Ludzie Ślonska

[broneknotgeld]

Do kogo rzykać - do Ślonska Ludzi
To nom Ponboczka w duszy łobudzi.

[broneknotgeld]

Jakub Boehme

Na misa cynowo z szewca ławy blikoł
Po cichu do Boga możno przi tym rzykoł
Miska z jedny strony nojpiyrw mu blyszczała
A potym ze inkszy światło łodbijała

Już wiy! - Już łobudzioł sie we niym Bog-czowiek
W kerym zło i dobro jakby po połowie
Może w tym przebiyrać - zoglondać we siebie
Łod niego zależy - w piekle jest czy w niebie

Wyloz ze swyj izby - stanoł se na progu
I poczuł że jakby sie topioł we Bogu
Łogyń w niym buzuje a woda go gasi
Dusza sie do świata tym sposobym łasi

Świat Bogym jest przeca - a łon z tego świata
Łod sia trza Mu za to dać dobro zapłata
Być durś blisko Niego pociongnońć tyż inkszych
By Duch Świynty w ludziach stoł sie jeszcze wiynkszy

Dyć łostawioł szydło - piora prziszła pora
Natchniony napisoł ta bosko "Aurora"
Kero luterany pryndko potympiyli
Choć inksi do serca naprowdy sie wziyli

Już prawie przeklynty - z wyroku niymowa
We niebie swyj duszy wypszone kłod słowa
Na wieki nastympne sie łone wyryły
Wszachwieczny mu we tym dodowoł tyż siyły

Choć szewc pomarł w końcu - prochym jego ciało
Żyło i żyć bydzie co po niym łostało
Przez wieki już siedzi to we naszych duszach
Te słowo czowieka zowdy bydzie wzruszać

Za Jakubym Boehme ku światłu idymy
Choć ło niym niy wszyscy możno cosik wiymy
Bestoż joch sie szkryflać te rymy łodważoł
Ło ślonskim mistyku trocha tyż pomarzoł.

[broneknotgeld]

Filadelfia

Pensylwanii stolica jak i downych Stanow
Założono przez kwakrow - ducha swego panow
Niy siedzioł im w gowie znak złotego cielca
Ale Jakub Boehme z naszego Zgorzelca.

[broneknotgeld]

Pamiyńci Boehmego

Kim byłby Mickiewicz bez miszcza swojego?
A czym świat nasz byłby jakby brakło Jego?

[broneknotgeld]

Giovanni Angelus Ballestrem

Przodek rodu ślonskego z pomnika zaś patrzy
Na tyn piykny pałac swojego prawnuka
I dlo jego ducha wiela tyż to znaczy
Że sie tukej łonczy religio i sztuka.

[broneknotgeld]

Karol Franciszek von Ballestrem

Majontek erbnoł po tych von Stechov
O jakim wcześni niy marzoł
I w nim niy zrobioł za wiela grzechow
Godula mu gospodarzoł.

[broneknotgeld]

Franciszek Karol von Ballestrem

Zaczoł w armiji kariera
Loł Austryjoka Francuza
Koń jednak - tako cholera
Porzondny zrobioł mu uraz

Cugle chcioł czimać we rynkach
Habeta podmiynioł pryndko
Reichstag mioł ze nim udrynka
Bo łon przed nikim niy pynkoł.

[broneknotgeld]

Walynty Wolfgang von Ballestrem

Rzońdzioł majontkym przez dziesiyńć lot
Potym ze świata tego nom spod
Jednak je z nami tukej do dzisioj
W świyntym Józefie żech ło tym słyszoł.

[broneknotgeld]

Mikołaj Wolfgang von Ballestrem

Pan majoratu łostatni
Z drezdyński niy wyloz matni
Grad bomb pożary i gruzy
Widzioł u końca podróży.

[broneknotgeld]

Laurka

Ballestrem Francek mo tu laurka
Bo łon bergmonom płacioł "barborka".

[broneknotgeld]

Franciszek II Ballestrem

Graf politycznom był tyż figurom
Parlamynt Rzeszy wzioł za krabikel
Ruda niy była przi niymu dziurom
Trza nom pamiyntać tyn "tortyntikel".

[broneknotgeld]

Franz Xaver von Ballestrem

Ło niym to zowdy szkryfnońć jo moga
Że we Bismarcku widzioł łon wroga
Dyć kulturkampfu te rzondy gupie
Nasz graf mioł richtig głymboko w dupie
Przeca i w twierdzy za to tyż siedzioł
Bo głośno tako prowda powiedzioł.

