Gran ze sztyrma

[hanys_hans]

zobacz.slask.pl/?id=mmgran
Gran ze sztyrma
Francek Chwila

We wtorek Nyszka juz zaczynala byc nerwowo. Zas we czwortek przidom te chopy i
cos jim trza bydzie zrobic do jedzynio i do picio. Nyszka zawsze sie starala -
coby jom niy lobgodali, ze za malo narychtowala. Dyc fto wiy jak to u inkszych
w doma jest. Józek tyz sie nerwowol, ale bez to ze lon Nyszce co sztyry tydnie
to samo godol: ze mo nakroc ino trocha wusztu i logórków i to jim przeca na
cale popoledniu styknie. W szranku miol tyz jeszcze schowane dwie halby.
Styknie na tyn i moze jeszcze na nastympny czwortek.

Piyrszy prziszel Janas - kamrat Józka z roboty. Razym przed pyndzyjom robili
na grubie za maszynioków. Za nim Hanek i August. Lokrongly stól byl juz
narychtowany. Nowo tajla kort lezala na pojszczodku. Halba, sztyry kieluszki i
talyrze z wusztym i logórkami na malym szranczku kole stola. Nyszka sie tyz
prziwitala i pedziala, ze kole siódmyj zrobi jim cos na cieplo. Chopy padaly,
ze niy trza bo jak se we sztyrech ta halba wypijom to jim juz cieplo bydzie.


Siedli na stolkach. Janas, Józek i Hanek wyciongnyli drobne i rosciepali je na
stole, kozdy po swojij lewyj stronie. August piniyndzy niy wyciongnol. Józek
rosciepol karty i kozdy wyciongnol jedna. Janas nojna krojc, August olber
szel, Hanek zibna szel a Józek króla herc. Wypadlo na Józka ze piyrszy dowo.
Józek potajlowol, dol Hankowi - co siedziol z prawyj strony - przelozyc i
rozdol kozdymu po piync kort. Potym dwie na musek i zas kozdymu po piync.
Kozdy sie loglondol karty, uklodol dupki na jedna strona, farby na drugo i
myslol co by z tych kort móg tyz wyrajcowac.

Józek gibko wejrzol do muska a potym lodkryncil halba i nalol po piyrszym do
kieluszków - na dobry poczontek.
August byl na przodku tóz Janas co siedziol na przeciwko Józka zaczon: Zibcyjn
- i czekol co bydzie dalij
Hanek pedziol achcyjn
August: mom.
Cwancich - ja.
Cwajoncwancich - tyz.
Grej.

Józek dol Augustowi musek. August wejrzol i loczy mu sie zaswiycily. Wsadzil
te dwie karty w srodek swojich a inksze dwie driknyl i polozyl na stole kole
siebie.
Gran - padol.
Som se bijesz - lodpedziol mu Janas.
Tóz August wyloz - cyjnom krojc. Hanek i Janas sciepli po dwie krojcowe bibzy.
Dalij asym krojc. Hanek i Janas zas sciepli. Piyrszy achta grin, drugi olbra
krojc. Janas juz wiedziol - August jest ze sztyrma. Potym poszel as szel.
Hanek miol blankówa tóz sie zas Augustowi gymba zasmiola. Sznajder byl juz
pewny a jak sie udo to Janas z Hankym szticha niy dostanom i lostanom szwarc.
Pociongnol dalij dupkami z wiyrchu bo przeca Janas i Hanek juz wiedzieli ze
jest ze sztyrma i niy bylo co sie dekowac. Potym jeszcze dwa razy po krojcach.
Kozdymu lostala jedna karta. Janas widziol, ze Hanek sciepol trocha szelów a
potym sciepowol griny. Som miol przed lostatnim sztichym króla szel i asa
herc. Na krojcowo nojna Augusta sciepol asa herc. Teroz sie lodezwol:
- no August dowej sam tego szela.
August richtik miol na koncu nojna szel bez co Janas mog lostatni sztich
królym wzionsc. Niy bylo co liczyc kort. Janas z Hankym mieli ino jedyn sztich
bez co lostali sznajder. Gran mit fiyr szpil fynf sznajder zeks. Po dwa
szterdziesci (bo grali dwugroszowego). Kozdy musiol dac Augustowi po dwa
szterdziesci - Józek chocioz ino dowol karty tyz. Augustowi zas sie udalo bo
nigdy na poczontku piniyndzy niy wyciongol i przewaznie piyrszo gra wygrywol.
- A co tam lezalo - spytol sie Hanek.
- Nic do ciebie - lodpedziol mu August - dupek krojc i malo hercka.

