Dodaj do ulubionych

Rym ...a godka

04.01.11, 08:32
Rym a Godka

My chcymy pamiyntać
ta nasza godka
Jak nóm prawioła
óma , ópa ,ciotka

Eli wszysko pódzie
we zapómniynie
Eli jak umrzymy
ze godki ciynie

Lata zakazu we
Szkołach godanio
Mówić uczono
Godka pomotlano

Czujesz ta Ślonskość
Ciyngym cosik robisz
Pamiyńć już niy ta
Dyć we godce zgobisz

Ciyngym spominosz
Jako kejsik godali
Wkłodosz to we rymy
A wszysko sie wali

Tropisz sie czy richtig
Skłodnie naszkryflałaś
Dyć tym rymom przajesz
Przeca fest storałaś

Barbara Politaj
Obserwuj wątek
    • marijankaonline Re: Rym ...a godka 04.01.11, 08:35
      RUDA ŚLONSKO

      Moje miasto Rudo Ślonsko
      Tukej jest mój dom
      Tukej dziecka wychowałach
      Tukej wszystkich znom
      Twoje gruby twoje huty
      Hołdy , familoki
      Łogródeczki i osiedla
      Betonowe bloki
      Kościół kaj Świynto Barbara
      Patronuje farze
      Kaj tyn Hanys bezrobotny
      Kludzi flachy w karze
      Cugi ,banki autobusy
      Co nimi rajzuja
      Torg na Wiyrku
      Co tam w szworek
      Na sztandach kupuja
      Rudo Ślonsko moje miasto
      Mocka jo ci przaja
      Niy dom pedzieć słowa złego
      Pryndzyj zrobia haja
      Dlo poetów naszych ślonskich
      Świotełko oświycosz
      I bergmonów mosz we zocy
      Gorko za nich rzykosz
      Miasto Ślonska nojmilejsze
      Kej żywot zakończa
      Na smyntorzu mie chowejcie
      Tam kaj wiela słońca

      Barbara Politaj
    • marijankaonline Re: Rym ...a godka 04.01.11, 08:38
      Rzykanie Bergmóna

      Kej na szychta jada
      Tam do szoli właża
      Twój łobroz mom w gowie
      Z cechowni ołtarza

      Stojisz ty tam hyrsko
      Zocno , gryfno Pani
      Barbóreczko Świynto
      Wstow sie Ty za nami

      By szczyńśliwe były
      Te nasze powroty
      By nom niy zabrakło
      Tyj zocnyj roboty

      Chroń nos przed wypadkiym
      Przed śmierciom na dole
      Bych fest narobiony
      Zaś trefioł do szole

      Żebych słonko łobejrzoł
      W doma dziecka , żonka
      Bych ze wiosny usłyszol
      Na polach skowronka

      Barbóreczko Świynto
      Nasza zocno Pani
      Weź Ty nos w łopieka
      Ulituj nad nami

      Tak jo zowdy rzykom
      Do Ciebie patronko
      Uchroń moje życie
      Chca łoglondać słonko

      Barbara Politaj
      • marijankaonline Re: Rym ...a godka 04.01.11, 08:42
        Ach te lody

        Poberomy se ło lodach
        Ło inkszych niż dzisioj
        Poberomy se ło lodach
        smak mi na nie prziszoł

        Tyn Calipso śmietankowy
        We strzybnym zilberku
        Spómna jeszcze i Bambino
        W tyj budce przi werku

        Dyć nojlepsze w gorke lato
        Ze Pingwinym było
        Chocioż zowdy była raja
        Nas to niy mierziyło

        Ach te lody ze dzieciństwa
        Czamu już ich niy ma
        Możno teroz som i lepsze
        Istne durś w wspómniyniach

        Za Calipso za Bambino
        Za tego Pingwina
        Łoddom wszyske lody świata
        Dzieckym być? Marzynia.

        Barbara Politaj
        • marijankaonline Re: Rym ...a godka 04.01.11, 08:44
          Aerobik po naszymu

          Powywijosz śmiatkym
          Zetrzesz tyż deliny
          Poskokosz przi łoknie
          Przewiesisz gardiny

          Zrobisz małe pranie
          Cosik pobiglujesz
          Wleziesz na drabina
          Byrna wypucujesz

          W lodówka niy kukniesz
          A z wieczora wcale
          Stracóm sie fałdeczki
          Stracóm sie i żale:)

          Barbara Politaj
          • marijankaonline Re: Rym ...a godka 04.01.11, 08:46
            A czymu?

            Ty suchosz jak dziecko
            zadowo pytania
            Kej yno umi
            poskłodać zdania
            Łoczka te piykne
            na Ciebie patrzom
            A łodpowiedzi
            tak wiela znaczom
            Czymu te niebo
            jest take modre?
            A gwiozdki na nim
            świyconce , szykowne?
            Te ptoszki czymu
            tak piyknie śpiywajom?
            A czymu te rybki
            we wodzie pływajom?
            Tropisz sie zowdy
            co tu łodpedzieć
            A mały bajtlelek
            nowe chce wiedzieć
            A czymu , a czymu
            powiydz mi zaros
            Hm... musza pomyśleć
            dyć fest sie starosz...

            Barbara Politaj
            • marijankaonline Re: Rym ...a godka 04.01.11, 08:48
              Ania i bania

              Szkryfna dzisioj ło tyj bani
              Co rosła w zegródce Ani
              Ania fest ło bania dbała
              Dziynnie jom tam podlywała

              Rosła bania łogromniasto
              Grzondka była już zaciasno
              Farby piykny tyż nabrała
              Fest sie Ania radowała

              Cza wykopać już ta bania
              Niy do rady sama Ania
              Wziyna ze sobom Jorgusia
              Ku pomocy jeszcze Usia

              We trzech wytargali bania
              Dyć już pora przyszła na nia
              Halołin wloz nom do mody
              Tam kajś za tyj wielkij wody

              Straszyć bydzie łoświytlono
              Bo już cołko wynontrzono
              Bajtle bydom sie radować
              i bombony w miyszki chować

              I komportu sie napijom
              Z tym niy bydzie tyż mecyjo
              Tyn na łoccie z goździkami
              Kery tak smakuje Ani


              Barbara Politaj
              • marijankaonline Re: Rym ...a godka 04.01.11, 08:50
                Były plany...

                Gyszynki dlo dzieci
                Na Boże Narodzynie
                Tyn elegacki szrank
                Jedno nowe łodziynie

                Ta zowdy łobiecano
                Na wongel łojcom kartka
                Silwester u naszych kamratów
                Przi wiliji wina lampka

                Ańfach sie zdowało
                te nasze bycie
                Rombło,huk, koniec
                Skończoło sie życie

                Łostatnio szychta Twoja
                Łobiod w gorkach leży
                Łoczy suche parzom
                Płaczków niy ma, ftoś uwierzy...

                Yno tyn ból tympy
                Co w gowie świdruje
                Sklekotane serce
                strach paraliżuje

                Niy ma już planów
                Poszły kańś do ciynia
                Niy ma już nic
                Łostanom wspomniynia......

                Barbara Politaj
                • marijankaonline Re: Rym ...a godka 04.01.11, 08:52
                  BRIF DO PONBÓCZKA

                  Pisza jo do Ciebie PONBÓCZKU kochany

                  Brif mój choć lichutki to łod serca dany

                  Pozdrowiom Cie piyknie we kożdy dzionek

                  Slysza jo Twój głos kej śpiywo szkowronek

                  Dej mi znać PONBÓCZKU jako tam jest w niebie

                  Eli moje bliske siedzom już u Ciebie

                  Eli moja mama i łojciec kochany

                  Przyszli i łotwarli tam do raju bramy

                  Pytom sie i rzykom ło znak jakiś prosza

                  Bo ciyngym w serduszku pokora jo nosza

                  Eli jake światełko ku Ciebie sie kludzi

                  Wiela mój PONBÓCKU mosz tam dobrych ludzi

                  Niy gorsz sie już na mie ze tak wypytuja

                  Znosz moja duszycka wiysz że Cie miłuja

                  Zowdy yno prosza ło tyn znak we życiu

                  Placzki zowdy lecom trzymia je w ukryciu

                  Pozdrowiom Cie Gorko jo twoja dziecina

                  Kej byłach frechowno przebocz … moja wina!

                  Barbara Politaj
                  • marijankaonline Re: Rym ...a godka 04.01.11, 08:53
                    Bojkowy kwiotek

                    Póda jo se kajś do lasu
                    We nocka czyrwcowo
                    Byda kukać na paprocie
                    Bateryjka mom ze sobom

                    Możno znojda kwiot paproci
                    Legyndarne cudo
                    Dyć niy urwia kej tam bydzie
                    Klipsnońć mi sie udo

                    Zdjynci kwiotka dom do romki
                    Powiesza na ścianie
                    Byda ciyngym tam zaglondać
                    Ech... zowdy przed spaniym

                    Na miynkućkim zegóweczku
                    W śnik przepiykny póda
                    W duszy dziecko?Kożdy mo!
                    I staro maruda.

                    Barbara Politaj
                    • marijankaonline Re: Rym ...a godka 04.01.11, 08:56
                      "BURZA"

                      Burza za burzom dziynnie sie kulo
                      Pierony lecom dyć żodyn niy fulo
                      Parno łod rana ciyngym duchota
                      Niy widzisz kamrata stoć wele płota

                      Dyć ta pogoda jak nasze życie
                      Roz słońce roz dyszcz roz nawałnice
                      Słonka czekomy ,czekomy zgody
                      Starzik i starka , syneczek mody

                      Dyngi po burzy co piyknie sie miyni
                      Radości we sercu, "Dziyń dobry "we siyni
                      Niywiela tak trzeba a ciyngym udrynka
                      Chocioż na zgoda wyciongosz rynka

                      Dyć co jom wyciongosz , zaś coś ugryzie
                      Zaś lecom pierony , zaś dusza w biydzie
                      Tak sie to kulo w koło Macieju
                      I bydź tu mondry mój przyjocielu!