[broneknotgeld]

Dyć Korfanty...

Dyć Korfanty na nos z nieba
Patrzy coroz bardzi chmurny
Złoić skora by nom trzeba
Bo straciyli my Ślonsk Gorny.

[broneknotgeld]

Jak Korfanty z Piłsudskim

Przed tym Sejmym Ślonskim na parkingu stoji
Bliko na marszałka i trocha sie boji
Bo łon z ty habety srogo nań tam łypie
Myśli chyba ło tym jak Wojtkowi sypie.

[broneknotgeld]

Możno ta fraszka tu niy sztimuje
Dyć rym se ło tym som jakby suje


Marszałek na Ślonsku

We Katowicach marszałek stoji
Koniym chce wjechać do Sejmu
Łon sie nikogo tukej niy boji
Co dobre to wszysko dej mu.

[broneknotgeld]

Polityk ze Siymianowic

We Siymianowicach rodzioł sie Korfanty
Bestoż tyż go majom tukej mocno w zocy
Czy znojdziesz tu kogoś kto by mog być anty?
A możno sie bojom powiedzieć to w łoczy.

[broneknotgeld]

ks. Ludwik Tunkel

Farorz z Kochlowic ze kelniom w rynce
Znoloz se miejsce w tyj ślonski mynce
To co zbudowoł dzisioj nos cieszy
A kto go wygnoł pierońsko zgrzeszył
Na Dolnym Ślonsku jego mogiła
Choć do Gornego dusza mu wyła
Biskupym prawie byłby tu przeca
Dyć niy pasowoł do Polski neca.

[broneknotgeld]

Donnersmarckowie

Na "czwortkowym targu" kariera zrobiyli
We Spiszu kajś wele Lewoczy
Jak grosz cysorzowi kedyś pożyczyli
To Henckel na Bytom nom wskoczył

A potym do tego Bogumin dodali
Na Ślonsku już mieli dwie nogi
Fortuna sie piyknie toczyła im dali
Aż urosł majontek tyn srogi.

[broneknotgeld]

Markiza de Paiva

Sławno to była kokota
Żodyn niy skompioł jyj złota
A jak sie z wiekym roztyła
W Świerklańcu końca dożyła.

[broneknotgeld]

We Świerklańcu

Pałac kerymu Wersal mogby coś zazdrościć
Zrodzioł sie ze wielki francuski miłości
Duch markizy de Paiva błonkoł sie w komnatach
Niy dała mu rady łod Slepcowa Katia.

[broneknotgeld]

Fryderyk II

Na Austryjokach łon tyn Ślonsk zdobył
Jednak co niyco tyż tukej zrobiył
Kozoł budować gruby i werki
Niy darmo Niymcy godajom - Wielki.

[broneknotgeld]

Franciszek Winckler

W Goduli szoł ślady
Wyraźnie to widać
Lepiyj sie doł rady
Niy wżynioł sie w biyda

Majontek ucapioł
Dziynki pewnyj wdowie
"Po mie jom obłapioł"
Aresin nom powie.

[broneknotgeld]

Karlik G i Francik W

Karlik nosz samotnie
Umar we Wrocławiu
A Francik łodwrotnie
Niywiasta łostawioł

Majontek ich wielki
Wszysko co zostało
Erbły mode frelki
Bo Niebo to chciało.

[broneknotgeld]

Waleska Winckler

Frelka to była werto miliony
Z majontku i mondry głowy
Kożdy by dzisioj chcioł taki żony
Richtig tyj lepszy połowy.

[broneknotgeld]

Matka Ewa z Miechowic

Wiela dlo siyrot łona zrobiyła
Możno by za to świyntom już była
Dyć wangeliczkom prziszło być łony
Ważne że ciyngym jom pamiyntomy.

[broneknotgeld]

Fryderyk Wilhelm Grundmann

Stoła nom po wojnie jeszcze jego chałpa
Kozała jom kipnońć jakoś naszo małpa
Wiater we tym miejscu szumi durś po cichu
By pamiyntać ło tym katowickim grzychu

Dyć łostatnio ło nim głośniyj tukej słychać
Do jego pomnika zaczynomy wzdychać
Na rynku nojlepi trza go nom postawić
Coby roz na zawsze pamiyńć sie poprawić.

