"Ślonzok fikcjom" - tragikomedyjo.

[broneknotgeld]

"Ślonzok fikcjom" - tragikomedyjo.

Roztomajcie we realu richtig ło tym prawiom
Jedni widzom go Polokym, inksi Niymcym jawiom
Dwie nacyje dlo Ślonzoka mustrym tu być miały
Dyć po prowdzie, richtig łobie za gorszego miały

Ano - było, jest - czy bydzie? -Leci historyjo
Dyć jo szkryfnońć chca wom prawie z Neta komedyjo
Jak roz istny Bolek Broda - pewnikym go znocie
"Fikcjom" łostoł w "naszy-klasie" - wcale niy skiż pociech

Czy kajś zgobioł? -Czy uciyrpioł skiż kunsztu ślonskego?
Boł za wiela wrazidlaty? -Trzimoł sie swojego
"Fikcjo" zdo sie jako sztrofa dlo obywatela
Stalking z tego już zaziyro? -Możno chnetko tela.

[broneknotgeld]

Sztuka na piontka

Piontka postaci w sztuce poznocie
Piyńć palcow tako u ryncow mocie
Bolek ze Hyjdlom forum zbudujom
Ignac z Hajnelym tymu dziwujom
Bydzie tyż Admin - szycha we Necie
Tela wystyknie - wiyncy niy checie.

[broneknotgeld]

Materiały źrodłowe:
nk.pl/#forum/17/977/63
nk.pl/#forum/17/977/64

[broneknotgeld]

Admin

Szycha we Necie - w portalu władza
Toż niy na darmo go tukej wsadza
Dość wiela może - czy robi wiela?
Dyć łodpowiado za swoja sztela

Duchym portalu jakby sie zdowo
Kej łon niyherski czy rośnie zdrowo?
Ech, łod Admina wiela zoleży
Tymu naprowdy możecie wierzyć.

[broneknotgeld]

Bolek

Klasowicz prawie we tym portalu
Kery społecznościowym sie miyni
Niy medykuje ło jakimś "Graalu"
Bo przeca twardo łazi po ziymi

Szkryflo na forach, "profil" buduje
Wolontariuszy staro podźwigać
I ślonsko godka tako promuje
Jako poradzi - niy chce w tym migać.

[broneknotgeld]

Hajnel

Istny durś kuko na ślonske fora
Czegosik szuko tam niy łod wczora
Kajniykaj szkryflo sie po naszymu
Poradzi piyknie dać coś do rymu

Po prowdzie jednak - woli dziwować
Niż cołko dusza czymuś łoddować
Gafto ze bliska, niy ze daleka
Zdo sie na cosik jakby durś czekać.

[broneknotgeld]

Hyjdla

A dyć, ślonsko frela - gorko jeji dusza
Chciałaby w portalu niyjednego ruszać
Coby pomog ciongnońć wszystko w strona zocno
Łona za tym stować zowdy bydzie mocno

Ktoś dobrym chce dzielić - wspiyrać we tym bydzie
Choć leko z tym niy ma, roztomajcie idzie
Hyjdla sie niy poddo nawet jak fest tropi
Kto mo ślonsko dusza pewno jom spokopi.

[broneknotgeld]

Ignac

Chce coś zrychtować na ślonskim forum
Mo nawet "fanklub" echt-romantyczny
Dyć sie niy widzi mu kyns humoru
W gowie durś jakiś muster liryczny

Lipsty łon ciyngym w portalu szuko?
Zdo sie tym kilać niyjedna frela?
Czy richtig za "M" kajniykaj kuko?
Keroś sie doczko ze niym wesela?

[broneknotgeld]

Wstymp - na łobroz to za mało
Dyć se tako zaczynało
Trefioł koncept do Admina
Czy mo forum cosik z kina?

[broneknotgeld]

Szanowna Administracjo

For w Waszym portalu jest naprawdę wiele
W różnorodnych działach są poukładane
Chcę jedno założyć - na to się ośmielę
Czy sukces odniesie? -Może będzie dane

Widać w "naszej-klasie" fora konkursowe
Właśnie takie prawie po głowie mej chodzi
Może założycie kategorie nowe
na konkurs, plebiscyt co zabawę rodzi?

[broneknotgeld]

Szanowny Panie

Kategorii nowych się nie przewiduje
Założyć Pan może forum konkursowe
Radzę wybrać "Inne" - to pewnie spasuje
Ciągle się tam tworzą fora całkiem nowe.

[broneknotgeld]

Szanowny Adminie

Dzięki za odpowiedź - forum więc otworzę
Aby promowało tych co dobrem dzielą
W rozkręcenie tego nieco trudu włożę
Posty śląskim rymem tam wątki zaścielą.

[broneknotgeld]

Łobroz piyrszy - w kerym forum
Mo coś z fraszki, ze humoru
Dyć rozkulać tako musi
Rym konceptu niy zadusi.