                      Barbara Politaj
                      • marijankaonline Re: Rym ...a godka 04.01.11, 08:57
                        Brif do Dzieciontka

                        Dziecionteczko Boże
                        Brif do Ciebie szkrobia
                        Dej mi wyboczynie
                        Kej możno nazgobia

                        Niy chca jo gyszynków
                        Złota i rubinu
                        Za to dej mi zdrowie
                        Niy pytej sie czymu

                        By moji familiji
                        Sie krzywda niy stała
                        Bych tyn konsek chleba
                        Dziynnie rano miała


                        Niych świynta Dzieciontko
                        We szczyńściu zaś bydom
                        Żebych niy storała
                        Sie ze jakomś biydom

                        Ozdrów serca tych
                        Co szkalujom wiela
                        Chroń przed niynawiściom
                        Co w tym świecie tela

                        Możno mi sie spełni
                        Prosza piyknie Ciebie
                        Niy trza mi już wiyncyj
                        Byda mieć jak w niebie...


                        Barbara Politaj
                        • marijankaonline Re: Rym ...a godka 04.01.11, 09:00
                          Cichy zabójca

                          Cichy podstympny
                          cichtowoł sie w norze
                          Bez smaku zapachu
                          zaścieloł swe łoże

                          Cichtowoł nadymoł
                          bez farby mioł lica
                          Macki wyciongoł
                          czekoł na hica

                          Spoziyroł za winkla
                          robocie przyglondoł
                          W czeluściach wyngielnych
                          swoj trójkont rozciongoł

                          Taki łopasły
                          we swoje moce
                          Gruchnoł polecioł
                          wymiot po dródze

                          Łogiyń dopomóg
                          Łuny w czeluściach
                          Dopod górników
                          Tyn szpetny zabójca

                          Barbara Politaj
                          • marijankaonline Re: Rym ...a godka 04.01.11, 09:03
                            Zima

                            Doczkomy zimy
                            Kej śniegu wiela
                            Stromów biolutkich
                            Klojzdówek w niydziela?

                            Wielgachnych bałwanów
                            Z kneflami czornymi
                            Gwiozdeczek lodowych
                            Kej szklom sie na ziymi?

                            Górek zacióngłych
                            Śniygowym tepichym
                            Kaj mroźny szrón
                            Za lasym cichym?

                            Ech tako zima
                            Marzyniym kozdego
                            Bajtla starzika
                            Pisorza zocnego

                            Barbara Politaj
                            • marijankaonline Re: Rym ...a godka 04.01.11, 09:04
                              Danga Dynga Tyncza

                              Dynga - danga to ta tyncza
                              wiyncyj tukej jom niy myncza

                              Kożdy bajtlik jom maluje
                              dyć z farbami fest rojbruje

                              A łobrozek piykny zowdy
                              we przedszkolu bardzo modny

                              A ło ronczkach to niy godom
                              cza szorować mydłym wodom

                              Ale bajtlik dumny fest
                              że na kartce danga jest.

                              Barbara Politaj
                              • marijankaonline Re: Rym ...a godka 04.01.11, 09:07
                                Flidrowy maj

                                We maju we gaju flidrowym
                                Tak piyknie słonko zaś grzeje
                                We maju fest kolorowym
                                Ciepły wiater nóm wieje

                                Siednymy se na ławeczce
                                We cichym flidrowym gaju
                                Pospominomy tyż młodość
                                Eli było jak w raju?

                                Woń flidra zakrynci Ci w gowie
                                Tak żyć sie chce zaś ze wiosny
                                Niy boja sie żodnyj burzy
                                Dyć rym Wom klyca radosny

                                Łoj maju szykowny miesioncu
                                Ty ludziom serca łotwiyrosz
                                Toż gorko gowa poety
                                Kej bramy raju łotwiyrosz

                                autor

                                Barbara Politaj
                                • marijankaonline Re: Rym ...a godka 04.01.11, 09:09
                                  „Na miano”

                                  Momy tukej Sowizdrzoła
                                  Z łorgankami gno przez pola
                                  Bo na naszyj ślonskij ziymi
                                  Miana żodyn mu niy zmiyni.

                                  „Na nuta”

                                  W polu, lesie, echo niesie
                                  Śpiywka piykno nom prziniesie
                                  Czy w serduszko wpadnie nuta
                                  Nojmilszego bałamuta?

                                  „Na emigranta”

                                  Niy jednego ze Ślonska wygnało,
                                  Możno i tak być musiało
                                  Tynskni, ślimto, fraszki klyci
                                  Dyć te same słonko świyci.

                                  Barbara Politaj
                                  • marijankaonline Re: Rym ...a godka 04.01.11, 09:11
                                    Lipa a gripa

                                    W lichym łodziyniu siednoł pod lipa
                                    Kiej w nocy przeziombnoł dopadła go gripa
                                    Natargoł kwiecia biołego lipy
                                    Zaparzi se tyju pozbydzie sie gripy.


                                    Na kusik

                                    Przaja wielce moji frelce
                                    Dyć wyznać to musza
                                    Jo łodkrywom swoje serce
                                    Kusikym jom skusza

                                    Sowizdrzoł

                                    Karlus gryfny i ucieszny
                                    Wionki frelkom kradnie
                                    Rymek możno zdoł sie grzysznym
                                    Skisz prowdy niy padnie.

                                    Barbara Politaj
                                    • marijankaonline Re: Rym ...a godka 04.01.11, 09:14
                                      O frelce co zwiyrzokôm nieba uchyli



                                      We zielonym lesie we samym postrzodku

                                      Stoji chałpka malućko kaj rabaty kwiotków

                                      W okiynkach gardinki bieluśke furgajôm

                                      Akuratno tam frelka… zwiyrzoczki jôm znajôm

                                      Samiutko se miyszko we wielgachnym lesie

                                      Wczas osierocôno terozki już wiycie

                                      Szwarno ôna dziołszka dobrota mo w siebie

                                      Przi nij kot i psioczek majôm sie jak w niebie

                                      Ptoszki tam świyrgolôm łod rana do nocy

                                      Futruje je frelka dyć trele mo w zocy

                                      Wywiórki skokajom na strômie u frelki

                                      Lyski i tam znoszôm kej zbiyro kamelki

                                      Kej na progu siado dychnôńć po robocie

                                      Zwiyrzoki już lecôm i szukajôm pociech

                                      Głasko tuli do sia śpiywo pieśni piykne

                                      Psioczek sztucho mordkom , kotek na klin mignie

                                      Barbara Politaj
                                      • marijankaonline Re: Rym ...a godka 04.01.11, 09:20
                                        MIGLANC

                                        Synek gibki i do szpasu
                                        Frelkom przaje? Ech do czasu
                                        Hań pozgobi hań zahoczy
                                        Freli zańdom płaczkom łoczy.
                                        - -
                                        KOMINORSKE SZCZYŃŚCI

                                        Szczyńsci przi nim ponoś zowdy
                                        Knefel łapniesz dowiysz prowdy?
                                        Sadza furgnie ci przi łoku
                                        Bier te szczyńści niy patrz z boku.
                                        - -

                                        KLACHULA
                                        - -
                                        Niy łod wieku to zoleży
                                        Modo , staro ftoś uwierzy?
                                        Klacho wszyndy „nudle wiyszo”
                                        Fest jest rada kej namiyszo.
                                        - -
                                        FARORZ

                                        Chop we szatach przi ołtorzu
                                        Moge fara mieć przi morzu
                                        I we górach przi jeziorach
                                        Mój miastowy tyż go kwola.


                                        Barbara Politaj
                                        • marijankaonline Re: Rym ...a godka 04.01.11, 09:23
                                          Gynsipympki

                                          Rosnom na łónce
                                          te małe kwiotuszki
                                          Szmaterlok tam siednie
                                          siednom i muszki

                                          I bożo krówka
                                          z kwiotuszka spoziyro
                                          W płateczkach malućkich
                                          szłapkami przebiyro

                                          Sóm take skrómne
                                          beztóż sóm piykne
                                          We wionku uplecisz
                                          tak wiela , że styknie

                                          Stokrotka z polskiego
                                          terozki to wiycie
                                          Przaje ji kożdy
                                          tam przeca życie

                                          Barbara Politaj
                                          • marijankaonline Re: Rym ...a godka 04.01.11, 09:25
                                            Gołombki

                                            Piykne ptoszki to gołymbie
                                            Znak pokoju ducha
                                            Już niy godom ło tych flugach
                                            Tam Ślonzoka duma

                                            Bo tradycjo jest Ślonzoka
                                            Gołymbnik w zegrodzie
                                            Tyn kto serce mo dlo ptoszków
                                            Gołomb go niy bodzie

                                            Kto gołymbie fest szkaluje
                                            Bez serca czowiekym?
                                            Nawet starzik ci to powiy
                                            Ty doświodczysz z wiekym

                                            Ach gołymbie mieć serduszko
                                            Marzy ludzkość nasza
                                            Koniec z wojnom niynawiściom
                                            No cóż trza mieć klasa...

                                            Barbara Politaj
                                            • marijankaonline Re: Rym ...a godka 04.01.11, 09:27
                                              Hymn "Ślonskij Godki"

                                              I
                                              Na cołkim świecie na zajtach w necie
                                              Piykniejszy stronki już niy znojdziecie
                                              Bo jedna tam jest ślonsko perełka
                                              Jako ta gryfno malućko iskerka
                                              Blyszczy jak gwiozdka na modrym niebie
                                              Kiej na nia klikniesz jeżeś u siebie

                                              Ref

                                              To "Ślonsko Godka" nasz piykny dom
                                              Pszaja ji wielce dyć godom wom
                                              Tam mom kamratów tam słonko jest
                                              Kiej już tam wleziesz zapszajesz fest!

