Po ślonsku ło Kaszubach

[broneknotgeld]

Kaszuby dzisioj

Puck Jastarnio Kartuzy i Władysławowo
To sztele kaj słychać durś kaszubske słowo
We Żukowie Rumi Redzie Wejherowie
Kaszubskim korzyniom tyż fest pszaje czowiek

Trza by tu rachować jeszcze Kościerzyna
Bo ciyngym tam przeca ty godki dziedzina
Miast wiyncy tu jakoś dołożyć niy idzie
Dyć gmin richtig mocka - tam Kaszub se bydzie.

[broneknotgeld]

Na Uniwerku Gdańskim

Kaszubskego lektoratu tyż se dorobiyli
Toż tukej jynzyka za "dialekt" niy wziyli.

[broneknotgeld]

Biblio po kaszubsku

Nowy Testamynt wydany majom
Teroz za Stary już se chytajom.

[broneknotgeld]

Kaszubske "beloki"

Na ucho ich tako zowdy tu poznocie
Kaj "ł" tam "l" ciyngym se u nich "beloce".

[broneknotgeld]

"Rodno zemia" - TVP Gdańsk

Po kaszubsku tyn program ciyngym tukej leci
Gdańsk richtig promuje lokalno kultura
Jynzyka se uczom w szkołach małe dzieci
Słychać go na polu i we miejskich murach.

[broneknotgeld]

"Plińce"

Ze "plińcow" na Helu aże mie brzuch boli
Plackow kartoflanych - jak ktosik z wos woli.

[broneknotgeld]

"Maszoperia"

Tako zowiom na Helu chnet co drugo knajpa
Jak gyszeft rybokow co czimali łajba.

[broneknotgeld]

"Mniyjszość etniczno"

"Mniyjszości etniczne" ciyngym w Polsce siedzom
Ślonzoki Kaszuby Mazury to wiedzom
Piyrwyj niż Polany przeca u sia byli
Przez wieki tyż zowdy po swojymu żyli.

[broneknotgeld]

"Dux Slavorum et Cassubie"

To miano Gryfici mieli łod Barnima
Kaszuby łostały choć princow już niy ma.

[mac_gyver]

A znasz Bronku encyklopedię w jęz. kaszubskim:

csb.wikipedia.org ?

[mac_gyver]

csb.wikipedia.org
Miało być tak, teraz można kliknąć na link.

[broneknotgeld]

No toż piykne dziynki.
Przido mi sie jak ktoś po kaszubsku zacznie szkryflać ło Ślonsku.

[broneknotgeld]

"Gbur to je mur"

Gbur to Kaszuba co z ziymi żył
A łona wiela mu dała siył
Czasym mocniejszy łod "ponka" bywoł
Toz se harowy mioł take "żniwo".

[broneknotgeld]

Kaszubom to dobrze

Kaszubow jest myni dyć dobrze sie majom
Łoni swoji godce ciyngym przeca pszajom.

[broneknotgeld]

"Norda" - tygodniowy dodatek "Dziynnika Bałtyckego"

Kaszuby se "Norda" w kaszubskim szkryflajom
Wiyncy łod Ślonzokow ze tym ciyngym majom.

[broneknotgeld]

Som "krole kaszubske"

Som na Kaszubach - wiela tyż było
Tu tradycyji durś se czimali
Dlo inkszych zowdy coś sie robiyło
Tako jest dzisioj i bydzie dali.

[broneknotgeld]

Biskup Mirry

Mo biskup Mirry Kaszubow w pieczy
Niych se niy zdowo co yno dzieci.

[broneknotgeld]

Gbur

"Gbur" na Kaszubach to niy przezwisko
- Gospodorz dobry co czimie wszysko.

[broneknotgeld]

Wiara

Godajom - "Kaszuby wiarom łoddychajom"
Dyć djobła za skorom tyż czasami majom.