[broneknotgeld]

Bolek

Roztomili - forum nowe
We portalu kery rośnie
Kuknie tu niyjedyn czowiek
Szkryfnie Ślonzok coś radośnie

Sztela mo nagrodzie służyć
Jako tym co dobro niesom
Bliźnim nawet we czas burzy
Zocne dusze jejich cieszom

Roztomili - toż wspiyrejcie
Ta ideja, tako forum
Posty swoje tu dowejcie
Trza radości i humoru

Dziynki wom niychej rozkwitnie
To co ślonske, to co nasze
Co złe niychej kajsik citnie
Forum biercie jako wasze

[broneknotgeld]

Hyjdla

Bolek - zocno to ideja
Trza nagrodzać dobrodzieja
Mieć go w zocy zowdy trzeba
Jako tyn pecynek chleba.

[broneknotgeld]

Bolek

Hyjdla - ciynżko to rozkulać
Jo niy byda ło tym fulać
Dyć jest fraszka - poradzymy
Forum blyśnie ślonskim rymym
Możno styknie promocyji
Kunszt we ślonski komedyji
Jo sie ło to prawie starom
Ślonski rym jest dlo mie miarom
Na nic colsztok z myjtermasym
Fraszka wsparciym w take czasy.

[broneknotgeld]

Hyjdla

Oby ze tym sie udało
Forum bydzie radowało
Przidom inksi - swoje dadzom
Z godkom tukej poparadzom
Jo to byda mocno wspiyrać
I na wontki durś zaziyrać.

[broneknotgeld]

Bolek

Wiysz - tyn portal zdo sie cudym
Niy ma we niym wcale nudy
Znod żech z podstawowki klasa
W średni niy grom za mamlasa
Som założoł żech tam swoja
Przidom inksi - sie niy boja
Tref tyż piyrszy już za nami
We realu z kamratami.

[broneknotgeld]

Hyjdla

Niych ci dali tako leci
No i coś przi tymu kleci.

[broneknotgeld]

Bolek

Dziynki - swoje robić byda
Zocne chyńci to niy biyda
A kej wsparcio inkszych styknie
To poleci nom tu piyknie.

[broneknotgeld]

Hajnel

Bolek - tyż na forum kukom
Możno mało tu nablukom
Dyć kontmanow w tym przibywo
-A mie tyn twoj "profil" dziwo.

[broneknotgeld]

Bolek

Hajnel - "profil" sie rozwijo
Przez "znajomych" - kryjolyjo!
Brify śla - na forum prosza
Ślonskom godkom tako głosza
-Szykujymy coś zocnego!
Tych "znajomych" mom skiż tego
Że choć mało tu szkryflajom
Na swoj "profil" zaproszajom.

[broneknotgeld]

[broneknotgeld]

Bolek

Mom we zocy kunszt Tigrana
Ze niym wszyndy zowdy stana
Zdo ci sie co tako broja?
-Dyć karykatura moja

Tak czy siak mie poznowajom
Uwierz - wcale jo niy bajom.

[broneknotgeld]

Hajnel

Kej tak prawisz, kej to jawisz
Niy dziw że tom fraszkom bawisz.

[broneknotgeld]

Hyjdla

Bolek - koncept w tym ciekawy
Tako przeca kyns zabawy.

[broneknotgeld]

Bolek

Uwiyrz Hyjdla - w dziyń dzisiejszy
Niy wiym kej żech jest gryfniejszy
Czy we zdrzadło kukom z rana?
Czy na kryska łod Tigrana?

[broneknotgeld]

Hyjdla

Toż niy yno fraszkom bawisz
Tym nikerych tyż ciekawisz.

[broneknotgeld]

Bolek

Niy ma w tym nic ciekawego
Łotworz "google" - wciep do tego
Czy gryfniejszy Bolek Broda?
Hehe - czasu nawet szkoda.

[broneknotgeld]

Ignac

Tak sie tu przegadujecie
Ślonskim rymym sztyjc sujecie
Dyć mie prawie ło to idzie
Kaj wic, fraszka - ślonskość w biydzie!
Skończyć trza ze "czynstochowom"
i kulturom "bercikowom"!

[broneknotgeld]

Bolek

Ignac, wiym - grosz za liryka
Biołym wierszym chcesz kajś rzykać
Rob se swoje jak poradzisz
Dyć niych fraszka ci niy wadzi.

[broneknotgeld]

Ignac

Wadzi mie i inkszym wadzi
Sie panoszy - niy paradzi
Dlo Ślonzoka gańba niesie
Durś wom kajsik tkać to chce sie
Toż kultura "krupniokowo"
Z tym sztyjc u nos wiyrchym stowo.

[broneknotgeld]

Bolek

Ignac - zdo sie co fandzolisz
Kej liryka yno chwolisz

Dyć to tukej niy zawadzi
Łotworz wontek - niych paradzi
Wiersz na forum co liryczny
Dlo kogosik tyż rychtyczny.

[broneknotgeld]

Ignac

Sie te fraszki na nic zdajom
Niy na darmo tukej wajom
Kej na forach je promujesz
Co zocniejsze tako psujesz.