                                              II
                                              Ludki co kwilka tam zaglondajom
                                              We nasza ksiynga piyknie szkryflajom
                                              Bery ,wierszyki ,zdjyncia ,piosynki
                                              We ślonskij gwarze jako gyszynki
                                              Dyć zaproszomy na nasza stronka
                                              Z nami i pojysz ślonsko wodzionka

                                              ref

                                              To "Ślonsko Godka" nasz piykny dom
                                              Pszaja ji wielce dyć godom wom
                                              Tam mom kamratów tam słonko jest
                                              Kiej już tam wleziesz zaprzajesz fest!

                                              Barbara Politaj
                                              • marijankaonline Re: Rym ...a godka 04.01.11, 09:28
                                                HEKSA

                                                Z piekła rodym to jest baba
                                                Niyańfach urody
                                                Kusi chopów na zło dróga
                                                Z djoskym szuko zgody

                                                W łoczach piyknych połnych blosku
                                                Piekła widzisz bramy
                                                Lica blade jako kreda
                                                Dosz kusik przegranyś

                                                W nec swój chyto,wobi piyknie
                                                Wdziynki pokazuje
                                                Kiej Cie dropnie, skusi do sia
                                                Toż sie fest raduje

                                                Lichy żywot jes kamrata
                                                Przepod łon na zowdy
                                                Djosek z Heksom drewka poli
                                                Dyć na dusza głodny

                                                Barbara Politaj
                                                • marijankaonline Re: Rym ...a godka 04.01.11, 09:31
                                                  JESIYŃ

                                                  Ścielom sie liście mechtajom farbom
                                                  Tepichym przepiyknym ziymia przikryto
                                                  Dymbiok ryszawy sie kulo z kasztonym
                                                  Wiater we stromach gro cichom muzykom

                                                  Jesiyń paniczka idzie przez lasy
                                                  Zaglondo we parki i pola
                                                  Furgajom liście jak szmaterloki
                                                  Dyć tako jest jeji wola

                                                  Słonko przebijo przez kalne niebo
                                                  Kej dzionek jesiynny sie budzi
                                                  W zżołknionyj dymbach siado na hyrdzi
                                                  Poświata złocisto kludzi

                                                  Chocioż tak piyknie jest nałokoło
                                                  Nale w postrzodku mie ścisko
                                                  Dyć przelotuje i moje życie
                                                  Ech do starości tak blisko...

                                                  Barbara Politaj
                                                  • marijankaonline Re: Rym ...a godka 04.01.11, 09:33
                                                    Katyń - 10.04.2010r

                                                    W bólu i żolu jest Naród Polski
                                                    Zocni ludzie zginyli
                                                    Łostatnio rajza? Dyć niy wiedzieli
                                                    Tragiczny "przystanek" mieli

                                                    Uczcić pragnyli ofiary Katynia
                                                    Kwiat piykny... tyj downyj Polski
                                                    Na msza chwalybno już niy zdonżyli
                                                    Mgławica zakryła ich szczontki

                                                    Stołki czekały na zocnych gości
                                                    Mszo sie bez nich odbyła
                                                    Płacze Katyń nad nowom tragediom
                                                    Polska sie kirym łokryła

                                                    Kwiecie tyj nowyj naszyj histori
                                                    Zgnieciony fligra żelozym
                                                    Co my mogymy ? My Naród Polski
                                                    Sie godzić z wyrokiym Bożym

                                                    Trza nóm porzykać i prosić gorko
                                                    Ponbócku weź ich ku siebie
                                                    Łotwórz im bramy Królestwa Twojigo
                                                    Niych rajza skończy sie w niebie

                                                    Barbara Politaj
                                                  • marijankaonline Re: Rym ...a godka 04.01.11, 09:35
                                                    1 LISTOPAD

                                                    Małe i wielke smyntorze
                                                    Kwieciem łodzione , wiyńcami
                                                    Znicze i małe świycuszki
                                                    blyszczom ku niebie łunami

                                                    Dzisioj jest wielke świynto
                                                    Tych co poszli w zaświaty
                                                    Dyć przekroczyli próg życio
                                                    Rodzina, niyznani, kamraty

                                                    Wszyscy przy grobach stojom
                                                    Rzykanie słyszy Ponbócek
                                                    Prośby ło niebo dlo Nich
                                                    A dlo nos by lekszy był smutek

                                                    Dwa światy we jednym miejscu
                                                    Żywi i zmarli świyntujom
                                                    Łuny blyszczom ku niebu
                                                    Czerwono poświata snujom

                                                    Barbara Politaj
                                                  • marijankaonline Re: Rym ...a godka 04.01.11, 09:37
                                                    Magjo czorno- biołych zdjynć

                                                    We starym albumie wklejone
                                                    Kajś skryte we szranku na dnie
                                                    Choć trocha wyblakłe skurzone
                                                    Za serce chytajom Cie

                                                    Przychodzi czas na spomniynia
                                                    Łotwiyrosz album i jest
                                                    Ta magjo Ci sie udzielo
                                                    Tyn czar przyciongo Cie fest

                                                    Łoglondosz te stare zdjyncia
                                                    A płaczka we łoku sie krynci
                                                    Tam matka i łojciec som młodzi
                                                    Tam tysz Twoj wiek niymowlyncy

                                                    Kajś s tytom do piyrszyj klasy
                                                    Stoji malutko chudzinka
                                                    Na gowie szlajfa doś wielko
                                                    Na buźce słodziutko minka

                                                    Oma i opa Cie tulom
                                                    Bo piyrszo Twoja Komunio
                                                    Wionek ze merty i brośka
                                                    I świyczka czimiesz fest dumno

                                                    A dalij młodziyncze lata
                                                    Kolonje i gory i las
                                                    Kajś w dali jest piyrszo miłość
                                                    Ach minoł tyn piykny czas

                                                    Niy łoddo Ci tego co teras
                                                    Tyn kodak tyn kolor i film
                                                    To magjo zdjynć czorno -biołych
                                                    Tyn album ze szranku tyn ciyń...

                                                    autor
                                                    Barbara Politaj
                                                  • marijankaonline Re: Rym ...a godka 04.01.11, 09:39
                                                    Morze

                                                    Morze srogo woda
                                                    Bałwoniaste fale
                                                    Kej sztormy przyłażom
                                                    W portach słychać żale

                                                    Ryboki markotne
                                                    We szynku kajś siedzom
                                                    Szify marynorskie
                                                    Ze ankrami biydzom

                                                    Ździybko rumu z beczułki
                                                    Dlo wszyskich pociecha
                                                    Hań niyjedna szanta
                                                    Wyłazi ze miecha

                                                    Beranio posuchosz
                                                    Jako kejsik bywało
                                                    Jedyn szluk ze flaszki
                                                    Piyknych szant niymało

                                                    Łoj leci pieśniczka
                                                    ło tych co na wodzie
                                                    Eli Neptun ulituje
                                                    Miyj w łopiece Boże


                                                    Barbara Politaj
                                                  • marijankaonline Re: Rym ...a godka 04.01.11, 09:42
                                                    Malućko ptaszyna"

                                                    Cichutkim głosikym świyrgoli ptaszyna
                                                    Piórka mo mokre w szłapecki i zima
                                                    Wziołabych ciebie w ciepełku skukała
                                                    Kej byś sie jeszcze mi chycić dała
                                                    A ty tam siedzisz na gołyj gałynzi
                                                    Niy chcesz mieć z ludźmi tak bliskij wiynzi
                                                    Czy nocka przeżyjesz? Doczekosz dzionka?
                                                    Czy Cie łogrzejom promyki słonka?
                                                    Jak stana raniutko czy Cie usłysza
                                                    Wstałach... za łoknym dyszcz siompi i cisza...

                                                    Barbara Politaj
                                                  • marijankaonline Re: Rym ...a godka 04.01.11, 09:43
                                                    MUZYKA

                                                    Nutki gnajóm jedna za drugóm
                                                    Wszysko sie pleci we melodyjo
                                                    Trombka ,klawiyr i skrzipki piykne
                                                    Gro nóm już cołko filharmonijo

                                                    Dlo ucha i duszy to to wielgo gościna
                                                    Kej leci muzyka przepiykno
                                                    Oczy zablyszczom niy roz i płaczkom
                                                    We sercu festelnie Ci tyko

                                                    Leć melodyjo przez cołki świat
                                                    Kupluj nóm ludków ku siebie
                                                    Niy trza nom wiela bo twoja magio
                                                    Bez chmury gno i ku niebie

                                                    Barbara Politaj
                                                  • marijankaonline Re: Rym ...a godka 04.01.11, 09:44
                                                    Naszym poetom

                                                    Coś sie łodrodziyło
                                                    Serca barzij bijóm
                                                    We tyj naszyj godce
                                                    Ślonske rymy żyjóm

                                                    Tela ludzi przaje
                                                    Wiersze piykne szkryflo
                                                    Niy roz płaczka leci
                                                    Ze uciechy - gryfno

                                                    Niy ma gańbowanio
                                                    Rymy wartko gnajóm
                                                    Fraszki, poezyjo
                                                    Liryka tyż znajóm

                                                    Kunsztym świycom strofy
                                                    Ło tyj Ślonskij Ziymi
                                                    Piyknym kwieciu ze wiosny
                                                    Ło strómach , zielyni

                                                    Bioło tyż paniczka
                                                    Kjojzdo nom po lodzie
                                                    Barbóreczka gryfno
                                                    U berkmóna w modzie

                                                    Utopki i strzigi
                                                    W rym sie wybiyrajom
                                                    Beranie po ślonsku
                                                    Wszyscy dobrze znajom

                                                    Gowa nisko schylom
                                                    Poetom dziynkuja
                                                    Dobro kuko w serce
                                                    Kej wiersze czytuja!!!!


