Bojka s Ponszowic

[ramon6]

Bojka s Ponszowic


Kejsik, jusz dojs douwno do zadku, ale juzajs niy tak za douwno,
poszua Marika s Mauy Strony we Poniszowicach na Wszyskich Swiyntych
do Kojscioua.

Boua uona trocha za wczas, bestosz bouo jeszcze wszandy cima.
Wlazua, bes te niske dzwiyze pod hurym, uod strony dzwonnice rajn.
Best e maue uokno we szyndziouowym dachu miejsonczek swiyciou prawie
tela, ze bouo widac kaj cza isc.

We kojsciele tysz bouo jeszcze prozno, i jyno wiecznou lampka na
lewo uod oltourza trocha swiatua robioua.

„No ja“ padaua Marika do sia „ fajnie – zoudnego niyma to se poradza
siednonc blank na pszodku“, tam kaj podle normalny mszy dzieci
siedzom.

Poleku zaczli sie ludze schodzic – kouzdy do swiji lawki, na swoj
wykupiony plaz.

Kole Mariki siadua sie starou Szafarczynou. To ny bouo by nic
dziwnego, jyny narouski szczeloua Marice do gowy, ze starou
Szafarczynou jusz na podzim uonskiego rokuboua pochowanou.
Marika s Mauy Strony sie jeszcze uobrocioua, i tukej naprouwdy –
Hlida Szafarszczynou, co uodni chop na wojnie zostou kole ni
siedziaua.

Hilda sie leko usmiychua, wzona jedyn rog zoupaski uod Mariki do
ranki i urwaua ciynki pasek s zoupaski, stanoua i poszua.
Zanim Marika sie uopamiyntaua, stouli narouski jedyn za drugym pszed
niom, jak do komunii. A bou tam Paulek uod Kocura, Biynkowy Horst,
co we Francyji noga straciou, mauy Herbet Walon, kerego we wiosna
pod lodym we stouwie znoudli, Maciouszek Hajncej, kery sie miou za
cojs lepszego, Amalia Steinbruch co boua kucharkom u faroza, kerou
ale Malysz naprowdy sie zwaua i na karpiou uojsc na piyrszy fajertag
umarua, no i wiela wiela inkszych.
Kouzdy s nich urwou sie pasek s zoupaski uod Mariki i poszou.

Marika naroski uocacua i jak uopyntanou s kojscioua wyleciaua i asz
do wrut pszed placym leciaua. Tam sie uobrocioua, a zaniou niy bouo
zoudnego. Jyny na kojciele pizuo jedna.
I tukej dopiyro spokopaua uona kej uona boua we kojsciele.

Na drugi dziy, pszed porannym, wszyskym w doma pedziaua co uony sie
bes ta noc pszidazouo. Zoudyn nic niy wierzou.

Po drodze na poranne - jak wlejzli na friedhof, naros ujzeli na
kouzdym grobie te paski s zoupaski uod Mariki.

To mi moja mama uopowiadaua, a zmiynou zech jyny nazwiska i imiona,
bo uod niykerych we Ponszowicach jeszcze groby tam som.

Ramon

[ballest]

Ramon a skond te bojki mosz!?

[ramon6]

Hallo Ballest,
jou sie tak niykej starszych pytom, a jak mom glick, t zaczynajom je
wykopywac;)

[ballest]

Ramon, wiysz uo tym, ze Kochtschütz tysz nagrywou caly czas starych
ludzi, podobne jeji najlepsze kolezanki to som oumy co majo wiyncy
jak 90lot.

[szwager_z_laband]

to je wiyncyj jak nagroda Nobla za to!

[szwager_z_laband]

RAMON SUPER!!!

richik zes mie zrobiou szpas:)

widac zes je nasz synek!

moga to dac na Glywicke Slonzoki?