[broneknotgeld]

Bolek

Żech ci swoje już tu pedzioł
Czegoś ło cia tyż dowiedzioł
Wicym, fraszkom jo raduja
I krupniokym poczynstuja
Dyć na forum wolno wola
Czymu pszaja i sie chwola.

[broneknotgeld]

Ignac

We "czynstochowie" co zocne topisz
Możno to kedyś w końcu spokopisz.

[broneknotgeld]

Bolek

Co jo spokopia - moja w tym gowa
Mie zdo jałowo durś twoja "mowa"
Chcesz dać tu cosik - wiersze kładź w wontku
Niy chcesz - sie trzimej swojego kontku

Dali tyn dyszkurs ciongnońć niy werci
Bo bych se musioł chlapnońć trzi ćwierci

[broneknotgeld]

Łobroz drugi - z plebiscytym
Ździybko trza nom sztopnońć przi tym.

[broneknotgeld]

Hyjdla

"Pisze inaczy", dyć czytać idzie
- Ze plebiscytym jako tu bydzie?

[broneknotgeld]

Bolek

Ano - plebiscyt trza już rychtować
Wolontariuszy na muster dować
Drap kandydatow tu wystowiymy
Tym dobrodziejow wypromujymy.

[broneknotgeld]

Hyjdla

Jo poru mom zocnych - tako ich tu zgłoszom
We wercie nagrody - dobro inkszym noszom.

[broneknotgeld]

Hajnel

Tyż kandydatury tu moje dołoża
Dyć sie niy dziwejcie że na to wom woża
Choć mi ryzykowno zdo sie ta ideja
Dobrym jest uczynkym wspacie dobrodzieja.

[broneknotgeld]

Bolek

No - jak jo dom swoje, to możno wystyknie
Plebiscyt sie może rozkulać nom piyknie
Na piontka aż idzie tako zagłosować
Coby ludzie kukli trza tyż fest promować

[broneknotgeld]

Hyjdla

Ech, kajniykaj szkryflom i linka tyż kłada
Welowanie ruszo - plebiscyt - parada!

[broneknotgeld]

Bolek

Hyjdla, jo tyż brify wysyłom do ludzi
Jakosik to leci - wiyncy tyż tu wkludzi
Głosow durś przibywo - istni w wiyrch skokajom
Zdo sie co "fankluby" nikierzy tyż majom.

[broneknotgeld]

Hajnel

Dyć anonimowo ktosik tyż weluje
Ze regulaminu - "to sie niy rachuje".

[broneknotgeld]

Bolek

Dubeltowo głosy wiela by dowało
Jakby sie sie cuzamyn wszysko rachowało
"Profile fikcyjne" ciyngym tukej mnożom
Dyć cołkym inaczy we portalu wożom.

[broneknotgeld]

Hajnel

Mie te "fikcje" już wnerwiajom
Toż czasami na to wajom
Lepi by w portalu było
Jakby sie to stond straciyło.

[broneknotgeld]

Bolek

Hajnel - "fikcjo" z wolny woli
Jedyn wajo inkszy chwoli
Taki "profil" hobby zdo sie
Dyć tu nic po jejich głosie.

[broneknotgeld]

Hajnel

Ja - na forach już maraszom
Dyszkurs zocny czynsto gaszom
Niypotrzebne w "naszy-klasie"
Sie przekonosz poniywczasie.

[broneknotgeld]

Bolek

Przeca wszysko prawie łod ludzi zoleży
Czasym w jejich duszach maras tako leży
Kej anonimowo na wiyrch wyciepujom
Abo sie strachajom abo tym gańbujom.

[broneknotgeld]

Hajnel

Tak czy siak - zgobiom
Łostuda robiom.

[broneknotgeld]

Hyjdla

Jeronie - przestońcie sztrachecle tu ciupać
Plebiscyt jest gorki - chcom ludzie tu klupać
Na darmo skiż "fikcji" tela labiydzicie
Kej teroz na forum aże were życie.

[broneknotgeld]

Bolek

Mie to fest raduje - richtig tym sie ciesza
Niy byda biadoloł - możno tako grzesza.

[broneknotgeld]

Hyjdla

Choć "Notgeld" niy "Nobel" dyć uciecha niesie
I zocno ideja lansować z tym chce sie.

[broneknotgeld]

Hajnel

Ja, Hyjdla - to chyto
Niyjedyn sie pyto
Chce kogosik wspiyrać
Na forum zaziyrać.

[broneknotgeld]

Hyjdla

Ano - zaziyrajom - na wontkach głosujom
Tako tyż ta sztela po trochu budujom
Razym z plebiscytym te forum rozkwitnie
A że dobru służy - niych nigdy niy kitnie!

[broneknotgeld]

Hajnel

"Notgeld" fest ciekawi. Czamu łon nagrodom?
Kej sie mie pytajom roztomajcie godom
Wiym że piniondz miejski skiż potrzeby wielki
A że niy podrobka - tyż niy duperelki.