[broneknotgeld]

F.W. Grundmann

Dwiesta lot tymu w Saksonii sie rodzioł
Tukej Katowicom wiela tyż dogodzioł
W końcu możno bydzie mioł teroz ulica
Winno mu to przeca naszo okolica.

[broneknotgeld]

Biskup Jan Kropidło

Rojber był z tego Jana Kropidło
Chacharske życie mu niy łobrzidło
Bo aż do końca chcioł forsy władzy
I z kurewkami dowoł se rady.

[broneknotgeld]

Morcinek

Pod Stalinogrod "wyromboł chodnik"
Choby tyn Łysek wozyk ciong
Dyć we tym lesie wyrosł już młodnik
A jego pryndko ktoś wyprzong.

[broneknotgeld]

Gustav Freitag

Freitaga po polsku niy mog żech przeczytać
Bestoż tu za wiela niy ma ło to pytać
Inszo rzecz że teroz szłoby go tłumaczyć
Dyć jego szkryflanie coś dlo Ślonska znaczy.

[broneknotgeld]

Maria Goppert-Mayer

Katowicko frelka w atomie grzebała
Dyć nawet do bombki sie w Stanach zabrała
Bo wdycki nojbardzi jom ciongło te jondro
I Nobel jyj przipod za cołko ta mondrość

[broneknotgeld]

Richard Holtze

Przewodzioł łon Radzie we tych Katowicach
I łaźniom skiż niego szło sie tu zachwycać
Łodcisnoł tyż tukej swoj sztympel dość fest
Czas by to docynić - stoć nos na tyn gest.

[broneknotgeld]

Karol Godula

Niy przijoł szlachectwa łod krola pruskego
Stykło że robota godała za niego
Niy chcioł grać jakegoś wielmożnego pana
Harować łon prziwyk łod samego rana.

[broneknotgeld]

forum.gazeta.pl/forum/72,2.html?f=16759&w=19589374&a=19590011

[broneknotgeld]

Karliczek Godula

W Makoszowach sie urodzoł
W przyszowicko szkoła chodzioł
A łokrzciyli go w kościele
Co i dzisioj znaczy wiele
Tyn zabytek z drzewa cały
W Borowyj Wsi cieszy gały.

[broneknotgeld]

August Borsig

W samym Berlinie ciuchcie budowoł
Przijechoł do nos po glajzach
Ślonskego wonglo łon potrzebowoł
Werciyła mu sie ta rajza

Znoloz go przeca we Biskupicach
Już mioł co w ciuchcie folować
Choć życio zgasła mu potym świyca
Syn zaczoł łostro fedrować

Słynyła w Zabrzu przeca "Jadwiga"
Kedyś tyż "Pstrowskim" nazwano
A zaczło sie to skuli Borsiga
Trza nom pamiyntać to miano.

[broneknotgeld]

Borsig w Biskupicach

Przikuloł sie cugym aże ze Berlina
Spodobała mu sie Biskupic dziedzina
Po prowdzie to jednak wongel go tu ciongnoł
Kery do roboty w swojich ciuchciach wprzongnoł

Szachty jego grubow pryndko tu stanyły
Niy yno "Jadwigi" tyż "Ludwika" były
Świtoł mu we gowie plan pieronym wielki
I tukej postawioł inksze swoje werki

Wielke piece kuźnia stalownia walcownia
Pryndko tyż dołożoł do tego gazownia
Piykny pałac tukej dlo siebie postawioł
Bo we Biskupicach wiyncyj czasy bawioł

Zaś dlo robotnikow stowioł familoki
By blisko tych werkow miyszkali boroki
Z czasym wszysko razym "Borsigwerkym" zwano
Przilgło do Biskupic na amyn to miano.

[broneknotgeld]

Jerzy Gische

Galman we Bobrku mu dobywali
Do Gdańska go wywoziyli
Ze kukfrym potym razym stopiali
I mesing z tego robiyli

Na tym majontek swoj wybudowoł
Szlachecki tyż dostoł tytuł
Choć i we Wrocku suknym handlowoł
Swojo historio tu wykuł.

[broneknotgeld]

Fryderyk Wilhelm Gische

Za jego żywota zmiyniyła sie władza
Dyć pedzioł - "Z Prusokym tyż sie tu poradza"

Bo pruske fabryki tyn galman durś brały
I ciynżke talary sie dali sypały

Potomka łon niy mioł i bestoż po śmierci
To wszysko capnyli jego "spadkobiercy".