                                                    Barbara politaj
                                                  • marijankaonline Re: Rym ...a godka 04.01.11, 09:46
                                                    Nojgryfniejsze ślonskie słowo

                                                    Nojgryfniejsze słowo
                                                    Szukom medytuja
                                                    Co chyci za serce
                                                    "Kopruch" czy "leluja"

                                                    Chocioż i "szmaterlok"
                                                    Wlecioł mi do gowy
                                                    "Cimpel" siod za łoknym
                                                    Starunek gotowy

                                                    Możno "flider" lilowy
                                                    Abo bioło "trusia"
                                                    Spominom "zegródka"
                                                    Co tam "plyci" Usia

                                                    No i nojwożniejsze
                                                    "Pszonie" eli "przocie"
                                                    Fest gorke "kusinki"
                                                    Wszyscy to znocie

                                                    "Szpyndlik" co mie bodnoł
                                                    Serce na "zicherce"
                                                    "Karlus" powiy dobre
                                                    Spodobo sie "frelce"?

                                                    A tyn "byfyj" we kuchni
                                                    Co "szolkami" szczyrko
                                                    "Izba" na nij "tepich"
                                                    Ślonske niy jest wyrko

                                                    Tyla gryfnych słówek
                                                    We gowa wlazuje
                                                    Co tu obrać ludzie?
                                                    Co komu spasuje?

                                                    Barbara Politaj
                                                  • marijankaonline Re: Rym ...a godka 04.01.11, 09:47
                                                    Nasze przoci

                                                    Nasze przoci to dziecka
                                                    Kej do sia tulymy
                                                    To matczyno miłość
                                                    Tak zowdy czujymy

                                                    To jest i twój chopek
                                                    Co ring doł ci złoty
                                                    Dyć przed Bogiym prawiył
                                                    Kej był jeszcze mody

                                                    Naszo piykno Ziymia
                                                    Na keryj żyjymy
                                                    Nasz Pónbóczek dobry
                                                    Fest go miłujymy

                                                    W przociu dusza piykno
                                                    Serduszko co czuje
                                                    Przoci nojgryfniejsze
                                                    Kej łobroz malujesz

                                                    Kej łod serca szkryflosz
                                                    We strofki ukłodosz
                                                    Z przocia to sie biere
                                                    I lepszym sie stowosz

                                                    Przoci , miłowanie
                                                    Dyć słowa … te same
                                                    Jedne yno prosisz
                                                    Niychej w życiu dane!

                                                    Barbara Politaj
                                                  • marijankaonline Re: Rym ...a godka 04.01.11, 09:49
                                                    Niyhersko dusza

                                                    Dusza mom niyhersko
                                                    Kej krziwda sie dzieje
                                                    Kej bliski jest chory
                                                    Wiater zimny wieje

                                                    Uciecha ze życio
                                                    Kajsik ulatuje
                                                    Serce ból tyż trowi
                                                    Jodło niy smakuje

                                                    Zło dobroć zalywo
                                                    Szkamro ci przi uszach
                                                    Kej dusza niyhersko
                                                    Śmiychu niy wymusza

                                                    Ciynżko mi kamracie
                                                    Strowić ta zgryzota
                                                    Dobre myśli traca
                                                    Czorne duszy wrota

                                                    Yno ta nadziejo
                                                    Co to gupich matkom
                                                    Trzymie mie przi życiu
                                                    Myśli dobrych swatkom

                                                    Ciyngym boje tocza
                                                    W ty moji utropie
                                                    Ech dusza niyhersko
                                                    Kral jom łostry dropie

                                                    Barbara Politaj
                                                  • marijankaonline Re: Rym ...a godka 04.01.11, 09:51
                                                    OBLATEK

                                                    Bioły lekutki
                                                    Chlybiczek anielski
                                                    Kej sie nim dzielisz
                                                    Zdowosz sie wielgi

                                                    Tela mo siyły
                                                    We swoji kruchtości
                                                    Łomiesz go z bliźnim
                                                    Toż serce w miłości

                                                    Żole , utropa
                                                    Idom do ciynia
                                                    Zbliżo sie dziyń wielki
                                                    Dziyń Bożego Narodzynia!

                                                    Jo wasza kamratka
                                                    Oblatkym sie dziela
                                                    W tym małym chlybiczku
                                                    Na lepsze nadzieja!

                                                    Barbara Politaj
                                                  • marijankaonline Re: Rym ...a godka 04.01.11, 09:52
                                                    Poezyjo dowo zwola?

                                                    Sianko co łosuszo słonko
                                                    Promyk co sie w wodzie tonko
                                                    Łabyńdź co przekrziwio główka
                                                    W żytku czerwono makówka
                                                    W strofy szkryfniesz toż uciecha
                                                    Przeca niy z jednego miecha
                                                    Poezyjo dowo zwola
                                                    Bestóż jom tu mocno chwola!

                                                    Barbara Politaj
                                                  • marijankaonline Re: Rym ...a godka 04.01.11, 09:55
                                                    Piernikowe serduszko

                                                    ♥_._♥_._♥_._♥_._♥_._♥_

                                                    Piernikowe serduszko
                                                    lukrym łoblywane
                                                    Dlo małyj freliczki
                                                    lepsze niż śniodanie
                                                    Słodkości za tela
                                                    we pierniku driny
                                                    Toż nasza freliczka
                                                    robi słodke miny
                                                    Pokosztuj ômeczko
                                                    Powiydz że smakuje
                                                    ôma fest nerwowo
                                                    Sznitki i szmaruje
                                                    Zjydz cosik inkszego
                                                    Niy same maszkyty
                                                    Tak se ôsprawiajom
                                                    Ze ranka kobiyty:)
                                                    ♥_._♥_._♥_._♥_._♥_._♥_
                                                    Barbara Politaj
                                                  • marijankaonline Re: Rym ...a godka 04.01.11, 09:57
                                                    Ropucha

                                                    Roztopiyrzo sie ropucha
                                                    Że mo ta nojlepszo fucha
                                                    Że jest mondro że szkolono
                                                    Że we Francji tyż cyniono

                                                    Mo dostojnych w familiji
                                                    Co w królewskim garcu byli
                                                    Ze niy łony biydok w gowie
                                                    Że z Francuzym jest po słowie

                                                    Chwoli sie tak dzionek cały
                                                    By se żabki posuchały
                                                    By i tyż pozowiściyły
                                                    No dyć te sie z trowy zmyły

                                                    Niy strowiyły już ropuchy
                                                    Wolom mieć za jodło muchy
                                                    Wolom toplać sie we stawie
                                                    Niż udować żabske pawie

                                                    Barbara Politaj
                                                  • marijankaonline Re: Rym ...a godka 04.01.11, 09:59
                                                    Słowym malowano

                                                    Bogini Ty słodko
                                                    Tak cie namaluja

                                                    Twōj piykny portret
                                                    Słowym opisuja

                                                    Oczka Twoje piykne
                                                    Jak te niyzabudki

                                                    Tak pewnikym zowiom
                                                    Te modre kwiotuszki

                                                    Włosy Twoje światłe
                                                    Jak włōka pszynicy

                                                    Słoneczko jak świyci
                                                    Złotym je uplyci

                                                    Buźka Twoja słodko
                                                    Liczko fest blade

                                                    Worgi jako ta malina
                                                    Co kajś rośnie w sadzie

                                                    Cołko Ty je szwarno
                                                    Aże dych sztrabuje

                                                    Boś Ty frelko ślōnsko
                                                    Majster Cie maluje


                                                    Barbara Politaj
                                                  • marijankaonline Re: Rym ...a godka 04.01.11, 10:01
                                                    Ślonsko asta

                                                    Ślonsko asta ze naszego stróma
                                                    Kaj korzyń głymboko we ziymi
                                                    Wiater cie niy urwie przeca
                                                    Dyć cie osłóniymy

                                                    Niy złomie cie żodyn
                                                    Bo tam naszo siyła
                                                    Tu na Ślonskij Ziymi
                                                    Żeś sie narodziyła

                                                    Stróm hyrski i czyrstwy
                                                    Dziycioł za dochtora
                                                    Łubka oklupuje
                                                    Niy trza tyż znachora

                                                    Wiosna ,lato zima
                                                    Obstojisz ... pieruny
                                                    Godkom ,prozom, wierszym
                                                    My tako zodbomy

                                                    Barbara Politaj
                                                  • marijankaonline Re: Rym ...a godka 04.01.11, 10:03
                                                    Ślimoki ptoki i kury

                                                    Dwa ślimoki fest kamraty
                                                    Ze szkorupy miały chaty
                                                    Roz na trowie sie spotkały
                                                    Hań debaty łodprawiały

                                                    Ptok cimpelek wpod im w łoko
                                                    Tyn co durś po dachu skoko
                                                    Tyn co furgo już łod rana
                                                    Zowdy budzi gryfno Ana

                                                    Wiysz kamracie że ty cimpel
                                                    Mioł kejsik na łoku pinkel?
                                                    Wiym to pieron przepadzity
                                                    Krupy zjodo łod Haźbiyty

                                                    No Haźbiytka fajno frela
                                                    Mo masorza kawalera
                                                    Łon krupnioki ciyngym robi
                                                    Bestóż tam tyn ptoszek zgobi!

                                                    Skoko jim po fynsterbrecie
                                                    Dziynnie w kuchnia kuko przecie
                                                    Kiej na placu krupy chłodzom
                                                    Wszyske ptoki jim tam szkudzom

                                                    Ech ślimoku moj kamracie
                                                    My u ptokow niy w tymacie
                                                    Niych tyn masorz żyje dugo
                                                    Ptok w szkorupa nom niy dziubo

                                                    Tak gwarzyli dzionek cały
                                                    Rogi swoje wystawiały
                                                    Z połnym brzuszkiym ptok na dachu
                                                    Toż i ślimok niy mioł strachu

                                                    Ze faflanio,ślimaczynio
                                                    Ze tyn ptok niy mo znaczynio
                                                    Pozór niywiela dowały...
                                                    Kury ich tam rozdziubały

                                                    Barbara Politaj
                                                  • marijankaonline Re: Rym ...a godka 04.01.11, 10:05
                                                    Ślonske dymby

                                                    Zaszumiały dymby stare
                                                    Na Ślonskij Ziymi
                                                    Szumiom i berajom
                                                    Eli sie coś zmiyni

                                                    Sroge hyrske stojom
                                                    Ciynia przy nich wiela
                                                    Nale co padajom
                                                    Uciechy niywiela

                                                    Markotno jim zowdy
                                                    Kej te zwady słyszom
                                                    Niy ma tam kamractwa
                                                    Dusi ciynżkom ciszom

                                                    Jakoś zowiść wielko
                                                    Wkrodo sie we dusza
                                                    Niypojynte dlo nich
                                                    Mało dangi , burza

                                                    Spominajóm starzików
                                                    Co tak Ślonsku pszali
                                                    Kiej by to widzieli
                                                    By sie gańbowali

                                                    Siednij sie pod nimi
                                                    Pogłoskej tyj łubki
                                                    Możno tyż usłyszysz
                                                    Czowieku malućki!