[broneknotgeld]

Bolek

Hajnel - jo to zbiyrom, łod lot tyż wystowiom
Ludzie sie dziwujom, uczom, tako bowiom
Piyrwyj skiż utropy boł potrzebom "chwili"
Dyć przeca z niym wiela ludzie tyż przeżyli
Notgeld we złym czasie jako ta nadzieja
Toż zocnom nagrodom jest dlo dobrodzieja.

[broneknotgeld]

Hajnel

Mosz recht - żeś to piyknie teroz wyklarowoł
Tym bardzi jo byda ideja promowoł.

[broneknotgeld]

Hyjdla

Ludzie durś welujom - pewno fest kukajom
Widać dobrodziejom we tych czasach pszajom
Ech, czas wartko leci - chnetko finał bydzie
Ze końcym tych głosow jeszcze ździybko przidzie.

[broneknotgeld]

Bolek

Ano - jeszcze trocha głosy idzie dować
Chnetko jednak wontki przidzie zasztopować
Hyjdla - welowało trzista ludzi prawie
Kożdy sie wygranym zdowo w ty zabawie.

[broneknotgeld]

Hyjdla

"Notgeldow" piyńć yno prziznowanych bydzie
Dyć kto niy dostanie wcale niy we biydzie.

[broneknotgeld]

Bolek

Dobrze tukej prawisz - richtig "niy we biydzie"
Pewnikym za roczek ktoś zaś dran z tym przidzie
Wontki w plebiscycie terozki haltuja
Wszystkim za te głosy festelnie dziynkuja.

[broneknotgeld]

Hyjdla

No i patrz - sie wszysko piyknie rozkulało
A przi tymu forum piyknie rozkwitało
Wystykło do tego miesiyncy niywiela
Rym ślonski dopomog - szkryfna yno tela.

[broneknotgeld]

broneknotgeld napisał:

> Hyjdla
>
> No i patrz - sie wszysko piyknie rozkulało
> A przi tymu forum piyknie rozkwitało
> Wystykło do tego miesiyncy niywiela
> Rym ślonski dopomog - szkryfna yno tela.
No i patrz - sie wszysko wartko rozkulało.

[broneknotgeld]

Bolek

Piontce co z "Notgeldym" już tu gratuluja
Zaproszom na finał - z majym to szykuja
Dyplom tyz do tego jako potwierdzynie
Niy idzie inaczy - by żgało sumiynie.

[broneknotgeld]

Hyjdla

Do gratulacyji i jo dokupluja
Przeca sie skiż tego tyż wiela raduja.

[broneknotgeld]

Hajnel

Jo tyż sie łodzywom - sukcesow winszuja
Wszyskim dobrodziejom - za rok popromuja
Ideja "Notgelda" trza ciongnońć w ty szteli
Niychej tu rozkwito - z tym przeca weseli.

[broneknotgeld]

Łobroz szworty - po finale
Czy uciechy wiela? -Wcale?!

[broneknotgeld]

broneknotgeld napisał:

> Łobroz szworty - po finale
> Czy uciechy wiela? -Wcale?!
Łobroz trzeci....

[broneknotgeld]

Ktoś utropy sie spodziywoł?
Po sukcesie sztrofom dziwoł?
Ech to niy som balakwasty
Ciynzko być ze ślonski asty.

[broneknotgeld]

Bolek

Toż już po finale - piyknie ze tym było
Poru dziynnikorzy nawet tam trefiyło
Kablowka nagrała - kuknijcie we Necie
Zdjyńć wiela ze tego łoglondnońć możecie
Za rok możno lepi jeszcze ze tym bydzie
Jak czas plebiscytu "Notgelda" zaś przidzie,

[broneknotgeld]

Hyjdla

Bolek - wyszło gryfnie, uciechy fest było
Ciesza sie że mie to tyż niy łominyło
Za rok tyn plebiscyt zaś byda wspiyrała
Linki z relacyjom terozki dowała.

[broneknotgeld]

Hajnel

Hyjdla - dyć dziynkuja
Że tego niy szukom
Sukcesym raduja
Z uciechom tam kukom

Bo przeca z tym prawie
Przed łoczy mi włazi
Finał - śnik na jawie!
Dyć kogosik razi.

[broneknotgeld]

Bolek

"Dyć kogosik razi" - szkryfnołś w zło godzina
Na swoj "profil" kukom - mom niytyngo mina
Administracyjo "fikcjom" mie zrobiyła
Skuli czego tako? -Dyć niy wyjowiyła!

[broneknotgeld]

Hyjdla

Bolek - zdo sie niymożliwe!
Żeś niczego niy ukrywoł!
Kery chcioł tyn wartko przeca
twojim klasom tyż podziwoł

Tam na forach szkryflołś nawet
Dyszkurs wiod ze kamratami
Czy ta Administracyjo
chce sie asić felerami?

[broneknotgeld]

Hajnel

Bolek - szpas szykujesz tako?
Byś tym nos za bozna robioł?
Wybocz - widza w tym gupota
Czy ktoś komuś gowa łobioł?

