Świyńci Pańscy

[broneknotgeld]

Szukoł żech łostatnio na rudzkim forum rymowanek ło św. Barbarze, boch
łobiycoł to przesłać jednymu kapelonkowi.
Dyć se łone tam już zarchiwizowały, a przeca wontek ze świyntymi może sie
tukej richtig przidać. Tela rożnistych parafiji mo swoje gazetki do kerych
szukajom materiałow, że możno i tukej bydom w końcu zoglondać.

[broneknotgeld]

Mom tako cicho nadzieja, że możno z czasym ktosik tyż tukej dołonczy, przeca niy
musi to być we gwarze.

Św. Barbara

[broneknotgeld]

Św. Barbara

Patronka z bergmonym na tym dole była
Przed wielgim niyszczyńściym czynsto go chroniyła
Czasym jak mu wongel blysnoł mocno w łoczy
Myśloł że jom we nim choć ździybko łoboczy

Doczekoł sie w końcu łon pyndzyji swoji
Dyć teroz ło żywot ciyngiym sie zaś boji
Jak downiyj se rzyko ło trocha tyj mocy
Dlo swojyj Barborki - bo jom mo we zocy.

[broneknotgeld]

Co z Niom jest grane?

W kalyndorzu Kościoła tyj Barbary niy ma
Mondrale pedzieli - "Niy niosła jom ziymia"
Ale Kościoł polski do dzisioj jom nosi
A ło jeji wsporcie kożdy Ślonzok prosi

U nos jest Barborka jako piyrwyj była
My wiymy że ze Niyj płynie na nos siyła
Kero w ciynżki doli zowdy dopomoże
W chodniku kopalni abo i na dworze.

[broneknotgeld]

"Barbarsko" historyjo

Dzioło sie to wszysko w czasach Dioklecjana
Kery gnymbioł srogo w Syrii krześcijana
Mynczynnikow wtedy była aż za wiela
Łobrodziyła niymi cołko rzymsko sztela

Dyć dlo rzymianina modo krześcijanka
Przeca kożdo była jako ta "barbarka"
Jak fater był Dioskur - tako dioskurcyjo
To musioł wyznować ichnio religijo

Terozki z tym problym majom teologi
Kaj wsadzić Barborka niy wiedzom niybogi
Tych dziywic mynczonych było aż za wiela
W kożdyj jest ta świynto - jo powiym tu tela

Inksi łomiom gowy a mie to zochwyco
Że we Niyj ukryte jest niyjedno lico
W dodatku wygrała w końcu ta ideja
A jo krześcijanin z radości sie śmieja.

[broneknotgeld]

Nojstarsze miejsca kultu

Klasztor we Edessie już we wieku czwortym
Mioł w Niyj swo patronka i wiela był worty
Krześcijańske Kopty we starym Kairze
Kościoła łotwarli na łościyrz swe dzwiyrze
Łod siodmego wieku im patronowała
Na wyspie w islamie z nimi tukej trwała

Dyć sławno fest była Barbara we Rzymie
Tu na starym fresku znojdli Jeji imie
I w łoczy wejrzeli tyj fajnistyj frelce
Krziż mo ksionżka z pawiym i myśli coś wielce
Możno nawet ło tym że czas pryndko leci
I chnetko sie Syria Jyj pieczy poleci.

[broneknotgeld]

Barborka w średniowieczu

Średniowieczym wiela ło Niyj napisali
W kalyndorze świynte Jeji miano dali
We kodeksach starych możno ło Niyj czytać
Bo sie krześcijany mieli ło Nia pytać

W Europie relikwii Barbary zaś było
Tela że na wiyncyj frelek by starczyło
Nawet w samyj Polsce ciynżko by je zliczyć
A to dość daleko łod Jyj okolicy

U nos kult Barborki te krziżowce wsparli
Na Ślonsk joannici ze Niom sie durś garli
A choć piyrwyj znano na połnocy była
Dyć tam za krziżokow fest urosła w siyła.

[broneknotgeld]

Kutnohorsko Barborka

We Kutny Horze na czeski ziymi
Gornikow znodło sie wiela
Z Niymiec ściongnyli dyć właśnie nimi
I srebrym blysła ta sztela

Łod tych bergmonow stanoł tu kościoł
Zaś naszyj świyntyj Barbary
Doł gwarek grosza choć czynsto pościoł
Niy żol mu było ofiary.

[broneknotgeld]

Kult w średniowieczu

Łod śmierci z Bogym patronkom była
Choć pryndki ale ze wiarom
We wiekach średnich Jeji w tym siyła
Bo inkszom żyło sie miarom

Człowiek sie krotko tym swiatym cieszoł
Pryndko go ziymia chowała
A przeca jednak tyż mocno grzeszoł
Jak z Bogym pomarł to chwała

Barborka czciyli w Europie całyj
Ci co wiedzieli że kosa
Tnie rowno - wielki żeś jest czy mały
I niy zoglondo do trzosa

Bergmon co śmierci durś kukoł w łoczy
Rzduchoł kilofym jom czynsto
Mioł ta patronka mocno we zocy
I rzykoł do Niyj durś gynsto

Prziszła na Ślonzek tyż ze gwarkami
Ze Niymiec Czech i stron inkszych
Z średnoiwiecznymi kolonistami
Jyj kult tu nabroł siył wiynkszych.

[broneknotgeld]

Pod Legnicom

Pod Legnicom na polu stanyli tyż gwarki
Pod sztandarym patronki tyj świyntyj Barbarki
Legli tukej i Jego w tym była już wola
Dyć niy łoni Tatarom uciykli ze pola

Durś nad nimi wysoko Barborka kronżyła
Kery łoczy zamykoł - poznowoł Jyj siyła
Szoł ku świotłu skond świynto do niego wołała
Wiedzioł teroz że jego rzykanie słyszała.