                                                    Barbara Politaj
                                                  • marijankaonline Re: Rym ...a godka 04.01.11, 10:06
                                                    Szyderca

                                                    Kej trefi do niego?
                                                    że serce tyż czuje
                                                    Kej trefi do niego
                                                    że tyż sie miłuje

                                                    Zgorzkniało mo dusza
                                                    a słabe ciało
                                                    Niynawiść go pasie
                                                    i wiecznie mu mało

                                                    Pasie go zło
                                                    kej inkszym wyrzondzo
                                                    Raduje zgryzota
                                                    kej wbijo żondło

                                                    Czowiek bez uczuć
                                                    bez żodnyj dobroci
                                                    Som take na świecie?
                                                    som ludzie złoci

                                                    Wycycko co dobre
                                                    we jadzie sie pławi
                                                    Gnymbi , poniżo
                                                    czy richtig bawi?

                                                    Żołosny czowieku
                                                    niy tam twoja siła
                                                    Miyj pomyślunek
                                                    dyć życie to kwila

                                                    A co zaś zrobi?
                                                    łoszkliwie wyśmieje
                                                    Doszuko feleru
                                                    jadym zaleje...

                                                    autor
                                                    Barbara Politaj
                                                  • marijankaonline Re: Rym ...a godka 04.01.11, 10:12
                                                    ZWADA PTOKA I ŚLIMOKA

                                                    Spytoł ptok ślimoka:

                                                    PTOK:

                                                    Mosz ty lebrze ptoka?
                                                    Ciyngym sie ślimaczysz
                                                    i niywiela znaczysz

                                                    Ślimok fest wkurzony
                                                    wielce rozeźlony

                                                    ŚLIMOK:

                                                    Łoj ty gupi ptoku
                                                    żol mi cie boroku
                                                    Mosz móżdżek malutki
                                                    chycisz nawet trutki

                                                    PTOK :

                                                    A ciebie zaś tympiom
                                                    Zarazo przeklynto
                                                    Zocniejszych z rodziny
                                                    jedzom w urodziny

                                                    ŚLIMOK:

                                                    Ty furgosz świyrgolisz
                                                    nad zimnym biadolisz
                                                    W fynsterbrety klupiesz
                                                    łod ludzi coś szkubiesz

                                                    PTOK:

                                                    Mie ludziska przajom
                                                    trelów mych suchajom
                                                    A ciebie sie brzidzom
                                                    kej w kartoflach widzom

                                                    ŚLIMOK:

                                                    Chytajom wos w klotka
                                                    ta waszo czelodka
                                                    Dyć żerecie puchniecie
                                                    miast lotać po świecie

                                                    PTOK :

                                                    Darymno z tobom godka
                                                    wola już ta klotka
                                                    Niźli siedzieć w biksie
                                                    w łolejowym miksie

                                                    Hań sie fest wadziyli
                                                    bez tyn dzionek cały
                                                    Kej te" za i przeciw"
                                                    w łebkach pomiyszały

                                                    Barbara Politaj
                                                  • marijankaonline Re: Rym ...a godka 04.01.11, 10:14
                                                    Zwóneczki

                                                    Cichy mroźny wieczór
                                                    Zwóneczki strzybne glingajom
                                                    Bioło jest nałokolo
                                                    Wszyske dziecka czekajom

                                                    Dzyń dzyń to Mikołaj
                                                    W rajza jedzie sonkami
                                                    Strzybno nutka w świat leci
                                                    Za lasami górami

                                                    Coroz bliży i bliży słychać
                                                    Zwóneczki przepiykne
                                                    Dziecka z noskami przi szybie
                                                    Możno zejrzom kej mignie

                                                    Wszysko narychtowane
                                                    Pierniki bombony na deczkach
                                                    Glingnoł zwóneczek we siyni
                                                    Dźwiyrza otwiyro mateczka

                                                    Ho ho ho już od proga
                                                    Piyknie Mikołaj wito
                                                    Siednij sie dobry starziku
                                                    Ku stole … kaj piernik i mlyko
                                                    Barbara Politaj
                                                  • marijankaonline Re: Rym ...a godka 04.01.11, 10:17
                                                    Zagrej mi w duszy

                                                    Zagrej mi rymie ślonski
                                                    Zagrej mi prosza we duszy
                                                    Niych lecom strofki przepiykne
                                                    Niychej serduszko sie wzruszy

                                                    Ło Ślonsku naszym kochanym
                                                    Ło stromach z przezocnom astom
                                                    Ło tym cimpelku na dachu
                                                    Ło wsiach ślonskich ło miastu

                                                    Zagrej duszo w pieśniczkach
                                                    A pośpiywomy se zowdy
                                                    Niych ucieszno muzyczka
                                                    Pleci se z rymym szykownym

                                                    Ślonsku przaja ci mocka
                                                    Czytom beranie pisorzy
                                                    Gro mi we duszy piyknie
                                                    Dyć śnik przi tymu niy zmoży

                                                    Zagrej mi w duszy wyno
                                                    Eli rzykać mi przidzie
                                                    Bonbócku tako cie prosza
                                                    Grej w radości i biydzie!

                                                    Barbara Politaj
    • marijankaonline Re: Rym ...a godka 04.01.11, 12:20
      Płaczki

      Taki malućke słone krapki
      Cisnom sie zowdy do oczka
      Kej mosz uciecha jeżeś szczyńśliwy
      I kej utropy jest mocka

      Godajom że gańba przed drugim ślimtać
      Trza kryć te płaczki w ukryciu?
      Przeca z uciechy no i ze żolu
      Tako już jest w naszym życiu

      Toż ślimtej niy duś we siebie
      Ulży Ci... żodne cygaństwo
      Kej nom to dane tak pomyślane
      Płaczkami spłukosz i chamstwo

      Kej sie wypłakosz lekcij Ci bydzie
      We duszy zaś "słonko" niy "burza"
      Dyć życie ta "żgaczka"ciyngym Ci wbijo
      Nale i tak piykne jak róża!!!

      Barbara Politaj
        • marijankaonline Re: Rym ...a godka 04.01.11, 12:25
          Przemijanie

          Starziku z siwiutkom brodom
          Kaj mosz fajfka co smyndzi
          Kaj ta starka coś godoł
          Że nad uchym ci glyndzi

          Kajście starziki poszli
          Ze tyj ławki pod lipom
          Niy ma gowy przi gowie
          Kej kwiot lipy nań sypoł

          Niy ma już ławki i lipy
          Ponoś fest zawodzała
          Parking zrobiyli na auta
          Mie w pamiyńci ostała

          Ławka starzik i starka
          Tyj lipowy przi grypie
          Beranie jak kejsik bywało
          W pamiyńci już ledwo zipie.


          Barbara Politaj
          • marijankaonline Re: Rym ...a godka 04.01.11, 12:34
            PISZESZ INACZY

            Piszesz inaczy

            Bo wiysz co to przonie

            Co targo serce

            Kej bolom skronie

            Wiysz co to słodkość

            Jeji kusików

            Kej jeji pieszczoty

            Lepsze łod lyków

            Że nieba siyngosz

            W tyj słodkij boleści

            Jeji gorki łoddych

            Twoje czoło pieści

            I szarpie Ci dusza

            Jeji łoziymbiynie

            Że to co łonczoło

            Idzie w zapomniynie

            I widzisz te płaczki

            Na tych gryfnych licach

            Piszesz inaczy

            A jo sie wycisza...


            Barbara Politaj
            • marijankaonline Re: Rym ...a godka 04.01.11, 12:50
              "Pomotlane tory"

              Pynkło cosik w moji duszy
              Czy mie kejsik coś poruszy
              Świat już wybroł swoje tory
              Niy pomogóm mu znachory

              Piniondz rzondzi, wielko sława
              A jo w sercu móm obawa
              We ta zocność , serca czyste
              Jak te wody fest przejrzyste

              Kaj tyn tor nos doprowadzi
              Dyć pragliwość ludzko wadzi
              Torowisko pomotlane
              Glajzy zdarte, połomane

              Kaj ta sztela"Snożne Serce"
              Komuś tesno do nij jeszcze?
              Kaj tyn banhóf "Piykno Dusza"
              Chca dojechać , bo jo musza!

              Barbara Politaj
              • marijankaonline Re: Rym ...a godka 04.01.11, 12:53
                Prowda

                "Tako prowda" - tak godomy
                Kej z kamratym łosprawiomy
                Uwierz prosza niy cygania
                Kaj jest prowda? Som dwa zdania

                Chocioż ciyngym mu klarujesz
                Bijesz w klota sie nerwujesz
                Łon ci powiy yno na to
                Godej prowda ta "sagato"

                Zaś na nowo to "manglujesz"
                Argumynta przeciepujesz
                Kiwo gowom ... dyć mo "ale"
                Teroz łon wylywo żale

                Suchosz myślisz tyż mo recht
                Prowda we pojstrzodku jest!

