Ô ty Wyspie Szmaragdowy

[broneknotgeld]

Ô ty Wyspie Szmaragdowy

Irlandjo

Ze zielōnych pastwisk cołko wyspa słynie
Szmaragd to prowdziwy w Europy dziedzinie
Zachodnie wybrzeże we fiordach i klifach
Ta Irlandjo zowdy werto bydzie grzycha.

Festiwal św. Patryka 12-17.III.04.

Caluśko Irlandjo terozki sie bawi
Świynty Patryk przeca wiyncyj szczyńścio sprawi
Choć łōn mioł tyż wielgo z tōm wyspōm utropa
Celtōw jednak ôkrzciōł - wert był miana chopa.

"Gaelachty"

Dyć po gaelicku mniyj ludzi chce godać
Moga yno szkryfnōńć iże richtig szkoda.

Kōń

Kōń tyj wyspy piyknym znakym
Łōn w Irlandji znaczy wiela
Wyścigym niy belejakim
Żyje przeca cołko sztela.

Golf

Ktō portmanyj gruby mo
I we golfa piyknie gro
Tego tyż ta wyspa kusi
Biere kije - zagrać musi.

Kawa po irlandzku

Niy yno ze malcym - whiski do niyj trza
Dyć rozgrzywo trzywia i smakuje - pra?

Irlandczyk

Irlandczyk - z nich kożdy tańcować fest umi
Nojlepi jak piwo we gowie zaszumi.

[broneknotgeld]

Irlandzke cmyntorze

Na tych starych zowdy je celtycki krziż
Pleciōnkōm zdobiōny - pewno ô tym wiysz.

Irlandjo

W pieszczōnku Europy szmaragdym jest łōna
Ta prowda ôd downa przeca wszyscy znōmy
Irlandczyk by pedzioł "Ujrzeć jōm i skōnać"
Szczyńściym co my jednak inksze zdanie mōmy.

"Zielono Wyspa"

Na "zielony wyspie" zimy prawie niy ma
Jednak łōna richtig mo wilgotny klimat
Wielgachne pastwiska tyn kolor dowajōm
Baranōw tam wiyncyj niż kaj ińdzi majōm.

Harfa

W herbie harfa widać dyć tyż i we duszy
Niōm do tańcowanio zowdy idzie ruszyć
A jak zaśpiywajōm wōm po gaelicku
To płaczki ze szczyńścio trefiajōm na licku.

Republika Irlandji

W dwudziestym piyrszym łōńskego wieku
Nastoł wolności już czas tu
Ale niy cołkym - tōż wiysz czowieku
Anglio durś siyngo Belfastu.

Irlandczyk

Piegowaty i ryszawy
Zowdy pryndki do zabawy
Takich jest nojwiyncyj tukej
Choć we świecie tyż ich szukej.

"Hurling"

To jest irlandzki hokej na trowie
Refleks do tego musi mieć czowiek.

[broneknotgeld]

Irlandzko "whiskey"

Jōm szkocki "whisky" za przikłod dować
Dyć aż trzi razy trza destylować
Prawiōm co Bōg im doł taki trunek
Kery ôdgōnio kożdy frasunek.

"Tygrys celtycki"

Zowiōm ta Irlandio "tygrysym celtyckim"
Dyć tako niy było przeca tukej wdycki
W Uniji durś jednak do przodka leciała
Z piniyndzy jyj danych nic niy zmarnowała.

I po "saksach"

Irlandczyk na "saksy" już jeździć niy musi
Robota u siebie przeca fest go kusi.

Gōra św. Patryka

Świynty Patryk na gōrze sztyrdziści dni rzykoł
Coby kożdy demōn ze Irlandji zmykoł
Tyż wynże i smoki skiż tego citnyły
Terozki ich niy ma a piyrwyj tu były.

"Crom Dubh"

Piyrwyj jego była ta "Gōra Patryka"
Dobre zbiory dowoł i przed złym ôbrōniōł
Poleku trza było ôd niego ôdwykać
Choć tyn bōg tyż frelki do dzieciokōw gōniōł.

"Guiness"

W Blarney kamiynie łaziōł całować
Stykło "Giunessa" yno skosztować.

Co godać?

Ze świyntym Patrykym ktōś Irlandjo zwiedzi
Yno co mo godać potym na spowiedzi?

[broneknotgeld]

17.III. Świyntego Patryka

Zielono wyspa i take piwo
Tōż już we Polsce tyż to niy dziwo

---

Trza dać pozōr na Patryka
Bo na Ślōnsku zacznie brykać.

Na św. Patryka

Czy skiż Patryka
trza zimie zmykać?

---

Szmaragdowy Wyspie istny patrōnuje
Zdo iże Europa aże cołko czuje.

---

Na wyspa św. Patryka
Rajzujōm niy yno rzykać.

[broneknotgeld]

"Lerna"

Tako ta wyspa Greki nazwali
Bo przeca do niyj już żeglowali.

"Hibernia"

Ze czasōw Rzymu to jeji miano
Bo im tyż była Irlandjo znano.

Milezjany

Trzi i pōł tysiōnca rokōw z gōrōm tymu
Krōl Miled Iberji włodoł kōnskym ziymi
Downiejsze to przeca niż te dzieje Rzymu
Możno skiż legyndy cosik ô tym wiymy

"Wyspa Szmaragdowo" dyć już była znano
Bestōż sie niy dziwcie wojokōm Mileda
Ze rozkazu krōla przez nich podbijano
We jejich włodaniu ôstała ta "scheda"

Miyszały sie tukej plymiona celtycke
Stare ze nowymi przeca przibyszami
Tako dyć urosło plymie gaelicke
Zwane w downych czasach tyż Milezjanami.

Firbolgi

Przed Celtami Firbolgi na Irlandji żyli
Dyć tako mocniejsi tu istnych podbiyli.

Z epoki brōnzu

Z epoki brōnzu tu megality
Wyspa ta piyrwyj spiżym słynyła
Dyć niy ôstali istni tu przi tym
Ajza z Celtami rzōndy sie wziyła.

Ok. 500 r.p.n.e.

Celty sie na wyspa w tych czasach wkludziyli
Ze niymi epoka tu ajzy nastała
Tōż już po swojymu Irlandjōm rzōńdziyli
Kero siyła ze tym na drōga swo brała.

[broneknotgeld]

W czasach rzymskich

Podboje rzymske jōm ôminyły
Chocioż legjōny po blisku były
Dyć siył już brakło by stanōńć tukej
Tako Irlandji przi Celtach szukej.

"Tuatha"

Krōlestwa celtycke - zdo sie ich tu tela
Że ciynżko zrachować - richtig tego wiela.

150 krōlestw

Sto piyńdziesiōnt krōlestw
Jako plaster miodu
Kożdy panym u sia
Tela yno godōm.

W federacyji (V w.n.e.)

Rōd O'neill wybioł sie nad inkszymi
Arcykrōlewski zdowo terozki
Kaj wzgōrze Tara trōn jejich - wiymy
Dyć wnet nadyńdōm tu inksze troski.

