Ślonske Zoo

[broneknotgeld]

Żółw

Chcioł se cugym zrobić rajza
Dyć za drogo na tych glajzach
Z potmanyja żol piniyndzy
Wybroł szłapcug i był pryndzy.

[broneknotgeld]

Kamela

Kamela dwa pukle se nosi
A jeszcze ło jedyn sie prosi
Durś mało mo w puklach tustego
Poasić sie chciała z czeciego.

[broneknotgeld]

Elefant

Elefant co miano mioł Bomba
Chcioł lajsnońć sie nowo tromba
Bo stary graciol sie zatkoł
Jak liści mocka tam natkoł.

[broneknotgeld]

Afy

Bele kaj hopsnom te nasze afy
Kajsik som u nich wielgachne gafy
Bo kindersztuba u afy tako
Łona sie lacho kaj inszy płako.

[broneknotgeld]

Amajza

Czerwono amajza
Wylazła na glajza
Cug jechoł pieronym
Kaj flek je czerwony?

[broneknotgeld]

Struś

Struś kożdego sie boji
Beztoż jak czasym stoji
A keryś chce go podłoskać
Palica chowie do pioska.

[broneknotgeld]

Lis

Ryszawy fater ryszawy ołpa
Erbnoł żech po nich ryszawo dupa
Cołki je zy mie ryszawy lis
Pitej bo poznosz tysz moj gyjbis.

[broneknotgeld]

Krokodyl

Gadzina dugo zymbato groźno
Gnaty by gryzła jak kołocz możno
Marzy ło rajzie we swoje strony
Tyż bych tam trefioł - bez nia łykniony.

[broneknotgeld]

Pantera

Jeji maść wszyjscy tu znomy
We szwongu jom podziwiomy
A choć ji to niy pasuje
Cyntki w szprincie gibkim suje.

[broneknotgeld]

Kangur

Za wielge mo istny szwaje
Beztoż trynuje przełaje
W fuzekli dziura mu blyndzi
Skiż aromy a niy nyndzy.

[broneknotgeld]

Wilk

Niy trza tu nawet godać wiela
Choć jo ci powiym - sie łośmiela
Jakby tu richtig żywy prziszoł
To chrupot gnatow bych usłyszoł.

[broneknotgeld]

Hamster

Niy trza szukać go we zoo
Dzieciarnia go dobrze zno
Czynsto z futru je paplaty
No bo żere to na raty.

[broneknotgeld]

Ćimpel

Tego ptoka kożdy zno
Dyć niyprowda że go mo
Po co czimać ćimpla w gorści?
Niych se ćwiyrko na wolności.

[broneknotgeld]

Kopruch

Do pierucha
Zaś mi brzynczy wele ucha
Spać po nocy łon niy dowo
Chce mie bajsnońć na surowo.

[broneknotgeld]

Krolik

Niy nosi łon wcale korony
Nojlepszy je chyba pieczony
A krolik-kurdupel je modny
Jak blikom na niego toch głodny.

[broneknotgeld]

Staro habeta

Ciynżki mo żywot - chciałaby skonać
A tu trza jeszcze suchać formona
Kery jom co dziyń ciongnie do dyszla
Padnie w zoprzyngu - tak jo se myśla.

[broneknotgeld]

Żmija

Żmija piykne mo zigzaki
To urodny god je taki
Powiym jednak na łostatku
Niy ciś sie do jeji jadku.

[broneknotgeld]

Wieprzek

Jak ło tym wieprzku ktoś łosprowio
Richtig problym zaś mi stowio
Bo jo niy wiym czy łon z chlywa?
Czy na krzoku se dojrzywa?

[broneknotgeld]

Ciyrczek

Latym słychać go z trowy
Krzipek zyń co sie zowiy
Żarłok tyż je niywonski
Muchy to som doń zakonski.

[broneknotgeld]

Szmaterloki

To kwiotki furgajonce
W lesie abo na łonce
A jest ich czosym bez liku
W gablotkach - na szpyndliku.

[broneknotgeld]

Mucha

Mucha - wielgo szpryciucha
Co brzynczy wele ucha
Bo wiy że jo jom smola
Bez muchy zupa wola.

[broneknotgeld]

Rukfuksy

Jakby sie mie kery spytoł
Kaj żech te rukfuksy chytoł?
Powiym że na hołdzie stary
Lotały ich całe chmary.