                Barbara Politaj
                • marijankaonline Re: Rym ...a godka 04.01.11, 13:02
                  Paradnica


                  Pociorki jarzymbiny
                  frelka nawlykała
                  Keta szykowno
                  na karczek wsadzała

                  Uplytła wionuszek
                  na główka wrazioła
                  Na uszkach cześnie
                  tak se paradzioła

                  Leciała nad stof
                  bo zdrzadła niy miała
                  Wszyske swoji wdziynki
                  w wodzie łoglondała

                  Nale jo je gryfno
                  pod noskym nucioła
                  Coroz bliżyj wody
                  już nóżki zmoczoła

                  Utopek tam siedzioł
                  I graby zaciyroł
                  Świdrujoncym łoczkym
                  Na wdziynki spoziyroł

                  Łoj bydziesz ty moja
                  Ty gryfno freliczko
                  Byda jo na wieki
                  głoskoł twoje liczko

                  Frelka lazła dali
                  we głymboko woda
                  Cosik przyciongało
                  Już przy karczku woda

                  Chycioł jom za keta
                  Utopek przeklynty
                  Wir na stofie wielki
                  Wciongnoł frelki wdziynki

                  I wszysko ucichło
                  Woda martwo stoji
                  Utopek łoszkliwy
                  Ze freliczkóm broji.


                  Barbara Politaj
                  • marijankaonline Re: Rym ...a godka 04.01.11, 13:05
                    PRZYSIYNGA BIESIADNIKA

                    Jo jako bywalec Ślonski Biesiady

                    Przyrzekom mieć gowa niy łod parady

                    Zjym sztyry krupnioki, żymlok , leberek

                    Jeszcze ku tymu ze zymftym oplerek

                    Byda tańcować, wywijać z frelami

                    Jo - biesiadniczka ze karlusami

                    Piwka wypija kufelków wiela

                    Kej zaczna we piontek

                    To skończa w niydziela

                    Ucieszny byda i wicym sypna

                    Na wszysko dom pozór sie nigdy niy kipna!

                    Przyrzekom tyż śpiywać ze kamratami

                    A zocne pieśniczki nagrodza brawami

                    Przyrzekom , przyrzekom toz piwko lyjcie

                    I ta BIESIADA już rozpocznijcie!


                    Barbara Politaj
                    • marijankaonline Re: Rym ...a godka 04.01.11, 13:08
                      Jodło

                      Pojydz sie bratku
                      Pojydz sie dobrze
                      Twoj żełondeczek
                      Niy jest w żałobie

                      Sznita ze tustym
                      łogorek z boncloka
                      Lepszy niż miynso
                      Z modego cieloka

                      Do tego biyrek
                      Co na przeciwko
                      Leje we szynku
                      Poczciwe chopisko

                      Na to dwa kreple
                      Trzi ajerkuchy
                      Krupniok ze wody
                      Zowcite gruchy

                      Jeszcze leberek
                      Ze świniobicio
                      Ftoś mi tu ryczy:
                      Dość już kobiyto!

                      Barbara Politaj
                      • marijankaonline Re: Rym ...a godka 04.01.11, 13:11
                        Śnik ło jesiyni

                        Piykno jesiyń mi sie śnioła
                        Łoblecono w czerwiyń, złoto
                        Kajś po polach gibko gnała
                        Dyć freliczka już niymodo

                        Hut ze liści farbowanych
                        Na gowiczce swoji miała
                        Wosy siwe, platynowe
                        Kasztanami fest ciepała

                        Babie lato rozciongała
                        Kajś miyndzy strómami
                        Wiatrym ciepłym nadmuchała
                        Sypła dymbiokami

                        Wele stawu przystanoła
                        We wodzie przejrzała
                        Rynkom machła w moja strona
                        Do lasu pognała

                        We tym piyknym mojim śniku
                        Dogonić jóm chciałach
                        Zerknóńć we te modre łoczy
                        Nale niy umiałach ...


                        Barbara politaj
                        • marijankaonline Re: Rym ...a godka 04.01.11, 13:25
                          Świynty Mikołoj

                          Szóstego grudnia
                          Tradycyjo momy
                          Na tego starzika
                          Z bajtami czekomy

                          Mo siwiutko broda
                          Mantel fest czerwony
                          Biołym pelcikym
                          Piyknie wykóńczony

                          Wielki miech na plecach
                          Niesie dobry starzik
                          Tam znojdziesz gyszynki
                          Co fto se zamarzi

                          Czelodka we chałpie
                          Kaj zwóneczki słucho
                          Ze piernikym w rynce
                          W gorke mlyko dmucho

                          Kej we chałpa wlezie
                          Na zesel se siednie
                          Niyjedyn tam bajtlik
                          Ze strachu tyż zblednie

                          Pyto ojców o dziecka
                          Czy utropa mieli
                          Kej niy - wszysko dobrze
                          Gyszynkami dzieli

                          Wierszyki , pieśniczki
                          Mikołoja radujom
                          Ze miecha gyszynki
                          Wartko wylazujom:

                          Graczki i maszkyty
                          Szaliki , galotki
                          Mycki z bombelkami
                          I gyszynk od potki

                          Żegno sie Mikołoj
                          Wons zakrynco siwy
                          Dyć go tura czeko
                          Żodyn sie niy dziwi


                          Barbara Politaj
                          • marijankaonline Re: Rym ...a godka 04.01.11, 13:28
                            SWOJSKO JESIYŃ
                            Jesień kuko nom na dworze
                            Farbowane liście leżom
                            Kaszton sypie sie ze drzewa
                            Jabka tyż we igla mierzom

                            Staro szkapa łod Ecika
                            Ciongnie wongel już na furze
                            Bamber z kartoflami stoji
                            Miech przi miechu kajś przi murze

                            Rołza z Gryjtom w nec pakujom
                            Kartofliska fest dorodne
                            Bydom tarły je na placki
                            Wszyscy w chałpie som już głodne

                            Bajtle przi klopsztandze zgobiom
                            Pukeltasze rozciepane
                            Tako jesiyń majom w zocy
                            Na fojerki umowianie

                            Łoj wesoło wszyskim zowdy
                            Dyć fojera już blynduje
                            Wuszt pieczony na patyku
                            I ze smakym ty wpucujesz


                            Barbara Politaj
                            • marijankaonline Re: Rym ...a godka 04.01.11, 13:31
                              Strzybny ksionże

                              Ciymno noc nastowo
                              Ciyń sie downo schowoł
                              Gwiozdka z nieba mrugo
                              Ło miesionczku dumo:
                              Łoj Ty moj paniczu strzybny
                              Moj Ty ksiynciu zocny gryfny
                              Za twym licym bladym wzdychom
                              W nieboskłonie Tyś pociechom
                              Ty mi ziymia pokazujesz
                              Strzybnom niciom jom malujesz
                              We łokynka ludziom świycisz
                              Tam kaj serynady lecisz
                              Niy jednymu przoniu świadkym
                              Tymu co tyż jest ukradkym
                              Niych mi Ciebie niy zabraknie
                              Bo Two gwiozdka tyż wyblaknie.

                              Barbara Politaj
                              • marijankaonline Re: Rym ...a godka 04.01.11, 13:34
                                ♥ Świonteczne jodło ♥

                                ڿڰۣڿ

                                Hazok z szekulady
                                Baran twardy z cukru
                                Zisty wyrośniynte
                                Ze polywom z lukru

                                ڿڰۣڿ

                                Jajca farbowane
                                Szynki balerony
                                Apluziny w szalach
                                Stół już łobstrojony

                                ڿڰۣڿ

                                Kaczki kury gynsi
                                W brytfannach dymfujom
                                Komporty w asjetkach
                                Już sie paradujom

                                ڿڰۣڿ

                                Na posztrzodku stoła
                                Waza z nudelzupom
                                Tarto bioło kluska
                                Micha ze kapustom

                                ڿڰۣڿ

                                Jest tyż gorzołeczka
                                Ajerkoniak winko
                                Biyrek po łobiedzie
                                Mogesz zagryź szynkom

                                ڿڰۣڿ

                                Kej to wszysko wklupniesz
                                Drzymanko Cie weźnie
                                Przetrowisz z godzina
                                Łoj w łóżku sie mierznie

                                ڿڰۣڿ

                                No i zaś łod nowa
                                Ku stole sie kludzisz
                                Szlukniesz se kawusi
                                W świynta niy marudzisz

                                ڿڰۣڿ

                                Ze wieczora dychniesz
                                Gurt popuścisz w pasie
                                Potym popieronisz
                                Że mosz manko w kasie

                                Barbara Politaj
                                • marijankaonline Re: Rym ...a godka 04.01.11, 13:37
                                  Stary górol

                                  W nadmorskim szynku
                                  kajś kole portu
                                  Kaj fale ło brzeg
                                  ciyngiym bijom
                                  Siedzioł se starzik
                                  fest siwutyńki
                                  ze swojóm górolskóm kryjóm
                                  Pykoł se fajfka
                                  popijoł piwko
                                  a łoczy z płaczków łociyroł
                                  Pod nosym cichutko
                                  nuciół se szanta
                                  lekutko takt krykóm wybijoł
                                  Stary to górol
                                  ze Tater wielgachnych
                                  do morza sie zowdy uwijoł
                                  - - -
                                  Kejsik za modu bół marynarzym
                                  I szant poznoł doś trocha
                                  Serce starzika jeszcze gorónce
                                  na morze miało cióngota
                                  Dyć życie cołkie
                                  przeżół we górach
                                  do morza ciyngym go gnało
                                  Szant ach szant
                                  tych nojmilejszych
                                  zowdy mu brakowało!


                                  Barbara Politaj
                                  • marijankaonline Re: Rym ...a godka 04.01.11, 13:41
                                    SZCZYŃŚĆ BOŻE

                                    Szczyńść Boże ludkom kochanym
                                    Szczyńść Boże światu cołkimy
                                    Miyj ty nas Boże w opiece
                                    Pytosz sie pojakymu?
                                    Bo tyla Ojcze kochany
                                    Złego sie w świecie dzieje
                                    A mie ze tego wszyskigo
                                    Ponbóczku serce dryntwieje
                                    Uchróń nas Ojcze od złego
                                    Tako ciebie proszymy
                                    Malućke dyć grzyszne ludzie
                                    W rzykaniu wiara znojdymy
                                    Szczyńść Boże!!!