Wzgorze Tara

Tōż stōnd – siył władcy przeca niy kryjōm
Rzōndzōm - choć ciyngym to je mecyjōm
Brakuje istnym jakby cysorza
Dyć arcykrola trza tyż powożać.

"Złoty Wiek"

"Złoty Wiek" prziszoł jak Rzym upodo
Irlandjo blaskym niy ćmokym godo
Zdo sie kolybkōm nowy kultury
Kunszt i nauka dźwigo do gōry
Ze tym we zgodzie teologijo
Trōjca ta trzimie koalicyjo.

[broneknotgeld]

Niywolnik świyntym

Niywolnik z Waliji
Tukej ôdsprzedany
Tako w Irlandyji
Umynczōł sie z panym

Uciyk w świat daleki
Francjo, Italyjo
Gōry, lasy, rzeki
Wander niy mecyjo

Dyć na ściyżkach swojich
Durś spotykoł Boga
Bestōż sie niy chwoli
Postawić zaś noga
W irlandzki dziedzinie
Krziż tu wszyskim niesie
Co łōn do - niy minie
Tōż szkryfnōńć to chce sie

Trza po ślōnsku chwolić
Świyntego Patryka
Cud to jego woli
Kej zaczli tu rzykać.

Irlandjo 432 r.p.n.e.

Juzaś we Irlandji Patryk noga stowio
Jakby nowōm erōm sie to tukej zdowo.

Krześcijaństwo

Krześcijaństwo Irlandzke rośnie klasztorami
Zdo sie co w nich richtig ty dziedziny siyła
Ôbrodziyła ziymia podobnoś mnichami
Chocioż przed Patrykym pogańsko fest była.

Irlandzke manuskrypty

Manuskrypty szkryflali mnichy po klasztorach
Dokłodali tako coś do tego dwora
I chocioż niywiela ze tych ksiōng ôstało
Dyć jak na te czasy to i tak niymało.

[broneknotgeld]

Hynryk II Plantagenet

Krōl Anglji tukej już wylōndowoł
Chcioł dlo sia zgarnōńć dziedzina
Kto przeciw niymu bydzie tu stowoł?
Zwyciynsko teroz mo mina.

Angelsko

Angelsko tako wyspa na wieki
Choć siyła tyż przi barōnach
Jakby na trōnie sypane ćwieki
Tako już bywo w tych stronach.

Irlandzke barōny

Irlandzke barōny same chcōm sie rzōńdzić
Co krōlōw angelskich jakby pokurczōne
Tako Hynryk VIII pedzioł im -"Niy błōndzić"
Zdało sie że ze tym samowładzy kōniec

Ziymia mieli ôddać w krōlewske włodanie
Łōn zwrōcić jom istnym - dyć ze łaski swoji
Tōż bunt na tyn rozkaz terozki nastanie
Szmaragdowo wyspa nowōm wojnōm stoji.

Za Elżbiety I

Już tu jeji ôjciec yno z wojskym rzōńdziōł
Chocioż mu godali co we tym pobłōńdziōł
Za czasōw Elżbiety czas tyż niyspokojny
Irlandjo umynczōm aże sztyry wojny.

Za Jakuba I

Krōl Anglikōw ,Szkotōw tyż tu z wojskym bywoł
Hardości barōnow ponoć fest sie dziwoł
O'Neilla pokōnoł w bitwie pod Kinsale
Dyć na tym utropa niy kōńczy sie wcale

We hrabstwa Ulsteru (krōlestwa downego)
Kolōnistōow wsadzioł - kalwinōw do tego
Taki był poczntek niyszczyńścio ty ziymi
Kere trwo do dzisioj - przeca ło tym wiymy.

[broneknotgeld]

Portadown 1641

Tōż katoliki tukej powstali
Dlo protestantōw pogrōm szykujōm
Tysiōnce życie z tym postrodali
Z czasym sie jednak istnym ôdkujōm.

"Wielko Rebeljo"

We Anglji katu krōl ôddoł gowa
Tukej rebeljo rośnie ôd nowa
Tōż Cromwell z wojskym drapko wyruszo
"Czowiek ze ajzy" - krew go niy wzruszo.

"Ironside" ("czowiek ze ajzy")

Śmierć we Irlandji sieje fest gynsto
Na nic powstańcōm ich cołke mynstwo
Tōż lord protektor sie z tym niy smoli
Ginie co trzeci tukej katolik.

Karol II

Krōl angelski choć katolik
Zgoda religijno woli
Protestantōw tu popiyro
Z tym nadzieja tyż ôdbiyro
Tukej sprawie katolicki
Bydzie tako już na wdycki?

Jakub II

Tōż wedle krolewski woli
Gōrōm mo tu być katolik
Dyć zabraknie wnet Jakuba
Protestantōm zaś na chluba.

Boyne 1690

Wilhelm Orański Jakuba bije
Zaś protestantōm lekci sie żyje.

[broneknotgeld]

Wilhelm III Orański

Dlo Irlandczykōw z niego gnymbiciel
Ôd protestanta co mogli czekać
Tōż rzymski wiary nawet tympiciel
Lepi za woda wielko uciekać.

Irlandzko wiynkszość

Irlandzko wiynkszość - ta katolicko
Musi myńszości kłōniać sie nisko
Gōrōm tu przeca te protestanty
Bestōż niyjedyn durś bydzie - anty.

Wydziedziczani

Antykatolicke prawa
Protestantōw bogaciyły
Irlandczykōm niy zabawa
Tracōm dyć poleku siyły

Ziymi majōm coroz myni
A do tego rozdrobniōno
Kedy sie utropa zmiyni?
Irlandjo – poleku kōnosz!

Katolicko szlachta

Katolicko szlachta - choć sama gnymbiono
Dziyrżawcow durś dusi - chłop z głodu już kono
Szmaragdowo wyspa wyżywić niy umi?
Czy ktōś tu biydoka naprowdy rozumi?

Z głodu

Z głodu chłop do bandy idzie
Kto rabuje w myńszy biydzie
A że szlachty niynowidzi
"Fachu" tego sie niy wstydzi.

Jonathan Swift

Choć z Guliwerym kajś zawandrowoł
Dyć we katedrze dubliński dowoł
Głos - coby polić co ôd Anglikōw
Coby niy skōmpić w ta strona blikōw
Z kery parlamynt irlandzki przidzie
Zdało co w kōńcu tu tako bydzie.

[broneknotgeld]

"Ochotniki" - 1782

Anō, Irlandczyki sie terozki zbrojōm
Za niypodległościōm richtig mocno stojōm
Ôziymdziesiōnt tako zebrało tysiyncy
Nadzieja kupluje - czy bydzie ich wiyncyj?

Parlamynt w Dublinie

Brytyjsko Korōna we kōńcu zgodziyła
Irlandjo utropōm dyć i dlo niyj była
Niychej łobradujōm sie ô sia w Dublinie
Bele krōla Anglji władza niy przeminie.

We tym parlamyncie

Katoliki wiela do godki niy mieli
We kraju wiynkszościōm, dyć co tref im ścieli?
Majōm protestantōw ło prawa durś prosić?
Rōwności w religji sie niy do ôgłosić.