[broneknotgeld]

Wspomożyciele

Sztyrnoście świyntych grupa liczyła
Łona na Ślonsku durś w gymbach była
Czynsto wołało sie ich pomocy
Jak te niyszczyńście zojrzało w łoczy

Błażej - tyn chroni strony głosowe
Ze bolym gordła we nim sie chowej
Pomogo czynsto naszym zymbiskom
I jak krew z rany pierońsko trysko

Jerzy - wiadomo - chroni wojoka
Łon go we bitwie niy spuszczo z łoka
Kedyś przed łostrym bronioł żelazym
Potym łod kuli - dyć wiela razy!

Akacjusz czimie ze zbiegym sztama
Pilnuje jego aże łod rana
Coby niy dropła go wredno władza
Rzykej do niego - jo ci poradza

Erazm nos wspiyro w wielki chorobie
Ło kery czasym nic niy wiy czowiek
Żołondek nyrki wontroba serce
Wszyskim sie tropi tyn świynty wielce

Wit paczy ciyngym na guchych niymych
Wiy łon co dzieje sie ze ichniymi
Padaczka miywosz czy słabe nerwy
Z Witym we życiu mosz wiyncyj werwy

Do kogo rzykać szły prziszłe matki?
Wiymy bo przeca do Małgorzatki
Łona przi cionży i przi porodzie
Bestoż jyj imie do dzisioj w modzie

Zaś świynty Krzisztof chroni wyndrowca
By nikt niy wodzioł go po manowcach
Pogoda zsyło ci jak nojlepszo
I przed powodziom z nim bydziesz spieprzoł

A Pantaleon - teroz mi powiydz
Kto dbo ło cało w zogrodzie gowiydź?
Co dziynki niymu dobrze sie chowie
I mniyj utropy mosz z tym na gowie

Cyriak w pokusie cie przipilnuje
Choć czasym trocha to niy sztimuje
Niy potrza bydzie tyż egzorcysty
Jak mu zawierzysz durś bydziesz czysty

Idzi w łopiece mo wszyske matki
Kere umynczom jejich gagatki
Namowi czasym cie do spowiedzi
Jak wiy że ciynżki grzych w duszy siedzi

Eustachy fesztrom wielkim patronym
Posłuch mo w borze łon tam jest ponym
Nawet jak zbiyrosz grziby jagody
Świynty uchroni łod złyj przigody

Dionizy czimie sie twojyj gowy
Dobry na bole kożdy ci powiy
Dropia sie teroz we własno glaca
Wiym kto pomoże mi zaś na kaca

Ja - niy trza wiela mi przipominać
Dyć jo pamiyntom że Katarzyna
Mo w swyj łopiece te wszyske frelki
A łobowionzek przeca to wielki

Na koniec powiym - naszo Barbara
Stoji przi ciebie jak żeś na marach
Byś w wierze pomar pilnuje przeca
Łona łostatnio jest z tego neca.

[broneknotgeld]

Sztyry Świynte Dziywice

Razym ze Małgośkom Kaśkom i Dorotkom
Jest naszo Barborka tom dziywicom słodkom
Co życie w modości za wiara łoddała
We cnocie jom przeca ta ziymia chowała
Mynczynnikow świyntych momy tyż doś wiela
Wspomij ich jak paczych na ta piykno frela
Tyn miecz co we rynce jeji groźnie blysko
Ło ciyrpiyniach dziołchy powiy prawie wszysko
Reszta zaś wyczytosz z murowanyj wieży
Czi łokna tam tyż som na na znak że trza wierzyć.

[broneknotgeld]

Bractwa św Barbary

W łoziymnostym wieku przi rożnych kościołach
Mnożyły sie Bractwa co miały durś wołać
Ło śmierć w bożyj łasce do świyntyj Barbary
Ło siyła by w mynce niy wyprzeć sie wiary

Ludzie dziynki tymu w kupie sie czimali
Czynsto do tyj frelki przepiyknie rzykali
W łopieca zaś mieli kaplice ołtarze
Poświyncane czynsto tyj naszyj Barbarze

Tako konfrateria poznoły Głubczyce
Rudy Strzelce Bardo inksze okolice
We Tarnowskich Gorach to samo sie dzioło
Dziynki Niyj dyć przeca bergmonom wesoło

Bo wiedzom że jednak ktoś czuwo nad niymi
Jak co dziyń fedrujom głymboko we ziymi
Krziż i Jeji imie ochroniajom szola
Czy nazod wyjadom? To już Boga wola.

[broneknotgeld]

Barborka Willmanna

W raciborski farze łobroz momy taki
Kaj jyj leży ciało ze gowom łodciyntom
A Dioskur morderca z nieba dostoł znaki
I możno jom widzi we gorze już świyntom

Bo pieron zablyszczoł jasno mu we łoku
Zesłoł go Pon Boczek za kara na niego
Barbara wysoko spoziyro z łobłoku
Na kelich bo przeca we nim jeji niebo.

[broneknotgeld]

Wrocławsko Barborka

W muzeum we Wrocku jest łobroz Barbary
Choć winiyn być w ichnim kościele
Malowoł go Willmann ze głymboki wiary
Co durś mu pod pyndzlym sie ściele

Już miecz nad tom frelkom zablysnoł łokrutnie
I fater durś paczy złowrogo
Łon przeca zarozki ta gowa jyj utnie
Barborka sie przed niym niy chowo

Bo wiary we Boga sie łona niy zaprze
Do końca niyj przeca łostanie
Ciekawe co myśli terozki ło fatrze
Czy wiy co sie ze nim tyż stanie?