                                    Barbara Politaj
                                    • marijankaonline Re: Rym ...a godka 04.01.11, 13:44
                                      SZKUDZYNIE

                                      Wielko mecyjo
                                      Miała zicherka
                                      Kiej jom łodepła
                                      Malućko frelka

                                      Pożgać freliczka
                                      Abo sie zapnońć
                                      Przebić paluszek
                                      Czy leko drapnońć

                                      Jegła z przeciwka
                                      Na to zaglondo:
                                      Gupio zicherko
                                      Tyś chyba niymondro

                                      Nożycki doś łostre
                                      Se z boku leżom
                                      Blyskajom łostrzami
                                      Jegle niy wierzom

                                      A hekynadla
                                      Ta wielko pani
                                      Krynci łebeczkiym:
                                      Dom jim po bani

                                      Nici po leku
                                      Sie łodwijajom
                                      Dyć som spokojne
                                      Frelki niy żgajom

                                      Wszyske cichtujom
                                      Czy małe paluszki
                                      Dropnom to wszysko
                                      Z babcinyj puszki

                                      Freliczka sie śmieje
                                      Bo wlazła omeczka
                                      Na talyrziku
                                      Niesie babeczka

                                      Klapła ta puszka
                                      Palcym ji grozi
                                      Wnuczusia już młoci
                                      Ze omkom sie droźni


                                      Barbara Politaj
                                      • marijankaonline Re: Rym ...a godka 04.01.11, 13:49
                                        Ałtor niyznany?

                                        Siedziołś chopie nad wierszykiym
                                        Chciołżeś żeby boł Ci lykiym
                                        Chciołś radować wszyske dusze
                                        Chciołś przegonić smutki ,burze
                                        Pisołś żeś i nocka przybroł
                                        Żeby wieszyk w świat sie wybroł
                                        Jak boł piyknie ułożony
                                        Twoj podpisik tyż złożony,
                                        Wklejołś go na jakoś zajta
                                        Twoj wysiłek... istno plajta
                                        Dyć i loto łon po świecie
                                        A kaj podpis? Niy znojdziecie.

                                        Barbara Politaj
    • marijankaonline Re: Rym ...a godka 04.01.11, 14:06
      Basia Baśka Barbóreczka

      Jak na frelka momy godać
      Barbóreczko Berblo Baśko
      Jako se to forsztelować
      By niy miała mina kwaśno?

      Toż utropa z mianym takim
      Na Barbara godać Baśka
      Możno jom mianować Berbla?
      Dyć i lepi kupcie taśka

      Frela przeca je do zgody
      Chocioż kożdy kombinuje
      Toż mianujcie jako chcecie
      Przeca se to forszteluje

      Kej od serca to ku sercu
      Kożde miano i spasuje
      Basiu ,Baśko Barbóreczko
      I poeta zarymuje:)

      Barbara Politaj
    • marijankaonline Re: Rym ...a godka 04.01.11, 14:15
      Bałwan

      Śniyżyk sypie już ôd rana
      Zasypało plac i pola
      Dziecka z tego sie radujōm
      I śpiywajōm hyjże hola.

      Rynkawiczki , szalik , mycka
      Ciepły mantlik ôblykajom
      Lecōm na dwor ze uciechom
      Markew ,wongel w kapsi majom

      Jedna kula drugo , trzecio
      Teroz trza to poukłodać
      Stoji bałwan jak panisko
      Śmiychu pisku szkoda godać

      Małe ronczki w rynkawiczkach
      Fest glajchujom bałwanisko
      Lucek wzion se za robota
      Z wonglo robi już kneflisko

      Z markwie nochol dowo Julka
      A Maryjka garniec stary
      Z mietłom leci tyż Wiktorka
      Erbła jōm od ciotki Klary

      No i fertig stoji gryfczok
      Szkli mu sie ôd mrozu gymba
      Dziecka wziyny sie za rynce
      I śpiywajōm mu kolynda

      Barbara Politaj
      • marijankaonline Re: Rym ...a godka 04.01.11, 14:17
        Klachy w necie.



        Łonacyła baba w necie
        że źle dzieje sie na świecie

        Łonacyła na to drugo
        Że to niy pociongnie dugo

        Trzecio na to łonacyła
        Ze to zowiść ludzko była

        Szworto na to tyż łonacy
        Że to mogło być inaczy


        Dyć łonacy na to pionto
        Że to przez fikcyjne konto

        Szosto z raji wlazla w godka
        że z tym łonacyniym plotka

        Siodmo chyto sie za gowa
        z łonacynio boli gowa


        A kej ósmo na to wdepła
        z łonacynio cołkym krepła


        Kej dziewionto to zejrzała
        na mszo świynto ściepa brała


        A dziesionto z łonacynia
        poszła legnońć sie do ciynia

        Na te wszyske łonacynia
        BASTA - powiedziała Gynia

        Se łonaczcie w familoku
        Wszyske bery bydom w ćmoku



        Barbara Politaj
        • marijankaonline Re: Rym ...a godka 04.01.11, 14:23
          Chwila wytchniynio

          Zrobia sie chwila wytchniynio
          Łod żalu , łod śmiychu, łod złości
          Póda jo se na łąki
          i wyprostuja se kości

          Popatrza na chmury gryfne
          Wygrzeja na słonku ciało
          Na chwila zapomna ło wszyskim
          ło tym co spać mi niy dało

          Czasym pobyć samymu
          Dobrze robi na duszy
          Dobrze popatrzeć kajś w dal
          Niych "złe" same sie kruszy

          Chwila łoddychu mi czeba
          Me bliske nawet to widzom
          Pałznij troszka kobiyto
          Tak nadymnom sie biydzom

          Posuchom tyj dobryj rady
          Łodpocznie dusza i ciało
          Potym możno i lepi
          Bydzie sie strofki szkryflało

          Barbara Politaj
          • marijankaonline Re: Rym ...a godka 04.01.11, 14:25
            Cołko mokro

            Ida pod paryzolym
            Woda sie leje z nieba
            Te trocha drotów i szmatki
            Terozki niy widza nieba

            Kałuże wielke mijom
            Szczewiki już przemoknione
            Ze tom wilgociom mecyjo
            Do dom sie wartko uwijom

            Yno jedna ulica
            I już byda przy siyni
            Ałto wjechało w kałuża
            Gichło aż w łoczach sie miyni

            Cołko mokro jak w śmiyrgus
            Mój paryzol klapuja
            Po co jo sie mynczołach
            Kiej i tak zmokłach jak kura

            Barbara Politaj
            • marijankaonline Re: Rym ...a godka 04.01.11, 14:28
              Danga - tyncza

              Po burzy , po dyszczu
              Kej słonko łoświyci
              Danga na niebje
              Łoczy Twe zachwyci
              Farbami sie miyni
              Niebo fest łozdobio
              Piykny most łod Boga
              Budowla szykowno
              Ech pospinać sie na wiyrch
              Gowom siyngnońć chmury
              Popatrzeć se na dół
              Widzieć wszyskich z góry...

              Barbara Politaj
              • marijankaonline Re: Rym ...a godka 04.01.11, 14:32
                Dlo mamy

                Mamo ,mateczko moja
                Tak mi ciynżko bez Ciebie
                Kaj ty mi uciykłaś?
                Kaj ty je kaj? w niebie?
                Zostawiołaś siyrotka
                Na tym ziymskim padole
                Serce zowdy krwawi
                Tyś głymboko w dole
                Płaczki wylywom
                Moja Ty mateczko
                Czy ty mie tyż słyszysz
                Woło Twoje dziecko
                Przaja Ci tak fest
                Że serce mi pynko
                Miyj mi Jom w łopiece
                Najświyntszo Paniynko...

                Barbara Politaj
                • marijankaonline Re: Rym ...a godka 04.01.11, 14:40
                  Gowiydź „miastowo”

                  Możno ździybko pomarudza , wiersz Wom na Jastrzymbie kludza
                  Chocioż frela jo miastowo, gowiydź znom tak mi sie zdowo
                  A poznałach jom za bajtla , teras Wom tu gibko majtna:
                  Jak jo jeszcze bajtlym była , w familoku jo se żyła
                  Grałach w guma przy chlywiku , a tam wieprzek robioł kwiku
                  Był tuściutki, różowiutki a tyn ryjok mioł gryfniutki
                  W drugi raji kurnik był, kokot tam z kurami żył
                  Pieron z niego był ognisty , zowdy dziuboł dzieci Kristy
                  Toż gospodarz sie znerwowoł , we bulionie wylondowoł
                  W inkszym zaś siedziały trusie, te króliki te łod Usie
                  Dakle duge łone miały, jedyn czorny drugi bioły
                  Pora kaczek tyż tyrało , we kałuży sie toplało
                  Pultok dreptoł łoćby paw , wszyske bajtle miały strach
                  Gulgoł łod samego rana , dyć w gowiedzi istno szpana
                  No a w doma koty psy, hamstry , ptoszki to sie wiy
                  Toż to na miastowo frela , znałach tyj gowiedzi wiela?
                  Niych łocyni komisyjo , dyć niy bydzie z tym mecyjo.