Kej Lōndyn zwolōł

Ziymia kupować doł katolikōm
W Ulsterze bestōż zdrożała - blikōm
Jako skiż tego bydzie ôstuda
Skuli religji grzychy - niy cuda.

Ulster 1791

Dwie religije jakby sie godzōm
Chyńci do reform cuzamyn rodzōm
Angliki tropiōm - co dali bydzie?
Cołkym wykludzić z wyspy im przidzie?

"Skuplowane Irlandczyki"

Klub majōm w Belfaście, klub majōm w Dublinie
Kej zgoda buduje czy złość ich ôminie?
Angljo drap potympio! Angljo sie ich boji!
We wojnie z Francyjōm. Co Irlandjo zbroji?

[broneknotgeld]

Ôjciec powrōzła w Belfaście robiōł
Syn adwokatym - czy coś nazgobiōł?
Chcioł dyć Irlandjo w jedno skuplować
Przidzie mu za to przed Bogym stować?

Drapko wygnanym do Hameryki
Z niyj ku Francyji keruje bliki
Czy Paryż richtig go wspiyrać bydzie?
Ja - dyć niywiela ze tego przidzie.

Irlandjo z Francyjōm? 16.XII.1796

Anō - sie richtig z tym dogodali
Tōż ze Francyji szify wysłali
Burze Anglikōw uratowały
Kej wylōndować wojsku wzbrōniały
Na psinco tako zdała wyprawa
Dlo "Skuplowanych" przegrano sprawa.

Stan wojynny we Ulsterze

Niy ma co dziwać - Angljo ścisnyła
Za "Skuplowanych" teroz chyciyła
Kierzy niy citli - we hereszt gnajōm
Anō - utropa wielgo z tym majōm.

Ferajna Orańsko (1795)

Oranżystōw w tym poczōntek
Skiż Wilusia Orańskiego
Protestanckim kożdy kōntek?
Tympiōm co katolickego!

Tyż tych tympiōm co kuplujōm
Chocioż dzieli religijo
"Skuplowanych" zdo - mordujōm
Ło jeronie! Kryjolyjo!

Wielgo rebelyjo - 1798

Sie buntujōm Irlandczyki
Iże gnymbiōm durś Angliki
"Skuplowanych" siyła mało
Dyć Irlandjo w ōgniu cało
Chop-katolik z protestantym
Krew przelywo niy ło kanty
Szlachcic chopa tko w mogiła
Tōż Irlandjo - żeś krwawiyła
Ze tym rokym zdo co ciebie
W piekle trzimiōm durś, niy w niebie.

[broneknotgeld]

Siyrpiyń 1798

Wiycie - zaś Francyjo płynie
Hrabstwo Mayo w ty dziedzinie
Tam wojska wylōndowały
Dyć niywiela zwojowały
Republika z Irlandyji?
Trza z tym wiyncyj tragedyji?

W hrabstwie Donegal

Wolfe Tone, Francyjoki
Tu londujōm, dyć boroki
Za "Skuplowanego" życie
Zdo im wiela - pewno wiycie

Co ôstało z tym istnymu?
Kej bez ôgnia niy ma dymu
Marnie skōńczōł we hereszcie
Tako szkryfna - tymu wierzcie.

Tōż mono unijo

Anō - sie Anglikōm teroz tako zdało
Parlamynt w Dublinie - w niym utropa cało
Lepi Irlandczykōw ściōngnōńć do Lōndynu
W Izbie Gmin sto miejscōw - bydzie myni dymu
Prymier Pitt jak yno to ofyn ôgłosiōł
Irlandczykōw wiela do tego niy prosiōł.

We Dublinie

Parlamynt w Dublinie sōm sie rozwiōnzuje
Ktōsik sie tym tropi, a ktōsik raduje
Lōndyn niyjednego dyć przeca tyż kusi
Czy nowo utropa przilyźć ze tym musi?

Irlandjo w uniji

Chop ciyngym był biydny
Szlachcic durś sie wadziōł
Lōndyn dyć niczymu
Tukej niy zaradziōł
Tōż wartko zawere
Tymu niy dziwejcie
W historyjo dali
Ździybko pokukejcie.

[broneknotgeld]

Robert Emet 1803

Wiycie - syn doktora protestantym był
Dlo wolny Irlandji niy chcioł skōmpić siył
Tōż prōbowoł zamek dubliński zdobywać
Ze "Skuplowanymi" tryjumfu zożywać

Dyć na psinco wszysko, kej źle zrychtowane
Emetowi stryczek, potym ćwiartowanie
Tela iże cołkym go niy przepōmnieli
Kierzy tu Anglikōw niyradzi widzieli.

Daniel O'Connell

W hrabstwie Kerry urodzōny
We Francyji wykształcōny
Tōż kej do dōm wrōciōł potym
Chycioł wartko ty roboty
Z kery wolność lyźć zdowała
Choć Korōna przeciwiała

Chcioł być tym "Czowiekym Ludu"
Chcioł doczekać tukej cudu
Katolikōw zrōwnać w prawach
I czuć wolnym! Śnik czy jawa?

"Czowiek Ludu"

Już w Lōndynie, w parlamyncie!
Bydzie mioł O'Connell wziyńcie?
Katolikōw w prawie dźwigać
Przed tym niy chcioł istny migać
Z tym sie richtig mu udało
Irlandjo uratowało.

"Niykorōnowany krōl Irlandji"

W Izbie Gmin istnego tako mianowali
We Irlandji tymu teroz dziwowali
O'Connell dyć staroł wylyźć ze uniji
Tako coby stało to bez tragedyji
Coby krwi niy przeloć, coby yno w prawie
Podźwgać dziedzina - tōż godo ciekawie
I wiece rychtuje na wyspie zielony
Takim go na wieki tu zapamiyntōmy.

[broneknotgeld]

"Niykorōnowany krōl Irlandji"

W Izbie Gmin istnego tako mianowali
We Irlandji tymu teroz dziwowali
O'Connell dyć staroł wylyźć ze uniji
Tako coby stało to bez tragedyji
Coby krwi niy przeloć, coby yno w prawie
Podźwgać dziedzina - tōż godo ciekawie
I wiece rychtuje na wyspie zielony
Takim go na wieki tu zapamiyntōmy.

Mōr kartofli 1845

O’Connell wiela mōg wszyndy gymbować
Dyć trza było jodło familijōm dować
Kartofli brakuje – głōd ludzi fest kosi
Pōn Bōg sie zmiłuje? Na darmo lud prosi

Kej na czynsz brakuje, dziedzic co chce biere
Kościotrupym biydok – życie w nim niy were
Szmaragdowo Wyspa trułōm dlo miljōna
A wiela głōd wygnoł na amant ze dōma?

„Szify-truły” płynōm dyć do Hameryki
Tam ich niynowiści zoznajōm Angliki?

Głōd w Irlandji

Głōd we Irlandji O'Connellowi
Plany pomotloł - kożdy to powiy
Modo Irlandjo sie ôbudziyła
Kero godała - Niych rzōńdzi siyła
Niych krew sie leje, ciyrpiōm Angliki
Trza im w Irlandji taki wyćwiki.