[broneknotgeld]

Ech, Willmannie, Duchu Ślōnska!
Polska copła cie we kōnskach!

www.facebook.com/groups/332939560673928/posts/1147210109246865/

[broneknotgeld]

Św Barbara i Strumiyń

Małe miasto Strumiyń Ślonska Cieszyńskego
Dlo naszyj Barbary znaczynio wielkiego
Bo w piytnostym wieku jeszcze właśnie tukej
Farnego kościoła tyj dziywicy szukej

Przez lata nastympne uciyrpioł łon wiela
Protestanty nawet we nim mieli sztela
Zaś po czistu rokach stanoł kościoł nowy
Dyć kożdy ta świynto czcić tu był gotowy

Zocny frelki naszy relikwie w nim majom
I łobroz przi kerym goronco rzykajom
By wszyskich borokow durś chciała tu wspiyrać
I nigdy niy dała bez Boga umiyrać

Ciekawe że nojpiyrw flisokow chroniyła
Bo stond do Krakowa towarow szła siyła
Jak yno sie tu zaś ważniejszy stoł wongel
Bergmona pilnuje co w ścianie durś rombie.

[broneknotgeld]

Toszek

Barokowy komputer cmyntorny we Toszku
Tyż mo jom przi Ołtorzu na świyntym łobrozku
Łon przeca pod wezwaniym jest świynty Barbary
Dziywicy kero zaprzeć niy chciała sie wiary.

[broneknotgeld]

Bycina

Asi sie pałacym Paczyńskich Bycina
Hrabia go budowoł co był ze Tenczyna
Jak w kaplicy tukej dzwigniesz w gora gowa
To na kupa świyntych możesz sie dziwować

Kaśka i Barborka dwie frelki mynczone
Tyż tukej som piyknie wiernym przedstawione
Pod jeji nogami miecz fest groźnie blysko
Zoglondej na wieża - wiysz już prawie wszysko.

[broneknotgeld]

Kolanowice

Łobrozkow jest wiela na chorze w kościele
Historio Barborki we łoczy sie ściele
Tu widzisz w całości jyj życie i mynka
Siedymnostowieczno zrobiyła to rynka.

[broneknotgeld]

Tarnowskie Góry

W tutejszym kościele łod lot bractwo było
W kaplicy Barbary czynsto sie modlyło
Łona ze ołtorza na nich zoglondała
Spokojno śmierć z Bogym potym zesyłała.

[broneknotgeld]

Kamieniec Zombkowicki

W cysterskim kościele nastawa ołtorza
Wspomnieć sie tyż tukej zarozki łodwoża
Bo to arcydzieło snycerki baroku
Kaj sztyrnoście świyntych radość budzi w łoku

To czczone na Ślonsku som "wspomożyciele"
Do kerych karlusy rzykajom i frele
Barborka tu znojdziesz co czuwo przi śmierci
Byś wiary niy stracioł nawet jednyj ćwierci.

[broneknotgeld]

Bogacica koło Kluczborka

Przepiykny ołtorz we Bogacicy ze Namysłowa pochodzi
Dali go tukej jak franciszkanom Prusy zaczyły tam szkodzić
Rzeźba Barbary w nim podziwiomy - downo zrobiyła jom rynka
Z sztyrnostu świyntych wspomożycieli łona łostatnio mo mynka.

[broneknotgeld]

W dziewytnostym wieku

W dziewytnostym wieku jak rosły nom werki
Kult świynty Barbary stoł sie tukej wielki
Na grubie czy w hucie szło życie postradać
Rzykej do tyj świyntyj - Kościoł dowoł rada

Z czasym huty poszły za świyntym Florianym
Barborce podziymny świat zaś był pisany
Bergmony jom zawsze mocno mieli w zocy
Bo niy łodmowiała im swojyj pomocy

Jak łonych tyż przeca wiyńziyły jom skały
Ło życie sie boła - tyn strach był niymały
Wiy co sie na dole telepie we duszy
Niydola gornika jom zowdy poruszy.

[broneknotgeld]

Miyndzylesie

Barborka i Kaśka dwie te mynczynnice
W Miyndzylesia spotkosz kościele cmyntarnym
Ich piykne figury i urodne lice
Widzisz jak już padoł łopuszczosz tyn marny

Barbara jak zowdy miecz i kelich nosi
Przi niyj skończysz żywot godnie i we wierze
Tyla łaski przeca u Boga uprosi
Yno rzykej do niyj czynsto no i szczerze.

[broneknotgeld]

We cechowniach

We cechowniach przi jeji łobrozie klynkali
Dyć zowdy przed zjazdym tyż do niyj rzykali
Kajniykaj nabożno pieśń ciongnoł im śpiywok
A po niyj do szybu już bergmon szoł żywo

Po szychcie jak z dołu wyjechoł szczyńśliwie
Dziynkowoł Barborce w cechowni żarliwie
Szoł do dom kaj tyż sie ło niego już boli
Dziecioki i ślubno tyż przeca mu pszoli.

[broneknotgeld]

"Weneckie" łobrozy

We Wenecji jest łobroz tyj świynty Barbary
Zocnego malyrza - piyńset lot już stary
Karlusom łod harmat patronkom tam była
Tref chcioł że z tyj ziymi na Ślonsk sie wkludziyła

W myłowicki grubie Fritsch dyrektorowoł
Łon sie tym bergmonom fest tyż przipodoboł
Jak fondnoł tyn łobroz - łozdobioł cechownia
Wszyscy sie tu rzykać mogli teroz co dnia

Przepiykne te dzieło August Wolf malowoł
Dyć przeca we Włoszech sztuka sztudiyrowoł
Zrobioł go nojlepi jako wtedy umioł
Łon chyba ta świynto naprowdy zrozumioł

Z tego to łobroza kopie dalyj idom
We "Gischu" i "Murckach" nastympne nom przidom
"Bytom" i "Kleofas" gruby jeszcze inksze
Miały te Barborki myńsze abo wiynksze

Na wenecki muster piyknie malowane
I do dzisioj kajsik jeszcze zachowane
Klynkomy tyż dzisioj przed świyntym łobrozym
Czowiek czynsto słaby choć Pon Bog go stworzył.