[broneknotgeld]

Legynda z Osłonina

Kaj wysoki brzeg jest ty Pucki Zatoki
Ponoć śpiom we zbrojach kaszubske wojoki
Kedyś se łobudzom - na Gdańsk pokerujom
Czas jeszcze niy prziszoł - Kaszuby to czujom

Rycerze to przeca pomorskego ksiyńcia
Co chcom być świodkami regionu poczyńcia
Kery choć przi Polsce tyż som by sie rzońdzioł
I niy skiż wszyskego we Warszawie błońdzioł.

[broneknotgeld]

1224

Piyrszy roz ło Rumi cosik naszkryflali
No i se historio pokulała dali.

[broneknotgeld]

Smyntek

Tego djobła yno na Kaszubach znojdziesz
Dej pozor - niy dowej jymu swoji duszy
Bo do zatrocynio z niym poleku dojdziesz
Dyć w końcu do piekła som bydziesz chcioł ruszyć.

[broneknotgeld]

"Jantarowy pałac"

Toż se rozlecioł pałac Juraty
Jantar zbiyrajom z niego na raty.

[broneknotgeld]

Kaszubsko "baśka"

Ano - toz wcale to niy som wice
W "baśka" gro Kaszub - już teroz wiycie
Ślonzok gra w szkata mo swoja przeca
"Baśka" ze kaszubskego zaś neca.

[broneknotgeld]

80 lot tymu

Łoziymdziesiont lot tymu Rumia fest urosła
Toż wtedy se łona na Zagórze poszła
Kazimierz chyciyła no i te Łężyce
Wpiyrw to były jeji yno okolice

Latoś dwie rocznice mogom se fajrować
Rok ty "Wielki Rumi" przed łoczy nom dować
Do tego dołożom gyburstag miejskości
Dubeltowo przeca ze tym jest radości.

[broneknotgeld]

Rumia

Kaj Zagorsko Struga - toż miyndzy kympami
Rumia ponoć leży - gowa mie niy mami

[broneknotgeld]

1224

Doł Świyntopełk Rumia cystersom w Oliwie
Zoglondo ze grobu i gowom durś kiwie
Dziwuje se tymu że daleko doszła
Przeca dzisioj widać co richtig urosła.

[broneknotgeld]

"Pod lipami"

W dworku "Pod lipami" łykniesz historyje
Łoziymset lot przeca ta miejscowość żyje
"Dzieje Rumi" zocne - niy łomijej tukej
Na wystawa tako do MOKu zaklupej.

[broneknotgeld]

Mestwin II

Bardzi go znomy z miana Mściwoja
Syn Świyntopełka sławnego w bojach
We Rumi dynkmal znojdziesz Mestwina
Zocnym był princym - wiy to dziedzina

Czi ślubne jednak syna niy dały
We tym frasunek łon mioł niymały
Ponoc skiż tego - szkryfna se tukej
Zaś te Pomorze przi Polsce szukej.

[broneknotgeld]

Gryfno Sulisława

Czecio ślubno łod Mestwina
Modo piykno jakby sorna
Asi sie niom ta dziedzina?
Dyć durś mielom "boske żorna"

Wpiyrw w klosztorze mniszkom była
Tam inkszymu ślubowała
Choć we pszoniu wielko siyła
Syna princu już niy dała.

[broneknotgeld]

Gyburstag Rumi

Dyć fufcig rokow już miastym jest
Fajrować szłoby gyburstag fest
Możno październik bydzie ciekawy
Niy braknie w Rumi wtedy zabawy.

[broneknotgeld]

80 lot tymu

Sztyry wioski złonczyli we ta jedno gmina
Toż stała se wielko ta rumsko dziedzina
Rumia z Łężycami terozki we zgodzie
Kazimierz z Zagórzym cuzamyn niy bodzie.

[broneknotgeld]

Choczewske lipy

Choczewske lipy dworka wachujom
Dyć asić by sie niym chciały
Czas na to przidzie - łone to czujom
Zobytek blyśnie zaś cały.