[broneknotgeld]

Bolek

Łoj roztomili - idzie spokopić
Że ktoś ideje zocne chce topić
Łoszkliwo czynsto tyż ślonsko dusza
Tako tu szkryfnońć terozki musza

Nikerym zelter bije do gowy
Inkszych grzych kusi jakisik nowy
Kej ktoś "zbudować" nic niy poradzi
Uciechy szuko w tym co "wysadzi".

[broneknotgeld]

Hyjdla

"Niyrzeczywistym" "fikcyjne konto"
Z niyprowdziwymi cołkym "danymi"
-Z regulaminu podowom wom to
Toż bydźcie tako teroz mondrymi.

[broneknotgeld]

Bolek

Że ich cygania tako "pedzieli"
Ze klas kamratow tyż łoszukuja
-Łoszczerstwo ofyn wcisnońć mi śmieli!
Niy ma co dziwać - fest tym nerwuja!

[broneknotgeld]

Hyjdla

Trza ci szkryfnońć do Admina
Niych niy robiom tukej "kina".

[broneknotgeld]

Bolek

Hyjdla - brif przisłali prawie
Mom być "fikcjom" - już po sprawie?
Żech "niyregulaminowy"!
Stond tyn "klajdzik" dlo mie nowy.

[broneknotgeld]

Hyjdla

Niy po jejich myśli jest karykatura?
Możno prawie bezto w całym widzom dziura.

[broneknotgeld]

Hajnel

Hyjdla - zdo sie kogoś mierzi fest co ślonske
Ciynżko wyklarować kej gowiczki wonske.

[broneknotgeld]

Hyjdla

Pewno ze zowiści sie "fikcjo" wykluła
Pódzie to łodkryńcić, choć NK mo ruła.

[broneknotgeld]

Bolek

Durś "fikcyjnym" z wtorkym byda?
Jako jutro? Czy tu przida?
W "usuniynte" awansuja?
Tako dzisioj medytuja

Muter w grobie sie przewroco
"Fikcyjnego" rodzić? Po co?
Ech ta administracyjo!
Robić tako komedyjo!

Godka "fikcjom"? Co powiycie?
Dlo mie łona jako życie!
Etniczności ktoś łodmowio?
Nacjonalnie sie zabowio?

Czy gymbusiom jo cygania?
Trza łopytać se Tigrana
Co mie tako wyrysowoł
Cajtong tyż łopublikowoł

Żech "fikcyjny" - wyrok mieli
Ło nic spytać se niy chcieli
Ostracyzmym popisali
Jako ze tym bydzie dali?

[broneknotgeld]

Hyjdla

Jo żech "fikcyjnych" poblokowała
Byda terozki to łodkryncała
Bolek - brif wyśla tyż do Admina
Ech - sie skiż tego aż traci wyna!

[broneknotgeld]

Bolek

Dziynki - czekom łodpowiedzi
Tyż brif posłołch do Admina
Coś dziwnego w NK siedzi?
Antyślonskość majom w gynach?

[broneknotgeld]

Hajnel

Kej żeś sie sukcesym asioł
To cie wartko ktoś ugasioł
Widać tako musi być
Ślonzok mo łobrywać w rzić.

[broneknotgeld]

Bolek

Szłoby dowiyść?
-Polsko zowiść?

[broneknotgeld]

Hajnel

Niy wiń yno w tym Poloka
Swoj tyż zowiść trzimie w zokach
I kej go zaświyndzom piynty
Sztrasa prosto mo zakrynty

A Polokom już "w to grej"
Toż Ślonzoku pretekst dej
We "zgłoś fikcjo" styknie klikać
Ze uciechom potym blikać
Żeś kajś komuś coś zmajstrowoł
-Jakosik łoszkliwość nowo.

[broneknotgeld]

Bolek

Sztygsym dlo nikerych fraszka
Nawet ofyn to szkryflali
Wloz sztrachecel tam kaj draska?
Możno by sie winszowali

Dyć po prowdzie w tym gupota
Jako sranie w gniozdo swoje
Zy mnie możno tyż niycnota
Mierznom jednak take "boje"

Trza na ślonskość chuchać, dmuchać
Kożdy kunszt mieć ciyngym w zocy
Ktoś lirycznie może "gruchać"
- Yno z tego styknie mocy?

[broneknotgeld]

Hyjdla

Bolek - trza poczekać
Cosik łodpowiedzom
Niy darmo Adminy
Na portalu siedzom.

[broneknotgeld]

Bolek

Żech ło swoja "fikcjo" rozpytoł na forum
Kere zdo sie jako ze Adminow dworu

nasza-klasa.pl/forum/20/2/4140
Wartko wontek wytli - cynzury niy widać
Toż kaj informacjo ło szykanie by dać?

[broneknotgeld]

Hyjdla

Możno ktosik sie gańbuje
Bestoż wartko to gumuje.

[broneknotgeld]

Bolek

Jakby sie tym gańbowali
Drap "realność" by prziznali
Dyć kej wytli cosik wiymy
Trza mi było taki szprymy.