Po dwóch rundach Hanek dol Janasowi kontra na grina. Janas wygrol a Józek niy
zapomniol zas poloc, bo przeca na kontra trza bylo po jednym poloc. Lod czasu
do czasu ftos komus dowol kontra ale ta jedna halba musiala styknonc.
Za kozdym razym jak Janas miol przeklodac namowiali go inksi coby przinajmnij
roz klupnyl. Janas nic niy godol ino prawom rynkom wzion do gosci pora kort,
polozyl je z lewyj strony w reszta polozyl na nich. Janas jeszcze nigdy w
zyciu przi przeklodaniu niy klupnyl. Miol swoje zasady przi szkacie.

Kole pól dziesiontyj - prawie August dowol karty - Józek pedziol: to co chopy
lod krojcdupka runda. Krojcdupka dostol Hanek bez to musieli grac jeszcze
szesc szpilów. Resztka halby rozloli przi lostatnij grze. Przed dziesiontom
policzyli piniondze, podziynkowali Nyszce za jedzynie, Józkowi za halba i
rozeszli sie do dom.
- Do nastympnego czwortku u mie - pedziol August.
Józek posprzontol ze stola a Nyszka sie spytala: i fto wygrol?
- Dzisiej my Hanka lograli, jo wygrol dwanoscie zlotych.
- To mu ale Hilda do - padala Nyszka.

Take czwortki mieli my co sztyry tydnie w doma.

[sloneczko1]

to szkat,a te karty co tam widać to dupki;)
abo sie myla?

[ballest]

Ja to som dupki po slonsku a po naszymu my tysz "unter" godali;)

[sloneczko1]

dupek krojc,dupek grin,dupek herc i dupek szel :)

[ballest]

gynau, to Ty umiysz szkata grac!

[ballest]

Suoneczko, Skat je bardzo mondrou gra, musisz duzo kombinowac, i som rozne
spiele nawet Null czy Null over, my godali nulower

[sloneczko1]

w szkole sie grywało na przerwach,ale to wieki tymu było;),ale dali u nos som
zawody szkatowe

[ballest]

wiym, grou uech roz u wos;)

[szwager_z_laband]

tysz

krojc-dupek
szel-dupek

itd

[ballest]

bouy spiele kaj se mit vier przegrywauo!

[szwager_z_laband]

mie sie ino roz udauo wszyskich ograc ze piynindzy:)

bali my jeszcze smarkate chopcy we LO, jechali my do wisuy na pora dni
zagrandzic - no i we cugu grli my we pokera - miouech nojlepszo karta a inksze
dtysz mieli super strity i wiyncyj ...#

we wisla wszyske pyiniondze bouo u mie, ale potym zech i tak musiou za
wdzyskich puacic -

[ballest]

Jou nie grou nigdy w pokera, ale w skata na pieniondze to bou uokres, zech
dziynnie grou , nawet calou noc do rana, ale zech se przez to nie wzbogaciou,
bo my grali fenika.

[szwager_z_laband]

ja jo to znom z za bajtla - jak zech szou zakanou do oumow i tantych to
widziouech jak na wieczor zawsze onkle i tante tak grali na fgyniki/grosze -

[ballest]

pamientom te brele, najlepsze bouo, ze te same kedys John Lennon nosiou!
Das war die HÖHE!;)