[broneknotgeld]

Cudne lipy

Lip we Choczewie Ponboczek niy sioł
Toż we nich znać Jego wola
Możno żeś ło tym cudzie coś słyszoł?
Joch bliknoł i bestoż chwola.

[broneknotgeld]

Perseidy (11.08.2004)

Ze Kopalina w strona Jackowa
Keruja w nocy se moja gowa
Jest - już ślatuje jekby do lasu
Co sie winszuja? -Zabrakło czasu

Dyć gwiozdka spodo zarozki drugo
Czy szczyńście richtig do mie zamrugo?
Już leci czecio szworto i pionto
Styknie dobrego - w pamiyńci mom to.

[broneknotgeld]

Lubiatowsko mszo

Chcesz mszo w niydziela se mieć na plaży
Toż Lubiatowo ci sie zaś marzy
W lipcu i siyrpniu niym zońdzie słonko
Tam sie z Ponboczkym niy bydziesz błonkoł

[broneknotgelt]

Niy mierz inkszych swojom miarom
Blikej na nich z wiynkszom wiarom
Żech jest łysy cymbał to jo wiym
Na dzisioj w Rudzie dobrze mi z tym.

[broneknotgeld]

Ze "d" na końcu notgeld prawdziwy
Inkszy być może yno fałszywy.

[broneknotgeld]

Gmina Choczewo

Łod Wejherowa to dzisioj gmina
Dyć i lymborsko jakby dziedzina
Miyszo sie tako co jest a było
Bydzie skiż tego lepi se żyło?

[broneknotgeld]

Osetnik - Stilo

Kto na "blizie" robi tukej zamiyszkuje
Choć możno nikery tymu sie dziwuje
Do roboty bliży - przeca to jest plus
Toż dlo latarnika Osetnik chnet mus.

[broneknotgeld]

"Choczewskie Cisy"

Szczyńściym natura je zachowała
Siył do mnożynio tyż jeszcze dała
Dyć trza nom chronić richtig je fest
Cisow niywiela już w Polsce jest.

[broneknotgeld]

"Nadmorska Strefa Prestiżu"

Take piykne "cyntrum" se miasto funduje
Tu WTC-Gdynia dwie wieże postawi
Jak ze Nowym Jorkym to richtig sztimuje
Przidzie czas że byda sie tyż mog tam bawić.

[broneknotgeld]

Gdynia 1922

We Warszawie nad tym deliberowali
Coby se Poloki port pobudowali
No i pryndko tako przeca sie tyż stało
Szwongu ze tom Gdyniom dyć było niymało.

[broneknotgeld]

Gdynia 1925

Oksywie ze Gdyniom we jedno se zloło
Choć piyrwyj tyż łod sia było im wesoło.

[broneknotgeld]

Gdynia 10.II.1926

Co chcieli to majom - ze wioski już miasto
Ponoć bez zokalcu im wyszło te ciasto.

[broneknotgeld]

Gdynia 1929

Kurde - już zrobiyli tukej powiat grodzki
Haratali przi tym widać tyż przez nocki.

[broneknotgeld]

Gdynia 1930

Co tu dużo godać? Ciyngym sztela rośnie
Redłowo z Chyloniom capnyli radośnie.

[broneknotgeld]

Łod 1930

Już tu transatlantyk pasażerow broł
Do Nowego Jorku płynołś jak żeś chcioł.

[broneknotgeld]

Gdynia 1933

Toż Witomino z Obłużym wziyła
Tyż "Działki Leśne" - tako w niyj siyła.

[broneknotgeld]

Gdynia 1935

Mały Kack erbła no i Cisowo
Jeszcze Pogórze Morske Orłowo
Lasy chylońske i witomińske
Kryńci sie kryńci te "koło młyńske".

[broneknotgeld]

Gdynia 1953

Toż jeszcze copła kaszubsko wioska
Ło Wielki Kack jest wiynkszo zaś troszka
Na tym se jednak cołkym stanyła
Myśli że zowdy aż tako była.

