Powinszowania na Gody

[broneknotgeld]

Przi Wiliji

Niych moj opłatek w sieci nom leci
To co nojlepsze we duszach nieci
Przełom se z bliźnim - podej mu rynka
Życie to przeca niy zowdy mynka

Dzieciontko z nami - pomyślcie tako
Niychej we Gody wszyndy jednako
Blikej na inkszych - uwidź w nich siebie
Trza dyć niywiela by czuć sie w niebie

Boga w czowieku widzieć wystyknie
Mało iskerka - już bydzie piyknie
Toż we Wilijo Jezus jest z nami
My z Niym - nojciynży jak my som sami.

[broneknotgeld]

List do Dzieciontka 2005

List do Dzieciontka trza szkryfnońc nowy
-Co mi prziłazi teroz do gowy?
Dyć zdo sie ciyngym to samo mynczy
W stolicy fraszki trza rymow wiyncy

Niychej nom Ruda blyszczy lirykom
Choc som jo wierszy prawie niy tykom
Mie rymowanki i fraszki styknie
Już ze tym forum urośnie piyknie

Niychej nom miasto tako rozsławi
Jednych coś uczy inkszych fest bawi
Dźwigo we gora ślonsko kultura
Toż Dziecionteczko poniyś jom w chmurach.

[broneknotgeld]

Do stoła siednońć se we Wilijo
Toż se raduje fest familijo
Dzielić opłatkym przi ty wieczerzy
Szczyńście we doma - możecie wierzyć

Trza nom pod goik śpiywać kolyndy
Niychej na Ślonsku juzaś to wszyndy
Dopiyro potym gyszynki cieszom
Dziecka przi tymu wcale niy grzeszom

Jako Dzieciontko łobdarowane
Som na pamiontka tych Godow dane
Dlo familiji łod Jezusiczka
I niy dziwota - wesołe liczka.

[Gość: andy]

Niych Ci sie Bronku w życiu darzy, a Pon Bóczek niych Twoich dróg straży!

[broneknotgeld]

No i wzajymnie - Ponboczka łaski
Niych w życie wiedom jak gwiozdek blaski
To nom pisane zowdy z Godami
Przi Dziecionteczku my niy som sami.

[broneknotgeld]

Możno za rychło na tyn opłatek?
Czy to dopiyro jakby zadatek?

[broneknotgeld]

Idzie se opłatkym i na forum łomać
Bo choć wirtualny dyć weseli w doma.

[broneknotgeld]

Gody 2005

Choć przi Godach braknie naszego papiyża
Duchym z nami bydzie - w to ciyngym jo wiyrza
Łaski i Ponboczka wyprosi Łon w Niebie
I bydzie pamiyntoł przi tymu ło Ciebie.

forum.gazeta.pl/forum/71,1.html?f=28940

[broneknotgeld]

Czego winszować Wom ze Godami?
Pewnikym wiycie dobrze to sami
Dyć szkryfna tako - Serca zocnego
By bliźni zowdy trefioł do niego.

[broneknotgeld]

Ano ze wtorkym karpia winszuja
Bo som bez niego Gody mniyj czuja.

[willi2]

Po Wiliji se legna z pelnym bzuchem
owina sie cieplym kozuchem

Ślonsko Betlyjka

[broneknotgeld]

"(Narrator)
Jako z Maryjôm naszôm sie stało
Co modo frelka Syna poczyła
Niychej wiy ło tym i ziymia cało
Z Pônbôczka woli brzymiynnôm była
Toż Zefel stolorz wziôn jôm za ślubno
"Syn Dawidowy" śnik tyż mioł taki
W kerym klarowoł mu anioł rôwno;

(Anioł)
Niy som na darmo te wszyske znaki
Ty dlo Jezusa rodzicym bydziesz
Przeca żeś chopym niy belejakim
Z Immanuelym do Nieba przidziesz

(Zefel)
Toż môj aniele niych to sie stanie
Ślubnôm mi ciyngiym Maryjo czysto
A jak już przidzie jyj rozwiônzanie
Pszoć tako byda - rzecz łoczywisto

Jezusiczkowi co sie narodzi
Z cołkiych siył swojich zastômpia Pana
Tako mi słudze przijôńć se godzi
Ta wola bosko - jak yno wstana

(Narrator)
Chnet czas registru prziszoł rzymskigo
Zefel z Maryjôm już we Betlyjym
Sie spodziywajôm szczyńścio swojigo
Dyć tu ze ańclom wiela mecyji

W stajynce tako kôntek swôj majôm
Tref? – Przeznoczynie co im pisane
Świynto Familjo – choć fest sie pszajôm
Dzieciôntko w biydzie na świat wydane.