[broneknotgeld]

Pnioki

Dzisioj we Chorzowie downiyj jednak gmina
Jeji godło zowdy werci sie wspominać
Bo świynto Barbara na nim przeca była
Takom sie patronkom ta ziymia asiyła.

[broneknotgeld]

Kościoł św Barbary w Chorzowie

W dziewiytnostym wieku - we jego połowie
Parafio Barbary powstała w Chorzowie
Dyć Krolewskom Hutom wtedy nazywali
Miejscowość kaj kościoł piykny zbudowali

Poświyńcioł świontynia ksiondz Alojzy Ficek
Chropaczow Lipiny i Swiyntochłowice
Hajduki Szarlociniec Pnioki Łagewniki
We jednyj parafii teroz katoliki

Wszyscy tu rzykali do świynty Barbary
Choć z czasym ciasnota niy miała już miary
Pryndko wiyncyj ludzi na tyj ziymi było
Bestoż sie kościołow potym namnożyło.

[broneknotgeld]

• Re: 5 lot
broneknotgeld 28.09.2003 23:18 + odpowiedz

Joch to pisoł skiż rocznicy łopieki nad Rudom
Za miesionce dwa bergmony do kościoła pódom
Możno wtedy sie przidadzom rymy ło tyj Basi
Ruda tukej se je znojdzie by sie nimi asić
Jakby tyż to mieli w zocy we inkszych dziedzinach
Śmioć sie bydom moje łoczy - weselszo mom mina.

[broneknotgeld]

Re: 5 lot
broneknotgeld 03.10.2003 19:07 + odpowiedz

Piyńć lot

Dyć piyńć lot już my som u Barborki w zocy
Ale cosik mało z tego momy mocy
Niy pomoże dzisioj klynkanie w kościele
Trza "machać hercowom" - tworzyć nasze sztele.

[broneknotgeld]

5 lot
broneknotgeld 24.09.2003 23:36 + odpowiedz

Piyńć lot nad nami tukej czuwała
Trza by ta Ruda durś w zocy miała.

[broneknotgeld]

4 grudnia

Wielke świynto na grubie to było
We cechowni sie rzykać zaczyło
Potym śleper ze sztajgrym we zgodzie
Do kościoła szli w gryfnym pochodzie

Przodym piyknie łorkestra zagrała
We mundurach dyć maszerowała
Za niom poczty taszczyły sztandary
Dalyj reszta bergmoński szła wiary

A w kościele mioł farorz kozanie
Ło gorniczym durś godoł łon stanie
Niyjednymu naciepoł w te uszy
By Barborka mioł zowdy we duszy

Po mszy wszyscy na gruba wrocali
Teroz tukej se zafajrowali
Nowych gwarkow przijyli do wiary
Jak łobyczoj nakozoł im stary

Richtig fajer to był po niyszporach
Piwo loli do kufli w ta pora
Mode ślepry tyż czynsto stowiali
I niy wszyscy do nocy szczimali.

[broneknotgeld]

Czas do Barborki drapko przeleci
forum.gazeta.pl/forum/72,2.html?f=28940&w=24396333&a=31353299
Już se tu tako cosik tyż kleci.

[broneknotgeld]

Barborka w Ornontowicach

Zowdy przi GOKu sie zebiyrajom
Tyż familije ze bergmonami
Procesjom idom grajom śpiywajom
-Dyć do kościoła kery dzwonami
Na mszo niy yno w Barborka woło
Choć we gornicze radosne świynto
We parafiji richtig wesoło
Toż i niyjedyn se zapamiynto
-Kozanie kere farorz wygłosi
-Prośby patronki ło jyj opieka
Po mszy GOK do sia tako zaprosi
Toż niy dowejcie na siebie czekać
Z "Budrykym" przeca akadymijo
Ciynżki roboty podziynkowanie
Ano szczimiymy bo niy mecyjo
Jak z biyrym potym tyż świyntowanie

[broneknotgeld]

Barborko

Ech Barborko frelko świynto
Tyś przi śmierci jejich była
Za nich wszyskich - teroz wiym to
U Ponboczka se wstawiyłaś

Gruba życie im zabrała
Jako w piekle gorkość tako
Na pociecha Tyś łostała
Dyć se niy dziw - czowiek płako

Bo kto żyje tyn siyrotom
Jak łodyńdzie bliźni jego
Śmierć niy może być nom cnotom
Chocioż kożdy dozno tego

Ech Barborko richtig zocno
Tyś patronkom końca z Bogym
Choć rzykomy teroz mocno
W życie niychej wiedom nogi.

[broneknotgeld]

Ech Barborko - byłaś z niymi
We ty chwili co na ziymi
Już łostatniom dlo bergmona
-Na "tysioncu" prziszło konać.

[broneknotgeld]

Porzykomy dyć do Ciebie
Bo powiedziesz do tych w Niebie.

[madohora]

broneknotgeld napisał:

> Porzykomy dyć do Ciebie
> Bo powiedziesz do tych w Niebie.


Już jak trzeba składam dłonie
I pomodlę się też do niej.