[broneknotgeld]

Yjzel

Sława tego łosła
Łostatnio urosła
Pierońsko sie sztrabnoł
Aż zod mu sie rabnoł.

[broneknotgeld]

Kwoka

Na jajkach siedzi se kwoka
I myśli tako boroka
Czy jajek tych niy poczaskać?
Som przemondrzałe - do diaska!

[broneknotgeld]

Grinery

Chytołch za bajtla w trowie grinery
W som roz przinynta na raki
A branio było że łod cholery
Rakow w mig miołżech czi saki.

[broneknotgeld]

Kokot

Na sztachety forgnoł rano
I łobudzioł wieś zaspano
Potym zajoł sie kurami
Co tam pochoł? Wiycie sami.

[broneknotgeld]

Żmija

Zygzakym sie asić chce żmija
Dyć trza jom z daleka łomijać
Na śniegu by chciała paradzić
A niy wiy jak z mrozym se radzić.

[broneknotgeld]

Sroka

Jak widzisz czorno-biołego ptoka
To bydzie sroka - tako boroka
Łona je richtig jak kleptomanka
Dowej se pozor byś niy mioł manka.

[broneknotgeld]

Wancka

Niywiela jom teroz zno
Czy jom jakoś chałpa mo?
Dyć jak sztrom pod puc wciepali
Z familokow poszła dali.

[broneknotgeld]

Mol

Jo tam wcale niy wola
Łotwiyrać drzwi do mola
Łon wredny choby wancka
Jak wciśnie sie do szranczka.

[broneknotgeld]

Rus

Na rusa sie poluje w nocy
Trza mu zablyndzić prosto w łocy
I go rozdepnońć na delinie
Ze pancra tuste mu wypłynie.

[broneknotgeld]

Szwob

Szwoba piwo mocno nyńci
No i skiż ty swoji chyńci
Robol nom na Ślonsku poleg
Lepsze to niż "prusakolep".

[broneknotgeld]

Ropucha

Lepi i niy pacz we łoczy
Bo z pyskym na ciebie skoczy
Policzy ci wszyske zymby
I je potracisz ze gymby.

[broneknotgeld]

Kundel

Kundla mieć w doma to wielge szczyńście
Czeko cie przi nim nijedne wyńście
Ło twoja forma łon bydzie dboł
Chćby profitu niywiela mioł.

[broneknotgeld]

Pulpul

Za bajtla jo boł sie pulpula
Boch wiedzioł że łon chce mi wkulać
Czerwone korole mu rosły
Mie gyry zarozki tyż niosły.

[broneknotgeld]

Muchy

"Owocowka" czy "masara"
Tako sama to poczwara
Dyć mie łod samego ranka
Dzisioj marzy sie "hiszpanka".

[broneknotgeld]

Wirus

Ledwo widać to to chopie
Yno w ekstra mikroskopie
A pierońsko jednak mynczy
Że niyjedyn wtedy jynczy.

[broneknotgeld]

Sztichla

Rybka z kolcami
Chyćcie se sami
Jo jom niy rusza
Chyba że musza.

[broneknotgeld]

Bober

Wszyscy znocie bobra tukej
Kaj żerymia tam go szukej
Nosi futro mo tyż sadło
Bestoż wiela ich już padło.

[broneknotgeld]

Glisdy

Do glisdy godo glisda
-Moj chop to kawał gizda
Durś chcom wyciongać go na te ryby
A łon sie zapar bo woli grziby.

[broneknotgeld]

Kangur

Leci taśka na dwóch nogach
To jest kangur - łolaboga!
Rajfeszlos mu sie łodpinoł
Stracioł cosik jak mie minoł.

[broneknotgeld]

Gacek

Tyn sztres pieroński mynczy tyż gacka
Ze nerwow zaczoł daklami klackać
Bo mu sie śniyło że jak tak wisioł
Pierdnoł i laksyr z dupy mu wyszoł.

[broneknotgeld]

Bociek

Leci bociek leci
W dziobie toszczy dzieci
Aże ze Afryki
A biołe te smyki.

[broneknotgeld]

Lew

Lew krol puszczy dzisioj zły
Durś wyszczyżo łostre kły
Dyć go błecha jedna mało
Bajsła w rzić i boli cało.

[broneknotgeld]

Dziyńcioł

Dziyncioł mie mocno z rana umynczoł
Durś romboł a jo pieronym jynczoł
Ślubno mi godo - "Widzisz dziyńciole
Niy trza sie było toplać w gorzole".

