Gość: Lizoppox
IP: *.warszawa.cvx.ppp.tpnet.pl
19.06.04, 11:00
E lei qtaisi. E pei ona masani ai i tausaga taitasi i le faagasologa o le
liki Volipolo a
le Ekalesia Faapotopotoga Kerisiano Amerika Samoa (EFKAS), a maea ona faia
taaloga o pulega taitasi, ona sosoo ai lea ma le faagasologa o taaloga a
Matagaluega. A maea lea, ona see atu lea mo taaloga faitauina a le Ekalesia,
o sue'ga siamupini aoao.
Ua maea nei le vaega muamua o faasologa o taaloga pei ona alo atu ai pulega
taitasi. Mo le vaega lona lua lea ua oo atu ai le faasologa, o taaloga a
Matagaluega taitasi. E fa Matagaluega o loo i ai, o le Matagaluega a le
Manuatele, le Matagaluega a Sisifo, le Matagaleuga a le vaega Tutotonu faapea
ma le Matagaluega a Sasae.
O le aso Toonai lea faatua mavae atu, lea sa fuafuaina e faataunuu ai taaloga
o Matagaluega pei ona fuafuaina, ma lea sa tatala ai i le Matagaluega a Sasae.
O le faasologa lea ua i ai nei pei ona faalauiloa mai e le komiti o taaloga,
lea sa amata ai i le Matagaluega a Sasae. A maea le Matagaluega a Sasae ona
sosoo ai lea ma le Matagaluega a le vaega Tutotonu. A maea le Tutotonu ona
sosoo ai lea ma le Matagaluega a Sisifo, ae faaiu i le Matagaluega a le
Manuatele.
O taaloga uma a Matagaluega taitasi o le a faataunuu uma lava i le faletaalo
a le Tupulaga i le laumua i Kanana Fou, lea o le a muamua i le Matagaluega a
Sasae le faasologa o taaloga.
Sa faatumulia le faletaalo i susuga i faafeagaiga ma o latou faletua, o
matua, uo ma e masani sa lolofi atu aua le molimauina o taaloga a le fanau.
O le susuga i le Faatonusili o Aoga a le Laumua, le susuga i le faafeagaiga
ia Tumau Petaia sa fai ma taitai o le tatala aloaia o taaloga a le fanau, aua
se upu tomua ma timaiga mo le tupulaga.
E tolu Pulega o loo fausia ai le Matagaluega a Sasae. O le pulega mai
Vaifanua, le pulega mai Saole faapea ma le pulega mai Sua.
O faasologa lea o au o loo fai ma sui o pulega taitasi. O le pulega a
Vaifanua i le vaega o 'A' alii, 'B' alii ma le 'B' a tamaitai, o loo suia uma
mai e le autalavou a Tula, ae mo le 'A' a tamaitai o loo suai lea e Aoa.
See atu i le pulega a Saole i le vaega o 'A' alii ma tamaitai faapea ma
le 'B' a tamaitai, o loo suia uma mai e le autalavou a Amouli. Ma le vaega
o 'B' alii lea o sui mai ai e Auasi.
O le toe pulega o le Matagaluega, o le pulega lea a Sua. I le vaega o 'A'
alii ma tamaitai o loo fai ai le autalavou a Laulii ma a latou sui. I le
vaega o 'B' alii ma tamaitai, o loo suia mai ai e le autalavou a Masefau.
Mo le faasologa o taaloga sa i ai, lea sa tatala malae ai le vaega o tamaitai
ae faaiu i le vaega o alii. Muamua 'B' a tamaitai, sosoo 'A' a tamaitai,
faasolosolo atu i le vaega o alii, lea na muamua ai 'B' alii ae faaiu i le
vaega o 'A' alii.
Sa mataina uma taaloga pei ona feagai ai ma autalavou sa suia maia pulega
taitasi. Na molimauina le tau fai tutusa uma o au tusa ai ma gaioiga o le
taaloga i soo se vaega o le taaloga.
O au e fa ia ua fai ma sui o le Matagaluega mai Sasae. Mo le vaega o 'A' alii
ma tamaitai lea ua tulai mai ai le autalavou a Laulii, see atu i le vaega
o 'B' alii lea ua tulai mai ai le autalavou a Masefau, ma le vaega mulimuli i
le 'B' a tamaitai, lea ua tulai mai ai le autalavou a Amouli.
O le aso Toonai la o lenei vaiaso, o loo fuafua e faautaunuu ai taaloga a le
Matagaluega a le vaega Tutotonu. O loo fuafua le vaega o komiti o taaloga,
lea o loo taitaia e le susuga i le faatonusili ia Tumau Petaia, afai ae
faataunuu uma taaloga a Matagaluega i aso ia pei ona faatulagaina, ona
sauniuni atu lea mo le masina fou aua le sailia o le siamupini o le Ekalesia
aoao.
