld]

Juliusz Cezar w Galji

Czy skiż Cezara Rzymiany wszyndy?
-Ze wojskym swojym Galjo podbijo
Wercyngetoryks choć bronioł grzyndy
Dyć przegroł tako - toż tragedyjo.

[broneknotgeld]

V-VI w.n.e.

Z Kornwalji i Walji Bryty przipłynyli
Na cołkim połwyspie se tu osiedlyli.

[broneknotgeld]

Pepin - krol Frankow

Z Childerykym kończom - Pepin krolym Frankow
Longobardow pobioł jak jakiś barankow
A co jejich było łoddoł papiyżowi
Monarcha przezocny - Kościoł tako powiy

Trnava - Zabrze - Kaliningrad - Lund - Równe

[broneknotgeld]

Połedniowe dźwiyrza

Połedniowe dźwiyrza jak do Lille se jedzie
Droga ze Paryża tyndy przeca wiedzie.

Trnava - Zabrze - Kaliningrad - Lund - Równe - San

[broneknotgeld]

Trnava IX w.

Kaj trakty handlowe se pokrziżowały
Osada stanyła - tref we tym niymały.

[broneknotgeld]

Trnava 1543

Turki Ostrzyhom we rynkach majom
Dyć Kościołowi łoni niy pszajom
Biskup do Trnavy tako se wkludzioł
Na lepsze czasy nadzieja budzioł.

Trnava - Słowacyjo

[broneknotgeld]

Trnava Słowacyjo krasi
Zabrze se kamratym asi.

[broneknotgeld]

Już była

Była już Słowacjo przez ta wojna drugo
Dyć trocha niyrichtig no i tyż niydugo.

Zabrze - Kaliningrad - Lund - Równe - Sangerhausen

[broneknotgeld]

Grzibowicko legynda

Grzib tukej miyszkoł kedyś przed laty
Ponoć był piernik richtig bogaty
I do swojego durś prziwionzany
Że ze tym wszyskim chcioł być chowany

We ziymi leży przeca już downo
A z nim tyż ślubno - kedyś szykowno
Kota dociepli i psa starego
Tyż wor piniyndzy co był łod niego

Jak już mioł wszysko poszoł do Piotra
By wrota nieba przed Grzibym łotwar
A świynty Pioter yno zamrugoł
W czyśću pokuta zadoł mu dugo

Pedzioł mi kedyś tyż jedyn ołpa
Że z tych piniyndzy co wzioł sie kupa
Mo w Grzibowicach być coś dobrego
Wtedy sie skończy kara łod niego

Szukali forsy już lot za wiela
Znojść niy umieli i majom tela
Co dlo sia yno ciynżko zarobiom
Ło skarb zapytej - w gowa sie szkrobiom.

[broneknotgeld]

Zabrze

Serca tu szyjom piyknie
Ale to im niy styknie
Przemysłym chcieliby słynońć
Co jakby mioł już przeminońć.

[broneknotgeld]

Zabrzańske platany

Zabrze platanami słynie
Jest i "Platan" - sklepik w tyj zocny dziedzinie.

[broneknotgeld]

Na "Makoszowach"

Siedza na grubie - na "Makoszowach"
Tam kaj "szyb szworty" tyż moja gowa
Łon wielki jakby wieża "World Center"
A jo jak klawiyr malutki - "enter".

[broneknotgeld]

Biskupice

Biskup ze Wrocławia mioł te Biskupice
Już w czinostym wieku - chyba mi wierzycie
A jak niy wierzycie pytejcie ta Viola
No i Władysława - ksiyńcia ze Opola
We piytnostym wieku tu Husyty wpodli
Pokradli zniszczyli co cynnego znodli
Po czeskich honcwotach prziszli te Tatary
Niy było tu szczyńścio yno same mary
Możno tyż skiż tego we wieku nastympnym
Biskup je chcioł sprzedać i znoloz sie chyntny
Dyć nazwa łostała - do dzisioj jom znomy
Przeca to dzielnica kero w Zabrzu momy.


Biskupicko rocznica

Siedymset sześdziesiont klupło im tych lot
Z czego jo jest przeca richtig teroz rod
Na gyburstag ciepia rymow mojich trocha
Yno tela moga w tym szczyńściu popochać.


