Fraszki i rymowanki ło Ziymi Lymborski

[broneknotgeld]

Kaszubskich to prawie niy ma
Polskich mało - tako ziymia
Dyć se znojdom rymy ślonske
Kaj dziedziny som niywonske.

[broneknotgeld]

Możno ktosik dokupluje
I tyż tako porymuje.

Lębork

[broneknotgeld]

1285

Miasto Lymbork wyrosło z tutejszy osady
Łone Białogardzie pryndko dało rady
Do dzisioj se asi swojom historyjom
Ciyngym zocne ludzie we tych murach żyjom.

[broneknotgeld]

Lewinburg 1341

Mistrz krziżacki Dytryk doł chełmińske prawa
Zamek tyz zbudowoł bo to niy zabawa.

[broneknotgeld]

Paweł Nipkow (1860-1940)

Karlus se w Lymborku rodzioł
Coś łod sia doł światu
Telewizor mu niy szkodzioł
Wert jest łon wiwatu.

[broneknotgeld]

Św. Jakub Apostoł

Jakub Lymborka patronym
Lekci z niym żyje se dzisioj
Tela jo szkryfna tyż łonym
Jarmark Jakuba zaś prziszoł!

[broneknotgeld]

Banhof - 1870

Banhof w Lymborku se stanoł
Za pruskich tu jeszcze czasow
Do Słupska jechołś tom banom
Co miała pora tyż klasow.

[broneknotgeld]

Gora Parkowo

Na ty gorce piyrwyj skazańcow wiyszali
Bestoż Szubiynicznom wszyscy tu jom zwali
Dzisioj Czartoryja to tyż jeji miano
Kokot niy zapieje tukej nigdy rano.

[broneknotgeld]

Wasserturm - 1912

Możno jest zamkym Gory Parkowy?
Niy - wieża ciściyń to ino
Dyć i latarnio - ktosik tyż powiy
Jak downe czasy wspomino.

[broneknotgeld]

Żabio fontanna

Fontanna tu majom kaj żaby rechocom
Jakeś historyje łosprowiajom nocom
Ło pszoniu Jakubka z burgemajstra cerom
Słysza te kumkanie i nerwy mie bierom.

[broneknotgeld]

Baszta Bluszczowo

Ze starych murow łona łostała
Choć bluszczym se już niy asi
Przemorz - połtora wieku bezmała
Dugo już baszty niy krasi

Dyć miano po nim ciyngym w pamiyńci
Zmazać już tego niy idzie
Zielonym liściym we gowie nyńci
I niychej zowdy tak bydzie.

[broneknotgeld]

Na Trzech Kroli

Na "Trzech Kroli" tukej jest "świynto ratusza"
Gyburstag mo przeca szkryfnońć ło tym musza
W tysionc dziewiyńćsetnym go tu postawiyli
Ze przepiyknom wieżom kerom sie asiyli.

[broneknotgeld]

Lymborsko poczta

Na bezrok klupnie poczcie sto lot
Lymbork ze tego richtig jest rod
Dziesionty grudnia - zjada na fajer
Tako rocznica to niy jest bajer.

[broneknotgeld]

"Poste Restante"

Pojeść i popić w barze se idzie
Niym tu bryftryjger z pyndzyjom przidzie
Skasujom ze niyj zaroz połowa
A co do reszty - ślubny w tym gowa.

[broneknotgeld]

Miejsko Bibliotyka Publiczno

Skiż szpyrytusu sztela stanyła
Teroz ze ksionżek biere swo siyła.