[broneknotgeld]

broneknotgeld napisał:

> Bolek
>
> Jakby sie tym gańbowali
> Drap "realność" by prziznali
> Dyć kej wytli cosik wiymy
> Trza mi było taki szprymy.
Drap "realność: by łoddali

[broneknotgeld]

Hyjdla

Bolek - musisz jeszcze strzimać
My tyż niy bydymy drzymać
Forum przeca rośnie piyknie
Wiela nos tu cosik kliknie.

[broneknotgeld]

Bolek

W piyrszo środa po wyroku
Kara ciyngym mie nerwuje
Konstytucjo majom w kroku?
Łona cosik gwarantuje

Z rownych w prawie już łodstowom?
Obywatel gorszy masy?
"Fikcyjnościom" chopa dłowiom
Niy ma mie kaj moje klasy

Ślubno tyż sie ciyngym tropi
Mo "fikcyjne" zy mnom dzieci?
Trza na smutno mi sie łopić
Gorzołeczka "fikcjom"? -Leci!

Czy łoszczerczo łoskarżony
Bronić nawet sie niy może?
Kapturowo łosondzony?!
Ech, wyboczcie, dyć - Szczyńść Boże.

[broneknotgeld]

Hajnel

Miano deptać ku zabawie?!
Ano - Bolek, żeś we prawie!

[broneknotgeld]

Bolek

Swoje miano mom we zocy
Fikcjo śmiom mi ciepać w łocy
"Podczłowiekym" tyż niy byda
Sie niy godza na ta "biyda".

[broneknotgeld]

Hajnel

Trza słąć brify z protestami
Chnet doczkomy tego sami?
Chocioż włos niy zleci z myjny
Kożdy może być "fikcyjny"
Zło z zowiści z łoszkliwości
Niych we trule gyry prości.

[broneknotgeld]

Hyjdla

Brif Adminom żech wysłała
Inksi tyż - dyć ło tym piszom
Łodpowiedzi niy doszkałach
Inkszym łodpedzieli - ciszom?

[broneknotgeld]

Bolek

Za te brify - wszyskim dziynki
Niy "fikcyjny" dowom rynki
Jedno wom tu łobiycuja
Strzimia - som niy zrezygnuja
Choć pewnikym ło to idzie
Kej sie straca tako bydzie
Z woli Administracyji
Niy skiż jakiś komedyji.

[broneknotgeld]

Hajnel

Recht mosz - toż sie trzimej fest
Z tobom wiela nos tyż jest.

[broneknotgeld]

Bolek

Na brif mi niy łodpedzieli
Cynzurować wontek chcieli
Dyć żech łotwar prawie drugi

nasza-klasa.pl/forum/20/2/4152
Czy sie zrobi richtig dugi?

[broneknotgeld]

Hajnel

Swoje trzi grosze żech tam już wciep
Coby wiedzieli żech jo niy "kiep".

[broneknotgeld]

Hyjdla

A mie jakoś ciynżko coś na wontku szkryfnońć
Bych im tam musiała żolami aż gichnońć.

[broneknotgeld]

Bolek

Dziynki - dyszkurs już tam leci
Toż niyjedyn post se skleci
Choć moj piyrszy wontek wytli
W tamtym chyba nic niy przitli.

[broneknotgeld]

Hyjdla

Ech, by ze tym już skończyli
Ci "realność" prziwrociyli.

[broneknotgeld]

Bolek

Dowejcie pozor - możno zaraza
Za "fikcyjnymi" czasami łaża
Toż pewno łod nich chyciołch bakcyla
Mor chnetko przidzie? -Czy jo se myla?

[broneknotgeld]

Hajnel

Hehe - przeszła już ci ora?
Żeś inaczy szkryfloł wczora.

[broneknotgeld]

Bolek

Sie dziwujom w moji klasie
"Fikcjom" teroz chwolić trza sie?
We portalu tako moda?
Niypotrzebno na to zgoda?

[broneknotgeld]

Hyjdla

Dyć mie szpas we tym nic niy raduje
Korajom ślonskość kero promujesz?
Wiym że gupota w tym wykpić idzie
Dyć jako dali to richtig bydzie?

[broneknotgeld]

Bolek

Hyjdla - retunek jedyny widza
Brif nowy wyśla - nad nim sie biydza.

[broneknotgeld]

Hyjdla

Aże sie biydzisz? Toż mie ciekawisz
Możno coś ło tym wiyncy wyjawisz
Przeca ze tobom sztama trzimiymy
A co szykujesz niywiela wiymy.

[broneknotgeld]

Bolek

Dyć niy kryja co szykuje
Tako brifym wyklaruja.