[broneknotgeld]

Stonoga

Żol mi tyj stonogi
Wiela trza szułow na jeji nogi
A jak zaczyno sie je łoblykać
Wola niy paczeć yno umykać.

[broneknotgeld]

Wija

Wija se zwijo
Co chce łomijo
Co niy chce na przima przetnie
No i do tego
Drogi kolego
Jeszcze potupie sie setnie.

[broneknotgeld]

Gołymbie

Z ptokow lubia tyż gołymbie
Gołymbiorza som durś w gymbie
Gafto na nie zowdy w locie
I niy myśli ło robocie.

[broneknotgeld]

Cwerg

Na krasnoludka tukej sie godo
To kożdy Ślonzok pryndko ci podo
Mie jednak w gowie tyż taki kokot
Co kożdo kura pryndko łobskoko.

[broneknotgeld]

Żaby

Zrobiyło sie ciepło - żaby już sie parzom
Dyć ani na momynt ze siebie niy złażom
Rechoczom ze szczyńścio - w skrzeku sie toplajom
Na kery już ponoć ryby tyż czekajom.

[broneknotgeld]

Kokot w Grecyji

Już Greki godali że kokot jest bat
Jak by go niy było to marny tyn świat
Godali że pioniym niy yno nos budzi
Nim kury zapłodnio i dyszcz mog przikludzić.

[broneknotgeld]

Kokot w Rzymie

Łon był nojważniejszy we ichnich legionach
Bez niego niy dało sie wroga pokonać
Dyć jak kery kokot im klynska wywrożoł
To richtig pryńdziutko za zakonska służoł.

[broneknotgeld]

Krześcijański kokot

Dlo nos jest tyn kokot tyż symbolym wiary
Zapioł łon na Pyjtra - niy były to czary
Bo Chrystus mu przeca nojpiyrw ło tym pedzioł
Bez to nikt niy powiy że dioboł w nim siedzioł.

[broneknotgeld]

Jajco

Jajco wnerwio teroz kwoka
Bo sie kulo kajś po bokach
Kurcze kura chce wysiedzieć
A skond jajcu ło tym wiedzieć?

[broneknotgeld]

Cukrowka

"Cukru cukru" - cukrowka godo
Jednako staro jak i tyż modo
Problym jest we tym że to niy cuker
Na fynsterbrecie łostawio kuper.

[broneknotgeld]

Piszczoła

Piszczoła jedna wesoło
Dziobnyła czowieka w czoło
Terozki jednak żałuje
Bez żondła dyć wykorkuje.

[broneknotgeld]

Tako mucha

Chopu zowdy dodo ducha
Ta hiszpańsko zocno mucha
Choby viagra łona działo
Yno bier sie jeji mało.

[broneknotgeld]

Stonka

Nawet piykne mo te paski
Dyć niy było dlo niyj łaski
Wrog komuny to był wielki
Ot - czerwone duperelki.

[broneknotgeld]

Pluskowiec

Na plecach we wodzie pływo
Take to śmiyszne jest dziwo
Dyć jednak wancka to przeca
Niy chciyj jom na swojich plecach.

[broneknotgeld]

No - teroz Rudo wszkryflej tu posty
Bo przeca rym jest naprowdy prosty
Gowiedzi w świecie jest richtig wiela
Arkom Noego bydzie ta sztela.

[broneknotgeld]

Mysz

Z myszom wcale leko niy ma
To tyż przeca gryzoń dobry
Zlekceważysz jom we rymach
Gorszo bydzie łod tyj kobry

Trza docynić przeciwnika
Choć niy straszny łon za wiela
Wiydz że możesz potym zmykać
No i w ślady iść Popiela.

[broneknotgeld]

A jo bych se mog tu przisionc
Bo to dlo mnie przeca klar
Z jednyj myszy zrobić tysionc
W Internecie taki bal.

[broneknotgeld]

Ceki

Dwa razy mie ceki pogryzły
Na życie mi ślod wtedy wyżły.

[broneknotgeld]

Z myszow żech przeszoł tukej do cekow
By pozor dować zowdy człowieku
Trzeba mieć łoczy ze kożdy strony
Groźny niy yno wałek łod żony.

[broneknotgeld]

Koń

Koń sie tymu fest dziwuje
Że ktoś mu opinio psuje
Zrobić w konia! -Jego gowa
Niy umi to forsztelować.