[ramon6]

serwus Laband,
mum uciecha s tego ze ci sie podobou.
Jou mom jeszcze poura takich bojek, "Jakto bouo jak formon s
Ponszowic smierc straciou" abo "Biouy kon na Boguszycach"
Musza sie dali stazikow wypytac, a uoni sie corosto barzi te stare
czasy pszipominajom.

[szwager_z_laband]

toszniybyc taki:), niydej sie prosic i dej to sam:)


fajne to je bo swojske:)

[ballest]

To wsodz to sam, tukej kedys nawet pisaua jedna dzioucha z Boguszyc,
ale bardzo malo (niy nie tukej, yno na Gliwicach)

[ramon6]

--Moj piyrszy cud, abo jak fliger na Jagiole sleciou.

Kaj Jagioua je to dzisiej kouzdy wiy, ale jou we 1960 zech jyny
wiedziou we jakym richtungu Jagioua musiaua byc.

Niykej, jak my sie pszi stouwie bawiyli, to se pszeciwka starou
Cichnka, co couki dziyn we fortce stoua i sie jednom rynkom
uokolnika a drugom kryki czimaua, do Barbory, kerou krowy gnaua,
wouaua: „Kaj to idziesz“ a ta jyno „na Jagioua“.

Ros, my juzajs s Vichtorym i Jozlym pszi stouwie na dzistkach uod
kaczek kiouzdali, leciaua Trudel uod Melzonow s grabioma pod pachom
i ryczaua hoby Rusy byli za niom
„ na Jagiole fliger sleciou. Jedyn sie zabiou.

My na drapko, bes tyn stouf, we kerym mono bouo wiyncy piorek i
lisci jak wody, be krowie klouty i po drodze pouny kurzu na Jagioua.

Na wartko my lecieli, asz za zandgruba i jeszcze corousto dali, asz
za uostatniou papla.

Po Gabryjsowym polu na prawo i pszed nomi stou wielki, zouty fliger,
s dwoma sksziduoma.
Jozel pedzou „Doppeldecker“- ja to musiou byc Doppeldecker, bo jako
by szuo na take cojsik inaczy pedziec?

Heinzel i Jorgel stouli jusz kole DOPPELDECKER i nous uodgoniali.
Jorgel miou we jedny swojski bicz a we drugi czimou uobie Krowy i
nom jyny goudou ze to je gyferlich i ze momy nazut ciongnonc. S
Vichtorym skryli my sie we drugym grzondki cwikle.

Teroski zech dopiyro tyn drugi flieger dojzou pod lasym. Uon bou
trocha majnszy, ale miou duksze skszidua.

Naroski tyn zouty fliger zapujsciou sie s wielkym larmym i poleku
nakrynciu sie we ta strona kaj Jagioua musiaua byc.

Pieronowe larmo sie zrobiouo, kupa kurzu i trowy i smrodu zaczuo
furgac. A Jorgel ny smouzou se krowami i musiou za niymi leciec.

Naroski – blank po leku, niy warci jak buldouk – leciou tyn wielki
we lufcie a tyn majnszy za niym na linie. Blank, blank po leku,
meter za metrym. Nojpiyrf ku Sznorraberg a potyn coros wyzij i nad
Niywieszom do nieba.

To bou piyrszy prawdziwy cud jaki jou naprowdy widziou.
A mozno bouy to dwa, bo tyn drugi fliger tysz do nieba poleciou,
choc jyny bou ciongniynty.

Ramon

Nicht der Weg ist das Schwere, sondern das Schwere ist der Weg

[szwager_z_laband]

Ramon, jo niywia wprowdzie kaj je Jagioua ale znom Melz(s)onow i
podobo mi sie ta geszichta:)

[ramon6]

Mom jeszcze jedna ciekawou s 1928 roku, ale musza jom jeszcze
poskuoudac;-)
A Jagioua zech dopiyro s bliska uobejzou jak zech bou jusz we Reichu

[szwager_z_laband]

no tosz powiydz cos wiyncyj o obu tych rzeczach:)

[ballest]

Jagielinou u nos w Plawniowitz sprzedowoua!