Niyfraszka

[broneknotgeld]

Jo kilofym fraszki rombia
Ło tym głośno tukej trombia
Kynsy lecom i drobnica
A mie śmiejom sie durś lica.

[broneknotgeld]

Moj fioł

Forsa licza na biliony
Taki zy mie pomylony
Kolekcjoner co bez tydziyń
Chleba z kyjzom sie niy wstydzi
Zjodbych nawet sucho sznita
Dyć pilnuje mie kobiyta
Bych sie w foile niy zatracioł
Zdrowiym tego niy przeplacioł
Ło rodzinie durś pamiyntoł
I bez tydziyń i bez świynto
Myśla że tyż wiysz coś ło tym
Na tym dość już - reszta potym.

[broneknotgeld]

Jakby tak poszperać w głowie
To hobbystom kożdy człowiek.

[broneknotgeld]

ZABORCA ŚLONSKA
Bywoł Mieszko w Czechach na zolytach
Prziwioz sie stamtond fajno kobiyta
I choć sie musioł przez nia tyż łochrzcić
To ani myśloł za mocno pościć
Zamarzoł mu sie tłuściutki konsek
Chrapka mioł wielgo na czeski Ślonsek
A gdy Dombrowka przikryła ziymka
Do Gniezna pryndko przigruchoł Niymka
Teraz już myśloł ło nowy wojnie
Z pomocom Niymcow Ślonsk napod zbrojnie
I w końcu siłom go Czechom zabroł
Tak swego teścia po latach nabroł.

[broneknotgeld]

Zowiść

Zowiści u nos pełny wor
Rośnie to choby jaki mor.

[broneknotgeld]

Łostudka

Mało łostuda w doma je dobro
By chop durś wiedzioł kaj jego ziobro.

[broneknotgeld]

A jo żyja...

A jo żyja z politykom
Jo ty frelki niy unikom
Bo jak robia coś dlo inkszych
Toch je trocha jakby wiynkszy

Niy trza paplać ze niom wiela
Myśleć robić - no i tela
Polityka piykno to je
Take zdanie ło tym moje.

[broneknotgeld]

Prowda

Wiela we tym prowdy że lepi dwa razy
Trza pomyśleć przodzi by prowdom niy razić
Jednak richtig prowda mo być w wiynkszy cynie
Niż słodke cygaństwo co niszczy sumiynie.

[broneknotgeld]

Bajlaga

Za ańfach jom kożdy mo
Tu sie bardzi ło chlyb dbo
Przeca łona kończy życie
Na poczciwy chleba sznicie.

[broneknotgeld]

Ło rymach

U mie z rymami je ciynżko raczy
Że pisza tukej - Bozia wybaczy
Chocioż sie bawia we wierszoklety
Niy bydzie zy mie richtig poety
Dyć wymynczone te wypociny
Nawet niy bawiom moji rodziny
W rymie rymować to dlo mnie tela
Co zaharować sie we niedziela.

[broneknotgeld]

Punkt

Je punkt widzynio
Punktym siedzynio
Niy ma sumiynia
Co chce to zmiyniać.

[broneknotgeld]

Spowiydź

To je w nos tyż boske - powiym na spowiedzi
Roz dioboł roz anioł ciyngym w sercu siedzi
Jednak człowiek wyży - to pedzieć tu musza
Pon Boczek nom tyż doł przeca wolno dusza.

[broneknotgeld]

I zaś reformy

Marne to bydom reformy skutki
Jak rozum durś je przi tym za krotki
Cosik komorek ciyngym brakuje
Bestoż to wszysko nom sie sam suje.

[broneknotgeld]

Kolyjka

Stoł żech w kolyjce po bożo łaska
A Łon mi pedzioł "Ciebie dom fraszka"
Zapomnioł jednak dodać polotu
Bestoż to krynca ze siodmych potów.

[broneknotgeld]

Niy wiym czy jeszcze roz sie łodwoża
Stanońć we ta bosko raja
Z tego coch dostoł przeca durś tworza
I za to dzisioj Mu pszaja

A Tyś we fraszkach tyż przeca majster
Rymow tu ciepiesz durś mocka
To niy je ańfach niy lipny klajster
Mosz grajfka richtig w tych klockach

Zaś co do ślubny to tyż mom problym
Łona mie czynsto haltuje
Ale to jedak duch je moj dobry
Dyć przi ni fraszka sie suje.

[broneknotgeld]

Jo szukom prowdy
Zowdy.

[broneknotgeld]

Gówno - prowda

Tyj gówno - prowdy chyba nojwiyncy
To jak choroba kero nos mynczy
Zmora co w nocy durś dusi chopa
Trza kajś przegonić tako utropa.

[broneknotgeld]

Na krytyka

W szkole żech mioł marne stopnie
Bestoż krytyk mie niy kopnie
Jak mi keryś chce ubliżyć
Może przi mie sie poniżyć.

[broneknotgeld]

Te fraszki to moj nowy fioł
Kery już byda chyba durś mioł.

[broneknotgeld]

Piniondz

Piniondz jest starszy łod krześcijaństwa
Wiela tyż dzisioj znoczy dlo państwa
Jo - numizmatyk czasym sie śmieja
Bo wiym że piniondz to tyż ideja.

[broneknotgeld]

Taki kij

Dlo jednych znak krziża jest życiowom tarczom
Inszym zaś srebrniki za wiara wystarczom.

[broneknotgeld]

W kijoku tyż jest zawsze środek
Niych ło tym wiedzom stare i mode.

[broneknotgeld]

Łod kijoka lepszo kryka
Jak chce kery mocno brykać.

[broneknotgeld]

Krupy nojlepsze som na żołondek
Pieroński w trzewiach robiom porzondek.

[broneknotgeld]

Czamu?

Czamu we Niymcach godajom "Tod"
Na naszo poczciwo kostucha
Chyba żech na to terozki wpod
Ze śmiychu czimia sie brzucha

Bo jak tu szukać tyj płci we gnatach
Jak kosom macho jyj łapsko
Położ sie na nia choć stare lata
A poznosz miydnica babsko

Do dzisioj na to niy wpodli Niymce
Łod nos sie tego nauczom
Dyć to pociecha w łostatni mynce
I niych już wiyncyj niy buczom.