(Kacper, Melchior, Baltazar)
Toż nôm we łoczach gwiozda durś blyszczy
Do krôla drôga wskazuje
Narôd żydowski z Niym wiela zyszczy
Zdo sie – już ziymia to czuje

Arcykapłany – czy drôga znocie?
Kaj Krystus se wôm narodziôł?
Dobro nowina dlo nos już mocie?
Cud ty Judeji przigodziôł?

(Herod)
Co to za myndrce? Kogo szukajôm?
Krôlym Judeji jo tako!
Bojaźni w sercu łôni niy majôm?!
Dyć zowdy niychej jednako

Tôż tyn môj narôd mie słuchać bydzie
W utropie jako w radości
Niy?! – Dyć mu richtich z tym gorzi przidzie!
Wiela krôlewskij môm złości!

Hej – sługi moje! Myndrcôw mi dować!
Niychej łopytôm se gości
Cygaństwo abo jakosik zmowa?
Kto mie łodbiyro wielkości?!

(Narrator)
Jako rozkozoł tako sie stało
Już isnych wiedôm mu sługi
Dostojność jejich aż błyszczy cało
Dyszkurs niy bydzie za dugi.

(Kacper, Melchior, Baltazar)
Herodzie – gwiozda niy łocygani
Do krôla świata nos wiedzie
Ćmok przidzie - łoko sôm połôż na ni
Judzke Betlyjym na przedzie

W niym se dokôno co przeca musi
Tôż ziymia kwiycie wydowo
W pszoniu nojwiynkszy – grzych go niy skusi
Śmiertelny Bogym sie zdowo

Kraj twôj szczyńśliwy niych se raduje
Sôm Stwôrcy tako złôż dziynki
Uwiyrz jak tego niy forsztelujesz
Skôńczôm sie wieczne nôm mynki.

(Herod)
Toż roztomili idźcie szukejcie
Recht co to musi być cudo
A jak znojdziecie znać drapko dejcie
Bych sôm z pokłônym se udoł.

(Kacper, Melchior, Baltazar)
Panie Judeji - niychej sie stanie
Tôm samôm drogôm wrôcymy
Byś tyż môg zaczôńć te fajrowanie
Wszysko ci chnet łopowiymy

(Narrator)
Toż do Betlyjym w kôńcu ruszyli
Stajynka i żłobek znodli
Kaj już pastyrze nojpiyrwyj byli
Dzieciôntku dary pokłodli.

(Kacper, Melchior, Baltazar)
Maryjo gryfno i Zeflu zocny
Z wôs świynto już familijo
Dzieciôntko zesłoł Pôn Bôg wszechmocny
Szczyńście – niy jakoś mecyjo

Tu pokłôn Jymu my złożyć prziszli
Gwiozdka nos wiôdła do Niego
Ano żył nojprzôd we naszy myśli
Dzisioj widzymy Isnego

(Maryjo)
Myndrce ze wschodu a wpiyrw pastyrze
Dzieciôntko Boske witajôm
We żłobie dzisioj jego jest lyże
Dyć przeca wiela mu pszajôm

Zdo sie - w świat idzie dobro nowina
Ło cudzie w małyj stajynce
Boże w łopiece miyj mo Dziecina
Durś Twoje czim nad Niôm rynce.

(Zefel)
Toż dejcie dary wele Jezusa
Łodpoczońć w stajni tyż chciyjcie
Posłać w barłogu wôm jednak musza
Biyda - tu spanie se miyjcie

(Anioł)
Kacprze, Melchiorze i Baltazarze
Misyjo waszo skôńczono
Już historyjo tego niy zmaże
Co Bôg w Betlejym dokônôł

Zowrôćcie do sia – mińcie Heroda
Niy paczcie danego słowa
Bo ze tym prziszłaby wiynkszo szkoda
Choć krôl - zowistno mo gowa.

(Narrator)
Jak aniôł pedziôł tako sie stało
Myndrce już do sia wrôcajom
Heroda mynczy zaś richtich małość
- Ciyngym złe myśli ścigajôm.

A wele żłobka dali jest radość
Aż prziszôł tyn co mo piôra

(Anioł)
Coby złe tukej niy miało zadość
Zefel – se wybier za gôra
Niy yno jedna – za rzeki pola
Słônko z miesiônczkiym niych wiedzie
Anô – ci Egipt terozki chwola
Prowodź familjo na przedzie."