[broneknotgeld]

Możno wyna ze tym przidzie
Wiersz na konkurs tako bydzie
forum.gazeta.pl/forum/72,2.html?f=28940&w=31702301

[madohora]

broneknotgeld napisał:

> Możno wyna ze tym przidzie
> Wiersz na konkurs tako bydzie
> forum.gazeta.pl/forum/72,2.html?f=28940&w=31702301

Wyna mie już trocha tropi
Może mi sie co spokopi
Bo jak wyjyżdżom z Nikisza
To coś w autobusie pisza
Może z tego coś poskłodom
I na konkurs zaroz dowom.

[madohora]

broneknotgeld napisał:

> Możno wyna ze tym przidzie
> Wiersz na konkurs tako bydzie
> forum.gazeta.pl/forum/72,2.html?f=28940&w=31702301

A pisza to w autobusach
Bo rym doszlifować musza

[broneknotgeld]

Tyż coś w busie szrajbna czasym
Rym se trzimie ponoć sztrasy.

[broneknotgeld]

Drapko świynto Jeji przidzie
Zaś Barborka z nami bydzie.

[broneknotgeld]

Czy przi mnie staniesz?

Czy przi mnie staniesz jak bydzie trzeba?
Strach i ciyrpiynie z Tobom lżyj znosić
Czy moja dusza pódzie do Nieba?
Miyj we łopiece - chca ło to prosić

Godziwy koniec - Tyś mu patronkom
Pamiyntej - przeca byda umiyroł
Pióro we tincie terozki tonkom
Żech na Barborka darmo zaziyroł?

[broneknotgeld]

Barboreczka chnetko przidzie
Co patronkom w wielki biydzie.

[broneknotgeld]

Ech - na dworze bioło momy
Mroz kajś kogoś może skosi
Bo Barborki porzykomy
Niychej szczyńścio tyż uprosi.

[broneknotgeld]

Gratulacyje dlo laureatow konkursu "Barborkowe Strofy"!

Na laureatow tam kładź swoj blik
nk.pl/profile/3128084/gallery/album/16/427
Przeklejić styknie czy zrobić klik.

[broneknotgeld]

Bronisław Wątroba napisał(a):
Finał VII Konkursu Barborkowy Poezyje - 31.01.2012

nk.pl/#profile/12830066/gallery/album/5/452

Janina Szołtysek – głowna nagroda
Marek Wacław Judycki – wyrożniynie I stopnia
Regina Sobik – wyrożniynie I stopnia
Urszula Pilny – wyrożniynie II stopnia
Ryszard Grzesica – wyrożniynie II stopnia

Gratuluja laureatom i dziynkuja wszyskim kierzy na tyn konkurs przisłali swoje wiersze.

wiadomoscirudzkie.pl/aktualnosci/zobacz/150

[broneknotgeld]

Barbōrkowo choinka

Na Ślōnzek ze NIymiec choinka trefiła
Dyć coś Frankōnijo przed nami ukryła
Mono prawie richtig tako wpiyrw być miało
We kōńcu sie przeca to cołkym wydało

Wiycie, w tamtych strōnach niy łod dzisioj prawiōm
Ło drzewku Barbōrki – dzieciokōm to jawiōm
Iże Jyj tyn gojik – niy trza tymu dziwać
Tako posłuchajcie, coby gowom kiwać

Ano, Djoskur srogi cera wiyńziōł w celi
Tōż roz citła jymu – w Niebie tako chcieli
Znodli jōm bergmōny, do sztolni zabrali
Przed łojcym łoprawcōm głymboko schowali

Dugo w ćmoku gruby freliczka strzimała
Dyć na podzim prawie już fest słabowała
Trza było Jyj słōnka i luftu świyżego
Tōż na wierch wyniyśli, niy chcieli nic złego

Na nic jednak wtedy zdało Jyj ukrycie
W chałupie dosiyngły sługi łojca – wiycie
Drapko Jōm przez łogrōd ku baszcie prowadzōm
Do heresztu ciōngnōm, to niy jest paradōm

Kej szli wele drzewa pierōnym zawioło
Wiater frelki włosy łokryńciōł we koło
Zaplōntoł we asty już sage, suchawe
Straż ciōngnie dyć mocno, we celi chnet prawie

Już rygle zawarte, Barbōrka stropiōno
Sie zdało Jyj – wartko terozki tu skōno
Dyć astka z włosami – jōm rynkōm siyngnyła
Czy ze tym nadzieja na powrōt wrōciyła?

Z gałōnzkōm bez liścio, gałōnzkōm suchutkōm
Jako znakym wiary łodpōr dowo smutkōm
Do bōncloka kładzie, sie wodōm z niōm dzieli
Tako Jyj listopad zleci we ty celi

Aże dni grudniowe piyrsze w kōńcu przodōm
Astka kryje liściym! Czy kōniec ze biydōm?
Niy, choć hereszt w kōńcu przed Istnōm łotwiyro
Śmierć w durś gryfie łoczy freliczki zaziyro

Wziyna, wziyna astka na łostatnio drōga
Ciynżko mieć we łojcu nojwiynkszego wroga
Ulży choć ździybeczko Jyj astka zielōno
Wiy – ze mianym Krysta wartko teroz skōno

A wy sie dowiycie co dali z tym stało
Bergmōna trefiła – we łoczach mioł żałość
Tōż żywo gałōnzka jymu darowała
Łopiekuna we niym przeca rozpoznała

Tyn istny niy czekoł, niy widzioł Jyj kōńca
Astka mu sie zdała jako prōmyk słōńca
Wziōn do dōm, z dzieckami codziennie jyj dziwoł
A kej żałość brała płaczkami podlywoł

Niym trzi tydnie przeszły, z Wilijōm wesoło
Gojik kwiyciym łokrył! Sie dopiero dzioło!
Radzi dubeltowo! Gody idōm przeca!
Gojik Barbōrkowy tyż ze tego neca!