Daniel O'Connell - 1847

Pomarł "krōl Irlandji"
Pomarł i co stało?
Wyzwolić dziedziny
Dyć mu niy udało

Dali wyspa ciyrpi
Ciyrpiōm Irlandczyki
I ku Hameryce
Tyż kerujōm bliki.

[broneknotgeld]

Wiosna Ludow 1848

Gowy we Kilkenny dzwigli insurgynty
Dyć kaj niy ruszyli wszyndy yno piynty
Ksiyndze niy poparli, lud z głodu słabuje
Insurekcjo zwijo kej mało sztimuje.

W latach piyńdziesiōntych

W latach piyńdziesiōntych ziemia wiyncyj rodzi
Nikerym przi tymu zdo lepi powodzi
Bestōż myni marzōm ô niypodległości
Dyć ideja w duszach conikerych gości.

James Stephens

Połednie i zachōd Irlandji łōn prawie
Ôbłazi i godo iże śnik na jawie
Chnetko mono bydzie, chnet niywola straci
Dyć trza ô to starać – niy siyngać durś laci.

Irlandzke Bractwo Republikańske
17.III.1858

Tōż sie stało tako we dziyń Patrykowy
Ferajna chce dźwigać tyn kōncept niy nowy
Tyranōw ôbalić, wyzwolić dziedzina
Stephens przirychtowoł zdo nowo ańbryna.

„Fyniany”

W Hameryce Bractwo „Fynianami” zwali
Armjōm Republiki ich tam minowali
Niy było w tych czasach dyć i tam spokojnie
Hameryka toplo w secesyjny wojnie.

Irlandzko Armjo Republikańsko

Ano – w Hameryce, na światowy binie
Sie zaczło co wyspa teroz niy ôminie
Choć za oceanym armjo niy powstała
Irlandjo ruszyła, brōń we rynce miała.

[broneknotgeld]

Irlandjo 1867

Tōż sie IRA ciyngym zbroji
Partyzanckōm wojnōm stoji
Z Hameryki jōm wspiyrajōm
Brōń na wyspa przisyłajōm

Niy ma leko z tym Anglikōm
Szmaragd krwawi – tako blikōm
Partyzantōw ciyngym wiela
IRA groźno – szkryfna tela.

IRA w Anglji

IRA w Anglji tyż rojbruje
Cosik szpryngnie, krwi napsuje
Mustrym inszym terrorystōm?
Ech, Irlandjo niy je zistōm.

William Eward Gladstone

Prymierym w Lōndynie – pokoju durś szukał
Na Irlandjo jako na chorego kukoł
Kościōł katolicki zrōwnoł z protestanckim
Reformować staroł a niy „cisnōńć wancki”

Niy szło już dzierżawce ze ziymie rugować
Dobrze urodzōnym trza było haltować
Choć tako Gladstone ôgyń richtig dusi
Zaś autōnōmjo niyjednego kusi.

Ku autōnōmiji?

Tōż zaś richtig chcieli parlamentu prawie
Kery by w Dublinie radziōł we ich sprawie
Ô sia u sia chcieli mieć nojpiyrsze zdanie
Czy Lōndyn do zwola? Co terozki stanie?

Charles Steward Parnell

Mioł w hrabstwie Wicklow ziymi dość Wiela
W Izbie Gmin zicnōł – niy yno tela
Niyroz Anglikōm tam groł na nerwach
A jak rozgodoł – na psinco przerwa

Kery w pamiyńci mioł O’Connella
Tyn kukoł terozki na Parnella.

[broneknotgeld]

Michael Davitt

Rodzicielōw z ziymi mu wyrugowali
Tako sie do Anglji w biydzie przekludzali
Michael we werku drap postradoł rynka
Jedynoście rokōw klupło mu w ta mynka

Niy dziwota iże potym stoł „Fenianym”
Niy dziwota iże hereszt był mu dany
Stoł za tymi kierzy ziemia tu ôrali
Choć we wiynkszy czyści inksi żniwowali.


Irlandjo 1877

Pōnoć cołke lato we Irlandji loło
Zgniyło co na polach – niy było wesoło
Z Hameryki zbożo zaś we zatrzyńsiynie
A czynsz jako płacić? Stōnd wielge ruszynie
Kej szlachta dziyrżawcōw zaś chciała rugować
Kōme we Irlandji w ich ôbrōnie stawać?

Irlandzko Narodowo Liga Ziymsko

Parnell ze Davittym Liga założyli
Niy yno dziyrżawcōw dyć tako chronili
Kościōł katolicki mocno istnych wspiyroł
Kery żył z roboty – na Liga zaziyroł.

Bojkot

Anō, w hrabstwie Mayo Boycott chcioł bogacić
Na ziymi co prziszło dzierżawcōm utracić
Dyć za to nikt niy chcioł my rynki podować
Wiela ło tym szłoby możno połosprowiać
Dyć styknie co miano istnego Boycotta
Ło czymś dzisioj świodczy – to niy je gupota.

Ustawa ziemsko Gladstone’a

Tōż dzierżawcom gwarantował
Coby nikt ich niy rugowoł
Kej czynsz płacōm, kej ôrajōm
Źle z tym było wpiyrw – niy bajōm

A kej dobrze gospodarzōł
Kej wykludzić chcioł, sie ważył
By kajś bardzi być w proficie
Pan dopłacic mōg – tōż wiycie.

[broneknotgeld]

Co sie stało we Dublinie?!

Co sie stało we Dublinie?!
Dyć zażgali Cavendischa!
Chyńć do reform ze tym minie
Z tym złowrogo teroz cisza

Za to Izba Gmin sie sroży
Coby karać Irlandczykōw
Zło sie ze tym ciyngym sroży
Czy trza wiyncyj niyboszczykōw?

Liga Ziymsko

Liga brōni, atakuje
Liga rośnie, sie niy suje
Liga Ziymsko siyły zbiyro
I na Lōndyn tyż zaziyro
Wiycie – skiż autōnōmiji
Bez niej wiyncyj tragedyji.

Welunek do Izby Gmin 1885

Zdało co welunek richtig uraduje
I autonomio Irlandji sztymuje
Zdało – choć mandatōw erbła Liga Wiela
Choć Angliki mōgli Irlandji dać tela
Dyć sie historyjo kulnyła znaczy
Ulster we Irlandji tyż swoje złōnaczy.

We Ulsterze

We Ulsterze protestanty kuplować niy chcieli
Katolikōw we Irlandji durś za inszych mieli
W Szkocji były ich korzynie dyć wrośli już tukej
Autōnōmjo im utropōm – w strachu grzychu szukej.


Belfast

Belfast w Ulsterze urosnōł w siyła
Na lnie podźwigoł, port, stocznia była
Zdało – bogaci go industry jo
Dyć niy Lachecie, niy komedyjo.

[broneknotgeld]

A Zakōn Orański

Przeciw „papistōm”, przeci ich prawu
Autōnōmijōm tyż sie niy „bawiōł”
Straszōł co wojna wartko rozkulo
Z autōnōmijōm miało wyńść „nulo”.