[broneknotgeld]

Herb Gdyni

Dwie fisze na mieczu wyndzone
Podobnoś szczyńśliwe som łone.

[broneknotgeld]

Bożo Zatoczka

Toż piykny kontek Gdański Zatoki
Kaszubske żyli tukej ryboki
Se wioska swojo Gdyniom nazwali
Na świat w spokoju durś dziwowali

Z Polskom sie jednak życie zmiyniyło
Stare ze nowym ździybko pobiyło
Wybudowali wielgachny port
Kto niy poskopioł niywiela wort.

[broneknotgeld]

Wiocha?

Godajom "za Niymca" Gdynia wiochom była
Po prowdzie to trocha we tym jest cygaństwa
Już wtedy z "kuracji" tyż przeca se żyła
Kwatery czimali tyż tukej "dlo państwa".

[broneknotgeld]

Jan Radtke 1872-1958

Z gburski rodziny Radtke pochodzioł
Tref w jego rynkach - łon niym niy wodzioł
Przed piyrszom wojnom chałpa postawioł
W kery niyjedyn letnik już bawioł

Dyć Polska tukej se zaklupała
Ze Gdyni łokno na świat mieć chciała
Po myśli było to tyż istnego
I jest zasługa w tym przeca jego

Wojtym ty gminy łon wtedy był
Niym do miejskości nabrała siył
Choć burgemajstrym jednak niy łostoł
Dyć przeca stołek vice tyż dostoł

Chcesz go łodwiedzić toż kerchof gdyński
Kerego zowiom tu "witomiński"
Poasić jego kwaterom może
Gyburstag Radtke mioł z miastym w porze.

[broneknotgeld]

"Srebrno Tabakiera Abrahama"

Nadowajom w Gdyni medal taki zocny
Miano wzioł Kaszuby co za Polskom szoł
Czy skuli tabako łon był we tym mocny?
Cosik mi sie zdowo że tyż "nosa mioł".

[broneknotgeld]

"Bazylika Morsko"

Łod miyndzywojnia tyn pomysł świtoł
Dyć se z "realym" tu niy prziwitoł
Tam kaj być miała stoji se krziż
Kamiynno Goro - co ło tym wiysz?

[broneknotgeld]

Piyrszy krziż na Kamiynny Gorze

We czidziestym piyrszym krziż stowiali tukej
Kaj miała być Gdyni "Morsko Bazylika"
Tego jednak wcale terozki niy szukej
Choć pod krziżym przeca możesz se porzykać

[broneknotgeld]

Drugi Krziż

We czidziestym szwortym Świynto Morza było
Se "kamiyń wyngelny" kładli bazyliki
Krziż stanoł tu nowy - wielki że ąż miło
Jak ćmok był łon świycioł skuli elektryki

Tych "bronotnych" w Gdańsku pewno cosik wnerwioł
Bo jak prziszła wojna pryndko go kipnyli
Historyji jednak tym Niymiec niy przerwoł
Dyć Kaszuby przeca zowdy twarde byli.

[broneknotgeld]

Czeci Krziż

We sztyrdziestym piontym zaś Kamiynno Gora
Na krziż se dziwuje co łodbijo w chmurach
Stoł se lot czinoście aż kipnoł go wiater
"W złym czasie" jak pedzioł synkowi tu fater

Dyć nocom łod nowa w ziymia go wkopali
By w końcu komuna musiała go zwalić.

[broneknotgeld]

Szworty Krziż

Czidziści lot chnetko krziża tu niy było
Jednak w nowy Polsce zaś ludzi to "wziyło"
Rok dziewiyńdziesionty - nowy krziż ze drzewa
Dziwuje se tymu yno gdyńsko mewa.

[broneknotgeld]

Pionty Krziż

Stanoł w Wielki Piontek dziewiyńć rokow tymu
Ze ajzy jest teroz - metrow z sety ćwierć
Jak w czidziestym szwortym ćmok niygroźny jymu
Zowdy sie "łodrodzo" - niy wiy co to śmierć.