Ponie Prezydyncie

Ponie Prezydyńcie tu fest szanowany
Na nasz rudzki stolec niy roz welowany
Żeś po to by wspiyrać w biydzie rudzianina
Tyż nadziejom mojom na weselszo mina

Toż ło poświodczynie pokornie jo prosza
Wiydz że ślonske słowo w "naszy-klasie" głosza
Dyć władcy portalu "fikcjom" mie tam darzom
Poświodcz żech realny - możno coś zajarzom

Wybocz żech Cie przeca rymym rzduchoł piyrwyj
Co złe ze pamiyńci możno nawet wyrwij
Tyś we Rudzie władzom - w Swoji łaskawości
Dej rymopisowi patynt realności

Bo jako mi przidzie wiyźć "fikcyjne" życie?
Jako mi rymować w tym po ślonsku? -Skrycie?
Mieć "fikcyjne" dzieci ze prowdziwom ślubnom?
Jako gurt popuszczać kej galoty rubnom?

Jak syn marnotrawny łojca prosioł swego
Duch stolicy fraszki mie prziwiod do tego
Że klupia we dźwiyrza burgemajstra miasta
Choć jo tyn zokalec ze Twojego ciasta

Ech - popiołym suja zapocono glaca
Z żolu chnetko ślimtom, myjny niy łonaca
Z "konta fikcyjnego" mosz siyła wybowić
Rynkom możno kiwnońć i już tako sprowić

Nic że w Rudzie Ślonski słychać bydzie wrzaski
Broneknotgeld klynko - doproszi sie łaski!
Niy spokopi tego kto "fikcjom" niy tkniynty
Toż chciyj mie wybowić z ty medialny "piynty".

[broneknotgeld]

Hyjdla

Toż kunsztownie przirychtowoł
Lachać potrza sie, czy ślimtać?
Brif tyn wyślesz? Sie niy zdowo
Choć szpas ślonski to niy piynta.

[broneknotgeld]

Bolek

Hyjdla - wyśla - ździybko czekom
"Fikcjo" jeszcze dzionek strzimia
Czy inaczy mie "łoblekom"?
Już z tym coś za dugo drzymia.

[broneknotgeld]

Hajnel

"Drzymiesz" - tako tukej prawisz
Dyć łostudy ze tym wiela
Kunsztym te felery jawisz
Czy wystyknie yno tela?

[broneknotgeld]

Bolek

Ech, spokopiom małowiela
Wykpić moga - yno tela
Sie kajś coś ze tego robiom?
Jako mie tyż inkszym zgobiom
A Adminy niy sprowdzajom
"Fikcjom" darzom - dyć niy bajom.

[broneknotgeld]

Hajnel

Bolek - niy popuszczej ze NK Adminom
Możno nos tyż "fikcje" w końcu niy łominom.

[broneknotgeld]

Bolek

Sie zanosi na "wojynka"?
Mom klawiyra yno w rynkach
I rym ślonski na łobrona
Chocioż zy mie słabszo strona
Przeca poddać se niy poddom
Realności swyj niy łoddom.

[broneknotgeld]

Hyjdla

Bolek - my cie w tym wspiyromy
Brifow poszło wiyncy przeca
Lepi dyć jak czasu im domy
Tako teroz tu zaś skleca.

[broneknotgeld]

Bolek

Recht - dyć trocha już zetrwało
Jutro pionty dziyń - niymało
Jutro "profil" niy łodmiyniom
"Drif łotwarty" wszyndy wtryniom
Wyśla tyż prezydyntowi
Byda ciekow czy łodpowiy.

[broneknotgeld]

Hyjdla

Pionty dziyń - toż prawie kukom
Bolek, "fikcji" twoji szukom
Żeś "realny" - gratuluja!!!
Sie festelnie tym radyja!

Pionty dziyń - dość dugo trwało
Szpany było z tym niymało
Toż terozki cieszyć chca sie
Jako my - żeś w "naszy-klasie"!

[broneknotgeld]

Hajnel

Bolek - pynkli - gratuluja!
Razym z Hyjdlom tyż raduja!
Razym ze inkszymi tukej
Teroz klasom swojim kukej
Trza łod nowa sie logować
Dyć ci przi kamratach stować
Jako nowy za inkszymi
Ubliżyli ci - my wiymy
Ktoś tyż możno mioł nauczka
Ważne żeś sie niy boł "tuczka"
Żeś to strzimoł, swoje pedzioł
Żeś ze nami tukej siedzioł
"Fikcjo" przeszła - niy "zabiyła"
Wiydz że tako tyż wzmocniyła.

[broneknotgeld]

Bolek

Toż witejcie roztomili
Zdo sie jaśni w jedny chwili
Z prow czowieka mie łodarli
Sie przi tymu tyż zaparli

Konstytucji niy czytali?
Bestoż godność podeptali?
Ślonzok dlo nich to niy czowiek?
"Fikcjom" cołkom, czy w połowie?

Ciśnie gowa pytań wiela
Niyobywatelsko sztela?!
Ano - prawie tako zdo sie
Doświodczynia teke mo sie.

[broneknotgeld]

Hyjdla

Co złe - przeszło. Po co tropić?
Ciynżko możno to spokopić
Łod zowiści do gupoty
Dyć niych już spokojni po tym
Bolek, strzimoł żeś to piyknie
Tela szkryfna - mi wystyknie.