Izba Gminōw – 1886

Autōnōmijo dziedzinie dali?
Niy! Ôdciepniyńcie przegłosowali
Ze tym przigasła gwiozda Parnella?
Anō - ôstało ze niej niywiela.

Z kōńcym XIX wieku

Czas dlo kultury nastoł celtycki
Literatura dziedziny kwitnie
Ôdrodzo jynzyk tyn gaelicki
Co echt irlandzke ôdrodzo piyknie.

Liga Gaelicko

Ferajna po to coby dźwigała
To co dziedzina zocnego miała
I historyjo, i ta kultura
Irlandczyk łazić mo z gowōm w chmurach
Sie Anglikowi ciyngym niy kłōniać
Niy dać sie nigdy robić we kōnia.

I zaś sie szajsli – 1893

Gladstone chciōł autōnōmiji
Był pewny – ze tym mniyj tragedyji
Już Izba Gminōw dowała zwola
Dyć Izba Lordōw haltła – niy chwola
Niy chwola – wiym co dali sie dzioło
W Irlandji ciyngym dyć niywesoło.

[broneknotgeld]

Kej wiek nowy nastoł

Kej wiek nowy nastoł co sie pomiyniyło?
Jako Irlandczyōm u sia teroz żyło?
Sie autōnōmijo jednym ponoć marzy
Inkszym niypodległość – co tref im przydarzy?

Arthur Griffith

W Dublinie drukorzym
Potym blysnōł piōrym
Na szala położył
Niypodległość – sznōry
Co dusiyły – chciołby powyrywać
Dyć czy sie to udo? Przidzie nōm podziwać.

John Mc Bride

Republikanin ze hrabstwa Mayo
Coś ô Irlandji wolny durś bajo?
Biōł z Anglikami we burski wojnie
W Irlandji chnetko niy za spokojnie.

Welunek 1910 – Izba Gminōw

Po welunku liberały
Prawie tela głosōw miały
Wiela tyż kōnserwatysty
Kogo potrza im do zisty?

Anō – potrza Irlandczykōw
Trza w ich strōna wiyncyj blikōw
Zdo autōnōmijōm kusić
Trza pochwalić, niy durś dusić.

John Redmond

Partji irlandzki istny przewodziōł
Autōnōmiji kōncept zaś rodziōł
Prziznać dziedzinie parlamynt może
Tōż Redmond rzyko – „Dej Panie Boże”.

[broneknotgeld]

Edward Carson

Carson przeciwioł sie w parlamencie
Autōnōmiji ideji zocny
Nikōmu ziymi niy grozi wziońcie
W Irlandji teroz katolik mocny

Tōż zdo mu psincym cołko ustawa
Coby mioł Dublin sie rzōńdzić u sia
Ulster mu klackoł, tam słyszoł brawa
Kaj protestancko durś wiyrchym dusza.

440 tysiyncy

Tela tysiyncy aż Ulsterczykōw
Niy chce w Irlandji autōnōmiji
Handszrifty kładōm bez katolikōw
Drapko z tym przidzie czas tragedyji?

Ulsterske Ochotniki

Tymu niy dziwejcie – wartko tukej zbrojōm
Chcōm żyć przi Anglikach – za tym richtig stojōm
Gywery ściōngnyli drapko z zagranicy
Sto tysiyncy ludzi jejich „korpus” liczy.

Irlandzke Ochotniki

Tōż Połednie tyż sie zbroji
Kej „pod brōniōm” Ulster stoji
„FF” na odznakach majōm
„Fianna Fail” – wcale niy bajōm
Jako w mitach bohatery
Spokopi to conikery.

Na szejść rokōw

Na szejść rokōw we Ulsterze
Hrabstwōw szōstka przi Korōnie
Redmond zgoda doł w ty wierze
Iże potym ze tym kōniec.

Rok 1914

Wartko prziloz rok sztyrnosty
Wartko dlo autōnōmiji
Rok wojynny, tōż niyprosty
Czas kolejny tragedyji.

[broneknotgeld]

Szli na wojna

Szli na wojna ochotniki
Ze Belfasu, ze Dublina
Kaj frōnt kładōm teroz bliki
Zdo tym żyje ta dziedzina

Krwi niy szczyndzōm, życie tracōm
Ôrderami Angljo suje
We Francyji fest łōnaczōm
Czy dziedzina to raduje?

Partjo Irlandzko

Partjo Irlandzko – ta przi Redmondzie
W swojich frōntowcach widzi nadzieja
Iże już Ulster ôdpowiy – „Znōm cie”
„W autōnōmiji zocno ideja”.

A we Ulsterze

A we Ulsterze krew tyż rachujōm
Nad Sommom bijōm ich regimenty
Ze Angljōm bardzi tako kuplujōm
Irlandjo durś mo dlo nich coś z piynty.

Sinn Fein – „My sami”

Za niypodległościōm partjo tako stoji
Kej Anglji niy wiedzie, Irlandjo niych zbroji
I autōnōmijo psincym istnym zdo się
Kej czas wojny, Anglji trza zagrać na nosie
Trza z kolan podźwigać Wyspa Szmaragdowo
Sinn Fein tego czeko, Sinn Fein za tym stowo.

Arthur Griffith – Sinn Fein

Arthur Griffith Irlanczykōw we Sinn Fein kuplowoł
W bōj nacyjo ku wolności istny by kerowoł
Zdo autōnōmijo piyntōm – marzy republika
Dublin niychej jako Lōndyn – bić ô to, niy rzykać.

[broneknotgeld]

James Connolly

Tōż irlandzki socjalista
We Szkocji rodzōny
Strajk dlo niego jako zista
To wcale niy krōmy
Robotnikōw mo we zocy
Chce im ulżyć w doli
Brōń mo im dokłodać mocy
W boju z wolny woli.

Irlandzko Armjo Obywatelsko

Connolly „Armji” założycielym
Kero przi strajkach mo brōnić ludzi
Coby niy boli, by strzimać chcieli
Niych sie Irlanjo cołkym ôbudzi.

Padraic Pearse

Dyrechtor szkoły – niy wojok przeca
Skiż jego wiary w ta strōna leca
Skiż wiary iże Irlandjo dźwignie
Kej krew irlandzko niy yno kidnie
Tōż trza w bōj ruszać, trza jōm przelywać
Sie historyjo aż bydzie dziwać?

Insurekcjo Wielkanocno – 24.IV.1916

W ciynżkim roku wojny, w druge świynto prawie
Śmiyrgust zaczōn krwawy w Irlandji na jawie
Sinn Fein wynokwiyła? Ktōś ludzi zbuntował?
Nikery z giwerōm za wolnościōm stowoł
Insurgynty gowy dźwinyli w Dublinie!
Czy cołko Irlandjo tyż to niy ôminie?

