Ślonsko dusza

[broneknotgeld]

Ślonzok pomiyndzy

Ślonzok pomiyndzy, dyć niy ma leko
Czy złe już było? Czy ciyngym czeko?
Ślonzok pomiyndzy - Niymcym, Polokym
Czy w przodek pódzie już herskim krokym?

Ślonzok na Ślonsku teroz myńszościom
Sie dwie nacyje podobnoś złoszczom
Iże chce yno być tym Ślonzokym
Ani niy Niymcym, ani Polokym

Pomiyndzy niymi lyźć w przod - zabawa?
Rzduchajom z lewa, rzduchajom z prawa
I zdo czasami na to czekajom
By yntka zrobioł - wcale niy bajom

Ślonzok pomiyndzy. Szczyńście? Utropa?
Ciynżko łodpedzieć, bestoż spokopia
Iże kejniykej poradzom stracić
I złym przi tymu dusza zagracić

Ślonzok pomiyndzy - jako kuplować
Czorne ze biołym - co wiyrchym dować?
Kej etniczności broniom nacyje
Pomiyndzy niymi durś tragedyje?

Ślonzok pomiyndzy - dyć szkryfna prawie
Iże terozki rośnie - na jawie!
Setki tysiyncy som GUS rachuje
To co pomiyndzy już Polska czuje

Ślonzok pomiyndzy - a we diasporze?
Wsparcio z ty strony dej doczkać Boże
Wsparcie diaspory by sie przidało
Bele ze duszy niy łodziyrało

Pomiyndzy - flance ślonskości rosnom
Zdo - przez rok cały, niy yno wiosnom
Pomiyndzy - slonskość niychej rozkwito
Czech, Niymiec, Polok ze nami wito

Wito radośnie, wito jak brata
Profit w tym przeca - niy jakoś strata
Dyć trza tyż tego coby my sami
Czuli sie richtig echt Ślonzokami!

www.facebook.com/events/543857922381211/?fref=ts

[broneknotgeld]

Jako z tom ślonskościom...?

Jako z tom ślonskościom naszom ciś do przodka?
Łostała kulawo już yno nom godka?
Co z resztom? Abfale?
Zdo - niy ma już wcale?
Co we ślonske dusze zocnego zaś potkać?

Czy samy ideji wystyknie w tym czasie?
Niypolskość we Polsce mo leżeć w marasie?
Jak pszoć ty ślonskości?
Jak ofyn ugościć?
Jako z niom podźwigać, kej dźwigać nom trza sie

Jako? -Dyć trza chalać, trza sie niom durś asić
Nic iże kto przeciw z uciechom marasi
Trza dbać by niy citła
Ciyngym w duszach kwitła
Coby jom ze Ślonska niy wywioz ktoś w tasi.

www.facebook.com/events/543857922381211/?fref=ts

[broneknotgeld]

Co ze Niymcym kupluje Poloka?
Niy chcom widzieć pomiyndzy Ślonzoka?
Spolszczyć może?
Zeniymczyć dej Boże?
Bele som niy postompioł w przod kroka?

Bele z kolan niy dźwigoł przed niymi?
Bele niy śmioł być solom ty ziymi?
Etnicznościom niy asioł?
Ślonskość w duszy swyj gasioł?
Mo amajzom być yno ty ziymi?!

www.nowiny.rybnik.pl/artykul,36824,uznanie-slaskiej-mniejszosci-jest-dla-slazakow-niebezpieczne.html

[broneknotgeld]

Co ze Niymcym kupluje Poloka?
Niy chcom widzieć pomiyndzy Ślonzoka?
Spolszczyć może?
Zeniymczyć dej Boże?
Bele som niy postompioł w przod kroka?

Bele z kolan niy dźwigoł przed niymi?
Bele niy śmioł być solom ty ziymi?
Etnicznościom niy asioł?
Ślonskość w duszy swyj gasioł?
Coś łod czasow "Hakaty" dyć wiymy

Historyjo sie czynsto dubluje?
Co wpiyrw Niymcom - Polokom sztimuje?
Jako szkryfnońć mom prości?
Dwie nacyje to złości?
Ślonsko dusza dyć niy zglajchszaltuje!

www.nowiny.rybnik.pl/artykul,36824,uznanie-slaskiej-mniejszosci-jest-dla-slazakow-niebezpieczne.html

[broneknotgeld]

Naszy godce
**
Godko - tyś była, żeś je i bydziesz
Boś dlo Ślōnzoka jak chlyb codziynny
Łōn z tobōm w życie ôd bajtla idzie
I prawie bez to dlo cudzych inny
-
Godko - żeś w duszy frelki, karlusa
Jak familijo, plac i kamraty
Dyć zowdy bydziesz serca nōm ruszać
Bez ciebie Ślōnzok zdo sie sagaty
-
Godko ty ziymi - szumisz we lesie
Przi wodzie bulkosz, ze wiatrym tyrosz
Zdo mi co wszysko cie wiyrchym niesie
Jak ślōnske słowa cuzamyn zbiyrosz
-
Godko - żech słyszoł cie uślimtano
Ktōś niy spokopiōł czamuś we zocy
Ech, jo chca z tobōm być już we rano
I bez dziyń cołki, aże do nocy
-
Z miesiōnczkym tako chciyj rzōńdzić, prawić
Morfeusz ciebie wysłucho przeca
Jak jo ci pszaja - moga wyjawić
Kej śnik, kej jawa - za tobōm leca
-
Bez ciebie niczym by ślōnskość była
Bez ciebie czowiek tukej borokym
We duszach naszych czynsto sie kryłaś
Czas jednak w przodek lyźć herskim krokym
-
Terozki prawie nōm wygryfniejesz
Kunsztym rozblyśniesz, w ćmok zablyndujesz
Tref szczyńściym darzy - sie roześmiejesz
Wiela ci pszaje - recht w tym co czujesz.

www.facebook.com/groups/332939560673928/posts/1389450825022791/

[broneknotgeld]

Na tyn 2026 rok!
__
Jo ze ty „zofy” czytōm to prawie
Coś medykuja tyż ô ty sprawie
Już na pyndzyji
Zdo – bez mecyji
Godka niych kwitnie jak śnik na jawie
__
„Lokalnymu dyskursowi wiynszuja tego, żeby przestali go dyktyrować pynzyjōniścio, co myślōm, że na zofie po Teleexpressie kludzōm bez mobliniok wielko polityka.”
www.slazag.pl/grzegorz-kulik-powiynszowania-na-nowy-rok-co-nom-latos-los-prziniesie