[broneknotgeld]

Port wojynny

Ano zgarnyło Oksywie wojsko
Kaszubsko wieś sie jakby straciyła
Już tu niy było jak piyrwyj swojsko
Se marynarka Polsce marzyła.

[broneknotgeld]

Piyrszo latarnio oksywsko

Toż mogła yno być "poniymiecko"
Stanyła jeszcze tu za Wilusia
Tego "piyrszego" - wiydz ło tym dziecko
Boś ty terozki jest tukej u sia

Jak Polska prziszła tyż sie przidała
Aż do poczontku łostatni wojny
Potym już światłym niy zamigała
Znak czasu taki - co niyspokojny.

[broneknotgeld]

Na oksywskim cmyntorzu

Tu rybok ze gburym zowdy se spotykoł
Echt Polok z Kaszubom co wielki tyż przeca
Przi grobach wojokow tyż se bydziesz rzykoł
Kostucha jednako zabiyro do neca.

[broneknotgeld]

Świynto Gora na Oksywiu

Piyrwyj na tym miejscu krziż nabożnie stoł
W opiece ofiary zarazy łon mioł
Dyć dzisioj go niy ma. Kaj ta gora świynto?
Kto terozki ło tym jeszcze durś pamiynto?

[broneknotgeld]

Oksywsko kapliczka św. Rocha

Z moru za życio czynsto wyłazioł
Tyż inkszych kostusze niy doł
Ze wiarom na to zowdy sie ważoł
Niym w końcu ducha som wydoł

Toż przed zarazom Oksywie chroni
Tukej do niego rzykajom
I ta kapliczka zrobiyli łoni
Wiyncy nadzieji z niym majom.

[broneknotgeld]

Chylońsko gora

"Gora Krziżowo" to "Gora Świynto"
Tyż Mikołaja miano pamiynto.

[broneknotgeld]

Cudowno gorka

Świynty Mikołoj wybroł ta gorka
Rzykosz do niego - tu cie wysucho
Niyjedna minie życiowo chmurka
Ze wiary wszysko kero niygucho

Bestoż kapliczka tukej stanyła
Z figurkom zocnom patrona tego
I była ponoć w niyj wielko siyła
Dyć niy sprowdzymy dzisioj już tego.

[broneknotgeld]

Św. Mikołoj na Kaszubach

W pieczy rybokow mioł i pasterzy
Tako tu piyrwyj durś było
Wilki stond wygnoł - możecie wierzyć
Rybokom lżyj sie tyż żyło

Bo jak na morzu se zabłonkal
Do brzegu niy mogli dobić
Toż do patrona tego rzykali
-Ze wiarom szło tako zrobić.

[broneknotgeld]

Śluby Kaszuby

Rybok se na morzu błonkoł
Strach - chocioż rzykoł to aże jonkoł
Świynty Mikołoj ślub słyszoł chopa
-Dom cera Bogu! Minie utropa?!

Do dom dopłynoł - co złe to za nim
I już świyntego ślubym niy mami
Toż pedzioł - Morze całuj mie w rzyć
A moja Klara w doma mo być!

[broneknotgeld]

Herb

Lew na rybie - to ci gratka
Jako we tym jest zagadka?
Możno w Kocie Wazow znak?
Łon Bałtyk traktyje tak?

[broneknotgeld]

Muzeum Rybołowstwa

Muzeum take na Helu szukej
Kaj piyrwyj kościoł tam teroz klupej
Nałdki dziwej tyż zabytkowe
Siedymset lot już pływoł tu czowiek.

[broneknotgeld]

Lew z Łososiym

Lew łososia chycioł - to mi niy sztimuje
Dyć Gdańsk se Krziżokom przeca tyż buntowoł
Bestoż krol Szwecyji z flotom Puck zajmuje
Czy richtig pod zastaw tyn port łon dostowoł?

