Jak chop z babom

[broneknotgeld]

Jo wiela pochoł yno we myśli
To mi do dzisioj zostało
Bestoż jak czasym frelka sie prziśni
Łobkusioluja jom cało.

[broneknotgeld]

Niy je tak cołkym po myśli Twoji
Bo ślubno czynsto sie budzi
Chyba jo we śnie niy paplom moji
Choć tyż warzechom mie studzi.

[broneknotgeld]

Wiosna

Już wiym że teroz momy zaś wiosna
Przeca mi jakoś chyntka urosła
Yno że u mie za wielko chyntka
Zawsze sie w końcu zamiynio w yntka.

[broneknotgeld]

Dyć wiosna momy i pora frelek
Niych Ci zaćwiyrko w ucho cimpelek
A jak Ci zimno to wlyź do łożka
Kicholym przitul sie do cycuszka
Ryma łodleci łod Ciebie w mig
A chuć poczujesz jak mody śpik.

[broneknotgeld]

Ze śmiychu rosnom mi teroz pejsy
Ździebko a zacznom furgać "olłejsy".

[broneknotgeld]

No richtig piyknie
Dzisioj lachanio chyba mi styknie
Galoty wiyncyj niy szczimiom tego
Już knefle lecom. Pyrsk moj kolego.

[broneknotgeld]

Toś tukej wciepoł problym zaś nowy
Jo chyntnie pija zdrowie teściowy
Ze swojom świekrom żyja we zgodzie
Choć ponoć wcale to niy jest w modzie.

[broneknotgeld]

Możno z teściowom niy idzie szczimać
Jak sie jom czeba za kece czimać
Jo jednak niy mom problymu tego
Dyć jyj pomogom jak trza - kolego
Nigdych tyż ze niom niy był na kupie
Momy sie w zocy a niy we dupie.

[broneknotgeld]

Grażyna

Poznoł żech kedyś jedna Grażyna
Frelka to była fajnisto
Jak łona srogo zrobiyła mina
Karlus w galoty aż drzistoł.

[broneknotgeld]

Ale jajo

Kajsik żech słyszoł ło tych zwyczajach
Kere sie lyngły zowdy przi jajach
Jak jakoś dziołcha karlusa pszoła
To sie tyj magii w jajcach niy boła
Brała kraszanka tako czerwono
I jom wciskała mocno we łono
Jak potym galant te jajco wciamroł
Już yno ło niyj jynzorym mamloł
Już yno w głowie mioł durś ta frelka
Tako jest siyła we jajcu wielka.

[broneknotgeld]

Wojna na jajca

Wojna z jajcami - tymi na twardo
Wydała kedyś mi frelka hardo
Potym pisanki swoje straciyła
Mojego jajca przeca niy zbiyła

Możno zrobiyła mi taki szpas
I we tyn sposob godała - pas
Dzisioj sie myśla że jo był frajer
Boch zabroł yno tyn myndel jajek.

[broneknotgeld]

Frelek coś niy ma - to mynczy szaca
Juzaś skiż tego mo wiynkszo glaca.

[broneknotgeld]

Jak baba chopa durś do sia woło
To łon mo wtedy wysoke czoło.

[broneknotgeld]

Na Jurze

Chytom ściana za wystympy
W eksploracji mom postympy
Przeciskom sie jakomś szparom
Blysk! Co robia z mojom starom?!

[broneknotgeld]

Jak chce sie hajtnońć
Po co jyj haltnońć?
Dyć sie zowitkom być tyż niy boji
Jo bych jyj za to doł piykny mojik.

[broneknotgeld]

Dyć nawet starzik za modom leci
I chciołby przeca jyj robić dzieci
Legnie sie w bety - postawi kryka
A łona wskoczy jak na konika
No - chyba że już jyj niy postawi
Wtedy niych z dziołchom sie nic niy bawi
Bo jakby słyszoł że dziywa stynknie
Pewnikym drapko serce mu pynknie.

[broneknotgeld]

Dobrze co chocioż śni mu sie piyknie
Jak już na frelka zdrowio niy styknie
Dyć jakby prziszła modo sagato
Ołpa jak modzik by lecioł na to
W krziżu by już mu nic niy szczykało
Możno by pedzioł nawet że mało
Nic że przi tymu wykończoł by sia
Krepnołby z łokym wlepionym w pisia.

[broneknotgeld]

Z nos już tyż som ołpy prawie
A myślymy ło zabawie
Ze cycatom cystom cudzom
Choć nos ślubne nic niy nudzom.

[broneknotgeld]

"Lupulina"

Ponoć jakoś lupulina kero w piwie jest
Chopu chuć lubi łobcinać i to richtig fest
Jak jo wiyncyj piw wypija to problym z niom mom
Lygom przeca sie do wyra i mi jondra śpiom
Dyć po jednym czy dwóch biyrach z seksym niy jest źle
Powiym tela - ptoszek bardziyj broić wtedy chce.

[broneknotgeld]

Joch to pisoł do tych frelek coby to wiedziały
Jak chop żłopie dużo piwa może być łospały
I jak uśnie frelce pryndko to niy jego wina
Wszysko bez to że we piwie jest ta lupulina.

[broneknotgeld]

Bo Cie dopodnom te feromony
Pryndzy łod cudzy niż swoji żony
A już pierońsko - frelki w rozkwicie
Take durś nasze jest chopske życie.

[broneknotgeld]

Hilda

Hilda ślinto mocno teraz
Szac i uciyk. To cholera!
Dyć skiz sexu. Prowda godom
Pitnoł nogami do przodu.

[broneknotgeld]

Za dużo chciała - za dużo brała
Brakuje teroz jyj szaca ciała
We łożku siyngo teroz do kroka
I ślinto biydno tako boroka.

[broneknotgeld]

Ło Lucy

Wtuloł bych sie we ta Luca
Zwłaszcza w jeji wielke płuca.

[broneknotgeld]

Niywyżytyj

Niyjednego dlo niyj trza by
Chopa - kery "pies na baby".