[broneknotgeld]

Karp

Karp sie ździybko nom sztresuje
Pewnie świynta łon już czuje
Zaś wyciongnom go sieciami
I upiekom ze łościami.

[broneknotgeld]

Płotka

Ze stawu momy ciekawo plotka
Że zwariowała łostatnio płotka
Bo u szczupoka na urodzinach
Spytała - Kaj jest moja rodzina?

[broneknotgeld]

Dziyńdzioł

Jedyn dziyńdzioł w brzim fest klupoł
Już go prawie cołki ściupoł
- Kornikow cosik za wiela?!
- Niy! Staro mynczy hicwela!

[broneknotgeld]

Brathering

Ckni mu sie ździybko do wody słony
Jak we łoctowo zostoł wciepniony
Jednak i tak jest mu dobrze teraz
Bo już niy piecze go jak cholera.

[broneknotgeld]

Inszo piszczoła

Była robotno jedna piszczoła
Aż skosztowała kedyś gorzoła
Po prowdzie wiela sie niy napiyła
Niy darmo szkryflom przeca że była.

[broneknotgeld]

Wrona

Czorno wrona
Łod łogona
Aż do swoji gupi gowy
Krakać uczyć chce tyż krowy.

[broneknotgeld]

Jamnik

Wele nog sie ploncze glizda
Biera brele - widza gizda!
Toż to jakiś dugi psiok
Co zakrynco teroz w bok

Przednie łapy idom w prawo
Zadnie w przodek ciongnom klawo
Miyndzy nimi kloty łuk
Jak żech łośmioł sie toch puk.

[broneknotgeld]

A to ci dopiyro

Cztyrych pancernych i ta kolumna
Kero to była? Zaroz sie wspomna
Już wiym - dyć piontom jom nazywano
Szarik Alzacki insze jyj miano.

[broneknotgeld]

Moj pies

A jo mioł Tajsa kery tyż latym
Na piwo chodzioł ze mojim bratym
Kto wiyncyj słepoł do dzisioj niy wiym
Bo zawsze łobu czuć było piwym.

[broneknotgeld]

Pudelek Bombelek

Niyjedyn karlus na tym sie szajsnoł
Jak go w Glywicach Bombelek bajsnoł
Trza by sie teroz Szwagra zapytać
Wiela mioł szkody na nogawicach.

[broneknotgeld]

Do kurnika kokot idzie
Myśli ło ty swoji biydzie
Tela cipek. Czy to raj?
Czy to yno jest dlo jaj?

[broneknotgeld]

Widzioł żech te kury chore
Do znoszynio jaj niyskore
Czasym jednak - jakoś hardo
Znosi je - yno na twardo.

[broneknotgeld]

Dinozaury na Ziymi kedyś wyginyły
Niy nos idzie winić za ta katastrofa
Dyć płazom co tukej miliony lot żyły
Ciyngym my godomy terozki - wynocha!
I ginom nom w łoczach jest ich coroz myni
Możno już za późno by jeszcze to zmiynić.

[broneknotgeld]

Ludzie złoci!!!
Na Jurze ślimok sie koci!
Dyć marza sie teroz żeby
Kaj indzi łon chcioł sie źrebić
To przeca wszysko być może
Jak czowiek mu dopomoże.

[broneknotgeld]

Puli

Tyn pies kamratym pasterza
Jo w to jakosik niy wierza
Jak pacza na wełny kupka
Myśla - ktoś robi mie w gupka.

[broneknotgeld]

Mrowki

Mrowki czasym gody majom
Jak te muchy se furgajom
Czowiek jednak w tym ubogi
Nojwyżyj mu rosnom rogi.

[broneknotgeld]

Rykowisko

Byki we lasach fest porykujom
Że bydom brane łanie tyż czujom
Dyć u jelynia rogi som w zocy
Sroge - to wiela chuci i mocy.

[broneknotgeld]

Ślimok

Ślimok mo za miynke rogi
No i kajsik stracioł nogi
Chałpa se na pukel wsadzioł
Bo ze dojściym se niy radzioł.

[broneknotgeld]

Ślimok ekszportowy

Zowdy normalnym ślimokym boł
Aż kedyś trefioł na piykny stoł
Fest asioł sie tym - chocioż dość krotko
Że w smaku bije grinera udko.