[broneknotgeld]

Prastary Puck

Archeolog godo - Tyn Puck jest leciwy
Soldy bizantyjske przeca tukej znodli
Ze szostego wieku - toż naprowdy dziwy
Tako w historyjo głymboko aż bodli

[broneknotgeld]

Pucki łodpust

Toż tukej ryboki z cołki okolicy
Nojpiyrw se zbiyrajom we porcie w Kuźnicy
By razym do Pucka zatokom przepłynońć
Łodpustu puckego niy mogom łominońć

Dopłynom do brzegu - idom z procesyjom
Do "Pyjtra i Pawła" ci co z morza żyjom
Za ty "stary piyrwy" tako to bywało
Łod ćwierć wieku jednak na powrot nastało

[broneknotgeld]

"Zopucko"

Tako Kaszuby zwom Kympa Pucko
Dlo nich to zowdy było Zopucko

[broneknotgeld]

Ziymia Pucko

Downiyj ta Ziymia epniejszo była
Dyć sie ze czasym jakoś kurczyła
Choć Puck ze tego możno niy rod
Tako jak dzisioj fufcig już lot

[broneknotgeld]

7 gmin

Siedym gmin puckich dyć dzisioj mocie
Se na Pomorzu wszyske poznocie
Piykne to przeca wybrzeżo strony
Trza rymym ślonskim sypnońć na łonych

[broneknotgeld]

Szczyńśliwo siodymka

Hel Jastarnia Kosakowo
Krokowa Władysławowo
Miasto Puck i tako "wioska"
Szczyńścio znojdziesz tu niytroszka

[broneknotgeld]

Gisdepka

Łod połednia Gisdepka Zopucko łoblywo
Jyj piykny dolince niyjedyn se dziwo

[broneknotgeld]

Puszcza Darzlubsko

Łod zachodu mosz Puszczy Darzlubski tu konski
Kedyś bor wielgachny dzisioj jakiś "wonski"

[broneknotgeld]

Wielke Morze

Nad "Wielkim Morzym" dziedzina leży
Sami to wiycie - niy czeba wierzyć

[broneknotgeld]

Małe Morze

Nikierzy zatokom łod Pucka je zwom
Dyć jo se we gowie "Małe Morze" mom

[broneknotgeld]

Fufcig rokow (1954-2004)

Rowno fufcig rokow Ziymia Pucko tako
Siedym gmin se dzisioj na dziedzina skłodo
Piyrwyj wiynkszo była dyć to już jednako
Ważne że tu Kaszub po swojymu godo.

[broneknotgeld]

Rzucewo Wejherow

Ernest Wejher kupioł - Jan erbnoł po fatrze
Zamek i aleja lipowo skiż niego
Historyjo przeca tego już niy zatrze
Majontek ze klucza był wejherowskiego

Zaś Jakub z Wejherow - pan na swojim grodzie
Se łod Radziwiłłow wzioł za ślubno frela
Toż po śmierci jego Rzucewo we rodzie
Tym litewskim było chocioż małowiela.

[broneknotgeld]

Aleja Lipowo

Z Osłonina do Rzucewa przyńdziesz se alejom
Lipy chnetko lot sztyrysta do ludzi sie śmiejom
Prowda co to nojgryfniejszo tukej drzew jest droga
W cołki Polsce - to tyż szczyrze tukej szkryfnońć moga.

[broneknotgeld]

Rzucewo Sobieskich

Se Michał Radziwiłł z Sobieskom łożynioł
Łona zaś bratowi te Rzucewo dała
Zamek sie krolewskom jakby dongom miynioł
Bo przi Janie III Polska zablyszczała

[broneknotgeld]

W dobrach Przebendowskich

Łod Sobieskich je kupioł Pyjter Przebendowski
Toż zamek już stary - mioł z niym ździybko troski

[broneknotgeld]

Rzucewsko aleja

Marysiyńka Sobiesko czista lip sadziyła?
Niy ma sie co wadzić - prowda inkszo była