                  Barbara Politaj
                • marijankaonline Re: Rym ...a godka 17.01.11, 06:20
                  28 – styczyń 2006 MTK – Katowice

                  Wielko hala swiotłym blysko
                  Gołymbiorzy wielki zlot
                  Ludzi kludzi widowisko
                  Klotków z gołymbiami moc

                  Głośno ,gwarno naokoło
                  Gołomb grucho , gro kapela
                  Miechy z futrym , sroge sztandy
                  Ludzi sie nagarło wiela

                  Kajś na dachu ze ty hali
                  W hołdach śniegu coś cichtuje
                  Sie szpanuje ,zgrzipi ,trzasko
                  W zimnym lufcie - zło weluje

                  Gnie sie wszysko pod ciynżarym
                  Ludzie wrzeszczom , ktosik ślimto
                  Grzmotło na hala daszysko
                  Wieje wiater , wszyndy ciymno

                  Flug żałobny gołombeczków
                  Kajś nad halom prości krzidła
                  W sercu ścisko co sie stało?
                  Tragedyjo ,jankor, krziwda…

                  autor
                  Barbara Politaj

    • marijankaonline Re: Rym ...a godka 09.01.11, 09:22
      WOŚP

      Dzisioj momy wielge granie
      Dyć serduszek rozdowanie
      Gro orkestra już łod rana
      Leci piniondz w putnia , kana

      Zocny cel przyświyco tymu
      Wciep w pucinka pytosz czymu?
      Ano dlo tych chorych dzieci
      Niych gwiozdeczka im sie świyci

      Bajtlik chory, żałość biere
      Pomogejcie przyjociele
      Niy żałujcie tego grosza
      Jako oma piyknie prosza

      Niych w chorobie ulga majom
      Dyć dziecioczkom wszyscy przajom
      Serce gorke ludki miyjcie
      Wiela idzie pomogejcie!!

      Barbara Politaj
    • marijankaonline Re: Rym ...a godka 02.02.11, 08:09
      Brif do Świynty Barbary - 04. 12 .2010

      Świynto Barbaro szkryflom brif do Ciebie
      Wejrzyj na Bergmónów tam w tym wielkim niebie
      Na ciynżko robota , na grubie na dole
      Na te nasze życie , na ziemskim padole

      Wspomóż nas we wierze , w serca wlyj radości
      By była w nos siyła , mocka wytrwałości
      Uchroń łod niyszczyńcio , tych na grubie wiela
      Pobłogosłow ludków w ta piykno niedziela

      Pragnymy w dobroci iść przez nasze życie
      Jak nojmyni płaczków kere lecom skrycie
      Szkryflom z czystym sercym moja Barbóreczko
      Niychej Twoja łaska wspómoże nas deczko

      Przed twym majestatym schylom nisko gowa
      Tako żech to oblyk we te ajnfach słowa
      Niych światełko jasne na dole sie kludzi
      I nikyj niy zgaśnie dlo robotnych ludzi

      Barbara Politaj
    • broneknotgeld Re: Rym ...a godka 02.02.11, 21:33
      Alojz Lysko
      Prowda prawi
      Chnetko wszysko
      We tym jawi
      www.dziennikzachodni.pl/opinie/364088,strachy-przed-jezykiem-slaskim,id,t.html
      Ano - idzie fest ku wiośnie
      Ślonsko godka wartko rośnie.
      • marijankaonline Re: Rym ...a godka 13.06.11, 05:37
        FICINUS cd...

        Na Ficinusie z rana deptała
        Słońce parzyło gowa bolała
        Kukła w aptyka
        Przi murze kryka
        Poła pyndzyji w tyn czos udała

        Zejrzeli ciga z przodku Kubiny
        Kajś przi kwiaciarni nale niy driny
        Cosik żuchlała
        Festelnie mlaskała
        Wyloli na nia z kibla mydliny.

        Mokro koziczka deptakym śmigo
        W zymbach mo kwiotek kożdego dziwo
        Bańkami hepie
        Ze szkutow cieknie
        Na take widoki nojlepsze piwo.

        Skiż Ficinusa dostowo wyny
        Limeryk zocny z rymami driny
        Starka caubruje
        Pewnikym raduje
        Frelka ze cigom puści w maliny?


        Barbara Politaj
        • marijankaonline Re: Rym ...a godka 13.06.11, 05:39
          Torg na Wiyrku

          Ze kolaniji przyciongło ciga
          zjym olberiby zjym jako figa
          Mlasko sie ślini
          w łoczach sie miyni
          Brzyncy nad uchym łopasło fliga

          Na sztandzie gymiza na inszym bania
          dostała ciga smaku tyż na nia
          Rogami bodła
          zofcik tam znodła
          Śmiatej stond giździe fukła nań Ania

          Tukej jabuszka dali szałoty
          Hań ustrojone zielonym płoty
          Ciga : jo w raju
          piyknie we maju
          Yno tyn czowiek niy ma za złoty

          Handlyry na torgu ciga zejrzeli
          kajś przi kapuscie jynzorym mieli
          Bamber wnerwiony
          idziesz w pierony
          Na Ficinusie mosz przyj ocieli

          Markotno ciga fest rozeźlono
          depto we pola kaj trowa zielono
          Tukej podychom
          Na tyn torg kichom
          Leła sie w ciyniu rozanielono.

          Barbara Politaj
          • marijankaonline Re: Rym ...a godka 13.06.11, 05:41
            FICINUS - Dziyń Dziecka

            Na Ficinusie cwergi lotajom
            bo to Dziyń Dziecka przeca niy bajom
            Kajś przi przedszkolu
            a możno w polu
            Ciga dosiadły pieśniczki śpiywajom

            Loce se ciga z cwergami na puklu
            Na kożdym cwergu polywa z lukru
            Maszkytne ludki
            Te krasnoludki
            Kożdy mo w paci lizok ze cukru

            Wylazły bajtle piszczom z uciechy
            Na trowie leżom graczkow trzi miechy
            Ftoś ciga głasko
            inkszy zaś mlasko
            Tako sie bawiom nasze pociechy.

            Barbara Politaj
        • marijankaonline Re: Rym ...a godka 24.04.13, 09:11
          Na Dziyń Naszy Godki

          Przi Pōnbōcku Janioł siedzi
          I festelnie sie dziwuje
          Czamu mōj kochany Ôjcze
          Ślōnzok tak piyknie rymuje

          Blikōm na te ślōnske strofki
          Krzidła noszōm mie w ta eka
          Tam kaj ślōnske dusze siedzōm
          Spotkosz zocnego czowieka

          Mōj Janiele Pōnbōg prawi
          Ślōnsko godka trza spisować
          I we rymie wierszach ,prozie
          Jednym szwōngym wiyrchym dować!

          Dołżech ludkōm piykno mowa
          Sercu mymu cołkym blisko
          Tōż Ślōnzoki majōm GODAĆ
          Na tyn tymat wiysz już wszysko.

          Barbara Politaj
      • marijankaonline Re: Rym ...a godka 24.04.13, 09:14
        Zagrej we duszy

        Toż zagrej mi rymie ślōnski
        Zagrej mi prosza we duszy
        Niych lecōm strofki przepiykne
        Niychej serduszko sie wzruszy

        Ô Ślōnsku naszym kochanym
        Ô strōmach z przezocnom astōm
        Ô tym cimpelku na dachu
        I Ô wsiach ślōnskich, ô miastu

        Zagrej mi duszo w pieśniczkach
        A pośpiywomy se zowdy
        Niych ucieszno muzyczka
        Plecie ze rymym szykownym

        Ślōnsku jo przaja ci mocka
        Czytōm te bojki pisorzy
        Grajōm we duszy mi piyknie
        Dyć śnik przi tymu niy zmorzy

        Zagrej we sercuw miwyno
        Eli i rzykać zaś przidzie ?
        Pōnbōcku tako cie prosza
        Grej przi radości i biydzie!

        Barbara Politaj
    • broneknotgeld Re: Rym ...a godka 03.02.11, 17:52

      Kej godki braknie
      Braknie Ślonzoka
      www.dziennikzachodni.pl/opinie/364088,strachy-przed-jezykiem-slaskim,id,t.html
      Możno se baknie
      I straci w zokach
      We historyji bydzie wspomniyniym?
      Jako to godzić z naszym sumiyniym?
    • broneknotgeld Re: Rym ...a godka 04.02.11, 18:54

      Recht - tu godki
      niy szanujom
      katowice.gazeta.pl/katowice/1,35019,9055489,Slazacy_do_Rady_Europy__Polska_nie_dba_o_godke.html
      Jakeś klotki
      jyj fundujom
      Ślonzok w Polsce durś borokym
      Państwo kuko srogim łokym.
    • broneknotgeld Re: Rym ...a godka 04.02.11, 21:43

      Trza durś rzykać?
      Prowda boli!
      katowice.naszemiasto.pl/artykul/764290,polskie-obozy-koncentracyjne-skandaliczna-wypowiedz-kutza,id,t.htmlPolityka?!
      Pieprz do soli
      To co było już niy przidzie
      Dyć czy ślonskość w zocy bydzie?
    • broneknotgeld Re: Rym ...a godka 06.02.11, 16:32
      "Europa musi dowiedzieć się o języku śląskim?"

      Co we Opolu bydzie sie dzioło?
      www.marekplura.pl/
      Możno już potym bardzi wasoło
      Ktosik nazgobi?
      Gorzyj jyj zrobi?
      Łoj - by go lepi kajsik wywioło!
    • marijankaonline Re: Rym ...a godka 13.06.11, 05:34
      FICINUS

      Na Kubiny loce koza
      Trza by przipnońć jom do woza
      Trzymiom za rogi
      Drugi za nogi
      Niy dlo kozy tako poza

      Frela z Ficinusa
      Szukała karlusa
      Kaś na Kubiny
      Wdepła w maliny
      Karlus jom zejrzoł doł ku ni szusa

      Na Ficinus sie wybiercie
      Dobry wachtyrz jest we wercie
      Biuro tam jest
      Znoczne tyż fest
      Ze "Nowa system" wachtyrzow biercie

      Staro ślonsko kolanijo
      Rok za rokym starce mijo
      A ta gryfnieje
      Aż kokot pieje
      Chop klipsuje sie uwijo

      Promocyjo Ślonska gno
      Sie Ficinus mustrym zdo
      Industriada
      Ech parada
      Wander bydzie że ho ho.

      Na Ficinus sie wybiercie
      Na deptaku podeptejcie
      Wele płotka
      Kościoł z przodka
      Se na domki podziwejcie

      Barbara Politaj

Nie pamiętasz hasła

lub ?

 

Nie masz jeszcze konta? Zarejestruj się

Nakarm Pajacyka