[broneknotgeld]

Bolek

Ano - idzie sie radować
Dyć tyż tymu trza dziwować
Jako leko "fikcjom" zrobić
Bele kto może nazgobić

No a Administracyjo
Na zielono - kryjolyjo
Świyci tym co chcom coś niszczyć
Co "we trowie" richtig "piszczy"?

[broneknotgeld]

Hajnel

"Piszczy" zgobnik ze Adminym
Łoba "w trowie" siedzom driny
Zdo sie jako dwa kamraty
Tympić ślonskość - łoba za tym
Tyn nazgobi, tyn prziklepnie
Ślonzokowi z tym sie hepnie.

[broneknotgeld]

Bolek

Szczyńściym krotko to dość trwało
Sie tym razym niy udało
Som bych pewno w "fikcji" łostoł
Dyć żech wsparcie łod wos dostoł.

[broneknotgeld]

Hajnel

Czy cie chocioż przeprosiyli
za to jako ukrziwdziyli?

[broneknotgeld]

Bolek

Hajnel - ty mi poczta czytosz?
Prawie teroz ło to pytosz
Ano - brif terozki prziszoł
Choć durś niy wiym kto namiyszoł
Do feleru sie prziznali
Yno tym uradowali.

[broneknotgeld]

Hyjdla

Ano widzisz - coś do przodka
Tu nom kwitnie dali godka
Po tym nawet żeś mocniejszy
Toż z uciechom dziyń dzisiejszy.

[broneknotgeld]

Bolek

Roztomili - koniec sprawy
Koniec tragikomedyji
Stało sie niy skiż zabawy
Niy trza wiyncyj z tym mecyji

Forum rośnie nom przepiyknie
Wiyncyj klasowiczow kuko
Tako fertig - już wystyknie
Niych sie cosik ktoś kajś bluko

Za asysta w tym dziynkuju
Wszyskim kierzy mie wspiyrali
Koniec, fertig - tym raduja
Żeście swoje tyż szkryflali.

[broneknotgeld]

I SZLUS!

Z tragikomedyjom szlus
"Fikcjo" przeca to niy mus
Możesz być tym z wolny woli
Niy z admina ani "trolli".

======================

[broneknotgeld]

"Ślonzok fikcjom" - "tako to leciało".

www.facebook.com/photo.php?fbid=278335558908021&set=a.278332652241645.64630.195759197165658&type=1&permPage=1
Ano - richtig "tako to leciało". Moja tragikomedyjo to przeca ślonsko sztuka faktu, kero łosprowio ło tym co mi sie richtig przitrefiyło we portalu "nasza-klas.pl".
Założoł żech tam ślonske forum, coby prawie tako zrychtować kolejno edycyjo nagrody "Notgelda". "Notgeldy" som prziznowane we naszym mieście tym, kierzy chcom i poradzom sie dzielić ze bliźniymi dobrym, som takimi wolontariuszami-dobrodziejami.
Toż udało sie zrychtować i rozkulać take forum, a som plebiscyt nagrody łokozoł sie sukcesym, choć leko niy było. Jednak wiela mie we tym wspiyrało, pomogało to wszysko rozkulać. Jakosik krytyka już wtedy tyż boło widać, dyć na nic sie to zdało.
Toż po sukcesie ze tom idejom, a możno prawie skiż tego, administracyjo NK zdegradowała mie do "profila fikcyjnego". Pewno wystykło do tego pora zowistnikow, kierzy klikali we "zgłoś profil fikcyjny", no i indolyncjo adminow tego portalu.
Niy boło leko ze tego wylyźć i możno bych nawet niy wyloz, kejby niy wsparcie inkszych forumowiczow. Szykana jako mi ofyn przirychtowali adminy NK richtig łodebroł żech jako podeptanie mojich prow obywatelskich. Skończyło sie jednak dobrze i mozno nawet ktosik cosik spokopioł, choć pewności niy ma.
"Jako to leciało" poczytejcie sami - zaproszom:

forum.gazeta.pl/forum/w,28940,126348953,,_Slonzok_fikcjom_tragikomedyjo_.html?v=2

Trza jeszcze pedzieć, że to już drugo tragikomedyjo kero żech szkryfnoł i wydoł. Po prowdzie to jakby piyrszo ze cyklu. Co ciekawe, trzecio ze tego cyklu wydano boła łońskego roku - mianowała sie "Plebiscyt we Necie":

rudaslaska.naszemiasto.pl/artykul/1087061,bronislaw-watroba-napisal-tragikomedie-po-slasku-dzielo-ma,id,t.html
Toż jest czyńść piyrszo i trzecio już wydano. Drugo czeko we raji - pewnikym jom wydom na bezrok. Możno nawet na takim "literackim tryptyku" sie niy skończy.

[broneknotgeld]

Tref autorski - niy "fikcyjo"
filia18halemba.blox.pl/2012/05/Slonzok-fikcjom.html
Kryjolyjo! Kryjolyjo!