Dziedzice Biskupic

Jak trza było forsy z Wrocka biskupowi
Bierawskymu przedoł je Mikołajowi
Ze Rudom je czimoł tyż Jan Gierałtowski
Syn zaś po nim erbnoł dyć dopustym boskim
Pomarł dosyć pryndko a po nim ta wdowa
Coś drapko za Prażmy była wyjść gotowa
Zastawiyła nawet swoje Biskupice
Bestoż tu Koniccy stali sie dziedzice
W siedymnostym wieku - we jego połowie
Zwolski na tyj ziymi był nojpiyrszy czowiek
Potym je ucapioł baron Jerzy Welczek
Jak pomarł to wdowa rzońdziyła tu wielce
Dyć po jeji śmierci zaś erbli to Prażmy
Potym hrabia Dunin był tu richtig ważny
Stechowowi przedoł wioska za guldyny
Łon majorat zrobioł ze swojyj dziedziny
Jak syn jego pomar dostała to cera
Ballestrema ślubno i łon mioł to teraz
Ze ślubnom te piykne Biskupice dostoł
Majorat we rynkach Ballestremow łostoł
Czimali to wszysko jak mogli nojduży
Aż po wiek dwudziesty by Ślonskowi służyć.



Biskupicko parafio św Jana Krzciciela

We "Rejestr Ujazdu" łoka jo niy wroża
Dyć wiym że pisali ło łanach farorza
Kery w Biskupicach na parafii siedzioł
Siedymset lot tymu - szmat czasu - bych pedzioł

Kościoł tu być musioł malutki drewniany
We tych downych czasach czynsto łokrodany
Bo tu buszowali husyty tatary
Pewnie tyż sie spoloł kościołek tyn stary

Nowy kościoł z drewna potym postawiyli
Jak sie wiek piytnosty już cołkym pochylił
Osobno dzwonnica jymu zbudowali
I Jana Krzciciela miano świynte dali

Za reformacyji żle sie tukej dzioło
Przeca katolikom niy było wesoło
Z czasym jednak wszysko wrociyło do normy
A farorz z Biskupic nabroł wiynkszy formy

Dyć za Ballestremow w dziewiytnostym wieku
Niy wyczimoł burzy tyn kościoł - czowieku
Nowy pryndko stanoł staraniym hrabiego
Do dzisioj łon blyszczy - przyńdź sie wele niego

Jest neogotycki wyglondo se piyknie
Wszyskim parafianom jednak krotko styknie
Przeca jak tu przemysł zaczyli budować
To pryndko za ciasny poczoł sie zaś stować

W downych czasach na mszo Ruda tu chodziyła
A i dlo Zaborzo parafio ta była
Odpadła ta Ruda to samo Zaborze
W końcu inkszy kościoł stanońć sie tyż może

Jednak parafiany wszyske ło tym wiedzom
Że Jan Krzciciel zaczoł co stoji za miedzom
Siedym wiekow wiara ciyngym kwitnie tukej
Jak u ciebie słabo - w tym kościele szukej.

[broneknotgeld]

Mikulczyce

Ziymi Bytomski te Mikulczyce
Tarnowske Gory tyż miały
Dzisioj - dyć wszyscy dobrze to wiycie
W Zobrzu tyn konsek niymały

W ślonskim kodeksie tyż ło nich wzmianka
Dobiesław czimoł je wtedy
We tyj historii jest trocha manka
Wiela? Dowiymy sie kedyś

Na razie ważny jest wiek cztyrnosty
Z garcow nom łone słynyły
Dyć chopy wiela tu miały troski
Choć Pon Bog dodowoł siyły

Panow Mikulczyc tyż było wiela
Niy byda ich tukej liczoł
Poleku jednak rosła ta sztela
Ślonzok sie nigdy niy byczoł

Mog coś dorobić w kamiyniołomie
Bo złoże wapnia tu było
I chocioż w końcu z tym prziszoł koniec
Jakoś sie dalyj kryńciyło

Za Donnersmacka już wszysko rosło
Torg cug agyncjo pocztowo
I nawet gruba - do tego doszło
Buduje sie tukej nowo

Ronk do roboty trza było wiyncyj
Rosła ta gmina we siyła
Czas robioł swoje i lecioł pryndzyj
W końcu sie w Zobrze wtopiyła.


Biskupice - Zaborze

Legły sie Biskupice przi borze
A za niym było Zaborze.