Po prawdzie, niywielgo insurgyntōw siyła
Wiynkszość tych „we siyłach” na frōncie dyć biyła
Wiynkszość co z giwerōm sie dobrze radziła
Przi Anglikach przeca w Francyji stanyła
Dublin jednak blysnōł na krōtko wolnościōm
Zdo co Lōndyn tako pierōńsko rozzłoszczōm

Stykło kanōnierki, ze rzeki grzmōciła
Stykło żdziybko wojska, sie wolność skōńczyła
Dublin Insurgyntōw niy ôbrōniōł prawie
Sinn Fein spokopiyła co drapko po sprawie
Pora setek ofiar insurekcjo wziyła
I jako rozblysła, w ôziym dni straciyła.

[broneknotgeld]

Stan Wojynny

Anō, niy dziwota, Angliki sie srożōm
Dusz sztyry tysiōnce drap za kratki wrożōm
Sinn Fein, insurgynty tako we hereszcie
Zlitujōm Angliki? Niy cołkym - w to wierzcie
Dyć i niy dziwota, wojna przeca była
Irlandjo by Angljo tako ôsłabiyła.

Dni majowe 1916

Dni majowe sōm by krwawić?
Insurgyntōm śmierć chcōm jawić
Prowodyrōw rozstrzylali
Tōż Irlandjo krwawisz dali

Kukosz kōńca synōw twoich
Janioł śmierci przi nich stoji?
Nic żeś mało ich wspierała
Krew ich to dlo ciebie chwała

W dni majowe sie ôudzisz?
Gniyw twōj rośnie? Gorkość studzisz?
Zdało na coś ich ciyrpiynie?
Ruszy teroz cie sumiynie?

Boże Narodzynie 1916

Czyńść heresztantōw już na wolności
Radość we dōmach nikerych gości
Żol tych stracōnych, tych za kratkami
Co dali bydzie z Irlandczykami?

Wielkanoc 1917

Amnestjo – wolność dlo insurgyntōw
Griffith i Collin niy widzōm piyntōw
Shinn Fein niypodległościōm durś żyje
Z idejōm wielgōm wcale niy kryje
Po insurekcji mo teroz wziońcie
Mandatōw chyci we parlamyńcie.

[broneknotgeld]

Rosła w siyła

Anō – Sinn Fein rosła w siyła
W parlamyncie nawet była
We heresztach sztrajki z głodym
Niypodległość marzy modym
Tōż zaś po kryjomu zbrojōm
Za wolnościōm swojōm stojōm.

Kwietniowo branka

W ôziymnostym roku – wiycie
Mus na szali kłaść już życie
Mus Anglikōm dać rekruta
Dlo Irlandji w tym pokuta?

Trza autōnōmiji czekać?
Niy na nerwy już człowieka
Ulster mo być przi Anglikach?
A co w nim po katolikach?

Tōż i Kościōł sie sztrabuje
Niyjednymu niy sztimuje
W Izbie Gminōw fest już were
Sie Irlandzko Partjo biere
Weg – kej ich dziedzina krwawi
Czy ofiara ich wybawi?

Powojynny welunek – grudziyń 1918

Sinn Fein welunek tukej wygrała
Dyć Lōndyn psincym już bydzie miała
Chce republiki, chce prezydenta
Chce parlamyntu – Dublin niy piynta

Nic co Angliki przeciw niyj bydōm
Wolność we wercie krwi, tōż niy biydōm
Nic co z tym idzie wojna dōmowo
IRA sie zbroji i za tym stowo.

„Prezydynt” Eamon de Valera

Przeżył powstanie, te „Wielkanocne”
Hereszt angelski przetrzimoł tyż
W Irlandji jego noty sōm mocne
W Dublinie „piyrszym” terozki – wiysz.

[broneknotgeld]

IRA - Irlandzke Ochotniki

Sinn Fein - wolności zdo politykōm
IRA jyj siyłōm – ze strachym blikōm
Kej czynsto godo yno giwera
Wojna dōmowo w Irlandji teraz
Na wicekrōla aż zamachnyli
Choć fest przi tymu richtig szajsnyli
Choć niylegalno partjo już potym
Prawo Anglikōw tu zdo – gupoty.

Samorzōndowy welunek – styczyń 1920

Choć niylegalno – Sinn Fein wygrywa
To Irlandczykōw wcale niy dziwo
Psincym Anglikōw wszyske starania
Wiyrchym Irlandjo – czy wos cygania?

Ku republice

Ku republice w Irlandji cisnōm
Zdo co Angliki przi tymu skisnōm
Na psinco wojsko i policaje
IRA im przeca tukej niy pszaje

Krziwda, utropa, krew ziymia zlywo
W tyn rok dwudziesty – kogosik dziwo?
Ktō partyzantym? Ktō insurgyntym?
W tyn rok dwudziesty żodyn niy świyntym.

Maj 1921

Angljo welunek z tym ôgłosiła
Pōłnoc na Belfast tako kuknyła
Połednie swoje mo we Dublinie
Dwa parlamenty teroz w dziedzinie

Zdo tako bydōm na amant dzielić
Co kejś kuplować we jedno chcieli
Co ciyngyj przeca w nikerych gowach
Co niy poradzōm durś tu rychtować.

[broneknotgeld]

Październik 1921

Kōnferyncyjo prawie w Lōndynie
Angljo z Irlandjōm wojna ôminie?
Terozki prawie sie dogodajôm?
Czy bić zaś bydōm kej durś niy pszajōm?

Lloyd George sie staro coby dogadać
Wieść tako w kōńcu idzie w świat podać.

Wolne Państwo Irlandzke – 5.XII.1921

Tako sie stało – traktat szkryfniōny
Irlandjo jako dōminium mōmy
Choć bez Ulsteru – to niy udało
Tōż niyjednego niy radowało

Dyć Lōndyn niy doł Irlandji „swojich”
Sinn Fein ze IRA niych tam niy broji
Połednie kaj chce lyźć może sztrasōm
W hrabstwach Pōłnocy uńji niy zgaszōm.

Ulster 1921

Szejść ze dziewiyńciu hrabstwōw Ulsteru
Angliki do sia dyć ciyngym bierōm
Trzi katolicke przi Irlandczykach
Dyć na ta szōstka durs bydōm blikać.

Irlandzke podziały

Anō, jako zowdy je we polityce
Dublin ôd ôstudy zaczōn nowe życie
Jedni protestanckich hrabstwōw niy żałujōm
Inksi durś tym tropiōm, wcale niy radujōm.

Źle rachowoł

Collins rachowoł co hrabstwa z czasym
Chycōm sie wszyske irlandzki sztrasy
Dyć nawet IRA skiż tego dzieli
Jedni z tym godzōm, drudzy niy chcieli.

A w Dublinie

A w Dublinie, w parlamyńcie
Ôbie strōny miały wziońcie
Traktat dyć ratyfikujōm
Choć sie dzielōm, niy kuplujōm.

[broneknotgeld]

A w Dublinie

A w Dublinie, w parlamyńcie
Ôbie strōny miały wziyńcie
Traktat dyć ratyfikujōm
Choć sie dzielōm, niy kuplujōm.

Za traktatym

Griffith z Collinsym tego sie trzimiōm
Ze czyści IRA armjo państwowo
Dyć tym co przeciw tyż tu niy dziwiōm
Czy przidzie richtig wojna dōmowo.