Ano, niy dziwejcie, kej już teroz wiycie
Chocioż śmierć nos czeko, durś wygrywo życie
Ny darmo bergmōny czczōm świynto Barbōrka
Kej przi ciebie stanie „fedrujesz” pod gōrka
Niy darmo we dōma choinka strojicie
Barbōrkowe drzewko tyż łokryło kwiycie.

[broneknotgeld]

Za tych co fedrujom
Dzisioj niych radujom.

Prost!

[broneknotgeld]

Już je dziedzictwym w naszy dziedzinie
Chwała jyj tukej niych niy przeminie.

[broneknotgeld]

Glϋck auf!

Barbōrko, patrōnko knurowski dziedziny
Patrōnko bergmōnōw ô kerych tyż bojisz
Żeś z nami na zowdy, we sercach durś driny
Glϋck auf! -W naszych duszach przeca tako stoji

Do Ciebie w cechowni my zowdy rzykali
Kaj ze mozaiki Tyś na nos blikała
My z Tobōm we szoli na tyn dōł zjyżdżali
Przeca żeś durś za nos u Boga wstowiała

Niyleko robota, niy je łōnkōm ściana
Choć słōnka niy widać, wōngel gorki bywo
Tōż niyroz wzywali my Twojego miana
Glϋck auf – szola w gōra – jazda nich szczyńśliwo

Stropiynie za nami, familijo czeko
Dzisioj zaś po szychcie nos gruba puściyła
Tyś uwachowała, byłaś niedaleko
Tyś nos mantlym swojim ôd zła ôdgrodziyła

Tōż nōm patrōnujesz, tako być musiało
Sztympel na tym nawet Watykan położōł
Przeca tukej wszystkim richtig tego chciało
Zdo iże z tym Knurōw jakby bardzi ożōł

Kukosz na nos z wiyrchu, turm szachy we chmurach
Choć kejsik we turmie żeś ôjca czekała
Kukosz na dziedzina, kukosz tyż we dziura
Coby kajś we rzōmpiu śmierć niy cichtowała

Glϋck auf! -Dzisioj czyńści sie słyszy – Szczyńść Boże
Dziwać niy trza tymu, choć piyrwyj inaczy
Dyć miyj nos w ôpiece, kej chcesz i kej możesz
Niych zło nos ômijo, niych na nos niy patrzy.

[broneknotgeld]

Coś ło Barborce nado sie prawie
Ano, żech kuknoł tu we ty sprawie.

[broneknotgeld]

Ta świynto tyż łoncza z Rudom
Bestoż rymy ło niyj tu dom.

[broneknotgeld]

"Otylijo"

Otylijo znom z Fryncity
Miano zocny mo kobiyty
Dyć została w końcu świyntom
Szkryflom tela co pamiyntom

Jak sie diukowi cera zrodziyła
To cołkym ślepo podobno była
Muter jom siostrze zakonny dała
Podobno życie jyj ratowała

W zakonie pryndko dziołszka łokszciyli
Świynconom wodom światło wrociyli
Piykno pobożno frela z niyj rosła
W końcu do fatra jednak tyż poszła

Dyć tyn Etichon - take mioł miano
Chcioł coby cera była wydano
Otylio Bogu zaś serce dała
Przed wolom łojca już uciykała

Cudym mu uszła - był znak łod Boga
W skale schroniyła sie ta niyboga
Fater nic na to niy mog poradzić
W końcu przestało już mu to wadzić

Zamek Hohenburg nawet jyj doł
Bo przeca jednak tyj frelce pszoł
Łona zaś klasztor tam założyła
W niym przeoryszom do śmierci była

Dzisioj patronkom jest Alzacyji
Co w europejski ty familiji
Francja i Niymcy miały we zocy
Region zaś szukoł u niyj pomocy.

Św. Walynty

[broneknotgeld]

Świynty Walynty

Biskupym rzymskim we czecim wieku
Życie utracioł toz wiydz czowieku
Co za cysorza Klaudiusza Gota
Z krześcijanami tako "robota"

Kościoł świyntego mo mynczynnika
Nom zaś do Niego łopszonie rzykać
Bo go Angliki patronym majom
Tych co se richtig pierońsko pszajom

Choć zdo sie co łon w reszcie Europy
Chroni łod gowy ciynżki utropy
Z kerom niyrichtig jest czowiek przeca
No i padaczka tyż z Jego neca.

[broneknotgeld]

Kult świyntego Walyntego

Wziyła z Anglyji go Hameryka
Stamtond zaś prziszoł se do Europy
Trza nom terozki do Niego rzykać
Ło to co ciongnie baby i chopy.

[broneknotgeld]

Św. Walynty

Za Klaudiusza Gota tyn biskup stracony
Mosz głowa niyrichtig - twojim jest patronym
I lipling ze lipstom do Niego rzykajom
Zowdy we tym czasie jak se wiela pszajom.

[broneknotgeld]

Świynty Walynty

Biskupym rzymskim we trzecim wieku
Życie utraciōł toż wiydz czowieku
Co za cysorza Klaudiusza Gota
Z krześcijanami tako "robota"

Kościōł świyntego mo mynczynnika
Nōm zaś do Niego ô pszonie rzykać
Kej go Angliki patrōnym majōm
Tych co sie richtig pierōńsko pszajōm

Choć zdo sie co łōn w reszcie Europy
Chrōni ôd gowy ciynżki utropy
Z kerōm niyrichtig jest czowiek przeca
Nō i padaczka tyż z Jego neca.

[broneknotgeld]

Wszyskich Świyntych za piyńć dni
Trza porzykać - kożdy wiy!

[broneknotgeld]

Ano - prziszło co być miało
Wspomnieć świyntych nom zachciało.