[broneknotgeld]

(Herod)
Kaj sôm te myndrce? Downo być mieli!
Wieść ło Dzieciôntku prziniyśli?!
Czekôm jak gupi w ty moji szteli
Możno z Judeji już wyszli!

(Sługi)
Panie - kraj ponoć przeszli po cichu
Blisko już dôma sôm łôni
Śmieli se niy boć takiygo grzychu
Dyć jako isnych nôm gonić?

(Herod)
Tôż co zrychtować? - Bajtli zabijać!
Kere łostatnio zrodzône?!
Wojoki! Trza sie za tym uwijać!
-Utropy z tym łodmiyniône!

(Wojoki)
Krôlu Herodzie twôj rozkaz srogi
My sługi tako spełniymy
Tyś jest nôm bardzij łod dzieci drogi
Żeś władcôm - to jedno wiymy

Jako rozkożesz tako sie stanie
Na nic ślimtanie i jynki
Matek w utropie głośne wołanie
Jak wolôm twojôm ich mynki

(Herod)
Ano! Dyć ze tym trôn mocny bydzie
Zicna se na niym jak piyrwyj
Deliberować ło taki biydzie
Jak styknie pedzieć mi - wyrwij!

(Narrator)
Rzeź niywiniôntek straszno nastała
W Judeji podniôs sie lamynt
Litości wola krôla niy znała
Dlo synkôw taki był amynt

Świynto familjo w Egipcie bôła
Jezus im rosnôł poleku
We Niym sie bosko wola ukrôła
Wiydz ło tym dobry człowieku

Syn Boga richtich Krystusym bydzie
We kôńcu czas łodkupiynio
Człowiek do Łojca-Stwôrcy chnet przidzie
Świat Jego pszôniym sie zmiynio

Dyć we Betlejym wszysko sie stało
Pônbôczek w Synu narodziôł
Choć ta betlyjka licho i mało
Przeca i na nia tyż zgodziôł.

[broneknotgeld]

Ze Godami chca winszować
Wiyncy Ślonska w naszy duszy
Z niym co rano w dzionek stować
Do roboty tako ruszyć

Ze Godami chca winszować
Zdrowio szczyńścio pomyślności
Mo Ponboczek łaski dować
Radość w familijoch gościć.

[Gość: Andrzej Z.]

Wykorzystali my Twoja poezyjo na stronie www.bractwo.pless.pl Bydziesz sie
gniywać.

[broneknotgeld]

Hehehe - czamu bych se mioł gniywać?
Jakby niy paczeć, to tyż noleża do Zwionzku Gornoślonskego, a szkryflom to po
to, by popularyzować to co ślonske.
No ja, wnerwio mie to, jak ktosik podbiyro te fraszki bez podanio autora abo w
intyncjach kere niy cołkym zdowajom mi sie czyste.
Toż moga yno podziynkować, a na ta zajta zarozki se zoglondna.

[broneknotgeld]

W powinszowaniu tako sie łonczom
www.bractwo.pless.pl/
Istni co przeca wcale niy "bronczom".

[Gość: Andrzej Z.]

Przeca to niy wstyd należeć do ZG, a przyznać się do członkostwa w tym
stowarzyszeniu w jego chudych latach wymago odwagi. Ciebie Bronku trudnio niy
darzyć sympatią. Myśla, że my oba niy som ani fanatykami ZG, ani wrogami innych
górnośląskich organizacji.

[broneknotgeld]

Hehe - nigdy żech se niy wstydzioł mojego stowarzyszynia, choć
poczynanio "wiyrchuszki" czasym mie wnerwiały. Jo na to pacza jakby z poziomu
Koła, kere żech swego czasu wspołtworzoł i przez czi piyrsze kadyncje dość
łostro tam działoł. Terozki zoglondom yno "roz na ruski rok" , dyć dali żech
jest członkym. Choć w porownaniu z tym co było na poczontku zdo sie jakby wiela
sie straciyło, to jednak docyniom i to co dzisioj sie w kołach dzieje.
No ja, zrobiyły sie jakby bardzi dlo pyndzyjonistow, dyć przeca i mie roki
lecom.
Jakby niy miyszali aże tako we ustawie ło pyndzyjach, to za czi lata już som
bych se tego doczkoł. No, jednak niy byda mioł tak dobrze.
Pozdrowiom świontecznie

[broneknotgeld]

"Cicho noc"

We "cichy nocy" tyż radość przeca
Niychej sie sypie z Ponboczka neca.

Godôw radosnych!