Przeciw traktatowi

Valera przeciw, ze czyńsciōm IRA
Wojna dōmowo stanie na gyrach?
Kej im sie marzy Irlandjo cało
A to co terozki zdo za mało.

Wojna dōmowo

Anō – złe nojgorsze stowo
Prziszła już wojna dōmowo
Collins kōńca niy dożyje
W krwi Irlandjo zaś ôbmyje
W krwi patriotōw ze strōn ôbu
Griffith tyż doczeko grobu
Niym Valera brōń ôdstawi
I we państwie pokōj zjawi.

Wolne Państwo Irlandzke 1923

Kej sie już uspokojyło
Na pōł wieku podzielyło
Zdo po rōwno polityka
Roztomajcie prziszło klikać
Na tyn traktat z Anglikami
Już pewnkiym wiycie sami.

Fine Gael – „Plymie Irlandji”

Tōż ta partjo za traktatym
Im niy wadzi ôstać na tym.

[broneknotgeld]

Katoliki we Ulsterze

A katoliki ze tym niy godzōm
Co protestanty ku Anglji wodzōm
Dyć bojkot na nic terozki zdo sie
Pōłnoc Połedniu tyż gro na nosie.

Wolne Państwo Irlandzke 1939

Choć Angljo teroz wiela kusiyła
Coby Irlandjo z Niymcami biyła
Valera jednak „rynce umywał”
Tymu w Irlandji czowiek niy dziwoł.

A Belfast krwawi

Anō, w sztyrdziestym piyrszym naloty
Luftwaffe bōmby ciepie, a potym
Gore we dole, śmierć niy przebiyro
Zdo, wojna tukej prziszła dopiero.

Republika Irlandji – 1948

Dublin zatwierdziōł miano dziedziny
Sie radowali tym możno driny
Dyć szejść dwadziścia hrabstwōw w tym ino
Pōłnoc szajdōngu durś dopōmino
Pōłnoc niy myśli coby kuplować
Coby być z Angljōm, za tym jyj stować.

A Lōndyn na to

A Lōndyn na to co mōg ôdpedzieć?
Krōl w republice na czym mōg siedzieć?
Dlo brytyjczykōw to niy gupoty
Irlandjo ôd sia – wele Wspōlnoty.

Jako przed wojnōm

Dyć gospodarczo jako przed wojnōm
Żyje rolnictwym i wsiōm spokojnōm
Cłym jako piyrwyj import tyż dusi
Ktōś za robotōm wyjeżdżać musi

Pōłnoc rozkwito, Belfast durś rośnie
Czy na Połedniu śniōm już ô wiośnie?
Kościōł haltuje, kultura drzymie
Fanaberyje cynzura trzimie.

[broneknotgeld]

Irlandjo Pōłnocno

Kej już Połednie echt republikōm
Pōłnoc tym bardzi widzi Anglikōm
Tōż uńjōnistōm to gwarantujōm
Co we Wspōlnocie ich potrzebujōm
Belfast kamrata mo we Lōndynie
Na chwała trōnu we ty dziedzinie.

Irlandjo Seana Lemassa

Anō, kej istny prymierym został
Chcioł coby kraj tyn tyż szwōngu dostoł
Gyszeft chcioł robić ze Anglikami
I industryjo dźwigać ryncami
Kerych na roli zdało za wiela
We tym nadzieja – szkryfna tu tela.

Dublin – Belfast - 1965

Lemass dogadać z O’Neillem chcioł
Ôbu zdowało co to niy fioł
Coby skamracać te dwie dziedziny
Puszka Pandorry wybuchnie driny?!

Myńszość w Ulsterze dźwigo drap gowy
Prow sie dōmogo - kōncept niy nowy
Marszōw „zielōnych” terozki wiyncy
Ktōś tym raduje? Dyć Ulster myczy!

Pōłnocnoirlandzki Ruch Prow Obywatelskich

Anō, ta ferajna „zielōnych” śmiy dźwigać
We prawach po szkodzie, tōż w tym jyj niy migać
Policjo Ulstersko rozgōni pałami
Dyć durś protestujōm! Czy bydōm w tym sami?

Lōndōnderry 1969

Oranżysty maszyrujōm
W grodzie co wpiyrw Derry zwany
Co „zielōne”przirychtujōm?
Łogyń! Bergi! Wiela szpany!

Policaje już niy radzōm
Wojsko sciōngnōm na retunek
Ulster dychnie kej niy czadzōm?
Czy w tym dobry pomyślunek?

[broneknotgeld]

Wojsko w Ulsterze

Zdało co dychnōm i katoliki
Kej tu pod brōniōm prziszli Angliki
Zdało co krew sie już niy poleje
Dyć IRA szkryfnie inaksze dzieje.

IRA

IRA w szejśćdziesiōntych latach
Wpiyrw przigasła – jak bić brata?
Z czasym dyć sie podzielyła
Politykōm jedna żyła
Drugo „wojna” szykowała
Durś ô Ulster bić sie chciała.

„Wojna” z IRA

We Ulsterze drap wojoki
Przeciw IRA robiōm kroki
Drapko juzaś krew poleje
„Wojna” z IRA – tōż źle dzieje

Protestanty – katoliki
Z ôby strōnōw durś złe bliki
Ciyngym marsze i pochody
Skiż ôstudy, a niy zgody

Ulster krwawi, Ulster tropi
Keryś kogoś tu spokopi?
Ciyngym tyn „stan wyjōntkowy”
Ciyngym gorke bardzi gowy.

Lōndōnderry 30.01.1972 „Krwawo Niydziela”

„Krwawo Niydziela” we Lōndōnderry
Kej wojsko strzylo to niy sōm bery
Trza porunostu cywilōw chować
Trza pōmścić?! IRA durś dźwigo gowa!
Bōmby we Anglji już tyż podkłodo
Spokōj daleko, kej tako „godo”.

[broneknotgeld]

A republika gōni

A republika Europa gōni
Choć na Połedniu IRA tyż chrōni
Irlandjo trzimać geszeftu staro
Zdo co przi tymu terozki jaro
Zdo co rozkwito i drap bogaci
Czasu terozki wcale niy traci.

We EWG – 1973

Anō, Irlandjo w tym wartko dźwigo
Ze industryjōm w przod drapko migo
Wiela tyż dzieje richtig w kulturze
Dziedzina zdo być terozki w gōrze
Kej kwitnie sztuka, literatura
Dublin ze gowōm chce lyźć we chmurach.

Irlandzki fyminizm

Tymu niy dziwejcie iże tu ôdzywo
Chocioż Kościōł swoje ciyngym zbiyro żniwo
Skiż aborcji styknie jechać do Belfastu
I antykōncepcji drapci przidzie czas tu.

A we Ulsterze

Po Krwawy Niydzieli w Ulsterze źle dzieje
Angljo tu parlamynt teroz rozwōnzuje
Dyć czy skuli tego dlo pokoju dnieje?
IRA swoje robi, IRA niy prōżnuje

Katolikōw godzić ze protestantami?
Zdo to niymożebne – pewno wiycie sami
I Żelazno Dama tymu niy zaradzi
Choć swoje „trzi grosze” do Ulsteru wsadzi.