Św. Jadwiga

[broneknotgeld]

Toż naszom świyntom żyje Trzebnica
www.trzebnica.pl/index.php?option=com_content&task=view&id=143&Itemid=132
I cołko ślonsko tyż okolica.

Św. Brygida

[broneknotgeld]

Świynto Brygida (1300-1373) - cera Birgera Perssona

"Prawo Upplandu" fater łopisoł
Cera widzynia zaś miała
Dyć jyj we głowie nikt niy namiyszoł
Ślubnego drapko dostała

Bo jak jyj klupło rokow trzonoście
Już za karlusa wydano
Łosmiorga dzieci matkom - toż proście
Jom ło potomstwo co rano

Dyć chop jyj pomarł - wdowom łostała
Dali juz zyje w świyntości
Na nic jyj przeca pociechy ciała
Ponboczek w duszy durś gości.

[broneknotgeld]

Łobjawiynia świynty Brygidy

Toż łopuszczały Brygida siyły
Dyć przez to rosła juj dusza
Czy se Ponboczka myśli w tym kryły?
Dzisioj już pytać niy musza

Co łobjawione Isny łostało
To w końcu prziszło naprowdy
Cudym potomnym se wydowało
Skiż tego świyntom na zowdy.

[broneknotgeld]

Świynto Brygida - Rzym +1373+

Ze Ziymi Świynty we "Wieczne Miasto"
Niywiasta naszo w koncu se wroco
Dzisioj już wiymy - wypełnioł czas to
Coś niyziymskego życie Jyj skroco.

[broneknotgeld]

Świynto Brygida a Krziżaki

Toż w łobjawiyniach tako widziała
Co ich potynga cołkym zmalała
Jagiełło we to richtig uwierzoł
Choć Zakon jeszcze wojna z niym przeżoł.

Św. Jan Nepomucen

[broneknotgeld]

Na św. Jana Nepomuka

Patron Halymby - tako już wiycie
Lekci terozki leci nom życie

[broneknotgeld]

19.V.2007 Halymba

Farorz festyn przirychtowoł
Se raduje parafijo
Aż Nepomuk fest dziwowoł
To już przeca tradycyjo.

[broneknotgeld]

Parafialny festyn latoś

Gryfnie słonko zablyszczało
Z Nypomukym yako chciało
Farorz Drozd se rozświyrgolił
Wedle boski wszysko woli.

[broneknotgeld]

Na Halymbie

Fajer w maju
rudaslaska.com.pl/i,rudzkie-nepomuki,100,864976.html
Dyć niy bajom.

[broneknotgeld]

Ło halymbskim Nepomuku

Stanoł na krojcoku, zdo sie co durś słucho
Przi Niymu roz larmo, roz cicho aż głucho
Stoji na krojcoku - Halymby wachuje
Pewnikym farorza tako tym raduje

Stoji na krojcoku, chroni łod powodzi
Som żech jom uwidzioł - złe tyż Kłodka rodzi
Stoji na krojcoku, na wiek wiekow amyn
Halymba, Kuźnica z Kłodnicom cuzamyn
Rzykajom przi Niymu - bierom z wiary siyły
Kere ze nadziejom som w duszach, durś były

Toż niych ciyngym stoji i rzeki wachuje
A kej złe uwidzi zwonym alarmuje
Zwonym na niyszczyńście - dyć karlusy, frele
I taki znojdziecie w halymbskim kościele.

Świynty Patryk

[broneknotgeld]

Niywolnik świyntym

Niywolnik z Waliji
Tukej łodsprzedany
Tako w Irlandyji
Umynczoł se z panym

Uciyk w świat daleki
Francjo Italyjo
Gory lasy rzeki
Wander niy mecyjo

Dyć na ściyżkach swojich
Durś spotykoł Boga
Bestoż se niy chwoli
Postawić zaś noga
W irlandzki dziedzinie
Krziż tu wszyskim niesie
Co łon do - niy minie
Toż szkryfnońć to chce sie

Trza po ślonsku chwolić
Świyntego Patryka
Cud to jego woli
Zaczyli tu rzykać.
www.dziennikzachodni.pl/artykul/784594,lucyna-nenow-na-tropach-swietego-patryka-spencer-pub-i,id,t.html

[broneknotgeld]

Korekta - wyboczom.

Durś spotykoł Boga
Bestoż se niy boji

[broneknotgeld]

Niywolnik świyntym

Niywolnik z Waliji
Tukej łodsprzedany
Tako w Irlandyji
Umynczoł se z panym

Uciyk w świat daleki
Francjo Italyjo
Gory lasy rzeki
Wander niy mecyjo

Dyć na ściyżkach swojich
Durś spotykoł Boga
Bestoż se niy boji
Postawić zaś noga
W irlandzki dziedzinie
Krziż tu wszyskim niesie
Co łon do - niy minie
Toż szkryfnońć to chce sie

Trza po ślonsku chwolić
Świyntego Patryka
Cud to jego woli
Zaczyli tu rzykać.

Św. Wojciech

[broneknotgeld]

Ze Drogi Świyntego Wojciecha

"Camino Grande" mi przipomino
Ze Gniezna, Pragi, Aachyn zaczyno?
Kaj Adalberta aszom gowami
Niy - spokopicie pewnikiym sami
Iże sztartuje we Radzionkowie
Już świyntobliwy za życio czowiek
Biskupym praskim nojsompiyrw przeca
Pastorał trzimoł - Ślonsk z Jego neca.
www.radzionkow.pl/2-aktualnosci/321-wystawa-gdy-wszyscy-swieci-ida-do-miasta

[broneknotgeld]

Na Wszyskich Świyntych kuknie tam ktosik?
Pomiyndzy niymi tyn biskup praski
Wspomnioł przi tymu mi "wdowi grosik"
Dzisioj Go Polska prosi ło łaski.

www.facebook.com/media/set/?set=a.894597097256224.1073741952.427827820599823&type=3

[broneknotgeld]

Łod Radzionkowa pont przirychtuje?
W miejsca, kościoły - tym uraduje?
Som sie wybiyrom już Jego śladym
Radzionkow piyrszy we tym - bez zwady.

www.facebook.com/AsocjacjaMBP18/photos/a.894597097256224.1073741952.427827820599823/894597800589487/?type=3&theater

[broneknotgeld]

Ze Drogi Świyntego Wojciecha?