[broneknotgeld]

Karl Grosser

Architekt to był wrocławski
Sławny i docyniony
Powiym że ze piyrszy ławki
Dyć Brynek durś podziwiomy

Joch tam przejyżdżoł łostatnio
W Technikum Leśne żech blikoł
Miyszkoł Donnersmarck dostatnio
Z wrażynio ślina żech łykoł.

[broneknotgeld]

Otto Fritsch

Był ratownikym śleprow ze gruby
Niy doł sie w kasza nadmuchać
Na "Ferdynandzie" retnoł łod zguby
Bergmony zaczli go suchać

Dugo im potym dyrektorowoł
W kopalni we Mysłowicach
Podsadzka z piosku piyrszy rychtowoł
I za to świyczka mu świyca.

[broneknotgeld]

Józef Lompa

Tukej Zefel robioł dlo tyj Polski wiela
Bo dusza mioł jakby rogato
Rektorowoł w Lubszy i pisoł durś tela
Że w końcu uciyrpioł tyż za to

Bez niego by mynij jakoś Polski było
My wiymy że mocka w tym racji
Łobudzioł w Ślonzoku co sie yno śniyło
Słowiańskij łon pszoł przeca nacji.

[broneknotgeld]

Generał Paul von Werner

Pon na Bujakowie i somsiednich włościach
Frycowi Wielkymu doł łostro po kościach
Bioł sie za cysorza w piyrszy ślonski wojnie
Kaj łon był - Prusoki niy mieli spokojnie
Na krola szarżowol pod Zombkowicami
Fryc pitoł w przebraniu polnymi drogami
Choć wojna Austrioki ta jednak przegrali
Dyć sława Wernera ciongnyła z nim dali.

[broneknotgeld]

Ksiondz Norbert Bonczyk

"Homerym Ślonska" dzisioj tyż zwany
Łon tukej polskość nom budzioł
By Ślonzok niy był durś poniżany
Nad tym sie ciyngiym tyż trudzioł

Ta "gora chełmsko" "kościoł miechowski"
Blyszczom w poezji sie jego
A przeca inksze mioł jeszcze troski
Ulgi niy było dlo niego

Tako mi w gowie myśl chodzi tera
Ło piyknym naszym regionie
Dyć jak mu dali miano Homera
Trza łodkryć Ślonzek - niych płonie

Łogniym co grzeje i świyci jasno
Kery nom wszyskim pomoże
Niych w naszych gowach niy ma za ciasno
Bonczyk by pedzioł - Śzczyńść Boże.

[broneknotgeld]

Andreas Hindenberg

Mapa Hindenberga już nom niy zaginie
Dyć wyskanowali jom piyknie we Pszczynie
Trza nom tukej wspomnieć tego kartografa
Bo inaczyj przeca była by zaś gafa

Piyknie wyrysowoł łon to tym Primnitzom
Całe gospodarstwo - ichnie plesske państwo
Inkszy taki mapy szukej tu ze świycom
Ratować jom trzaba - bo bydzie zaś draństwo.

[broneknotgeld]

Janosch

Z jego Cholonka słynie Zaborze
Choć kajś żech słyszoł że coś niy może
Szczimać tyj prowdy ze ksionżki kartek
Godali że to niywiela warte

Widać jest tako już polityka
Prowda przez palce ludziom umyka
Niy zawsze blikać sie chcom na siebie
Szkryflo sie piyknie yno ło niebie

A ziymia przeca mo swoje prawa
Nojpiyrw ślintanie potym zabawa
Zawsze sie idzie ździybko zchacharzyć
Czasym tyż za tym trocha pomarzyć

Z tego marzynio bajki Janoscha
Ło nie jo ciyngym dlo dzieci prosza
A zy mnom przeca cołko Europa
Gafto na kartki ze Zabrza chopa

Jak mały bajtel łobrozki widzi
I nad czytaniym chce mu sie biydzić
We tym tyż sztuka wielgo karlusa
W jego łobrozkach ślonsko jest dusza

Bestoż go lubiom dzieci Europy
Z kerych wyrosnom porzondne chopy
I nasze wszyske pszone durś frelki
Powiym że Janosch Ślonzok jest Wielki.

[broneknotgeld]

Janosch "w doma"

Możno na rynkach trza nom go nosić
Na Ślonsk co roku z wizytom prosić
Czy nom "Cholonek" jego wystyknie?
"Ślonsk ze Janoschym" - byłoby piyknie.