Recesyjo

Prziszła recesyjo tako do Ulsteru
I za republika jyj „demōny” bierōm
Rośnie bezrobocie, rośnie inflacyjo
Utropa z tym teroz, zdo chnet tragedyjo.

[broneknotgeld]

Republika Irlandji 1977

Fianna Fail w Dublinie juzaś władzy chyto
Naôbiycywali – jakby sie ktō pytoł
Tōż wydatki rosły, dług epny w budżecie
Państwo chnet bankrutym – tako sie tu plecie.

Charles Haughey

Fianna Fail przi niymu zdało co ôdżyła
Republikōm dugo terozki rzōńdziyła
Choć w partyji siyła yno myńszościowo
Z koalicjantami wiyrchym ciyngym stowo

Haughey „cudym” państwo podźwigoł z kryzysu
W „kalny wodzie” pływoł dyć zrychtowoł miszōng
Ze kerego przidzie dali kraj budować
Szmaragdowo wyspa wiyrchym juzaś stowiać.

Mary Robinson

Co dziewiyńdziesiōnte lata tu prziniesōm?
Istno prezydyntym – fyministki cieszōm
Z downa im kamratkōm – rada liberałōm
Zesel prezydenta ze władzōm niymałōm
Kej kobiyta zicnie, niy pyndzyjōnista
I dlo fyministki polityczno zista.

Referyndum 1992

Przi welunku referyndum
Skiż aborcji, prowdy tako
Pokozane teroz zrzyndōm
Iże coś przi tymu krako

Tōż Irlandki za granica
Dali bydōm rajzowały
Niy wystyknie im grōmnica
Choć niywiela w tym ugrały.

[broneknotgeld]

Na Pōłnocy 1994

Na Pōłnocy „wojnōm” sie w kōńcu zmynczyli
Zdało – brōń na hoki teroz powiesili
Czy terozki zgoda? Jako sie ôkoże
Moga juzaś szkryfnońć – „Dej im Panie Boże”.

Na Połedniu

Na Połedniu ô tym czasie
Fest ôstuda w polityce
Fianna Fail zdo we marasie
Fine Gael wiyrchym – wiycie.

John Bruton

Fine Gael we Dublinie
Piyrszych krzipcōw sie chyciyła
Rzōndzōm terozki w dziedzinie
Choć w Brutonie marno siyła

Dyć drap gospodarka dźwigo
I kultura tyż rozwija
W przodek lyźć żodyn niy migo
Piniōndz suje im Unijo.

Referyndum 1995

Szajdōng z chopym, ze kobiytōm
Mo legalny być? Jo pytōm
Anō – tako ôkozało
Szajdōng w prawie! Wiela? Mało?

Tōż dwa roki z tym niyskorzyj
Szajdōng w prawie! Coś to woży!

We Europejski Uniji

Geld ze Uniji Irlandjo wspiyro
Szwōngu chyciyła ze tym dopiero
Kraj tako kwitnie, kraj durś gryfnieje
W Belfaście ćmi sie? W Dublinie dnieje?

Djaspora wroco

Kej industryjo w Irlandji rośnie
Kej tu już żyje bardzi radośnie
„Curik” irlandzkim duszōm pedzieli
Werci zaś wrōcić do swoji szteli.

[broneknotgeld]

Imigranty

Szmaragdowo Wyspa ludzi teroz kusi
Kej „na saksy” jechać niyjedyn kajś musi
Kej geld i robota znajdzie w ty dziedzinie
Tōż nadzieja widzi prawie we Dublinie.

Mary Robson – 1997

Już niy prezydyntym – teroz w ONZecie
Kuko prow człowieka na caluśkim świecie
Ze Zielony Wyspy – w kolorze nadzieja
Irlandji przipodnie rola dobrodzieja?

Europa pszaje

Europa pszaje Irlandji przeca
Unijo wspiyro co ze jyj neca
Rolnik profitōw z tego mo wiela
I turystykōm blyszczy drap sztela
Kunszt roztomajty, taniec, muzyka
Irlandjo – niy trza za ciebie rzykać?

Sie reklamujōm

Sie reklamują, tōż niy dziwejcie
Tyż wiary tymu richtig dolejcie
Iże Irlandjo piykno, ciekawo
Kej kukosz w lewo, kej kukosz w prawo

Tōż tako richtig kusi wandrusa
Zdo co szmaragdym ciyngym jyj dusza
W irlandzkim pubie werci zabawić
Ciału i duszy uciecha sprawić.

„Zawieszynie brōni” – 1997

Kej yno Angljo rzōnd pomiyniyła
IRA tyż prawie „brōń zawiesiyła”
Sinn Fein już pokōj chce wiyrchym stowiać
Niy werci bulić kej trza budować.

[broneknotgeld]

Teilifis na Gaeilge – 1996

Po gaelicku telewizyjo
Co to sie dzieje? Ô kryjolyjo!
Chnetko mioł jynzyk być zatracōny
A zaś ôdżywo – we tym niy krōmy
Kej spokopiyli co ich bogaci
Trza to mieć w zocy – niych sie niy traci.

„Zawieszynie brōni” – 1997

Kej yno Angljo rzōnd pomiyniyła
IRA tu prawie „brōń zawiesiła”
Sinn Fein tyż pokōj chce wiyrchym stowiać
Niy werci bulić kej trza budować.

Postympowe Demokraty

Tōż zaś miyni rzōnd w Dublinie
Postymp widać w ty dziedzinie
Wiela we tym je nowego
Choć niy zowdy tyż zocnego
Kej kajś zgobiōm, zło tyż rośnie
We ty „gaelicki wiośnie”.

Mary McAleese prezydyntym – 1997

Po kobiycie zaś kobiyta
Czamu? Zdo, co niy trza pytać
Dyć ciekawe kej z Belfastu
Zdo, co richtig lepszy czas tu
Zdo, co „topōr zakopany”
We Irlandji myni szpany?

Wielgi Piōntek – 1998

We Ulsterze z tym dniym prawie
Pokōj podpisany
Dublin tyż już we Belfaście
Niy chcioł wiyncyj szpany

Żdziybko jeszcze dyć zetrwało
Niym sie dogadali
Za rok spokōj we dziedzinie
Przewożōł na szali

Sinn Fein ze Uńjōnistami
Prziszło dogadywać
Dyć niy leko z tym po prawdzie
Niy ma czymu dziwać

Choć nadzieja w tysiōncleciu
Zdowo cołkym nowym
Historyjo nōm pokoże
Czy Ulster je zdrowy.

"Celtycki Tygrys"?

W nowym tysiōncleciu tyż utropy nowe
Plusy z minusami jakby po połowie
Kej w Irlandji euro blysło – dolar zdoł uciykać
Za pomyślność ty dziedziny werci nōm porzykać.

---

Ô ty Wyspie Szmaragdowy
Szkryfnōłch po swojymu
Kōmncept we tym niy je nowy
Wszysko skuli rymu.

[broneknotgeld]

I zaś Patryk poswawoli
Kej zielony biyrek woli.