[jaborygyn]

Wšyskym, co sam na tym Forôm gűos zabjyrajôm, chćoű bych žyčyć radosnych
Godôw: coby Wôm Pônboček bűogosűawjyli, coby'śće zdrowe bôűy, coby Wôm
Dźećôntko přińôsűo pod kristbaűm take gyšynki, jake'śće se űobštalowali i coby
Wôm močka i makôwki smakowaűy latoś, jak ješče ńigdy. A na Bezrok žyča
nôm wšyskym, coby niy brahűo śyűôw do roboty nade kodyfikacyjôm ze pořytkym dlo
našy Godki i dlo wšyskich Ślônzokôw, koždymu zaś z űosobna coby śe Mu wjôdűo
jak nojlepi.

Pozdrowjôm Wos wšyskich pjykńe

Aborygyn

[broneknotgeld]

Licho stajynka

Choć licho stajynka
Dyć wiela tu idzie
Ponboczek mo Synka
Dusze niy we biydzie.

[Gość: Silesius]

Ks. Jan Twardowski



Życzenia świąteczne



Pomódlmy się w noc betlejemsklą

w Noc Szczęśliwego rozwiązania

by wszystko się nam rozplątało

węzły, konflikty, powikłania

Oby się wszystkie trudne sprawy

porozkręcały jak supełki

własne ambicje i urazy

zaczęły śmieszyć jak kukiełki



Oby w nas paskudne jędzy

pozamieniały się w owieczki

a w oczach mądre łzy stanęły

jak w choince barwnej świeczki

Niech Anioł podrze każdy dramat

aż do rozdziału ostatniego

i niech nastraszy każdy smutek

tak jak goryla niemądrego.



Aby się wszystko uprościło

było zwyczajne - proste sobie.

Aby wątpiący się się rozpłakał

na cud czekając w swej kolejce

A Matka Boska -cichych ufnych

na zawsze wzięła w swoje ręce


silesia.trella.de/artikel.0.html?&tx_ttnews[tt_news]=20&tx_ttnews[backPid]=1&cHash=f5f33715ca

[broneknotgeld]

Powitanie

Ze Wilijom powitanie
Ano - dzisioj to sie stanie
Że Dzieciontko zaś narodzi
Szczyńście tako nom przigodzi.

[broneknotgeld]

Piyrszo gwiozdka chnet na niebie
Se doczkomy Jezu Ciebie
Choć niy bydzie betlejymsko
Nom zwiostuje radość ziymsko.

[broneknotgeld]

Na pastyrka

Ze pastyrzami chnetko pódymy
Dzieciontko radośnie witać
Już narodzone - to dobrze wiymy
Niy trza nikogo sie pytać

Toż na pastyrce nom kolyndować
Nowina rozgłosić w świecie
Pszonie we sercach rozblysko z nowa
Nadzieja dowo nom Dziecie.

[broneknotgeld]

Durś we stajynce chory anielske
Choć życie zdo sie wcale niy sielske
Jednak tyż radość bo tu jest Dziecie
Myndrce już idom - forsztelujecie.

[broneknotgeld]

Przi Jerozolimie

Przi Jerozolimie Betlyjym znojdziecie
Choć małe dyć wielke naszom wiarom przecie.

[broneknotgeld]

Plac Żłobka

Ano - Betlejym to richtig serce
Tukej urzyndy i bazylika
Pokoj zdo ci sie jak na zicherce
Dyć przeca ciyngym prziłażom rzykać

Choć se świontynio twierdzom ci jawi
Toż niy dziwota - wiela przeżyła
Pont we te miejsce duszy niy zbawi
Styknie co wiara rośnie we siyła.

Na Gody

[broneknotgeld]

Przi świyntym Michale usłyszysz śpiyw ptoszka
Do Wiliji bydzie zimy yno troszka.

[broneknotgeld]

Opłatek

Czy se niym yno we Polsce dzielom?
Czy tam kaj w świecie jest Polonijo?
Choć som niy u sia dyć tyż łośmielom
Łomać opłatkym zowdy w Wilijo.

[broneknotgeld]

Pod jymiołom

Pod jymiołom wieczerzocie
Ze tym pokoj w doma mocie.

[broneknotgeld]

W noc cudow

W noc cudow i gowiydź godo jako ludzie
Kto zły do stworzynio w zogrodzie niy pódzie.

[broneknotgeld]

Bioły serwet

Bioły serwet na stole - to radość nom jawi
Że już se narodzioł tyn co świat wybawi.

[broneknotgeld]

Drzewko wiadomości dobrych jako złych
Czy pomyśleć tako to zarozki grzych?