Po łostatniyj wojnie...

Po łostatniyj wojnie w tutejszym ratuszu
Piyrszy Urzond Gminy Opolszczyzny ruszoł
Dzisioj sie dziwiymy bo opolske dalyj
Granica sprzed wojny wtedy uwożali

We Ziymi Bytomski Mikulczyce były
Choć za pora lotek z Zobrzym sie złonczyły
W piyńdziesiontym piyrszym roku to sie stało
Dyć po dziyń dzisiejszy już tako łostało.

[broneknotgeld]

"Gazeta Mikulczycka"

Dyć dziwowała sie okolica
Piyrszom gazetom we Mikulczycach
Kero wydali pryndko po wojnie
Chocioż niy było jeszcze spokojnie

We gminie rzońdzioł Gawlik Wincynty
Co go dość mocno polyły piynty
W sztyrdziestym piontym w miesioncu maju
Już ta gazeta tu wydowajom

I niy dość tego bo na zadatek
Wychodzioł do niyj jeszcze dodatek
Kery tutejszo dziatwa radowoł
Dlo nich go przeca Gawlik szykowoł

Downo już tukej gazety niy ma
Ale pamiyntać mo ło niyj ziymia
I chocioż ciynżke czasy to były
Trza ło nich wspomnieć by nabrać siyły

Do tego co przed nami terozki
Bo przeca momy zaś inksze troski
We Mikulczycach som jednak ludzie
Co wiedzom umiom i pedzom - "Pódzie".

[broneknotgeld]

Zabrzance

Kedyś przez zabrzanka
Dorobiołch sie manka
Choć niy wypominom
Jak cycek wspominom.

[broneknotgeld]

"Aleksandrine" 1788

Drugo gruba von Stechowa
Dyć niy stowioł jom łod nowa
Yno kupioł na Porymbie
Choć niy rudzko - mom jom w gymbie.

[aka-jo]

Moze byc wydal te swoje wiersze;)
po Slonsku....

[broneknotgeld]

Co po ślonsku i we rymie
forum.gazeta.pl/forum/72,2.html?f=28940&w=23022365
By wydali pryndzy w Rzymie.

[broneknotgeld]

No a w Rudzie ciyngym tako
forum.gazeta.pl/forum/72,2.html?f=261&w=28100163
Tu i Trefoń jakby płako.

[Gość: Zabrze]

Czekamy z zainteresowaniem na dalszy ciąg tej pięknej poezji.
Pozostałe miasta też są ciekawe do opisania.

[broneknotgeld]

Hmm, ze tym to jednak jest utropa.
Rymowanki ło Kaliningradzie szkryfnołch dość downo, boch czytoł ło tym mieście
we jednym ze przewodnikow i prawie mi to pasowało do wontku na forum fraszkowym.
Niystety, na miejskich zajtach ło partnerach nojczyńści jest treści tela
co "kot napłakoł". Link na strona partnera niy załatwio sprawy, chyba że tam
choć czyńść informacji byłaby tyż po polsku.
Wyglondo jednak na to, że tako forma wspołpracy jakby miastom niy łodpowiadała.
Bestoż "szary miyszkaniec" niy mo nawet możliwości dowiedzieć se czegoś wiyncy
ło miastach kamratach.

Na jakby "modelowo" wspołpraca partnersko naknołch se jednak we Kluczborku.
Tam wydali ksionżka ło tym kamracyniu. Terozki zaś jest wydowany album ło
Brzeżanach - jednym ze kamratow.
Kuknijcie se na tyn wontek
forum.gazeta.pl/forum/72,2.html?f=26289&w=46914209&a=46914209
To niy jest wcale przipodek, żech szkryfnoł tela rymowanek.
Majom wiyncy ło swojich partnerach na stronie internetowy, a do tego jeszcze
radno poprzedni kadyncji przisłała mi trocha materiałow dziynki kerym mo żech
to szkryfnońć.

[broneknotgeld]

Tako poszła piyrszo seta
Wleja drugo - na podnieta.

[broneknotgeld]

Jo arbajtom na rodzina
Przeca cera mom i syna
Tako ślubno na dokłodka
Jako "łokraść" ta czelodka?

[Gość: btr]

Ale to forum to śmietnik - nikt nie mówi tutaj racjonalnie!!!
Pozdrowienia dla nudzących się urzędników w UM.:)