Kwiotki i inksze ziyla

[broneknotgeld]

Łoch te sosny

Bez cołki tydziyń glaca żech mioł żołto
Ze sosny pyłek przeca ino boł to
Codziynnie lasym drałowołch nad morze
I nawet bryle mioł żech w tym kolorze.

[broneknotgeld]

Jaśmin

Kwitnie piyknie na bioło choby ta dziywica
Jak łona aromom chopa tyż podniyca
Bestoż modo frelka to dlo mie "jaśminka"
Choć żech som niy mody uszczknoł bych jyj kszinka.

[broneknotgeld]

Cebula

Szczyńściym dlo noszego zdrowia
Ta cebula - tela powia
Dyć jak jo jom yno kreja
Dyrś se ślintom a niy śmieja.

[broneknotgeld]

Begonie

Gubernator Antyli doł im miano swoje
Mnich francuski je łodkrył w siedymnostym wieku
Dzisioj kolorami cieszom łoczy twoje
Balkon i łogrodek - sodź je tam czowieku.

[broneknotgeld]

Malwa

Łozdoba to jest naszych łogrodkow
Łodyga jeji wcale niy krotko
Zowdy zza sztachet tyn kwiotek wyńdzie
Dyć podziwiomy go prawie wszyńdzie

Niy yno jednak łona jest piykno
Bo przeca tyż nom pomogo
Jak sie mynczymy kucaniym chrypkom
I brzuch nom coś niydomogo.

[broneknotgeld]

Koper

Koper cie rozpuczy piyknie
Na trowiynie łon ci styknie.

[broneknotgeld]

Lipa klipie

Jak ryma chycisz boś ździybko klipa
To ci pomoże w utropie lipa.

[broneknotgeld]

Lipa

Lipa lipno niy jest wcale
Lepszo niz bez zima szale
Przeziymbiynie łona goni
Przed chorobom cie łobroni.

[broneknotgeld]

Głog

Łon ci wzmocni słabe serce
Już niy bydzie - na zicherce
Jak dzwon jeszcze ci zabije
Z głogu przeca serce żyje.

[broneknotgeld]

Pokrziwa

Pokrziwa sparzyć cie może
Na nyrki czasym pomoże
I ryjmatyka przegoni
Łod pokrziwy niy trza stronić.

[broneknotgeld]

Lubczyk

Chlyb z lubczykym mi podała
Pewnie cosik łona chciała
Możno jego było mało
Bo niywiela mi to dało.

[broneknotgeld]

Krasikoń

Krasikoń znod żech - mioł liście sztyry
A potym widziołch przepiykne gyry
Ale niy moje szczyńście to było
Choć żech pomyśloł by sie spełniyło.

[broneknotgeld]

Irysy

W Egipcie cynione
Przez Grekow chwolone
We zocy Francyji
No i Floryncyji

Z łogrodka je znomy
I durś podziwiomy
Som choby lilije
A klara w nich żyje.

[broneknotgeld]

Jabko

Fest zofcite! - Tkosz do gymby
A ktoś stracioł przez nie zymby
Ugryz Adam bo chcioł wiedzieć
I na ziymia poszoł siedzieć.

[broneknotgeld]

Zimowitki

Zimowitki już rosnom we różowym fiolecie
Chyba szepto tyn kwiotek że sie zima już plecie.

[broneknotgeld]

Kasztan

Już kasztanowce sypiom kasztany
We kerych świat jest zaczarowany

Blyszczy sie bronzym świyży dojrzały
Z czasym nom uschnie wyblaknie cały.

[broneknotgeld]

Rokitnik

Mie tyn rokitnik teroz zochwyco
Rośnie łon ponoć pod Rokitnicom.

[broneknotgeld]

Lebioda

Lebioda dobro na lebra
Dali niy robi ale mo febra.

[broneknotgeld]

Na kłokoczce

Z krzoka żech na świot se dziwoł
Jejich kwiotkow tyż nazrywoł
Mom na łoku jedna frela
Z kerom kwieciym sie podziela.

[broneknotgeld]

Powiym - trza wom to sprobować
Lubczyk to sie może schować
Joch tyj freli ledwoch uciyk
Boch wystraszoł sie jyj chuci.

[broneknotgeld]

Reszta kwiotkow joch wyciepoł
Jakiś karlus mie zaczepioł
Pedzioł że sie niy pszoł z łysym
A mie wcale to niy śmiyszy.

[broneknotgeld]

Chryzantymy

Wiela urody łone tyż majom
Ale z kerchowym mi sie zlepiajom.

[broneknotgeld]

Miynta

Miynta czuja jo do ciebie
Jak powoniom to żech w niebie.

[broneknotgeld]

Miynta pieprzowo - fefermynt

Krojcok normalny ze ty rośliny
Niy ma co robić tu kwaśny miny
Dwie miynty w jedna se skuplowali
Z Anglyji poszło to potym dali.

[usia.t]

Wiedziała tysz panna
Kaj rośnie dziywanna.
Jest wysoko jak kij,
pszczoły miod robią z nij.

[broneknotgeld]

Gwiazda betlejymsko

Niy prziszła do nos wcale ze wschodu
W Meksyku rośnie łod zowdy
Wilczomlycz ze niyj jo ci to godom
Boj sie jyj soku - naprowdy

Jeji przikwiotkym piyknym sie cieszcie
Co gwiazda nom przipomino
Z niom tyż trzech kroli gościcie w mieście
U wos som z dobrom nowinom.

[broneknotgeld]

Jymioła

Dymbom brzozom topolom fest pszaje jymioła
Choć niyjedna asta sie jom przeca boła
Łodbiyro jyj woda no i minerały
Skiż niyj bywo czasym nawet domb schorzały

Moc jeji jest wielko - nawet bogom szkodzi
Z mitow skandynawskich przeca to sie rodzi
Tyn pieroński Loki fest był niygodziwy
Baldra niom pokonoł - to ci boske dziwy

We celtyckich czasach świyntom łona była
Nojbardzi ta z dymbu w kery wielko siyła
Złotym siyrpym druida z gałyńzi utniynto
Nawet krew ofiary jymioła pamiynto

Som domb przeca bogym - a był w jeji mocy
Ze niyj to na ludzi mogło przyńść we nocy
Magia siyła i jurność jymioła dowała
No i łod trucizny kożdyj ratowała

W średniowieczu heksy i diobły goniyła
Anglii i Francyji szczyńście przinosiyła
Do dzisioj we zocy miywo jom Europa
Radość mo przikludzić - wygonić utropa

Dyć we medycynie tyż miejsce sie znodła
Niy darmo przez wieki ludzi czymsik bodła
W hercklekotach padaczce złyj jusze sklerozie
Trowiyniu i krebsie łona cie wspomoże.

[broneknotgeld]

Pieprz

Bioły czorny i czerwony
Bywo nawet tyż zielony
Dyć to zowdy pieprz tyn som
Choć kolorow tela znom.

[broneknotgeld]

Z pieprzym

Z pieprzym naprowdy dobro pieprzowka
Po niyj niy mynczy sie jakoś głowka
No i bebechy czimie we normie
Wypij pieprzowka coby być w formie.

[broneknotgeld]

Ło pieprzu

Pieprz był drogi choby złoto
Dyć stoniało wszysko to to.

[broneknotgeld]

Alech tu popieprzoł pieprzym
Inkszych przpraw już niy było?
Dyć łon możno jest nojlepszy
Ciynżko by bez niego było.