Szlaku w Polsce jeszcze niy ma?
Styknie blyńdzić tam kaj cima?

forum.gazeta.pl/forum/w,28940,159088554,159088554,Ze_Drogi_Swiyntego_Wojciecha.html

[broneknotgeld]

Ze Świyntym Wojciechym we herbie

Sztele poznocie - w herbie Go majom
Dyć Adalberta - przeca niy bajom.

forum.gazeta.pl/forum/w,28940,159088554,159088554,Ze_Drogi_Swiyntego_Wojciecha.html

[broneknotgeld]

Ze "Drogi Świyntego Wojciecha"

Ano - je z tego uciecha
Kej na szlaku łod Wojciecha
Sie wspiyrajom tako gminy
Siyła we nich zdo być driny
Siyła ducha? Siyła wiary?
Jo w nia wierza choć żech stary.

www.mucharz.pl/index.php/aktualnosci/398-gdy-wszyscy-swieci-ida-do-miasta.html

[broneknotgeld]

Herb Muchorza

Krziż w herbie Muchorza - tymu niy dziwocie
Dyć przed princym Polan krziż już tukej znocie
Świynty Adalbercie - mosz wiosło z dzidami
Żeś ciyngym pomiyndzy jest mynczynnikami
Gryf Cie niy szteruje - znakym norbertynek
Choć zdo conikerym jak w Skawie harynek.

www.mucharz.pl/index.php/aktualnosci/398-gdy-wszyscy-swieci-ida-do-miasta.html

[broneknotgeld]

Adalbertowi Cidry durś pszajom
Tyż na wystawie istnego majom
Kej Wszyskich Świyntych
Niy szukej piynty
We "Karolince" Wojciech - niy bajom.

www.facebook.com/AsocjacjaMBP18/photos/pb.427827820599823.-2207520000.1445724504./894597847256149/?type=3&theater

[broneknotgeld]

Dziewiyńć sztelow Wojciechowych
Dziewiyńć - tako tyż herbowych
Wiyncyj znocie?
Cynk mi docie?
Som mom szukać dziedzin nowych?

forum.gazeta.pl/forum/w,28940,159088554,159088554,Ze_Drogi_Swiyntego_Wojciecha.html

[broneknotgeld]

Gniezno

Choć Gniezno prawi -"W herbie Go niy mom"
Na polski "drodze" być przeca musi
Tyż pofolguja przi tymu rymom
Kej wyna yno ku tymu skusi.

forum.gazeta.pl/forum/w,28940,159088554,159088554,Ze_Drogi_Swiyntego_Wojciecha.html

[broneknotgeld]

Gnieźniyńsko Katedra

Kościoł co tu stanoł piyrszy
Już se przeca stol nojwyrszy
Z niego ta katedra była
Dyć se pryndko wypolyła

Chrobry nowo zaroz stowioł
Łon na darmo niy zabowioł
Ło koronie myśloł przeca
Tu jom wzioł do swego neca

Czechy kościoł zaś zniszczyli
Za Ślonsk tako se pomściyli
Trza Śmiałego czekać było
By łod nowa coś ruszyło

Stanyła już po roz czeci
Dyć sie pożar pryndko nieci
I Hermana teroz gowa
W tym by stowiać jom łod nowa

Jakoś Władek se poradzioł
Z Bogym ło to niy powadzioł
Styl romański - nawy czi
Kościoł stanoł - to sie wiy

Świontyni fundamynt cały
I dźwiyrza co sie łostały
Wpisali potym we gotyk
Piyńć kościołow - huk roboty

[broneknotgeld]

Mucharz - gmina

Gmina świyntowojciechowo
Tako mi sie niy wydowo.

Św. Wawrzyniec

[broneknotgeld]

Świynty Wawrzyńcu

Świynty Wawrzyńcu – Iberio ślimto
Żeś tam rodzōny – jo przeca wiym to
Poszołś do Pyjtra dyć po Sykstusie
Via Tiburtina wspōminōm tu sie

Rzym dlo Cia rusztym, śmierciōm w gorkości
Zdało co Graala trzimiesz we gorści
Dobra żeś rozdoł miyndzy ubogich
Psinco mioł z tego Walerian srogi

Bicze żeś strzimoł i przipiykanie
Kaj grōb Twój z czasym świōntynio stanie
Djakōnie z kratōm, z palmōm, ze tasiōm
Do dzisioj zdosz być nadziejōm naszōm

Czczōm Cie sztudynty, czczōm Cie szkolorze
Czczom tyż kuchorze, no i piekorze
I bibljotykorz, i biydok zowdy
I wiela inszych tyż czci – naprowdy.

www.facebook.com/pg/AsocjacjaMBP18/photos/?tab=album&album_id=1974820182567238

[broneknotgeld]

Mono na banhofie Barborka przidarzy
Stacjo-Bibljotyka, a mi tako marzy
Ło świynty Laurynty społym z Katarzynom!
Czy grzysza, czy rymy ze prowdom łominom?

www.facebook.com/groups/332939560673928/permalink/474448663189683/